شبكة همس الشوق - عرض مشاركة واحدة

13 - 3 - 2014, 03:29 PM

المكان مخيف وموحش ..
وهي جالسه وضامه رجلها لصدرها ..
تبكي وتشاهق ..
اللي صار لها مو شوي ..
مظلومه بكل شيء ومن كل شخص ..
امها .. ابوها .. اهلها .. الناس .. كلهم ظلموها ..
عانت وعانت وعانت الى حد ما صار فيها اي طاقه للاحتمال ..
صبرت .. وتوكلت على الله .. ومع هذا محد راضي يرحمها ..
بنت ما تجاوز عمرها ١٩ سنه ذاقت اللي ما ذاقوه بقية البشر ..
لا اصل ولا فصل ..
لا اهل ولا سند ..
لا صديق ولا رفيق ..
واللحين محبوسه بين ثلاث جدران رابعهم اعمده من حديد ..
كرهت حياتها اكثر وتمنت الموت للمره المليون ..
وللمره المليون فكرت في الانتحار ..
تبي تفتك ..
تبي ترتاح ..
تبي الخلاص من كل هذا ..
بس في آخر لحضه تتذكر ربها وان هذا حرام ..
سحبت نفس عميق من صدرها وطلعته بمراره ..
٧٥٠ ألف .. مبلغ اكبر من تخيلاتها ..
شلوون راح تدبر مبلغ ضخم زي هذا ..؟!
من فين لها فلوس وهي راتبها ألف ريال بس ..
يبغالها اكثر من ٦٢ سنه عشان تجيب هالمبلغ ..
آآآآه ما تدري معاناتها متى راح تنتهي ..
ندمت لأنها ما سمعت كلام صاري ..
اكثر من مره قالها اذا تبيني اييب لج شغل ثاني فأنا حاضر ..
بس كانت ترفض ..
ما كانت تبي تزعجه وغير كذا كانت مرتاحه مع ليلى ..
ليلى اللي تخلت عنها وما ساعدتها ..
ليلى اللي ما شهدت معاها ..
هزت راسها وهي تقول بألم: ليه ياليلى .. ليه يا جواد ..؟! انا شنو ساويت لكم ..؟! انا بشنو أذيتكم عشان تجازوني جذي ..؟! حسبي الله عليك يا خالد .. الله لا يسامحك .. خلاص كرهت الشغل ومابي اشتغل فيه .. مابي ..
غمضت عيونها تحاول توقف نزول دموعها ..
من امس وهي هنا في السجن ..
حاولوا فيها تعترف بس شلون تعترف على شيء هي ما صلحته ..
فحطوها هنا لين تجي رئيسة المشغل تتصرف في الامر ..
فتحت فمها وقالت بهمس: وينك يا آرثر ..؟! لو كنت عايش جان ساعدتني .. ما كنت راح تقصر .. ابدا ..
لفت نظرها في السجن تطالع فيه ..
المكان مخيف .. مرعب .. مظلم ..
وهي هنا ولوحدها ..
اقشعر جسمها من الخوف وكأن هذا المكان ذكرها بالشقه حقتها ..
الشقه المخيفه المسكونه ..
تسارعت دقات قلبها وهي تتذكر كل اللي صار ..
الاصوات الغريبه .. الاحداث الغريبه .. الهمهمات الغريبه ..
كل هذا كان لا وجود له ..
ارتجف جسمها ونزلت دموعها اكثر ..
خـــايـــفـــه ..
خـــايـــفـــه ومحتاجه لأحد يحضنها .. يهديها .. يسمع لها ..
محتاجه للحنان .. تبي تشتكي لأحد ..
تبي تفضفض لأي احد ..
تعبت وهي تشيل بقلبها ..
ما عاد فيه مساحه اكثر لأوجاعها ..
بيجي يوم وتنفجر ..
تطلع كل اللي بقلبها ..
تصارخ .. تبكي .. تشتكي .. بيجي اليوم اللي راح تطلع فيه كل هذا ..
هي حاسه بذا الاحساس بس مو عارفه متى هاليوم .. ومين هالشخص اللي بتنفجر في وجهه ..
مو عارفه ..

تقدم احد الضباط الى السجن وقال بصوت جهوري: اسيل عبد الرحمن ..
رفعت راسها ومسحت دموعها اللي على وجهها وقالت: نعم ..
دخل المفتاح في القفل وفتح الزنزانه وقال: امشي وراي الى حضرة الرائد ..
قامت من مكانها وخرجت من هالمكان وهي تتمنى انها ما ترجع له مره ثانيه ..
اتجه الضباط لغرفة الرائد وهي تمشي وراه ..
فتح الباب وحيا تحية عسكريه وهو يقول: لقد احضرت المحتجزه اسيل عبد الرحمن ..
حرك الرائد راسه وهو يقول: دخلها ..
حيا التحية مره ثانيه وسمح لأسيل تدخل وبعدين قفل الباب وراه ..
طالعت اسيل في الرائد وانتبهت لرئيستها بالشغل جالسه عالكنبه ..
الرائد: اسيل لآخر مره اسألج .. وين الاوراق ..؟!
اسيل: قلت لك انا ما سرقت شي .. انتوا ليه مو راضيين تصدقوني ..
تنهد الرائد وقال: التهمه ثابته ثابته وانكارج ما راح يغير شيء .. الاوراق المسروقه مهمه جدا وهي عباره عن عقد شراكه بين ثلاث شركات اثنين منهم شركات عالميه واجنبيه .. في الاوراق عقود تثبت استلام الموافقه والكاتلوجات ومبالغ ماليه موقعه .. هذا غير عن التخطيطات السريه ضد شركات منافسه .. يعني لازم يندفع مبلغ ٧٥٠ ألف ريال قطري كتعويض عن ضياع هالاوراق .. واللحين يت مرام رئيستج في الشغل المسؤوله عن هالملفات عشان تتفاهم معاج .. وهذه هي جدامج ونصيحه مني لا تجذبين لأنه مب بصالحج ..
طالعت اسيل فيه شوي بعدين لفت على مرام ..
هزت مرام راسها بأسف وقالت: خافي ربج يا اسيل .. انتي دخلتيني بمشكله وايد صعبه .. ليه ساويتي جذي ..؟! منو اللي حرضج .. وليه ..؟!
فتحت اسيل فمها بتدافع بس قاطعتها مرام تقول: انا ما خلصت حجيي .. انا قبل جذي حذرتج وقلت ممكن اتغاضى عن اي شي إلا من ثلاث اشياء .. السرقه والخداع والنصب .. فقلتي بلسانج انج فاهمه .. شوهتي سمعت صاري اللي ياي يتوسط لج عندي .. بنت غبيه وتافهه .. ما كنتي ابدا قد الثقه .. ياليتني ما وافقت .. خربتي سمعت مشغلي اللي كان ببداية شهرته عالميا .. حسبي الله عليج ..
نزلت دموعها مره ثانيه وهي تقول بدفاع: والله العظيم ما خذيت شيء .. واللي خلقني ما مديت ايدي على شيء .. صدقوني .. شنو تبوني اساوي عشان تصدقوني ..؟! وربي اني بريئه .. انتم ظلمتوني والله ظلمتوني ..
مرام بعصبيه: بشنو ظلمناج يا بعدي .. بصماتج مويوده بمجان المفروض ما تقربي منه .. ممكن تقولي لي شنو اللي ياب بصماتج هناك ..؟! ياللا ياوبي يالبريئه ..
هزت اسيل راسها بلا وهي تقول: خالد .. خالد هو اللي طلب مني اطلع له اوراق من الدرج .. هو طلب مني عشان يوقعني .. هو اكثر من مره هددني صدقوني هو اللي سرقها ..
عصبت مرام وقالت: جــــــب .. حرام عليج تتهمي غيرج .. خالد هذا محل ثقه ويقرب لي بعد .. استحاله يكون له يد يالجذابه .. سمعيني عدل .. انا طلبت من الضباط انه يطلعج وابيج خلال اسبوع تدبري المبلغ فاهمه .. يوم الاربعاء الياي يكون جدامي يالمبلغ او الاوراق .. وهذا اخر حجي عندي ..
خرجت بعدها بسرعه وما سمحت لأسيل فرصه انها ترد ..
قدم لها الرائد اوراق وقال: وقعي عالخروج ..
طالعت فيه بعيونها المليانه دموع بعدها قالت: حرام عليكم .. مو عشانكم لقيتوا بصماتي اتهمتوني ..
الرائد: افرضي ان سجل من درجي بهالمكتب انسرق ولقينا بصمات وبعد بحث طلعت بصمات للبواب .. فتعتقدي مين يكون السارق انا ولا البواب ..؟! طبعا البواب لأن دخول هالمكتب ممنوع عليه .. اتمنى تكون الصوره وضحت جدامج ..
اسيل: وليه ما حطيتوا احتمال ان احد يحاول يتهمني ..
الرائد: اذا كل واحد مجرم قال انا ما سرقت وواحد لفق لي التهمه وعفونا عنه صارت الدنيا خراب .. ياللا وقعي ونصيحه منه انج تطلعي الاوراق قبل لا تضيع منج وتطيحي بمشكله ..
ما ردت عليه ..
كل ما دافعت عن نفسها طلعت كذابه ..
ما بإيدها شيء تسويه ..
اخذت القلم الازرق ووقعت وخرجت من المكتب بهدوء تام ..
طلعت من مركز الشرطه كله واتجهت للرصيف عشان توقف لها سيارة اجره ..
٧٥٠ ألف .....
كيف بتدبر هالمبلغ بأسبوع واحد ..؟!

ركبت التاكسي واتجهت لشغلها ..
راح تكمل الشغل لين نهاية الاسبوع عشان تاخذ راتبها كامل ..
طلعت اصابعها تحسب ..
١٠٠٠ ريال راتبها + ٣٥٠٠ ريال لساعة آرثر اللي معها + ١٧٠٠ بقية الاسواره اللي باعتها ..
٦٢٠٠ ريال بس .. هذا هو المبلغ اللي تقدر تدبره ..
طلعت نفسها بحراره وألم ..
حتى ربع المبلغ ما تقدر تدبره ..
مافي شيء تقدر تصلحه ..
مافي احد تقدر تتسلف منه ..
جاء في بالها صاري بس هزت راسها بلا ..
بيتهم كان جدا عادي ومبلغ زي كذا كبير عليهم ومستحيل يدفعونه لوحده غريبه ..
ما عاد فيه غير طريقه وحده وهي السرقه ..
بس للأسف هالطريقه ابدا ما اعجبتها ومستحيل تسويها ..
حاولت تقوي ثقتها بالله ..
راح تدور لنفسها شغل ثاني ..
شغل يكون الراتب بالساعات مو بالشهر ..
وقفت سيارة التاكسي قدام المحل ..
دفعت له اجرته من فلوس كانت بجيبها وبعدها دخلت المحل ..
لفت نضرها ناحية مكتب خالد ..
بتهزئه .. بتهاوشه .. بتحاول تخليه يعترف ..
بس للأسف ما كان موجود حاليا ..
تنهدت بألم ولفت تطالع في جواد اللي كان يتصرف ببرود ولا كأنه شافها وليلى اللي تلعب بأصابعها بتوتر ..
تقدمت لشغلها تشتغل فوقفت قدامها ليلى وقالت لأسيل بإرتباك: ا اسيل .. ا ا الحمد لله ع ا السلامه ..
طالعت اسيل فيها بنظرة احتقار وقالت: الله يسلمج وشكرا على اهتمامج اللي ما ابيه .. وحبيت اعطيج معلومه .. شهادة الزور من اكبر الكباير واللي حذر منها نبينا صلى الله عليه وسلم اكثر من مره ..
تجاهلت ليلى وراحت تستقبل احد الزائرات ..
عضت ليلى على شفتها وهي تتألم من داخل وتقول: "اعذريني بس والله غصب عني .. غصب عني" ..

================================================== ==================

الساعه وحده الظهر وقدام مدارس الثانويه للطلاب ..
خرج منها بدر وإياد واتجهوا لسيارة إياد لأن هاليوم جوا عليها ..
ركب إياد وقفل الباب وهو يقول: واخيرا ياء الاربعاء .. احب هاليوم وايد ..
ضحك بدر وقفل الباب بعد ما ركب وهو يقول: هههه اكيد .. ماكو احد يكرهه ..
حرك إياد السياره وهو يقول: ياخي انا مبسوط اليوم ..
بدر: ههه ليش ..؟!
إياد: واخيرا هالليله بأرقد في غرفة مساعد .. بالقوه امك وافقت ..
فتح بدر فمه بيرد بس ضحك إياد وهو يقول: ههههه اقول بدر شفت امك شصلحت اليوم ..؟!
بدر: وش صلحت ..؟!
إياد: لمن امك وافقت رحنا للسياره عشان المدرسه بس نسيت مفاتيحي ولمن دخلت تحداك شنو سمعت ..؟!
بدر: شنو ..؟!
إياد: هههه سمعت امك تكلم بالموبايل تقول بسرعه ارجع البيت يا مساعد ههههههههه تبي تبعدني عن الغرفه بأي طريجه ..
بدر: هههههه اسكت الله يصلحك ..
إياد: امنيتي اشوف شلون يكون ويهها لمن انام بالغرفه هالليله ههههههه ..
بدر: ههههههه خلاص فكنا من سواليفك ولا تنسى تمر على ثانوية البنات ..
إياد بإستغراب: شتبي ..؟!
بدر: ذيج اللي اسمها لينو .. اتصلت عليها اكثر من مره بس ما ترد .. ابي اعرف شنو صلحت لين اللحين ..
إياد: اها .. اوكي ..
لف بسيارته واتجه لمدرسة البنات الثانويه ..
بعد دقايق وقف قدام المدرسه وكانت البوابه توها تفتح والبنات توهم ينصرفون ..
لف إياد على بدر وقال: ليش ما كانت ترد على اتصالاتك ..؟!
بدر: مدري .. دقيت عليها ثلاث مرات بس ما ردت ..
إياد: ذي تستهبل ولا شلون ..
بدر: ياخي شفيك .. يمكن عندها ضروف .. خل عندك حسن ضن ..
تنهد إياد وتربع واخذ جواله يطقطق فيه وهو يقول: طيبتك زايده عن حدها .. بس اوكي بأخذ الامر بحسن ضن واعتبر ان عندها ضروف ..
بدر: اهو هذه هي ..
دق إياد بوري سيارته فلفت لينو عليهم واستغربت من السياره الرياضيه اللي تنادي عليها ..
هزت راسها بلا وهي تقول: لا تاخذي بنفسج مقلب .. يمكن ما يقصدونج ..
لفت ناحية سواقها فدق البوري مره ثانيه ..
هنا تأكدت ان السياره تقصدها وخصوصا انها الوحيده الواقفه فذي الجهه ..
راحت للسياره ولمن شافتهم قالت بصدمه: انتوا ..؟!!!
بدر: اهليين .. ليش ما تردين عالموبايل لمن كنت ادق ..؟!
لينو: اولا ليش غيرتوا سيارتكم .. قبل جذي كنتوا بكامري ابيض ..؟!
بدر: ذيج كانت سيارتي وهذي سيارة رفيجي إياد ..
لفت نضرها تطالع في إياد اللي يطقطق بجواله وقالت في نفسها: "ما استغرب .. الولد واضح عليه ولد عز .. قطيعه حتى اولاد الثانويه كشخه وخقق وانا عبالي ان اولاد الجامعات هم الكشخه والرزه" ..
طالع إياد فيها وقال: مضيعه شيء بويهي ..؟!
لينو بإستهزاء: ها ها ها من زين هالخشه ..
اكتفى إياد بضحكه قصيره تدل عالثقه ورجع يطالع في جواله ..
لفت لينو على بدر بعدين قالت: سوري ما رديت لأني كنت بحجرتي اذاكر .. هالايام مضغوطه امتحانات ..
بدر: اوكي المهم وش صار على اللي قلناه لج ..؟!
لينو ببلاهه: نسيت وش طلبتم ..
رفع إياد نضره عن الجوال وطالع فيها بدهشه ..
ونفس الحال عند بدر ..
ضحكت وقالت: ههه كنت امزح ..
إياد: سخيفه ..
ورجع يطقطق بالبي بي ..
بدر: المهم وش صلحتي ..؟!
لينو: سرقت السجلات من اغراض بابا شوي صعبه .. اعطوني جم يوم ..
بدر: يعني جم تبين ..؟!
لينو: اممم اسبوع ..
بدر بدهشه: تستهبلين انتي ..!!!
لينو: لا ما استهبل .. بابا نادرا يكون بالبيت والمكتب حقه الخاص دووم مقفل .. عبالك السالفه سهله ..
بدر: بس اسبوع مرره كثير .. مو معقول ابوج يغيب عن البيت اسبوع ..
لينو بحده: يب مو معقول بس الاوراق اللي تطلبوها موجوده بالمكتب وهو ما يدخل المكتب غير مره او مرتين بالاسبوع .. ولما يدخل يقفل الباب وراه ولما يخرج يقفل الباب وراه .. يعني السالفه شبه مستحيل ..
تنهدت وكملت: احمدوا ربكم اني اساعدكم في مهمه ضد بابا .. لا تضغطوا علي اكثر من جذي ..
إياد ببرود: طيب ليش معصبه ..؟!
لينو بقهر: لاني معصبه ولا شي ..
إياد وهو يطقطق بالجوال: اها .. سوري اذا ..
تنرفزت من اسلوبه ولفت على بدر وقال: انتضروني بعد اسبوع ..
وراحت عنهم ..
لف بدر على إياد وقال: ياخي شفيك انت .. ما تعرف تسكت ..
إياد: صجتني .. واقفه عند دريشتي وتهرجك انت .. اذني انزعجت من حدة صوتها .. والمشكله تقول انا مو معصبه ..
بدر: خلاص لا تعصب .. حرك ..
إياد: هههههههههههههههههههههههههههههههه ..
بدر: بسم الله شفيك تضحك ..؟!
إياد: لا ولا شيء ..
بدر: نفسيه ..
إياد: افا اللحين انا صرت نفسيه ..!!!
بدر: عيل ليش تضحك فجأه بدون سبب ..؟!
إياد: لا بس قفزت في مخي احداث اول لقاء بيني وبين ولد العم .. واحشني وايد ههههه ..
بدر: الله يشفيك .. حرك حرك ..
ضحك إياد وحرك السياره متجه للبيت ..

اما عن لينو فأتجهت لسيارة السواق بس سمعت صوت صاحبتها: لينـــــــــو ..
لفت لينو فشافت صديقتها سيمو "اسماء" ..
لينو: هاي سيمو .. هههههه طلعتج ابله شيخه ..
سيمو بضجر: قطيعه .. خبله وايد .. يعني وش فيها لو فصفصت بالحصه ..؟!
لينو: المهم نضفتي الفصل زي ما عاقبتج الابله ..؟!
سيمو: انا حلفت اني ما انضف ..
لينو: عيل شلون طلعتج ..؟!
سيمو: ههههه هربت ..
انفجرت لينو ضحك وهي تقول: هههههه يا مينونه .. يوم السبت راح تشوفي الويل منها ..
سيمو: ههه عارفه عشان جذي بأييب صفصف بنت عمي عشان تتوسط لي عندها تسامحني ..
لينو: وتتوقعين وصايف راح تساعدج ..؟!
سيمو: ههههه لا بس بأحاول ..
لينو: هههه المهم شرايج تيي معاي اليوم نتغدى ببيتي ..؟!
سيمو: يا شيخه لا تسألين .. راح اوافق اكيد ..
لينو: ههه عيل خليني اخذ موبايل السواق عشان تحاجين ابوج ..
استأذنت سيمو من ابوها وبعدها ركبت هي ولينو مع السواق واتجهوا للبيت ..
سيمو: ايه صح شفتج من بعيد واقفه جدام سياره رياضيه .. مين صاحب هالسياره الصاروخ ..؟!
لينو: بدر وإياد ما غيرهم ..
سيمو: اخسس .. من فين لهم هالسياره اللي جذبت انتباه كل بنات المدرسه ..؟!
لينو: هي لإياد وشكل هالولد كاش ..
سيمو: طيب شكانوا يبون منج هالمره ..؟!
لينو: يسألوني عن السجل اللي طلبوه ..
سيمو: شنو قلتي لهم ..؟!
لينو: ماطلت معهم .. قلت ان علي ضغط امتحانات وبابا نادر يي البيت والسجل بالمكتب ونادر يدخل له وجذي يعني ..
سيمو: هههههههههه وبعدين ..؟!
لينو: قلت لهم ينتضروني اسبوع ..
سيمو: اسبوع يالظالمه ..
لينو: ههههه خلينا نستمتع شوي .. ماكو شي ببلاش ..
سيمو: هههه طيب انتي راح تعطيهم السجل ولا لا ..؟!
لينو: ما فكرت .. وقتها يحلها ألف حلال .. ياللا وصلنا ..
وقف السواق ونزلت لينو وسيمو ودخلوا للبيت ..
لفت لينو وطاح نظرها على مكتب ابوها وقالت لنفسها: "ليش بابا دايم يقفل هالغرفه .. اول مره اسأل نفسي هالسؤال" ..
لفت على سيمو وقالت: امشي نطلع فوق نبدل مراييلنا ..
سيمو: ههههه هالمره انا اللي بأختار اللي يعجبني ..
لينو: اوكي ههه ..

.................................................. .....................

وفي مكان مو بعيد عن لينو وسيمو ..
في نفس البيت وفي الديوانيه الخاصه بجراح ..
كان جالس فيها هو وصديقه ضاري ..
صب جراح لنفسه شاي وهو يقول: ها قابلت ولد عم إياد ..؟!
اسند ضاري ايده على المتكى وهو يقول: ايه امس قابلته .. اتوقع اسمه سامي صح ..؟!
جراح: ايه .. ها طلعت منه بفايده ..؟!
ضاري: ابدا ..
جراح بصدمه: وشو ..؟! لا يكون زي بدر مو راضي يقولنا شيء عن رفيجه ..!!
ضاري: لا مو زيه ..
جراح: عيل وش صار ..؟!
ضاري: ابد بس سلمت عليه وقلت انت ولد سلطان قال ايه فقلت انا رفيج إياد .. ياخي تضايق ويقول ما صدقت افتكيت من إياد حتى ييوني اصدقاه بعد ..
جراح بإستغراب: وشو ..؟!
ضاري: اللي سمعته .. شكله يكره إياد .. احنا كنا نبيه عشان نعرف منه وش هي نقطة ضعف إياد .. يعني وشهو الشي اللي نقدر نضغط فيه على إياد عشان يفتح حلجه ويتحجى بس شكله ماكو فايده ..
جراح: مو معقول .. ذيج الليله اللي قابلنا فيها إياد انا ويزن ياء ولد عمه وساعده .. شلون تقولي اللحين انه يكرهه ..؟!
ضاري: هذا اللي صار .. سويت نفسي مصدوم وقلت ليه تكره إياد تراه واحد حبوب وينحب بسرعه انزعج مني وهزأني وقال اذا تحبه انقلع عن ويهي وروح عنده .. ابدا ما قدرت اطلع منه اي معلومه ..
جراح بقهر: ياخي ليش هالانسان معقدنا .. يا اننا نقابل واحد يحبه مرره او واحد يكرهه مرره .. ليش ما نقدر نطلع عنه اي شيء ..
سحب ضاري نفس من سيجارته وقال: الحظ معاه ..
لف على جراح وقال: لازم نتصرف .. التأخير مب بصالحنا ابدا ..
اشعل جراح هو الآخر سيجارته وقال: معاك حق .. الكميه اللي مخزنينها راح تخلص يالليله او باجر .. وانت عارف اننا ما نقدر نعيش بدون هالشيء اللي نتعاطاه .. راح نهلك ..
هز ضاري راسه بصمت ..