شبكة همس الشوق - عرض مشاركة واحدة

13 - 3 - 2014, 03:34 PM

بيت ام مساعد ..
فتح إياد باب غرفة مساعد وطالع فيها بإنتصار ..
واخيرا حصل على الغرفه ..
ضحك ضحكه طويله وهو يحس نفسه حقق نصر كبير ..
بدر: الله يشفيك ..
إياد: ههههه ياخي شعور الفوز حلو .. والله حلو ..
بدر: هههههه لا تتحجى صوتك غريب ..
إياد: ايه صح حسيته تغير ..
بدر: لا يكون بتزكم ..
إياد: ان شاء الله لا .. انا مو ناقص صخونه وتعب وغياب عن المدرسه ..
حط بدر إيده على راس إياد بعدين قال: تصدق ان حرارتك مرتفعه ..
إياد: لا لا تقول ..!!
بدر: من صج مرره مرتفعه .. انتظر اييب لك بنادول وقلاس ماي ..
خرج من الغرفه وفي نفس هالوقت دق جوال إياد ..
طالع في اسم المتصل ولمن شاف انه ابوه طنش ..
فتح محفضته وقلب فيها شوي بعدين قال: خلصت الفلوس اللي عندي .. لازم اصرف لي من الصرافه ..
تذكر بطاقته الصرافه الثانيه اللي عند جراح وربعه ..
تنهد وقفل المحفضه وجلس عالسرير ..
دخل بدر ومعاه حبتين بنادول وكوب مويه واعطاه إياد ..
اكل إياد الدواء وشرب الماي وبعدين قال: اسمع بدر انا طالع شوي ..
اخذ بدر منه الكاسه وقال: وين رايح ..؟!
إياد: بس بصرف لي فلوس وايي ..
بدر: عيل لا تتأخر لأن العشاء شوي ويجهز ..
إياد: لا ما بتأخر .. كلها عشر دقايق او ربع ساعه ..
خرج إياد من الغرفه ونزل تحت فقابل في طريقه ام مساعد طالعه من المطبخ ..
ابتسم ابتسامته الاستفزازيه وقال: الليله راح انام بغرفة مساعد هههه ..
ام مساعد بقهر: ضحكوا من سرك بلا قل آمين ..
إياد: ههههههههه ياللا بأطلع شوي .. ابي ارجع وألقى العشاء جاهز اوكي ..
وطلع فقالت ام مساعد بعصبيه: متى راح افتك من هالويه ..؟!
بعدين صرخت: لبنوووه وويع .. لبنـــــــــووه ما تسمعين ..
نزلت لبنى من الدرج وقالت: نعم نعم ..
ام مساعد: وينج يالخبله ..؟! اكيد بحجرتج نايمه ..
لبنى: لا انا عم ارتب غرفة بشاير متل ما طلبتي ..
ام مساعد بعصبيه: كل ذا الوقت وانتي ترتبين ..؟!
لبنى: هلأ انا بديت وقبل دقيقتين انتي طلبتي مني .. طبعا ما بيمديني اخلص بسرعه ..
ام مساعد: جـــــب بلا قرقره زايده .. خلصي بسرعه وتعالي ساعديني ..
لبنى بقلة حيله: حاضر حاضر ..

اما عن إياد وقف سيارته الرياضيه قدام احد الصرافات ونزل ..
دخل بطاقته بالصرافه وسحب الفلوس وهو يتذكر كلام بدر اليوم العصر ..

"بشاير اختي بالبنك وقدرت تعرف حكاية صرافة اختك .. الاسم بالاصل لوحده ميته بس حصل لعب بالقانون ويابوا طفله ثانيه وعيشوها بأسم اسيل ولما انكشفت الحقيقه صارت البطاقه بدون فايده"

تنهد إياد وقال: كأني فهمت السالفه .. فيه احد لقى اختي ورباها بدل وحده ميته وعشان جذي صاير اسمها اسيل وبعدين لما عرفت الشرطه ألغت كل المعاملات اللي بهالأسم .. طيب هي اللحين وينها ..؟! مسكوها الشرطه ولا لا ..؟!
حط الفلوس بالمحفضه وبعدين حط محفضته في جيب بنطلونه البرمودا الاسود ..
فجأه تفاجئ بدخان سيجاره كثيف علي وجهه ..
ابعد بسرعه يكح وحاس بإختناق في رئته من هالدخان ..
ابتسم صاحب السيجاره وقال: سوري نسيت ان عندك ربو ..
لف إياد وراه فشاف جراح واقف والابتسامه على وجهه ..
إياد في نفسه: "اووف مو وقتك .. العشاء وغرفة مساعد ينتظروني" ..
إياد: قول اللي عندك وخلصني انا مب فاضي لك ..
نفث جراح الدخان مره ثانيه بوجه إياد وهو يقول: ليش على وشو مستعيل ..؟!
كح إياد بقوه وبدأ تنفسه يضيق من هالكتمه ..
مد رجله وضرب جراح بقوه ببطنه ..
ترنح جراح وطاح وصك ضهره بحافة الصرافه ..
جراح: آآآآه يالحققققيير ..
وقام هجم على إياد بس إياد ابعد عنه فمسك جراح نفسه قبل لا يصقع في سيارة إياد ..
لف على إياد ولكمه في وجهه بقوه ..
ترنح إياد في الوقفه بس اعتدل ورد اللكمه بثنتين ..
عصب جراح وهجم بقوه يضارب إياد وإياد يرد له الضربات بأقوى مع انه يحس بتعب في جسمه وصدره ..
جراح: عبالك يالبزر انك راح توقف في ويهي اكثر .. تحلم ..
ما رد إياد عليه وهو يحاول يتماسك اكثر و: آآآآه ..
صرخ بألم لما جت ضربة جراح في جنبه اللي فيه جرح ..
حط إيده على جنبه بألم ولما ابعدها انصدم من الدم اللي غطى إيده ..
صك على اسنانه بألم وقهر لأن اكيد الخياطه انفتحت وانفتح الجرح ..
ابتسم جراح وقال: اووه سوري ما كنت اقصد ..
ومسك إياد من تيشيرته وقال بحده: جــم الــرقــم ..؟!
ابعد إياد إيد جراح ورجع ورى واستند على سيارته بألم ويحس ان رجله مو قادره تشيله ..
حط إيده على فمه يكح ..
لحد الآن صدره مخنوق ويحتاج للاوكسجين ..
ابتسم لجراح بإستفزاز وقال: تلهث لهث عشان الرقم .. بجد زي الجلاب ..
جن جنون جراح وانقض على إياد بعصبيه ..
زادت ابتسامة إياد وبسسرعه فتح باب سيارته فصكت الحافه ببطن جراح اللي طلعت عيونه من الألم ..
صرخ صرخة ألم ومسك بطنه وهو يقول: حققيييير ..
إياد: ههههه عوافي ..
انقض جراح ومسك رقبة إياد وهو يقول: راح تندم يا ولد ابوك قد شعر راسك .. فأحسن لك قول جم الرقم قبل لا انهي حياتك اللحين ..
حاول إياد يبعد إيد جراح لأنه حدده مخنوق اكثر من قبل ..
نزل نضره لتحت وابتسم ..
دعس بقوه على طرف اصابع رجل جراح ..
تألم جراح لأنه كان لابس حذاء عاديه وإياد لابس جزمه رياضيه ..
بعد ما بعد جراح إيده اخذ إياد نفس عميييق ..
جراح بقهر: انت من فين ياي بالضبط يالحقيير ..؟! حتى نقطة ضعفك مو قادرين نطلعها .. ياليت سامي تحجى وقال عشان يريحنا ..
فتح إياد عيونه بصدمه بعد ما سمع اسم سامي ..
وبسرعه مسك جاكيت جراح وهو يقول بعصبيه: سامي .. وش دخل سامي بالسالفه ..؟! مشكلتكم معي انا لا تدخلون احد من اهلي ..
تفاجئ جراح من ردت فعل إياد ..
شوي ابتسم بخبث وكأنه استمتع بالسالفه ..
جراح بخبث: اعذرني إياد .. سامي الآن بخير واذا تبينا نتركه بسلام تحجى وقول جم الرقم ..
انصدم إياد وقال بعصبيه: انتم احقر شله شفتها بحياتي .. شنو دخل سامي بالسالفه ها ..؟!
جراح ببرود: بتقول جم الرقم ولا اتصل على يزن وضاري يتصرفوا فيه ..؟!
عض إياد على شفته بقهر وهو يقول في نفسه: "والخبل ذاك كيف سمح لهم يمسكوه ..؟! غبي" ..
جراح: وش آخر كلام عندك ..؟!
فك جاكيت جراح وطالع فيه بنظره شرسه لفتره طويله ..
بعدها قال: والله اني راح اندمكم على كل شيء ..
لف وجهه بضيقه وقال: ٧٧٥٢ .. هذا الرقم واشبعوا بالفلوس يا جلاب ..
ابتسم جراح وضحك ضحكة انتصار نرفزت إياد ..
جراح: عفيه عالشطور .. جذي انت تمام ..
وابعد عن المكان وهو يضحك ..
فتح إياد باب سيارته وجلس بقهر ..
اول ما جلس آلمه جنبه اكثر واشد من قبل ..
مسك على جنبه وهو يعتصر الألم بداخله وتنفسه صار ثقيل ..
قفل باب السياره وبالقوه شغلها ومشي بها كم لفه وبعدين اضطر يوقف ..
مع كل حركة إيده او رجله يتألم من جرح اللي بجنبه ..
اخذ جواله بإيد ترتجف من التعب وحرارة جسمه ارتفعت اكثر ..
دق على رقم رئيس اعمال ابوه ..
لما رد قال إياد بصوت تعبان: ألو يحيى ..
يحيى: اهلين سيد إياد ..
إياد: اسمع .. تذكر بطاقة الصراف لبنك الـ**** .. ابيك توقف حسابها ..
يحيى: اعذرني ما اقدر .. هالبطاقه تخص ابوك وهو الوحيد اللي يقدر يوقف الحساب ..
إياد بعصبيه: طيب انت رئيس اعماله .. وقفها اللحين ..
يحيى: صدقني ما اقدر .. هذه قوانين الحكومه .. اذا تبي حسابها يوقف اقدر اقول لأبوك يروح للبنك بنفسه ويوقفها ..
إياد: لا .. لا تقوله .. لا يوصل شيء له .. طيب اذا ما تقدر توقفها عالأقل غير الباسورد ..
يحيى: حتى هذا ما اقدر .. صاحب البطاقه هو الوحيد اللي يقدر .. هذه مسائل امنيه مشدده ..
قفل إياد الجوال بقهر وهو يقول: تبن ..
اسند راسها عالكنبه وهو حدده مقهور من اللي صار ..
اخذ الجوال مره ثانيه واتصل على سامي ..
شوي حس إياد الدنيا تدور فيه ..
فرك عيونه وهو يحاول يتماسك فجاه صوت سامي يقول: خير متصل وانا اتعشى ..
ابتسم إياد وقال بهمس: انت بخير ..؟! الحمد لله ..
استغرب سامي من صوته وقال: إياد شفيك ..؟!
بس للأسف ما سمع اي رد ..
طالع سامي بالجوال بإستغراب بعدها قال بقهر: شفيك يا سامي مهتم فيه ..؟! خله يولي ..
قفل الجوال وبدأ يكمل العشاء ..
ومهما كان الكلام اللي قاله بس قلبه ما زال خايف على إياد ..

================================================== ==================

على الساعه ١١ ونص الليل ..
توه خالد رجع للمحل بعد ما كان يستلم كميه جديده من الملابس ..
دخل المحل وقال للبنقاله اللي يشيلوا الاغراض: شوف انت وياه .. كل هذا كرتون تحطه بالغرفه هناك .. معلوم ..؟!
البنقاله: ايوه معلوم ..
خالد: ياللا ابدأوا شغلكم ..
وبدأوا يدخلوا الكراتين للمخزن ..
لف خالد على جواد وليلى واسيل وقالهم: افتحوا الكراتين وابدأوا رتبوا الملابس في اماكنها اللي انتم تعرفونها ..
راحوا جواد وليلى ..
اما اسيل فما زالت واقفه في مكانها ..
خالد بإبتسامه: سمعتي ولا تبيني اعيد يالحراميه ..
ضاقت نظرة اسيل وهي تقول: حقير ..
خالد: شكرا ..
تقدمت منه وقالت: انت ليه تسوي فيني جذي ..؟! ليه ..؟!
خالد ببراءه: ليه انا شنو سويت ..؟!
اسيل بصراخ: دمرتنــــي .. انت دمرتني وعذبتنــي .. انت ظلمتنــي وخليت الكل يظلمونــي .. انت طعنتيــي وطعنت سمعتي .. اتهمتني ظلم يالظالم .. كل هذا لأني ما اطعت اوامرك اللي تدل على دنائتك ..
خالد ببرود: انتي شنو قاعده تخربطين ..؟!
اسيل والدموع بعينها: حتــــى اللحين راح تنكر .. الى متى راح تستمر بالجذب والانكار ..؟! محد عندنا فأعترف وقولي وين الاوراق وينها ..؟!
خالد: انا مو فاهم شيء ..
ارتجف صوتها وقالت بضعف وانكسار: خالد واللي يسلمك واللي يعافيك طلعني منها .. الله يخليك يا خالد طلعني من هالتهمه .. انا مو قادره .. المبلغ اكبر من اللي اقدر عليه .. راح انسجن اذا ما دفعت في اسبوع .. خالد ارجوك خبرني عن مجان الاوراق واللي يخليك ..
ابتسم خالد وكل مالها ابتسامته تزيد وهو يشوف ضعفها قدامه ..
اقترب منها وهمس بإذنها: موافق يا اسوله بشرط انج تسلمي لي نفسج .. اتوقع انج فاهمتني يا قمر ..
رجع اسيل ورى والدموع تنزل من عيونها ..
هزت راسها بلا وهي تقول: مستحيل .. الله يخليك اطلب اي شيء غير هذا ..
هز راسه بلا وقال: انا اعطيتج طريجة خلاصج والقرار بإيدج ..
طالعت فيه فتره طويله ..
بنضرات واهنه ..
ضعيفه ..
منكسره ..
شهقت وابعدت عنه وراحت لغرفة الراحه ..
جلست عالكرسي وغطت وجهها بإيدها تبكي وتشاهق ..
مو معقول ..
مو معقول اللي قاعد يصير لها ..
عمرها ما تخيلت ان حياتها بتكون جذي ابدا ..
فتحت ليلى الباب بهدوء ودخلت وقفلته وراها ..
تقدمت من اسيل وجلست قدامها ..
ليلى: اسيل ..
ما ردت عليها اسيل ومازالت تبكي ..
ليلى: اسيل انا آسفه .. والله ودي اوقف معج بس ما اقدر .. حياتي انا واخواني بتضيع اذا شهدت معج .. انا فقيره واخواني صغار ومالهم احد غيري يساندهم ..
نزلت دموعها وقال: هددني خالد بأنه يفصلني من شغلي اذا تحجيت .. اذا فصلني شلون راح نعيش انا واخواني ..
مسحت دموعها وقالت: عارفه انج مظلومه بس صدقيني غصب عني .. حتى جواد مو قادر يوقف وياج .. اخوه الصغير قتل له واحد بالغلط بس جواد غطى عليه عشان لا يروح الاصلاحيه .. خالد هو الشاهد الوحيد على اللي صار .. فعشان جذي مو قادر يتحجى جواد بإي شيء .. اسيل واللي يعافيج سامحينا ..
رفعت اسيل راسها وطالعت فيها ..
قالت وقلبها ينطعن ستين طعنه: لا عادي .. اقدر ادبر روحي ..
ابتسمت ليلى وقالت: الحمد لله .. ياللا عن اذنج بروح اشتغل شغلي وشغلج .. لا تتعبي روحج ..
وطلعت واسيل تتابعها بنظرها ..
رددت بهمس وألم: اقدر ادبر روحي .. لا والله ما اقدر .. ما اقدر ..
مسحت دموعها بإيدها اللي تنتفض من البكى ..
جلست لوحدها تفكر بحل لمشكلتها ..
شوي طالعت في ساعتها ..
جت الساعه ١٢ .. يعني انتهى دوامها ..
خرجت من الغرفه ومن المحل كله ..
خرجت من السوق ووقفت عالرصيف تنتظر تاكسي ..
.........: اسيل ..
لفت ورى فشافت جواد اللي يشتغل معها بالمحل ..
شال نظره عن عيونها وقال بهدوء: انا معي حول ثلاثين ألف .. خذيها عشان تسددي المبلغ اللي عليج ..
هزت راسها ورددت نفس الجمله اللي قالتها لليلى: لا شكرا .. اقدر ادبر روحي ..
رفع نضره لعيونها وعرف انها كذابه ..
الثلاثين ألف هي فلوسه كلها ..
يبغى يساعدها عشان يعوض عن كذبته اللي كانت غصب عليه ..
لفت اسيل وركبت التاكسي اللي وقف لها ..
تحركت السياره وجواد يتابعها بنظره ..
تنهد وراح لبيته ..

اسندت اسيل راسها عالشباك ..
لازم تلقى لها شغل اضافي ..
بس حتى لو لقيت مافي امل ..
مافي امل انها تجمع هالمبلغ الضخم ..
مافي اي امل ..

اتركيني ياهمومي ...
وارحمي قلبي الحزين

كفكفي دمعي رجِيتك ...
وادفني نار الشجون

راحت أيام السعادة ...
وانطوت عِشْرة سنين

وأغرقت ذكرى الليالي...
بين أمواج الحنين

وصارت آهاتي توالى...
أطوي ليلي في أنين

كم تباطت بيّ ليالي...
كم تساهت بي جفون

يازمن عيش السعادة...
يازمن خضر الغصون

جتك أشعاري تنادي ...
وين خل الروح وين

وقف التاكسي قدام العماره ونزلت ..
دفعت له الفلوس وراح ..
لفت ناحية العماره بس وقفت ..
الوقت ليل ..
والعماره مسكونه ..
شلون ..؟!
شلون راح تقدر تدخل ..؟!
مستحيل ..
بس اذا ما دخلت ما تدري وش راح تسوي ..
وين تنام ..؟!
مستحيل ترجع لنوم الشوارع زي قبل ..
دموعها نزلت من الخوف وهي تطالع في العماره ..
مسحت دموعها وحاولت تشجع نفسها ..
مالها غير هالمكان ..
غمضت عيونها ورددت بداخلها الاذكار ..
" حسبنى الله ونعم الوكيل نعم المولي ونعم النصير
اعوز بكلمات الله التامات ومن شر ماخلق
بسم الله الذي لايضر مع اسمه شي في الارض والا في السماء وهو السميع العليم
الهم انت ربي اسالك ان تكفنيهم بما شئت وكيف شئت"

بعد ما حست نفسها هديت فتحت عيونها واندهشت ..
انصدمت ..
اتلعثمت ..
هذه اول مره بحياتها ..
اول مره تشوف هالشيء ..
دايم تشوفها بالمجلات والتلفزيون ..
ابتسمت وهي حاسه نفسها مبسوطه ..
عالزاويه ٣٠ درجه من قدامها كانت هناك سياره ..
سياره رياضيه حقيقه ..
هزت راسها بعدم تصديق ..
تقدمت شوي من السياره عششان تشوفها من قريب ..
لا احد يلومها .. اول مره تشوف سياره رياضيه ..
لفت حواليها وهي تطالع بانبهار ..
شوي انصدمت لمن لاحظت احد داخلها ..
اسيل في نفسها: "يا ربييييه فشيله .. اكيد يحسبني مينونه" ..
لفت عششان تبعد عن السياره ولا كأن شي صار ..
بس وقفت ولفت ناحية السياره ..
شيء في قلبها يطلب منها تلقي نضره على اللي بداخل السياره ..
هذا شيء جنوني بس هذا اللي تحسه بقلبها ..
تقدمت بهدوء ناحية شباك السياره ولاحضت احد داخل ..
اسيل: شكله مبين انه شاب ..
دققت بالنضر شوي وبعدها شهقت ..
اثار الدم على الدركسون و ايد الولد ..
حست بخوف وفتحت باب السياره وانصدمت من منظره ..
الدم مغطي جسمه وهو مغمض عينه ولا حاس باللي حواليه ..
اسيل بخوف: يا ربي وش اسوي اللحين ..
جاء في بالها تتصل بالاسعاف ..
فتحت جواله بتتصل بس وقفت ..
اذا جت الاسعاف راح تكون هي المتهمه في القتل اذا كان ميت ..
وراح يجي التحقيق والشرطه وبكذا يكتشفوا انها بدون اصل ..
يعني نهايتها يا السجن او دار الايتام او القصاص ..
ارتبكت وتوترت ..
هي بوقف صعب ومو عارفه كيف تتصرف ..
ابدا مو عارفه ..

ولهنا ينتهي البارت الثالث عشر الجزء الثاني ..
اتمنى البارت يكون جمييل وعند حسسن ضنكم ولا اسمع احد يقول قصير لاني تعبت فيه كثيير .. وهو 70 صفحه تقريبا ..

انتضروني يوم الخميس ببارت جميل كما عودتكم ..

اختككم // صــــوصصــإآ ..