شبكة همس الشوق - عرض مشاركة واحدة

13 - 3 - 2014, 03:27 PM

|$[ البارت الثالث عشر الجزء الثاني ]$|

صباح يوم جديد اشرقت فيه الشمس على بيت ام فيصل ..
فيصل وامه وفارس كانوا على طاوله وحده يفطروا ..
طالعت الام في ساعتها بعدين قالت: الساعه سبع ونص .. مو كأنك تأخرت عن جامعتك يا فارس ..
فارس: ..................................
لف فيصل جهة فارس فلاحظ انه سرحان ..
فيصل: فارس شفيك ..؟!
ما رد فارس عليه لأنه ما سمعه اصلا ..
عقله مشغول في ريما والكلام اللي قاله منصور ..
احتقر اخته في هاللحضه ..
فقال بهمس وقهر: غبيه ..
طالعوا امه واخوه فيه بإستغراب ..
الام: فارس ..
طالع فارس فيها وقال: نعم ..
الام: منو تقصد بغبيه ..؟!
قعد فارس فتره يطالع فيها بعدين قال: لا ذي وحده عندنا بالجامعه ..
اول ما نطق بذي الجمله تذكر لبنى ..
ابتسم وقال في نفسه: "من زمان ما شفتها .. حتى امس لمن وصلت اوراقي للمدير ما لاحضتها ابدا" ..
الام: على طاري الجامعه لقيت بنت تناسبك يا فيصل .. وحده جامعيه وحلوه وألف واحد يتمناها ..
فيصل بلا مبالاه: عيل خليها للألف اللي يتمنوها .. مابي آخذها منهم ..
الام بعصبيه: فيصــــــل ..
فيصل: يا يمه جم مره اقولج ما راح اتزوج إلا اذا تزوج فارس ..
الام: فارس توه صف اول .. باجي له يخلص جامعه وبعدين يشتغل ويكون نفسه وبعدها يتزوج .. انت خلاص شوي وتدخل ٢٧ من عمرك ومو ناقصك شي فمتى راح تتزوج ..؟!
فيصل: حتى لو تزوجت وانا في ٣٥ من عمري ما فيها شيء ..
الام بعصبيه: عيل ليه قبل امس قايل لي اختاري لي وحده ..؟!
فيصل ببرود: كنت ابي انام وارتاح فقلت جذي عشان تتركيني في حالي ..
انقهرت الام وقالت: راح ازوجك يعني راح ازوجك غصب عنك ..
لف فيصل على فارس وقال: اقول فارس ..
فارس: نعم ..
فيصل: اذا تبي اروح اكلم اهل لبنى عشان لا تتزوج احد قبل لا تخطبها فأنا حاضر ..
هز فارس راسه وهو يقول بهدوء: مو لازم .. ابي القى اسيل اولا لأنها اهم ..
رفعت الام راسها تطالع في فارس وقالت بعصبيه: اسسيل اسسيل .. هو احنا ما راح نفتك من سيرتها اللي مثل ويهها ..
قام فارس وقال: انا شبعت ..
اخذ شنطته فقالت امه بعصبيه: اكيد شبعت .. متضايق عشانها ها .. اقسسم بالله لو شفتها راح اقتلها .. للمره المليون اقولكم اكرهها فلا تييبوا سيرتها هالجلبه الفاجره ..
طالع فارس في امه وقال: حرام عليج يا يمه .. وهي عندج ما سلمت منج وحتى وهي بعيده عنج ما سلمت من وصفج لها .. هالبنت شنو ساوت عشان تكرهيها كل هالكره ..؟! دووم تسمع كلامج ولا تراددج واذا هاوشتيها ما تشيل بخاطرها عليج .. ما اعطيتيها حنان الام اللي فقدته .. ما قد ابتسمتي بويهها او ضحكتي لها .. انتي ليه قلبج قاسي جذي يا يمه ..؟! طردتيها من البيت والله العالم ان كانت حيه او لا .. واللحين بس تشتميها وتسبيها .. يمه لا تكوني قاسيه بلييز ..
الام بعصبيه: يعني اللحين هالاسيلوه اهم من امك ..؟! انا امك ينتك ونارك فلا تراددني او تحاجني بهالطريجه .. لو اسبها لو اذبحها بإيدي مالك حق تفتح فمك او تحاسبني يا ولد .. فاهم ..؟!
طالع فارس فيها فتره بنظرة حزن بعدها لف وخرج من البيت ..
جلست الام وهي تقول: بيينني هالولد .. مدري شنو اللي عاجبه بهاللقيطه بدون اصل ولا فصل ..
قام فيصل وقال: الحمد لله شبعت ..
الام: على وين باجي ما كليت شيء ..
فيصل: تأخرت على شغلي ..
خرج فيصل من البيت واتجه لسيارته فشاف فارس واقف قدام سيارة ريما اللي صارت له وسرحان ..
فيصل: فارس ..
صحي فارس من سرحانه وقال: ها ..
فيصل: شفيك ..؟!
فارس: لا ولا شيء ..
دخل ايده بجيبه عشان يطلع المفاتيح فتذكر شيء وقال: فيصل ..
لف فيصل عليه وقال: نعم ..
فارس: عندك سلف عشرين .. المكافأه تنزل باجر وخلصت فلوسي ..
ابتسم فيصل وقال: سلف ..؟! تستهبل ولا شنو .. انت اطلب لا تتسلف انا اخوك الكبير ..
فارس: هههه عيل عطني عشرين ولا تسأل عنها مره ثانيه ..
طالع فيصل فيه فتره بإبتسامه .. من زمان ما شاف هالضحكه على وجهه ..
طلع محفضته وبدأ يقلب بين كومة الفلوس والابتسامه اختفت من وجهه ..
في النهايه طلع عشره وقال: معليش فارس اللحين ما عندي غير هذي .. اذا بتنتضرني اصرف من الصرافه واعطيك فأنا حاضر ..
طالع فيه فارس بنضره لها معناها ..
هو شاف كمية الفلوس اللي بالمحفضه فليش يقول انه ما عنده غير عشره ..؟!
اخذ العشره بهدوء وقال: لا شكرا ..
وبعدها اتجه لسيارته ..
تنهد فيصل وركب سيارته وحركها متجه للشركه ..
ضغط بإيده عالدركسون وهو يقول: فاهم شتقصد بنضرتك يا فارس .. اعذرني ما اقدر اعطيك اكثر من عشره لأن هالعشره هي الوحيده فلوس حلال .. الباجي فلوس حرام وانا ما اقدر أأكلك حرام ..
ضغط عالبنزين واسرع على شغله ..

من جهه ثانيه وقف فارس السياره في مواقف الجامعه ولحد الآن فكره مشوش في حركة فيصل ..
مستحيل يكون بخيل لأن كلامه اللي قبل يأكد هذا ..
اذا ليييش ..؟!
وبدأت وساوس الشيطان تدش في راسه ..
هز راسه بلا وهو يقول: يمكن الباجي دين يبي يسدده لواحد من ربعه ..
دخل الشيطان مره ثانيه لراسه يقول/ واذا كان دين يقدر يعطيك وبعدين يسحب الباجي من الصرافه على قولته ..
عقد فارس حواجبه بتفكير بعدين هز راسه وتعوذ من الشيطان ودخل للجامعه ..
اتجه لكلاسه ودخله فشاف اصحابه سامر وماهر جالسين في كراسيهم وطاقينها سوالف ..
جاء فارس عندهم وقال: اهليييين ..
لفوا عليه واندهشوا لمن شافوه ..
فقاموا وسلموا عليه وهم حددهم مشتاقين له .. من زمان ما شافوه ..
ماهر: سلامات فرووس ما تشوف شر ..
سامر: احسن الله عزاك يا فارس ..
تذكر فارس ابوه وحس بألم في صدره ..
مشششتاق لأبوه بشكل مو طبيعي ..
ابتسم بهدوء وقال: مشكورين عالاهتمام ..
لف حواليه وما شاف منصور ..
ماهر: منصور غايب ..
فارس: آها ..
جلس على كرسييه وقال: وش اخذتم بالاسابيع اللي فاتت ..؟!
سامر: اوهوو اخذنا كثيير واختبرنا اكثر من اختبار .. الله يعينك ..
هز فارس راسه وقال: الله يعين .. امس لمن ييت عشان اقدم عذري قالوا لي رتب نفسك مع الدكاتره وصلح لنفسك جدول تختبر فيه اختباراتك اللي فاتتك ..
ماهر: امس ييت ..؟!
فارس: ايوه عشان اقدم عذري ..
ضربه سامر على ظهره وهو يقول: وليييش ما ييت عندنا ..؟!
فارس: ههه والله كان ودي بس كنتم بالمحاضره فما قدرت انتضركم لأني مستعيل ..
جاء واحد من الطلاب في هالوقت وقال: اهلييين فروس كيفك ..؟!
فارس: الحمد لله تمام .. كيفك انت يا ذياب ..؟!
ذياب: عال العال .. ليش لك غايب اسابيع ..؟!
فارس: كنت تعبان شوي ..
ذياب: سلامات ما تشوف شر .. حبيت اسألك صحيح ان اسيل مب اختك ..؟!
انصدم فارس منه وهو يقول: شنو ..؟!
ذياب: قبل فتره انتشرت اشاعه ان اسيل لقيطه ومو من عائلة الرملي .. صح ولا غلط ..؟!
زادت صدمة فارس من الكلام اللي يسمعه ..
معقوله انتشرت اشاعه عن اسيل اللي لحد الآن يعتبرها تؤامه ..؟!
كيف وليش ومتى ومين اللي انشرها ..؟!
السؤال الاهم هو الاخير .. مين اللي انشرها ..؟!
محد عارف غيره وفيصل وامه وريما ومنصور ..
مستحيل يكون واحد منهم هو اللي انشرها ..
ذياب: فارس وين رحت ..؟!
طالعوا سامر وماهر في فارس يشوفون ردت فعله ..
طالع فارس في ذياب فتره بعدها قال: ايوه ..
لانت ملامح ذياب وقال: الله يعينها .. ياللا استأذن ..
وراح .. حط فارس راسه بين ايده وقال في نفسه: "يالله يا اسيل .. انتي في عذاب .. وينج انتي اللحين عشان تشوفي وش صلحوا الناس من بعدج ..؟! حسبي الله على من كان السبب" ..

================================================== ==================

في نفس هالوقت وفي كلاس طارق ..
كان انس جالس على كرسيه وماسك كتاب يذاكر ..
وفهد معاه اوراق مراجعه يحل فيها والهدوء مسيطر عالكلاس تماما ..
اما طارق فكان جالس عالكرسي وحاط رجل فوق رجل على طاولته وسرحان ..
لف انس عليه وقال: طارق ..
طارق بهدوء: نعم ..
انس: ليه ما تذاكر ..؟! الاختبار بعد نص ساعه ..
طارق: ذاكرت في البيت وخلاص ..
انس: طيب راجع ..
طارق: انت عارف اني ما احب اراجع ابدا ..
انس: طارق انا بنفسي شفتك امس .. ما كنت تذاكر عدل لأن اغلب وقتك كنت سرحان .. ذي ماده صعبه .. اظهر شوية اهتمام يا طارق ..
طارق: ..................................
تنهد انس وقال: ماكو فايده .. بس تذكر في الامتحان ما راح تييك اسيل او شهد او مهند يساعدوك فبطل سرحان فيهم وذاكر ابرك لك ..
وكالعاده دخل الكلام من اذن وخرج من الثانيه ..
طالع طارق في ساعته بعدين قال: انس فهد ابيكم توصلوني لمجان ..
طالعوا فيه وقال فهد: وين رايح ..؟!
طارق: ابي اقابل ولد الراهي فوصلوني عنده وبعدها ارجعوا ذاكروا ..
انس: وش تبي فيه ..؟!
طارق: كلام خاص ..
فهد: ليه انت من متى تعرفه ..؟!
طارق: اصلا ما قد تقابلنا ولا اعرفه ..
انس: مادامكم ما تقابلتم فشنو هالشيء الخاص ..؟!
فهد: صح شنو تبي منه دامك ما تعرفه ..؟!
طارق بضجر: اوووه بتوصلوني ولا اروح وحدي .. ياكثر هرجكم واسئلتكم ..
طالعوا فيه فتره فقال انس: اوكي بنوصلك ..
جت عهد في هاللحضه وقالت بإبتسامه: هااي ..
طالعوا فيها وقال طارق: سلمي عدل ..
انحرجت عهد وقالت: السلام عليكم ..
لفوا انس وفهد يطالعون في طارق بقهر على اسلوبه الجاف وردوا عليها: وعليكم السلام ..
عهد بإبتسامه: كيفكم ..؟!
انس: الحمد لله تمام ..
فهد: بخير .. وانتي ..؟!
عهد: تمام .. كيفك يا طارق ..؟!
طارق بطفش: وش تبين ..؟!
طالعوا فيه اصحابه بعصبيه وودهم يضربوه على راسه عشان يعتدل ..
انحرجت عهد من رده وقالت: لا بس مريت فحبيت اسلم عليكم ..
طارق: اها .. اوكي ثانكس عالاهتمام ..
وراح فلحقوه اصحابه ..
انس بعصبيه: شهالاسلوب الجاف يا طارق ..؟! احرجت البنت ..
طارق: ما احبها وهي مصره تتلزق بأي طريجه .. ابيها تكرهني ..
فهد: ياخي تقدر تبعدها عنك بطريجه مو محرجه لها زي جذي .. خذها على ينب وقول لها انا احب بنت غيرج وخلاص .. الامر مو صعب ..
طارق: لو صلحت جذي راح تسوي مثل اللي بالمسلسلات وتحاول توصل لي بأي طريجه وتصير مشاكل مالها نهايه .. اما اذا خليتها تكرهني فهذا اسهل ولا تفتحوا الموضوع مره ثانيه ..
طالعوا فيه فتره بعدها سكتوا وما فتحوا الموضوع ..

اما عن عهد فكانت لساتها واقفه في مكانها تداري دمعتها ..
عهد في نفسها: "حرام عليك يا طارق .. ليش تسوي فيني جذي انا احبك ..؟! على كثر الصدود من جهتك إلا اني مو قادره اكرهك ابدا" ..
اخذت نفس عميق وهي تطالع في الكرسي اللي كان جالس عليه ..
عهد بإبتسامه: كل شيء فيك يعجبني .. ابتسامتك وثقتك بنفسك وحتى سرحانك اللي هالايام صار كثير ..
تنهدت وبعدها راحت للكرسي حقها ..

.................................................. ....................

عند شلة سامي ..
كان موجود هو ويزيد وصالح عند بوابة الجامعه ..
وتوه عماد دخل فقال سامي: وينك يا ريال ننتظرك من اول ..؟!
عماد: المهم دانا وريان يوا ولا باجي ..؟!
سامي: اطمئن اتصلت عليهم وقلت لهم يتأخروا ..
عماد: كويس .. ياللا وش المقلب اللي اتفقتوا تسووه ..؟!
طالعوا ببعض بعدين طالعوا بعماد وقال يزيد: اللحين احنا منتظرينك ليش ..؟! انت المفروض تييب المقلب مو احنا ..
عماد: لا تقولوا انك اعتمدتوا علي وما يبتوا اي شيء ..؟!
سامي: هذا اللي صار يا استاذ عماد ..
عماد: طيب ليييشش ..؟! ما تعرفوا تفكروا ..؟!
سامي: إلا نعرف بس اعتمدنا عليك على اساس انت ابو الافكار كلها ..
صالح: خلاص خلونا نأجل المقلب يوم ثاني ..
يزيد: لا مو حلو .. هم غابوا امس فالمفروض نصلح المقلب اليوم .. اذا تأخرنا يطلع المقلب سامج ..
تنهد عماد وقال: عيل خلونا نفكر عالسريع بمقلب خفيف وسريع ..
سامي: انا بصراحه ما اعرف شيء بالمقالب .. المقلب الوحيد اللي اعرفه هو اننا نحط حبل ولما يمرون نشده عشان يطيحون .. بس ..
يزيد: ياخي انت من اي عصر ياي ..؟! هذا المقلب قديييم .. حتى توم وجيري يسونه ..
عماد: هههههه مقلبك خطيير يا شيخ .. تصدق انه اعجبني ..
سامي بغرور: هه غصب عنك يعجبك ..
صالح: يا شباب بطلوا سواليف .. يمكن في اي لحضه يوصلون ريان ودانا ..
يزيد: ايه صح .. خلونا نفكر بسرعه في مقلب صاحي ..
ابتسم سامي بخبث وقال: هيه شباب .. مو يقولوا ان البنات يخافوا من الحشرات .. شرايكم نييب عقرب محنط ونحطه عند ريل دانا وواحد منا يدقها بإبره على اساس ان العقرب قرصها .. ونشوف ردة فعلها ..
يزيد بإستنكار: يممه منك يا سامي وش هالمقلب ..؟! البنيه راح تنجلط ..
عماد: هههه اعجبني ..
صالح: لا لا انا مو معكم .. هذا مقلب قوي ..
عماد: ياخي المقالب ما تطلع حلوه إلا اذا كانت قويه .. باجي ريان نييب له مقلب ..
سامي: اممممم دقيقه افكر لكم لأني طلعت العبقري حق الشله وانا ما ادري ..
صالح: عن العبط حقكم .. خلوكم واقعيين شوي .. البنت ما راح تتحمل ..
سامي: لا تكبر السالفه اكبر من حجمها يا صالح ..
يزيد: بصراحه انا مع صالح .. اذا بتسوا المقلب بريان اوكي بس في دانا اعذروني ما اقدر .. راح اطلع من السالفه ..
عماد: ياخي انتم الاثنين متعاطفين مع دانا كثير .. انا كنت اصلح مقلب اقوى من جذي مع لينا ولا صار شيء .. المهم انا رايح لقسم الاحياء اسرق لي عقرب محنط وايي ..
راح للقسم من هنا وبدأ يزيد وصالح يقنعون سامي من هنا ..
بس سامي كان مصمم وشكله هو اللي اقنعهم بروعة المقلب وحماسه ..
وبعد كم دقيقه رجع عماد وهو يضحك ضحكه شريره ..
عماد: يبت العقرب بنجاح ..
سامي: كفو والله .. واللحين ....
قاطعه يزيد: ريان ودانا يوا ..
لفوا عليهم بصدمه وقال سامي: لا مو وقتهم .. باجي ما يبنا مقلب لريان ..
عماد: ليش ما تأخروا شوي ..؟!
سامي: هات هات العقرب انا بأحطه ..
اعطاه عماد وقال: مو بسرعه .. يعني بعد ما نسولف شوي حطه ..
سامي: اوكي ..
اخذه وخباه ورى ظهره ..
ريان: السلام عليكم شباب ..
دانا بهدوء: السلام عليكم ..
يزيد + صالح: وعليكم السلام ..
عماد: وعليكم السلام اهليين ..
سامي: يا هلا بريان ودانا ..
ريان: عرفنا انك ما تعرف تسلم .. طيب عالأقل رد السلام ..
سامي بإحراج: وعليكم السلام .. ياخي لا تحرجني جذي ..
ريان: هههه انت اللي تحرج نفسك ..
سامي: المهم اللحين خلونا نيلس ونسولف ..
ريان: اوكي هيا ..
راحوا لمكانهم المعتاد وجلسوا ..
وطبعا سامي جلس جنب دانا وبهدوء حط العقرب بينه وبينها لين يجي الوقت المناسب ويدقها بأي شيء حاد ..
ريان: ها احكوا لي .. وش صار امس وانا غايب ..؟!
صالح: يوم عادي ما صار فيه شيء مهم و لا .....
قطع كلامه فجأه وكأن تذكر شيء ..
يزيد: إلا إلا صار شي .. فاتك نص عمرك ..
ريان: شصار ..؟!
اشر عماد على سامي وقال: ما دريت ان خوينا ذا خطب له بنت ..؟!
ريان بصدمه: شنــــــــــــــــــو ..؟!!!
اما دانا من الصدمه انربط لسانها ..
شلون خطب له وحده ..؟!!
شلووووون ..؟؟!!
شلـــــــــووون ..؟؟!!!
ظهرت علامات الضيقه على وجه سامي بس ابتسم وقال بمرح: هههه شفيكم يا شباب ابي اكمل نص ديني ..
هز ريان راسه بعدم تصديق ..
هو اكثر واحد عارف حياة سامي بتفاصيلها ..
هو اكثر واحد عارف شكثر سامي يكره الزواج ..
كل اللي صار قبل شوي ما دخل مخه ابدا ..
هو المفروض اللحين يفرح على تغير راي صديقه في الزواج ..
بس شلون يفرح على شي مو قادر يستوعبه ..؟!
طالع في سامي اللي مبتسم وهو يكلم اصحابه ..
هو صديقه وعارفه زين .. هالابتسامه كاذبه ..
فهم ريان ان مسألة الخطبه فيها شيء غلط ..
من جهه ثانيه وعند دانا ..
كانت تراقب حركات سامي وكلامه وهي مو مستوعبه شيء ..
سامي راح يتزوج ..!!
انصدمت من هالشيء وتضايقت ..
حست بضيقه فضيعه ورغبه شديده بالبكاء ..
مو قادره تفسر كل هذا ..
نزلت راسها وهي تقول في نفسها بألم: "الله يوفقه .. الله يوفقه" ..
كل هذا يصير وريان يراقبها بعيونه بعدين لف على سامي وقال: سامي طالع فيني ..
طالع سامي فيه فقال ريان: انت خطبت صج ..؟!
تردد سامي شوي بعدين قال: ايه ما تسمع ..
ابتسم ريان وقال: اللحين تأكدت ..
عماد: ريان راح تنصدم لو عرفت اسم اللي خطبها ..
ريان بإستغراب: مين هي ..؟!
عماد: غيدا ما غيرها .. ألد اعداء سامي ..
ريان بصدمه: غيـــــــــدا ..؟؟!!! غيداا يا سامي ..؟!!
سامي: يا جماعه خلاص غيروا الموضوع ..
ريان في نفسه: "فعلا يبي لي يلسه مع سامي عشان يفهمني حكاية قراراته المينونه" ..
اشر عماد لسامي بمعنى ياللا صلح المقلب ..
فهم سامي وطلع قلمه وفتحه ..
وبحركه خفيفه دق دانا في رجلها ..
حست دانا بشي فبعدت رجلها شوي وطاح نظرها على العقرب ..
ابعد سامي وقال بتفاجؤ مصطنع: يوه عقرب .. شيابه هني ..
ريان انصدم لمن شاف العقرب ..
مو مصدق ان قدامه عقرب حقيقي وبالجامعه ..
اما دانا ففتحت عيونها على آخرها وانشلع قلبها من مكانه ..
ارتجف جسمها كله وهي تقول بهمس متقطع: السـ ـسـ ـسـ السـ ـسـ ـم .. الـ ـسـ ـم .. آآآآآآآآآآآآآآآآآآآآآآآآآآآآآآآآآآآآآآآآآآآآآآآآه ..
وصرخت بأقوى ما عندها بخوف ورعب ما قد شافت مثله بحياتها ..
وبسرعه جاء سامي عندها وحط ايده على فمها عشان تسكت ..
صراخها يبين انها بنت ..
راح تنفضح اذا احد سمعها وشافها ..
جوا عماد ويزيد حوله عشان يغطون دانا عن الطلاب ..
من بعد ما صرخت دانا كل الطلاب والطالبات لفوا على جهة الشله ..
شافوهم جالسين مع بعض ودانا مو واضحه ..
صالح يكلم الطلاب: خلاص شفيكم لفيتو علينا .. كل واحد يروح لكلاسه بسرعه .. ياللا ..
لفوا بعض الطلاب وهم مستغربين .. هم متأكدين انهم سمعوا صراخ بنت ..
حاولت دانا تبعد ايد سامي وهي حدددها خايفه ومرتعبه ..
خلاص تحس رجلها تشنجت من كثر ما تخيلت ان سم العقرب دخل فيها ..
سامي: دانا دانا اهدئي لا تفضحي نفسج ..
نزلت دموعها وهي ما تزال تحاول تصارخ وتبعد سامي عنها ..
حاسه ان ما بينها وبين الموت إلا شعره ..
اما ريان فيطالع فيهم وهو مو فاهم شيء ..
عماد: دانا سمعي هذا مقلب والعقرب مو صج .. هذا عقرب ميت فهمتي ..؟!
سامي: سوري دنو ما كان قصدنا نسوي جذي .. شدرانا انج بتاخذي الامر بجديه ..
هديت دانا وهي تطالع فيهم وبدأت تفهم كلامهم ..
لما حس سامي انها هديت بعد ايده عنها وقال: اللحين انتي بخير ..؟!
ارتجفت شفتها وقالت: مـ ـقلـ ـب ..!
ريان بعصبيه: سخيفييين .. من صاحب هالفكره الغبيه اللي مثل ويهه ..؟!
طالعوا في بعض وقال سامي: ا ا انا ..
ريان بعصبيه: ياخي ما عندك عقل تفكر قبل لا تسوي شيء غغبي واهبل زي جذي ..؟! ولا مخك ما يشتغل إلا في المصايب والمشاكل بس ..؟! ليه ما تفكر بالعواقب قبل لا تخفف دمك وتصلح مقلب ..؟! ليه يا سامي ..؟!
فتح سامي فمه بيرد بس قاطعه صوت يقول: اووه يعني مثل ما توقعت ..
عقدوا حواجبهم بإستغراب ولفوا ناحية الصوت فشافوا واحد واقف ومتكتف يطالع فيهم ..
سامي: منو انت ..؟!
ابتسم وقال: انا حسان .. في نفس كلاس رفيجكم عادل ..
سامي: ايه طيب وبعدين ..؟!
حسان: لا ابد بس حبيت اقولكم ان شكوكي صارت صج بعد اللي صار اللحين .. من زمان وانا شاك بحركات عادل الغريبه .. بمعنى اصح حركات واحد مو ريال ..
تناقلت النضرات بينهم بشك وقال سامي بحذر: شتقصد ..؟!
حسان: هههه اقصد البنيه اللي يالسه وياكم .. اللحين تأكد انها بنت مب ريال من صرختها اللي قبل شوي ..
انصدموا كلهم من كلامه صدمه عنيفه ..
مشكله اذا اكتشف احد حقيقها ..
مصيرها السجن ..
ابتسم حسان وقال: حبيت اقولكم ان هالخبر راح اوصله لإدارة الجامعه بس مو اليوم .. ان شاء الله يوم السبت ..
قام سامي بعصبيه ومسك حسان من ياقة جاكيته وهو يقول بحده: اقص لسانك لو تفتح فمك بكلمه .. فاهم ..؟!
حسان: هههه شفيك همجي يا ولد سلطان ..؟! تهديدك ما راح يأثر فيني ابدا .. لا تحاول ..
لكمه سامي بقوه في وجهه وقال بعصبيه: انت بس يرب تفتح فمك .. شوف وش راح يصير لك ..
ترنح حسان من الضربه بعدين اعتدل وقال بإبتسامه: ما راح ارد عليك لأني ما راح احط عقلي بعقل بزارين .. انتظروني السبت ..
وراح بكل ثقه وسامي يطالع فيه بقهر ..
لف يطالع في دانا فشافها جالسه بهدوء تطالع في الارض ..
سامي: دانا انـ...
قاطعته دانا بصوت فيه رجفة البكى: مشكور يا سامي على مقلبك اللي فضحني .. مشكور ..
اخذت شنطتها وراحت بسرعه برى الجامعه ..
عوره سامي قلبه من كلامه ..
فقرر يلحقها عشان يعتذر بس اعترض طريقه واحد واقف وحاط ايده بجيبه ..
تكلم ذاك الشخص وقال: سامي ابي احاجيك خمس دقايق ..
طالع سامي فيه شوي بعدين قال: طيب تفضل ..
تنهد ذاك الشخص اللي ما كان غير طارق وقال: وش علاقتك بأسيل ..؟!
طارق جاء عند سامي بس عشان يعرف مكان اسيل ..
ما يعرف شيء عنها وعشان كذا يسأل اللي يعرفوها ..
بس لما شاف سامي غير سؤاله ..
بدل لا يسأله عن مكان اسيل سأله عن علاقته بأسيل ..
وكأنه يبي يطمئن اولا ان سامي ما يحبها ..
اول ما سمع سامي سؤاله انصدم ومسك طارق من اكتافه وهو يقول: اسيل .. وينها .. وين اسيل ..؟! هي فينها وفي اي مجان ..
انصدم طارق من لهفة سامي بالسؤال عليهم ..
انقلبت الصدمه الى عصبيه وقال: انا سألتك عن نوع علاقتك بأسيل فياوبني بسرعه ..
سامي بعصبيه: مالك شغل بعلاقتي فيها .. المهم قول لي هي فينها ..؟!
فارت اعصاب طارق البارد ومسك سامي من بلوزته وقال بحده: ياوبني عن سؤالي لأدفن قبرك هني .. اش علاقتك بأسيل ..؟!
ابعد سامي ايد طارق عنه وقال: علاقتي فيها كبيره وخاصه فلا تتدخل يالغريب ..
فتح طارق عيونه بصدمه ولكم سامي في وجهه بقهر وهو يقول: اششش .. انت جذاب .. لازم تشيلها من راسك فاهم ..؟!
تنرفز سامي من اللكمه اللي آلمته فمد ايده بيلكمه بس طارق مسك ايده قبل لا توصل له اللكمه ..
رفع سامي رجله وبركبته ضرب طارق ببطنه ..
تألم طارق فقال سامي بعصبيه: شيلها من راسك وجذاب ذي ما فهمتها .. المهم عندي اللحين اسيل .. وينها وشلون تعرفها ..؟! واياني واياك تمد ايد....
قاطعه طارق: اسسسكت .. انصحك انك تبعد عن طريجي وطريج اسيل عشان لا تندم .. فهمت يا ولد الراهي ..
عصب سامي واستعد عشان يضرب طارق ..
بس جاء ريان في هالوقت وقال: خــــــلاص يا سامي شفيك ..؟!
حرك طارق اصبعه وهو يقول: لنا لقاء ثاني يا ولد الراهي ..
وراح برى الجامعه ..
سامي بعصبيه: انت ليش وقفت بويهي ..؟!
ريان: سامي انت ما تعرف تمسك اعصابك شوي ..
سامي بقهر: الآدمي اللي قبل شوي رفع ايده بويهي وهددني .. اقسسم بالله اني مو ساكت له ابدا ..
ريان: سامي روق وهدي نفسك ..
سامي: اوووه انا ويين وانت ويين ..
وطلع برى الجامعه ..
تنهد ريان ولحقه لبرى ..
ركب جنب سامي بالسياره وقال: سامي انزل .. بعد شوي عندنا اختبار لا تنسى ..
غمض سامي عيونه وقال: ماني رايح بس ابي ارتاح ..
ريان: طيب منو ذا اللي كنت تتهاوش معاه ..؟!
سامي بقهر: مدري عنه .. واحد غبي وينرفز ..
ريان: طيب شكان يبغى ..؟!
سامي: يسأل عن اسيل ..
ريان بإستغراب: وليش ..؟!
سامي: مدري عنه .. خلاص سكر الموضوع لأنه ينرفزني ..
سكت ريان شوي بعدين قال: سامي سوري على الكلام والصراخ اللي صرخته عليك قبل شوي .. بس بصراحه نرفزتوني بحركتكم ..
سامي بهدوء: لا عادي .. انا غلطت ولازم اعتذر لدانا ..
ريان: ايه صح شسالفة خطبتك ذي المفاجئه .. انا مستحيل اصدق انك خطبت ..
سامي: كنت عارف انك مستحيل تصدقني ..
ريان: عيل شسالفه ..؟!
سامي: ابوي خطب لي غصب ..
ريان بصدمه: وليه ما عارضت ..؟!
سامي: عارضت في البدايه بس بعدين سكت ..
ريان: وليش سكت ..؟!
سامي بهدوء: ابوي خيرني بين الزواج او يسفرني عند امي ..
انصدم ريان من كلامه وقعد ساكت فتره طويله وهو يطالع في سامي ..
بعدها قال: صحيح دايم اقولك تزوج بس اللحين اعذرني .. زواجك غلط .. شلون تتزوج وحده تكرهك وانت تكرهها ..
سامي: اطمئن انا مستحيل اسمح بهالشيء .. وارتحت اكثر لمن عرفت ان غيدا رافضه .. وواضح ان ابوها غاصبها بعد .. بس زي ما قلت مستحيل اسمح بهالشي ..
ريان: عيل شنو راح تسوي ..؟!
سامي: مدري .. ما فكرت .. مدري افكر بمين او بمين .. زواجي او بنت عمي اسيل او دراستي .. هذا غير عن جاك اللي صرت اتحلم فيه كثير ..
ريان: هو اسمه جاك او جاكي ..؟!
تنهد سامي وقال بهمس: اسمه جاك .. بس امي تناديه جاكي .. وحتى ذيج اللي يسمونها اختي تناديه بجاكي ..
ريان: على طاري اختك .. ما تعرف شي عن اخبارها ..؟!
غمض سامي عيونه وهو يقول بألم: كافي كافي يا ريان .. انا قاعد اتعذب من داخل فسكر الموضوع كله ..
هز ريان راسه وبعدها سكت تماما ..

================================================== ==================