شبكة همس الشوق - عرض مشاركة واحدة

15 - 3 - 2014, 10:32 AM

|$[ البارت الخامس عشر الجزء الاول ]$|

رفع المدير حاجبه وقال: اوكي يالوسيم ممكن توريني بطاقتك الجامعيه او تعطيني رقمك الجامعي ..؟!
انصــــــــدموا الشله من كلامه ..
نسيوا سالفة البطاقه الجامعيه ..
ما جت في بالهم ابدا ..
عقد إياد حاجبه وهو يقول في نفسه: "بطاقه جامعيه" ..؟!!!
لف سامي عالشله وهو يقول: شلون راحت ذي من بالنا ..؟!
طلع ريان جواله بسرعه وهو يقول: لازم نتصل على دانا ونعرف منها الرقم عالاقل ..
طالع إياد في المدير وقال: بطاقتي الجامعيه ..؟!
المدير: ايوه .. هاتها ..
إياد: شتبي فيها الله يهديك ..؟!
المدير: عادل .. عطني وبلا كثرة هرج ..
إياد: حاضر بس اول شيء قولي شتبي منها ..؟!
المدير: عادل وبعدين ..؟!
طالع إياد فيه لفتره بعدها قال: اها استنتجت السبب ..
رفع المدير حاجبه يطالع فيه ..
إياد: انا اقولك شتبي فيها ..؟! انت قلت في نفسك يا الهي ان هذا الشاب بالغ الوسامه يجب علي ان اتحقق ان كانت صورته قبيحه او لا ... اطمئن حتى في الصوره طالع حلو ..
عماد: ههههههه مو صاحي ..
يزيد: كويس قاعد يماطل بالمدير ..
طالعوا في ريان وقال صالح: ردت ..؟!
ريان: اوووه مغلق ..
سامي بقهر: لييييش ..؟؟!!
يزيد: طيب ما عندكم رقم البيت او رقم اخوها ..؟!
ريان: لا ..
سامي: اوكي انا راح اروح البيت لأني اعرف طريجه وآخذ الرقم ..
ريان: حلو .. اول ما توصل وتاخذ الرقم اتصل علينا اوكي ..
سامي وهو رايح: اوكي ..
طالعوا الشله في بعض والقلق مسيطر عليهم وكل واحد فيهم يفكر بطريقه عشان يطلعوا منها ..
رفع المدير حاجبه وهو يطالع في إياد بعدها قال: عادل .. انت ليش تماطل ..؟!
ضحك إياد وقال: افا .. تشك فيني ..؟! لا لا ما توقعتها ..
المدير: عادل وبعدييين .. بتعطيني بطاقتك ولا شلون ..
إياد: الله يصلحك لو انك تقولي وش تبي فيها ما حيصير لك شي ..
المدير بنفاذ صبر: عـــــــــادل ..
إياد: امممم طيب اذا كنت نسيتها وش اسوي ..؟!
المدير بعصبيه: وليش تنساها اصلا ..؟! البطاقه ذي مهمه والمفروض يوميا تكون معك ..
طالع إياد فيه ببراءه وما رد ..
تنهد المدير وقال: طيب اعطني رقمك الجامعي .. ذي عاد مستحيل تكون ناسيه ..
سكت إياد فتره بعدها قال: نسيته ..
ضاقت عيون المدير وهو يقول: عادل .. انت صج عادل ولا لا ..؟!
اخذ ريان نفس بعدها قال: مشكله .. المدير بدأ يشك ..
عماد: لازم نطلع لنا تصريفه ..
صالح: قلت لكم من البدايه ان الامر خطير بس ما تسمعون ..
يزيد: هذا مو وقت العتاب .. إياد بيتورط معنا كمان .. لازم نتصرف ..
دخل إياد إيده في جيبه وقال: شنو ..؟! ما فهمت ..
المدير: اقصد انك مو عادل ..
إياد: آها .. لحد الآن انت شاك اني اخته ..
هز المدير راسه بلا وقال: انت شخص ثاني مسوي روحك عادل ..
إياد ببلاهه: شخص ثاني يعني كيف ..؟! يعني مثلا اكون ولد عم صديق عادل ..؟! هههههه بليز لا تضحكني ..
المدير بحده: ممكن اعرف منو انت ..؟!
إياد: اممم عادل ..
المدير: لا تجذب .. من يوم ما دخلت وانا احسك صغير شوي .. يعني اولى جامعه تقريبا او اصغر ..
إياد: هههه ايه اصلا انا محافظ على شبابي ..
المدير بحده: بطل غباء ..
إياد: طيب يا استاذ اذا انا واضح اني صغير سنتين فبنتك واضح انها صغيره بأربع سنوات .. لا تحكم عالشكل ..
إياد في نفسه: "اولى جامعه يالظالم .. انا بثاني ومكبرني سنتين .. المهم اللحين اللي برى شقاعدين يصلحون ..؟! اكيد معتفسين وحددهم قلقانين" ..
دق الباب في هالوقت ودخل الدكتور تركي ..
د.تركي: السلام عليكم ..
المدير: وعليكم السلام اهليين .. ها بشر ..؟!
جاب الدكتور الاوراق وحطها قدام المدير وبدأ يكلمه ويأشر عالاوراق ويتناقشون ..
لف إياد جهة الباب بس استغرب لما ما شاف الشله ..
إياد في نفسه: "وينهم ..؟!"
سكت شوي يفكر بعدها قال لنفسه: "يمكن شكهم هالدكتور وهاوشهم .. ياللا احسن بس انا ابيهم يكونوا موجودين" ..
لف عالمدير وقال: يا استاذ .. ممكن اطلع ..
طالع المدير فيه وقال: لا ..
لف الدكتور تركي يطالع في الطالب بس عقد حواجبه ..
مشبه عالولد ..
د.تركي في نفسه بصدمه: "صحيح يشبه اسيل .. يا ترى هو يقرب لها ولا خلق من الشبه اربعين" ..
لم المدير الاوراق بإيده وهو يقول: كويس .. اللحين مو ناقص غير الترتيبات العامه .. وان شاء الله نخلصها قبل موعدها ..
هز الدكتور تركي راسه فقال المدير: ايش هي اخبار الدكتور راكان ..؟!
د.تركي: امس الليل رحت ازوره بس يقولوا الزياره ممنوعه عنه .. الله يقومه بالسلامه ان شاء الله ..
المدير: الله يسمع منك ..
د.تركي: ياللا استأذن ..
لف وطالع في إياد فتره وبعدها طلع ..
لف إياد على ورى يتابع تركي بنظراته وهو مستغرب ..
إياد: "شفيه يطالعني ..؟!" ..
المدير: ها يا عادل .. متى حنخلص ..؟!
هز إياد كتفه وهو يقول: مدري ..
طالع المدير فيه بعدها قال: وش بينك وبين حسان ..؟!
إياد: منو يطلع هذا ..؟!
المدير: هذا اللي بلغ عنك انك بنت بدل اخوها ..
هز إياد راسه بإستنكار وهو يقول: ناس اغبياء مثل هذا ابدا ما اتشرف يكون بيني وبينه علاقه ..
المدير: طيب ممكن تفسر لي التصرف اللي ساواه .. شلون يبلغ وهو جذاب ..؟!
إياد ببرود: مهستر .. ما عليه شرهه ..
المدير: معليش انا مو قادر استوعب انه ممكن يجذب جذبه زي جذي ..
إياد: يعني لحد الآن تحسب اني اخت عادل ..؟!!
المدير: لا .. واضح جدا انك ولد .. بس يمكن تكون واحد من اصحاب اخت عادل وييت بدل عنها عشان تساعدها ..
إياد: اممم فكره ممكن تصير .. بس انت طالع في الاوراق اللي جدامك وشوف ان كان الولد اللي بالصوره يشبهني ولا لا ..
طالع المدير بالاوراق وهو يقول في نفسه: "وهذا اللي محيرني .. شلون جذي .. بس لحد الآن احس انه فيه حلقه ناقصه .. احسه جذاب ومستحيل اصدق إلا اذا شفت البطاقه الجامعه بعيني" ..

وصل سامي في هالوقت لعند بيت دانا ونزل بسرعه من السياره ودق الباب بقوه وبدق متواصل ..
انفتح الباب وطلعت ام دانا وقال: هلا ....
قاطعها سامي بسرعه: وين دانا ..؟! ناديها بسسرعه يا خاله بسسسرعه ..
استغربت ام دانا بعدها دخلت عشان تنادي دانا ..
شوي طلعت دانا ولما فتحت فمها بتتكلم قاطعها سامي يقول: جم رقمج الجامعي بسسرعه ..؟!
طالعت فيه فتره وبعدها .......
واما اصحابه جتهم فكره انهم يتمشكلوا مع اي شله وبعدها يروحوا للمدير بس استبعدوها على طول ..
جتهم فكره ثانيه بس كمان استبعدوها ..
كانوا في مرحلة قلق وخوف ما قد جربوها ابدا ..
لا سوري قد جربوا مراحل زي كذا ..
في النهايه راحوا لغرفة المدير عشان يشوفوا وش صار على إياد ..
سمعوا صوت المدير يقول بحده: لنا تقريبا ثلث ساعه ولحد الآن ما طلعنا بشي .. ابي افهم انت ليش تماطل ..؟! ماكو طالب بالجامعه ناسي رقمه الجامعي ..
إياد: طيب شسوي انا نسيته ..
المدير: شلون تنساه .. عيل شلون تدخل عالموقع في النت ..؟!
إياد: في البدايه حطيت الرقم وبعدها كتبت تذكر كلمة المرور ومن بعدها صرت ادخل تلقائيا ..
المدير بقلة صبر: عـــادل لا تحاول .. انا ابدا مو مصدق انك عادل ..
إياد: عيل ليه تناديني بعادل ..؟!
هز المدير راسه بعدم تصديق ..
شوي وينجن من هالطالب اللي قدامه ..
إياد: ههههه والله انك خوش مدير .. تهتم بأدق التفاصيل عشان محد يضحك عليك .. اعجبتني ..
دخل إيده بجيبه وطلع البطاقه الجامعيه وقال: هاك ذي البطاقه .. بس بغيت اشوف اذا احد يقدر يضحك عليك ولا لا ..
طالع المدير بالبطاقه والشله كل واحد يطالع في الثاني بصدمه ..
يزيد: شسالفه ..؟!
ريان: هذا اي بطاقه طلعها ..؟!
صالح: لا يمكن تكون البطاقه الجامعيه صج ..؟!
عماد: مستحيل تكون البطاقه الجامعيه ..!
يزيد: اذا ما كانت هي عيل وشو ..؟!
طالع المدير في البطاقه بعدها رفع راسه يطالع في إياد وتنهد بعمق ..
إياد: هههههههه اعذرني والله عارف اني يننتك بس عشاني حبيتك وحبيت اسولف وياك ..
مد المدير فأخذ إياد البطاقه وهو يقول: تامر بشي ثاني ..؟!
هز المدير راسه وهو يقول: اطلع يا حبيبي اطلع .. ماكو طالب ينني مثلك ..
إياد: هههههههههه بس اكيد حبيتني صح ..
ابتسم المدير وقال: ياللا روح عالكلاس لا تتأخر على محاضرتك ..
إياد: طيب يا استاذ ابسألك سؤال ..
المدير: اسأل ..
إياد: هذا اللي اسمه حسان وش بتسوا معاه ..؟!
طالع المدير فيه فتره بتفكير فقال إياد: خلاص لا تكلمه لأني هههههههه لأني انا شككته بنفسه وخليته يحسبني مو عادل .. ما توقعت انه بيعلم ..
المدير بدهشه: انت ..؟!!!
إياد: ههههههههه يب ..
المدير: وبعدين يا عادل وبعدين .. بطل مشاكل ..
إياد: هههه حاضر من عيوني ..
المدير: ياللا لا تتأخر على محاضرتك ..
إياد: ههههه باااي ..
خرج وقفل الباب وراه ..
لف بعيونه يطالع في الشله اللي يطالعوه بدهشه واستغراب ..
هز إياد كتفه وقال ببرود: قلت لكم من قبل انكم اغبياء .. اتوقع انكم فهمتوها اللحين ..
ريان: لا يمكن ..!!
إياد: لما حكيتني كل شيء استغربت انك ما يبت سيرت انكم زورتوا البطاقه الجامعيه فعشان جذي اخذتها من دانا هالصباح واعطيت واحد اعرفه من طرف ابوي يزورها لي وانتهى الامر .. مدري شلون طلاب جامعيين لهم ثلاث سنوات بالجامعه نسوا شيء زي جذي وانا اللي ما اعرف شيء بالجامعه تذكرتها ..
ابتسم وكمل: هذا ان دل فدل على فرق العقل اللي بيني وبينكم ..
يزيد: اللحين انت تقصد ان البطاقه من قبل لا تدخل عالمدير وهي معاك ..؟!
رفع إياد حاجبه وهو يقول: وش هالسؤال المهستر .. لا ابد ما كانت معي بس كنت انتظر طيارة هيلكوبتر تييبها لي .. والحمد لله وصلت بالوقت المناسب .. حتى المدير لما شاف طيارتي اعجب فيها وقال انه بيشتريها وقعدنا نتساوم عالسعر ..
يزيد: دامها معك من البدايه فليش خليتنا في حالة قلق وتفكير وخوف وحتى سامي وهو تعبان راح لبيت دانا ..؟! ليه ما قلتنا من البدايه ..؟!
إياد: ما راح اقولكم .. تستغلون طالب ثانوي وذكي مثلي وبدون ثمن .. لازم تدفعوا الثمن ..
تنهد ريان وقال: ياخي اقلقتنا .. بس المهم ان كل شيء عدى على خير ..
ابتسم إياد وقال: شرايكم فيني ..؟! حتى سالفة حسان انهيتها ..
عماد: انت فضييع .. مدري من فين لك هالافكار ..؟!
إياد: ههههههههههه شايف كيف المدير حبني .. والله اني ادخل القلب بسرعه ههههه ..
عماد: ههههههههههههههههههه ..
صالح: الله يعين سامي .. روحته بدون فايده ..
إياد: هههههه هو ذا .. ابيه يتعب .. معليش بس انا انسان نذل ههههه ..

طالع سامي في دانا فتره بعدها قال بصدمه: كيف ..؟! شلون يعني ..؟! انا مب فاهم ..
هزت دانا كتفها وقالت: اللي سمعته .. وكمان طلب مني اقفل موبايلي عشان ايننكم ..
اعتفس وجهه سامي وقال بعصبيه: ابن اللذين .. كان لاعبها من اول .. صدقني اني راح اردها لك ومحد راح يفكك مني .. هيين ..
لف سامي بيروح سيارته بس وقفه صوت دانا تقول بهدوء: سامي ..
لف عليها وقال: نعم ..
طالعت فيه شوي متردده بعدها قالت: الحمد لله عالسلامه ..
سامي: الله يسلمج .. والله من بعد ذيج المهاوشه ما توقعت اني بأقدر امشي ..
دانا بهدوء: انا آسفه ..
سامي بإستغراب: على شنو ..؟!
دانا: بسببي صار لك اللي صار ..
سامي: يا بنت لا تعتذري .. اعتبري هذا يزاء المقلب اللي ساويته فيج ..
حست العبره بتخنقها وهي مو عارفه ايش السبب ..
يالله ماهي قادره ..
تحبه وتحبه وايد ..
لف وجهها ودخلت البيت وقفلت الباب واستندت عليه ..
طالع سامي فيها بإستغراب بعدها ركب سيارته ورجع للجامعه ..

شهقت دانا ونزلت دموعها من عينها ..
جلست عالارض ودفنت وجهها بين ركبتها وبكت ..
فيها ضيقه مو طبيعيه ..
ما تدري تلقاها من فين ولا فين ..
من اخوها المقعد اللي تتألم كل ما شافته او شافت احباطه ..
او من الجامعه ودراستها ومشاكلها اللي حتى اصحابها طيحتهم فيها ..
ولا من حياتها ومعاناتها واحاسيسها اللي بتذبحها وتخنقها ..
وبطريقه مفاجئه حوطت إيدها على جسمها بعد ما جتها نغزة ألم ..
شوي الألم ازداد وهي شدت إيدها على جسمها أقوى وضاغطه على اسنانها بقوه عشان تتحمل ..
ومع كل اللي سوته الألم ما وقف وكل ماله يزيد لدرجة انها حست ان روحها بتطلع ..
ضربت برجلها بقوه عالارض ودموعها تنزل انهار ومع هذا ضاغطه على اسنانها عشان لا يطلع اي صوت ..
ألم فضيع ..
ألم يمزقها بعنف ..
هالآلام جتها اكثر من مره بس ما كانت بالقوه هذي ..
خرج تؤمها عادل في هالوقت وانصدم من منظرها ..
اسرع بالكرسي ناحيتها لدرجة انه كان حيطيح ..
اول ما وصل عندها نزل بخوف وجلس قدامها وهو يقول: دانا .. دانا شفيج .. دانا تحجي .. شنو فيج .. بشنو تحسين .. دانا ..
فتحت دانا فمها بتتكلم بس ما قدرت ..
هزها عادل وهو يقول بخوف: دانا بليييز تحجي .. ليش تبجين وليش تتألمين جذي ..؟! شنو فيج بالضبط ..؟! تحجي ..
مدت إيدها ومسكت بلوزة اخوها وضغطت بقوه وعادل يحس بقلبه بيتقطع من حالة اخته ..
شوي انهارت قوتها وفكت بلوزته وطاحت عالارض مغمى عليها ..
كل هذا وعادل يطالع فيها وهو حددده مصدوم ..

================================================== ==================