شبكة همس الشوق - عرض مشاركة واحدة

12 - 3 - 2014, 08:07 PM

في صباح يوم الاثنين ..
كانت واقفه قدام المرايه تلقي نظره على ملابسها ..
بنطلون رصاصي فاتح على تيشيرت سماوي واسع عليها ..
هذا هو نوعية لبسها اللي دايم .. بنطلون وتيشيرت واسع ..
اخذت ساعتها ولبستها وبعدها لبست كم اسواره بألوان مختلفه ..
طاح نظرها على سلسال بأشارة الإنفنيتي ∞..
طالعت في السلسال فتره بعدين اخذته ولبسته ..
خرجت من الغرفه وراحت للمغسله القريبه لها ..
كان عالمغسله جل آرمادا حقها ..
اخذت منه شوي وبدأت تجلجل شعرها الناري القصير ..
كل هذا تسويه وهي سرحانه تفكر ..
كلام اهلها من ذاك الوقت يتردد في مخها ..

" طالعت غيدا فيهم بصدمه وقال: فيه واحد خطبني ..؟!
تنهدت الام وقالت: ايه وولد حلال ما يعيبه شيء ..
الاب: بصراحه الولد قمه في الاخلاق وانا معجب فيه بشده وراح يزوروننا يوم الاثنين و.... "

رمت غيدا الجل في المغسله بقهر وقالت: يخسون والله ما اتزوج لو ايش ما يصير ..
راحت لغرفتها وهالجمله تتردد في مخها ..
" وراح يزوروننا يوم الاثنين "

دخلت وصفقت الباب وراها وهي حدها متنرفزه ..
لبست جزمتها سبورت سماوي واخذت جوالها ومحفضتها وحطته في الشنطه ..
نزلت وراحت لغرفة الاكل ..
حطت شنطتها على جنب وجلست تفطر من دون لا تسلم على احد ..
محسن: السلام لله ..
طالعت فيه وقالت بحده: انطم ..
محسن في نفسه: "شرسه .. اكيد عشان سالفة الخاطب اللي بيي اليوم" ..
طالع الاب في غيدا وقال: فكرتي بالموضوع ..؟!
انفلت اعصاب غيدا وهي تقول: للمره المليون لاا .. مستحيل اتزوج مسستحيل .. فاهمين شنو يعني مستحيل ..؟! جم مره اقولكم سكروا على هالسالفه ولا تفتحوها ابد ..
الام بحده: غيدا احترمي اللي جدامج ..
غيدا بعصبيه: ماني محترمه احد .. مابي .. قلت لكم مابي اتزوج .. ابي اموت وانا جذي من غير زواج .. انا بويه وراح اظل بويه وماني متزوجه مهما كانت الاسباب ..
عصبت الام وجت بترد بس الاب وقفها بإشاره من ايده فسكتت ..
طالع الاب في غيدا وقال بهدوء: من يوم وانتوا صغار ما كنت احب اجبركم على شيء ابدا .. هذي طبيعتي وما اقدر اغيرها .. وسالفة انج بويه هذي انا مو راضي عنها ابدا .. كلمتج السنه اللي طافت بس رفضتي فما حبيت اجبرج على انج تتركي هالتشبه .. وزي ماقلت هذي طبيعتي من يوم وانا طفل ..
سكت شوي بعدين كمل: بس لكل شيء حد يا غيدا .. البنت راح تظل بنت ومصيرها تتزوج .. والشاب اللي بيي اليوم ويخطبج ولد ناس ومافي شيء يعيبه .. يمكن عنده عيب واحد بس المواصفات الثانيه تغطي على هالعيب ..
غيدا: لا تغصبوني على شيء انا ما ابيه .. ترى قسم بالله اهج من البيت واترككم ..
الام بعصبيه: اقص ريلج فاهمه ..؟!
الاب: غيدا السالفه منتهيه وخلاص .. ابو الشاب هو رئيسي في الشغل واتفقنا انا وياه على كل شيء ..
غيدا بصدمه: وافقت من دون لا تاخذ رايي ..؟! وافقت عشانه رئيسك بالشغل ..؟! يعني السالفه مصلحه ها ..؟!
الام: الوقت راح فروحي الجامعه وارجعي بدري عشان يمديج تشتري لبس عدل بدل من ملابسج السبورتيه اللي بدولابج ..
غيدا بقهر وعصبيه: قلت لا ما تفهمون .. انذبح ولا اوافق على حركه سسافله زي جذي ..
عصب اخوها معاذ وقال: غيدا احترمي نفسج .. اللي جدامج امج وابوج فحشمي لسانج لا اقصه لج ..
غيدا بقهر: مالك شغل .. لا تتدخل .. ابي ادافع عن نفسي .. مستحيل كلام احد يمشي علي والزواج مو غصب .. ابوي الزواج مو غصب ..
فتح فمه معاذ بيهزأها بس سبقه ابوه يقول: خلاص لا احد يتدخل ..
طالع في غيدا وقال: اعرف ان الزواج مو غصب .. بس انتي لازم تتزوجي .. دينج ماراح يكمل من دون زواج .. اذا استمريتي على هالحال ومتي راح يكون عذابج شديد يوم القيامه .. غيدا حبيبتي اصحي على نفسج .. الريال واحد عنده فلوس وراح يأمن لج حياة سعيده وحلوه ..
غيدا: مهما كان انا ما بتزوج ..
الاب: اول شيء شوفيه بعدين قرري ..
فتحت فمها بتعارض بس تراجعت ..
هي معارضه ومستحيل توافق بس بتسايرهم وتشوفه وبعدين بتطلع فيه مليون عيب ..
الاب: صدقيني انه راح يناسبج .. وانتي تعرفينه بعد ..
غيدا بإستنكار: اعرفه ..؟؟!!! منو ذا ..؟!
واول ما نطق ابوها الاسم كأنه هناك صاعقه ضربت راسها بعنف ..
فعلا انصعقت من الاسم ..
ما كانت تتوقعه ..
ابدا ما توقعته ..

================================================== ==================

في الجامعه والساعه ثمان ..
في كلاس طارق ..
كان جالس وكالعاده فوق الطاوله بس هالمره سرحان يطالع في الطلاب ..
اما انس وفهد فطاقينها سوالف وضحك ..
تنهد طارق وتفكيره كله في ... اسيل ..
كل ما تذكرها يتذكر معاملته الوقحه معاها ..
مو من عادته يعتذر ولا عمره قد نطق كلمة آسف ..
دايم يشوف تصرفاته صح حتى لو هو عارف انها غلط ..
بس هالمره وده يشوفها ..
يبي يعتذر عن كل شيء ..
اللي سواه مو قليل ..
جرحها .. اهانها .. اتهمها .. قلل من قدرها ..
اخذ نفس عميق ..
هالايام ما يفكر إلا فيها ..
حتى سالفته مع مهند ناسيها ولا مهتم فيها مثل اسيل ..
" م يحس بقيمة الشيء إلا فاقده "
فعلا ما كان يحس بقيمة اسيل في حياته إلا لمن فقدها واختفت عن عيونه ..
كان يوميا يشوفها ..
تضحك .. تستهبل .. تعصب .. تتنرفز ..
اشتاق لها ولعيونها ولكل شيء فيها ..
خلاص صار مجنون فيها وما تمر ساعه بدون لا يتذكرها ..
يبغى يقابلها ويتفاهم معها ..
هو مو شاك .. هو متأكد انها بترفضه ..
اللي سواه مو قليل ..
ابدا مو قليل ..
انس: طــــــــــــــــــاارق ..
طارق بهدوء: نعم ..
فهد: في منو سرحان ..؟!
انس: اكيد في عيال عمه .. تفكر في شهد صح ..؟!
طارق بسرحان: ايه ..
انس: ان شاء الله تلقاها ..
طارق وفي باله اسيل: الله يسمع منك ..
فهد: طيب انت ما تعرف شيء عنها ..
طارق: ياليتني اعرف .. مدري هي شلون عايشه او من فين تاكل .. او يمكن لساتها عند عائلتها اللي ربتها ..
انس وفهد: ؟؟؟؟؟؟؟؟؟؟؟!
فهد: شتقصد ..؟!
طارق: ما اعرف غير عنوان بيتها ..
انس بصدمه: عارف العنوان وساكت .. ما تشوف اخوانها شلون قلقانين عليها وانت مو هامك .. والمشكله انك تسألهم عن مجان شغلها وانت عارف .. طارق انت من صجك ولا تستهبل ..!!
فهد: هالانسان مو طبيعي .. شلون يفكر ..؟!!!
عقد طارق حواجبه وهو يتذكر فيصل ..
تذكر معاملته لأسيل اول ما نزلت من السياره ..
على طول ضربها حتى قبل لا يفهم السالفه ..
طارق: اخوها غبي .. مستحيل احد يحبه .. مليق ..
عصب انس وقال: طارق انت شفيك بالضبط ..؟! تستهبل ولا تستعبط ..؟!
طالع طارق فيه وقال ببرود: اللحين انت شفيك معصب ..؟!
انس: من حجيك الغبي .. ليش تغيرت فجأه ..؟! ابي افهم ..
طارق: انا ما اشوف شيء غلط في حجيي .. هذي مشكلتك اذا شايف غلط ..
انصدم انس منه وقال فهد: طارق انت من صجك ولا تتغشمر ..؟!
طارق: ويهي مو ويه واحد يتغشمر ..
طالعوا فيه بصدمه وهو مستغرب من صدمتهم الغريبه بس ما اعطى الامر اهميه ..
دخل الدكتور راكان الكلاس وقال: السلام عليكم ..
الطلاب: وعليكم السلام ..
حط اغراضه عالمكتب وقال: مين ما حل الواجب ..؟!
رفع راسه يطالع فيهم وعرف ان الكل حال ..
طالع في انس وقال: انس حليت ..؟!
تنرفز انس وقال في نفسه: "هذا ما يمل من سؤالي كل يوم .. يعني هو يستمتع بنرفزتي ولا شنو" ..
د.راكان بإبتسامه: انس شفيك ساكت ..؟! لا يكون ما حليت ..!!
انس في نفسه: "والابتسامه شاقه حلجه بعد" ..
اخذ انس دفتره وقام من مكانه واتجه لمكتب راكان ..
حط الدفتر قدام راكان وقال بضبط اعصاب: يبته لك عشان تصدق ..
ابتسم الدكتور راكان وطالع في الحل بعدها قال: طيب اكتبه عالبورد ..
اخذ انس قلم وبدأ يكتب الحل عالسبوره ..
انس في نفسه: "ما يكفي طارق المينون حتى ييني راكانوه السامج" ..
عقد حواجبه وهو يفكر في كلام طارق ..
مو قادر يصدق ابدا ..
عض على شفته وهو يقول في نفسه: "فعلا غبي واهبل .. ابي افهم شمعنى الحجي اللي قاله .. شلون عارف البيت اللي تشتغل فيه شهد ومع هذا ما يروح .. والمشكله يقول ابغى القى شهد بسرعه .. طارق هذا اكيد في مخه شيء" ..
ضغط عالقلم بقوه وهو يحل وكمل في نفسه: "اللي رافع ضغطي هو كلمته بأن اخو شهد غبي ومليق .. واول يقول لي في الشقه انهم ييننون ويحبهم كثير .. هذا اكيد عنده انفصام في الشخصيه .. ايه هذا هو التوقع الاكيد" ..
حط القلم عالمكتب بعد ما كتب الحل واخذ دفتره وراح لمقعده ..
رفع الدكتور راكان حواجبه وهو يطالع في الحل اللي واضح انه مكتوب بقهر ..
جلس انس على الكرسي حقه ولف يطالع في طارق اللي كان واضح عليه انه سرحان ..
لف انس على فهد وقال بهمس: طارق مريض ..
فهد بنفس الهمس: شتقصد ..؟!
انس: الحجي اللي قاله قبل شوي يدل ان عنده انفصام شخصيه ..
فهد: ايه صح فعلا .. اكيد عنده انفصام شخصيه .. ياخي ريحتني عبالي ان طارق خلاص تغير ..
انس: حتى عبالي جذي بس الحمد لله انه ما تغير ..
لفوا اثنينهم يطالعون في طارق اللي كان يطالع في شرح الدكتور راكان ..
صحيح عيونه على الدكتور راكان بس عقله بعيد ..
يفكر في كلام انس ..

"طارق انساها لأنها مستحيل تقبل فيك"
هز طارق راسه بلا وهو يقول في نفسه: "مستحيل .. مستحيل انساها .. ما اقدر .. حاولت اكثر من مره بس ما قدرت .. يالله ابي اشوفها .. ابي اطمئن عليها" ..
حط راسه بين ايده وهو يقول في نفسه: "هالبنت يننتني .. عمري ما عشقت احد بهالطريجه .. مو راضيه تفارق مخي ابدا .. وينج يا اسيل .. لحد الآن كارهتني ولا خلاص نسيتي السالفه" ..
ابتسم بإستهزاء وكمل: "اكيد كارهتك يا طارق .. واكيد ما راح تسامحك" ..
رفع راسه يطالع في الدكتور راكان ..
يحاول يركز في الشرح بس مو قادر ..
شوي تذكر كلمات فيصل في ذيك الليله ..

"مـــــــــو ناقصنــــــــــــــــــا غير بنت الشــــــــــــــــــوارع تيي البيـــــــــت في انصاص الليالي"
طارق في نفسه: "اللحين فهمت حجيه الغريب .. كان عارف انها مو اخته ومع هذا ما كان رحيم معها ابدا .. شلون اسيل قدرت تتحمله" ..
تنهد وكمل: "اسيل تحملت الكثيير" ..
حط ايده على خده وهو يلعب بالايد الثانيه بالمرسام عالطاوله ..
طارق: "حتى لو كنت اعرف عنوان البيت فمستحيل ألقاها هناك .. ما دام عندها اخ مثل ذاك الاخ ما اضن انه سمح لها تعيش عندهم .. طيب وين راحت ..؟! ودي اسأل اخوها بس باين انه مليق وحتصير مهاوشه اكيد .. طيب هي عندها اخوان غيره ولا لا ..؟! ما اعرف شيء عنها غير اسمها" ..
اخذ نفس عميق وهو يلعب بالمرسام ..
يحبها ومع هذا مو عارف عنها اي شيء ..
يبغى يوصل لها ومو عارف من فين الطريق ..
طارق في نفسه: "لحضه ..!! راشد الشعلان والاسباني آرثر والمغزلجي سامي .. اسيل تعرف هالثلاثه فاكيد هم يعرفوها .. يبغالي اسأل واحد منهم .. بس كلهم مليقين .. واحد مهايطي والثاني اكرهه والثالث مغزلجي مغرور .. مستحيل اتحجى مع واحد منهم" ..
عدل جلسته وقال في نفسه: "بس عشان اسيل راح اتكلم مع واحد منهم .. يا آرثر او سامي .. اما راشد فمستحيل لأنه مشكلجي وما يعرف يتفاهم" ..
صحي من افكاره على صوت انس يقول: طارق ..
طالع طارق حواليه فشاف ان الكلاس بدأ يطلع ..
طارق: خلصت المحاضره ..؟؟!!
فهد: ايه توها خلصت ..
انس: طارق ابي اكلمك بموضوع ..
طالع طارق فيه وقال: شنو ..؟!
انس: صدقني انا ما ابي غير مصلحتك .. فعشان خاطري انا وفهد روح تعالج في الطب النفسي ..
رفع طارق حاجبه اليمين وهو يقول: سلامات .. مصخن ..؟!
فهد: طارق احنا نتحجى صج ..
طارق: وانا بعد اتحجى صج .. حجيكم ما يدل إلا انكم مصخنين .. الله يشفيكم ..
وبعدها قام يرتب كتبه ..
انس: مو مصخنين ولا شيء .. انت اللي عندك انفصام شخصيه ولازم تتعالج قبل لا يتطور الامر ..
ابتسم طارق بإستهزاء ولا رد ..
انس بعصبيه: احنا نتحجى صج .. شهالابتسامه الغريبه ..
لف طارق عليهم وقال بإبتسامه: طيب ممكن تقولون شلون اكتشفتم ان عندي انفصام شخصيه ..؟!
فهد: من حجيك اللي قبل المحاضره ..
انس: قبل كنت تقول انك تتمنى تعرف عنوان شهد بنت عمك عشان ترجعها لأخوانها ودايم تقول انك تحب شادي ووسيم كثير .. وقبل المحاضره تغير حجيك تماما ..
فهد: قاعد تقول انك تعرف عنوانها وان اخوها غبي ومليق ..
انس: هذا يدل على انفصام الشخصيه ..
طالع طارق فيهم فتره وشوي انفجر يضحك عليهم ..
وانس وفهد على راسهم اكبر علامة استفهام ..
طارق: ههههه لا فعلا تأكدت انكم مصخنين .. كنت اتحجى عن اسيل واخوها مو شهد واخوانها ..
فهد بدهشه: بس احنا نحسبك تقصد شهد ..
هز طارق كتفه وهو يقول: مو مشكلتي .. مشكلتكم انتم ..
انس: طيب احنا سألناك عن شهد فليش تياوب عن اسيل ..؟!
اخذ طارق شنطته وطلع وهو يقول ببرود: هذي مشكلتكم ولا يكثر ..
وطلع فقال انس: غغبي .. المفروض يجاوب على سؤالنا مو يصلح جذي ..
فهد: المهم خلنا اللحين نلم اغراضنا ونطلع من الكلاس ..

================================================== ==================

الساعه وحده الظهر ..
وفي مكان اول مره نروح له ..
بس الاشخاص اللي فيه مو جديدين علينا ..
كان جالس عالكنبه بطريقه مهمله وبإيده سيجاره يدخنها ببطئ شديد ..
نفثها وقال ببرود: انتم اللحين ليش متنرفزين .. خلونا نحل الامر بروقان .. العصبيه ما راح تفيدنا ابد ..
طالع فيه صاحبه اللي ملامح وجهه تدل على القهر وقال: ياخي بطل البرود اللي انت عايش فيه .. ما تشوف احوالنا من سيء لأسوأ بسبب هاللي ما يتسمى .. خلك جاد يا يزن ..
يزن ببرود: العصبيه ما راح تفيدنا يا ضاري .. فأهدأ وروق ..
طالع صاحبهم الثالث جراح في يزن وقال: طيب حلها لنا يابو الروقان .. صاحب هالاستراحه محذرنا اكثر من مره بخصوص الايجار .. لحد الآن ما دفعنا .. والشخص اللي نتعامل معاه ونستورد البضاعه كل شوي يزيد السعر اللي فوق طاقتنا .. انتم حالتكم الماديه سيئه وما تقدروا تدفعوا .. اما انا صحيح ابوي غني بس رافض تماما يدفع لنا فلس واحد .. يقول يكفي انه يغطي علينا من ناحية الامن وماله دخل في المصاريف فممكن تقول لنا شلون راح نعدل حالنا ..؟!
كمل ضاري يقول: قبل كان كل شيء تمام بسبب فلوس إياد اللي كانت تمشي امورنا بس اللحين تركنا وما عاد صار عندنا ممول يمول لنا .. الشباب احوالهم سائت .. محتايين البضاعه بسرعه ..
جراح: ابن اللذين ماكو طريجه ما استعملناها ضده .. بالطيب وبالقوه وبالضرب بس ماكو فايده .. اعند انسان شفته بحياتي ..
اخذ يزن نفس من السيجاره وبعدها نفثها بهدوء وقال: يبغالنا نستعمل طريجه ثانيه .. لازم نلقى له نقطة ضعف نستعملها ضده ونضغط عليه .. ماكو انسان ماله نقصة ضعف ..
ضاري: طيب وشهي نقطة ضعفه ..؟!
يزن بإبتسامه: قلت لكم "لازم نلقى له" وهذا يعني اني ما اعرف بس لازم ندور ..
تكتف جراح وقال: وفين ندور يعني ..؟!
يزن: نسأل اشخاص يكونون مقربين جدا من إياد ..
ضاري: ماكو غير ابوه ورفيجه بدر .. وابوه طبعا ما بنقدر .. اما بدر فحاولنا معاه اكثر من مره بس رفض يوقف في صفنا ودايم في صف رفيجه ..
يزن بإبتسامه: لا تنسوا انه على حسب معلوماتنا اللي جمعناها عنده اخت وعم وابن عم ..
ضاري: ايه صح .. بس عمرنا ما سمعنا عنهم شيء ابدا .. لا من إياد ولا من غيره ..
جراح: حتى لمن كان إياد معنا ما كان ييب سيرتهم ابدا ولا كأنهم مويودين ..
يزن: يبغالنا ندور عنهم معلومات عشان نعرف ان كانوا احياء او لا .. ونعرف مجانهم .. فاهمين ..
طالعوا فيه فتره وهم يفكروا ..

.................................................. ................

في نفس هالوقت وامام مدرسة الثانويه للبنات ..
كان هالوقت هو وقت انصرافهم من المدرسه ..
وقدام المدرسه فيه الكثير من السيارات والباصات اللي راح توصل البنات لبيوتهم ..
من بين هالسيارات كان فيه سياره صغيره بيضاء وبداخلها شخصين ..
تنهد واحد فيهم بملل وقال: يمكن ما يات اليوم يا بدر ..
هز بدر راسه بإستنكار وقال: لا هي ما تغيب ابدا ..
إياد: وانت شدراك ..؟!
بدر: بحثت بكل المعلومات عنها وعرفت انها مو من عوايدها تغيب بدون سبب ..
تربع إياد وقال بطفش: بس احنا مسنترين بهالسياره من نص ساعه .. ياخي طفشت ..
بدر: دور عنها وانت ساكت ..
إياد: اوووف ملل ..
وبدأ يلف بعيونه بين هالطالبات اللي يمشوا يدور وحده تشبه الصوره اللي جابها بدر ..
إياد: بدر ..
بدر: ها ..
إياد: عندي احساس يقول ان خطتك ما راح تنجح .. يعني مستحيل تتعاون معنا ..
بدر: ما راح نخسر شيء اذا يربنا ..
هز إياد كتفه وقال: بكيفك ..
بدر: لحضه لحضه كأني لقيتها ..
لف إياد عليه وقال: وينها ..؟!
بدر: كاهي هناك اللي لابسه جنطه اورنج وصابغه اشقر ..
إياد: صح نفس اللي بالصوره .. بس بصراحه صاروخ هالبنت .. كشخه ..
فتح بدر شباك سيارته وقال بصوت عالي: يا بنت محمد ..
لفت البنت عليهم فأشر لها بدر انها تجي ..
استأذنت من صاحبتها وجت عند شباك السياره ..
حطت ايدها بجيب مريولها وقالت: خير .. شتبي ..؟!
ابتسم بدر وقال: انتي اخت جراح صح ..؟!
البنت وهي تطقطق بالعلك: ايه اخته .. بس وش تبون ..؟!
بدر: طيب شسمج ..؟!
رفعت حاجبها وقالت: مو كأنك سافهتني وما رديت علي ..
إياد: بعدين نقولج ..
طالعت في إياد وقالت: هذا رفيجك ..؟!
إياد: لا رفيج السياره اللي ورانا ..
البنت: ها ها سامج ..
إياد: هههههه والله مدري من فينا اللي سأل سؤال سامج ..
بدر: المهم اللحين خلينا نتعرف .. شسمج ..؟!
تكتفت وقالت: المفروض تعرف بنفسك اول ..
بدر: اوكي انا بدر وهذا رفيجي إياد ..
طالعت فيهم بعدين قالت: وانا اسمي لينو ..
بدر: ما طلبنا اسم الدلع ..
إياد: ياخي واضح انه دلع اسم ليان ..
ابتسمت وقالت: للأسف خطأ ..
إياد: عيل لين ..
لينو: كمان خطأ ..
إياد: لينا ..
لينو: خطأ ..
انزعج إياد وقال: عيل شنو ..؟!
لينو: ما راح اقولكم ولا تحاولوا تسألوا احد لأنهم حيقولولكم ان اسمي لينو .. اهلي ورفيجاتي وابلاتي وسواقي ما ينادوني إلا لينو ..
بدر: خلاص ذي مو قضيه .. المهم لينو نبي منج خدمه ..
رفعت حاجبها تطالع فيه فكمل: سؤال بسيط ونبي اجابته ..
لينو: وشو ..؟!
بدر: اول شيء نبيج تكوني رفيجتنا .. يعني عشان عندنا شغله نبي ننجزها وما نقدر من دون مساعدتج ..
ابتسمت لينو وتكت على شباك السياره وقالت: اوكي بس طبعا كل شيء بثمنه ..
طالعوا بدر وإياد في بعض بعدين قال بدر: اوكي اتفقنا ..
وكمل في نفسه: "هالانسانه ماديه" ..
لينو: طيب وشهي شغلتكم ..؟!
بدر: اممم فيه واحد نعرفه بالشرطه اسمه عبد الخالق .. هالانسان ناشب لنا بالبلعوم .. ودايم يلفق لنا تهم احنا ما ساويناها فنبي نجمع حواليه تهم تزيحه من عمله .. وبما ان ابوج له مكانه عاليه بالشرطه فقلنا يمكن تساعدينا ..
لينو: آهآ .. طيب ليش هالشرطي يلفق عليكم التهم ..؟!
بدر: بسبب مشاكل عاديه تصير بيننا وبين ولد اخوه ..
لينو: طيب شالمطلوب مني ..؟!
بدر: نبيج اللحين بشغله وحده .. امم نبي نعرف وين يحط ابوج سجلات الضباط اللي تحت امرته عشان نقدر نطلع معلومات عن عبد الخالق وبعدها نشوف وش الخطوه الثانيه ..
ابتسمت وقالت: اوكي .. بس زي ما قلت كل شيء بثمنه ..
بدر: طيب جم تبين ..؟!
حطت اصبعها على فمها دلالة التفكير بعدين قالت: بما اننا لساتنا بالبدايه فما راح اطلب كثير .. يكفين ألف مقدما ..
اندهش بدر وقال في نفسه: "طماعه" ..
لينو: الشغله اللي انا اسويها مب بسيطه يا حبايبي ..
فتح إياد محفضته وقال: اوكي راح نعطيج ..
اعطاها ألف فأخذته تتفحصه وتوجهه ناحية الشمس وهي تقول: خلوني اتأكد انها مب مزوره .. لأنه واضح عليكم الخبث ..
بدر بصوت منخفض: مدري مين فينا الخبيث بصراحه ..
حطتها بجيبها وقالت: اوكي تمام .. سجلوا رقمي عندكم عشان نقدر نتواصل ..
طلع بدر جواله وسجل رقمها وبعدها ابتعدت عن المجان ..
بدر: بصراحه ما كنت اتوقع انها راح تتعاون معنا بسهوله ..
إياد: المهم انها صدقت جذبتنا وبس ..
بدر: هذي بس المرحله الاولى وان شاء الله بعدين نقدر نوصل لأشياء تدين ابو جراح عشان ينقط بالسجن هو وشلة جراحوه ..
إياد: طيب بدر شتتوقع اسمها ..؟!
بدر: منو ..؟!
إياد: لينو ..
بدر: مدري والامر مو مهم عندي ..
إياد: ياخي عندي فضول يذبحني .. لازم اعرف اسمها ..
حرك بدر سيارته فقال إياد: لا تنسى تمر الورشه اطلع سيارتي بعد ما كسروا قزازها ..
بدر: اوكي ..

اما عن لينو فرجعت لصاحبتها اللي قالت: طولتي .. وش كانوا يبون هالشباب ..؟!
ابتسمت لينو وقالت: العصر راح اييج واخبرج كل شيء يا سيمو ..
سيمو: بجد بجد تحمست .. انطرج لا تتأخرين ..
لينو: اوكي ..
سيمو: وطبعا ابيج تعلميني شلون اطقطق بالعلك .. امس قلت لبنت عمي وصايف تيب علك وطول الليل وانا احاول اطق بس مو قادره ..
لينو: هههههه وربي سهل ..
سيمو: هههه كل ما سألت احد قال سهل فييني احباط مو طبيعي ..
لينو: اوكي بأحاول اعلمج العصر .. سي يا ..
سيمو: سي يو ..
راحت لينو وركبت السياره وحرك السواق للبيت ..
ابتسمت وهي تقول: بدر وإياد .. خلونا نشوف إلى وين تبون توصلون بجذبكم ..!!

** لينو محمد .. صف اول ثانوي .. ذكيه جدا ومحد يقدر يلعب عليها .. شعرها مصبوغ اشقر فاتح ومشقره حواجبها .. بيضاء وملامحها جدا جميله عكس اخوها جراح الاسمر والمعضل .. اسمها الحقيقي راح نعرفه ان شاء الله بعدين **