شبكة همس الشوق - عرض مشاركة واحدة

15 - 3 - 2014, 11:04 PM

|$[ البارت السادس عشر الجزء الثاني ]$|

لف فأنصصدم من مهند اللي كان واقف ومستند على سيارة انس ..
طارق: مهند ..!!
مهند: ودعت رفيجك عدل ولا لا ..؟!
ضاقت عيون طارق وهو يطالع فيه ..
ابتسم مهند وقال: لأن هذه هي آخر مره تشوفه فيها يالقاتل ..
طارق: انت مينون ..
مهند: وايـــــد .. والسبب انت ..
هز طارق راسه بأسف وهو يقول: انت شكلك ناسي ان جدامك طارق مو واحد ثاني ..
دخل مهند إيده بجيبه وقال: بطل غطرسه يا الاستاذ طارق ..
طالع طارق حواليه في المواقف وما شاف إي احد ..
طبيعي مافي احد لأن الوقت متأخر والكل قد جاء من أول ..
بعدها لف نظره وطالع في مهند ..
طارق: لو ياء احد راح تكون نهايتك السجن يالغبي ..
هز مهند كتفه وقال بلا مبالاه: عادي .. اهم شيء اني اكون مرتاح نفسيا ..
طارق بإستهزاء: القتل يسبب لك راحه نفسيه ..!! صج مينون .. ما فكرت بأهلك شلون يعيشوا من بعدك ..؟! ما فكرت شلون تقابل ربك يوم القيامه ..؟!
مهند بعصبيه: جــــــب .. ما باجي غير المجرمين يعطون حكم ونصائح .. لو كنت صج خايف على اهلي فليش قتلت ابوي لييش ..؟؟!!
طارق: قلت لك ما قتلته .. طاشت الرصاصه ومات .. انت ما تؤمن بالقدر ..؟؟!!
طلع مهند مسدسه وصوبه على طارق وهو يقول بعصبيه: ايييه تحجج بالقدر عشان تبرأ نفسك .. بس والله ما ارحمك يالقاتل ..
طارق بصدمه: مهند استغفر ربك وشيل اللي بإيدك قبل لا تتهور .. والله العظيم انك راح تندم كثييير ..
مهند: جــــــب .. لا تتفلسف اذا كنت مو ميرب اللي انا فيه .. انت مو ميرب .....
قاطعه طارق: إلا ..
طالعه مهند بدهشه ..
طارق: ابوي ما مات بطريجه عاديه .. ابوي مات في حادث والخطأ كله على السياره الثانيه .. ما حقدت عليه ولا حملته المسؤوليه .. بالعكس قلت لنفسي انه ما كان قصده او انه انشغل شوي .. سوء الضن ما يسبب غير المشاكل .. اترك عنك سوء الضن لأنه ما يسبب غير العداوه ..
مهند بحقد: آها .. يعني انت ضنيت ان ابوي هو اللي صدم ابوك وعشان جذي ذبحته ..
انصدم طارق من تفسيره للأمور ..
طارق بعصبيه: انا قلت لك لا تسيء الضن .. انت شفييك بالضبط ..؟!
مهند: جــــــب ..
وضغط عالزناد واطلق الرصاصه ..
فتح طارق عيونه بصدمه وبسرعه ابعد عن طريق الرصاصه ..
بس للأسف مالحق واصابته الرصاصه في كتفه الأيسر ..
تأألم طارق وعض على شفته بقووه لحد ما انجرحت ..
مهند بقهر: الحقير ..
واشر عليه مره ثانيه بس طارق سبقه وضرب إيد مهند برجله فطاح المسدس على الارض ..
عصب مهند وانحنى عشان ياخذ المسدس بس انصدم لما شاف المسدس بإيد طارق ..
مسك طارق كتفه الأيسر بألم وهو يرفع إيده اليسرى ويصوب المسدس على مهند ..
طارق بضعف: مهند اصحى على نفسك ..... ابوك لو كان حي .. صدقني ما راح يرضى ..... شيل فكرة الانتقام من راسك .. شيلها ..... كل اللي يعيشوا حياتهم من اجل الانتقام .. نهايتهم .. كانت سيئه ..... فكر في امك .. اختك ..... هم يحتاجوك .. وايد ..
ضاقت عيون مهند وقال بحقد: لا تحاول .. مستحييل اخليك حي بعد ما هدمت حياتنا .. امي صحتها صارت دمار .. اختي ما عاشت طفولتها مثل الناس .. انا تأخرت عن دراستي وانسجنت بسببك .. حطمت حياتنا ولازم احطمك كمان ..
تقدم من طارق وعيونها كلها نظرات الانتقام وبس ..
عض طارق على شفته وهو يحس بطعم الدم في فمه ..
عارف ان مهند يتقدم لأنه واثق انه ما راح يطلق عليه ..
شال إيده اليمين من على كتفه اللي مليانه دم ومسك المسدس ..
وعلى طووول رماه بعييييد عنهم ..
انصدم مهند وهو يشوف المسدس يطير للجهه الثانيه ..
مهند بعصبيه: غغبــــــي ..
وراح ناحية المسدس ..
فتح طارق باب سيارته وركبها ..
ماله حل غير انه يبعد عن هالمجنون قبل لا يقتله صدق ..
شغل سيارته وبدأ يخرجها من مكانها ..
اخذ مهند المسدس اللي كله دم من إيد طارق ..
لف وشاف سيارة طارق خارجه ..
مهند: ويين حتروح من إيدي ..
صوب المسدس على عجلات السياره واطلق ثلاث رصاصات ..
وكلها اصابت الهدف تماما ..
ضغط طارق عالبنزين بقووه وهو يحاول يسيطر عالسياره بإيد وحده بس لحد ما وقفها ..
اخذ نفس عميق وقال بهمس: ماكو فايده ..
ابتسم مهند وهو يقول: ماكو فايده .. ما تقدر تهرب مني ..
تقدم خطوه وحده بعدها سمع صوت سياره داخله فلف يطالع فيها وعرف على طوول انها سيارة الدكتور اللي يدرسه ..
عض على شفته بقهر وحط المسدس بجيبه ..
مرت سيارة الدكتور من جنب مهند ووقفت شوي ..
الدكتور: مهند .. شفيك واقف هني ..؟! بسرعه عالكلاس انا اللحيين يايكم ..
مهند بهدوء: طيب ..
لف وطالع في سيارة طارق بعدها اتجه لبوابة الجامعه ..
طالع الدكتور في سيارة طارق اللي كانت موقفه في طريق خروج السيارات ..
الدكتور: شفيها هالسياره ..؟!
وقف سيارته بعدها نزل واتجه لسيارة طارق ..
طالع طارق في المرايه وشاف الدكتور جاي عنده ..
طارق في نفسه: "مو وقته ابد" ..
لف حواليه فشاف جاكيته بالمقعده اللي ورى ..
بالقوه قدر ياخذه وحطه على اكتافه بطريقه عشوائيه عشان يخفي الدم اللي يسيل من كتفه الايسر ..
وصل الدكتور ودق الشباك ففتح طارق الباب وقال بإبتسامه وهو يحاول يعدل صوته: هلا ..
الدكتور: شفيك واقف هني ..؟! وقفتك مرره غلط ..
طارق: ايه عارف .. شوي واحرك السياره ..
استغرب الدكتور من صوته وقال: فيه شيء يؤلمك .. صوتك مره تعبان ..؟!
طارق بسرعه: لا لا .. بس احس بمغص بسيط .. شوي ويخف ..
الدكتور: اها .. طيب بسرعه وروح لكلاسك .. تأخرت وايد ..
طارق: طيب ..
لف الدكتور وراح للجامعه ..
اخذ طارق نفس عميييق وقفل باب السياره ..
حس بألم فضيع في كتفه ..
مسك جواله وضغط عالازرار ودق على انس ..

حس انس بجواله يهز .. خرجه من الشنطه واستغرب ان طارق المتصل ..
انس في نفسه: "لا يكون اتصل يقول انه انشغل وما بيحضر المحاضره ..؟!" ..
طالع في الدكتور فشافه لاف وجهه عالسبوره ويكتب عليها ..
حط الجوال على اذنه وقال: الو .. وينك ما ييت ..؟!
جاه صوت طارق يقول بضعف: انس تعال بسرعه لمواقف السيارات .. بسرعه ..
انصدم انس من صوته وقال بسرعه: طارق شفيك ..؟!
طوط طوط طوط ..
طالع في جواله فقال فهد: هذا طارق ..؟!
انس: ايه ..
فهد: وينه ..؟!
انس: مدري ..
رفع راسه وقال للدكتور: لو سمحت ..
لف الدكتور عليه وقال: نعم ..
انس: ممكن اطلع دقايق ..؟!
الدكتور: ليش ..؟!
توهق انس وقال: أ آ شيء خاص ..
الدكتور: لا .. اذا خلصت المحاضره اطلع ..
انس في نفسه: "ملييق .. راكان افضل منه" ..
قام من فوق كرسيه وطلع والدكتور يطالع فيه بصدمه ..
غيدا: هههههههه جريء ..
الدكتور في نفسه: "يستهبل هذا ولا شنو" ..
اتجه انس لبوابة الجامعه وهو يقول: دكتور غبي .. رفيجي في مشكله وهو يقول لا .. اعذرني بس رفيجي اهم من محاضرتك الممله ..
طلع برى البوابه واتجه للمواقف ..
استغرب من وقفة سيارة طارق وراح لها ..
فتح الباب وركب وهو يقول: طارق شسالفتك بالضبط ..؟! ا....
وقف كلامه لما شاف وجه طارق التعبان ..
انس بخوف: طارق شفيك ..؟!
طارق بضعف: انس ... غير كفرة سيارتي .... بسرعه ..
انس: ها ..؟!
نزل من السياره ولف حواليها واستغرب لما شاف كفرة السياره منفوشه ..
رجع عند طارق وقال: شفيها جذي ..؟! انت قبل يومين غيــ....
قطع كلامه فجأه لما شاف آثار الدم من تحت الجاكيت ..
سحب الجاكيت عن طارق وانصصددم ..
طارق: انس بسرعه .... غير الكفر انا ما اقدر ..
انس بعصبيه: شنو هذا يا طارق ..؟! منو ساوى فيك جذي ..؟! تحجى وياوبني ..
عقد طارق حواجبه وهو يقول: انس بلييز غير الكفر .. ابي اروح البيت بسرعه ..
انس: اول شيء ابي اعرف انت ليه جذي ..؟! من مهند صح ..؟! صح يا طارق ..؟!
سكت طارق وما رد عليه لأنه مو قادر يناقش احد ..
عض انس على شفته بقهر وقال: اجلس عالمقعد الثاني ..
نزل وطلع الكفره من شنطة السياره وطلع الادوات وبدأ يغيرها ..
انس في نفسه: "يبي يروح البيت ها ..؟! انسان غبي .. المفروض يروح للشرطه ويشتكي على مهندوه ويرتاح منه .. مدري شلون يفكر ..؟! حياته اهم من انه يفكر في حياة ذيج الطفله رزان وامها" ..
بعد ما خلص رجع كل شيء مكانه بعدها ركب محل السايق لأن طارق انتقل للمقعده الثانيه ..
شغل السياره وطلع برى محيط الجامعه ..
انس: ما راح اروح عالشقه ..
طالع طارق فيه بعدها قال بهدوء: روح للشقه ..
انس: لا .. حأروح للمخفر عشان تشتكي .. مادام الامور وصلت لهالحد لا تسكت ..
طارق بهدوء: انس .... روح للشقه وبس ..
انس: لا ..
طارق بعصبيه: انــــــــــــس ..!
مسك كتفه على طول لأنه حس بألم فضيييع ..
طالع انس فيه بعدها قال: معاك حق .. غلط نروح للمخفر .. لازم المستشفى اول ..
عصب طارق منه فقال بصوت منخفض: انس بليييز خلنا نروح للشقه ..
انس: لا ..
طارق: انس خلاص اوعدك اني اروح المخفر بس وصلني اللحين للشقه ..
طالع انس فيه وقال: صج ..؟!
طارق: ايييه ..
انس: طيب عالاقل نروح للمستشفى و.....
قاطعه طارق يقول: انس ..
تنهد انس وقال: اوكي ..
لف بالسياره واتجه للشقه ..
بعد ربع ساعه كانوا بالشقه ..
انس واقف وطارق جالس عالكنبه وينزل التيشيرت حقه بالصعوبه ..
طالع انس في جرح طارق وقال: طارق .. خلنا نروح المستشفى افضل .. خلهم يتصرفوا بجرحك عشان لا يتلوث او يتورم ..
نزل التيشيرت وطالع في جرحه وقال: لا .. حيشوفوا الرصاصه وحيفتحوا تحقيق ..
انس بصدمه: الرصاصه بكتفك ..؟!!!
طارق: لا .. ببطني ..
انس بعصبيه: طاااارق ..
سحب طارق مناديل ومسح الدم بعدها قال: الجرح صغير .. مدري شلون راح اقدر اطلع الرصاصه ..
غمض عيونه وهو عااض على شفته المجروحه وبدأ يحاول يطلعها ..
وانس فاتح عيونه بصصدمه ..
لف وجهه على طول .. ما يتحمل يشوف شيء زي كذا ..
دخل غرفته وهو يقول: بأييب جنطة الاسعافات الاوليه ..
بحث عنها بالغرفه لحد ما حصلها ..
خرج فشاف طارق جالس بإسترخاء ونفسه سريع ..
وقدامه عالطاوله آثار دم تحت الرصاصه اللي خرجها ..
جلس انس جنبه وفتح الشنطه وبدأ يضمد له وهو يقول: لا تنسى انك وعدتني انك تروح المخفر .. لازم تحط حد لتصرفات مهند .. اذا سكت بتكون نهايتك انك تموت وهو يصير قاتل وينسجن .. اهله راح تتشرد واهلك راح يتألموا عشانك .. لو بلغت افضل .. لأنه بس راح ينسجن وانت تقدر تهتم لأهله .. كلامي صح ولا غلط ..؟!
طالع طارق في انس ..
كلامه مقنع ..
مقنع كثيييير ..
بــــــس ..................

================================================== ==================

في نفس هذا الوقت وفي جامعه ثانيه ..
نفس الجامعه اللي انتقلت لها اسيل ..
كانت واقفه عند البوابه وتطالع في محيط الجامعه ..
حاسه بتوتر وهذا شيء طبيعي لأي شخص يدخل مكان غريب عليه ..
تقدمت بهدوء وبدأت تدور على مبنى الاداره ..
بعد مشي ربع ساعه حصلته ودخلته ..
اول شخص قابلته سألته عن غرفة الإداري المختص بنقل الطلاب ..
دخلة لمكتبه وبعد كم دقيقه خلصت كل الاجراءات وعرفت مكان قاعتها وجدولها ..
راحت للكلاس حقها ودخلته ..
كان كبيير وفوضوي من كثرة حركة الطلاب واصواتهم وهرجهم ..
اسيل في نفسها: "يا ترى راح ارتاح هنا ولا لا" ..
لفت بعيونها تدور مكان فاضي تجلس فيه .. بس المشكله تخاف يكون لشخص غيرها ..
ظلت واقفه مكانها متردده مو عارفه وش تسوي ..
تنهدت وقررت تدخل وتجلس على اي كرسي ..
بعض الطلاب لاحظوا انها طالبه جديده وبعضهم ما لاحظ ..
جلست بمكان جنب الشباك .. تعشق الشباك عشان اذا طفشت تطالع برى ..
وفرحت كثير لما شافت ان الشباك يفتح عالساحه الخارجيه المليانه بالطلبه اشكال وانواع ..
هذا يعني انها ابدا ما راح تمل ..
اختفت فرحتها وهي تتذكر جامعتها القديمه ..
كانت اذا طالعت من الشباك يطيح نظرها على مكان شلة راشد ..
بصراحه لحد الآن هذا الانسان يرعبها ..
تنهدت للمره الثانيه وطلعت جوالها تشغل نفسها فيه ..
حصلت رسالتين ما تدري من متى موجوده لأنها نادرا تفتح جوالها وتشيك عليه ..
فتحت الاولى فكانت اعلان عن الازياء وغيره ..
فتحت الثانيه واستغربت ان الرساله من رقم غريب ..
قرأت الرساله وبدأت تتأمل فيها ..
مستحييل تكون من صاحباتها ..
اذن من ميين ..؟!

"اسسسول حبيبتي ردي"
محد يناديها بحبيبتي غير ابوها وآرثر ..
بس هالشخصين ماتوا ..
حست بالألم لما تذكرتهم ..
تحبهم .. كثييير ..
بلعت ريقها عشان تمنع دموعها من النزول وقالت في نفسها: "الله يرحمهم ويرحم جميع المسلمين ويسكنهم في فسيح جناته" ..
رجعت نظرها للرساله تفكر بالشخص اللي ممكن يكون ارسل هالرساله ..
بس ما جاء في بالها احد ..
ضغطت على زر الاتصال بفضوول .. تبغى تعرف مين يكون هذا الشخص ..
وبسرعه تراجعت وضغطت الاحمر ..
مستحييل تتصل على شخص مو عارفه مين يكون ..
حفضت الرقم تحت اسم "مجهول" وبعدين بدأت تكتب رسالة رد ..
(( ما اعرف منو انت .. ولكني قطعت علاقتي بالكثير فأتمنى انك تقطع علاقتك فيني )) ..
ارسلت الرساله له ..
في هالوقت جت طالبه ووقفت تطالع في اسيل ..
مستغربه من الطالبه الجديده اللي جلست في مكانها ..
فترددت تقومها ولا لا ..
انتبهت اسيل للبنت فسألتها: هذا مجانج ..؟!
البنت: ها .. آ آ ايه ..
اسيل: معليش ما كنت ادري و.....
البنت: لا لا خلاص عادي خليج يالسه وانا بأيلس في هالكرسي لأن صاحبته اعتذرت عن الدراسه ..
جلست جنب اسيل وقالت: انت طالبه يديده صح ..؟!
طالعت اسيل فيها وهي خايفه ..
تخاف تكون علاقتها معها ولما تعرف حقيقتها تبعد عنها ..
بكذا بيكوون الوضع مؤلم .. كثير ..
البنت: يا عسسل ..
انتبهت لها اسيل وقالت: هلا ..
البنت: انا اسمي رنا يوسف الـ****** .. وانتي ..؟!
ترددت كثير بعدها قالت: اسيل محمد ..
"محمد" الاسم اللي اضافوه لاسمها ..
اي شخص مجهول النسب يضيفوا له اسم اب وجد بدون لقب ..
رنا: حلو اسمج .. شكلج بتكوني رفيجتي الكلاسيه ..
اسيل: ها ..
رنا: ههههه انا عندي شله وايد كبيره بس افترقنا في الكلاسات فصرت لوحدي في هالكلاس فراح تكوني رفيجتي في الكلاس ..
اسيل: .............................
رنا بتأفف: امي تعرف وحده هنا وتقدر تنقلني عند رفيجاتي بس رفضت .. تقول خليج وحدج افضل عشان تركزي بدراستج .. اوووف وش ذا .. تقهههر ..
طالعت اسيل فيها لفتره ..
امها تبغى مصلحتها وهي تتأفف ..
فيه ناس يتمنوا ام تخاف عليهم .. بس هالبنت مو حاسه بالنعمه اللي هي فيها ..
مو حاسه ..
طالعت رنا فيها وقالت: انتي هاديه ..
اسيل: ..........................
رنا: اممم عندج اقارب هنا ..؟!
طالعت اسيل فيها شوي بعدها قالت: لا ..
رنا: طيب انتي شنو لقبج ..؟! لأني مشبهه عليج وحده ..
تلعثمت اسيل وما عرفت بشنو ترد ..
بس كذا ولا كذا راح توضح حقيقتها فليش تحاول تخفيها ..
رنا: شفيج سكتي ..؟!
اسيل: انا .. ما عندي لقب ..
رنا: كيف يعني ..؟!
بعد ما سألت سؤالها عقدت حواجبها تستوعب ..
شوي قالت بصدمه: انتي بنت حرام ..؟؟!!!!
لفت اسيل وجهها للشباك وما ردت عليها ..
طالعت رنا فيها لفتره طويله بصدمه بعدها سمعت اسيل تقول بهمس: لا .. انا لـ ـقيطه ..
فغرت رنا فمها بدهشه بعدها سكتت شوي وبعدين قالت: بعد شوي راح يي الدكتور فؤاد .. ههههه المصري ذا خطييير .. نستمتع معاه كثير .. يا شيخه المصاريه محبوبين ..
ابتسمت اسيل بهدوء وما ردت ..
طالعت في الساحه من الشباك وهي تفكر ..
هل دراستها هنا بتمر بسلام من دون مشاكل ..؟!
او العكس ..؟!

================================================== ==================