شبكة همس الشوق - عرض مشاركة واحدة

15 - 3 - 2014, 11:09 PM

الساعه وحده ونص الظهر ..
خرجت غيدا وشلتها من الكلاس بعد ما انتهت آخر محاضره عندهم ..
تهاني: آآفف الدكتور اليديد ما ينبلع ..
غدير: مليييق بزياده .. آآخخ وين ايامك يا راكان .. هالدكتور نعمه وتونا حسينا فيها ..
خلود: خلاص هانت .. باجي تقريبا اسبوع ويي دكتورنا القديم حسن ونفتك من التنكه اللي يدرسنا ..
طالعت غيدا فيهم بعدها قالت: بس بصراحه مابي حسن .. راكان افضل ..
غدير: من ناحية الافضل فصح ان راكان الافضل بس هو تعبان وعنده اجازه مفتوحه .. يعني انسي انه يدرسنا ..
تهاني بإحباط: قسم انه خوش دكتور ..
خلود: المهم خلونا نغير السالفه .. انا اليوم رايحه ادج في الكورنيش .. مين تخاويني ..؟!
غدير: طبعا انا ..
تهاني: بأحاول افضي نفسي وايي ..
خلود: وانتي يا حموود ..؟!
غيدا: مدري .. بس الكورنيش صاير ممل ..
خلود: خفي علينا .. مو اول كنتي تحبيه ..؟!
غيدا: اممم مدري .. بس مالي خلق اطلع ..
خلود: براحتج .. انتي الخسرانه ..
غدير: طيب نتجمع عالساعه جم ..؟!
خلود: شرايج يكو.....
وكملوا سواليفهم وغيدا في عالم ثاني ..
كانت تفكر في سامي ..
هالأيام ما صارت تشوفه .. واذا شافته يكون هاجد على عكس طبيعته ..
غيدا في نفسها: "غريبه مع انه هو كمان كان رافض فكرة زواجنا .. المفروض يكون مبسوط مو زعلان" ..
فتنهدت وتذكرت كلام ابوها ..
"انتي ضعيفة شخصيه"
"الوحده اذا تبغى تكون لها هيبه مو شرط تحول نفسها بويه"
"اوعديني يا غيدا انج تتزوجي وما تضلي بويه"
"وش تستفيدي من هالتشبيه"
"وش تستفيدي من هالتشبيه"

هالجمله هي اكثر جمله تتردد في مخها ..
وش بتستفيد من التشبيه ..؟!!!
فعلا وش بتستفيد ..؟!
ضعفت شخصيتها كثير وضعف قلبها بعد الحادثه اللي صارت لها مع سمير وسامي لما حبتهم بس رفضوها ..
حست بالضعف من طفولتها لما ذاك الولد المجهول سبب لها اذى تحت عينها ..
من بعد هالاشياء حست بضعف كبيير وبعدها انتقلت لجامعه ثانيه وتعرفت على خلود وغدير وتهاني ..
من صحبتها لهم اكتشفت ان القوه راح تجيها اذا تشبهت بالأولاد ..
وفعلا هذا اللي صار .. بعد ما صارت بويه صار الكل يهابها ويخاف منها ..
استمتعت بالوضع وكملت ..
حصرت تفكيرها على شيء محدد وهو ان البويات هم الاقوى .. هم الافضل .. هم القمممه ..
بس وصايف .. هالبنت اللي بالبدايه تمشكلوا معاها ..
هالبنت بنت عاديه مثل كل البنات .. بس لاحضت عليها قوه في الشخصيه وكل اللي حولها يهابها ..
غيدا بنفسها اذا شافتها تخاف من نظراتها مع انها ما قد اضهرت الخوف ..
هذا يعني ان قوة الشخصيه مو محصوره بالبويات ..
حتى البنات يقدروا يثبتوا وجودهم ..
ما تدري ليش كل هالافكار جتها ..
وكأن شيء قدييم كانت دافنته طلع ..
صارت مو مرتاحه في وضعها ..
يعني حتى لو حولت بويه هي في الاصل بنت ..
لما تصلي فهي تصلي في البيت مثل البنات ..
لما يعورها بطنها فهو يجيها مثل اللي يجي للبنات ..
ببطاقتها الجنس انثى ..
الناس كلهم ينادوها بضمير المؤنث ..
جسمها مهما كانت قوته فهو في النهايه جسم بنت ..
صوتها مهما احتد فهو صوت بنت ..
يعني بصراحه حست نفسها انها تلعب على روحها ..
حست بسخافة نفسها ..
حست انها غبيه .. ياااه بجد حست انها بزره وضحكت على نفسها ..
خلود: ياللا اشوفكم الليله .. سي يو ..
غدير: سي يا ..
تهاني: حتى انا رايحه .. بااي ..
غدير: باااي ..
فراحوا خلود وتهاني ..
لفت غدير على غيدا وقالت: حمود حبيبي شفيك سرحان ..؟!
طالعت غيدا فيها بعدها قالت: اممم غدير .. ما تحسي انج غبيه ..؟!
غدير بإستغراب: شهالسؤال الغريب ..؟!
غيدا: لا لا خلاص ماكو شيء ..
غدير: لا جد تحجي شنو فيج ..؟! واضح من عيونج انج محتاره ..
غيدا بإستغراب: ما شاء الله عليج .. شدراج ..؟!
ابتسمت غدير بعدها قالت: شنو فيج حبي ..؟!
غيدا: مدري .. شيء محيرني وايد .. مو قادره استقر على رأي واحد .. امم مدري والله مدري ..
طالعت غدير فيها بعدها قالت: طيب تبيني اسحب على خالد وعزوز عشان اييج البيت وتحكي لي كل اللي بقلبج ..؟!
طالعت غيدا فيها وودها تقول ايه بس ما قدرت ..
غيدا: لا لا هالشيء مو جايد .. روحي واستانسي ..
غدير: طيب تعالي تونسي معنا .. حنييب دخان ونلعب لنا بلوت وندشر .. بجد بجد وناسه ..
غيدا بتردد: شكله بيكون حماس بس .. لا لا عندي شغله ..
طالعت غدير فيها فتره بعدها قالت: اوكي براحتج ..
باستها وقالت: ياللا باي قلبو ..
غيدا: بااي ..
راحت غدير وغيدا تراقبها ..
تنهدت وبعدها راحت لسيارتها واتجهت للبيت ..

================================================== ==================

هذا اليوم بالنسبه له ازفت يوم لأنهم ما يخلصوا من محاضرتهم إلا بوقت متأخر ..
ودايما من كل اسبوع في نفس هالوقت يكون متذمر ..
بس هالمره لا لأنه فيه شيء يشغل باله ..
كلام سمعه امس ويتردد في مخه ..
" لما احاجيج طلي في ويهي يا آنسه دانا .. فاهمه ..؟!"
من امس وهو يفكر ولحد الآن يفكر وقدر يربط كل الاحداث مع انها شوي خياليه ..
يعني بعد ما صدم عادل انشل فقررت اخته التؤام تدرس بدل عنه ..
كان دايم تسائل عنه ..
مره يشوفه منشل ومره جسمه ضعيف ..
مره اذا شافه يعصب ومره يكون هادي ولا فيه شيء ..
هذا يعني ان الشخص اللي تضارب معه ورفع صوته عليه هي بنت واسمها دانا ..
ابتسم بخبث .. هالبنت موجوده في قائمة اللي يبي ينتقم منهم .. واللحين لقى طريقه فعاله للأنتقام ..
زادت ابتسامته وهو يتخيل الموقف ..
تكون جالسه مع شلتها في الكافتيريا فيي ويوقف قدام الكل ويفضحها بطريقه مفاجئه ..
راشد في نفسه: "وااااو .. مشكله وايد حلوه .. والله لأكسر براسها الجلبه ذي عشان بعدين تعرف منهو راشد الشعلان نار وبركان .. هين يا دانا .. راح تاخذي درسج كامل .. وباجر كمان" ..
ابتسم وهو حددده مبسوط ..
شلون ما ينبسط وهي ناوي على نيه شرسه تناسب طبعه المشكلجي ..؟!
شوي اختفت ابتسامته وقال في نفسه: "لا تنبسط .. باجي جلب ثاني لازم انتقم منه .. هالبسام هو اكثر واحد قاهرني" ..
لف يطالع في مكان بسام وقال في نفسه: "بس الجلب غايب من امس .. تعال يا حبيبي تعال ووقتها صدقني اني راح احضر لك هديه تناسبك واايد .. انتظرني يا ولد العاصي" ..
صحي من افكاره الشريره على صوت الباب ينقفل بعد ما طلع الدكتور اللي كان عليهم ..
ايمن: واااااه واخيرا .. والآن لا اشتهي سوى سرير بارد وغرفة مظلمه وغطاء ثخين وجو هاديء ..
راشد بنص عين: ماودك احد يسطرك بالكتاب يعدل لك تصميم ويهك ..؟!
ايمن: ههههههه شفيك ..؟!
راشد: اسأل نفسك يالسامج ..
ايمن: هههههههههه ..
دخل راشد كتبه بالشنطه بعدها طالع في الباب ..
راشد بعصبيه وتهديد: هيـــــــــه وقفـــــــــوا وياويـــــــــل احـــــــــد يمشـــــــــي .. انا بأطلــــع اول ..
طالعوا فيه ووقفوا ..
محد منهم ناقص مشاكل في هالساعه ..
ايمن: ههههه مساجين .. كلهم وقفوا ..
راشد بإستهزاء: غصب عنهم .. ولا انت ناسي انا منو ..
ايمن: ههههه ياللا ياللا نطلع ياخي .. حددي تعبان ..
راشد بعصبيه: اخوك بعينك .. جم مره اقول انا ما عندي اخوان ..
ايمن: هههه خلاص خلاص زلة لسان .. سامحنا عليها ..
شال راشد شنطته وطلع من الكلاس وبعدها اتجه لبيته ..
بعد ما وصل دخل وشاف روان في وجهه متكشخه ..
استغرب وقال: رونه على وين رايحه ..؟!
روان: ههههه بأزور رفيجتي رشا ..
راشد: لا تقولين انه اخو ريان رفيج المغزلجي ..؟!
روان: يب هو ..
راشد: لا ..
روان بسرعه: ليييش ..؟!
راشد: اولا محد يزور في ذي الساعه .. ثانيا اخوها اكرهه هو وشلته فما راح اسمح لج ..
روان بعناد: بكيفي يا احلى خي بالدنيا كلها .. لك يؤبرني هاد الوج الرافض .. صدئني لو شو ما رفضت مش حأسمع كلامك وبأعاندك .. فهمت عليا يا بعدي ..؟!
غصب عنه ضحك .. ابدا داخله غلط بوقت غلط ..
روان: ههههههه والله احبك وانت جذي ..
راشد: بس مهما كان ما راح اوافق ..
روان: اقول رشوود .. ترى قد رحت لها كثير وانت مو داري ..
راشد بدهشه: وليييش .. مو انا قلت لج من اول مره اني ما راح اوافق تروحين ..؟!
روان ببرائه: قلت لك بروح عند رفيجتي فقلت لي روحي .. كنت دايم استأذن منك ..
راشد بعصبيه: ما كنت ادري انج تقصديها ..
روان: ههههه ياخي انت دووم معصب .. روق حبيبي ..
طالع فيها بصدمه .. هو اعصابه نار وهي تنكت ..
ابتسمت روان وبدأت تسكر ازارير جاكيته وهي تقول: اممم رشود رشا من اعز صاحباتي واحبها حييل وكل شيء احكيه لها .. ياخي يكفي ان اسمها شبه اسمك .. واللي يسلمك وعشان اختك الصغنونه اللي تينن وتهبل وافق .. ترى رشا حييل طيبه مثلي .. عشان خاطر رونتك ..
طالع فيها فتره بعدها اخذ نفس وقال: اوكي موافق .. بس اول شيء فكي ازارير الجاكيت ..
ابتسمت بعد ما قفلت ست وباقي اثنين ..
هزت راسها وهي تقول: لا .. ياللا تشاو حبي ..
وطلعت برى البيت وهو مصدوم ..
شوي نادى بعصبيه: روااان وقفي ..
بس للأسف راحت ..
عض على شفته وبدأ يفتح ازاريره وهو معصب ويهمس ببعض كلمات الشتم ..
دخل وطلع فوق عشان ينام لأنه في مثل هاليوم يتغدى في الكافتيريا قبل آخر محاضره فعشان كذا ما طلب اكل من شهد كالعاده ..

اما عن شهد فكانت في المطبخ جالسه عالأرض وتمسح لها بعض المواعين اللي يبغى لها مسح بالمناديل ..
بس تفكيرها كله كان في اختها .. في اصغر اخت لها ..
شهد في نفسها: "يا رب ما يكون فيه شيء جايد يا رب .. ذي آخر طفل يابوه امي وابوي .. يا رب مابي افقدها مثل ما فقدتهم .. يا رب اذا كان فيها اي مرض فحطه فيني انا وهي تشفى .. انا راضيه حتى لو كان سرطان المهم هي تكون بخير .. امي وصتني عليهم .. وابوي كمان وصاني على امي واخواني" ..
نزلت دمعتها وقالت: انا مو قد المسؤوليه .. ابدا مو قدها ..
مسحت دمعتها وقامت توزع الموعين بعدها راحت لغرفتها تنتظر رد من سعود ..
هو وعدها امس انه يروح المستشفى في اقرب فرصه ويعطيها خبر ..
وهاهي اللحين تنتظره وتتمنى ان اللي في اختها يكون بسيط جدا وتطلع اليوم قبل بكرا ..
شوي قامت ورجعت للمطبخ وفتحت بابه الخلفي ..
لفت نظرها يمين ويسار بس ما شافت اي اثر لسعود ..
ظلت في مكانها تنتظره ..
مرت ساعتين واذن العصر ..
فدخلت تصلي وتدعي ربها اكثر لأنها عارفه انه هو الوحيد اللي يسمع لها وعارفه انه هو الوحيد اللي يقدر يطلعها من اللي هي فيه ..
دعت لاختها شادن ولأخوانها الثلاثه الباقين ودعت لأمها وابوها ..
بعدها بوقت قامت ولمت شرشفها بعدها رجعت مره ثانيه للمطبخ وفتحت الباب ..
بعد ربع ساعه فرحت لما شافت سعود جاي لعندها ..
بعد ما وصل على طول سألته بلهفه تقول: شفيها شادن ..؟! سعود شنو فيها ..؟! هي بخير ولا لا ..؟!
تنهد سعود بعدها قال: والله ما اعرف شنو اقولج ..؟! التأخر اثر على حالتها كثير .. جسمها صار ضعيف وتأذى بقوووووه من داخل بسبب حرارتها المرتفعه .. هذا غير ان عندها هشاشه بالعظام .. اعذريني بس الدكاتره يقولوا انها ما راح تطلع بدري .. هي طفله والحراره المرتفعه اثرت بشكل سلبي عليها .. لازم لها رعايه خاصه واذا لزم الأمر راح يصلحوا لها عمليه ..
كانت تسمع لكلامه وهي مصدووومه ..
وانصدمت اكثر لما قال عمليه ..
فهزت راسها بلا وهي تقول: عمليه ..؟! شنو يعني عمليه ..؟! اكيد تستهبل .. هاي طفله فشلون يسووا لها عمليه ..؟! العمليه شيء مو سهل .. صعب .. مره صعب ومستحيل ارضى انهم يسووا بشدوون جذي ..
ابتسم وقال: شهد اهدأي واذكري الله .. بأذن الله انهم ما يوصلوا لهالشيء .. احمدي ربج واشكريه .. اغلب الاطفال اللي مثل شادن يصيبهم الشلل .. عارفه شنو يعني شلل ..؟! الطفل اذا كانت حرارته مرتفعه وتصيبه تشنجات في الغالب اذا احد تأخر فالطفل على طول ينشل .. احمدي ربج انها ما وصلت للشلل .. وصدقيني ان ما ورى الابتلاء إلا الفرج ..
حست ان مصيبتها اهون بعد ما سمعت كلام سعود ..
اخذت نفس بعدها قالت: لا إله إلا الله .. الحمد لله وان شاء الله تشفى بسرعه ..
سعود: ان شاء الله .. ياللا انا بروح قبل لا يشوفنا احد ..
شهد بإمتنان: مشكور يا سعود .. انا فعلا ممتنه لك كثير .. ما اعرف شنو راح اسوي من غيرك ..
سعود بإحراج: العفو ..
وبعدها راح .. تنهدت شهد بعدها دخلت وقفلت الباب وراها ..
راحت لغرفتها وانسدحت عالسرير تفكر في اختها ..

================================================== ==================