شبكة همس الشوق - عرض مشاركة واحدة

15 - 3 - 2014, 10:33 AM

الساعه تسعه الصباح ..
وفي شقة اسيل ..
كانت جالسه عالسرير وضامه رجلها لصدرها وهي تفكر ..
مو معقوله الانسان اللي بالامس معها يكون اخوها ..!!
ابدا مو معقوله ..
اسمه اللي بالكرت يأكد انه اخوها بس هي ما تبي تصدق ..
وصايف وقتها قالت ان لسميه بس بنت وحده وهي اسيل ..
عيل من فين طلع لها اخ اصغر ..؟!
من فين ..؟!
مهما تسائلت .. ومهما انصدمت .. ومهما استنكرت ..
الحقيقه تقول انه فعلا اخوها ولازم تصدق هالامر ..
نزلت دموعها على خدها وهي تتذكره ..
ضحكته .. استهباله .. سوالفه ..
كل هذا يدل انه مبسوط بحياته ..
نزلت دموعها اكثر وهي تتذكر كلامه ..

" ابوي دايم يحرص علي .. يدخلني مدارس اهليه ومعطيني حريه مطلقه اسحب من رصيده ودووم يلبي كل طلباتي .. معيشني في نعيم "
ضغطت بأصابعها بقوه على إيدها وهي تتذكر هالكلام ..
الشخص اللي رماها ..
الشخص المسمى بأبوها ..
الشخص اللي بينها وبينه علاقة دم ..
هالشخص قاسي ..
قاسي ..
طعنها .. دمرها ..
اخوها اللي من نفس دمها ولحمها عايش مرتاح .. مبسوط .. مو ناقصه شيء ..
طيب ليه هي لا ..؟!
ليه صلح فيها كذا ..؟!
ايش الفرق ..؟!
اختنق نفسها ودموعها واصلت النزول وقالت بهمس: حتى انا بنتك .. حتى انا من لحمك .. شنو الفرق بيني وبين إياد ..؟! شنو ..؟! ابي اعرف يوابك .. قتلتني بتصرفك هذا .. قتلتني ..
دفنت وجهها في إيدها وبكت ..
في كل يوم تزداد في عيونها حقارة اهلها ..
ومع كل يوم تحتقر نفسها كمان ..
وطعنات قلبها تزيد يوم بعد يوم ..
خلاص كافي انها عرفت انهم رموها ..
وكافي انها عرفت انهم اغنياء ومو ناقصهم شيء عشان يرموها ..
واللحين عرفت ان لها اخ وعايش عيشه احلى من العيشه اللي هي عايشتها ..
تبي تفهم طبيعة هالأهل اللي ولدت من صلبهم ..
تبي تفهم سبب تصرفهم ..
ليش صلحوا كذا ..؟!
شلون يفكرون ..؟!
وين قلبهم اللي المفروض يحن على بنتهم ..؟!
وين ضميرهم اللي المفروض يأنبهم على تصرفاتهم ..؟!
وين احاسيسهم اللي المفروض يتألموا منها على افعالهم ..؟!
وين كل هذا ..؟!
وين راح ..؟!
فتحت فمها وقالت بهمس وألم: اكرهكم .. ما ادري جم مره قلتها .. لو قلتلوني ارحم .. والله ارحم .. انتم مو اهل .. اكرهكم كلكم ..
زادت شهقاتها وبكائها ..
ما تعرف شلون ترتاح ..؟!
الراحه مو بالفلوس والمال ..
الراحه راحة النفس ..
شلون ترتاح نفسها وهي ما ذاقت الحنان من امها ..؟!
ولا العطف من ابوها ..؟!
ولا الحنيه من اقاربها ..؟!
بالعكس .. ذاقت الحرمان بسببهم ..
ذاقت الدمار بسببهم ..
تألمت وتعذبت بسببهم ..
رفعت راسها ومسحت دموعها وطالعت بالفلوس اللي اعطاها إياد ..
حست بشيء غريب بصدرها ..
ماهي راضيه عن هالفلوس ..
والسبب لأنها من فلوس ابوها ..
تكرهه فطبيعي تكره كل شيء من ناحيته ..
حتى إياد ابنه المفروض تكرهه كمان ..
بس مو قادره ..
ابدا مو قادره ..
هالانسان تحسه غير وما تقدر تكرهه ..
يمكن يكون السبب هو الكلام اللي قاله قبل ..
" تمنيت ان ابوي ميت "
" كرهته .. اهتزت صورته جدامي .. بين لي قد ايش هو انسان سيء "
" دمرني ومستحيل اسامحه "

بلعت ريقها كمحاوله انها توقف دموعها وهي تفكر بهالكلمات ..
كيف يعني ..؟!!
معقوله يكون ابوها بهالسوء ..؟!!
معقوله يكون سيء لدرجة ان ابنه يكرهه لهدرجه ..؟!!
ايش هالاهل بالضبط ..؟!!
حتى امها تسببت في دمار حياة البنت اللي اسمها وصايف ..
صـــــــــداااع فضيييع مسيطر على راسها ..
دق جوالها في هاللحضه وقطع حبل افكارها ..
طالعت في الشاشه فتذكرت صاحباتها ..
كان لها نيه انها تزورهم ..
بس خلااااص نفسيتها ما تسمح لها ..
راح تزورهم بيوم ثاني ..
غمضت عيونها وحطت راسها عالمخده ..
شوي تذكرت سالفة المبلغ ..
بكره راح تنسجن اذا ما دفعت ..
يعني ما تقدر تشوفهم غير اليوم ..
اخذت نفس عميق وبدأت تقرأ الاذكار ..
بعد ما حست انها هديت قامت من مكانها وجهزت نفسها وبعدها خرجت من الشقه وركبت اول تاكسي واتجهت للجامعه ..
طول الطريق وهي قلقانه وخايفه ..
تخاف تنجرح وهي مو ناقصه هم اكثر ..
تمنت ان ما تقابل احد ابدا ..
بس صاحباتها وبس ..
ما تبي غيرهم ..
بعد فتره وقف التاكسي قدام باب الجامعه ..
طالعت من الشباك وشافت الطلاب داخلين وخارجين ..
لفت بعيونها عالمكان تدور صاحباتهم ..
خنقتها العبره وابتسمت غصب عنها لما شافتهم ..
هم نفسهم ما تغيروا ..
ندى .. لين .. سارا .. ليان .. وسن ..
كلهم موجودين ..
مسحت دمعتها اللي نزلت وفتحت باب السياره وقالت للسواق: انتظرني ..
السواق: حادر ..
قفلت الباب وراها واتجهت لهم ..
اول من شافها لين ..
صرخت بقوه وجريت ناحية اسيل ونطت تحضنها وهي تقول: اسيـــــــــل لا مو مصدقــــــه ..
ندى بصدمه: يت ..
نزلت دموع ليان وراحت هي وباقي الشله لأسيل ..
لين وهي تبكي: يالجلبه توقعتج بتسحبين علينا ..
شهقت اسيل من البكي وما قدرت ترد ..
حضنتها ندى بقوه وهي تقول: وحشتينا يا بنت .. هذي سوات تساوينها برفيجاتج ..؟! خوفتينا عليج ..
سحبتها ليان وسلمت عليها وهي تقول: كويس الحمد لله انج ييتي ..
ابتسمت اسيل وقالت بهمس: وحشتوني ..
حضنتها سارا وهي تقول: وانت اكثر .. وربي وحشتينا كثير ..
ندى: حرام اللي تصلحينه فينا .. حنا رفيجاتج مو احد ثاني .. ليش جذي ..؟!
ابتسمت من بين دموعها وقالت: سوري ..
لفت نظرها على وسن فشافتها مبرطمه وتمسح دموعها ..
تقدمت اسيل عندها وحضنتها وهي تقول: يااااه يا كارلوتا .. وحشني كلامج ..
ما تحملت وسن فأنفجرت تبكي وهي تقول: اسيل والله احبج وايد .. ارجعي واضحكي علي طول اليوم .. والله ما ازعل .. امانه ارجعي عشاني ..
غمضت اسيل عيونها تمنع دموعها تنزل اكثر وقالت بهمس: ما اقدر .. والله ما اقدر .. مو بإيدي ..
لفتها لين على جهتها وقالت بعتاب: شنو يعني ما اقدر ..؟! انت شعليج من حجي الناس ..؟! خليهم يولوا .. اقسم بالله اني لأقطع لسان كل واحد يفتح فمه بكلمه اذا بغيتي ..
نقلت اسيل نظرها بينهم وقالت: انتم مو حاسين فيني .. خلوني على راحتي .. بُعدي عن الجامعه راحه لي .. اذا تحبوني لا تضغطوا علي ..
سارا: اسيل ما يصير جذي .. لا تهتمي بحجي احد ..
اسيل بإنفعال: شنو يعني لا تهتمي بحجي الناس ..؟! انا انسانه مب حجر عشان ما احس .. اتألم كل يوم مليون مره وانا اتذكر قدر نفسي وانتوا تقولوا طنشي .. ليه ما انتوا راضيين تحسوا بحالتي ليه ..؟!!!
حضنتها ندى وهي تقول: خلاص خلاص يا اسوول هدي .. هم ما قالوا جذي الا من حبهم لج .. يبون يطلعونج من اللي انتي فيه ..
بكت اسيل في حضن ندى وما ردت ..
وسن بصوت باكي: اسيل لا تبجين عشان ما ابجي .. والله كلنا نحبج فلا تبجين ..
حطت ليان إيدها على كتف اسيل وقالت: اسوله قلبي خلاص اهدأي .. احنا مقدرين الحاله اللي انتي فيها .. اذا ما تبين تيين الجامعه فصدقيني اننا ما راح نلومج .. اللي نبغاه منج انج ما تقطعي علاقتج فينا .. اتصلي علينا وردي على اتصالاتنا .. انتي رفيجتنا ..
مسحت اسيل دموعها بإيدها وهزت راسها بإيه ..
بعدت عن ندى وقالت: اعذروني انا رايحه ..
لين: ليييه بسسرعه ..؟!
اسيل: ......................
ندى: خلاص خلوها براحتها .. اكيد بتزورنا مره ثانيه ..
وسن: اسيل ..
طالعت اسيل فيها فكملت وسن: اذا تبيني اساعدج بأي شيء قولي لي .. اقدر اقول لبابي يضرب امج وابوج الشريرين ..
ابتسمت اسيل بهدوء وقالت: ههه ابوج كبير وما راح يصلح شيء زي جذي ..
وسن: طيب بأقول لصديقنا صاحب الحصانات يضربهم .. هو قوي .. تبيني اقوله ..؟!
حطت اسيل إيدها على كتف وسن وقالت: يا حياتي انا مقدره انج تبين تساعديني .. شكرا ..
ندى: اسيل ..
اسيل: نعم ..
ندى: ولد عمج وائل اكثر من مره اتصل علي عشان يطمئن عليج وقال اذا عرفتي عنها اي شيء قولي لي ..
اسيل: هالانسان فيه طيبه مو طبيعيه .. قولي له ان اسيل بخير وتسلم عليك .. قولي ان اسيل عايشه طبيعي وتتمنى انك تعيش طبيعي وتنتبه لحياتك ..
هزت ندى راسها وقالت: اوكي .. ياللا مانبي نطول عليج .. بااي ..
ودعوها صاحباتها وراحوا عنها ..
تابعتهم بنظراتها وبعدها راحت للتاكسي ..
وهم داخلين للجامعه صك كتف لين بواحد خارج ..
لفت تطالع فيه ولما شافته حركت فمها بقرف ودخلت ..
طالع الولد فيها بعدها لف على صاحبه وقال: طارق طاع هالمينونه شنو تساوي ..؟! خبله ..
طارق ببرود: طنشها ..
فهد: تنرفزني وايد ..
طارق: ياخي انت ما تعرف تطنش ..؟!
فهد: لا والله ما تعلمت اكون بدون مشاعر مثلك ..
طارق: عيل ذي مشكلتـ....
قطع كلامه فجأه وهو يطالع لقدام بصدمه ..
هي .. لا مو هي ..
يمكن تشبها ..
لا مستحييل هي نفسها ..
ما صدق عيونه وهو يشوفها متجه لسيارة تاكسي ..
فهد بإستغراب: طارق شفيك ..؟!
لف طارق عليه وهو يقول بعدم تصديق: اسيل ..؟!!
عقد فهد حواجبه بإستغراب وطالع قدام شوي وقال: ايه والله صح كأنها هي ..
رجع طارق نظره ناحية اسيل وهو مو مصدق ..
من زمان ما شافها ..
من زمان وهو يتمنى يشوفها ..
من زمان يبي يشوفها عشان يكلمها ..
يعتذر منها ..
اعطى كتبه لفهد وراح لجهة اسيل ..
اول ما ركبت اسيل السياره وجت بتقفل الباب جاء طارق ومسك الباب ..
رفعت راسها وانصدمت لما شافته ..
طارق: اسيل ..
طالعت اسيل فيه لفتره وهي مصدومه بعدها قالت بهمس: كنت مع رفيجاتي .. وهذا تاكسي .. ما كنت مع اي ريال عشان تيي وتقول حجيك اللي دايم .. ابعد ..
انصدم طارق من كلامها وقال: اسيل انا مـ...
قاطعته اسيل بصراخ: بـــــس .. اعرف اللي بتقوله .. بتقول حتى لو ماكو رياييل فلقبج يأكد معدنج ..
سكت شوي بعدها كملت بألم: ايييه .. انا اقابل رياييل .. مو واحد ولا اثنين .. عشره .. لا عشرين .. اقابل كثير .. عادي صح انا لقيطه فعشان جذي انت مو مصدوم صح .. اللحين ارتحت .. انا وحده سسيئه ججدا فلا تتكلم معاي ..
عصب طارق من كلامها وقال بعصبيه: اسيل انتي شلون تقولين هالحجي عن نفسج ..؟! لا انتي ابد مو البنت اللي اعرفهـ....
اسيل بصراخ: جـــــــــــب .. اسكـــــت .. مابي اسمع صوتك ..
بلعت ريقها وكملت: ايه انا مو اسيل اللي تعرفها .. قبل كنت ارمي نفسي على واحد او اثنين .. اللحين ارمي نفسي على ستين وسبعين .. فهمت ..
هز طارق راسه بعدم تصديق من كلامها ..
لهدرجه حالتها صعبه ..؟!
ليه تقول هالكلام عن نفسها ..؟!!!
لهدرجه كانت تصرفاته قاسيه جدا معها لين وصلها لكذا ..؟!!
مستحيل ..
مسكت الباب عشان تقفله بس طارق وقفه وقال: ما راح تروحين لين تسمعين كل اللي عندي ..
اسيل بصراخ: مابي اسمع شيء منك ..
طارق بعصبيه: راح تسمعي غصب عنج فاهمه ..؟!
طالعت فيه بعيون حاقده ..
ما تبي تشوف وجهه ابدا ..
تكرهه بقوه ..
طالع طارق في نظراتها وقال بهدوء: اسيل لا تطالعيني جذي .. انا اعرف انج تكرهيني بس مو لهدرجه .. ابي افهمج اشياء ..
هزت اسيل راسها وقالت: مابي افهم شيء .. اصلا انا غبيه .. اوكي .. انقلع عن ويهي وهدني لحالي ..
طارق بعصبيه: اسيل الى متى بتضلين جذي ..؟! انقذي نفسج من اللي انتي فيه .. وايهي الناس واسمعي لهم .. فيه كلام كثير ابي اقوله لج ..
اسيل بإنفعال: مابي اسمع شيء .. انت شعلاقتك فيني .. اتركني ..
وسحبت الباب في غفله من طارق عشان تقفله ..
حاول طارق يمسك الباب بس مالحق عليه وانقفل الباب على اصبعه ..
سحب إيده بألم وهو عاض على شفته ..
طالعت اسيل فيه وقالت نفس جملة اخوها وولد عمها: احسن .. عساك من هالحال واردى ..
وتحركت سيارة التاكسي بسرعه وطارق يتابعها بنظراته ..
طارق بهمس: ليه راحت ..؟!
تنهد ولف ورى وشاف فهد اللي ماكان بعيد عنه ..
فهد: ذي مو طريجه صحيحه تحاجيها فيه .. المفروض ما تعصب ..
اخذ طارق كتبه وقال: مالك شغل ..
واتجه لسيارته ..
هز فهد راسه ولف وراح لسيارته ..
كان باقي لهم محاضره بس بعد ما عرفوا ان الدكتور غايب راحوا لبيوتهم ..

================================================== ==================