شبكة همس الشوق - عرض مشاركة واحدة

12 - 3 - 2014, 08:08 PM

نرجع للجامعه وفي وقت انصراف الطلاب ..
توها انتهت محاضرة سامي ويزيد وريان وطلعوا من الكلاس ..
سامي بتأفف: اووف اكره هاليوم .. اربع محاضرات .. ياخي تعب ..
يزيد: هههه وانت الصاج .. الشله كلها مخلصين وراحوا لبيوتهم إلا احنا ..
سامي: يا حضهم ..
ريان: ههههه ياخي الوضع ايزي فليش متذمرين ..
يزيد: انت كل شيء عندك ايزي ..
سامي: هيه شباب .. مالاحضتم ان دانا اليوم هاديه ..
يزيد: ههههه اصلا هي دايم هاديه ..
سامي: لا اقصد اليوم بزياده .. ما تتكلم ودوم سرحانه .. وحتى ما تضحك او تبتسم ..
ريان: بصراحه انا لاحضت .. كأنه عندها مشكله جايده ..
سامي: شتتوقعون صار ..؟!
هز يزيد كتفه وقال: مدري ..
ريان: خلوها براحتها وما نضايقها .. وغير جذي لو سمحت يا استاذ سامي انت وعمادوه ..
سامي بإستغراب: شفينا ..؟!
ريان: راعوا مشاعرها .. لا تعاملوها على اساس انها بنت لأنها تنحرج .. عاملوها زي قبل ..
سامي: بالعكس جذي حماس ..
ريان بحده: حماس بعينك ..
انفجع سامي وقال: خلاص حاضر ..
يزيد: هههههههه عليك حركات تفجع يا ريان ..
ريان: باجي عمادوه لازم اتفاهم معاه .. ياللا باي ..
يزيد: باي ..
فراح ريان واتجهوا يزيد وسامي لسياراتهم ..
كل واحد ركب سيارته واتجه لبيته ..

بعد فتره وصل سامي ووقف سيارته بالكراج ونزل ..
دخل القصر وقابل بوجهه مراد ..
اعتفس وجه سامي وقال: متى رجعت من سفرك ياخي ..؟!
مراد بإبتسامه: امس ..
طلع سامي عالدرج وهو يقول: ياليت طيارتك صدمت بجبل عشان تموت اوووف ..
مراد: سامي ..
لف سامي وقال: خيير ..
مراد بإبتسامه: ابوك ينتضرك في غرفته ..
استغرب سامي وفي نفس الوقت ابتسامة مراد مو مريحته ..
سامي: شيبي ..؟!
هز مراد كتفه وقال: روح شوف بنفسك ..
طالع سامي في مراد فتره بعدها طلع لغرفة ابوه ..
دق الباب فسمع صوت ابوه يقول: ادخل يا سامي ..
فتح سامي الباب فشاف ابوه جالس عالصوفا الطويله وفي ايده سيجارة كوبيه يدخنها بهدوء ..
قفل سامي الباب وراه وقال: نعم ..
الاب: ايلس ..
تقدم سامي وجلس على الكنبه وهو حاس بتوتر فضيع ..
سامي في نفسه: "لا يكون السالفه فيها جاك .. لا يا رب" ..
الاب: كيف الجامعه معاك ..؟!
سامي: تمام ..
الاب: طيب ليش درجاتك سيئه ..؟!
سامي: هذي قدراتي ..
الاب: تحتاج مدرس خصوصي ..؟!
سامي: ما ابغى ..
الاب: انت حر ..
وبعدها سكت الاب فتره من الوقت وهو يطالع في سامي ..
طال سكوت ابوه فتكلم وقال: شكنت تبغى مني ..؟!
ابتسم الاب وقال: لا تنصدم اوكي ..
توتر سامي اكثر وقال: ما بنصدم ..
طفى الاب سيجارته وبعدها قال جملته اللي صعقت سامي وبقوه ..
سامي وهو بقمة الصدمه: شنـــــــــو ..!!!!
الاب: قلت انا خطبت لك وحده .. شلون ما سمعت ..؟!
وقف سامي وقال بعصبيه وبصدمه: شلون خطبت لي ..؟! انت عارف اني مابي اتززوج مابـــــــــي .. شلون تفكر .. انا مو مصدق ..! لا تقرر بكيفك .. مليـــــــــون مره قلت انا مابي اتزوج ابدا ابدا ..
الاب ببرود: خطبت وخلصت واليوم الشوفه ..
عصب سامي اكثر وضرب الطاوله اللي قدامه برجوله وهو يقول: انتم شلون تفهمون ..؟! ابوي انت مو من صجك ابد .. مو قادر استوعب ابدا ..
انقلبت الطاوله وطاح كوب القهوه اللي كان فوقها وابو سامي يطالع فيها ..
رفع راسه وطالع في سامي وبعدها وقف ..
تقدم من سامي وسامي من الخوف ما شالته رجوله فجلس ..
ابوه يرعبه بكل شيء ..
ابوه شخصيته من اقوى الشخصيات اللي قابلها بحياته ..
وقف الاب قدام سامي تماما وانحنى شوي وتكى بإيده على حافة الكنبه وصار وجهه قدام وجه سامي ..
فقال بهدوء تام: جم مره اقولك انسى امر جاك ..؟! هذاك خلاص مــــــات .. الى متى راح تظل تحت شبح الخوف منه ..؟! انسى كل الماضي يا سامي انساه .. لا ترفض الزواج عشان سبب سخيف زي جذي .. واذا انت رافض الزواج عشان السبب الثاني اللي انا تسببت فيه فترى مو انت الوحيد اللي جذي .. فيه ملايين غيرك ومع هذا عايشين .. واذا كان هذا بنظرك عيب راح ينقص قدرك جدام كل البشر فحبيت اقولك اني خطبت لك وحده كمان فيها عيب ينقص قدرها .. يعني ما راح تتكبر عليك بسبب مستواك .. البنت بويه ومسترجله .. والبنت المسترجله محد راح يفكر يتزوجها فعشان جذي خطبتها لك .. كل ما طولت لسانها وعايرتك فذكرها بأنها بويه ومحد بالعالم يطالع فيها .. جذي انتم متساوين ..
اعتدل في وقفته وقال: فكر في حجيي عدل وزهب نفسك نزورهم في المغرب ..
خرج من الغرفه وقفل الباب وراه ..
اما سامي فما زال على نفس جلسته ويطالع في الفراغ ..
تمتم بكلمات قالها بخفوت: جاك .. ما مات ..
نزل نظره يطالع في الارض وقفز في ذهنه شكل بشري متوحش يهاجم بعنف ..
حط ايده على اذنه وهز راسه بقوه عشان ينسى كل شي ..
وقف وطلع من الجناح وراح لغرفته ..

.................................................. ..............

في نفس هالوقت وببيت دانا ..
كانت العائله كلها جالسه تاكل الغدا بهدوء ..
عادل كان بس يراقب دانا ..
من امس الليل وهي هاديه وكلامها قليل ومتوتره بقوه ..
اكثر من مره يسألها فتقول مافيني شيء ..
قامت دانا فقالت امها: على وين ما اكلتي عدل ..
دانا بهدوء: شبعت ..
وراحت لغرفتها ..
لف عادل على امه وقال: شفيها دانا ..؟!
الام: والله مدري .. هالايام مو طبيعيه .. اكيد فيه شيء مكدرها ..
عادل: ان شاء الله انا اليوم ما بتركها لين اعرف ..
اسندت دانا ظهرها على باب غرفتها ونزلت دموعها اللي كانت حابستها ..
دانا: لا .. لا يا رب .. ان شاء الله يكون خطأ ..
جلست وغطت وجهها بإيدها وهي تبكي وفي نفس الوقت تصارع البكى ..
شيء هي متأكده منه بس ما تبيه يصير ..
بعد فتره هدأت وقامت ..
جلست على الكرسي قدام الكمبيوتر المكتبي ..
هو الكمبيوتر الوحيد الموجود بالبيت ..
شغلت وقعد خمس دقايق عبال ما يشتغل لأنه جدا قديم والنظام فيه بطيء ..
بعد ما اشتغل فتحت عالنت بعد ما اخذت شبكه من المودم حق جيرانهم ..
فتحت على قوقل وبعد تردد طويل كتبت كم كلمه وضغطت انتر ..
قلبها يدق وهي تشوف الخيارات اللي طلعت واختارت اول واحد ..
كلها كم ثانيه وانفتح الموقع المطلوب ..
بدأت تقرى ومع كل سطر يتأكد الشيء اللي خايفه منه ..
تجمعت الدموع بعيونها واختنق حلقها وشفتها ترتعش ..
دق عادل الباب في هالوقت وقال: دانا ممكن ادخل ..؟!
انتظر شوي ولمن ما سمع رد خاف عليها وفتح الباب ..
استغرب لمن شافها جالسه عادي وقدم منها ..
انصدم لمن شاف دموعها بعيونها وتشاهق فقال: دانا حبيبتي شفيج ..؟!
ما قدرت تتكلم ابدا .. حلقها مخنوق وبقوه وعيونها مليانه دموع فقال اخوها بخوف: بليييييييز تحجي شفيج ..؟!
انفجرت بالبكاء بحضن اخوها وهذا اللي خوف عادل اكثر ..
بدأ يمسح على شعرها القصير ويهدأ منها ..

================================================== ==================

العصر وفي بيت منصور وريما ..
كانت ريما جالسه في الصاله وتقلب في التلفزيون ..
نزل منصور وجلس عالكنبه وقال: فارس بيي ..
ريما: ..............................
منصور: يقول انه ياي يسألج عن اسيل ويبي يعرف منج كل شيء حصل من يوم الحادث لحد الآن ..
ريما: ...............................
لف منصور وطالع في ريما فتره وقال في نفسه: "خلاص لازم اسألها .. الوضع جذي مو ماشي ابدا" ..
اخذ نفس وقال: ريما الوضع هذا مو مريح لي ابدا ..
ريما: ولا انا .. باجي شوي وينتهي الشهر ونفتك ..
آلمه كلامها وقال بهدوء: تبين الفكه ..؟!
ريما: ايه زي ما انت تبيها ..
منصور بسرعه: منو قال اني ابي الفكه ..
لفت ريما وطالعت في منصور اللي توه انتبه على كلامه ..
ريما: شتقصد ..؟!
سكت فتره بعدها قال: ريما اسمعي .. ابغى اسألج سؤال وابيج تياوبين بصراحه عشان ننهي العلاقه اللي بيننا ..
طالعت ريما فيه تنتظر سؤاله ..
منصور بهدوء: في ذيج الليله اللي قابلتج فيها في الاستراحه ....
انتفض جسم ريما اول ما تذكرت كل شيء ..
منصور: اسألج وش صار بينج وبين ياسر ..؟! يعني بمعنى ثاني انتي بنت ولا لا ..؟!
وبعدها طالع في عيونها ينتظر اجابتها ..
منصور: ياوبي بصراحه عشان نقدر نعدل الامور اللي بيننا .. يا نتفق يا نفترق ..
غمضت ريما عيونها بألم واحداث ذيك الليله تمر في مخهها ..
احداث قاسيه ومؤلمه ..
احداث دمرتها ومو مخليتها تنام الليل ..
احداث مرعبه جدا ..
اللي صار شيء كبير ما يغتفر ..
لمن شاف منصور ملامحها المقلوبه خاف ..
خايف تكون مو بنت وبعدها يفترقوا ..
هو يعشقها كثير ويتمنى يعيشوا مع بعض احلى حياة ..
طالعت ريما فيه وقالت: انا مو بنت ..
انصعق منصور من ردها وقال بعدم تصديق: لا تتغشمرين ..
صرخت وهي تقول بإنفعال: لا ما اتغشمر .. انا فعلا مو بنت ابدا .. فاهم .. انا مـــــــــو بنـــــــــت فخلنا نفترق لأن زواجنــــــا كان غلــــــط ....
لحضة صمت بين ريما ومنصور بعد ما سمعوا صوت الباب ..
لفوا عاليمين وشافوا خادمه فاتحه الباب و...
وكان فارس واقف بالباب يطالع فيهم ..
دق قلب ريما وهي تطالع فيه ..
رسم منصور ابتسامه على فمه وقال: اهليـ ـن فارس ..
دخل فارس وقال بهدوء: اهلين ..
اشر منصور عالكنبه وقال: تفضل ايلس ..
هز فارس راسه بلا ..
لفت ريما وجهها للجهه الثانيه وهي تقول في نفسها: "يا رب ما سمع شي" ..
اما منصور فأرتبك من رفض فارس وسكت ..
طالع فارس فيهم فتره بعدين قال: شيعني زواجكم كان غلط ..؟!
انصدموا من سؤاله وصار اللي كانوا خايفين منه ..
فعلا سمع آخر كلامهم ..
منصور بإبتسامة ترقيع: ههه لا ذي ريما لمن تعصب تقول اشـ...
قاطعه فارس يقول بهدوء لريما: شيعني انتي مو بنت ..؟!
نزلت ريما راسها اكثر والدموع تجمعت في عيونها ..
كمل فارس يقول: ماكو وحده متزوجه تقول انا مو بنت .. شتقصدين ..؟!
محد رد عليه ..
ريما منزله راسها ومنصور لاف الجهه الثانيه ..
طالع فارس فيهم وقال: زواجكم كان غريب وسريع .. ريما المغروره وافقت بسرعه بدون شروط ومنصور مستعيل مع انه قالي انه ما يحب ريما .. كل شيء حصل فجأه وبسرعه .. ابي اعرف الحقيقه ورى هالزواج ..؟!
طالع في ريما وقال: اذا كنتي تعتبريني اخوج ....
طالع في منصور وكمل: واذا كنت تعتبرني رفيجك ياوبوا .. قولوا الصج ..
لفوا وطالعوا في نضرات التساؤل اللي بعيونه ..
منصور بهدوء: اختك يا فارس مو بنت .. تزوجتها عشان استر عليها ..
فتح فارس عيونه بصدمه وطالع في ريما ..
مو قادر يستوعب ..!
مو قادر يصدق ..!
هذي اخته الكبيره مستحيل ..!
فارس: انتي يا ريما ..؟!!!
نزلت دموع ريما ورفعت راسها فأنصدمت من نظرات فارس ..
كانت نظرات كره او احتقار او صدمه ..
ما قدرت تفسر هالنضرات اللي طعنتها ..
ريما بصوت مخنوق: فارس انا آسفه ..
ما رد فارس عليها وما زال يطالع فيها ..
كرهها .. بجد طاحت من عيونه ..
شهقت بألم وهي تقول: بليييييز فارس قول شيء .. اضربني قطعني بس لا تقعد ساكت واللي يعافييييك ..
وما زالت ريما تبكي وتصارخ وهو يطالع فيها ..
غمض عيونه وطلع من البيت ..
انهارت ريما عالارض تبكي فطالع فيها منصور وبعدها طلع لفوق ..

ركب فارس السياره واسند راسه على الدركسون ..
العبره خانقته ..
انصدم بقوه .. ما توقع اخته كذا ..
فقال بصوت خافت: ليه يا ريما ليه ..؟! ابوي في شنو كان مقصر معاج عشان تجازينه بهالجزاء .. حرام عليج ..
غمض عيونه بقوه وهو يتذكر ابوه ..
قد ايش هو محتاجه بقوه ..