شبكة همس الشوق - عرض مشاركة واحدة

15 - 3 - 2014, 11:15 AM

في صباح يوم الجمعه ..
وفي مخفر الشرطه عند اسيل ..
كان الشرطي جالس في مكتبه ويقلب الاوراق بين إيده لفتره وهو يفكر ..
بعدها دق الزر اللي جنبه فدخل ضابط وقال: امرك ..
الشرطي: روح ناد لي المحتجزه اسيل الرملي ..
الضابط: حاضر ..
خرج وبعد دقايق دخل وقال: لقد احضرتها ..
الشرطي: دخلها ..
دخلت اسيل وخرج الضابط وقفل الباب وراه ..
الشرطي: ايلسي ..
تقدمت اسيل وجلست على الكرسي الاسود ..
الشرطي: عندي موضوعين .. اولهم شيء يخصج ..
قلب بين الاوراق وقال: بطاقتج الاحوال تصادرت ولازم نطلع لج بطاقه اخرى حقيقيه .. اللحين كل شيء جاهز بس بغيت اسألج شنو الاسم اللي تبينه ..؟! نفسه اسيل ولا تبغي تغيري ..
رفعت اسيل راسها تطالع فيه ..
اللحين راح تطلع لها بطاقه جديده وهويه جديده ..
راح يتغير كل شيء ..
اذن لازم تغير اسمها كمان عشان محد يعرفها ..
فتحت فمها عشان تقول انها بتغيره بس وقفت ..
تذكرت ابوها عبد الرحمن ..
هالانسان اللي انتشلها من الشارع ورباها وعاملها احسن معامله ..
صحيح تألمت لأنه ما خبرها الحقيقه بس يكفي انه عيشها احسن من العيشه اللي كانت بتعيشها ..
اسيل .. هالاسم اللي كان يناديها فيه ..
اسول .. كذا كان يدلعها ويمزح معها ..
طالعت في عيون الشرطي لفتره بعدها هزت راسها وقالت: لا تغيره ..
الشرطي: اوكي .. يعني خلال ساعه راح تييج بطاقتج وكمان كان لج مبلغ بالبنك بأسم اسيل الرملي راح نحطه ببنك آخر تحت اسمج اليديد .. هو تقريبا حول خمس آلآف وجم ميه ..
هزت اسيل راسها بهدوء وما ردت عليه ..
طالع الشرطي فيها لفتره طويله بعدها قال: الموضوع الثاني اللي ابييج فيه هو بخصوص سرقة الاوراق .. السرقه ثابته فيج وراح تنسجني لين تدفعي المبلغ لأن هذا حق خاص ..
طالع فيها شوي بعدين قال: بس خلاص احنا افرجنا عنج ..
انصدمـــــــــت اسيل وطالعت فيه ..
الشرطي: امس بالليل ياء واحد ودفعها عنج .. دفع الـ٧٥٠ ألف عنج ..
طالعت فيه لفتره تستوعب كلامه ..
ميين هذا اللي دفع عنها ..؟!
لا يمكن يكون صاري لأنه قال لها انه بيطول على ما يجمع هالفلوس ..!!
وما تعرف احد عشان يدفع عندها هالمبلغ الكبير ..
ومستحيل يكون فاعل خير لأنه توها انسجنت وما يمدي احد يعرف ..
اصلا مستحيل فاعل خير يدفع مبلغ كبير مره وحده ..
يمكن يدفع شوي بس لا يمكن يكون كله ..
اسيل: منو ..؟! منو اللي دفع ..؟!
الشرطي: مدري منو لأنه ما وصلتني الاوراق اللي تخص القضيه .. وغير جذي طلب انه يشوفج بس رفضوا لأنج تحت التحقيق بقضيتين ..
اسيل بسرعه: لا .. لا تييبوا احد عندي .. مابي اشوف احد ..
الشرطي بإستغراب: انتي حره ..
تنهد وقال: خلال ساعه راح تستلمي بطاقتج واوراق خاصه عشان يعملوا لج تحاليل ويفتحوا ملف بأسمج فيه كل شيء عنج .. وراح تحط الحكومه لج مبلغ بالبنك عشان تعيشي حياتج ..
اسيل: طيب متى اطلع ..؟!
الشرطي: بعد ساعه بتروحي معهم للمستشفى عشان الكشوفات وبعدها ارجعي لبيتج ..
سكتت اسيل فتره تفكر ..
قرار تبي تآخذه بس متردده ..
متردده كثيير ..
اخذت نفس بعدها قررت انها تسويه ..
لازم تعيش حياتها دامها تعدلت اللحين ..
عندها فلوس تكفيها للعيش فليش ما تسوي كذا ..
اسيل: لو سمحت ..
الشرطي: نعم ..
اسيل: ابي منك معروف صغير .. ممكن ..؟!
الشرطي: ايه طبعا ممكن .. تفضلي ..
سكتت شوي بعدها قالت له ايش هو طلبها ..

================================================== ==================

الظهر وفي جناح بسام واخته ..
توها وصلت طلبية الغداء وصارت عالطاوله ..
وبسام جالس عالكنبه وبإيده جواله يكلم الدكتور المشرف على حالة أمه ..
اطمئن كثير لما عرف ان حالتها استقرت وان الزياره صارت مسموحه ..
هذا يعني لازم ياخذ سميه معاه ويروح يزورها ..
بس المشكله هي سميه ..
شلون يقنعها تجي معاه ..؟!
تنهد وراح للغرفه ودق الباب وقال: سميه ..
انتظر شوي بس ما سمع رد ..
دق مره ثانيه وثالثه بس كمان ما سمع رد ..
بسام: سميه حأدخل ..
لما ما سمع رد فتح الباب بهدوء فشافها جالسه عالسرير وبإيدها صوره وسرحانه فيها ودموعها على خدها ..
تقدم عندها وشاف ان الصوره هي صوره قديمه لها هي وزوجها في فترة خطوبتهم ..
تنهد وهو يقول في نفسه: "انا مدري شلون تحبين واحد زي جذي" ..
لاحظ عند رجلها صوره مقطعه لقطع صغيره ..
جلس وبدأ يجمع الصوره ويركبها عشان يعرف صورة مين ..
بعد ما خلص انصدم لما شاف انها صوره لها وهي شايله سجى ببداية ولادتها ..
رفع راسه وطالع في سميه وقال بهدوء: سجى مالها ذنب فليش تحملينها المسؤوليه ..
شهقت سميه وقالت: هي السبب .. هي السبب باللي انا فيه .. ياليتني ما رميتها .. بجذي ماتت بهدوء .. ليتني عذبتها لين ارتاح .. اكرهها .. واكره امي .. واكرهك انت .. واكره سحر .. الجلبه اكرهها وايد ..
طالع بسام في اخته فتره طويله بعدها قال: اكرهيني بالقدر اللي انتي تبينه .. بس بلييز لا تكرهي سجى .. هي شنو ذنبها ..؟! مو كافي انها تتعذب بسببكم انتم الاربعه .. وخاصتا انتي وريلج .. ليه تحملينها ذنب انتم السبب فيه ..؟!
سميه بهمس: جـــــب ..
وقف بسام وجلس عالسرير جنبها وقال: استغفري ربج .. قولي استغفر الله .. كرريها كثير لعل الله يطلعج من اللي انتي فيه .. توبي لربج يا سميه .. انتي ضيعتي بنتج بإيدج .. ذبحتي جارتج بإيدج .. اللي انتي فيه يزاج من رب الخلق .. اذا ريلج تركج فأتركيه انتي بعد .. الحب مو لهدرجه .. هالانسان خسيس وما يستحق ..
سميه بصراخ: قلــــــت جـــــــب ..
تنهد بسام وقال: ماكو فايده .. سميه انا حأحجز اقرب طياره عشان نسافر لأمي ..
سميه بحقد: مابي .. اكككرهها ..
بسام: بس هي تعبانه ويمكن تموت .. سميه خلي بقلبج احساس .. ذي امج .. ذي ينتج .. باجر لما تموت راح تندمين .. راح تندمي على صراخج عليها .. راح تندمي لأنج ما بريتيها ولا عاملتيها زين .. امي امنيتها انها تشوفج فحققي لها امنيتها يا سميه .. انتي بنتها البكر .. تحبج .. والله تحبج وايد ..
لفت وجهها للجهه الثانيه وهي تقول بهمس: مابي .. اكرهها ..
طالع فيها فتره بعدها قام وقال بإبتسامه: انا رايح احجز اللحين تذكرتين لي ولج .. الاكل مويود عالطاوله فروحي كلي قبل لا يبرد .. مع السلامه ..
طلع وقفل الباب وراه ..
بسام: كويس .. حالتها افضل بكثير من قبل .. ابو بندر دكتور ممتاز .. ان شاء الله تتغير للأحسن مو للأسوء ..
طلع جواله من جيبه ونزل على رقم اسيل ..
بسام: ان شاء الله هالمره ترد يا رب ..
اخذ محفضته ومفاتيحه وطلع من الجناح وجواله على اذنه ينتضرها ترد ..
بس للأسف دق لين قفل ومحد رد ..
طالع في الشاشه شوي بعدها دخل عالرسائل واحتار وش يكتب لها ..
استند على باب جناحه وهو عاقد حواجبه بتفكير ..
يبغى يكتب رساله تخليها تتصل عليه ..
اخذ نفس بعدها كتب //
(( اسسسول حبيبتي ردي ..
في شيء وايد مهم ابي احاجيج فيه ..
لا تطنشي اتصالاتي ..
بليييز لا تتطنشيها .. ))

وضغط عالارسال ..
طالع في الرساله مره ثانيه ..
حاس انها ما راح تتصل ..
بسام: ايش المخ هذا ..؟! لو اني كاتب على اساس اني وحده من رفيجاتها جان يمكن ردت ..
تنهد وقال: قدر الله وما شاء فعل .. ان شاء الله ترد علي ..
حط الجوال بجيبه بعدها طالع في جناح مصعب ..
بسام: غريبه .. ليش ما طلع وتلقف كعادته ..
هز كتفه بعدها نزل من المصعد ..
لما وصل للدور الارضي مر من عند المطعم وشاف هناك غداء عمل بين شركتين ..
ما اهتم لهم بس عينه طاحت على شخص فيهم ..
بنت في العشرينات من عمرها ..
انصدم لما شافها ..
وفي نفس اللحضه هي شافته ..
لف عيونه عنها وواضح ان الحقد يملأ قلبه من نظراته ..
خرج واتجه للمطار ..
تنهدت هالبنت بألم وقالت في نفسها: "ما ألومك يا بسام .. ولو انا بمجانك جان ساويت جذي كمان" ..
طالعت فيها مساعدتها وقالت: استاذه رؤى فيج شيء ..؟!
هزت رؤى راسها وقالت: خلينا نكمل شغلنا ..

================================================== ==================

بالليل وفي بيت دنو ..
كانت جالسه بغرفتها ودافنه وجهها بمخدتها تبكي بألم ..
كييف ماتبكي وهي عارفه ان فيها مرض ماله علاج ..؟!
كييف ماتبكي وهي عارفه ان الادويه اللي تاخذها هي بس للحد من تطوره ..؟!
طول الوقت تمثل قدام اهلها وقدام اصحابها انها طبيعيه بس اذا جلست لوحدها تطلع كل اللي كانت حابسته طول اليوم ..
حاسه بشيء مخنوق بصدرها ..
تبغى تشوف اخوها وهو يمشي على رجوله ..
تبغى تشوف صاحبتها رهف بثوب عرسها على اخوها عادل ..
تبغى تشوف راشد وهو ندمان على اللي سواه باخوها ..
امنياتها كثيييير بس خايفه ..
تخاف تموت قبل لا يتحقق شيء منها ..
خايفــــــه ..
خايفــــه كثيييير ..
رفعت راسها لفوق وقالت بصوت مخنوق: يا رب ..
قامت من سريرها وراحت للحمام وغسلت وجهها بالمويه ..
اخذت نفس عميق بعدها راحت للمطبخ ..
من فتره وهي حاسه ان مالها شهيه ابدا للاكل وهذا اثر كثيير على صحتها لان فيها انيميا ..
دخلت وفتحت الثلاجه تدور لها اي شيء تاكله ..
لقيت اشياء كثيره ممكن انها تنأكل بس للاسف مالها نفس ..
نفسيتها مسدوده تماما ..
تذكرت كلام الدكتور ..
لازم تبعد عن المشروبات الغازيه او الاكلات اللي فيها نسبه من الكحول ..
وتذكرت انه اوصاها بتناول المشروبات الحمراء والاطعمه الحمراء لانها تساعدها في التخلص من الانيميا ..
بس مالها نفس ..
قفلت الباب ورجعت لغرفتها ..
جلست عالسرير بس استغربت من شيء ..
على الكومدينه الصغيره اللي جنب السرير كان فوقها ضرف ..
قبل شوي كانت فاضيه فمن فين جاء هالضرف ..
مين دخل غرفتها في هالمده القصيره ..
باب البيت مقفل والشباك ......
لفت ناحية الشباك تطالع فيه فشافت انه مغلق بس مو بالقفل ..
رجعت نظرها للضرف تطالع فيه بحذر ..
مدت ايدها بتردد واخذته ..
قلبها قارصها ويقول ان اللي في الضرف شيء سيء ..
سيء جدا ..
فتحته وطلعت الورقه اللي فيه وفتحتها ..
قرت الكلمات الموجوده فيها بـ صـــــددمـــهه ..
مو قادره تستوعب ..
كيييف ..؟!
كيييــــــــــف ..؟؟؟!!

لهنا نوصل لنهاية البارت الخامس عشر ..

انتظروني الخميس الجاي ببارت احلى واحداث اجمل ..

قراءه ممتعه ..

|$[ نهاية البارت |$]