شبكة همس الشوق - عرض مشاركة واحدة

13 - 3 - 2014, 03:56 PM

العصر وفي احد السوبر ماركات المنتشره بالدوحه ..
كان عادل جالس عالمقعد حقه ويشتغل ..
كان يحاسب عالمشتريات بس عقله كله في دانا ..
يفكر فيها ..
هالأيام شاغله تفكيره كثير ..
تقدم احد الزبائن وحط علبة رد بول ولبان اكسترا ..
ابتسمت وقالت: جم ثمنها ..؟!
رفع راسه يطالع في هالزبون وانصدم لما شاف انها رهف ..
قالت بإبتسامه: كيفك يا عادل ..؟! وكيف دنو ..؟!
عادل ببرود: اتصلي عليها واسألي بنفسج ..
اختفت ابتسامتها وطالعت فيه بحزن ..
تحبـــــــــه ..
تعشقـــــــــه ..
بروده وكلامه هذا يؤلمها كثير ..
طالع عادل في الرد بول والعلك ..
لف نظره بعيد عنها وقال بتردد: مشروبات الطاقه مضره وخاصتا مع هالعلك ..
طالعت فيه فتره ..
نفس الكلام .. نفس هالكلام كان يقوله لها زمان ..
دايم يحذرها من مشروبات الطاقه ..
ابتسمت وقالت بهدوء: لحد الآن خايف علي ..؟!
سحب كيس عشان يحط المشتريات فيه وهو يقول: لا انتي غلطانه ..
مسكت العلبه في نفس الوقت اللي مسكها فيه ..
فكت إيده عن العلبه بهدوء وقالت بإبتسامه: راح اغيره ..
لفت وراحت للثلاجه ..
ضرب بإيده عالطاوله بقهر وهو يقول: مو انت قلت انك بتنساها .. شنو صار فيك يا الخبل ..؟!!

اخذت لها عصير تفاح وراحت عنده ..
حطت العصير قدامه وقالت: ها شرايك بهذا ..؟!
اخذه وحطه بالكيس ببرود وهو يقول: حطي ببالج اني متعود انصح الزبائن وانتي مجرد زبونه لا اكثر ..
هزت راسها وهي تقول بإبتسامه: طيب ..
قدم لها الكيس واخذ منها الفلوس ..
طلعت برى وعادل يتابعها بنظراته ..
طلع آهات من صدره وهو يقول بألم: مو قادر اكرهها مو قادر .. احبها وايد ..
نزلت الدموع من عينها بعد ما سمعت كلمات عادل من خلف الباب ..
اتجهت لسيارتها وهي حاسه براحه فضيعه ..
كانت شاكه بحبه من بعد الحادث بس اللحين تأكدت انه ما زال يحبها ..

حط عادل راسه بين إيده وهو يقول في نفسه: "لازم تنساها .. هي بنت حلوه وطيبه والف من يتمناها .. انت مجرد مقعد وعاجز فلا تفكر بوحده مثلها .. انساها يا عادل انساها" ..
رفع راسه وبدأ يكمل شغله طبيعي وهو يحاول ينساها لأنه مستحيل يرجع يمشي مره ثانيه ..
العلاج الطبيعي لحد الآن ما جاب اي نتيجه وراح يتركه ..
هو وعد دانا انه يستمر لمدة شهر وبعدين يشوف النتيجه ..
واللحين ما باقي غير ايام من هالشهر ولحد الآن ما ظهر شيء ..
تذكر راشد واخته ..
تذكر اصرار اخته انها تعرف مين صدمه وهو كان يرفض يقولها ..
ما كان يبغاها تطيح في المشاكل ..
وغير كذا هو عارف راشد زين ..
كان في نفس المدرسه ايام الثانوي ..
يعرف انه انسان همجي ومشكلجي وعشان كذا ما خبر دانا عنه ..
تنهد وهو يطالع في الباب ..
شوي انصدم لما شاف اللي دخل ..
فتح فمه وهو يقول بصدمه: علي ..!!!
طالع علي فيه وقال: اهلييين عادل ..
عادل: انت .. انت طلعت من السجن ..؟!
هز علي راسه وقال: امس طلعت ..
سلم عادل عليه وهو يقول: مبروووك .. كويس انك بخير .. اللحين اكيد اخذت درس عشان بعدين تبطل تهور ..
ابتسم علي وهو يقول بحقد: إيه اخذت درس واستفدت منه .. واللحين ياي اطبق ..
انصدم عادل من كلامه وقال: علي لا يكون ناوي شر على راشد ..؟! علي ما يصير جذي اصحى على نفسك ..
علي: مستحيييل .. لازم آخذ حقي من هالراشد .. وهالمره راح اضبطها صح .. وهذا آخر شي عندي ..
وراح وهو مطنش نداء عادل ..
هز عادل راسه وهو يقول: مستحيل .. لو صار اي شي مستحيل اسامح نفسي ..
وحط راسه بين إيده بألم ..

================================================== ==================

في صباح يوم السبت ..
دخلت وسن للجامعه واتجهت للشله وهي تفكر في كلام لين يوم الثلاثاء ..

"لا غصب عنج وبكيفي انا .. لو ييتي باجر بهاللون الاصفر راح اوريج ويه لين الثاني"

وسن: يوم الاربعاء غبت .. واللحين انا ييت بس ما سويت اللي قالته .. انا احب الاصفر ومستحيل اغيره ..
راحت للشله وقالت: السلام عليكم ..
ندى: اهلييين كارلوتا .. وعليكم السلام ..
رفعت لين حاجبها وقالت: اصفر بعد ها ..؟!
وسن: انقلعي يا دبا .. انا حرره ..
طلعت لين تيشيرت ازرق من شنطتها وقالت: كنت حاسه وعشان جذي يبت معاي هالتيشيرت .. ما اكون انا لين إن ما خليتج تلبسينه ..
وسن: ما راح ألبسه ابدا ..
سارا: ههههههه مو صاحيه يالين ..
لين: راح تلبسيه غصب عنج ..
راحت وسن عند ندى وقالت: ندى امانه خليها تبعد عني .. مابي ألبس ..
ندى: خلاص يا لين لا تغصبيها ..
لين: مالي شغل راح اغصبها ..
ندى: خلاص هي حره .. كل واحد يختار نوعية الملابس اللي تعجبه ..
طالعت لين في وسن وقالت: اوكي راح اعديها هالمره .. بس المره اليايه لا ..
وسن: اصلا ما راح يكون فيه مره يايه ..
ليان: يوووه وش يبون ذولا ..؟!
طالعوا في ليان اللي اشرت لقدام وقالت: شلة غيدا يايه عندنا ..
وقفت غيدا قدامهم وقالت: هاااي بنات ..
لين: خييير ..
غدير: له له هالبنت معدوم عندها الاسلوب ..
تهاني: معاج حق ..
سارا: نعم .. ممكن اعرف وش تبون ..؟!
غيدا: ما نبي شيء .. بس شفنا حالنا طفشانين فقلنا خلونا نطقطق على شلة اسيل ..
خلود: شخبار دراستكم يالفاشلين ..؟!
وسن: فاشلين في عينج .. احنا مو فاشلين ..
خلود: عيل انتو شنو ..؟!
وسن: احنا شطار ..
غيدا: ههههههههه يالبى .. هالبنت حدددها عجيبه ..
غدير: هههههههههههه بقووه ..
خلود: ههههه ودي اشوف الـ٣٩ شخص اللي يشبهها .. ابي اعرف هم خكاريه مثلها ولا شنو ..
تهاني: هههههههههههههههههه ..
ندى: اذا عندكم شيء مهم تفضلوا قولوه واذا ما عندكم فلو سمحتوا انقلعوا عن ويهنا ..
غيدا: اخسس .. طرده علنيه ..
ندى: ولا اقول احنا اللي بنروح لأنه ما يشرفنا نوقف مع بويات .. امشوا ..
فقاموا الشله وراحوا وغيدا تطالع فيهم ببرود ..
لفت على صاحباتها عشان تكلمهم بس استغربت من البنت اللي وقفت قدامهم ..
غيدا: اي خدمه ..؟!
تكتفت البنت وقالت: انا يايه اقولج كلمتين ورايحه .. ابعدي عن سامي .. سامي هذا لي انا فاهمه ..
رفعت غيدا حواجبها وقالت: اها .. ومنو حضرتج ..؟!
ابتسمت وقالت: اعرف انج تستهبلين .. عالعموم انا اروى .. فلو سمحتي إياني وإياج توافقي على سامي .. اقص ريلج لو وافقتي ..
طالعت غيدا فيها وشوي ضحكت ضحكه عااااااليه واروى تطالع فيها بإستغراب ..
غيدا: هههههههههههههههههههههه ومنو قالج اصلا اني ميته على ترابه ههههههههههههههههههه ..
اروى: اذا كان حجيج صج عيل ليش خطبج وليش لحد الآن ما رفضتيه ..؟!
غيدا: شسوي ابوي رافض وشكله راح يزوجني غصب ..
اروى بصدمه: مستحيييل .. لازم ترفضي ..
غيدا: ما اقدر .. بس اذا ساعدتيني يمكن راح يهون ابوي ..
اروى: شتقصدين ..؟!

...............................................

عند بوابة الجامعه ..
كان سامي ويزيد واقفين هناك ..
يزيد: ياخي من الفجر واحنا هنا .. ما اتوقع ان هذا الحسان راح يجي اليوم ..
سامي: انا راح انتظر لييين تيي الساعه تسسعه عالاقل ..
يزيد: ومحاضرتك ..؟!
سامي: ما بحضرها .. انا اللي جبت هالمششكله لدانا وانا اللي لازم احلها ..
تنهد يزيد ووقف معاه ..
عماد وصالح في محاضرتهم الان ودانا وريان لساتهم ما جووا ..
سامي: يزيد ..
يزيد: ها ..
سامي: فاتك قبل امس وش شفت ..
يزيد: وش شفت ..؟!
سامي: ههههه شفت دانا وهي لابسسه بجامه .. شكلها طلع بنت ..
يزيد: ههههههه طيب شفيك مستانس ..؟!
سامي: مدري بس احسسه حماس ..
يزيد: اييه صح نسيت اسألك .. من فين هالجرح اللي بويهك ..؟!
سامي: هذا بسبب ابن اللذين ..
يزيد: يعني إياد ضربك ..
سامي: يخسسى يمد ايده علي ..
يزيد: ههههه عيل شنو صار ..؟!
سامي: سويت حادث صغير ..
يزيد: يوووه سلامات .. وعششان كذا اليوم مشيتك مو طبيعيه ..
سامي بدهشه: لييه واضح اني اعرج ..؟!
يزيد: لا مو مره .. اللي يدقق راح يلاحظ ..
سامي: يارب البنات ما يلاحظون عششان لا تطيح هيبتي جدامهم ..
يزيد: شرايك اللحين افرش فيك التراب اخلي هيبتك ذي مالها وجود ..
سامي: ههههههههههههههههه ياخي شفيك اتغششمر وياك ..
يزيد: المهم راقب راقب عدل لا يمر واحنا ما ندري عنه ..
جاء ريان في هالوقت وقال: السسلام عليككم ..
يزيد: وعليكم السلام ..
سامي: اهلييييييين .. ليه تأخرت ..؟!
ريان: صحيت متأخر .. انتم وش اللي موقفكم هنا .. اللي يشوفكم يقول انكم متواعدين مع شله تتهاوشوا معها ..
سامي: اخسسس طلعنا جامحين واحنا ما ندري ..
يزيد: ههههه لا بس ننتظر الاخ حسسان عشان نقدر نتفاهم معاه قبل لا يفضح دانا وتروح فيها ..
ريان: ايه صح .. اعتذرت من دانا يا اخ سامي ..؟!
سامي: يب ..
ريان: وش قالت ..؟!
سامي:: عذرتني وقالت لا مو لازم تعتذر انا اللي مفروض اعتذر لاني سببت لكم مشاكل كثير انتم في غنى عنها و ..... ياخي قفلت الباب في ويهي ..
يزيد+ريان: ههههههههههههههههههههههههههههههههههههههههههههه ..
سامي: وشكلها اليوم غايبه ..
يزيد: ههههههه هذا اللي تستاهله ..
ريان: ليتها مدت ايدها عششان تعرف ان الله حق ..
سامي: لا ما اصدق انكم اصحابي من الثانويه ..
ريان: هههههه المهم ما تلاحظون ان هالحسان تأخر ..
ابتسسسم وقال: تدورون عني ..؟!
لفوا ورى وانصدموا لما شافوه واقف ويبتسسم ..
حسان: حبيت اخبركم اني توني راجع من عند المدييييييير .. وحبيت اخبركم انه انصدم من كلامي واللحين راح لكلاس رفيجكم يدور عليه .. اقصد رفيجتككم ..
كلامه هذا كان مثل الصاعقه اللي نزلت عليهم ..
انصدموا وبقوه ..
هذي ورطه مستحييل الخلاص منها ..
مسستحيل ..

لهنا يخلص البارت الثالث عششر ..
انتظروني في البارت الجاي ..
راح نعرف فيه مصير دانا .. وردت فعل إياد لما يصحى ..
ونتيجة عملية شهد .. وهل بسام يقدر يطلع اخته من المشفى ..
وراح نعرف شقالت غيدا لأروى .. واشياء كثيره انتظروها بالبارت الجاي ..

سوري اذا كان هالبارت قصيير .. بس بأعوضكم بالبارت الجاي ..

اختككم / صـــــوصصـــإآ ..

|$[ نهاية البارت ]$|