شبكة همس الشوق - عرض مشاركة واحدة

12 - 3 - 2014, 08:12 PM

|$[ البارت الثالث عشر الجزء الاول ]$|

في قصر سلطان الراهي ..
كانت الساعه الجداريه تشير الى ٢٠ : ٩ ..
تنهد سامي اللي كان مستلقي عالسرير وقال: ابوي مو صاحي .. اموت ولا اتزوج .. مستحيل اقبل بهالشيء ..
غمض عيونه وقال: خلوني عايش جذي احسن .. انا مرتاح في هالحاله ..
دق باب الغرفه فقال سامي: ادخل ..
دخلت ريندا وتفاجئت لمن شافته منسدح عالسرير ..
ريندا: سيد سامي لما لم تقم بتجهيز نفسك .. والدك ينتظرك بالاسفل ..
سامي: قولي له سامي نايم ..
ريندا: سيد سامي انا لا اكذب .. ليس هناك سببا يمنعك من الذهاب مع والدك فلما تتهرب ..؟!
لف سامي عليها وقال: ابوي يبي يخطب لي .. ها عرفتي ليش ..؟!
ريندا: وماذا في ذلك ..؟!!! الزواج هو اكمال للدين ..
لف سامي وجهه بضيق وقال: انتي مو فاهمه شيء فلا تتدخلي ..
طالعت فيه ريندا فتره بإستغراب بعدين قالت: لما هل الفتاه اللتي اختارها والدك لا تعجبك ..؟!
سامي: اصلا ما اعرف مين اختار ..
ريندا: اذا لما لا تريد ان تذهب ..؟!
سامي: سبب خاص ..
طالعت فيه ريندا فتره بعدين قالت: اذا انزل وقل هذا الكلام لوالدك .. لا تقحمني بمشاكلكم ..
تأفف سامي وقام من فوق السرير ..
خرج من الجناح ونزل من الدرج فشاف ابوه واقف ويتكلم مع مراد ..
لف ابوه عليه وشافه على نفس الملابس اللي كان لابسها بعد ما رجع من الجامعه ..
الاب: ليه ما بدلت هدومك ..؟!
سامي: ما ابي اتزوج ..
الاب: طيب لا تتزوج .. احنا رايحين نخطب وبس .. الزواج بعد ما تتخرج ..
سامي: قلت مابي اتزوج .. هذا يعني اني مابي اخطب لا اللحين ولا بعد مية سنه ..
الاب ببرود: مو بكيفك ..
سامي بعصبيه: إلا بكيفي .. انا صاحب القرار مو انت .. انا اللي بأتزوج مو انت .. لا تتدخل في حياتي الخاصه ..
الاب: فعلا ولد مهذب وألفاضك ذوق ..
ابتسم مراد بإستهزاء وهو يطالع في سامي ..
تنرفز سامي من حركته بس حاول يطنشه وقال لأبوه: المهم مابي اتزوج ..
الاب: راح تتزوج حبيبي رضيت او ما رضيت .. انا ابوك وادرى بمصلحتك وماكو احد بالعالم ما يبي يتزوج ..
طالع سامي فيه وقال: ايه انا ودي اتزوج واعيش واييب اولاد يشيلوا اسمي .. بس انت وامي دمرتوني وخليتوا هالامور مستحيله عندي .. انت السبب فلا تجبرني عالزواج ..
الاب: بعد كل اللي سويته عشانك صرت انا السبب ..!!!
سامي بقهر: ياليتك ما سويت اي شيء عشاني .. ليتني مت على ايده عشان ارتاح من هالحياة .. او عشت بعيد عنك عشان .....
سكت شوي بعدين كمل بهدوء: المهم انا مب رايح عند هالناس اللي حتى ما اعرف مين هم .. هذا اخر حجي عندي ..
طالع فيه الاب وقال بمنتهى الهدوء: سامي .. اذا كنت مو موافق تروح معي راح اضطر اسفرك تعيش عند امك ..
انصدم سامي من كلام ابوه ..
يعيش عند امه ..!!
لا مستحيـــــــــل ..؟!!!
طالع في ابوه فتره طويله يحاول يستوعب كلامه ..
يحاول يفهم هالكلمات اللي قالها ابوه ..
فتره طويلـــــــــه من الصمت بعدها لف سامي وجهه بضيق وقهر وقال بصوت منخفض: خمس دقايق واكون عندك ..
وبعدها طلع على غرفته ..
لف الاب ببرود يكمل كلامه مع مراد ..
قفل سامي باب الغرفه واتكى عليه وخصلات شعره على عيونه ..
كان مضهره هادي بس من داخل ينعاد المشهد هذا في باله ..
مشهد حصل قبل ١٧ سنه ..
مشهد حصل وهو بعمر ٤ سنوات ..
الكثير من المشاهد اللي قد صارت في طفولته وانحفرت بذاكرته ..
بس اللحين ما جاء في باله غيره ذا المشهد ..

:::::::::::::::::::::::::::::::::::::::::::::::::: ::::::::::
قبل ١٧ سنه ..

في زاويه من زوايا هالمكان الموحش كانت جالسه ..
وحده بعمر ٢٤ سنه تقريبا ..
وقدامها واحد ضخم البنيه ومعظل جسمه بعمر ٣٠ تقريبا ..
وبينهم طفله بعمر ٦ سنوات وحاضنه لعبه قطنيه على شكل ارنب زهري ..
اما سامي فكان موقعه بعيد شوي عنهم ..
واقف وقفه طفوليه ويطالع فيهم ومو فاهم شيء ..
رفعت البنت راسها وتقول وهي تبكي:no please my dear .. l'm sorry .. l'm very sorry .. this is my mistook>> لا ارجوك عزيزي .. انا آسفه .. انا آسفه جدا .. هذي غلطتي >>
اما الرجل صاحب البنية الضخمه فكان فاتح عيونه على اكبرها بصدمه ..
والطفله تطالع فيهم بإستغراب وطاح نضرها على سامي ..
ابتسمت وتقدمت عنده وهي مبتسمه ..
طالع سامي فيها بخوف طفولي ..
لحد الآن ارعبه دخول هالشخص وارعبه صراخه ..
مدت الطفله ايدها وهي تعطيه الارنوب اللعبه وتقول: take this ‎‏ <‏< خذ هذا << ..
ابتسم سامي لمن شاف اللعبه فأخذها ..
لف الرجل على سامي والطفله بنضره حاده فأرتعب سامي وطاح الارنب من ايده ..
تقدم الرجل بعصبيه من عندهم ودف الطفله بقوه عن طريقه فطاحت عالارض وبكت ..
طنشها الرجل ومسك سامي من رقبته وهو يقول بقهر: you son Sultan right ..‎?‎‎! ‎‏<‏< انت ابن سلطان صحيح ..؟!
وكمل كلامه والشرر يتطاير من عيونه: I HATE YOU ‎‏<< اكرهك << ..
وضغط على رقبته وبدأ سامي بالصراخ وهي ينادي على ماما وبابا ..
على امه وابوه ..
بس محد منهم اجابه ابدا ..

:::::::::::::::::::::::::::::::::::::::::::::::::: ::::::::::

غمض سامي عيونه بقوه وهو يحاول ينسى التكمله ..
تقدم وفتح الدولاب وخرج له اي بدله قدامه ولبسها ..
سامي بهدوء: راح اخلي البنت ترفضني .. وما دامها بويه فبيكون الامر اسهل ..
خرج من الغرفه ونزل من الدرج بس ما شاف ابوه فعرف انه ينتظره في السياره ..
خرج برى وركب السياره جنب ابوه ..
الاب: حرك ..
شغل السايق السياره واتجه لبيت غيدا ..
لف الاب يطالع في سامي وقال: ما عمري شفت خاطب يروح يخطب ببنطلون ..
سامي: .....................................
الاب: ولا متعطر ولا متكشخ حتى ..
سامي: انا مرتاح جذي ..
طالع الاب فيه فتره بعدين طنش ..

.................................................. ..............................................

في بيت غيدا كانت الاوضاع عندهم سيئه ..
غاده في غرفتها نايمه ومازن ومحسن في الصاله يطالعوا فلم سبيدرمان على اكشن ..
وفي داخل غرفة غيدا كانت غيدا واخوها معاذ وامها وابوها موجودين ..
الام: غيدا حركات بزارين احنا ما نبغاها .. الريال ياي في الطريج فتحركي وتجهزي ..
معاذ: يا بنت احنا نهرج معاج فتحجي .. مو من الفطور وانتي مسنتره هنا لا كلام ولا حركه ..
الام: غيـــــــدا بطلي عبط وتحركي ..
اما غيدا فلا حياة لمن تنادي ..
جالسه وسرحانه وفكرها كله في سامي ..
مصدومه من اللي سواه ..
ليه يخطبها مع انه قال ما يحبها ..؟!
والايام اللي راحت كانت دايم تضايقه وهو يعصب من حركاتها ..
مو قادره تستوعب او تصدق ..
حطت راسها بين ايدها وهي حاسه بصدآآآآع ..
تكره هالانسسان كثير ..
بس مو قادره تنسى انه كان حبها الاول بحياتها ..
شيء في داخلها يقول افرحي فحبك جاء بنفسه وخطبك ..
فهزت راسها بعنف ..
مستحيل ..!!
مستحيل توافق عليه ..
هي تكرهه ولا تبي تشوفه ابدا ..
هي اللحين بويه ولازم ترفض اي عنصر رجالي يقرب منها ..
هي تحبه بس هذا زمــــــــاان ..
اللحين الحب انقلب لكره وحقد ..
طالعت في اهلها وقالت: للمره الاخيره اقولكم انا مو موافقه ..
معاذ: بنت بطلي استهبال .. هذا واحد ما يتفوت .. اهله لهم سمعه قويه في عالم التجاره والاعمال الخيريه .. احمدي ربج ان احد فكر يخطبج ..
غيدا بقهر: انتم اللي بطلوا استهبال .. جم مره اقولكم اني مستحيل اتزوج ..؟! انتم ما تفهمون ..
الام: احترمي نفسج .. حكاية الزواج راح تتزوجين عاجلا او آجلا فاهمه ..؟! انتي مو صغيره وحركات المراهقه انتهت .. اللحين انتي حرمه والمفروض تتزوجي .. اللي بعمرج تزوجوا واولهم ريما بنت ام فيصل ..
غيدا بعصبيه: الزواج مو غصب ..
الاب: ايوه مو غصب بس لكل شيء حدود .. اسبابج للرفض مو مقنعه .. ييبي سبب مقنع عشان ترفضي ..
عصبت غيدا بعدها قالت: سامي ذا انسان مغرور ومتكبر ومغازلجي وما ترك بنت ما شبكها ولعب عليها .. انا لا يمكن اتزوج من واحد مثله ..
الاب: ذي حالة اغلب الشباب وابوه يقول انه يبي يخطب له عشان يعقل ..
فارت اعصاب غيدا وطلعت كل اللي حابسته في قلبها ..
علمتهم حقيقة سامي المو مشرفه بنضرها ..
لعل وعسى لمن يعرفوا حقيقته يبطلون ..
معاذ انصدم .. الام عصبت ..
اما الاب فقال ببرود: اعرف .. ابوه قالي .. وانا راضي ..
اما الام فصفقت غيدا كف وقالت بعصبيه: احترمـــــي نفسسج يا جليلة الحياء .. هذا ابتلاء من رب العباد والمفروض ما تعايرينه جذي .. من متى واحنا نتشمت في عيوب الناس ها ..؟!
عصبت غيدا من برود ابوها وحركة امها ..
طالعت فيهم وقالت بقهر: اكيد مو هامكم غير الفلوس صح ..؟! يعني مستقبلي ما يهمكم .. اذا تزوجته راح يعايروني الناس .. واذا يووا لي اولاد راح يعايرونهم الناس بأبوهم .. اوكي انا راح احضر الشوفه بس يصير خير ..
وطلعت من الغرفه بقهر وعصبيه ..
الاب: حجي ما يقولونه إلا اللي ناقصين دين ..
طالع معاذ في ابوه وقال: ابوي بصراحه كلام غيدا صح .. انا لو مجانها ارضى اتزوج السايق ولا اتزوج ذا الولد ..
الاب: حتى هالولد راح يرضى يتزوج خدامته ولا يتزوج وحده شاذه مخاويه لها بنات من جنسها .. فهمت .. تحمد ربها ان احد فكر فيها ..
وخرج الاب والام من الغرفه ..
تنهد معاذ وبعدها خرج ..

بعد ربع ساعه تقريبا وقفت سيارة ابو سامي قدام البيت ..
نزل سامي منها وقال: هالشارع انا قد ييته قبل فتره ..
طالع في بيت ام فيصل وقال: صح .. هذا بيت اسيل ..
نزل ابو سامي من السياره وتقدم ناحية الباب وراح سامي وراه ..
دق الجرس وبعد فتره فتح مازن ولمن شافهم قال: انت العريس صح ..؟!
تضايق سامي من ذي الكلمه وقال: ايوه ..
فتح الباب كله وقال: تفضلوا اللحين انادي ابوي ..
دخل سامي وابوه للمجلس اللي كان قريب من باب البيت ..
اما مازن فراح عند ابوه وقال: ابوي المعرس وابوه وصلوا ..
قام الاب وهو يقول: دخلتهم الميلس ..؟!
مازن: ايوه ..
دخلوا ابو مايد وولده معاذ عند سامي وابوه وسلموا عليهم ورحبوا فيهم بطريقه روتينيه ..
فبدأ ابو سامي يتكلم مع ابو مايد برسميه وسامي يطالع فيهم وهو يفكر ..
سامي في نفسه: "يقول ابوي انها بويه .. كويس اكيد راح ترفضني .. يعني ما راح اتعب في اقناعها" ..
دخل محسن عليهم وبإيده صينية قهوه ..
حطها قدامهم وسلم عليهم وبعدين بدأ يصب القهوه ..
اخذ سامي الفنجان حقه وقال في نفسه: "بصراحه ما عمري شفت احد يخطب في نص الاسبوع" ..
شرب شوي من القهوه وبعدين طالع في ابوه وابو مايد وهم يسولفون وسواليفهم عن الخطوبه ومن هالاشياء ..
ابتسم سامي بإستهزاء وكأنه في داخله واثق ان هالخطبه ما راح تتم ..
ابو مايد: ياللا اللحين راح تيي البنت وان شاء الله تعجبه ويعجبها ..
لف على محسن وقال: روح ناد اختك ..
قام محسن وهو يقول بهمس: الله يستر ..
دخل لداخل عشان ينادي غيدا ..
طالع سامي جهة الباب وهو يقول في نفسه: "اللحين راح تدخل وحده بعربجه وشعرها محلوق ويدها مليانه اساور .. بإختصار راح تدخل وحده تشبه غيدا" ..
من بعد جملته ذي دخلت غيدا بطريقه عربجيه مقصوده ولابسه بنطلون رصاصي عليه تيشيرت لنادي السد وايدها مليانه اساور اشكال والوان ..
طالعت في سامي نضرات ثاقبه كلها حقد وكره ..
اما سامي ففاتح فمه من الصدمه ..
انصعق اول ما شافها لدرجة انه يضن نفسه يتخيل ..
ابتسمت بإستهزاء وقالت: السلام عليكم .. هه عريس وياي ببنطلون ..
طالع ابوها بحده وحدددده معصب من لبسها وطريقة استقبالها لهم ..
انتبهت لنظرات ابوها فجلست عالكنبه وبعدها ما تكلمت ..
وسامي مازال مصدوم ومو مستوعب شيء ..
شلون غيدا هي البنت اللي خطبها ابوه له ..؟!
وايش معنى هي من بين كل البنات ..؟!
وشلون الزمن يجمعهم بصدفه زي كذا ..؟!
لا مو قادر يصدق ابدا ..
فجأه حس ان دمه فار وعصب ..
طالع في ابوه وقال: غيدا ..!!! ما لقيت غير غيدا ..؟!!
طالع ابوه فيه ببرود وما تكلم ..
لف سامي على غيدا وقال بإستنكار: انا اتزوجج انتي ..؟!! لا شكلج ماخذه بروحج مقلب .. لو اموت ما اطالع فيج ..
تنرفزت غيدا وقالت بعصبيه: احترم نفسك ساموه الغبي .. منو قال اني ابيج تتزوجني او اني مصدقه روحي انك بتتزوجني ..؟! لعلمك انت اللي ياي تخطبني مب انا .. فهمت اللحين منو اللي ماخذ بروحه مقلب ..؟!
عصب سامي من كلامها وكان راح يرد بس نضرة ابوه سكتته ..
ابتسم ابو مايد بإحراج وقال: معليش بنتي لسانها شوي طويل وما تقصد ..
هز ابو سامي راسه وهو يقول بهدوء: مو مشكله ..
حطت غيدا رجل على رجل وقالت: نسيت اقولكم اني كنت مخاويه بنت بس تفارقنا وقريبا راح اخاوي وحده ثانيه .. تكون اكمخ لو قبلت فيني وهذي صفاتي ..
وطالعت فيهم تنتظر ردت فعلهم وهي بالاصل مستغربه لأن سامي مو واضح عليه انه جاي يخطبها ..
غيدا في نفسها: "لا يكون مجبور علي ..؟!!" ..
طالع ابو سامي فيها فتره فقال ولده سامي بصوت مايسمعه إلا ابوه: ها شرايك بزوجة المستقبل اللي اخترتها لولدك الوحيد ..؟!
ابتسم ابوه وقال بنفس صوت سامي: جريئه ..
لف سامي وجهه للجهه الثانيه بضيق وقال في نفسه: "وش اللي اعجبه بهالخبله ..؟!" ..
طالع ابو مايد في بنته وقال: خلاص ادخلي لداخل اللحين ..
وقفت غيدا وقالت بإستهزاء: بااي يا عريس الغفله ..
سامي بصوت منخفض: تبن ..
سمعته وقالت بعصبيه: بفمك .. انسان وقح ..
طالع فيها وقال بإستهزاء: حشى رادار مو اذن ..
عصبت وكانت بترد بس ابوها قال بحده: غيــــــدا ..
طالعت في ابوها بقهر ولفت وطلعت من المجلس ..
دخلت الصاله عند امها واخوها مازن اللي ما زال يتابع فلم سبيدرمان ..
طالعت فيهم وقالت بعصبيه: يصير خير .. كلكم ضدي ها .. تبون تزوجوني من التبن هذا غصب عني ها ..؟! خلاص انا مو بنتكم عشان تهتمون بمصلحتي .. راح اكلم اخوي مايد .. هو الوحيد الصاحي في العائله وللمره المليون اقولكم الزواج ما راح يتم .. وراح تشوفوا كلام مين اللي راح يمشي ..
وطلعت فوق لغرفتها وصفقت الباب وراها بقوه ..
الام: حشى وحش مو آدميه .. وش هالدخول المفاجئ ..؟! اللهم سكنهم بمساكنهم ..

في المجلس قال ابو سامي: اوكي اللحين راح نروح .. البنت اعجبتنا وباجي نسمع ردها .. راح نعطيها اسبوعين .. هذا حقها ..
ابو مايد: شرفت والله وان شاء الله الامور بتمشي على خير ..
قام ابو سامي وقال: ياللا مع السلامه ..
ابو مايد: مع السلامه واعذرنا على وقاحة بنتنا بس ذي عادتها وما تبطلها ..
ابو سامي: لا عادي ما صار إلا الخير ..
اعطى ابو سامي نضره لولده ..
تنهد سامي وقال لأبو مايد: آعتذر عن وقاحتي اللي قبل شوي .. بس ذي عادتي ومع الربكه طلعت كلمات بدون حساب ..
ابو مايد: لا عادي لا تعتذر ولا شيء ..
ابتسم ابو سامي وطلع هو وولده من البيت وركبوا السياره ..
حرك السايق واتجه للقصر وبعد فتره من الصمت قال سامي بهدوء: راح امشي معاك بس تذكر شيء واحد .. زواج ما راح اتزوج .. حتى لو اضطريت اهرب او اسافر ..
ما رد عليه ابو سامي وكأنه ما سمع شيء ..

================================================== ==================

في صباح يوم الثلاثاء ..
فتح بدر باب المجلس وطف المكيف وبدأ يفتح الستاير وهو يقول: إياااد ياللا قوووم مدرسه ..
حط إياد اللحاف على راسه وهو يقول بصوت كله نوم: يا حمااار ولع المكيف وطس عني ..
بدر: لا .. بسسرعه ورانا اختبار انجليزي .. اصحى قبل لا اكب عليك الماي ..
جلس إياد وقال بضجر: اووف محد ياخذ راحته بهالبيت .. ازعاج ..
تكتف بدر وقال: يا ولد البابا اذا ما تبي ازعاج روح لبيت ابوك ..
إياد: لا تحاول تطردني انا مب طالع ..
وقف وقال: اسمع مالي شغل قل لأمك تعطيني غرفة مساعد .. انا مو متعود انام عالارض .. ظهري تكسر ..
بدر: نايم على فراش مو عالارض ..
إياد: يا شين الفلسفه على هالصبح ..
بدر: اقول إياد اسمع ..
إياد: ها ..
بدر: ترى امس بالليل ياء رشاش مع شوية غبار ..
إياد: طيب وش المطلوب مني ..؟! اطلع في النشره الجويه ..؟!!
بدر: ها ها سخيف .. لا بس ترى سيارتك انعدمت لأنها مب بالكراج ..
إياد بضجر: اوووف لييه .. هذا كله منكم ماخليتوا لي مجان بالكراج ..
بدر: احمد ربك اننا لقينا لك مجان بالحوش .. شحاذ ويتشرط ..
راح إياد جهة الحمام وهو يقول: قول لسواق يغسلها ..
بدر: يا بابا ما عندنا سواق ..
لف إياد عليه وقال: اممما عاد ..!!!
بدر وهو طالع: غسل بنفسك .. تلقى الليّ ورى الشجره بالزاويه ..
تأفف إياد وطلع للحوش ..
طالع في السياره وشافها معدومه ..
لف حواليه وشاف الليّ عند الشجره ..
اخذها وشغل المويه وبدأ يطش عالسياره ..
إياد: اوووف وربي مسخره .. إياد الراهي يغسل سيارته وبإيده صنبور الماي .. هذا عمره ما صار ..
خرج في هالوقت ابو مساعد من البيت وطالع في إياد ..
ابو مساعد: قاعد تغسل سيارتك ..؟!
ابتسم إياد بتسليك وقال: لا والله بس قاعد اسقيها عشان تكبر وتصير باص ..
ابو مساعد بعصبيه: تستهبل حضرتك ..؟!
إياد: والله مدري عنك .. شايف في ايدي صنبور ماي واطش على سيارتي .. يعني قاعد اصبغها مثلا .. اكيد اغسلها ..
ابو مساعد: اقول اسكت بس .. مو ناقص غير بزران يتفلسفون ..
ارتفع حاجب إياد ونزل وهو يقول في نفسه: "بزران ها ..؟!!" ..
لف ابو مساعد جهة الكراج عشان يطلع سيارته ..
ابتسم إياد بخبث ولف صنبور المويه جهة ابو مساعد وتبلل ثوبه وغترته وكل شيء ..
ضحك إياد غصب عنه من قلب وهو يقول: تحححفه ههههههههههه ..
لف ابو مساعد بعصبيه على إياد وقال بعصبيه: هذا انت صح ..؟!
هز إياد راسه ببراءه وهو يقول: لا مب انا .. ذي زوجتك ..
ابو مساعد بإستغراب: زوجتي ..؟!
اشر إياد على شباك في الدور الثاني وقال: الماي نزل من هناك ..
طالع ابو مساعد جهة الشباك وقال في نفسه: "صح هذا شباك غرفتنا" ..
لف على إياد وقال: حسبتك انت احمد ربك لأني كنت راح افرش فيك التراب .. بس اكيد زوجتي ما كان قصدها تطش علي ..
إياد بصوت منخفض: خروف ..
دخل ابو مساعد عشان يبدل ملابسه وكمل إياد غسل سيارته ..
إياد: اوكي جذي اكيد نضفت ..
فك الليّ من ايده عشان يروح يقفل الصنبور ..
اول ما فكه تحرك الليّ بطريقه عشوائيه بسبب قوة دفع المويه ..
حط إياد إيده قدام وجهه بس للأسف تبلل بالكامل من فوق لين تحت ..
قفل الصنبور وقال: هذا جزاء اللي ساويته في ابو بدر .. استاهل هههه ..
دخل البيت وهو يضحك ومو داري وش سبب هالضحك ..
اتجه للمجلس وفي الطريق مر من غرفه خاصه لأبو مساعد يعزم اصحابه فيها ..
لف وجهه للجهه الثانيه وبدأ يكح ..
كانت ريحة الشيشه طالعه واختنق منها إياد بسبب الربو اللي عنده ..
دخل المجلس وفتح شنطته وطلع منها منشفه وبدأ ينشف شعره ..
طلع له لبس ولبسه وبعدها اخذ شنطته وطلع وراح لغرفة الاكل ..
دخل واول ما شافته ام مساعد قالت بعصبيه: حتى اليوم بتتريق عندنا ..؟!
جلس عالكرسي وهو يقول: وباجر وبعده وبعد اللي بعده ليين اطفش ..
طالعت فيه بقهر وقالت: ومتى بتطفش ..؟!
هز كتفه وقال: الله اعلم ..
طالع فيها وقال: ايه صح ابي غرفة مساعد ..
ام مساعد بعصبيه: تحححلم ..
إياد: انتي ليه شريره .. اتقي الله يا بنت .. سوري اقصد يا إمرأه .. هههههه حلوه إمرأه .. متعوب عليها صح ..؟!
ابتسم بدر وضحكت لبنى وهي تقول: مهضوم كتيير هههه ..
ام مساعد بعصبيه: جب يا ولد الراهي .. لا تحدني اييب الشرطه عشان افتك منك ومن استهبالك ..
فتح إياد عيونه وهو يقول: الشرطه مره وحده ..!! انتي شطحتي بعييد يا ام بدر .. ترى الواقعيه شيء مهم بحياتنا ..
ام مساعد بقهر: ياخي متى تموت وافتك ..
إياد: هههههه اهليييين صرنا اصدقاء .. حلوه كلمة ياخي ههههههههههههه ..
دقه بدر وقال بصوت منخفض: اهجد .. كل وانت ساكت ..
ام مساعد بعصبيه: كلمه وحده وراح اوريك شغلك فاهم ..؟!
إياد: طيب جم الراتب .. هههه اعرف سخيف صح ههه ..
ام مساعد: اللحين ابي افهم انت على شنو تضحك ..؟! على سخافة عقلك ولا شنو بالضبط ..؟!
إياد: الدنيا كووول والضحكه شيء جمييل ..
طالعت فيه ام مساعد فتره بعدين قامت وقالت: شبعت .. بدر لا تتأخر عن مدرستك ..
بدر: طيب ..
خرجت فلف بدر على إياد وقال: وانت ما تعرف تمسك لسانك شوي ..
إياد: يعني تبيني اقعد ساكت ..!! ياخي اووم الطفش ..
لبنى: هههه بس بصراحه تعجبني كتير ..
بدر: طيب عالاقل وامي مويوده حاول ما تحتك معاها بالحجي ..
إياد بتسليك: يصير خير ..
طالع بدر في إياد وقال: ليش شعرك مبلل ..؟! انا قلت اغسل سيارتك مو اصطف ينبها واغسل نفسكم ..
إياد: هههههههههههههه اعجبتني ..
بدر: هههه ياخي عالأقل نشف شعرك عدل .. ما تشوف المكيف شغال ..
إياد بلا مبالاه: عادي ..
قامت لبنى وقالت: هيا تأخرنا .. انا بدي اوصل للجامعه بكير ..
إياد: يا حضك يا بدر .. عندك اخت مثل لبنى .. لهجتها حلوه ..
ضحك بدر وقام وهو يقول: هههه مستحيل تلاقي مثل اختي .. تحلم ..
إياد: هههه في ذي صدقت .. المهم اسمع بأروح معك اليوم ..
بدر: وسيارتك ليه ما تروح عليها ..؟!
إياد: توني منضفها فخلها تجف ..
بدر: تجف ..؟! ههههههه ليه هي ملابس ..؟!
إياد ببرود: تمسخر على راحتك انا ما يهمني ..
سكت شوي بعدين كمل بحماس: شرايك بكلامي قبل شوي ..؟! ههههه حسيت نفسي ثقيل ..
بدر: ههه ارحمنا يا شيخ ..
تأففت لبنى وهي تقول بداخلها: "ما يملوا من الهرج ابدا" ..
لبنى: بــــــدر إمتى حنروح للجامعه ..؟!
بدر: ايييه صح نسيت .. هيا ..
فخرجوا وركب بدر في سيارته ولبنى ركبت معاه بس ورى ..
ركب إياد جنب بدر بس بطريقه شوي غريبه ..
انسدح بشكل مائل ..
راسه على صندوق الاشرطه اللي بين المقعدتين وحاط رجل على رجل ومطلعها من الشباك وفي ايده جواله يطقطق ..
لبنى بإندهاش: إياد شو هاد ..؟!
شغل بدر سيارته وهو يقول: طنشي وصلحي نفسك ما شفتي شيء غريب .. اعتبريه شيء روتيني لأنها مب اول مره ولا آخر مره يتصرف تصرفات غريبه ..
لبنى بخوف: بس هيك جلسته مرره غلط .. بلكن إجت شاحنه سريعه وصدمت في رجلو ..
عقد إياد حواجبه وهو يقول: شاحنه سريعه ..؟!
هز راسه بالنفي وهو يقول: ما تركب ..
ورجع يطقطق بالبلاك ..
لبنى بترجي: إياد بلييز انا معتبرتك متل خيي وخايفه عليك ..
وقف إياد ضغط في جواله وسرح في كلام لبنى ..
إياد في نفسه: "اختي كيف هي ..؟! يعني هي حنونه وطيوبه مثل لبنى ولا العكس .. راح تخاف علي ان صار لي شيء ولا لا" ..
تنهد واعتدل في جلسته وسكر شباك السياره ..
لبنى براحه: ريحتني ..
ابتسم إياد وبعده رجع تفكيره بأخته ..
بعد فتره وقف بدر قدام الجامعه فنزلت لبنى وقال: باي ..
بدر: بااي ..
حرك السياره واتجه لمدرستهم ..
طالع في إياد وقال: هييه يا ولد شفيك مسرح ..؟!
لف إياد عليه وقال: بشاير ما ردت لك خبر ..؟!
هز بدر راسه وقال: من يوم ما اعطيناها بطاقة الصراف ولحد الآن ما شفتها غير نادرا وما امداني اتحجى معها .. بس ما دامها ما تحجت فأكيد انها لحد الآن ما طلعت شيء عنها ..
هز إياد راسه بتفهم وطالع في الطريق ..

================================================== ==================