شبكة همس الشوق - عرض مشاركة واحدة

15 - 3 - 2014, 11:09 PM

|$[ البارت السادس عشر الجزء الثالث ]$|

الصَمتْ !! هو النُقطَه الأخِيرَه لِكُلِ الأَشيَاء المُوجِعهْ ..

عند بوابة الجامعه ..
كانت اسيل واقفه وتطالع قدام ..
بينها وبين ذاك المطعم حول ٣٠٠ متر بسبب المساحه الكبيره اللي قدام الجامعه ..
وحولها معظم الطلاب يطالعوا في المطعم ونصهم راح لعند المطعم عشان يحضروا الافتتاح ..
ترددت كثير ..
ما تدري تروح ولا لا ..
صحيح تكرهه .. وبقوه كمان ..
بس مع هذا ودها تشوف شكله ..
آآآخخ .. ماهي قادره تفهم نفسها ..
ساعات تتمنى انها ما تشوف وجه واحد من اهلها ..
وساعات تتمنى يتعذبوا ويتألموا ..
وساعات تبي تنتقم منهم .. وساعات تبي تشوف اشكالهم بس ..
لفت عشان ترجع لكلاسها وتحاول تطنش الامر ..
بس كيف راح تقدر تطنش حكاية ان ابوها على بعد امتار منها ..؟!
في هاللحضه تذكرت صوته ..
ايه لما اتصل على إياد وهي ردت ..
هذاك الصوت صوت ابوها ..
ارتعبت كثير من تلك الشخصيه اللي اكتشفت بعدين انه ابوها ..
لفت وطالعت في المطعم ..
سيارات كثيييره متجمعه وصحافه وتصوير وغيره ..
بصراحه ما تقدر تنكر ان المطعم فــخــم بمعنى الكلمه ..
هذا وهو من الخارج وبعيد .. اذا من قريب ومن الداخل كيف بيكون ..؟!
ظلت واقفه بمكانها متردده وعلى بعد ثلاث امتار كان هناك الشباب الثلاثه والبنت معهم ..
البنت: اووف شفيكم واقفين .. خلونا نروح المطعم ..
الاول والثاني: آششش ..
الثالث بهمس: اهجدي ..
البنت: شفيكم تهمسون مثل القطاوه ..؟!
الاول بهمس: القطاوه ما تهمس ..
الثاني بهمس: مخرفه ..
الثالث بهمس: مدري شلون تييب هالتشبيهات ..؟!
البنت: عيل الضفادع ..
الاول: حتى ذي ما تهمس ..
البنت: عيل البومات ..
الثاني: لا ..
البنت: عيل الشمبانزي ..
الثالث: لا ..
البنت: عيل خلونا نروح المطعم .. بيوفوتنا الافتتاح والفله ..
الاول والثاني والثالث: لا ..
عفست وجهها وقالت: عيل ليش قلتم بنروح المطعم يا ويوه الثعالب ..؟!
الثلاثه: آششش ..
لفت اسيل ومشيت بهدوء لعند المطعم ..
حاسه انها بعدين راح تندم إذا ما راحت ..
فعشان كذا بتروح مع انها ما تدري شنو راح تسوي اذا راحت ..
الاول بهمس: هيا ..
فمشي ومشيوا اصحابه وراه ..
البنت بضجر: مره إيه ومره لا ومره إيه .. صج صج خرفان ما عندهم كلمه محدده ..
وبعدها مشيت وراهم ومعاها الكام حقها ..
من زمان تنتظر يوم الافتتاح عشان تتصور داخل المطعم وتقهر بنات خالاتها ..
خرجت اسيل خارج محيط الجامعه وصار بينها وبين المطعم شارع تقطعه وبس ..
وقفت بمكانها لفتره ودقات قلبها سريعه مثل سرعة اقدام الطلاب اللي يسرعوا للافتتاح ..
حطت إيدها على قلبها لفتره ..
انسان تكره من اعمااااق قلبها .. ماهي عارفه شنو بتكون ردة فعلها إذا شافته ..
بتتهور وتصارخ عليه ..؟!
او تنهار وتبكي ..؟!
طالع الاول في اصحابه وقال: شفيها كل شوي توقف ..؟!
الثاني: اكيد ترتب الحجي اللي بتقوله له عشان يعطيها فلوس ..
الثالث: آشش تحركت خلونا نلحقها ..
مشيوا ورى اسيل والبنت وراهم وبإيدها الكام تضبطه والابتسامه شاقه حلقها ..
وصلت اسيل لرصيف المطعم ووقفت تطالع بالزحمه ..
مستحيل تقدر تدخل بينهم ..
شكل جيتها كانت بدون فايده ..
الاول: شوفوا شلون تطالع بإحباط ..
الثاني: صح لأنه ما يمديها تقابله وذي الزحمه كلها عليه ..
الثالث: اكيد بتبطل وترجع ..
الاول: لا يمكن .. لازم نصلح لها طريق عشان تدخل ونراقب اللي بتسويه ..
الثاني: معاك حق ..
الثالث: هيا ..
دخلوا بين المتجمهرين وبدأوا يصلحوا ممر عن طريق دفهم عالجوانب ..
اما صاحبتهم البنت فمشيت ودخلت في هالممر والابتسامه اعرض من قبل ..
البنت في نفسها: "يسس حلمي بيتحقق واقهر بنات خالاتي وراح احاول اتصور مع صاحب المطعم .. سبحان الله حتى الطريق مفتوح لي .. القدر في صفي يسس" ..
انتبهت اسيل لمكان شوي واسع تقدر تدخل منه ..
ترددت شوي بعدها دخلت ..
الاول في نفسه: "يسس نجحنا" ..
الثاني في نفسه كمان: "حلو دخلت" ..
الثالث في نفسه: "الخطه نجحت بس البقره صاحبتنا ليش تتلقف وتدخل قبلها" ..
كانوا قدامها وكل شوي يوسعوا الطريق فتمر صاحبتهم وبعدها اسيل لحد ما يوصلوا للشريط الابيض اللي يمنع المتجمهرين من الدخول ..
وداخل هالشريط كان هناك مراسلين صحفيين ورئيس بلدية المنطقه وبعض المسؤولين والكثير من الحرس للحمايه ..
ومن بين كل هالاشخاص كان ابو اسيل واقف بثوبه الابيض والبشت الابيض اللي لابسه وتلك المسبحه اللي ماسكها كمظهر فقط ..
شخصيته الخارجيه تخلي اللي قدامه غصب عنه يحترمه ويهابه ..
وعلى باب المطعم كانت هناك الشريطة الحمراء اللي حيقصها كإعلان للأفتتاح وبعدها يدخلوا يكملوا الحفل داخل بدون إزعاجات الناس المتفرجين ..
وصلت البنت لعند الشريط ولما شافت ابو اسيل صرخت بحماس: هيـــــــــه هيــــــــــــــــــه انـــــا هنـــــــــا ..
كان صراخها عالي جدا وملفت ..
ألتفتوا يطالعوا في مصدر الصوت ومن بينهم ابو اسيل ..
طارت البنت من الفرح لما طالع فيها فقالت: هيـــــــــه انا اسمــــــي صبـــــــى .. وانا مررره معجبــــــه فيـــــــــك .. بآخـــــــذ لي صـــــوره معك أمــــانه أمــــانه أمـــــانه ..
طالع ابو اسيل فيها ببرود بعدها لف وطنشها ..
حست بإحباط شدييييد فصرخت تقول: هيـــــــــه لحضـــــــــه لحضـــــــــه لحضـــــــــه .. امانـــــــــه وقــــــف شــــــوي ..
اول مالف اخذت له صوره بعدها قالت بحماس: وناااسسه اقدر افربكها واحط نفسي معاه وبجذي يصدقون اني تصورت معاه .. يسسس ..
وصلت اسيل لعندها في اللحضه اللي لف فيها ابوها واتجه للشريط ..
وقفت جنب صبى وبدأت تلف بعيونها بين الموجودين بإضطراب ..
متوتره وفي نفس الوقت مو عارفه شلون بيكون شكل ابوها ..
هذا غير عن ان نص الموجودين معطينها ظهرهم ومو قادره تشوف وجههم ومنهم ابوها ..
وقفوا الشباب الثلاثه وراها وهم حدددهم متحمسين وينتظرون اللحضه اللي تروح فيها له وتترجاه يعطيها فلوس ..
الاول بهمس: شفيها تلتفت جذي ..؟!
الثاني بنفس الهمس: يمكن هي مو عارفه شكله ..
الثالث بهمس: عيل لازم نعلمها عشان لا نضيع الفرصه ..
الاول بصوت شوي عالي: يووه شوفوا صاحب المطعم شلون طالع رزه ..
الثاني: البشت الابيض اللي علييه معطيه شيء من الفخامه ..
الثالث: حتى المسبحه اللي بإيده باين انها غالييه ..
وصل حوارهم هذا لمسامع اسيل ..
هذا يعني ان ابوها لابست بشت ابيض وبإيده مسبحه ..
شوي سمعت تصفيق وبدأ المتجمهرين يصفقوا كمان ..
طالعت لقدام عدل فشافت واحد ماسك مقص بإيده واعطاه الحارس بعد ما قص شريط الافتتاح ..
هذا يعني انه هو ابوها .. بس للأسف مو قادره تشوفه عدل ..
حوله كثيير من المسؤولين اللي يحجبون شكله عنها ..
الاول بهمس: اللحين بيدخل داخل وما يمدينا ابدا ندخل وبيفوتنا فرصة المشاهده لأن اسيل كمان ما يمديها تدخل وتتشحذ منه ..
الثاني بهمس: صح لازم نلفت انتباهه ونخليه يي عندنا ..
الثالث: صعب ..
الاول: خلونا بسرعه نفكر في طريقه يا هبل ..
الثاني: شفيك تسب ..؟! حتى انت اهبل ..
الاول: وانا إيش دخلني ..؟!
الثاني: لأنك غبي ..
الثالث: بسس .. شوفوا كيف خلص الريال من الاسئله الموجهه له .. اللحين بيدخل وانتم تتناقرون مثل القطاوه على قولت صبى ..
الاول: اسمعوا ما عندنا وقت نفكر بطريجه .. خلونا افضل اننا نصرخ عشان ينتبه لنا ووقتها نتكلم بعشوائيه واكيد راح تطلع الخطط تلقائيا ..
الثاني: خوش فكره ..
الثالث: واحد .. اثنين .. اثنين وربع .. اثنين ونص ..
الاول: اخلص وبطل سماجه ..
الثالث: مابي ..
الثاني: عيل انا بأعد .. واحد .. اثنين ....
الثالث: اثنين وثلاثة ارباع .. ثــــــلاثه ..
فقالوا بصوت واحد: هــــــيــــــــــــــــــــــــه ..
الكــــــل انفجع من صراخهم ولفوا عليهم ..
حتى ابو اسيل لف وهو حدده منفجع .. معقوله فيه ناس عندهم صوت زي كذا ..؟؟؟!!!
الاول: ايــــــش اخبــــــارك يالطيــــــب ..؟! انـا اسمـــــي عــــــوااد ..
الثاني: وانـــا اسمي عيــــد ..
الثالث: وانا اسمــــــي عايــــد ..
طالعت فيهم صبى وقطت معهم تصرخ: وانا اسمــــــي صبــــــى .. صبــــــى .. اسمــــــي صبــــــى ..
استفهام استفهام استفهامات على راس اسيل ..
شخصيات مو طبيعيه ابدا ..
عواد: شــــــرايك اعزمك على بيتــــــي للعشاء بمناسبــــــة الافتتــــــاح ..؟!
عيد: ايــــــه إيــــــه ابوه عنــــــده غرفــــــه خارجيــــــه شعبيــــــه وجنبهــــــا بعير ..
عايد: لونــــــه بني غامــــــق .. الله يهديــــــه دايم في الشمــــــس فصار اسمــــر ..
صبى: حتــــــى احنا عندنــــــا بعير في كتــــاب اخوي .. لونه مــــــره حلو .. ابيض وكأنــــه حصــــان .. بس الحبــــه اللي فوق الظهــــر خربت التشبيــــه ..
عواد: قــــل تــــم .. واذا تبي اذبــــح لــــك البعيــــر والله انه يفــــداااااك ..
كثرت الاستفهامات وصارت على رؤوس كل الموجودين ..
اسيل في نفسها: "هستره ..!! لا لا .. ينون ..!! لا لا .. عيل شنو وصف اللي قاعدين يسووه ..؟!"
عواد: قــــل تــــم يا ريــــال ..
طالع ابو اسيل فيه بعدها قال بإستنكار: تكلمني ..؟!
عواد: ايه انت صاحــــب المطعــــم ..
طالعت اسيل في عواد فتره بعدها لفت بهدوء لجهة ذاك الصوت اللي سأل بطريقة شبه استهزائيه ..
فطاحت نظرها على شخص له هيبه وشكله يجيب الخوف وكأنها هالآت حوله تخلي اللي قدامه يرتعب ..
رفعت عيونه لحد ما طالعت في عيونه ..
دق قلبها بقووه وحست بحراره تجري في جسمها ..
عورها قلبها .. آلمها كثييير ..
ياللــــه قد إيش استحقرته وكرهته في هاللحضه ..
ياللــــه قد إيش هو قذر وواطي في نظرها ..
احتدت نظراتها وتجمعت الدموع فيها ..
تكرهه .. تككككرهه ..
آآآخخ تكررره كثيييــــر .. كثييــــر ..
اما الشباب الثلاثه فطنشوا سؤال ابو اسيل وطالعوا في اسيل بإستغراب ..
مستغربين من الدموع اللي بعيونها ..
ليش تبكي ..؟!
هالسؤال محيرهم ..
رفع ابو اسيل حاجبه لما شافهم لفوا وطنشوه ..
لف وطالع في الشخص اللي خلاهم يسفهوه ..
كانت بنت في نفس عمرهم ..
استغرب من نظراتها تجاهه ..
نظرات غريبه .. فيها كره .. حقد .. حزن .. ألم ..
تناظره بحده وما شالت عينها ابدا ..
رفع حاجبه وهو يقول في نفسه: "خييير من متى المعرفه" ..
مو قادر يعرفها .. اول مره يشوفها ..
اذا ليش تطالعه كذا ..؟!
ابتسم ببرود .. اكيد هي وحده من المتضررين من مخالفاته اللي محد يدري عنها ..
اكتفى بتلك الابتسامه البارده اللي تدل عالسخريه والإستصغار ..
بعدها لف وبكل بروود ..
انطعن قلبها من نظراته لها ..
انهارت عالارض وقالت: اكرهك يالقذر ..
دخل المطعم مع المسؤولين بعد ما سمع جملتها الاخيره ..
لفوا معظم الطلاب يطالعوا فيها ..
ما قدرت تتمالك نفسها فشهقت وبدأت تبكي وهي تهمس بعبارات الكره والحقد ..
عقدوا الشباب الثلاثه حواجبهم كمحاوله لتفسير الموقف ..
ضحك عيد وهو يقول: هههههههه اللحين فهمت ..
عواد: شسالفه ..؟!
عيد: الانسه اسيل حاولت ونزلت لها كم دمعه وهي تطالع فيه عشان يحن ويعطيها فلوس بس هو سافهها وكان اول شخص يسافهها فحست بالاحراج ..
عواد: آهآ ..
عايد: لقيطه قذره .. يا شيخه إذا ما اعطاج لا تتصنعي البجي ..
صبى: منو هاي البنت ..؟!
عيد: الطالبه اليديده اللي انتقلت لكلاسنا ..
صبى: آها .. ليش هي هني ..؟!
عواد: فاغره لحد يرد عليها ..
صبى: انا مب فاغره ..
عايد: ذي وحده طلع بالاصل ان مالها اصل .. لقيطه وكانت يايه هني تتسول عند صاحب المطعم يعطيها جم فلس ..
لفوا الطلاب على بعض بدهشه وطالعوا بأسيل اللي كانت منهاره عالارض وماهي قادره تشوف الارضيه من كثرة دموعها ..
جسمها كله يرتعش من كل شيء ..
نظرات ابوها لها + نظرات الطلاب لها ..
تقدمت وحده وحطت جاكيتها على اكتاف اسيل وهمست: الله يهديج ليش تطلعي وملابسج خفيفه .. الجو برد ..
فتحت اسيل عيونها وهي متفاجئه ..
هالصوت مو غريب عنها ..
رفعت البنت راسها وطالعت في الشباب الثلاثه بنضراتها الحاده اللي ارتعبوا منها ..
البنت بحده: شنو يساوون سلاحف النينجا هني ..؟! وشنو هالحجي اللي يقولونه على رفيجتهم بالكلاس ..؟!
كملت بحده اكبر: تحجوا ..
نطوا من الخوف فقال عايد بخوف: احنا ا .. ا .. آء ..
عيد برعب: كنا نـ.. ا .. ءء ..
عواد بتردد: لأنو .. شسمه .. احنا .. أء ..
البنت: وإذا كانت رفيجتكم لقيطه ما يحق لكم تطلعوا تهم جاذبه فاهمين ..؟!
الثلاثه بسرعه: فاهميين ..
صبى: هههه هاوشتكم ..
طالعت البنت في صبى وقالت: ترى انتي منهم يا قلبي ..
لفت صبى على اصحابها وقالت: اسمعوا انا ابغى اكون الرئيس اللي لابس بنفسجي ..
عواد: ياخبله رئيسهم مو اللي لابس بنفسجي ..
صبى: عيل منو ..؟!
عيد: الاحمر .. بس انا سبقت وانا بكون الرئيس ..
صبى: مالي شغل انا الاحمر ..
عيد: اقول تلايطي عني .. انا الاحمر ..
ضحك عايد في نفسه وهو يقول: "اغبياء يتضاربوا على الاحمر ويحسبوه الرئيس .. محد غيري يعرف ان الرئيس هو البرتقالي هههه ميانين" ..
بصراحه جميع الشله ذي تتصف بالجنون لأن الرئيس هو الأزرق ..
رفعت اسيل راسها وطالعت في البنت وقالت بهمس: وصايف ..!!
ابتسمت وصايف وقالت: كيفج اسيل ..؟! انصدمت لما شفتج هني ..
اسيل بدهشه: ليش انتي هني ..؟!
سكتت وصايف شوي بعدها قالت: بس لا تضحكين .. بصراحه ذيج الجامعه جامعة شؤم .. كل شوي عندهم حادثه وانا صدري تعب كثير من الربو ..
عايد: هههههههههههههههه البنت المرعبه جبانه هههه ..
عواد: هههههههههه ابوك يالولد .. مسويه فيها انها قويه وهي اخرطي ههههههه ..
عيد: ههههههههههههه آآخخ يا بطني هههههه ..
لفت وصايف عليهم وطالعتهم ببرود ..
في نص ضحكاتهم انتبهوا لنظراتها اللي اكيد وراها علقه ..
وبسرعه اخذوا نفسهم ورجعوا عالجامعه واسيل تطالعهم بإستغراب ..
لفت وصايف على اسيل وقال: هيا نرجع للجامعه ..
قامت اسيل وراحت معها بس تفكيرها كله كان في ابوها ..
حطت إيدها على قلبها تتحسس ضرباته اللي ما زالت سريعه ..
حست بالعبره تخنقها فعضت على شفتها بقوه عشان تمنع نفسها من البكاء ..

================================================== ==================

نرجع للجامعه الاصليه لأبطالنا ..
في احد الزوايا فيها كانت هناك شلة سامي جالسين ..
الكـــــــل موجود ما عدا سامي ..
ودانا جالسه معهم وتفكيرها كله في سامي ..
عماد: شبـــــــــاب ..
يزيد: وويع ..
عماد: انا طفششان ..
صالح: يرحم اوومك فكنا .. تونا طالعين من حكاية الحريق ..
عماد: طيب شسوي انا طفششان وااايـــــــــد ..
ريان: هههه عيل خلنا ننطر سامي ونشوف لنا شيء نسويه ..
عماد: اتمنى يي وهو مروق مو مثل اليومين اللي راحوا .. كانت اخلاقه في خشمه ..
يزيد: ههههه يووه سامي اذا عصب او تكدر مزاجه لحد يقرب منه .. يطلع لكم الشيطان اللي داخله ..
عماد: ههههههه وانت الصاج ..
طالعت دانا في الارض بهدوء ..
اذا عصب او تكدر مزاجه .. لا ابدا ماهم عارفين شيء عن معاناة صاحبهم ..
تتمنى انهم يعرفوا عشان يوقفوا معه ويخففوا من آلآمه لأنها ما تقدر ..
لفت وطالعت في ريان اللي واضح عليه السرحان ..
هي متأكده وبقوه ان ريان عارف عن حالة سامي ..
تصرفاته تأكد كذا .. واكيد انه هو اللي دايم يوقف مع سامي في كل شيء ..
بس هي ما تبي كذا .. تبي الكل يوقف معاه ..
كل اصحابه عشان ينزاح عنه الألم ..
لفت وطالعت فيهم .. ودها تقولهم بس سامي قالها لا تقولي لهم ..
طالعت في الشله فتره طويييله بعدها قالت: يا شباب ..
لفوا عليها وقال عماد: هلا ..
ترددت كثيير بعدها قالت: خلاص مو لازم ..
طالعوا في بعض بعدها قال يزيد: عادي قولي شنو عندج ..
عماد: لا تترددي ..
طالعت فيهم واحد واحد بعدها قالت: سامي .. انتوا مو ملاحضين عليه شيء ..؟! يعني ما تحسوا انه طايح بمشكله عوده ..؟!
سكتوا فتره فقال عماد: بصراحه انا حاس بجذي من اول ولما سألته قبل فتره قالي ماكو شيء بس اتهاوش دايم مع مراد وعشان جذي يضيق خلقي ..
هز راسه بلا وكمل: بس ما اقنعني ابدا .. ففضلت السكوت لأنه ما يبي يتكلم ..
عدل صالح نظارته وقال: وربي انه من زماااان واضح ان وراه شي بس هالأيام صاير صج مو سامي اللي نعرفه .. هاادي ودووم سرحان وحجيه بالقطاره .. بالبدايه توقعت عشان زواجه من غيدا بس واضح ان السالفه غيير ..
اما يزيد فطالع فيهم وهو ساكت ..
وريان يطالع في دانا وهو يقول في نفسه: "لحد الآن وانا يمتلكني فضوول اعرف شنو صار بينهم .. راح معصب ورجع هادي .. حتى دانا اختفت ورجعت للبيت .. وايش السبب اللي يخليها اللحين تتحجى عن سامي" ..
دانا: مو بس انتم حتى انا ملاحضه .. احنا لازم نعرف شنو فيه .. مو انتم اصحابه ولازم توقفوا في صفه .. امسكوه ولا تخلونه يروح إلا لما يطلع كل اللي بصدره ..
عماد: صراحتا حجيج صج ولازم يصير .. واليوم كمان ..
صالح: عيل لما يي نحشره ليين يفضفض كل شيء ..
يزيد: شباب ..
لفوا على يزيد وقال عماد: هلا ..
سكت يزيد فتره بعدها قال: انا اتوقع اني عارف شنو فيه ..
طالعوا دانا وريان فيه بصدمه ..
عماد بدهشه: عيل شنو فيه ..؟!
طالع يزيد فيهم وقال: في الترم الاول طلع بسرعه من احد المحاضرات عشان يلحق على وحده مواعدها وقالي اييب اغراضه وياي .. وقتها كان ريان غايب فرحت لمجان الشله ويلست انتظر عماد وصالح لأنهم شوي ويطلعوا من محاضرتهم .. فأخذت شنطة سامي واشغلت نفسي بتفتيشها وطلعت محفضته ..
طالع فيهم شوي بعدها قال: يا شباب بطاقة هوية سامي تأكد انه بدون اصل ..
انصــــــــــــــــــددموا الشلـــــــه من اللي سمعوه ..
عماد بصدمه: انت شقاعد تقول ..؟! شلون بدون اصل وهو ولد الراهي شلون ..؟!
هز يزيد راسه بلا وهو يقول: ما عندي اي فكره عن هذا .. بس البطاقه مكتوب فيها سامي سلطان محمد وبس .. بدون الراهي ..
صالح بدهشه: انت متأكد ..؟!
يزيد: إيه .. ومره قد طلبت منه محفضته عشان آخذ منها سلف بس رفض وقال انه هو بنفسه بيعطيني ..
هز عماد راسه بلا .. مو قادر يستوعب ..
ونفس الحاله عند صالح .. مصدووم لأبعد درجه ..
جاء سامي في هالوقت عندهم وقال بهدوء: السلام عليكم ..
لفوا كلهم يطالعوا فيه ..
طالع فيهم شوي وحس ان الجو مو طبيعي ..
جلس وما سأل عن الامر ..
عماد: سامي ابي محفضتك ..
كلهم لفوا مندهشين من طلب عماد المفاجئ ..
سامي: شتبي فيها ..؟!
عماد: ابي اشوفها ..
سامي: لا ..
ضاقت عيون عماد بعدها قال: سامي .. ما راح تقوم من هني إلا لما نفهم كل السالفه ..
طالع سامي فيهم بإستغراب وقال: اي سالفه ..؟!
صالح: شنو فيك بالضبط وليه اخلاقك قافله ..؟!
ناظر سامي فيهم شوي بعدها قال: لأني متهاوش مع مراد وبس ..
رفع عماد حواجبه وهو يسأله: ومهاوشتك مع مراد هو السبب اللي يخليك ترفض الزواج ..؟!
انصدم سامي من سؤاله وقال: مالكم شغل ..
يزيد: مالنا شغل ..؟! ليه انت شنو تعتبرنا ..؟!
عدل صالح نضارته وقال: احنا ربعك من الثانوي يا سامي .. كل ما وايهتنا مشكله حليناها مع بعضنا .. انت رفيجنا وتهمنا راحتك .. اذا انت مو واثق فينا او ما تعتبرنا ربعك فهذا راجع لك ..
سامي: منو قال ..؟! والله انكم ربعي بس معليش .. مسائلي الخاصه مابي احد يعرفها ..
طالعوا فيه لفتره طويله بعدها قال عماد: انا ولينا ماراح نتزوج إلا لما نحضر زواجك وهذا آخر كلام عندي ..
عصب سامي من كلامه وقال: تستهبل انت ..؟! تظلم نفسك والبنت عشان رفيجك ..؟! انا مستحييل اتزوج فشلون راح تكمل نص دينك يا استاذ ..؟!
عماد بلا مبالاه: حتى رفيجي ظلم نفسه وما يبي يكمل نص دينه ..
طالع سامي فيهم لفتره بعدها قال: لا ترغمني على شيء يسبب لي الألم .. انتم مو فاهمين شيء فلا تتدخلوا وهدوني براحتي .. صدقوني ان راحتي هي جذي ..
يزيد: طيب شنو اللي فيك بالضبط ..؟!
سامي: قلت لكم شيء خاص ..
عماد: انت بدون لقب او اصل .. هذا اللي فيك صح ..؟!
انصصـــــــــددم سســـــامي من كلامه وبقـــــووه ..
ولف بعيونه بينهم وهو مو مستوعب ..
شلون وكيف عرفوا ..؟!
طالع في ريان ودانا .. لا يمكن يكونون فتحوا فمهم بشيء ..
اذا كييييف ..؟!!
عماد بتساؤل وخوف: سامي هالحجي صج ولا لا ..؟!
شتت سامي نظره بينهم ومو عارف بشنو يجاوب ..
كان يبي الامر يكون خاص ومحد يدري عنه ..
بس بلحضة ضعف حكى لريان .. وكمان بلحضة ضعف حكى لدانا ..
خلاااص ما يبغى لاحد كمان يعرف عن حقيقته البشعه ..
يزيد: سامي واللي يسلمك رد علينا .. ببطاقتك ماكو لقب .. يعني انت بدون اصل ولا لا ..؟!
قام سامي وهو يقول: انا رايح ..
مسكوه بسرعه وقال عماد: لا تتهرب .. وقسم بالله اننا ما راح نخليك تروح قبل لا نعرف كل شيء منك ..
سامي: شنو اللي تبون تعرفونه بالضبط ..؟! بليز اذا تهمكم راحتي فأتركوني ..
يزيد: وانت ما تهمك راحتنا ..؟! يا سامي احنا اذا احد منا متضايق يفضفض للشله .. عيل انت ليش ما تحكي لنا ..؟! احنا منو بالضبط بالنسبه لك ..؟!
اخذ سامي نفس عمييييق بعدها قال: ايه .. انا ولد حرام .. ارتحتوا ..
طالعوا فيه عماد ويزيد وصالح بصدمه وهم مو مستوعبين ..
يعني الكلام صح ..؟! بس صعب انهم يتقبلوا هالواقع ..
صعب انهم يكتشفوا بين يوم وليله ان صاحبهم ولد حرام ..
صالح بهدوء: عشان جذي كنت تكره ابوك ..؟!
هز سامي راسه وهو ساكت ..
ظل المكان هادي يطالعون في سامي وسامي نظره بعيد عنهم ويطالع في الطلاب ..
بعدها قام وقال: انا رايح المحاضره ..
وراح مع انه باقي عالمحاضره ثلث ساعه ..
بعد شوي لف عماد على ريان وقال: انت كنت تعرف صح ..؟!
طالع ريان فيه شوي بعدها قال: ايه من زمان حكى لي كل شيء ..
يزيد: طيب ريان شحكايته بالضبط .. مدري بس احسه .... مدري شلون اشرحها بس يعني احس انه فيه شيء كمان ..
عماد: شيء مثل شنو اكثر من جذي ..؟! يالله هو شلون متحمل ..؟! لو انا بمجانه مدري شنو بأسوي بروحي ..
ريان: يزيد معاه حق .. مسألة ان سامي ولد حرام مو هو الشيء الوحيد اللي متألم منه ..
عقد صالح حواجبه وقال: عيل شنو ..؟!
طالع ريان فيهم فتره بعدها قال: مع انه قالي لا تقول لاحد بس راح اقولكم لأني اتوقع انه خلاص ما راح يعصب اذا عرف اني تكلمت ..
هز عماد راسه بمعنى كمل ..
ففتح ريان فمه وحكى لهم كل شيء عن سامي ..