شبكة همس الشوق - عرض مشاركة واحدة

13 - 3 - 2014, 03:23 PM

في مكان آخر مو بعيد عن بريطانيا ابدا ..
في احدى الفنادق الشاهقه في ليفربول ..
كان راشد الشعلان جالس عالكنبه ويطقطق بالجوال ..
رفع نضره وطالع في الغرفه اللي كان داخلها روان وشهد ..
وبعدها لف نضره عالارض وطالع في شادن اللي تلعب بالدبدوب حقها ..
رجع نضره للجوال يطقطق فيه وهو حده مقهووور ..
مو راضي ابدا على هذا الوضع ..
يحسها اهانه بحق نفسه انه يسافر مع شغالته عشان يعالجها ..

في داخل الغرفه كانت شهد جالسه عالسرير وروان واقفه تمشط شعرها ..
روان: خلاص كل شيء خلص .. ما باجي غير نروح لهم اللحين وتتنومي هناك لين يي وقت العمليه بعد ثلاث ايام ..
شهد: ..................................
روان: وان شاء الله تصيري بعدها بخير ..
شهد بهدوء: وين شادن ..؟!
روان: بالصاله تلعب باللعبه اللي اشتريتها لها ..
شهد: متى حنروح المستشفى ..؟!
روان: اللحين بس بأعدل شعري وبعدها نروح ..
شهد: روان ..
روان: هلا ..
شهد: بلييييييز اهتمي بشادن وابعديها عن راشد ..
روان: من عيوني ..
ابتسمت شهد وقالت: تسلمي ..

في الصاله الوضع زي ماهو ..
تأفف راشد وقال: اوووف متى يخلصوا ..
فجأه كان راح ينط من الفجعه لمن حس بحركه برجله ..
طالع في الارض وشاف شادن فقال بعصبيه: غبيه ابعدي عني يالدلخه .. اوووف ..
طالعت شادن فيه ببراءه بعدين وقفت واعطته الدبدوب وعينه اللي انخلعت ..
طنشها واشغل نفسه بجواله ..
ظهرت علامات الحزن على وجهها ..
حطت الدب وعينه عالكنبه وبعدها حاولت تطلع فوقها لين قدرت ..
اخذت الدب وجت جنب راشد ومدته له وكأنها تقول صلحه لي ..
طنشها راشد للمره الثانيه وهو يقول في نفسه: "اللهم طولج يا روح" ..
وقفت شادن وجت في حضنه وحطت الدبوب قدام جواله عشان يشوفه ..
ابعدها راشد عنه بعنف وهو يقول بعصبيه: ابعدي عني قبل لا اوريج شغلج ..
برطمت شادن بطريقه طفوليه وكأنها بتبكي ..
تأفف راشد وقال: اششش مابي اسمع بجي اطفال ..
فتحت فمها وصرخت تبكي وهي تضرب راس راشد بالدب حقها ..
عصب راشد ودفها بعيد عنه وهو يقول: ابعععدي عنـــــــي بالبـــــزره .. تراني ماسك اعصابي بالقوه فلا تحديني اضربج ..
بكت شادن اكثر وهي تسبه بكلمات مو مفهومه ..
اخذت الريموت ورمته على راشد .. حقد اطفال ..
صدم الريموت اسفل خد راشد فتألم ورمى جواله عالكنبه وهو ناوي شر ..
اول ما شافته شادن جاي عندها ضحكت وهي تنط عبالها انه جاي يلعب معها ..
جلس قدامها ورفع اصبعه قدامها بتهديد وهو يقول بحده: سمعيني عدل بالبزره الغبيه .. لو اشوفج ثاني مره مقربه صوبي ياويلج .. اقسم بالله لأهفج بكف اخليج تحرمين ازعاج الناس .. فاهمه ..؟!
طالعت شادن في ملامح وجهه الغاضبه وفي اصبعه اللي يدل عالتهديد وفهمت انه مو جاي يلعب معها ..
عقدت حواجبها الصغيره وفتحت فمها و ...
وعضضضت اصبع راشد بقووه وشراسة الاطفال ..
صرخ راشد من الألم وسحب إيده بقوه وطلعها من فم شادن ..
خرجت روان من الغرفه وهي تقول: شصاير ..؟!
طالع راشد في شادن بعصبيه وهجم عليها بقهر فأسرعت روان وابعدت شادن وهي تقول: بـــــــــس ..
صرخ راشد بعصبيه: اقســـــــم بالله اني راح اذبحهــــــا لو ما ابعدتوها عني ..
روان: راششد بطل عبط .. كببر عقلك .. ذي بزره ..
راشد بقهر: اول شيء قولي لهالبزره تتصرف مثل البزران عشان اكبر عقلي .. غبيه وهبله وحماره ..
شادن: اس كب .. دب .. << اصص كلب .. دب << ..
اشر راشد على شادن وهو يقول لروان: سامعه .. بالله عليج فيه طفله بعمر سنتين تتصرف جذي .. هذا كله من تربية اختها اللي مثل ويهها ..
شادن بغضب: اس اوكا .. << اصص ولا كلمه << ..
راشد بعصبيه: انطمـــــــــي انتي ..
فتحت شادن فمها وخرجت سييل من الطلاسم المو مفهومه ..
اما راشد فيعض على شفته بقووه وماسك اعصابه بالعافيه ..
اخيرا وصلت شهد لباب الغرفه وقالت: شادن حبيبتي تعالي ..
طالعت شادن فيها وراحت عندها وحضنتها ..
حضنتها شهد بقوه وقالت بصوت هادي: انت السبب في كل هذا يا استاذ راشد .. اختي المفروض تتربى احسن تربيه بس شلون اربيها وامي ماتت وانا اربع وعشرين ساعه اشتغل .. مافي وقت ايلس معها يلست اخت لأختها .. مافي وقت اعلمها السلوك الصح او اعلمها اسماء بعض الاشياء اللي ما تعرفها .. مافي وقت ألقنها بعض الكلمات المفيده او اقرأ عليها بعض الآيات ..
حضنت اختها وهي تكمل بصوت مخنوق: اخواني بيتشتتوا بسببك .. شادي متمرد وشقي .. كنت راح اربيه واعلمه السلوك الصح بس ما قدرت .. وسيم اهملته فصار يتعلم السلوك الخطأ من اخوه .. اثير من زمان وهي تعاني من ضعف في مادة الرياضيات .. كنت ابي ادرسها واعلمها بس ما قدرت .. اخذت ضعيف في الترم الاول وشكلها راح ترسب .. كله بسببك .. ما عندك ضمير تحس بغيرك .. انت اناني .. اناني بكل ما تعنيه الكلمه .. الله لا يسامحك ..
وبعدها دفنت راسها في رقبة اختها تبكي ..
طالعت روان فيها بحزن ولفت تطالع في راشد ..
ومثل ما توقعت .. كانت نضراته تدل على الغضب ..
روان في نفسها: "الى متى يا راشد ..؟! الى متى راح تضل في ذي القسوه ..؟! اصحى ياخوي وحس باللي تسويه في الناس" ..
وقف راشد وقال: اناني ها ..؟! صج انج وحده ناكره للجميل .. ما يكفي اني انتشلتج انتي واهلج من الفقر ورضيت اني اشغلج عندي .. ما يكفي اني اعطيج راتب يساعدج انتي واهلج في معيشتكم .. ما يكفي اني الآن مسفرج عشان تتعالجي من العمى عساج الحمى ان شاء الله .. كل هذا وتقولين اناني ..!!
صرخت شهد بين دموعها وهي تقول: شلووون انتشلتني من الفقر وانت كل يووم معيشني في مذله اصعب من الفقر نفسه ..؟! شلووون ساعدتني انا واهلي وانت ماتتركني ازورهم غير مره بالاسبوع ..؟! امي سائت حالها ومرضت وانا مب ينبها اساعدها واهتم فيها .. امي ماتت وتركت لي اكبر مسؤوليه اوايهها في حياتي .. ومع هذا ما قلت لي حتى كلمة احسن الله عزاج .. لا بالعكس تشمت وضربتني واهنتني في ذاك الوقت اللي كنت فيه احتاج لشخص يهدئني ويحاول يخرجني من الحزن اللي كنت فيه .. منعتني ازور اخواني واتهمتني ان عيني زايغه على ولد الييران .. اخواني كان من المفترض يتشردوا في الشارع بسببك لولا فاعل الخير اللي ساعدني أأمن لهم بيت يسترهم ويحافظ عليهم من الموت والضياع .. شلون ساعدتني وانت فرقتنا عن بعض ..؟! سفرتني لبريطانيا وتسمي ذي مساعده ..؟!! ذي مو طيبه منك لأنك انت السبب في العمى اللي انا فيه .. انانـــــــــي وراح تظـــــل اناني ..
عصب راشد وفار دمه من كلامها وراح لها بعصبيه وهو يقول: بجججد ناكـــــــره للجميــــــل .. خسسساره فيج الشفقـــــــــه ..
جت روان قدامه وقالت بصراخ: خـــــــــلاص يا راشد كفايـــــــــه ..
راشد بعصبيه: روااان ابعدي عن طريجي احسن لج ..
نزلت دموع روان وهي تقول: ورب الكعبه ان ما ابعدت راح اسافر واعيش عند خالي بأمريكا وتكون ذي آخر مره تشوفني فيها .. << راشد وروان اخوان من اب .. قد ذكرت هذا في الاجزاء القديمه << ..
انصدم راشد من كلامها وقال: روان ..
روان: انا ججاده ..
عض راشد على شفته بعصبيه وهو قابض قبضته بقووه يهدي نفسه ..
لف وراح لجهة الباب وقال: انتضركم بالسياره ..
وخرج من الجناح ..
اخذت روان نفس بعدها راحت عند شهد وقالت: شهد هيا ننزل ..
مسحت شهد دموعها وقالت: روان واللي يسلمج انتبهي على شادن .. واللي يعافيج يا حبيبتي ..
روان: اكييد .. ذي زي اختي الصغيره .. صدقيني بأحطها بعيوني ..
قامت شهد وراحت هي وشدونه مع روان لخارج الجناح وبعدين نزلوا للسياره واتجهوا للمستشفى ..

================================================== ==================

العصر الساعه خمسه إلا ثلث ..
وفي شقة اسيل ..
كانت واقفه قدام مراية الغرفه تضبط شعرها ..
دق جوالها في هاللحضه فلفت نضرها عالشاشه وانصدمت لمن شافت انها لين ..
رجعت نضرها للمرايه وهي تحاول تطنش ..
بعد ما خلصت راحت للمطبخ تطالع في الماي اللي حطته عالنار ..
شافته يغلي فكبت شوي منه في كوب بعدين حطت شوي سكر وحبه ليبتون ..
هذي اول مره بحياتها تسوي شاي وتتمنى ان يكون طعمه مقبول ..
اخذت الكوب وحركت السكر بالملعقه بعدها راحت لغرفتها ..
ولحد الآن الجوال يدق وكل ما وقف رجع دق مره ثانيه ..
طنشته اسيل وجلست عالسرير تلبس جزمتها لأنها اللحين راح تروح شغلها ..
بعد ما جهزت نفسها بالكامل اخذت جوالها بعد ما حطته عالسايلنت ..
اخذت الكوب وشربت الشاي و.....
ابعدت الكوب عنها بسرعه وراحت تشرب لها مويه عشان تبعد الطعم السيء عن فمها ..
اسيل: ايش هذا بالضبط ..؟! ليش طعمه سيء لهالدرجه ..؟!
كبت بقية الشاي بالمغسله وتوبت تصلح شاي مره ثانيه ..
السكر مو زايد ولا ناقص بس فيه طعم غريب ومررره سسسسيء ..
خرجت من شقتها وقفلت الباب بالمفتاح ..
لفت فطاح نضرها عالشقه اللي جنب شقتها اللي دايم تسمع منها اصوات ..
هالمره الباب كان مفتوح وقدام الباب كان هناك جزمه لطفله في شهورها الاولى ..
ابتسمت اسيل وقالت: شكل ييراني عندهم طفله .. بس غريبه بابهم مفتوح ..
حست بشيء يجرهها لهالشقه .. ما تدري هل هو فضول او شيء ثاني ..
تقدمت ولما وصلت دقت باب الشقه بس محد رد ..
دقت مره ثانيه وكمان محد رد ..
فضغطت زر الجرس ومحد رد ..
شوي سمعت بكاء طفله ..
فوقفت اسيل عن الدق بس صراخ الطفله ما وقف ..
اسيل: وين اهلها عنها ..؟! حرام ..
انتضرت عند الباب فتره وهي تسمع لصراخ الطفله وكأنها تنتظر احد يجي يسكتها ..
مرت دقيقتين والوضع مثل ماهو ..
اسيل: يمكن محد بالبيت عندها ..
ترددت بس في الاخير قررت انها تدخل ..
هي عارفه انه عيب تدخل بيت ناس بدون استئذان بس صوت الطفله قطع قلبها ..
دخلت بهدوء ومرت في الممر لين وصلت للصاله ..
كانت الصاله فوضويه نوعا ما ..
جاكيت رسمي عالكنبه .. منشفه غسيل بجانب التلفزيون ..
ثلاث اكواب قهوه فارغه عالطاوله الصغيره وصحن فصفص ..
كتب جامعيه ومدرسيه عالكنبه والارض موزعه مع شوية اقلام ..
عقدت حواجبها بإستغراب وهي تطالع فيها وقالت: عايله فوضويه جدا .. وكمان ما عمري شفت ناس تاكل الفصفص مع القهوه .. اللي اعرفه انها تكون مع الشاي ..
تقدمت شوي ورفعت كتاب مكتوب عليه العلوم الإداريه ..
فتحت اول صفحه تشوف الاسم .. مجرد فضول ..
بس اندهشت وهي تشوف خربشات غريبه ومو مفهومه ..
فتحت بعض صفحات الكتاب وشافت انواع ثانيه من هالخربشات ..
قفلت الكتاب وطنشت السالفه لأنها جايه عشان الطفله ..
عقدت حواجبها بإستغراب .. الصوت اختفى ..
ما صارت تسمع للطفله اي بكى ..
اسيل: قبل شوي كانت تبجي .. لا يكون صار فيها شيء ..
حست بخوف على هالطفله ..
بغت تدور عليها في الغرف بس بطلت ..
قررت انه من الافضل تخبر موضف الفندق عشان تتجنب اي مشكله مع اصحاب البيت اذا عرفوا انها دخلت بدون استئذان ..
نزلت الدرج واتجهت للموضف ..
اول ما شافته تذكرت شكله في ذيك الليله اللي كان سكران فيها ..
طالعت فيه وهي تتذكر لمن قال انها لقيطه .. كيف عرف ومن فين ..؟!
انتبه لها فقال: اهليين اسيل .. شو بلاج ..؟!
صحت اسيل من افكارها وقالت: ايه ييراني مو مويودين بالبيت وبنتهم تبجي وحدها وبعد مده انقطع صوتها .. انا خايفه عليها ..
فتح الملف اللي قدامه وقال: طيب شقه جم عشان نتصل برقم المستأجر ونشوف وينه ..؟!
اسيل: شقه رقم ١١ ..
رفع راسه وطالع فيها فتره وقال: محد استأجر هالشقه ..
انصصدمت اسسيل من كلامه وقالت: لا لا تأكد زين .. انا بنفسي شفت الشقه مسكونه واكثر من مره سمعت اصوات من عندهم ..
طالع في الملف مره ثانيه بعدين قال: الشقه رقم ٩ و١٠ و١١ مو مسكونه .. يمكن قصدج الشقه رقم ١٢ ..
اسيل: لا ذي شقتي .. طيب تعال بنفسك شوفها عشان تصدقني ..
الموضف: اوكي ..
طلعت اسيل الدرج وقلبها يدق بتوتر وخوف والموضوف وراها ..
ما راح تصدق كلام الموضف .. هي بنفسها دخلت وشافت الاغراض اللي تدل ان فيها اوادم عايشين ..
وصلوا للدور الثالث واشرت اسيل ناحية الشقه وهي تقول: ذي هي الشقه ..
الموضف بإستغراب: ليش بابها مفتوح ..؟!
تقدموا للباب واستغربت اسيل لأن الجزمه الصغيره مو موجوده ..
دخل الموضف ودخلت اسيل وراه ..
هنا كانت الفاجعه بالنسبه لأسيل ..
البيت فاضـــــــــي تماما ..
مافي جاكيت رسمي ولا منشفه غسيل ..
مافي اكواب قهوه ولا صحن فصفص ..
مافي كتب جامعيه ولا مدرسيه ..
مافي لا اقلام ولا مراسيم ..
جلست عالارض بصدمه والموضف يلفلف في الغرف الثانيه ..
بعد ما خلص وقف قدامها وقال: شكله يتراوالج لأنه ماكو شيء في الشقه .. والغبار مليان عالارضيه والجدران ..
هزت اسيل راسها ونبضات قلبها تدق بقووه وهي تقول: مستحيل .. الطفله .. طيب الجزمه انا شفتها .. كتاب العلوم الإداريه .. لا .. انا ما كنت اتوهم .. انا متأكده اني شفت كل هذا ..
طالعت في الموضف وقالت: كل يوم .. كل صباح .. كل مساء .. كنت اسمعهم .. ضحكاتهم .. سوالفهم .. مسجل الاغاني .. وربي اني كنت اسمع كل هذا .. مستحييل اكون اتخيل ..
تنهد الموضف وقال: استهدي بالله والساعه شوي وتصير سته .. تأخرتي على شغلج ..
قامت بمنتهى الهدوء وخرجت وهي في حالة اللاوعي ..
مو قادره تصدق اللي صار قبل شوي ..
مو قادره تستوعب كل هالاشياء ..
حست نفسها شوي وتبكي ..
هي متأكده من كلامها ..
هي واثقه من اللي شافته ..
هي سمعت كل شيء بإذنها ..
مستحيل يكون كل هذا اوهام ..
ركبت احد التكاسي واتجهت للمحل ..
حطت راسها بين ايدها بتوتر ملحوظ وهي تحس نفسها مجنونه ..
اشياء كثير تصير مالها تفسير ..
شلون تسمع صراخ طفله وفي النهايه مالها وجود ..؟!
شلون تشوف بعيونها اغراض متوزعه في كل مكان وبعدين تختفي ..؟!
يعني الاشياء اللي سمعتها وشافتها وش تكون بالضبط ..؟!
مستحيل تكون تتخيل او تتوهم ..؟!

ارتجف قلبها فجأه اول ما طرى في بالها الجن ..
هزت راسها بقوه وتحس قلبها راح ينشلع من مكانه ..
اسيل: مستحيل .. ماكو ينانوه .. اكيد ماكو ينانوه ..
بس العماره شبه مهجوره ..!
السكان قليل ..!
الشقق تخوف ..!
الاصوات الغريبه ..!
هزت براسها لا تبعد هالاشياء عن مخها ..
لمبات شقتها اللي ترجع وهي شغاله ..!
كوب الماي البارد ..!
تغير اماكن بعض الاشياء ..!
حطت ايدها على اذنها وهزت راسها بلا ..
شلون تكون العماره مسكونه ..؟!
شلون عايشه كل هالفتره مع جن ..؟!
شلون وشلون وشلون ..؟! مو قادره تستوعب ..
وقف راعي التاكسي وقال: كلاص وصلنا ..
طلعت له فلوس ودفعت الاجره ونزلت ..
اتجهت للمحل وهي تطالع في الارض وتفكيرها كله في الشقه ..
عقلها مشوش .. ترفض فكرة الجن ولا تبغاهم بس اللي صار يأكد انهم موجودين ..
مسستحيل هذي ارخص شقه واقرب شقه للمحل ..
ما عندها فلوس عشان تستأجر غيرها ..
ومستحيل ترجع للشقه بعد ما تأكدت بأنها مسكونه ..
مو عارفه شتسوي بالضبط ..
دخلت المحل ووقفت عند الباب فتره تطالع ..
منظر ثاني قدامها مو قادره تستوعبه ..
خالد + ليلى + جواد .. اوكي تمام ..
بس ايش دخل الشرطه كمان ..؟!
ثلاث عساكر بلباس الشرطه واقفين والكل يطالع فيها ..
خالد: واخيرا وصلت .. تأخرتي ساعه كامله .. لييش ..؟! كالعاده ضروف ها ..؟!!
ما استوعبت اسيل كلامه .. عقلها مشتت ما بين شقتها والشرطه اللي قدامها ..
لف خالد على شرطي ملامحه حاده وقال: ذي هي اسيل يا حضرة المفتش رامز ..
طالع رامز في اسيل وسأل بنبره جاده: انتي اسيل عبد الرحمن الرملي ..؟!
طالعت فيه وما تدري وش تجاوب لأنها ما تدري وش يبي هالشرطي بالضبط ..
تخاف تقول ايوه ويطلع هذا جاي عشانه كشف هويتها الحقيقيه ..
وتخاف تقول لا وتطيح نفسها بمشكله ..
خالد: وين لسانج الطويل ..؟! تحجي وقولي ايه وخلصينا ..
طالعت فيه بعدها قالت: ايه ..
م.رامز: شرطي حازم .. خذ بصماتها ..
تقدم حازم مسؤول البصمات واسيل تطالع فيهم بفهاوه ..
مو فاهمه اي شيء ..
قدم حازم جهاز يحتوي على سطح املس وقال: حطي هنا ابهام اصبعج اليمين ..
رفعت ايدها ونفذت الامر وهي مو مستوعبه السالفه ..
وطلب منها ابهام يدها اليسار وبعدها بقية الاصابع وبعدين ابتعد على جنب هو والشرطي الثالث ..
طالعت اسيل فيهم وقالت بتساؤل: شنو صار ..؟!
م.رامز: اللحين بتعرفين ..
بعد خمس دقايق رجع حازم وقال: البصمات متطابقه بنسبة ٩٨ % ..
لف رامز عليها وقال بإستهزاء: شنو صار ..؟! بكل برائه تسألين ولا كأنج مسويه شي ..
ارتبكت اسيل وخافت من كلامه وقالت: طـ طيب انا شنو ساويت ..؟!
م.رامز بحده: بطلي تصنع وياوبيني وين خبيتي الاوراق ..؟!
ارتعبت اسيل اكثر وهي تقول: اي اوراق ..؟! انت عن شنو تتحجى ..؟! انا مب فاهمه ..
خالد: حرباء تتلون بستين لون .. راح تضلي على نفس طبيعتج ومستحيل تتغيري ..
لفت اسيل تطالع في خالد وبعدها في الشرطي وقالت بنفاذ صبر: بلييييز خبروني .. شنو صاير هني ..؟!
م.رامز بعصبيه: تحليل البصمات يدل انه انتي فلا تمثلي البراءه .. التهمه ثابته ثابته فكفايه تمثيل ..
طالعت اسيل فيهم بنضرات حائره بعدها لفت على ليلى وقالت بترجي: ليلى بلييز قولي لي شنو صاير وشنو يقصدون ..؟!
لفت ليلى نظرها للجهه الثانيه وهي تقول: انسرقت اوراق مهمه ولقيوا بصمات ايدج عالدرج ..
خالد: طبعا ماكو غيرج وقد لاحضتج اكثر من مره وقد حذرتج بعد ..
فتحت عيونها بصدمه من الكلام اللي تسمعه .. لفت ناحية خالد وهي تقول: لا مستحيل .. مو انا .. وربي اني مالي دخل ابدا .. خالد جذاب .. ايه جذاب ..
م.رامز: البصمات تأكد فبطلي انكار يا اسيل ..
خنقتها العبره وهي تقول: وربي انه مو انا .. انا ما سرقت شيء .. اقسم بالله انه مو انا صدقوني ..
م.رامز: طيب ممكن تفسرين لنا شسبب وجود بصماتج في الدرج وفي الملف اللي كانت فيه الاوراق ..؟!
هز راسها بلا وهي تقول: لا .. مب .. مب بصماتي ..
صرخ رامز بعصبيه يقول: التحليل يأكد هذا بنسبة ٩٨ بالميه ولو رحنا للمخفر نحلل هناك جان التطابق يكون ١٠٠ بالميه .. لا تجذبي وقولي وين الاوراق ..؟!
نزلت دموع اسيل وهي تقول: والله العظيم اني ما سرقت شي .. والله ما سرقت شيء ..
م.رامز بثبات صبر: وين الاوراق ..؟!
لفت اسيل تطالع في خالد وانصدمت لمن شافت ذيك الابتسامه الخبيثه على شفته ..
شوي تذكرت تهديده امس ..
اسيل بسرعه: هذا خالد هو اللي سرق واتهمني .. ايه هو سرق لأنه هددني امس ..
خالد: قلت لكم انها حرباء تتشكل بأكثر من لون .. تسرق بعدين تمثل البراءه بعدين تنكر واللحين تتهم غيرها ..
ضرب رامز ايده بالمكتب وقال: وششلون يت بصماتج ان كان خالد هو السارق على قولتج ..؟!
طالعت اسيل فيه وهي بنفسها ما تدري شلون و....
شوي انعاد مشهد امس في مخها ..

:::::::::::::::::::::::::::::::::::::::::::::::::: :::::::::::::
الساعه ١٢ الا ثلث ..
يعني باقي ثلث ساعه وينتهي دوامها اخيرا ..
خالد: اسيل تعالي ..
استغربت اسيل وشافت في ايده اوراق يحسب فيها ..
جت عنده وقالت: نعم ..
خالد وهو مشغول بالحساب: طلعي الملف الازرق من الدرج الثاني عاليمين ..
عقدت اسيل حواجبها وهي تقول في نفسها: "ليلى قالت ان المكتب ممنوع احد يلمسه او يستعمله غير خالد .. غريبه" ..
لفت في الدرج المفتاح ففتحته وطلعت الملف الازرق وقالت: خذ ..
خالد: طلعي لي ورقه فيها ختم اخضر ..
تنهدت وبدأت تدور في الاوراق وبعدها لقيت الورقه فقال: ياللا اقري لي الرقم اللي بأسفل الصفحه ..
اسيل: ١١١٠٢٦٥٧٣٩٤٨ ..
وخالد يكتب بالورقه بعدها قال: اوكي رجعي كل شيء مجانه ..
قفلت الملف ورجعت كل شيء لمكانه ..
:::::::::::::::::::::::::::::::::::::::::::::::::: :::::::::::::

لفت اسيل ناحية خالد وهي تقول: ايه صح خالد امس طلب مني اطلع له اوراق من الدرج وعشان جذي طلعت بصماتي ..
خالد: هه تحولين التهمه لي .. من متى وانا اسمح للموضفين انهم يلمسوا شيء من الاوراق او الفلوس ..؟! هذا شيء عمره ما صار ..
اسيل بإستنكار: لا جذاب .. اقسم بالله انه امس طلب مني اطلع له اوراق من ملف ازرق .. اقسم بالله اني صاجه ..
م.رامز: ما دامج صاجه فليش ما ذكرتي هذا من البدايه ..؟! ببساطه توه اللحين طلع لج هالعذر ها ..
اسيل: لا لا بس كنت ناسيه و...
قاطعها خالد: ما عندج شهود فلا تحاولي تلفقي لي تهمه ..
اسيل: إلا .. امس المحل كان فاضي فأكيد شافوني جواد وليلى ..
لفت على ليلى وقالت: صح ياليلى .. انتي سمعتيه امس وهو يناديني صح ..؟!
هزت ليلى راسها وهي تقول: آسفه ما سمعت شيء ولا شفت شيء من اللي انتي تقوليه ..
انصدمت اسيل منها ومسكتها بأكتافها وهي تقول: شهالحجي ياليلى .. انا متأكده انج شفتيني .. ليلى بلييز قولي الصج ..
ابعدت ليلى نضرها عن اسيل وقالت: انا صاجه وهذا اخر كلام ..
هزت اسيل راسها بعدم تصديق ولفت على جواد وقالت: جواد انت شفتني صح ..؟!
ارتجف صوتها وهي تقول: ياوب بصج واللي يخليج ..
طالع جواد فيها فتره وبعدها رفع نضره لخالد شوي ..
حط ايده بجيبه ولف الجهه الثانيه وهو يقول ببرود: ما شفت ولا شيء ..
انهارت اسيل وجلست عالارض وهي تقول بصوت باكي: ليييه لييه .. الله لا يسامحك يا خالد .. حرام عليك والله حرام .. ليييه كل هذا يصير لي لييه ..؟!
غطت وجهها بإيدها وهي تقول: وينكم يا اهلي ..؟! ابي احد يساعدني .. اكرهكم ..
خالد: لييه ما قلتي لي من قبل انج ممثله هنديه بارعه جان قدرت ادور لج وضيفه بالسينما ..
م.رامز: عالمعموم راح تيي ويانا للمخفر لين تيي رئيسة هالمحل ونقدر نتفاهم ..
خالد: انصحج تطلعي الاوراق اللحين او تدفعي التعويض عالاقل ..
مسحت اسيل دموعها ووقفت وطالعت في ليلى وجواد فتره بعدها لفت عالشرطي وقالت: جم التعويض ..؟! بأدفعه وراح اعتبرها صدقه ..
م.رامز: سبع مائه وخمسين الف ريال ..
خالد: يعني مليون إلا ربع ..
فتحت اسيل عيونها بصدمه ورجعت خطوتين ورى وهي مو مصدقه ..
شلون اوراق بسيطه يكون تعويضها قد كذا ..؟!
خالد: هالاوراق تحتوي صفقه بين مشغل رئيسة المحل ومصنع ابو هتان وشركه كوريه .. اوراق مهمه جدا .. فيها اسماء الاجهزه اللي تستخدم في صناعة الملابس وطرق تركيبها واسعارها .. وضياع هالاوراق يكلف ٧٥٠ ألف ريال قطري ..
هزت راسها بلا ..
من فين لها هالمبلغ ..؟!
شلون راح تطلع نفسها من هالورطه ..؟!
ما عندها دليل براءه .. ما عندها شهود ..
الاشخاص الوحيدين اللي بيساعدوها تخلوا عنها ..
هل راح تساعد نفسها او مصيرها السجن لين يجي فاعل خير يدفع عنها هالمبلغ الضخم ..

ولهنا انتهى البارت الثالث عشر الجزء الاول ..
واقابلكم ان شاء الله بالبارت الجاي على خير ..

*ملحوضه مهمه: في البارتات اللي قبل قد كتبت هالكلمات اكثر من مره : الله يقرفك .. الله يرجك .. الله يخسك ..
حبيت اقول اني اليوم سمعت فتوى انها حرام وما يجوز نقولها فأتمنى انكم تحطوا هالحكم ببالكم وتنتبهوا وان شاء الله ما راح اكتبها مره ثانيه بعد ما عرفت حكمها ..

اختكم / صـــوصصـــإآ ..

|$[ نهاية البارت ]$|