شبكة همس الشوق - عرض مشاركة واحدة

15 - 3 - 2014, 11:00 AM

خلونا نتركها شوي ونرجع ٢٠ ساعه لورى ..
يعني امس الساعه تسعه الليل ببيت سلطان الراهي ..
من بعد ما طلع سامي من البيت ..
خرج ابو سامي وابو مايد من المجلس ..
ابو سامي: خلاص بجذي احنا متفقين ..
ابو مايد: فعلا .. واللحين استأذن .. مع السلامه ..
ابو سامي: مع السلامه ..
اتجهوا للصاله وهناك قابلوا بوجهم سيلينا وباتريك ..
استغرب ابو مايد بس طنش وطلع من القصر ..
اما ابو سامي فظهرت على وجهه علامات الصدمه لثواني بعدها تحولت لبرود ..
كلامهم بالانجلش طبعا بس بأكتبه بالعربي اسهل لكم ..
ابو سامي: اووه باتريك هنا .. مرحبا ..
طالع باتريك فيه وقال: سلطان ..!! لم ارك منذ فتره طويله .. كيف حالك ..؟!
ابو سامي: انني بخير ..
لف وطالع في سيلينيا بوجه جامد ..
رفعت عيونها وطالعت فيه وقالت بحده: لم آتي إليك مطلقا .. انا هنا من اجل ابني وحسب ..
ابو سامي ببرود: اعذريني سيلينيا لكن وجودك غير مرحب به ..
باتريك: سلطان دعني اشرح لك ..
ابو سامي: لا احتاج للشرح .. المحادثه بيني وبين هذه الخرقاء فلا تتدخل ..
سيلينيا بعصبيه: لا تنعتني بالخرقاء يا ايها الوغد ..
ابو سامي بإبتسامه: انه يناسب امرءاة بلهاء مثلك .. هل تريدين ان اذكرك لماذا ..؟!
عضت على شفتها بعصبيه بعدها قالت: لست هنا لكي اتجادل معك .. اريد ابني .. اريده ان يعود للعيش معي ..
ابو سامي: لن ادعه يعود للجحيم مرة اخرى ..
سيلينيا: اصمـــــــت .. انا امه ولو ألتجأنا للقانون لكان بصفي انا .. وانت تعلم ما السبب ..
ابو سامي ببرود: نعم اعلم .. واعلم ايضا انك لن تفعلي هذا ..
سيلينيا بقهر: سحقا لك يا ايها المتسلط ..
ابو سامي: والآن هلا خرجتي لأن وجودك يؤثر على سامي كثيرا .. وقد يضن ان مجيئك له علاقه بذلك الشخص ..
انصدمت سيلينيا بعدها نزلت نظرها لتحت والعبره خانقتها ..
بعد فتره رفعت نظرها والدموع بعيونها وقالت بصوت مرتجف: لقـ ـد استيــقـ ـظ ..
انصعق ابو سامي من كلامها وقال: ماذا تقصدين بهذا ..؟! كيف له ان يستيقظ .. مرضه يعني الموت .. لا تكذبي علي يا بلهاء ..
باتريك: انها لا تكذب ..
لف ابو سامي وطالع فيه بصدمه ..
هذا يعني ان هالكلام صح ..
مستحيل ..!
مسسستحيل ..!!
حس بالحقد يجري بدمه ..
لف على سيلينيا وقال: اخرجي خارجا فأنا لا اريد رؤية هذا الوجه ..
مسحت سيلينيا دموعها وقالت بقهر: لن اخرج حتى آخذ ولدي معي .. اريد تصحيح جميع اخطائي .. هذا ابني انا .. ان كنت لا تعرف شيئا عن احساس الام فلا تتكلم ..
ضاقت عيونه وقال بهدوء: احساس الام ..؟!! اتمزحين معي ..؟! هل انتي جاده بتسمية نفسك بالام ..؟! تبا لك ولكل من هم على شاكلتك ..
سيلينيا: لا تستثني نفسك يا سلطان .. انت ايضا مذنب ..
ابو سامي: انا لا استثني نفسي .. ولكن هناك فرق شاسع بيني وبينك .. انضري لما فعلته بإبنك وانضري ماذا فعلت انا .. والآن اخرجي خارجا وهذه هي المره الاخيره التي اقول فيها هذا الكلام ..
طالعت الام فيه لفتره طويله بعدها قالت: انك قاسي كما في الماضي .. لم تتغير ابدا ..
لفت واتجهت للباب وهي تقول: ولكن تذكر .. سامي ابني وسيعيش معي ..
خرجت وخرج وراها باتريك ..
لف ابو سامي وجهه وراح لفوق ولغرفته بالتحديد ..

.................................................. ......................

نرجع اللحين لأسيل ..
كانت الساعه قد جات سته وبدأوا يرتبوا البضائع والملابس اللي بالمحل ..
تعبوا كثير لحد ما جات الساعه سبع وهذا موعد اغلاق المحل ..
خلصت اسيل اول وحده وخرجت برى المحل ..
ظلت تمشي وهي تفكر ..
قلبها عورها بقوه ..
حياتها بتصير عذاب اذا دخلت السجن ..
.........: اسيل ..
لفت ورى واندهشت لما شافت صاري ..
لفت وجهها للجهه الثانيه وقالت: نعم ..
طالع صاري فيها فتره بعدها قال: عرفت انج حتدشي السجن اذا ما دفعتي ٧٥٠ ألف ..
تجاهلته اسيل وكملت طريقها وهي تقول: اها .. اوكي ..
تنهد ومشي معها وهو يقول: ليش ما قلتي لي قبل ..؟!
اسيل: وليش اقولك ..؟! انا لا اعرفك ولا تعرفني .. لا تقط الميانه بزياده ..
صاري: قدرت اجمع ١٢٠ ألف بس .. اعذريني بس احنا مو اغنياء .. تبيني ادفعها لج ..؟!
لفت عليه اسيل وقالت بعصبيه: انت شتبي بالضبط ..؟! اصرف الفلوس على اهلك ابرك لك .. من متى المعرفه عشان تشفق علي ..؟!
طالع فيها وهو بنفس هدوئه وقال: كلمت ناس اعرفهم وان شاء نقدر نجمع المبلغ كله ونطلعج من السجن .. اعذريني اذا تأخرت عليج شهرين او ثلاث .. جمع هالمبلغ مو سهل ..
اختنق صوتها وتجمعت دموعها بعيونها وهي تقول: لا تتدخل .. لا تتدخل ..
ابتسم لها وبعدها لف وراح ..
مسحت دموعها اللي تنزل بكفها وهي حاسه بالألم ..
ما تبغى احد يدخل بديون ومشاكل عشانها ..
ما تبغــــــى ..
ضلت تمشي وتمشي بدون لا تحدد وجهتها ..
يمكن تكون هذه آخر مره تمشي فيها ..
وبجنبها كان شارع وفيه اكثر من سياره واقفه ..
وحده من ذي السيارات كان فيها واحد منسدح على مقعدته وحاط إيده على عيونه وغارق في تفكيره ..
من الفجر ما حط شيء بفمه وحاس بجوع ..
ماكان له نفس ياكل بس اضطر انه ينزل اللحين ويروح للمطعم ..
فتح باب سيارته فصقع هالباب بأسيل ..
آلمها كتفها ولفت عالولد تطالع فيه بس انصدمت لما شافته ..
فتح الولد فمه بيعتذر بس سكت فجأه من تفاجؤه ..
طالع فيها من فوق لين تحت بعدها قال: اسيل ..؟!!
لفت بسرعه اسيل راسها وراحت بس الولد مسك إيدها وقال: لحضه اسيل ..
سحبت ايدها بقوه وقالت بعصبيه: ابعد إيدك .. اكرهـــــــــك ..
ولفت مره ثانيه بتروح بس هو جاء قدامها وقال: اسيل انتظري ابي اقولج كلام ..
دفته بقوه وهي كاتمه عبرتها وتقول: ابعد عني .. مابي اسمع شي .. ولا شيء .. ابعد عني .. مابي اشوف ويهك ابدا ..
مسكها من اكتافها بقوه وقال بحده: ما راح ابعد .. انا شنو ساويت لج عشان تكرهيني ..؟! اسيل انا حآخذج معي .. لازم ترتاحي من اللي انتي فيه .. انا سامي .. اصير ولد عمك ....
صرخت اسيل: جـــــــــب جــــــب مابي اسمع شيء .. اكرهكـــــــــم كلكم .. كل العائله اكرههـــــا ..
استجمعت قوتها ودفته بقوه وراحت تجري وهي تبكي ..
هز راسه بلا ..
مستحيل يخليها تروح ..
صحيح هو مو عارف وين يحطها بس مستحيل يتركها ..
حرك رجله بيلحقها بس واحد وراه مسك إيده وكأنه يمنعه ..
لف سامي على ورى وطالع في هالشخص ..
عقد حواجبه وهو يطالع فيه ..
فتح هالشخص فمه وقال كلمتين خلت سامي ينصعق من شدة الصدمه ..
مو قادر يصدق ..
ابدا ..

اما عن اسيل فكانت تجري وتجري وهي تمسح دموعها اللي كل شوي تزيد ..
لما شافت سامي حست بكره فضيع تجاه هالعائله ..
تكرههم فرد فرد ..
امها وابوها وعمها وخالها وحتى ولد عمها ..
ما تبي احد منهم ..
حتى اخوها ما تبغاه ..
هي ما قدرت تكرهه فعشان كذا ما تبغى تشوفه ..
وقفت من الجري بعد ما قطعت امتار كثيره ..
استندت على احد البيوت وبدأت تاخذ نفسها ..
دق جوالها فطلعت وشافت ان المتصل هي مرام ..
رئيستها بالشغل ..
غمضت عيونها لفتره بعدها ردت عالاتصال ..
بعد ساعه تقريبا كانت اسيل واقفه قدام مكتب الشرطي العام ..
وعلى الكرسي اللي جنبها كانت مرام جالسه وحاطه رجل على رجل ..
شبك الشرطي اصابعه ببعض واسندها عالمكتب وقال: ها يا اسيل .. دبرتي المبلغ ولا لا ..؟!
هزت اسيل راسها بهدوء ..
الشرطي: طيب وين الاوراق ..؟!
اسيل: ماهي معي ..
الشرطي: عيل شنو الحل بنظرج ..؟! اعطيناج فرصة اسبوع تدبري المبلغ او تطلعي الاوراق بس ما ساويتي ولا شيء ..
اسيل: ...............................
مرام: يعني شلون ..؟! يا بنت طلعي الاوراق وريحيني حرام عليج ..
اسيل بهدوء: قلت لكم ما سرقتها بس مو راضين تصدقوني ..
الشرطي: جم عندج ..؟!
اسيل: حول ثلاث آلاف ..
مرام بعصبيه: هذي شنو بتسوي بالضبط ..؟! حطي نفسج بمجاني وطلعي الاوراق ..
الشرطي: اسيل ابي اسمع آخر رد لج .. بتدفعين او تطلعين الاوراق او تنسجنين ..؟!
اسيل بهدوء: انسجن ..
تنهد الشرطي وقال لمرام: اعذريني بس شكلج ما راح تلقي تعويض ..
طالعت مرام بأسيل وهي حاسه بقهر وحقد اتجاهها ..
هذا مبلغ كبير ..
حيأثر هالشيء بميزانيتها ..
خرجت من المكتب وهي حددها مهمومه ..
ندمت انها شغلت اسيل عندها ..
طالع الشرطي بأسيل وقال: انتي عارفه انج بتنسجني فتره طويله لين تسددي ..؟!
اسيل: ايه عارفه ..
الشرطي: عيل ليه تجذبين ..؟! هذا مب صالحج ..
رفعت اسيل عيونها وطالعت فيه فتره بعدها قالت: الجذاب تصدقونه والصادق تجذبونه .. معقوله العداله وصلت لهدرجه ..!!!
طالع فيها وقال: ممكن توضحين ..؟!
ابتسمت اسيل وقالت: ايه انا سرقت الاوراق .. بس ماراح اعطيكم هيه ..
الشرطي بدهشه: عيل ليه كنتي تجذبين ..؟!
اسيل: شفت ..؟! انا قلت ان الصادق تجذبونه والجذاب تصدقونه ..
لفت نظرها للجهه الثانيه وقالت: ودني السجن وريحني ..
طالع الشرطي فيها فتره طويله بعدها قال: كنت احاول اجذب كل هذا لأن شكلج يقول انج بريئه بس للاسف طلع صح .. السرقه ماهي تهمتج الوحيده ..
طالعت فيه وقالت: شنو تقصد ..؟!
الشرطي: عندنا لج تهمه ثانيه واشد من الاولى ..
طالعت اسيل بصدمه وهي حاسه انها بتبكي ..
وش بعد ..؟!
يكفي تهمه وحده ..
منو متهمها زور كمان ..؟!
ميـــــــــن ..؟!
طالع الشرطي فيها لفتره بعدها قال: تزوير وانتحال شخصيه يا آنسه ..
اندهشت منه ولفت وجهها بسرعه عنه ..
الشرطي: منو انتي وليش تزوري جذي ..؟! ايش هو اصلج بالضبط ..؟!
اسيل: ...................................
الشرطي: ليه ما تياوبي ..؟! انتحال شخصيه هذا مو سهل .. لازم نعرف اهدافج من ورى هذا ..
طالع فيها ينتظر اجابتها بس كانت ساكته تماما وما نطقت بأي حرف ..
انتظرها اكثر من ثلاث دقايق بس من دون فايده ..
الشرطي: يعني مالج نيه تتحجي ..؟!
اسيل: .............................. ..
تنهد الشرطي وقال: اسيل ترى مصيرج تتحجي .. اذا ما تحجيتي اليوم بتتحجي باجر فاهمه ..
اسيل: ...............................
دق الشرطي زر عنده فدخل واحد وقاله الشرطي: دخل هالمتهمه للحجز ..
الضابط: حاضر ..
لفت اسيل وراحت معاه بهدوء ..

لهنا انتهى البارت الخامس عشر الجزء الثالث ..
وش بيصير مع اسيل ..؟!
وايش هي حكاية سيلينيا ..؟!
ومين هالشخص اللي وقف سامي ..؟!
كلها اشياء بنعرفها بالبارت الجاي او اللي بعده ..

انتظروني كالعاده يوم الخميس ببارت جديد واحداث جديده ..
واللي يقول البارت قصير راح يكون ضحية غضبي ههههه ..
لاني فعلا طولت البارت كثييير ..

اختكم / صروخہ ..

|$[ نهاية البارت ]$|