شبكة همس الشوق - عرض مشاركة واحدة

15 - 3 - 2014, 10:30 AM

في صباح الثلاثاء وعند بوابة الجامعه ..
كان سامي وصالح جالسين عالدرج ويزيد متكئ عالجدار ..
اما ريان ما جاء لحد الآن ..
وعماد دخل لداخل يشوف لسالفة حسان ..
يبغوا يتأكدوا اذا كان احد الدكاتره شاف حسان في المخزن ذاك اليوم ولا لا ..
طالع يزيد في سامي وقالت: انت واثق ان ولد عمك بيي ..؟!
سامي: مدري عنه .. بس ما دام قلت له بيروح نص عمرك اكيد بيتحمس ..
صالح: تخيلوا الخطه ذي خربت ..
سامي: بليز ما نبي تشاؤم .. ان شاء الله ما تخرب .. احنا اخذنا بكل احتياطاتنا ..
ابتسم إياد وقال: هااااي سااام ..
يزيد: اهو ياء ..
سامي: صح النوم .. بدري ..
إياد: هههههههههههههههههههه ..
سامي بعصبيه: شفيك تضحك ..؟!
إياد: هههههه من هرجك .. الله يصلحك دايم تضحكني ..
يزيد وصالح: ههههههههههههه ..
حاول سامي يضبط اعصابه بعدها قال: اللحين مو وقت خفت دمك ..
إياد: اها سوري .. ما كنت ادري انه له وقت محدد ..
سامي بقهر: غبي ..
يزيد: المهم احنا نبيك بخدمه تسويها ..
إياد: اصلح روحي عادل بدل البنت صاحبة الحفله التنكريه ..
سامي بصدمه: شدراك ..؟!!
إياد: من بعد ما كلمتني اتصلت على ريان وهو حكى لي كل شيء ..
سامي: ومن فين لك رقمه اصلا ..؟!
حك إياد راسه وهو يقول: بصراحه .. اممم خليت واحد من اللي ينادوني بالزعيم فديتهم يرشي واحد من عندكم عشان ييب لي رقم ريان من موبايلك ..
سامي: شنـــــــــو ..؟؟!!!
إياد: شفيك مصدوم جذي ..؟! انت ما عندك ذوق في الكلام وعشان جذي ما اتصلت عليك فأضطريت اساوي جذي ..
يزيد: خلاص اهدأوا ما صار شيء واللحين انت يا إياد فاهم كل شيء صح ..؟!
حط إياد إيده في جيبه وقال ببرود: ومنو قالكم اني موافق ..؟!
انصدموا من كلامه وقال يزيد: انت من صجك يا إياد ..؟! طيب ليش ..؟!
عقد إياد حواجبه وهو يقول: يا جماعه ما يصير جذي .. ما ابي اساعد احد .. احب اكون نذل ومستفز .. مابي اكون طيب حرام عليكم ..
صالح بإستغراب: شنو ..؟!
إياد: الحكايه مو اني خايف ان المدير يكشفني .. لا بس مابي اكون طيب واساعد الناس .. مابي اطلع بطل جدامكم .. ابي اكون انسان مستنذل وتصرفاتي شريره .. فهمتوني ..؟!
الشله: ؟؟؟؟؟؟؟؟؟؟؟ ..!
جاء ريان في هالوقت يضحك وهو يقول: هذا هو السبب ..! انسان عجيب ههههه ..
لفوا عليه فقال إياد: ايه نفس اللي قاله ريان .. ابي اكون انسان عجيب وغريب ومو طبيعي ..
ريان: ههههه ياخي سببك اغرب منك .. طيب عالاقل قدم هالمساعده عشان تكون المساعده الوحيده اللي تقدمها بحياتك ..
إياد: الثالثه ..
ريان: الثالثه ..؟!
إياد: ايه .. مره لها ومره لسهى وهالمره لها كمان ..
طالعوا في بعض بإستغراب وقال يزيد: متى ساعدتها ..؟! اللي اعرفه انك فضحتها جدامنا ..
إياد: قبل صدمت سيارة رفيجي بدر فقدمت لها فلوس عشان تصلحها بس رفضت فمنعناها من انها تدفع شيء وانا اللي صلحت السياره ..
سامي: ومنو سهى ذي ..؟!
إياد: صديقتي مالك شغل فيها ..
حط ريان إيده على كتف إياد وقال: قدم لها هالمساعده كرد دين على كشف حقيقتها لنا .. وبجذي ما تصير مساعده ..
إياد بتفكير: اقنعتني ..
صالح: اقتنع بسرعه ..
إياد: اوكي وين غرفة المدير ..؟!
سامي: دقيقه اول ننتظر عماد .. اخاف يكون المدير عرف عن حسان وحسان قاله كل شيء و....
إياد: لحضه لحضه .. من فين هالجرح اللي براسك يا سام ..
عدل سامي الكاب وهو يقول: حاولت اخفي الشاش بالكاب بس ماكو فايده .. تهاوشت مع واحد ..
إياد: وفيه كدمات مب واضحه في ويهك .. من المهاوشه بعد ولا لا ..؟!
سامي: ايه منها .. كانت واضحه بس خفت اللحين ..
إياد وهو يضغط عالسين: احسسسن .. عساه من هالحال واردى ..
عصب سامي وقال: انجججب ..
إياد: ما تتذكر هالجمله .. قلتها لي لما نزف الدم من كتفي .. وها انا رديتها لك .. هههههههههه واااه احس بوناسه ..
سامي: اها .. مردوده يا ابن اللذين مردوده ..
جاء عماد في هالوقت وقال: شباب ..
لفوا كلهم عليه وقال يزيد: ها شصار ..؟!
عماد: حسان ..
صالح: شفيه ..؟!
اخذ عماد نفس بعدها قال بإبتسامه: الجو امان ..
سامي: صـــــج ..؟!
عماد: يب .. حسان من امس غايب .. وسولفت شوي مع امين المخزن وحكي لي انهم يوم الاحد حصلوا المخزن مفتوح وهو مستغرب لأنه متأكد انه قفله .. ولا ياب سيرة انهم شافوا احد داخل ابدا ..
سامي: طيب ما شافوا آثار دم عالارض او عالحديده ..؟!
عماد: اقولك ما حكى عن اي شيء .. يقول الشيء الوحيد اللي لاحضه هو ان الباب مفتوح ويقول دورت في المخزن عشان لا يكون فيه شيء مسروق بس اطمئن لأن كل شي طبيعي ..
سامي: غريبه ..
ريان: اوكي اللحين ياء دور إياد ..
إياد: واااو حان وقت المغامره ..
يزيد: خذ الامر بجديه لا تفضحنا ..
إياد: انتم اغبياء ..
طالعوا فيه بإستغراب وقال ريان: شتقصد ..؟!
دخل إياد للجامعه وهو يقول: بعدين بتفهموها ..
طالعوا في بعض بتعجب بعدها دخلوا وراه ..
إياد: واااو هذي الجامعه اللي حأدخلها بعد الثانوي .. تحمست لها ..
يزيد: خساره راح تدخلها بعد ما نتخرج .. امنيتي اشوف ابداعك بالجامعه ..
إياد: ههههههههههههههههههههه ..
ريان: المهم خلونا نروح للاداره ..
توجهوا لمكتب المدير وكل ما مروا بشله يعرفوها او شخص يعرفوه حكوا إياد عنه ..
وصلوا للغرفه فقال ريان: اولا خلـ....
إياد: لا مو لازم تعلموني كل خطوه .. انا اقدر اتصرف ..
يزيد: انتبه لا تتردد ..
إياد: يا شباب انا إياد مب سام عشان تقلقوا ..
رفع سامي حواجبه وهو يطالع فيه ..
ضحك إياد ودق الباب عالمدير وبعدها دخل وقفل الباب وراه ..
قربوا الشله من الباب عشان يسمعوا كل شيء ..
لما دخل إياد قال: هـــــــااااي ..
سامي: خبل .. الواحد يقول السلام عليكم مب هاي ..
لفوا الشله كلهم يطالعون فيه بنص عين فقال سامي: يووه انا عادي لأني اقولها لأصحاب مب للمدير .. صدقوني راح يفضحنا إياد ..
رفع المدير راسه عن الورق وقال: هاااي ..؟!! فيه احد يكلم المدير جذي ..؟!
إياد: هههههههه عادي خلنا نقط الميانه ونصير اصحاب ..
رفع المدير حاجبه وقال: تحجى عدل قبل لا اعدلك ..
إياد: اخسس والله مدير هالجامعه قوي ..
سامي بهمس: شفتم .. قلت لكم بيفضحنا ..
المدير: قول اللي عندك ولا اطلع برى ..
إياد: الله يهديك لا تعصب .. انا الطالب عادل ..
المدير: عادل منو ..؟!
إياد: ههههههه مسرع نسيتني .. امس ييت لكلاسي وقلت اذا ياء الطالب عادل عبد العزيز قولوا له يي مكتبي ..
المدير بتفاجؤ: انت عادل ..؟!
إياد: ههههه لا اخته ..
حط ريان إيده على وجهه وقال: شنو يساوي ذا ..؟!
المدير: اخته ..؟! هذا اسمه اعتراف ولا شنو ..؟!
إياد: هههههههههههه والله انك حماس ..
المدير بحده: عادل ..
إياد: هلا ..
المدير: ياني واحد وقال انج بنت وتدرسين بدل اخوج المقعد .. هالحجي صح ولا غلط ..؟!
إياد: اللحين شايف شكلي شكل بنت ..؟! ناضر زين ..
المدير: والله فيه بنات ملامحهم شبابيه ..
إياد: هههههه ايه في هذه صدقت وخصوصا البويات ههههههه ..
ريان: قلنا له خلك جاد بس هو فاهم السالفه لعب ومغامره على قولته ..
يزيد: شكل دانا بتروح فيها ..
عماد: هههههه يعجبني ..
المدير: انا اتحجى بجديه فبطل هبل ..
إياد: حااااااضر ..
فتح المدير الملف الخاص بعادل وبدأ يقلب في الاوراق وهو ينقل نظره بين إياد والورق ..
المدير: اللحين ابي يواب صريح .. الحجي اللي قاله الطالب بأنج بنت صج ولا لا ..؟!
لف إياد نظره حول المكتب والجدران والباب والارض والمدير مستغرب من تصرفه ..
طالع إياد في المدير وقال: وين الكاميرا الخفيه .. ترى انا كشفتكم ياللا خلهم يطلعون ..
الشله كلها اصيبت بالاحباط وهم يكررون في نفسهم ان مستقبل دانا ضاع ..
المدير بعصبيه: عادل بطل استهبال واستعباط .. انا لما اسألك سؤال ياوب ..
إياد: والله مدري مين يستهبل .. سؤالك غريب .. شنو يعني انا بنت بدل اخوي ..؟! احنا ما نصور فلم او نعمل بروفه لمسرحيه .. منو هالخبله اللي تفكر بتفكير عبيط زي جذي ..؟! وين حاسه نفسها ..؟! شكلها تضن انها بحفله تنكريه سوتها صاحبة امها الامريكيه .. يعني السالفه تيي بالعقل .. مستحيل احد يساوي جذي ..
طالع المدير في إياد فتره وقال في نفسه: "حجيه صح ..؟! ما ألومه لو قال عني خبل .. بس ذاك الولد مستحيل يجذب جذبه زي جذي" ..
مسك إياد طرف تيشيرته وقال: تبيني انزل التيشيرت عشان تتأكد اني ولد ..؟!
سكت المدير شوي بعدين قال: ليش كنت غايب من السبت لين امس ..؟!
إياد: تهاوشت مع اولاد بالشارع وتأذيت ..
رفع تيشيرته من مكان الجرح وقال: انطعنت هني فقعدت في البيت لين ارتحت .. ولا تسأل عن اوراق مستشفى لأني ما رحت المستشفى .. مو ناقص تحقيق ..
طالع فيه المدير بتفحص وبعدين قلب في الاوراق اللي قدامه ..
ابتسم ريان وقال: كفو والله .. قدر يعدي السالفه ..
يزيد: كنت خايف بالبدايه بس كويس طلع يعرف تصرف ..
سامي: ما راح تنتهي السالفه إلا اذا طلع بأمان وبعدها بفتره نرجع الاوراق اللي بدلناها ..
ريان: بعد اسبوع عشان اذا حصل امر طارئ جذي ولا جذي ..
رفع المدير نضره وطالع في إياد ..
لحد الآن فيه شيء مو داخل مخه ابدا ..
مستحيل احد يتجرأ ويبلغ بنفسه عن احد وهو كذاب ..
إياد: اممم شفيك تناضرني ..؟! اكيد تقول ياليت عندي ولد بهالوسامه ..
رفع المدير حاجبه وقال: اوكي يالوسيم ممكن توريني بطاقتك الجامعيه او تعطيني رقمك الجامعي ..؟!
انصــــــــدموا الشله من كلامه ..
نسيوا سالفة البطاقه الجامعيه ..
ما جت في بالهم ابدا ..
عقد إياد حاجبه وهو يقول في نفسه: "بطاقه جامعيه" ..؟!!!
وهنا كانت الكارثه ..
فكيف بيطلعون منها ..؟!
بالبارت الجاي نعرف وش بيصير لهم وكيف بيكون عقابهم ..

وبكذا خلص آخر جزء من البارت الرابع عشر ..
البارت كان جميل واتمنى انه يكون ممتع لكم ..
انتظروني بموعدنا الدائم يوم الخميس بالجزء الاول من البارت الخامس عشر ..
واللحين لكم كم مقتطف من البارت الجاي عشان يزيد الحماس ..

:؛: حط عادل راسه بين إيده وهو يقول بألم: ليش .. ليش ما تكلمتي من اول يا دانا ليش ..؟! ليه ضليتي ساكته عن هاللي فيج .. :؛:

:؛: ابتسمت بين دموعها وهي ماسكه إيده وتقول: I‎'m your mam Sami ‎..‎ I‎'m your mam ‎‏>‏> انا امك يا سامي ‏..‏ انا امك .. :؛:

اممم بغيت احط مقطع ثالث بس هالمقطعين كفيله بأنها تحمسكم للبارت الجاي ..

محبوبتكم << يالواثقه << /
صــــوصصـــآإ ..

|$[ نهاية البارت ]$|