شبكة همس الشوق - عرض مشاركة واحدة

12 - 3 - 2014, 07:57 PM

الساعه تسعه وفي كلاس دانا ..
توها انتهت المحاضره وبدأ الطلاب يطلعون من الكلاس ..
لمت دانا اغراضها وهي تتنهد بعمق ..
الترم الثاني اصعب بكثيير من الاول ..
لازم تجتهد اكثر واكثر ..
لازم تضغط على نفسها عشان اخوها عادل ..
صحيح راح تتعب كثير .. بس تعبها ما يساوي ولا نقطه من الألم اللي يتألمه اخوها يوميا ..
دمعت عيونها وهي تدعي بنفسها: "يا رب اشفيه .. هذا اغلى شيء بحياتي" ..
مسحت دموعها بسرعه وعلى طول جاء في بالها راشد ..
حست بنيران في صدرها تشتعل ..
تكرهه وتبي تنتقم منه بس مو عارفه كيف ..
خرجت من الكلاس ودق جوالها بهاللحضه ..
رفعته وابتسمت لمن شافت انه رهف ..
ردت وقالت: اهليين حبيبتي رهوفه .. وحشتيني وايد ..
كان يمشي جنب دانا شاب بكلاسها ..
لف يطالع فيها وهو عاقد حواجبه من كلامها ..
حست دانا بالاحراج وابتعدت على جنب ..
رهف: وانتي اكثر .. وينج مقاطعتني ..؟! ترى انا مو منتج دينماركي .. قديمه صح خخ ..؟!
دانا بصوت منخفض: يووه يا رهف فشيله ..
رهف: شفيج ..؟!
دانا: اول ما رديت عليج كان ينبي ولد في نفس كلاسي وسمعني .. طلعت جدامه منحرفه مع اني متميزه بأني اعقل واهدأ وحده بالكلاس ..
رهف: هههههه وربي موقف محرج بجد .. طحتي ومحد سمى عليج هههه ..
دانا بقهر: هذا اللي الله حادج عليه .. تضحكين وتتشمتين ..
رهف: عيل شتبيني اقول ..؟! ابجي واقول مسجينه ربي يعينج .. ههههه يا شيخه خلينا ناخذ السالفه ضحك لأن حجينا ما راح يغير شي هههه ..
دانا: غبيه ..
رهف: من زمان .. إلا طمنيني شخبار دراستج ..؟!
تنهدت دانا وقالت: تمام بس هالترم صعب وايد ..
رهف: اجتهدي عشان تكوني الاولى عالدفعه وعلى التوالي .. والله وناسه ..
دانا: ما اتوقع ..
رهف: عيل بتكوني الاخيره ..
دانا بسرعه: فال الله ولا فالج .. بسم الله علي ..
رهف: ههه شسوي فيج انتي اللي تشائمتي من البدايه ..
دانا: المهم خلينا نغير السالفه .. شخبار الشله ..؟! عهود واسووم وريناد ..
رهف: كلهم بخير ومشتاقين لج وايد ..
دانا: والله حتى انا ..
رهف: هههه مسببين لي ازعاج يقولون قومي المحاضره اللحين تبدأ ..
دانا: وليه ما تقوميين ..؟!
رهف: ههه ودي اسحب ..
دانا: اقول قفلي الخط وروحي .. مستقبلج اهم ..
رهف: سبحان الله .. لحد الآن دافوره ..؟!! ما تتغيرين ..
دانا: هههه مع السلامه ..
رهف: لحضه دانا ..
دانا: نعم ..
سكتت رهف شوي بعدها قالت: شخبار عادل ..؟!
دانا بإبتسامه: الدكتور حقه يقول فيه تقدم حلو .. بجد مستانسه ..
رهف: الحمد لله .. ان شاء يرجع زي اول وافضل ..
دانا: ربي يسمع منج ان شاء الله ..
رهف: اوكي باي ..
دانا: باي ..
قفلت دانا جوالها واتجهت لمكان الشله ..
كان فيه يزيد وعماد وصالح ..
جلست دانا وقالت: وين ريان وسامي ..؟!
عماد: هههههه ريان في سابع نومه .. غايب ..
دانا: ليه سلامات ليش غايب ..؟!
يزيد: ههههه اطمئني هذا ما يصيبه شر ابدا .. يمكن عشانه سهر امس على فلم ونام متأخر وعشان جذي غايب ..
صالح: هههه حرام عليك ..
دانا: طيب وسامي فينه ..؟!
هز عماد كتفه وقال: مدري .. اول ما طلع من محاضرته ما ياء ..
يزيد: يقول عندي شغله بأسويها وايي ..
دانا: آها ..
جاء سامي في هالوقت وواضح على وجهه الضيقه ..
يزيد: شفيك ..؟!
سامي: ماكو شيء ..
جلس وقال في نفسه: "لها حول شهر غايبه .. وابوها مات من قبل شهر او اكثر .. هذا يعني انها انطردت من البيت من زمان" ..
عماد: عندي لكم تحدى واتحدى احد يفوز ..
طالعوا فيه يزيد وصالح ودانا اما سامي فكان مو معهم ابدا ..
يزيد: شهالتحدي اللي واضح عليه انه صعب ..؟!
عماد: اللي يفوز الاسبوع هذا كله اكله على حسابي ..
صالح: اوكي نقبل التحدي ..
عماد: اتحداكم تعرفون في شنو قاعد يفكر سامو ..؟!
لفوا كلهم ناحية سامي اللي كان عاقد حواجبه ويطالع في الارض بتفكير ..
يزيد: يمكن بنت كرشته وعشان جذي حزين ..
عدل صالح نضارته الطبيه وهو يقول: لا لا .. اهم شيء نركز عليه هو نضراته وحركة حواجبه .. نضراته فيها شوية كره على قهر .. يعني تقريبا حقد .. واضن انه حاقد على احد الدكاتره اللي يدرسوه لأن نضراته تقول جذي .. وانعقاد حواجبه يدل انه مستنكر الشيء اللي سواه الدكتور ..
عماد: خف علينا يالفيلسوف .. وانتي يا دانا ..؟!
قالت دانا وعيونها مازالت معلقه على سامي: يفكر في اسيل ..
عماد: اوكي نسأله ونشوف مين الصح فيكم ..؟!
يزيد: لحضه لحضه ما يمديني اغير اجابتي ..؟! فلسفة صالح اقنعتني .. شكله حاقد على احد مو حزين ..
عماد: مستحيل .. يمنع منعا باتا الاسترجاع في اجابتك ..
يزيد بقهر: اوكي اسألوه ..
دق عماد كتف سامي بدفاشه وهو يقول: هيييه سام ..
مسك سامي كتفه وهو يقول: آآآي لا تضرب بقوه ..
عماد بإستهزاء: يا قلبو انا آسف .. ما كان قصدي اعورك ..
اعتفست ملامح سامي وقال: غبي ..
عماد: ههههه المهم شفيك سرحان ..
سامي: مالك شغل ..
عماد: ههه والله شكلك مطرطع .. عالعموم انا مسوي تحدي عليك واللحين نبي منك الاجابه عشان نعرف مين الفائز ..؟!
سامي بإستغراب: شتقصد ..؟!
يزيد: الاخ عماد تحدانا نعرف في شنو انت تفكر وكل واحد قال توقع ونبي نعرف منك منو اللي توقعه صحيح ..؟!
سامي: انت شنو توقعت ..؟!
يزيد بقهر: ابي اغير بس عماد يقول لا ..
عماد: ههههههه توقع انك حزين لأنك بغيت تشبك وحده بس رفضتك ..
سامي: هههههههههههههه يا حليلك يا يز... اقصد زياد عشان لا تعصب علينا زي دايم ..
ضربه يزيد على راسه وهو يقول بقهر: اسكت اسكت يا شيخ .. بتيني الجلطه منك ..
مسك سامي راسه بألم وهو يقول: اللحين انا وش سويت عشان تضربني ..؟! المفروض تشكرني لأني ما غلطت زي دايم .. والله غبي ..
ضحكت الشله كلها ويزيد يطالع في سامي بعصبيه ..
يزيد: لا فيك الخير والله .. الحمد لله عدلتها في آخر لحضه ..
كمل بعصبيه: آلا خربتها في آخر لحضه .. اسمي يـــــزيــــــد سامع ولا لا ..؟! يـــــــــزيـــــــــد ..
سامي بقهر: طيب انا ما قلت شيء غلط .. كنت بأقول يزيد بس عدلتها في آخر لحضه وقلت زيا ....
وقف كلامه وهو عاقد حواجبه يستوعب كلامه ..
يزيد: ايوه كمل .. كمل يا استاذ ..
سامي: آهآ اللحين فهمت ..
ابتسم وكمل: سوري يا يززززيد ..
يزيد: ياخي لا تطول عالزاء .. احسك نحله ..
سامي بإستنكار: نحله ..؟!! اللحين شدخل النحل بسالفتنا ..؟!
يزيد: لأنك لمن تطول عالزاء يطلع صوت زي اصوات النحل ..
سامي: لا غلط .. صوت النحل جذي يكون .. ري ري ري ..
يزيد: خطأ .. جذي زززززززي ..
سامي: وشذا .. كأنه حرف انجليزي .. انا قد سمعت صوت النحله .. ررري رري وجذي ..
يزيد: اقول لا تتفلسف .. هذا صوت طياره مو نحل ..
سامي: انت اللي لا تتفلسف .. ما عمره سمع صوت نحل ومسوي فيها فاهم ..
صالح: بس يا جماعه .. قلبتوها قضيه ..
عماد: هههههههههههه قلبوا خليه ..
صالح: واللحين خلونا نرجع لسالفتنا ..
عماد: ايه صح .. ها يا سامي .. توقع يزيد صح ولا غلط ..؟!
سامي: للاسف فاشل .. اصلا محد كرشني ابدا .. وحتى لو صار ما راح احزن ابدا بس ماقد صار ..
طالعوا فيه وهم رافعين حواجبهم فقال عماد: سلكوا له سلكوا ..
صالح: اوكي .. طيب انت كنت مقهور من احد صح ..؟!
سامي: شتقصد ..؟!
صالح: نضراتك كان فيها حقد او كره فتوقعت انك حاقد على احد الدكاتره او شيء من هالقبيل ..
سامي بغرور: فاشل رقم اثنين ..
عماد: هههههه هارد لكم باجي دانا ..
دانا في نفسها: "اووف من عماد وسامي .. دايم ينادوني دانا ويحرجوني .. ابيهم زي الباجي يعاملوني كولد" ..
سامي بثقه: اكيد بتكون فاشله رقم ثلاثه ..
عماد: هههه يا رب .. ما ابي اخسر شيء من فلوسي ..
دانا: كنت تفكر بأسيل صح ..؟!
اندهش سامي وراحت علامات الثقه من وجهه ..
عماد وهو يطالع في سامي: لا بليييز قول غلط ..
يزيد: شكل ويهه يقول ان حجي عادل صج ..
سامي بنفس دهشته: شدراج ..؟!
صالح: هههههه جهز فلوسك يا عماد ..
يزيد: يب انت تحديت وعادل فاز ..
لف عماد على دانا وقال: لا اكيد دنو ما بتوافق .. ما بترضى على عماد يصرف فلوسه .. دانا انا ابي اجمع مهر لينا .. ترضيها علي ..؟!
يزيد: والله انك خسيس ..
دانا بإحراج: لا اصلا انا كنت برفض ..
طالع عماد في اصحابه وهز كتفه وهو يقول: رفضت ..
سامي: ههههههههههه والله عرفت تتصرف ..
صالح: ياخي اذا كنت مب قد التحدي لا تتحدى ..
عماد: لا لا قدها ..
طلع محفضته وهو يقول: انا اللحين بأروح واشتري لها على حسابي ..
دانا: لا لا مب لازم .. انا قلت ....
وقبل لا تكمل قاطعها عماد: شسوي .. رفضت ..
دخل محفضته بجيبه وهو يقول: المهم خلونا نغير السالفه .. شخبار دراستكم ..؟!
يزيد: عاش مصرف ..
سامي بحماس: هيه هيه شباب ..
صالح: وش فيه ..؟!
سامي: انا صرت دافور ..
عماد: دافور ..؟!!!
سامي: ايه .. قبل امس قعدت اذاكر على كتبي ثلاث ساعات كامله وطلعت بحث الدكتور راكان بنفسي وزينته وطبعته بدون لا اقول لأحد كالعاده .. والله حسيت بأحساس حلو نفس احساس صالح ودانا الدوافير ..
يزيد: طيب وشهو احساسهم اللي حسيت فيه ..؟!
سامي: مدري بس حسيت زيهم ..
يزيد: طيب شنوع الاحساس ..؟!
سامي: قلت لك مدري .. ياني نفس احساسهم وبس ..
عماد: ههههههه دلخ ما عليك شرهه ..
صالح: لا ما شاء الله صار دافور .. يكفي انه قعد ثـــــــلاث ساعات كامله .. استمر عالاقل احسن من لا شيء ..
سامي بإستنكار: لا فكني يا معود .. والله تعبت وحلفت اني ما اعيدها مرره ثانيه .. الدفرنه صعبه ..
عماد: هههههههه مستحيل يتغير ..
عدل صالح نضارته وهو يقول: معاك حق ..
طالع سامي في نضارة صالح وقال: انت ما تتعب من كثر ما تعدلها ..؟!
صالح: شنو ..؟!
يزيد: هههههه شكل مقاسها اكبر منه ..
صالح: لا لا علي تماما بس خلاص تعودت على هالحركه ..
سامي: طيب اعطني نظارتك ابي ايربها ..
عماد: اممما عاد سامي بنظاره طبيه ..!!! شلون راح يطلع شكله ..؟!
اعطاه صالح نظارته فلبسها سامي وطالع في اصحابه وقال: شرايكم في شكلي بصراحه ..؟!
يزيد: يلعن ابليسك حتى بالنظاره طالع خقه ..
انبسط سامي وهو يقول: بججد ..؟!!
عماد: لا لا طالع كشخه ورزه ..
سامي: وناسه ..
صالح: هههه شكلك واحد دافور ومؤدب ..
سامي: وانتي يا دانا شتقولين ..؟!
دانا بإحراج: حلو ..
ابتسم سامي وقال: حماس اشكالكم صغيره ومتحركه هههه ..
عماد: ههههه وش متحركه ذي بعد ..؟!
سامي: مدري .. هيه هيه شوفوا وش بأسوي ..
رفع إيده وعدل نظارته وهو يقلد صالح: يا جماعه باجي ٢٧ دقيقه وثلاث ثواني عن المحاضره واحنا باجي ما حضرنا للدرس ابدا .. بجذي راح تنزل درجاتنا ..
عماد ويزيد: هههههههههههههههههههههههههههههههههههههههههههههههههه ..
دانا غصب عنها ضحكت على طريقته المضحكه ..
ضربه صالح بقووه على ظهره وهو يقول: انا ما ابالغ قد جذي يا الغبي ..
سامي بتذمر: يوووه شفيكم بس تضربوني .. وربي اني مالي ذنب ..
سحب صالح نضارته وهو يقول: الشرهه علي معطيك نظارتي ..
سامي: عادي بأشتري احسن منها .. وبأخلي اطارها اسود مو رصاصي عشان ما تقول تقلدني ..
صالح: ياخي اشتر اللي تبغاه محد ماسكك ..
يزيد: ههههههههههههه ..
طالع سامي فيهم وقال: رجعتم لحجمكم الطبيعي ..
عماد: هههه احلف ..
سامي: ههه طيب بس باجر ..
عماد: ايه صح نسيت اسألك ..
سامي: وشو ..؟!
عماد: ليش كنت تفكر في اسيل ..؟! لا يكون مصر انها تحبك وتبي تشبكها ..؟!
تغيرت ملامح سامي شوي بعدين قالهم: اقولكم شيء وما تنصدموا ..؟!!
استغربوا من كلامه وقال يزيد: قول ..
سامي: اسيل طلعت تقرب لي ..
فغـــــــــروا فمهم من الصدمه والدهشه والذهول ..
يزيد: تقرب لك ..؟؟؟!!!!
عماد بإستنكار: مستحييل .. لقبك الراهي وهي لا فشلون تقرب لـ...
قطع كلامه فجأه بعد ما تذكر انها طلعت لقيطه ومو من عائلتها ..
انصدم اكثر وهو يقول: معقوله ..؟؟!!!
صالح: طيب هي بدون اصل فإيش دراك انها تقرب لك ..؟!
تنهد سامي وقال: لأني اعرف ابوها وهو بنفسه اعترف انه قطها وهي طفله ..!
ما زالوا في دهشتهم وصدمتهم وهم يطالعون فيه ..
يزيد: شدراك ان اسيل بنته ..؟!!
سامي: لأنها تشبهه كثير .. يكفي ان عيونها مثل عيونه ..
عماد: بس انت قلت ان ما عندك اقارب غير عم واحد ..
سامي: اسيل بنت هالعم الواحد ..
صدمـــــــــه ثانيه انصدموا بها ..
اسيل بنت عم سامي ..؟!!!

طالعت دانا في سامي وهي بصدمتها وقالت في نفسها: "بنت عمه .. اسيل تقرب له .. عشان جذي كان دووم يفكر فيها .. طيب شلون عرف وكيف ومتى" ..
تبي تعرف اجابات هالاسئله بس ما تجرأت تسأله ..
عماد: وربي صدمتنا يا سامي ..
صالح بهدوء: وليش عمك رماها ..؟! حرام ..
سامي بقهر: مدري عنه .. بس اكيد عشان سبب سافل مثله ..
استغربوا من سب سامي لعمه بس هذا يدل ان ذاك العم سيء جدا ..
يزيد: ياخي مو قادر استوعب ان ذيج البنت بنت عمك ..
سامي بإستغراب: ليش ..؟!
يزيد: ياخي صعب .. ذيج البنت اللي انت مصر تشبكها وهي تكرهك وايد مستحيل تكون بنت عمك .. مثلا شوف عماد ولينا .. من عائله وحده وواضح ان بينهم صفات مشتركه بس انت واسيل لا ..
عماد: هههه اتخيل اسيل مغزلجيه .. وربي حماس ههههه ..
رفع سامي راسه بتفكير وهو يتخيل نفسه جالس واسيل تقط جم كلمه عشان تشبكه ..
سامي: تصدق .. وربي حماس .. عشان بدل ماهي تكرشني انا اكرشها هههه ..
صالح: يبي يرد اعتباره ..
يزيد: يب معاك حق ..
طالع صالح بساعته بعدها قال: ياللا وقت محاضرتنا باجي له خمس دقايق ويبدأ ..
سامي: ههههه طيب ليه ما تحسب الثواني بعد ..
صالح: ما راح ارد عليك ..
يزيد: ههههه احسن تستاهل ..
قام عماد واخذ اغراضه هو وصالح وراحوا لمحاضرتهم ..

================================================== ==================

في الظهر وفي منزل راشد الشعلان ..
اليوم الصباح خرجت شهد من المستشفى وهي اللحين بغرفتها جالسه ..
جالسه على طرف السرير وجنبها اختها شادن تلعب ..
ما زالت في صدمتها ..
شلون فقدت نظرها ..؟!
شيء جدا صدمها ودمرها ..
نزلت دموعها على خدها بألم ..
صارت عميا .. بدون نظر .. ما تقدر تشوف شيء ..
نزلت نفسها قدام السرير وهي سانده ظهرها عليه وضامه رجلها ..
انفجرت تبكي ..
توها قدرت تستوعب كل شيء ..
كانت تبي الحريه والاستقرار ..
تبي تعيش من جديد مع اخوانها وتهتم فيهم ..
هذا هو طلبها الوحيد ..
بس للأسف هالطلب صار مستحيل ..
بكت وشهقت اكثر من مره ..
البصر هو اهم حاسه في الانسان ..
ما عاد صارت تقدر تشوف احد ..
لا اخوانها ولا الناس ولا نفسها كمان ..
ما عاد صارت تقدر تذاكر لأخوها وسيم ولا تهتم بشادن وتسويلها حليب ولا تقدر تهاوش شادي على تصرفات هي ما شافتها ..
ياليتها ماتت بيكون اهون ..
تمنت ان راشد قتلها ولا يعيشها بعذاب اكبر من العذاب اللي هي عايشته ..
تكرهه وتكرهه ولا تدري لأي حد واصله بكرهه ..
نزلت شادن عندها ودقتها وهي تقول: تهت .. ابا ماء ..
رفعت شهد راسها ودموعها تنزل على خدودها ..
اختها الصغيره عطشانه وتبي مويه ..
مدت ايدها ومسكت اختها وحضنتها وهي تبكي ..
شهد: ما اقدر يا حبيبتي ما اقدر .. ما اشوف شيء فشلون راح اميز بين العصير والمويه .. آآه يا ربي عجل بموتي .. ابي ارتاح ..
برطمت شادن بطريقه طفوليه وهي تشوف دموع اختها ..
مدت ايدها تمسح دموع شهد وهي تبكي معها ..
حضنتها شهد اكثر وهي تقول: بس يا حبيبتي بس لا تبجي ..
بس للأسف ما سكتت شادن وكملت بكي ..
غمضت شهد عيونها بألم ..
من الآن ورايح شلون راح تضبط شعر اختها وهي ما تشوف ..؟!
شلون راح تختار لها الملابس وهي ما تعرف اشكالها او الوانها ..؟!
شلون تضبط نفسها وشكلها وتختار ملابسها وهي ما تشوف ..؟!
شلون تقدر تمسك الجوال وهي ما تشوف ..؟!
شلون تقدر تمسك القلم وتكتب او تمسك الكتاب وتقرأ وهي ما تشوف ..؟!
شلون تعتني بأخوانها .. تطبخ لهم وتغسل ملابسهم وترتب البيت وهي ما تشوف ..؟!
شلون راح تمسك شهادة اخوانها وتفرح فيها وهي ما تشوف ..؟!
شلون وشلون وشلون .. يعني من الاخر شلون تكمل حياتها وهي ما تشوف ..؟!
خلاص ما تقدر تتخيل نفسها تعيش بهالوضع ..؟!
تبي تموت عشان ترتاح وفي نفس الوقت ما تبي عشان اخوانها الايتام ..؟!
ضمت شادن بقوه وهي تردد بصوت مخنوق: الله لا يسامحك .. الله لا يسامحك ..

سلبت عيوني من ايد طايشٍ ... كيف الحياة بغيرها يا للألم

أنا لا أريد سوى عيوني كي أرى ... أين الكتاب ودفتري أين القلم

مالي أرى الدنيا ظلاماً دامساً ... وأحسُ شمساً غير أني في الظلم

قد كنت في الآمالي أزهو طامحاً ... واليوم صارت كلَ آمالي عدم

قد كنت أعمل ما أريد بمفردي ... واليوم أجفو في الطريق من الحصم

والله لو أعطوا الحياة بكلها ... ثمناً لعيني أن عينيا الأهم

والله ما لي مطلبٌ إلا بأن ... تقلع عيون المجرمين مع القدم

يا أيها الطاغي كفى ما قد جرى ... لا تحرمني من كلِ النعم

لو كان عندك ذرةً فيها حياء ... أو عزةً ما كنت سفاكاً لدم

أنا لا أريد سوى عيوني كي أرى ... أين الكتاب ودفتري أين القلم

والله لو أعطوا الحياة بكلها ... ثمناً لعيني أن عينيا الأهم

في مكان آخر من هالقصر وفي غرفة راشد ..
كان جالس على مكتبه وروان واقفه وراه ..
روان: راشد انا اتحجى من جد ما اتغشمر ..
راشد بهدوء: روان طلعي برى ..
روان بصراخ: مانـــي طالعـــه ..
مشيت ووقفت قدامه وقالت بقهر: حرام عليك وربي حرام .. انت ما عندك ضمير يأنبك .. البنت ما صارت تشوف .. عارف شنو يعني ما صارت تشوف .. صارت عميـــا وانت السبب يا راششد .. المفروض تعالجها او تعطيها عيونك كتعويض ..
راشد بإستنكار: شنو ..؟!!
روان بصراخ ودموعها تنزل: انت السبب وما عندك حجه تبرر نفسك فيها .. ششلون تبيها تعييش وترعى اخوانها الصغار وهي عميا .. انت قاسي بس ما توقعتك لهدرجه ..
راشد بعصبيه: روان جم مره اقولج لا تتدخلي في شهد او تدا.....
قاطعته روان وهي تبكي: جـــب يا راشد لا تتحجي جذي .. المفروض تكون نادم او تنهار من الشيء اللي سويته بس انت زي الحجر ما تحس .. اكرهك يا راشد .. ليتني مت ولا اشوفك جذي بدون مشاعر ..
طالع راشد فيها بهدوء تام ..
مسحت روان دموعها وهي تشاهق بعدها قالت: انا بأسافر معها وما علي منك ابدا .. لأني ما ابيك تكون اخوي ..
خرجت وصفقت الباب وراها بقوه ..
حط راشد راسه بين إيده وهو يقول: يالله ليش الامور وصلحت لذا الحد ..؟! انا ما قصدت اخليها تفقد نضرها بس انا حر .. اعالجها وقت ما ابي .. ما احب احد يجبرني ..
تنهد وكمل: بس ذي روان .. اتمنى الموت ولا اسمعها تنتطق هالكلمه .. ما ابيها تكرهني ..
حاس نفسه مشوش ..
صحيح ندم انه ضرب شهد في ذيك اللحضه بس حتى لو ندم هي بنضره تستاهل ..
يكره احد يستغفله بذي الطريقه ويهرب ..
هذا بالنسبه له جزائها لأنه فكرت تشرد ..
وفي نفس الوقت يحس نفسه قاسي ان ما عالجها ..
كان يبي يخليها جم شهر عشان يأدبها بس ....
بس للأسف شكله راح يضطر يسافر عشان خاطر اخته ..

.................................................. ....................

كانت روان واقفه عند باب غرفة شهد وهي تطالع فيها ..
حاطه إيدها على فمها تمنع شهقاتها تطلع ..
روان في نفسها: "حرام عليك يا راشد حرام" ..
اخذت نفس عمييق عشان تختفي عبرتها بعدها دقت الباب ..
رفعت شهد راسها تجاه الباب وقالت: منو ..؟!
روان وهي تحاول تعدل صوتها: اححم .. انا روان ..
لفت شادن ولمن شافت روان ضحكت ..
شهد بهدوء: شتبين ..؟! اكيد يايه تبرري اللي سواه اخوج صح ..؟!
تقدمت روان وجلست قدامها وقالت بصوت واضح فيه العبره: لا شهد وربي مو يايه ابرر له .. اللي سواه شيء كبير وما يتبرر ..
دفنت شهد راسها بإيدها وقالت: عيل ليه يايه ..؟!
اخذت روان نفس بعدها قالت: شهد .. شرايج نسافر برى عشان تتعالجين ..؟!
رفعت شهد راسها وفي وجهها علامات الدهشه ..
شهد: اتعالج ..؟!!!
هزت روان راسها وهي تقول: في الخارج عندهم آلات وخبرات اعلى بكثير من هني .. ان شاء لله يقدروا يرجعون لج نضرج ..
شهد بألم: يعني مو متأكده بأني راح ارجع اشوف .. شكرا مابي اتعبج .. خليني بروحي ..
دخل راشد في هاللحضه وقال وهو متكتف: هذا يزاتها تهتم لأمرج ..!! صج انج ....
وما كمل كلامه ابدا ..
الصدمه اوقفت لسانه وهو يطالع في شادن ..
تحولت ملامحه للعصبيه وهو يقول بعدم تصديق: بزر كمان .. اخوانج ما يخلصون ..؟!! انتي ما تتوبين ..؟! ما زلتي تعاندين وتييبين اخوانج واحد ورى الثاني ..!!
لف حواليه وهو يقول: اكيد في واحد بعد متخبي صح ..
سكتت شهد وما ردت عليه ..
طالعت روان في راشد وقالت: ياللا مد إيدك واضرب هالطفله زي ما تسوي دايم ..
طالع في روان وقال: شهد المفروض تنضرب مو هالطفله ..
رفعت روان حواجبها بدهشه .. مستحييل يتوب ..
قامت شادن ومشيت بخطوات طفوليه وسحبت بنطلون راشد وهي تقول: دب .. ابا ماء ..
رجع راشد خطوه لورى وهو يقول بإستنكار: شنو ..؟! دب ..؟!! حتى هالبزره تبي تسميني دب متغطرس مثل اخوانها ..!!!
وطالع فيها بقهر وعصبيه وهي تطالع فيه بمنتهى البراءه ..
خافت شهد لمن سمعت كلامه وحركت إيدها جنبها تدور على شادن ..
شهد بصدمه في نفسها: "لا يكون راحت له" ..
قامت روان واخذت شادن وجلستها جنب شهد ..
اول ما حست فيها شهد سحبتها لحضنها ..
لفت روان وطالعت في راشد وقالت: ليش ياي ..؟!
تنهد راشد وقال وهو ما يزال يطالع في شادن: ابي اقولكم شيء .. انا طالع احجز لنا طياره على بريطانيا ..
فرحت روان من قلبها وقالت: صج ..؟؟!!
هز راسه وعلامات عدم الرضا واضحه على وجهه ..
شهد بصوت مخنوق: ما ابي منك شيء غير اني اطلع من هني وتهدني بحالي ..
راشد بحده: غصب عنج تسافرين .. ما عندي خدم يتشرطون ويرفضون اوامري ..
روان: راشد احجز اربع عشان شادن بتروح بعد ..
راشد: منو شادن ذي بعد ..؟!
اشرت روان على شادن وقالت: ذي ..؟!
راشد بصدمه: شنو ..؟!! شتبي ذي بعد ..؟!
طالعت روان فيه بنضرات ثابته فقال راشد بدون نفس: اوووف منكم ..
وطلع برى ..
جلست روان قدام شهد وقالت بإبتسامه: ان شاء الله جريب بنسافر كلنا .. وراح يرجع نظرج بأذن الله ..
نزلت دموع شهد وهي تقول: مابي ابي اخواني يا روان .. هم محتايين لي وايد ..
روان: شهد اذا تحبيهم لا تروحي .. راح يتألموا ان شافوج جذي .. راح تضايقي خلقهم .. اوعدج اتصل عليهم واطمئن قبل لا نسافر .. اوكي ..؟!
سكتت شهد فتره طويله وما ردت ..
قامت روان وقالت: ياللا بأتركج لحالج اللحين ..
شهد: روان ..
روان: نعم ..
شهد: تقدري تيبي لشادن ماي ..؟!
روان بإبتسامه: اكيد ..
وخرجت من الغرفه عشان تجيب لشادن مويه ..
اما راشد لمن خرجت روان كلمها عشان تجيب جواز السفر من شهد واوراق ثانيه عشان يقدر يحجز لهم ..