شبكة همس الشوق - عرض مشاركة واحدة

15 - 3 - 2014, 10:34 AM

الظهر والساعه وحده تقريبا ..
كان بسام ماسك شنطته ومتكئ عالجدار المقابل لباب جناحه ..
كان ينتظر الدكتور عشان يدخل معاه لأن حالة سميه سيئه جدا وحذره الدكتور من انه يدخل قبل لا يجي هو ..
تنهد وهو يتذكر امس لما جاب الدكتور ابو بندر لأول مره ..
حصلت مشاحنات قويه بينه وبين سميه وبعد فتره هديت كم دقيقه بعدها رجعت لحالتها القديمه ..
فتح فمه وقال بهمس: يا رب تتعافى وترد مثل قبل ..
تنهد للمره الثانيه وقال: لا اله الا الله .. هو قادر على كل شيء .. ان شاء الله كل شيء يرجع لمجانه الصحيح ..
ضاقت عيونه وهو يتذكر زوج اخته ..
هالانسان مكانه الصحيح هو السجن ..
نتيجة الجريمه اللي سواها بحق بنته ..
ونتيجه للاعمال اللي يحسب ان محد يعرف عنها ..
بسام: صدقني انك راح تنسجن على إيدي .. بس انت اصبر لين افضى لك .. اصبر شوي ..
فتح مصعب الباب وتكتف وقال: له له رجع الطالب من دراسته وهاهو الآن واقف جدام باب شقته .. لا يكون اختك عاقبتك وطردتك هههههههه ..
عقد بسام حواجبه وهو يطالع في مصعب ..
هذا شدراه ان اخته معاه بالجناح ..
مصعب: والله انك مسجن ودووم تكسر خاطري .. بس تستاهل .. تحسب اني نسيت سالفة انك قتلت واحد ودفنته بين آثار اهرامات مصر ..؟! لا يا حبيبي ما نسيت ..
رفع بسام حاجبه وهو يقول: انت عن شنو تتحجى .. اي واحد ذا اللي تقول اني قتلته ..؟!
مصعب: لا تتصنع العباطه يالعبيط .. اول ما كشفتك على طول هجيت لبريطانيا .. واللحين رجعت لأن عبالك اني نسيت ..
بسام: قبل لا اسافر ..؟!
شوي تذكر ذاك الموقف ..

:::::::::::::::::::::::::::::::::::::::::::::::::: ::::::

طالع مصعب فيه وقال: وينك ..؟! الجامعه مخلصه لها اكثر من ثلاث ساعات .. لا يكون تدرس مسائي بعد ..؟!
بسام بهدوء: كان عندي شغله ضروريه .. ها عندك سؤال ثاني ..؟!
مصعب: وش هالشغله الضروريه اللي ما جت غير اليوم ..؟!
بسام: شغله خاصه ..
مصعب: شغلاتك ما تخلص ..؟!
بسام: لا ما تخلص .. بليييز انا متضايق فأبعد عني ..
مصعب: وش هو اللي مضايقك ..؟!
بسام بإنفعال: مصعب ابعد .. لصبري نهايه ..
رفع مصعب حاجبه وقال: اوووه متضايق وبقووه .. لا يكون قاتل لك قتيل ..؟! حبيبي بسام قولي ولا تخاف .. صدقني راح اساعدك على تسليم نفسك للمخفر ..
طلع بسام مفتاحه وابعد مصعب بحركه حاده ودخل للجناح ..

:::::::::::::::::::::::::::::::::::::::::::::::::: ::::::

بسام: ههههههههههههههه يا رب هالانسان مينون ..
طالع في مصعب وقال: ياخي لا تخليني اضحك بحسره على هالحال .. الله يشفيك ..
مصعب: ايه تهرب وصلح نفسك انسان مسجين وبريء .. لو انك سلمت نفسك للمخفر افضل لك صح ولا انا غلطان ..؟!
هز بسام راسه بيأس بعدها قال: اوكي حجيك صح .. اللحين ندمت .. ان شاء الله اذا قتلت واحد ثاني بعدين راح اسلم نفسي .. تامر بشيء ثاني ..
مصعب: تستعبط حضرتك ..؟!! ترى انا مصعب ولد ابوي ومحد يستعبط علي .. اسمع قولي وش اسم الهرم اللي دفنت القتيل فيه ..؟!
بسام بتنهيده: خوفو ..
مصعب: اووه دفنته في اكبر هرم عشان يكون البحث صعب ..
بسام: طبعا انا ذكي ..
مصعب: خبيث ..
بسام: ايه انا خبيث ..
مصعب بتفكير: طيب في اي جهه دفنته بالضبط ..؟!
بسام: في الزاويه ..
مصعب: آها ..
بسام: خلص تحقيقك ..
مصعب: بسام حبيبي روح سلم نفسك عشان مصلحتك ..
بسام: حاااضر من عيوني .. اول ما انهي اشغالي بأسلم نفسي ..
تقدم مصعب وحط إيده على كتف بسام وقال: والله انك انسان جدع على قولة اخواننا المصريين .. اطمئن راح ازورك واييب لك اكل تاكله ودفتر وقلم عشان تكتب سيرة حياتك ..
بسام: مشكور ما قصرت ..
مصعب: ههههه واخيرا راح تطلع من الجناح بشكل نهائي .. استانست لما طلعت اول وحسبت اني طلعت رقم ٦٠ بس للأسف رجعت ..
تذكر بسام اسيل فطلع محفضته وقال: مصعب ابي اسألك سؤال ..
مصعب: وشو ..؟!
فتح بسام على صورة اسيل وقال: تعرف هالبنت ..؟!
مصعب: طبعا اعرفها .. ذي رقم ٥٩ اللي اطلعها .. كانت مع ولد عمها .. وكانت بالبدايه مينونه ..
قفل بسام محفضته وقال: حكني كل شيء عنها .. ليه يت هنا وشنو تقصد بمينونه ومنو ولد عمها هذا ..؟!
مصعب: وليش تبي تعرف كل شيء عنها ..؟!
طالع فيه بسام لفتره بعدها قال: ذي بنت اختي اللي قلت لك اني ادور عنها ..
انصدم مصعب وقال: جـــــــد ..؟!!
هز بسام راسه بإيه ..
مصعب: اممم اللي اعرفه انها يت سكنت هني وهي اصلا كانت هاربه من مستشفى ميانين ..
بسام بصدمه: شنـــــــــو ..؟!!
مصعب: اصلا حتى تصرافتها كانت غريبه وتدل انها مينونه .. ومره ياء ابوها يزورها فطردته .. اممم عندها اخ اسمه فارس تحبه كثيير ودايم تقول لولد عمها اللي اسمه وائل انه ييب فارس معاه .. بعدين حسيت انها رجعت طبيعي وصارت بخير واخذها اللي اسمه وائل ومشاها برى وفي اليوم اللي بعده طلعت من هني ..
طالع بسام فيه فتره وهو مصدوم من كلامه ..
شلوون يعني هربت من مستشفى مجانين ..؟!
شلوون يعني طردت ابوها وليه كانت تصرفاتها مو طبيعيه ..؟!
ايش اللي كان يصير معاها بالضبط ..؟!
اخذ نفس عميييق ..
مخنوووق وما راح يفتك من خنقته إلا لما يعيشها حياة تعوضها عن كل شيء عذبها قبل ..
مصعب: بسام ..
طالع بسام فيه بعدها قال: ما تعرف شيء كمان ..؟!
هز مصعب راسه بلا ..
ضغط بسام على ايده بقوه وهو يقول في نفسه: "هين .. صدقيني يا سجى اني راح انتقم لج من اللي يتسمى اب .. صج انه ما يستحقج" ..
جاء الدكتور ابو بندر في هاللحضه وبعدها دخل هو وبسام للجناح ..

.................................................. ................

في نفس هالوقت وفي بيت ابو سجى ..
كان جالس في مكتبه وهو عاقد حواجبه وكأنه يفكر في امر يزعجه ..
دق واحد الباب فقال بهدوء: ادخل ..
دخل رجل في بداية الثلاثين من عمره وقال: عفوا طال عمرك ..
طالع فيه ببرود وقال: ها شصار يا لؤي ..؟!
فتح لؤي فمه وقال: في الصباح ياء هني وطلب منا نزور له بطاقه جامعيه وبعدها راح للجامعه نفسها اللي يدرس فيها سامي وبعدين طلع عالساعه تسعه الا ربع وراح لبيت رفيجه بدر ولحد الآن ما طلع ..
ابو إياد: يعني هو بخير ..؟!
لؤي: طبعا ..
ابو إياد: عرفتم شيبي من هالبطاقه ..؟!
لؤي: حاولنا نسأله بطرق مختلفه بس كان يستهبل وما يجاوب ولما ياء بيروح قال اتمنى تبطلوا تراقبوني .. هذا يعني انه عرف مع اننا نراقبه بسريه تامه ..
ابتسم وقال: كنت حاس لأنه ذكي ويقدر يكتشف .. بس ايش اللي يبيه من الجامعه ..؟!
طالع في لؤي بعدها قال: خلاص روح ..
فطلع لؤي وقفل الباب وراه ..
نزل نظره يطالع في الاوراق اللي قدامه بعدها عقد حواجبه وقال: شلون هالبسام عرف شلون ..؟!
ضغط عالقلم اللي بإيده بقوه وهو يقول: اعرف انه ما راح يسكت .. انا لازم اتصرف قبله ..
كسر القلم بين إيده وهو يقول بضبط اعصاب: الحقيير ..
قعد على وضعيته كم دقيقه وبعدها قلب في الاوراق اللي قدامه ..
طلع ورقه منها واخذ له قلم ثاني وكتب فيها ..
ابتسم وقال: باجي خطوه وحده وبعدها حنشوف ان كنت تقدر تسجني يا بسام ولا لا ..
زادت ابتسامته وقال: انا اكبر منك يا ولد .. انا مو سهل ..
طلع سيجاره واشعلها بالولاعه وبعدها دخنها بهدوء ورواقه ..

================================================== ==================

العصر وفي احد المستشفيات ..
الام رايحه وراجعه وهي على احر اعصابها ..
لفت على ولدها وقالت بخوف: عادل .. الدكتور ذا متى بيطلع ويقولنا ايش فيها ..؟!
هز عادل كتفه بهدوء وهو يقول: ان شاء الله خير .. ان شاء الله خير ..
الام بقلق: اي خير يا عادل .. له ثلاث ساعات ولحد الآن ما قالنا الدكتور شي .. كل شوي يقول دقيقه ما طلعت النتيجه او يقول شوي بتأكد .. قلبي قارصني على بنتي ..
جلست عالكرسي وقالت: من اسبوعين وهي تشتكي من راسها وبطنها وكل ما قلت لها روحي المستشفى تقول مو لازم بأخذ بنادول وبصير بخير .. يا خوفي يكون عندها مرض والصداع من اعراضه ..
عادل: يمه لا تتفاولي عليها .. ان شاء الله خير ..
لفت الام على عادل وقالت بخوف: قبل يومين باخر الليل صحيت فشفتها بالحمام تستفرغ .. عادل ايش هو المرض اللي يكون الصداع والحمى والاستفراغ من اعراضه .. ياوبني .. قلبي واحساسي يقول ان فيها شيء جايد ..
عادل: يمه صلي عالنبي ..
الام: صلى الله عليه وسلم ..
عادل: خلاص اهدأي وان شاء الله ما يكون فيها إلا كل خير ..
الام: اقولك قلبي قارصني .. هذا قلب الام يا عادل ..
عادل: يمه الله يهداج وش قلنا ..
تنهدت الام وهي تقول: استغفر الله العظيم .. يا رب لطفك .. يا رب رحمتك .. لا إله إلا انت ..
وبدأت تدعي ربها ان بنتها تكون بخير ..
تنهد عادل وهو يقول في نفسه: "دانا فيها شيء .. انا تؤمها واكثر واحد حاس .. يارب .. يارب" ..
طلع الدكتور من مكتبه فقامت الام له بلهفه وقالت: ها شفيها بنتي ..؟! شنو فيها بالضبط ..؟!
تقدم عادل بكرسيه وقال: دكتور تراك خوفتنا .. هي حدها اغمى عليها فليش الفحوصات تاخذ كل هالوقت ..؟!
تنهد الدكتور وقال: الله يهديكم انتم ليش تأخرتم عنها جذي ..؟!
طاح قلب الام وهي تقول: ليه وش فيها ..؟! بنتي وش فيها يا دكتور ..؟!
الدكتور: عملنا الفحوصات فطلعت لنا بنتيجه فأعدنا عمل الفحوصات فطلعت لنا نفس النتيجه .. المرض فيها من اكثر من شهر وطبيعي مالاحظتم قبل لأنها مصابه في عضو من الاعضاء الصامته وهذا يعني ان الاعراض تطلع متأخر وحتى لو عملتم فحص عادي ما راح يطلع شيء لأني زي ما قلت المرض في احدى الاعضاء الصامته ..
فقد عادل صبره وهو يقول: اختي شفيها ..؟! تحجى وريحنا يا دكتور .. صبري تلف ..
الدكتور: سبحان الله .. هذا قدر ومكتوب .. بنتكم مصابه بمرض خطير .. هي مصابه بتليف الكبد او شمع الكبد .. والدليل الاعراض وهو اصفرار في العين وانيميا حاده وحمى والام بالبطن والاستفراغ وفقدان الشهيه .. لو ييتم بدري جان ما وصلت لهالمرحله ولو تأخرتم شوي جان اصيبت بالسرطان ..
انصدموا امها وعادل من كلامه ..
عادل: انت متأكد من تشخيصك ..؟! مستحيل هذا مستحيل ..
الدكتور: تأكدنا مرتين .. استهدي بالله وتذكر ان هذا قضاء وقدر ..
الام بسرعه: عالجوها .. ايش هو علاجها ..؟! سوا لها اي شيء بس المهم تكون بخير ..
طالع الدكتور فيها لفتره بعدها قال: تليف الكبد هو مرض سريع التطور .. اعذريني يا خاله بس لا يمكن علاجه او الشفاء منه .. واي دواء تاخذه هو بس الحفاظ عالحاله من التدهور السريع ..
انصعقوا من كلامه هذا ..
كيف يعني ماله علاج كيييف ..؟!
اكيد يمزح .. اكيد يستهبل .. مستحيل يكون كلامه صح ..؟!
انهارت الام عالكرسي تبكي وتشاهق على حالة بنتها ..
هز عادل راسه بعدم تصديق وهو يقول: دكتور واللي يسلمك تأكد ..
الدكتور: حاضر .. راح اعمل فحوصات اكثر دقه ..
طالع عادل فيه فتره وبعدها دخل على اخته في الغرفه ..
شافها جالسه عالسرير الابيض وحاضنه مخدتها وتبكي ..
تقدم من عندها وقال: دانا .. مو معقول ..؟!
دانا والدموع بعيونها: اسفه ..
حط عادل راسه بين إيده وهو يقول بألم: ليش .. ليش ما تكلمتي من اول يا دانا ليش ..؟! ليه ضليتي ساكته عن هاللي فيج ..؟!
هزت دانا كتفها وقالت: ما كنت اضن انه خطير جذي .. توقعت انه فشل كلوي ..
عادل بإنفعال: حتى لو كان فشل كلوي المفروض تتحجين ..
دفنت دانا وجهها في إيدها وهي تقول بهمس: مابي لأنك لو عرفت راح تتبرع بكليتك لي وعشان جذي ضليت ساكته .. ابيك تكون بخير وتتعالج وتتزوج رهف وتعيش بخير .. مابي اخرب مستقبلك ..
هز عادل راسه بلا من تفكير اخته ..
فتح فمه وقال بهمس: اللي سويته غلط .. مرره غلط ..

================================================== ==================