شبكة همس الشوق - عرض مشاركة واحدة

12 - 3 - 2014, 07:42 PM

|$[ البارت الثاني عشر الجزء الثاني ]$|

عقد الدكتور راكان حواجبه بإستغراب ..
حط ايده بهدوء على كتف انس وقال بهمس: انس ..
رفع انس راسه ولف ورى وانصدم لمن شاف انه الدكتور راكان ..
د.راكان بإهتمام: انس شفيك ..؟!
طالع انس فيه فتره بعدين اشاح بوجهه عنه وهو يقول: لا تتدخل ..
فتح باب سيارته ودخل فيها وقفل الباب وراه ..
تنهد الدكتور وهو يطالع في انس ..
د.راكان في نفسه: "السالفه جايده .. هذا اللي واضح" ..
غمض انس عيونه بألم واسند راسه عالدركسون ..
حاس صدره محروووق جدا من الخبر اللي سمعه ..
ما كان متوقع انه يسمعه ابدا ..
اصلا لسى بدري بنظره ..
بس الموت ما يعرف صغير او كبير ..
ما يعرف بدري او متأخر ..
الموت يجي فجأه على حسب ماهو مكتوب ومقدر ..
لف الدكتور راكان من قدام السياره لين وصل للباب من الجهه الثانيه ..
فتح الباب وجلس جنب انس ..
لف على انس وقال: انس بليييز قولي وش اللي فيك .. وليه هالنضره الحزينه اللي بعيونك ..؟!
رفع انس راسه وقال بدون لا يلف عليه: راكان ابعد وخلني بروحي ..
هز راسه بلا وهو يقول: ماراح ابعد .. ابي اعرف شفيك يا انس ..؟! امرك يهمني كثير وابي اعرف وش اللي مضايقك جذي ..
انس بهدوء: وقت المحاضره بدأ .. روح لا تتأخر عالطلاب ..
د.راكان: عساهم بحريقه شعلي فيهم .. المهم انت ..
لف انس على راكان وقال: انت ليه تبي تبين لي انك مهتم ..؟! تبيني انسى سالفة اختي إيمان صح ..؟! لا تحلم يا راكان .. مستحيل انسى ..
د.راكان بتأفف: ياليييل ابو لمبه .. مين ياب طاري هالسالفه اللحين ..؟!
لف انس وجهه وقال: راكان اطلع من سيارتي .. ابي اقعد بروحي فهدني لحالي ..
د.راكان: ماني مبعد .. وهذي المره الاخيره اللي اقولك فيها اني ماني مبعد ..
من بعد جملة راكان هذي قعد الجو هادي بينهم فتره من الوقت ..
تنهد راكان وقال: انس ..
انس: ................................
د.راكان: انس .. انس منو اللي مات ..؟!
انصدم انس ولف على الدكتور راكان وسأله لا شعوريا: شدراك ..؟!
د.راكان: سمعتك وانت تقول ليش بدري هي توها صغيره .. انس منو ذي اللي ماتت ..؟!
انس ما زال مصدوم يطالع في الدكتور راكان ..
شوي استوعب السالفه ولف وجهه وهو يقول: شدخلك ..؟!
د.راكان بهدوء يسأل: اختك الاء ..؟!
لف انس عليه وهو يقول بحده: فال الله ولا فالك .. هي الاخت الوحيده اللي بقت لي من بعد إيمان ..
ابعد الدكتور راكان نظره عن انس اللي كمل: إيمان اللي ماتت وتركتنا بسببك .. تتذكرها يا راكان ولا نسيتها ..؟! ياوب ..
تنهد الدكتور راكان وقال بهدوء: قضاء الله وقدره .. ما كان بإيدي شيء اسويه ..
انس بإنفعال: ججججذاب .. كان يمديك تساعدها .. كان يمديك تنقضها .. كان يمديها ترجع بخير وتعيش .. كل هذا كان ممكن بس انـــــــــت ما ساعدتها ولا حركت اصبع واحد بس ..
انخفض صوت انس وهو يكمل بألم: وركز على كلمة كان .. هذا كله في الماضي .. اللي انكسر ما يتصلح .. مهما سويت يا راكان انا مستحيل اسامحك ابدا .. مستحيل ..
حط إيده عالدركسون وطالع في إيده وهو يكمل بنفس النبره: إيمان كانت بالنسبه لي اكثر من مجرد اخت .. من يوم وانا طفل وهي تهتم فيني مع انه فرق السنوات اللي بيننا هو سنتين بس .. هي تساعدني بحل واجباتي .. هي تصحيني في كل صباح .. هي تنقذني من ابوي اذا هاوشني على خطأ سويته .. هي ترتب لي ملابسي واغراضي .. كان اعتمادي الكلي عليها .. حرام اللي سويته لنا يا راكان .. عذبتني عذاب مستحيل اخرج منه ..
اخذ الدكتور راكان نفس بعدين قال: انس .. على اي اساس انت قلت انه انا .....
قاطعه انس بإنفعال: اطلع من سيارتي يا راكان ..
طالع الدكتور راكان فيه فتره بعدين قال: منو اللي ماتت ..؟!
فتح انس فمه عشان يصرخ عليه بس سبقه الدكتور راكان يقول بتساؤل: بسمه ..؟!
فتح انس عيونه بصدمه لمن قال هالاسم ..
د.راكان: بسمه اللي ماتت صح ..؟!
نزل انس نضره لتحت وهو ما زال مصدوم ..
شوي تحولت نضراته لحزن شديد ..
ايه بسمه اللي ماتت ..
بنت عمه الوحيده ..
لحقت بأهلها اللي ماتوا قبل سنين بحادث سياره ..
بسمه اللي كانت خطيبته ..
بس اللحين صارت تحت التراب ..
<< جبت طاريها في البارت الثاني .. ماتوا اهلها فصار لازم تعيش عند عمها ابو انس بس ما يصير لأن انس مو محرم لها فقرر ابوه انه يخطبها له فصارت خطيبته .. هذا تقريبا قبل ثلاث سنوات لأن بعد فترة الخطوبه بفتره نقل انس للدوحه عشان يدرس في احد جامعاتها <<

طالع الدكتور راكان في انس وعرف من حركته ان بسمه هي اللي ماتت ..
حط ايده على كتف انس وهو يقول بهدوء: كل انسان مصيره الموت .. هذا قضاء وقدر ..
انس بهمس وألم: بس لساتها صغيره .. توها تدخل الجامعه .. لييش جذي لييييش ..
د.راكان: استغفر ربك يا انس ما يصير تقول جذي .. هذا قضاء من رب العباد .. لا تخلي الشيطان يسيطر عليك .. قول الحمد لله على كل حال وربك راح يعوضك باللي احسن منها ..
ما رد انس عليه لأنه مو قادر يتكلم بسبب الالم اللي يحسه ..
تنهد الدكتور راكان بتعب واسند ظهره عالمقعده وقال وهو سرحان يطالع في السقف: احمد ربك انك ما تعلقت فيها كثير .. يعني ألمك راح يكون اخف من ألم اللي كان عاشق وبينون .. لأنك لو تعلقت فيها اكثر وحبيتها اكثر وصار بينكم الكثير من المواقف الحلوه مستحيييل تقدر تعيش مثل الناس .. صعب .. بيكون صعب عليك تتخطى هالمرحله ..
اخذ نفس عميييق وقال: بسمه بنت وايد مؤدبه ومحترمه .. ادعي لها ان ربك يدخلها الينه .. هي محتاجه للدعاء اكثر من اي شيء ..
سرح اكثر بأفكاره وقال بهمس: وحشتيني يا إيمو ..
رفع انس راسه وطالع في الدكتور راكان ..
ابتسم الدكتور راكان وهو ما يزال يطالع في السقف وقال: كانت تكره ادلعها بإيمو .. كانت تقول اني احسسها بأنها وحده من بنات الإيمو .. دوووم تعصب وانا اعاند ..
اختفت ابتسامته وقال بألم: لو ترجع بس راح اوعدها اني ما ادلعها بهالاسم ابدا ..
اخذ نفس بعدها طالع في انس وحط ايده على كتفه وقال: زي ما قلت لك ادعي لها فهي محتاجه لدعائك كثير ..
بعدها فتح باب السياره وراح وانس يتابعه بنظراته ..
انس: اذا كنت تحبها صج فليش ما ساعدتها .. ليش ..؟! انا مو قادر افهمك .. مو قادر ..
غمض عيونه بقوه واسند ظهره عالمقعد وقال بهمس: الله يرحمكم .. ايمان وبسمه ..

================================================== ==================

في داخل احد الكلاسات الموجوده بالجامعه ..
دقت وسن لين وقالت بهمس: لين ..
لين: هممم ..
وسن: ابى اسألج سؤال صغنون مررآ ..
لين: ههه اسألي ..
وسن: وين بسام ..؟!
لين بإستغراب: منو بسام ..؟!
وسن: هاداك الولد اللي عنده حصانات ..
لين: هههههه ايه تذكرته .. بس اعجبني التعبير والوصف ههه ..
وسن بإستغراب: تعبير ووصف ..؟! اممم انا ما قريت اي قطعه .. من وين طلعتي كلمة تعبير ووصف ..؟!
هزت لين راسها وهي تقول بتسليك: المهم ليش تسألين عن بسام ..؟!
وسن: لأني الصباح ما شفتو .. وكمان شفت صاحبه بندر مع واحد تاني غير بسام .. تعرفي وينه ..؟!
لين: وانا شاللي يدريني ..؟! وكمان انتي ليه مهتمه جذي ..؟!
هزت وسن كتفها وقال: مدري .. بس هو مررآ طيب ..
تنهدت لين وقالت: عشان هالسبب بس .. والله انج فاغره ..
بوزت وسن وقالت بعصبيه: فمي مقفل مو مفتوح .. غغبيييييه ..
لين: ههههه بصراحه مو داريه مين فينا الغبي من جد ..
لفت وسن على ندى ودقتها وهي تقول: ندى شوفيلها .. تتحرش فيني ..
لين بدهشه: الله واكبر ..!! تتحرش مره وحده ..؟!!!! دانتي شطحتي لبعييد ..
ندى بتأفف: اششش خلوني انتبه مع المحاضره ..
طالعت وسن في لين وقالت: هبله .. اذا خرجنا من المحادره راح اعلم ليان عليج ..
لين بإستهبال: لا وسن بلييز اخاف ..
ضربتها وسن برجلها وهي تقول: جم مرآ اقولكم نادوني كارلوتا مو وسن ..
لين: احح حاضر عمتي .. تامرين شيء ثاني ..؟!
وسن: انا ما عندي اخو او اولاد اخو فلا تقوليلي عمه .. فاهمه ..؟!
لين: ابشري طال عمرج .. اي اوامر ثانيه ..؟!
وسن بقهر: لييين يالغبيييه لا تحاجيني جذي ..
الدكتور: وسن لين متى تسكتوا حضرتكم ..؟!
لين بإحراج: سوري ..
وسن: آسفين بس هدا كلو بسبب ليين وغبائها يا دكتور ..
لين: انا شدخلني .. وسن الباديه ..
وسن بقهر: اسمي كارلوتا يا لينووه الغبيه الكبيره ..
الدكتور: وبعدييييين ..
فهجدوا وكمل الدكتور شرح ..
كلها عشر دقايق حتى خلصت المحاضره وخرجوا من الكلاس ..
وهم بالاسياب يمشون للكافتيريا قالت ندى: وربي ان تصرفاتكم مثل البزارين ..
لين: مالبزر غير وسن ..
وسن: اسمي كارلوتا ..
لين بعناد: وسن وسن وسن وسن وسن وسن وسن وسن وسن وسن ..
وسن وهي شوي وتبكي: لين يالغبيه سكتي ..
لين: وسن وسن وسن وسن ..
وسن: غبيه اكرهج ..
لين: احسن ..
ندى: وقسم انكم اطفال .. هذا تصرف يهال مو كبار ..
لين: والله ما ادري مين الياهل فينا ..
دخلوا الكافتيريا وجلسوا على احدى الطاولات ..
ندى: ياللا يا وسن دورج ..
قامت وسن وقالت: وش تبغوا اييب لكم ..؟!
اعطتها ندى فلوس وهي تقول: ابي ببسي وبس ..
وسن: وانتي يالين وش تبغي ..؟!
لين بنفسها: "ههه مو كأنها قبل شوي قالت اكرهج .. بجد بنت مو طبيعيه" ..
اعطتها لين فلوسها وهي تقول: ابي وجبه كامله .. بس اللون ازرق ..
وسن: تيب انا كان قصدي اشتري الازرق ..
لين: طيب عادي خذي الازرق كمان ..
وسن: بس بعدين نصير زي بعض ..
لين: طيب عادي وش فيها لا صرنا مثل بعض ..؟!
وسن بتفكير: ايه صح ما فيها شيء ..
لين: وتلوموني لا قلت غبيه ..
وسن: ندى ما تبغي شيء تاني ..؟!
ندى: لا بس كافي ببسي ..
لين: تخاف عالدايت حقها لا يخرب خخخ ..
وسن: وش يعني دايت ..؟!
لين: معناته رجيم ..
وسن: آها .. حسبته يعني سفن اب ..
وراحت تشتري ..
لفت لين على ندى وهي تقول: سفن اب ..؟!! ابسألج فيه علاقه بين الاثنين ..؟!
ندى: لا ..
لين: طيب فيه تشابه اسماء عالاقل ..؟!
ندى: لا ..
هزت لين راسها بأسف وهي تقول: رفيجتنا محششه ..
اما عن وسن فكانت واقفه ورى وحده تشتري تنتظرها تخلص عشان تجي مكانها ..
بعد ما خلصت هالبنت جت وسن واعطت الفلبينيه فلوس وقالت: ابي واحد ببسي وواحد من هاديك الوجبه اللي لونها ازرق لي وكمان ابي وجبه ثانيه لونها ازرق نفس هاديك لرفيجتي ..
طالع فيها الولد اللي واقف بعدها بإستغراب ..
فأبتسم وقال في نفسه: "ما تعرف تختصر كلامها" ..
والولد هاذا اللي واقف وراها ما كان غير مهند ..
حطت الفلبينيه الطلبات عالرف الخارجي من الشباك ..
اخذت وسن وجبه بيد والوجبه الثانيه بيد ..
طالعت في الببسي وقالت: هادا كيف آخذو ..؟!
لفت ورى وشافت ان طاولة ندى ولين بعيده ..
تأففت وحطت وحده من الوجبات واخذت الببسي ..
طالعت في الوجبه الثانيه وقالت بطفش: ليييه عددهم ثلاثه اوووف ..
حط مهند إيده بجيبه وتكى نفسه على رجله اليمين يشوف كيف بتتصرف هالبنت اللي قدامه ..
نزلت وسن راسها تطالع في جسمها فأستغرب من حركتها ..
هاذي وش تبي تسوي ..؟!
رفعت وسن راسها وقالت بتأفف: خساره ما عندي إيد ثالثه ..
ابتسم مهند على حركتها الغريبه جدا ..
حطت وسن الاغراض كلها عالرف وقالت: اوووف .. لازم اقول لبابي يحط عربات عند الكافتيريا عشان نحط الاكلات عليها ..
رفع مهند حاجبه وقال في نفسه: "لا يكون هذي بنت المدير الدلوعه اللي يحكوا عنها" ..
لفت وسن وطالعت في مهند وقالت: اسفه طولت عليك .. استنى شويه عشان انادي صاحبتي تساعدني ..
ابتسم مهند وهز راسه بإيه ..
راحت وسن وفي نص الطريق رجعت ووقفت قدام مهند تطالع فيه ..
استغرب منها وقال: شفيج ..؟!
وسن وهي تأشر على حواجبه: مين ضربك هنا ..؟!
غصب عنه ضحك وقال: فعلا انتي غريبه ..
وسن: ياوب .. شكله يعور صح ..؟!
هز راسه بلا وقال: هذا جرح قديم .. لا تشيلي هم ..
هزت راسها بتفهم وبعدها راحت لندى ولين ..
وقفت عند الطاوله وقالت لين: شفيج تأخرتي ..؟!
فتحت وسن فمها بتتكلم بس تذكرت شيء ورجعت لمهند ..
وقفت قدامه وقالت بعصبيه: انت اللي ضربت لين اول صح ..؟!
عقد مهند حواجبه بإستغراب من كلامها ..
وسن: لا تنكر .. انت ضربتها اول لمن كانت تتضارب مع بيشو صديقة غيدا صح ..؟!
ما زال مهند عاقد حواجبه وهو مو متذكر ابدا ..
جت لين وهي تقول: وسن وويعووه .. يالسين ننتضرج وانتي تهرجي مع الخلق ..
وسن: انتي الويعووه .. اسمي كاروتا مو وسن ..
تأففت لين واخذت وجبتها والببسي وهي تقول: خلصينا ترى شوي وييون ليان وسارا وراح تشتري لهم انتي ..
وسن: عادي هما اثنين قد عدد إيدي ..
اخذت وجبتها وراحت ورى لين ومهند يطالع فيهم ..
هز راسه بمعنى الله يشفيهم ..
اشترى له سلاش بارد وراح عند طاولة اصحابه ..
مازن: وينك يا معود .. تأخرت وايد ..؟!
لؤي: فعلا فين رحت ..؟!
جلس مهند وما جاوب عليهم ..
احمد: ههههه تبوني اساعدكم في تلقيط ويوهكم ..؟!
مازن: ياخي ذا الآدمي دايم يكرشنا ..
لؤي: هههه فعلا .. ودوووم سرحان .. عندي فضول اعرف عن شنو يفكر ..
احمد: معاكم حق .. شوفوا مو معنا اللحين .. يالس يفكر وسرحان ..
مازن: تتوقعون في منو ..؟!
لؤي: يمكن طاح في الحب ..
احمد ومازن: ههههههههههههههههه ..
مهند في نفسه: "له ثلاث ايام غايب .. من بعد ما انتشرت الاشاعه عن الطالبه اللي اسمها اسيل ما ياء ابدا .. لهدرجه يحبها ..؟! انا اعرف طارق عدل .. مو اي بنت تدخل مزاجه وما توقعته يحب بنت بهالضروف .. راح يظل تفكيرك غريب ومحد يفهمه يا طارق" ..
وبعدها ابتسم بإستهزاء وكمل: "عايش مبسوط ومسوي علاقات بعد ولا كأنك هادم حياة اسره بكاملها .. قتلت طفولة اختي وضيعت مستقبلي ودمرت صحة امي .. صدقني جزائك بيكون عسير بس انا انتظر الوقت المناسب يا استاذ طارق" ..
طالع في السلاش حقه وقال: "لازم يكون في نفس التاريخ اللي مات فيه ابوي .. انتظرني" ..

================================================== ==================