شبكة همس الشوق - عرض مشاركة واحدة

12 - 3 - 2014, 08:10 PM

في المغرب ..
كانت اسيل في شغلها الروتيني المعتاد ..
تشتغل وتفكيرها كله في محادثتها امس مع وصايف ..
جاء وقت استراحتها فدخلت الغرفه وجلست على احد الكراسي اللي فيها ..
حطت راسها على ايدها وطالعت في الارض وهي تفكر في اهلها ..
اغنياء .. يعني مالهم عذر في رميها ..
لاهم محتاجين فلوس ولا راح تضيق عليهم عيشتهم ..
هي تبي تفهم السبب ..!
تبغى تعرف ليش رموها ..؟!
ليش تخلوا عنها ..؟!
من كلام وصايف يعني انها مو بنت حرام اذا ليش ..؟!
حاولت تدور سبب مقنع بس مالقيت ..
مافي سبب يبرر اللي سووه ..
تكرههم .. ما تدري كم مره راح تكرر هالكلمه ..
بس فعلا تكرههم كره مو طبيعي ..
ضغطت على راسها وهي تتذكر كلام وصايف ..
..." الراهـــــــــي "...
هذا هو اسم عائلتها ..
وفي نفس الوقت اسم عائلة المغزلجي سامي ..
لحد الان مزعجها هالتشابه بالالقاب ..
ما تبيه يقرب لها ابدا ..
تكره هالانسان بشده .. وزاد كرهها بعد ما عرفت لقبها الحقيقي ..
انفتح الباب وانقطعت حبل افكار اسيل ..
رفعت راسها واندهشت من دخول خالد ..
تكى عالجدار وقال: وش اللي ميلسج هني ..؟!
اسيل: آخذ فترة راحه ..
خالد بإستهزاء: ليه تعبتي ..؟!
ما ردت اسيل عليه ..
فأبتسم وقال: انتي ليش عنيده جذي ..؟! لعلمج انا متساهل معج كثير ..
تقدم ووقف قدامها وقال: من عادتي ادمر اللي يعاندني واندمه ..
انحنى ناحيتها وحط ايده على كتفها وقال: فهمتي ..؟!
ابعدت ايده عنها وقامت من فوق الكرسي ..
رجعت ورى وقالت: انت شتبي توصل له بالضبط ..؟!
طالع في ايده الله ضربتها وبعدين طالع فيها ..
تقدم منها وهي تبعد لين صكت بالجدار ..
وقف قدامها وقال: اسيل ما تلاحضي انج وقحه ..
اسيل: ابعد ..
ابتسم وقال: وليش ابعد ..؟!
زادت دقات قلبها وهي تقول: ابعد ..
خالد بنفس الابتسامه: وانا اقول ليش ابعد ..؟!
مد ايده ومسك خصلات شعرها يلعب فيها وهو يقول: صدقيني انج من اجمل البنات اللي قد شفتهم و....
وبدون سابق انذار صفقته اسيل كف ودفته عنها وهي تقول: حقييير .. لو تقرب مره ثانيه يا ويلك ..
عض خالد على شفته بقهر وقال: انتي شلون تتجرأي تمدي ايدج علي ..؟!
رفعت اسيل اصبعها بتهديد وهي ترتجف من داخل وتقول: احذرك .. اقسم بالله لا اندمك ..
قدم منها بعصبيه وهو ناوي شر ..
ارتعبت اسيل فتفلت على وجهه عشان يبعد ..
ابتعد خالد وهو مصدوم ..
طالع فيها ونيران الشر تطلع من عينه وقال بعصبيه: نفذ صبري يا اسيل .. انتي اللي جنيتي على نفسج .. ورب الكعبه اني راح اندمج .. انتضري اللي راح ييج باجر .. انتضري ..
طلع وصفق الباب وراه بقوه ..
جلست اسيل عالارض وهي ماسكه قلبها اللي يدق بعنف ..
اسيل في نفسها: "يا رب .. يا رب نجني من خالد يا رب" ..
دق جوالها في هالوقت ..
اخذته فشافت انه صاري ..
اخذت نفس عميق وهي تحاول تهدي رجفتها ..
هالخالد سوى لها رعب وحمدت ربها انه خرج ..
ردت وقالت: هلا ..
صاري: اهلين اسيل وينج ..؟!
اسيل: انا في المحل ..
صاري: بس ما اشوفك ..
اسيل: انت هني ..؟!
صاري: ايه ..
اسيل: عيل انتضرني راح اطلع لك لأني في غرفة الاستراحه ..
صاري: اوكي ..
قفلت اسيل جوالها وطلعت من الغرفه فشافته واقف عند الباب ..
جت عنده وقالت: اهلين صاري ..
صاري: اهلين .. كيفج ..؟!
اسيل: تمام .. وانت ..؟!
صاري: بخير .. كيف الشغل معاج ..؟!
اسيل: عادي ..
صاري: يعني ما توايهين مشاكل ..؟!
هزت اسيل راسها بلا ..
صاري: طيب ناقصج شي ..؟!
اسيل: لا مشكور ..
صاري: اذا فيه شيء مضايقج خبريني اوكي ..؟!
اسيل: ان شاء الله ..
صاري: تامرين على شيء قبل لا اروح ..؟!
اسيل: لا سلامتك ..
صاري: عيل مع السلامه ..
اسيل: مع السلامه ..
خرج واسيل تتابعه بنظرها ..
رجعت لشغلها بس تذكرت كلام خالد ..
" انتضري اللي راح ييج باجر .. انتضري "

اسيل في نفسها: "الله يستر" ..

.................................................. ............................

في مكان قريب من هالمكان ..
في المطار الدولي ..
اليوم رحلة راشد وشهد وروان والصغيره شادن ..
راشد كان عند الموضف عشان الاجراءات وشهد وشادن على كراسي الانتظار ..
اما روان فراحت عند الاتصالات عشان تتصل على شقة اثير ..
هذي المره الثالثه اللي تدق ومحد يرد ..
روان: يا ربييه ليه ما يردون ..؟!
دقت مره رابعه وهي تدعي في نفسها انهم يردون ..
والحمد لله جاها صوت وسيم يقول: ألو ..
روان: اهلين بالشقي .. كيفك يا وسيم ..؟!
وسيم: مين انتي ..؟!
روان: له له له ما عرفتني .. انا اللي كنتم ترموا عليها الحجار .. تتذكر ..؟!
وسيم: آآه رشيده .. اقصد روان ..!!
روان: زين انك عدلته .. المهم كيفكم ..؟!
وسيم: كلنا بخير .. كيف شهد وليش ما تتصل علينا ..؟!
روان: شهد تمام بس موبايلها خرب فعشان جذي ما تقدر تتصل ..
جاها صوت الرحله فقالت بسرعه: انا رايحه اسمع ابغى اسألك انتم مرتاحين ولا فيه شيء يضايقكم ..؟!
وسيم: احنا كلنا بخير وطارق يساعدنا في كل شيء وما صرنا نحتاج اي حاجه ..
روان: اوكي كويس .. باي ..
قفلت السماعه وراحت بسرعه تلحق عالطياره ..
طلعت عليها واتجهت لمقعدها فقابلها راشد يقول: ليش تأخرتي ..؟!
روان: ههه الحمامات كانت زحمه ..
راشد: اووف خلاص ايلسي ولا ابي اسمع هرج ..
ما ردت عليه لأنها تعرف قد ايش هو متنرفز ومو راضي عن هالرحله ..
ركبت جنب شهد اللي كانت عند الشباك وفي المقعد اللي قدامهم راشد وجنبه رجال ..
روان: هاي شهوده ..
شهد: كلمتيهم ..؟!
روان: يب ومبسوطين على اخر درجه ..
ارتاحت شهد وقالت: الحمد لله .. بس من وين لهم المصاريف ..؟! الفلوس اللي عندي ما قدرت اعطيهم ..
روان: مدري بس وسيم يقول انه في واحد يساعدهم ويصرف عليهم .. يمكن يكون فاعل خير ..
هزت شهد راسها وهي مو مرتاحه للأمر ..
تخاف يكون واحد يستغلهم او يلعب عليكم ..
تنهدت وقالت في نفسها: "يا رب احفضهم من كل سوء" ..
انطلقت الطائره متجهه لناحية بريطانيا ..
هناك راح تتعالج شهد وتصلح عمليه لعيونها ..
احتمال يرجع نضرها واحتمال انه ما يرجع ..
بس بالنسبه لها مرتاحه لأن اخوانها بخير ..
ومع هذا تبغى نضرها يرجع ..
مو عشان نفسها .. عشان اخوانها وبس ..

================================================== ==================

في اراضي بريطانيا وفي ليفربول بالتحديد ..
في داخل احد المستشفيات كان واقف ويتكلم مع الدكتور باللغه الانجليزيه ..
اما اخته الصغيره رزان فكانت تفحط في الاسياب ومستانسه ..
خلص كلامه مع الدكتور بعدين لف ونادى على اخته ..
جته رزان وقالت: مهند والله حلو مره .. الارض تزحلق ..
ابتسم وقالها: بس عيب نلعب في الاماكن العامه ..
برطمت بعدين تذكرت شي وقالت: ايه صح ايش قال الدكتور عن ماما .. كان يتكلم كلام ما افهمه زي اللي بالتلفزيون ..
مهند: الحمد لله بخير بس يبغالها عنايه وعمليه صغنونه ..
رزان: ومتى تطلع ..؟!
تنهد مهند وقال: الله اعلم .. وياللا خلينا نرجع الفندق نرتاح فيه شوي عشان بعدين امشيج زي ما وعدتج ..
رزان بحماس: لا مشني اللحين امانه ..
مهند: ما اقدر وربي تعبان وابي ارتاح ..
طالعت فيه بنظره طفوليه فتنهد وقال: طيب بس شوي ..
نطت بحماس وهي تقول: يسس ..
خرج مهند واخته من المستشفى وركب السياره وراح لأقرب مدينة ملاهي عشان يمشي اخته فيها ..
وقف سيارته في المواقف بعد ما وصل ونزلوا ..
رزان بإنبهار: واااااو .. مرره حلوه ..
مهند بإبتسامه: اعجبتج ..؟!
رزان: وايد ..
اشرت على العجله العملاقه وقالت: ابي اركب ذي ..
مهند: بس هذي عاليه ما تخافين ..؟!
رزان: لا ..
مهند: حبيبتي مو لازم .. تعالي اركبي في الاكواب ذي اللي تدور احسن ..
رزان بعناد: مابي مابي ابي العجله الكبيره ..
مهند: حبيبتي ما تقدرين لأنهم كاتبين ممنوع دخول طلاب الابتدائي ..
رزان: من جد ..؟!
مهند: ايوه ..
رزان بإحباط: خساره ..
راحوا للعبة الاكواب الدواره واشترى لها تذكره وركبها ..
فلعبت فيها واستانست وهو واقف يطالع فيها بإبتسامه ..
تنهد لمن تذكر حالة امه ..
حالة امه جدا صعبه ..
مهند: ان شاء الله تردين لنا زي قبل ..
جلس عالكراسي ويطالع في الناس بطفش ..
تعبااان ووده يرتاح ..
وقف نضره على شخص متكئ عالعمود وحاط ايده بجيبه ..
مهند: مو كأن هذا بسام ..!!
قام وراح عنده ..
مهند: اهلين بسام ..
لف بسام عليه واستغرب لمن شافه ..
بسام: مهند ..!! غريبه انت هني ..!
مهند: ههه وش يابك لبريطانيا ..؟!
بسام: عندي شغله ابغى انجزها .. وانت ..؟!
مهند: امي تعبانه وييت اعالجها ..
بسام: الله يشفيها .. شسبب تعبها ..؟!
انقلب وجه مهند وقال بقهر: اسأل رفيجك ..
طالع بسام فيه وقال في نفسه: "طارق مره ثانيه ..!! هو وش صلح بالضبط عشان يكرهه مهند" ..
غير مهند الموضوع وهو يقول: غريبه ياي للمدينه الترفيهيه ..
ابتسم بسام وقال: كنت متضايق فييت هنا .. لما تشوف اطفال مستانسين ويضحكون احس ضيقتي تخف ..
مهند: اللي اعرفه ان الناس يروحوا البحر في هالحالات مب الملاهي ..
بسام: هههه ياخي البحر في العصر يكون مزدحم ومحد يذوق طعم الراحه إلا في الليل ..
مهند: ههه معاك حق .. طيب وش اللي كان مضايقك ..
سكت بسام فتره بعدين قال: لو كان عندك شخص مسجون مثلا وتبي تطلعه بكفالتك بس القانون رافض وش بتصلح ..؟!
مهند ببرود: اقتحم السجن واطلعه بالقوه ..
بسام بدهشه: شنو ..؟!!
مهند: واذا كان السجن كبير وفيه شرطه كثير اخذ معي سلاحي عشان اطخ على اللي يوقفوا ضدي ..
بسام بإستنكار: مخك اجرامي ..
مهند: هههههههه ..
جت رزان في هالوقت وقالت: مهند خلصت خلنا نروح لعبه ثانيه ..
بسام بإبتسامه: ذي اختك ..؟!
مهند: ايوه رزان ..
بسام: مرره كيوت .. ربي يخليها لكم ..
مهند: تسلم ..
نزل لمستوى اخته وقال: خذي هالتذكره ورحي للعبة الاحصنه ذيج واعطيها للراعي وألعبي ..
رزان: حـــــــــاضر ..
وراحت تجري بسرعه ناحية الالعاب ..
طالع بسام في مهند وقال: مهند .. شاللي بينك وبين طارق ..؟! ليش انت تكرهه ..؟!
حط مهند ايده بجيبه وقال: اسأله واذا كان عنده جرئه راح يياوبك ..
وبعدها لف وراح ..
تنهد بسام ورجع يطالع في الناس ..
كان تفكيره في سميه بس ..
اما اللحين فتفكيره في سميه وطارق ..
بسام: شسالفتهم هذول الاثنين ..؟! لمن ارجع قطر لازم اسأل طارق ..
تنهد وقال: وكيف راح ارجع وانا ما اخذت سميه .. لازم اكلم لاري مره ثانيه .. بس مستحيل يوافق .. حده معصب لأني قلبت حالة سميه ١٨٠ درجه .. عيل شالحل ..؟!
مر في مخه كلام سميه ..
" وينه ..؟! ابيه .. احبـ ـه "

بسام: رغم كل اللي صار إلا انها تحب زوجها .. يمكن اذا كلمها راح تتحسن حالتها ..
طالع في الناس وقال في نفسه بقهر: "بس شلون تحب حقير مثل هذا ..؟! لازم ألقى طريجه ثانيه تعالجها من دون الألتجاء لزوجها الاناني" ..
عدل وقفته وراح لسيارته واتجه لفندقه ..

================================================== ==================

الساعه سبعه المساء ..
كان فيصل في سيارته متجه لمكان شغله ..
من زمان ما راح واكيد بيلقى قدامه كثير من الاشغال ..
وصل فنزل من سيارته ودخل الشركه ..
اول شيء راح عند رئيسه في الشغل ودق الباب ..
رد الرئيس: ادخل ..
دخل فيصل وقال: السلام عليكم ..
الرئيس: اهلين وعليكم السلام .. شخبار اخوك فارس ..؟!
جلس فيصل عالكرسي وقال: الحمد لله بخير وطلع امس من المستشفى ..
الرئيس: الحمد لله .. اللحين جدامك يا فيصل كثير الاشغال الغير منجزه ..
فيصل: اعرف وان شاء الله راح اباشرها من اليوم ..
الرئيس: الله يعينك .. بخصوص سفرتك لكندا راح تكون بعد ثلاث اسابيع .. راح تكون صفقتنا الاخيره اللي راح نسحقهم فيها ..
فيصل: ان شاء الله في النهايه كل شيء يعدي على خير ..
الرئيس: واللحين تقدر تروح تباشر شغلك ..
قام فيصل وقال: ياللا اشوفك على على ..
الرئيس: مع السلامه ..
خرج فيصل وقفل الباب وراه ..
راح لمكتبه وهناك قابل كومة ملفات تحتاج لدراسه وبعضها لتوقيع وبعضها لتحليل .... الخ ..
جلس عالمكتب وبدأ يشتغل وهو يفكر في رحلته لكندا ..
يحس بشعور غريب مو قادر يفهمه ..
حاول يتناسى هالشعور وكمل شغل ..
الشركه لها دوامين ..
دوام من ٧ الصبح لحد ١ الظهر ..
ودوام مسائي من ٦ المغرب لحد ١٠ الليل ..
فيصل دوامه دايم في الصبح بس عشانه متأخر كثير فراح يبدأ يشتغل دوامين عشان يمديه يلحق ..
مرت ساعتين وهو يشتغل وحس بصداع فضيع فاضطر يوقف ..
فيصل: صداع ياء في وقت غلط ..
قام وبدأ يرتب الملفات اللي خلص منها وبعدها خرج من الدوام ..
هو عارف نفسه اذا جاه صداع ما راح يخف إلا لمن ينام ..
ركب سيارته واتجه للبيت ..
بعد فتره وصل فنزل من سيارته ودخل البيت ..
لقى امه جالسه تطالع في التلفزيون فقال: السلام عليكم ..
الام: وعليكم السلام .. تعال هني تعال ..
فيصل: ما فيني بأطلع انام ..
الام: اقول تعال ابيك .. ما راح اطول ..
جاء عندها وقال: نعم ..
الام: متى بتتزوج ..؟!
تأفف فيصل وقال: جم مره قلت ما راح اتزوج إلا لمن يتزوج فارس وهذا آخر كلام عندي واتوقع اننا قفلنا هالموضوع قبل ..
الام: طيب عالاقل نحجز لك وحده ..
فيصل: مابي ..
الام: قلنا نحجز ما نخطب ..
حس فيصل ان امه ما راح تتركه إلا لمن تقنعه فقال: اوكي ..
الام بفرحه: واخيرا .. فيه وحده في بالك ..؟!
فيصل: لا ..
الام: طيب شرايك في بنت خالتك فـ...
قاطعها فيصل: بلييز مابي من بنات اخوالي او عمي .. كلهم بزارين .. ابي وحده قدي او اصغر مني بسنه او سنتين .. ابي وحده فاهمه مو مبزره ..
الام: وش هالطلب الغريب .. الناس يدوروا عالصغيره وانت تبعد عنها .. مستحيل الاقي وحده قدك .. البنات اللي بعمرك تزوجوا وخلفوا ..
طلع فيصل فوق وهو يقول: عيل ما بتزوج ..
الام: اووف خلاص بدور لك .. ايه نسيت اقولك عمك عبد الغني وعائلته ياين باجر ..
ما اهتم فيصل للأمر وطلع ..
مر من جنب غرفة فارس فدق الباب ودخل ..
كان فارس واقف وفي ايده اوراق يرتبها ..
فيصل: شتسوي ..؟!
فارس بهدوء: ارتب اوراق المستشفى اللي بأقدمها باجر للجامعه كعذر غياب ..
فيصل: الله يعينك .. اللحين بتكون لك اختبارات كثير مؤجله ..
هز فارس راسه وما رد ..
طالع فيصل في فارس وبعدين قال: فارس شفيك ..؟! احس انه فيه شيء مضايقك ..
هز فارس راسه وهو يقول: مافي شيء .. بس نعسان شوي ..
ما اقتنع فيصل في كلامه بس ما حب يضغط عليه ..
فيصل: ايه صح فيه سالفه وعدتك فيها ونسيت انفذ وعدي ..
طالع فارس فيه وقال: ايش ..؟!
فيصل: سالفة لبنى .. وعدتك اكلم اهلها وتكون بيننا كلمه عشان اذا تخرجت تتزوجها ..
تذكر فارس لبنى .. وفي نفس الوقت تذكر اسيل ..
طالع في فيصل وقال: فيصل ..
فيصل: نعم ..
فارس: ليش سمحت لأسيل تطلع من البيت ..؟!
اندهش فيصل من سؤاله وقال: فارس .. بصراحه وقتها ما كنت بوعيي ..
سكت فتره وكمل: واتوقع لو كنت بوعيي ما كنت راح امنعها ..
لف فيصل وجهه يطالع في اللاب وقال: تصدقني يا فارس لو قلت لك ان حسيت بتأنيب الضمير كل ما تذكرت اللي كنت اسويه في اسيل ..؟!
طالع فيه فارس بتفاجؤ وبعدها ابتسم ..
فيصل: كل ما تذكرت المواقف اللي بيني وبينها احس بصغر عقلي وتفكيري .. انا بجد ندمت ..
بعدها طلع من الغرفه ..
فارس بإبتسامه: واخيرا يا فيصل ..
اخذ نفس وهو حاس براحه لأن اخوه تغير ..
رتب اوراقه واغراضه وبعد ما خلص طف اللمبات ونام ..

في نفس هالوقت ..
الموعد اللي حدده ابو سامي عشان يزور ابو غيدا ..
في البارت الجاي راح نشوف وش بيصير بينهم ..
لحد هنا يخلص البارت الثاني عشر ..
انتضروني في بارت جديد واحداث جديده ..

||:.. مقتطفات من البارت الجاي ..:||

||: صرخ راشد بعصبيه: اقســـــــم بالله اني راح اذبحهــــــا لو ما ابعدتوها عني :||

||: فتحت عيونها بصدمه من الكلام اللي تسمعه .. لفت ناحية خالد وهي تقول: لا مستحيل .. مو انا .. وربي اني مالي دخل ابدا .. خالد جذاب .. ايه جذاب :||

||: حط وليد ايده بجيبه وقال: بس ماكو سبب مقنع يخليك تكرهه .. بسام .. انا عارف انك مخبي عني اشياء كثير بس انا ما راح اجبرك على شيء .. بس حط في بالك انك اذا طحت في مشكله راح تلقاني اول واحد بيوقف جنبك :||

|$[ نهاية البارت ]$|