شبكة همس الشوق - عرض مشاركة واحدة

12 - 3 - 2014, 07:48 PM

في نفس هذا الوقت من الصباح الساعه عشره وعشر ..
كان طارق في شقته واقف يطالع في شادي النايم فوق الكنبه ..
ابتسم وقال: واخيرا نام .. امس الليل كله سهران ..
ضحك وهو يتذكر لمن رجع لهم ..
كان انس متذمر وبقوه لأنه تعذب كثير مع شادي اللي مصر يطلع من الشقه ..
راح طارق لغرفته واخذ اللحاف حق السرير ..
حطه على شادي بهدوء بعدها تنهد ..
راح يروح يدور عنهم من جديد ..
مو عارف وين راحوا ابدا ..
خرج من الشقه وقفل الباب وراه بالمفتاح ..
اتجه للمصعد وانفتح قبل لا يدق الزر ..
خرجت ميار وهي بلبسها المدرسي فأبتسمت لمن شافته وقالت: اهليين طارق ..
طارق بإستغراب: الساعه عشره وربع .. بدري شلون طلعوكم ..؟!
ميار: ههههه انفجر المكيف فأخلوا المجان هههههه كان مكيف فصلنا ..
عقد طارق حواجبه وقال: ومبسوطه بعد .. المفروض تكوني بحالة رعب وخوف مو ضحك ..
ميار: ههههه فاتك شكل ابله فوزيه وهي تصرخ بخوف .. بدل ماهي تهدينا احنا اللي نهديها هههههه ..
ابتسم طارق وقال: المهم انج بخير والحمد لله عالسلامه ..
ميار: الله يسلمك ..
طارق: غريبه هالايام مختفيه .. وينج ما ييتي ادرسج ..
ميار: اولا انت ماكنت مويود يا استاذ .. صرت تطلع برى البيت كثير ..
طارق: ايه عندي اشغال وقلت لأنس يعتذر منج اذا ييتي بس انتي ما سألتي اصلا ..
ميار: لأني كنت مشغوله وايد .. ييراننا طردهم مدير العماره فأمي خلتهم عندنا فتره لين تيي اختهم .. وعشان جذي انشغلت ..
طارق: الله يعينهم .. ياللا عن اذنج وراي شغل ..
ميار بإبتسامه: اذنك معاك ..
دخل طارق المصعد وراحت ميار لشقتها ..
داخل المصعد كان طارق مستند وحاط إيده بجيبه يفكر ..
فيه شيء غلط ..
في كلام ميار شيء غريب جدا ..
شيء غريب مو قادر يفهمه ..
عقد حواجبه وردد كلامها: ييراننا طردهم مدير العماره ..!!!
فتح عيونه بصدمه وهو يقول: اخوان شادي ..؟؟!!!
ضغط بسرعه على زر الرجوع اكثر من مره ..
شوي ويخرب المصعد بس انفتح عالدور الارضي ..
ضغط طارق زر الغلق بس مو راضي ينغلق ..
خرج وطلع الدرج بسرعه ..
الدور الاول ..
الثاني ..
الثالث ..
وصل للدور الثالث وهو يتنفس بسرعه من التعب ..
راح لشقة ميار ودق الجرس ..
شوي فتحت ميار الباب واستغربت لمن شافته ..
ميار: مو قلت ان وراك شغل ..؟!
اخذ طارق نفس بعدين قال: ييرانكم عندهم اخ اسمه شادي صح ..؟!
ميار بإستغراب: ايه .. بس حالتهم اللحين سيئه لأن اخوهم ما رجع لحد الآن ..
طارق بعدم تصديق: يعني هم فعلا ..؟!
ميار: شتقصد ..؟!
طارق: ميار لا هنتي ممكن تناديهم لي ..
ميار: اوكي دقيقه ..
ودخلت عشان تناديهم ..
مرت كم دقيقه وطارق واقف ينتظرهم ..
طارق: شفيهم تأخروا ..؟!
شوي جت ام ميار ووراها اثير ووسيم ..
ام ميار: اهلييين طارق كيفك ..؟!
طارق وهو يحاول يطالع وراها: الحمدلله يا خاله .. كيفج انتي ..؟!
ام ميار: الحمد لله تمام كيف انس والاهل ان شاء الله طيبين ..؟!
عقد طارق حواجبه وهو يشوف اثير .. يحس انه قد شافها قبل كذا فقال: ايه بخير ويسلمون عليج ..
ام ميار: هههه والله انك مب معاي ..
بعدت شوي وقالت: هذي اثير واخوها وسيم بس ليه طلبت تشوفهم ..؟!
انصدم طارق وهو يطالع في وسيم ..
عرفهم .. قد وصلهم للمدرسه قبل كذا ..
قد قابل وسيم اكثر من مره ..
معقول هم عيال عمه ..؟!
وسيم: كيفك طارق ..؟!
صحي طارق من صدمته وقال: انت وسيم عمر العالي ..؟!
هز وسيم راسه وقال: ايوه ..
رفع راسه لاثير وسألها: وانتي اثير عمر العالي ..؟!
هزت اثير راسها بإيه وهي مدهوشه منه ..
كيف عرف اسمائهم وليش يعرفها ..؟!
ابتسم طارق وحط ايده على راس وسيم وهو يقول: مو قادر اصدق .. الحمد لله ..
ام ميار: ليه انت تعرفهم ..؟!
شهقت ميار وقالت بصدمه: انت اسمك طارق العالي ..؟! هل تقصد انو ....
وما كملت كلامها فأبتسم طارق وقال وهو يطالع في اثير ووسيم: ايه انا قريبهم .. اصير ولد عمهم علي ..
فتحت اثير عيونها بصدمه وهي تطالع في طارق ..
ولد عمها ..!!!! كيف ومتى ..؟؟!!!
ما عمرهم ابوهم وامهم قالوا ان عندكم قرايب ..
فشلون يكون ولد عمها ..؟!
ابتسم وسيم بفرحه وهو يقول: عندنا اعمام ..؟!! وناسسه ..
ام ميار: الحمد لله ان هالاطفال طلع لهم سند .. والله ان حالتهم تكسر الخاطر .. حتى المدير سالم حسبي الله عليه طاردهم من الشقه عشان الايجار ..
طارق بإبتسامه: اطمئني انا رجعتها لهم .. بيسكنون فيها مؤقتا لين تيي شهد وبعدين بأوديهم عن امي أأمن لهم ..
وسيم بخوف: هييه طارق ترى شادي من يوم راح للمدرسه ما رجع .. احنا خايفين عليه وايد ..
ام ميار بحزن: ايه والله ما لقيناله اثر ابدا ..
طارق: ههه اطمئنوا شادي عندي من يوم الاربعاء ..
ضحك وسيم وقال بفرحه: حلو ..
لف على اثير وقال: اثير اثير شادي ما ضاع ..
ابتسمت اثير بهدوء وهي تقول: الحمد لله ..
دقت ميار كتف طارق بدفاشه وهي تقول: اخسس يالمنقذ .. طالع شهم هاليوم ..
ضحك طارق من كلمتها لأنها ذكرته باللقب اللي يقوله شادي ..
ام ميار: الله يديم عليكم السعاده ولا يفرقكم ..
طارق: آمين ..
دخل ايده بجيبه وطلع مفتاح شقتهم وقال: ياللا ييبوا جنطكم ..
دخلت اثير لداخل ولحقتها ميار تساعدها ..
فتح طارق باب الشقه ودخل هو ووسيم ..
وسيم: واااااو بيتنا رجع ..
لف على طارق وقال: كيف رجعته ..؟!
ابتسم طارق وقال: المهم انه رجع .. بروح اييب شادي ..
خرج طارق وراح لشقته ..
فتح الباب بالمفتاح ودخل واتجه لشادي ..
دخل ايد من تحت رجله وايد من تحت رقبته وشاله بهدوء عشان ما يصحى ..
اول ما شاله ترنح بوقفته وكان بيطيح بس قدر يتماسك ..
طارق: جم وزن هالولد .. ثقيل وايد ..
راح للشقه ودخل احد الغرف وحطه عالسرير ولبسه باللحاف ..
خرج من الغرفه وكانت ميار توها طالعه بعد ما دخلت هي واثير الشنط ..
طالع طارق فيهم .. كانت اثير واقفه تطالع بالشنط وواضح عليها التوتر ..
اما وسيم فكان جالس قدام التلفزيون يتابع افلام الكرتون ..
طارق: وسيم ارجع ورى حبيبي .. مو كويس تيلس جدام التلفزيون ..
رجع كم خطوه ورى وكمل متابعه ..
لف طارق على اثير وقال: سمعي يا اثير .. انتم راح تيلسون في هالشقه على حسابي لين ترجع اختكم شهد وبعدها راح اوديكم تعيشوا عند امي .. انا عارف انكم تعبتوا كثير بحياتكم بس ان شاء الله ترتاحوا نهائيا بالخور ..
طالعت اثير فيه وقالت بعد تردد: ابوي قالي انه ما عنده اخوان .. شلون انت ولد عمي ..؟!
طالع طارق فيها فتره بعدها قال: هي قصه طويله واكيد ما خبركم عنها .. سمعي .. احنا من عائلة العالي .. عائله ذات مستوى عالي شوي .. عمي عمر اللي هو ابوكم كان اصغر اولاد يدي .. شاف امكم وحبها وطلب من يدي يخطبها له بس يدي رفض لأنها كانت فقييره وايد ويتيمة الاب وعايشه في حاره صغيره جدا .. رفض يدي بحجة انها مو من مستوانا ابدا .. عمي عمر عاند وقال ما راح اتزوج إلا هي فقال يدي اذا تزوجتها راح اتبرى منك واحرمك من الورث ولا اشوف ويهك ابد ..
طالع في اثير وكمل: ابوج رفض وراح تزوج من امج .. حرمه يدي من الورث وما اعطاه اي فلس ابدا .. عاش ابوج مع امج في بيت اهلها ومات يدي وتقسم الورث على ابوي وعمتي بس .. بعد فتره بدأ ابوي يدور على اخوه بس مات قبل لا يلقاه .. وقبل سنتين وصلنا خبر موت عمي عمر .. وقبل شهرين ونص وصلنا خبر موت امج وقدرت امي تطلع معلومات عنكم .. و ها انا الآن لقيتكم وراح تعيشوا عندنا معززين بدل العذاب اللي عشتوه .. عمتي هي الواصيه عليكم بس وكلتني انا اييبكم ..
اتجه للباب وهو يقول: هذي هي كل القصه ..
لف يطالع فيها وقال: بأترككم اللحين ترتاحوا وفي العصر بأيي اشوف احتياجاتكم ..
خرج من الشقه وقبل لا يقفل الباب سألها: اختكم شهد متى تيي ..؟!
هزت اثير كتفها وقالت: ما ادري .. آخر مره كلمتني قالت انها بتيي قريب ..
طارق: طيب هي وين تشتغل ..؟!
اثير: ما اعرف .. هي تشتغل عند واحد في قصره بس مو داريه وين مجان القصر ..
هز راسه وقال: مع السلامه ..
قفل الباب واتجه لشقتهم ..
دخل وقفل الباب وراه وهو مستغرب ..
طارق: شهد واثير وشادي ووسيم .. مو كأنه في احد ناقص .. الاوراق تقول انهم خمسه مو اربعه ..
اتجه لغرفته وهو يقول: ان شاء الله العصر اسألهم ..
انسدح عالسرير وهو حاس براحه كبيييره ..
هم وانزاح عن صدره ..
كانت على رقبته مسؤوليه كبيره والحمد لله انها تسهلت ..
غمض عيونه ونام ..