شبكة همس الشوق - عرض مشاركة واحدة

15 - 3 - 2014, 11:10 PM

العصر وبرى مدينة الدوحه ..
وفي احد المستشفيات التخصصيه ..
وقف بطلنا بسام سيارته ونزل منها وقفل الباب وراه ..
بعدها وقف ينتظر اخته سميه تنزل ..
بسام في نفسه: "يا رب تظل حالتها مثل ماهي ولا تسوء .. بالقوه اقنعتها تيي واخاف تنهار فجأه وتتصرف بينون" ..
بعد دقيقتين فتحت سميه الباب ونزلت وطالعت في المستشفى ..
تقدم شوي وقال: هيا ندخل ..
طالعت فيه بهدوء بعدها مشيت وراه ..
دخلوا لداخل وبعدها طلعوا فوق عند غرفة امهم ..
قابلوا دكتورها الخاص واستفسروا عن حالتها فكان الجواب ان الحاله كل مالها تسوء ..
تألم بسام من كلامه اما سميه فما ابدت اي شعور ..
دخلوا الغرفه بعد مالبسوا الملابس المعقمه الزرقاء ..
اول ما شاف شكل امه انصدم ..
الاجهزه حولها صارت كثيره ولون وجهها شاحب وضعيف ..
جاء عندها بسرعه ومسك إيدها وبساها وقال: امي ...... يمه ..
فتحت عيونها ولفت تطالع في مصدر الصوت ..
انصدمت لما شافته وقالت بضعف: بسام ... حبيبي ولدي ..
باس إيدها مره ثانيه وقال بخوف: سلامات يمه ما تشوفين شر .. ان شاء الله تتعافين وتردين لنا مثل قبل ..
مسكت امه خده بإيدها المرتجفه وهي تقول والدموع بعينها: الحمد لله اني شفتك .. خفت اني اموت وانا ....
بسام بسرعه: بسم الله عليج .. عسى يومج طويل ان شاء الله .. يمه لا تقولين هالحجي مره ثانيه واللي يسلمج ..
الام بهمس: لقيت سجى ..؟!
طالع بسام فيها شوي بعدين هز راسه بلا ..
غمضت الام عيونها بألم بعدها تذكرت بنتها سميه اللي تتمنى تشوفها ..
فتحت فمها بتسأل بسام عنها بس سبقتها سميه تقول بحقد: الام وابنها المدلل .. خوش عايله والله .. كنت حاسه انج ما راح تتغيري ابدا .. انانيه وما يهمج غير راحت ولدج وبس اما انا فعساني بحريقه .. اكرهج .. ماكو ام مثلج ..
لفت الام ناحية الباب فشافت بنتها واقفه وتطالع فيها بحقد ..
ابتسمت بحنان .. من زمان ودها تشوفها واخيرا شافتها ..
مدت إيدها وقالت: سوسو حبيبتي تعالي هني يا روح امج ..
اندهشت سمية من ردت فعل امها بعدها قالت بعصبيه: لا .. اكيد تتصنعي الطيبه .. مابي ايي عندج .. اكرهج ..
الام بضعف: يا بعد قلبي انا آسفه .. اعرف ان اللي صار زمان كرهج فيني .. يا بعد روحي تعالي لحضني .. وحشتيني يا بنتي ..
طالعت سميه فيها بسرحان ..
تقدمت خطوه تجاه امها بس وقفت وقالت: لا لا ما ابغي .. اكرهج ..
خرجت وقفلت الباب وراها وبسام يطالع فيها ..
فأبتسم لأنه لاحظ تصرفاتها زين ..
بسام: الحمد لله .. ان شاء الله تتحسن اكثر ..
مسكت امه إيده وقالت: بسام حبيبي روح لها .. خلك معها ..
بسام: لا وييين .. توني ياي اشوفج ..
الام: عشان خاطري حبيبي .. ما تتصور قد ايش انا مبسوطه اليوم بشوفتكم ..
بسام بإبتسامه: ان شاء الله دوم يا حبيبتي ..
الام: واللحين ارجع للدوحه ودور على بنت اختك .. ياللا ..
بسام: من عيوني بس بعد ما اطمئن عليج وايلس عندج جم يوم ..
هزت راسها بلا وقالت: الاعمار بيد الله وانا ما اعرف متي يي يومي .. ابي اشوف سجى .. ابي اعتذر منها .. بسام انت حققت امنيتي ويبت بنتي عندي .. باجي سجى .. ييبها بسرعه عشان اكفر عن ذنبي ..
طالع بسام فيها شوي بعدها قال: يمه انتي تجبريني على اشياء انا ما ابيها .. ابي ايلس عندج .. ابي اكون بينبج ولو لأيام بسيطه .. مالنا نص ساعه فليش تبين تحرميني من اليلسه معج ..؟!
مسحت على شعر ولدها وقالت: الله لا يحرمني منك يا ولدي .. الحمد لله ان ربي هداني وعرفت اربيك صح عكس اختك اللي ربيتها غلط .. يالله تب علي وسامحني .. حبيبي بسام ييب بنت سميه .. ييبها عندي واللي يسلمك حبيبي ..
تنهد بعمق وقال: ان شاء الله ..
سلم على راس امه وإيدها وقال: اشوفج على خير ..
الام: الله يسلمك .. مع السلامه ..
طالع فيها شوي وقال: مع السلامه ..
طلع من الغرفه وراح عند الدكتور يطلب منه انه يعطيه اخبار امه اول بأول بعدها دخل المصعد عشان ينزل ..
طلع جواله من جيبه وفتح رسالة اسيل اللي جته امس ..
ذي المره الثالثه يقراها .. مو عارف كيف يرد عليها ..
بسام في نفسه: "قطعتي علاقتج بالكثير ..!! الله يعينج .. انا لازم ألقاها او عالأقل اخفف من حالتها .. بس اذا عرفَت انا مين ما اتوقع ابدا اي نتيجه ايجابيه .. اكيد بتكرهني" ..
تنهد وبعدها بدأ يكتب لها رساله ..

بعد ما خلص خرج من المصعد وراح للسياره فشاف اخته جالسه فيها ..
ركب وقال: انا راح ارجع الدوحه .. تبين تقعدين هنا ولا تسافري معاي ..
سميه وهي تطالع من الشباك: ابي مجان مافيه لا انت ولا هي .. ابي عند زوجي ..
بسام بهدوء: طليقج ..
سميه بعصبيه: جـــــــب .. زوجي ..
بسام: طليقج ..
عصبت اكثر وقالت: انطـــــم هو ما طلقني .. بس قاعد يضحك عليك ..
طالع بسام فيها شوي بعدها شغل السياره واتجه للمطار عشان يسافر مع اول رحله ..

================================================== ==================

الساعه عشره الليل ..
كان واقف قدام الصرافه يطالع فيها ..
قبل شوي سحب له مبلغ بس تذكر الكلاب الثلاثه اللي اخذه بطاقته الثانيه ..
كل ما يتذكر انهم يستمتعوا بالفلوس ويلعبوا فيها بالحرام يحس بقههر ..
مافي اي طريقه غير انه يكلم ابوه يوقف حسابه بس هو ما يبغى ..
شلون يتكلم مع واحد كان يلبس قناااع ..؟!
جشع وطماع واناني ومجرم .. صفات اختبت ورى هذا القناع ..
حاول يشيل ابوه من راسه لأنه اذا تذكره يتألم ..
صدره يضيييق ويصيبه اختناق في حلقه ..
وبقووه ضرب الصرافه بقبضة إيده وهو يقول بقهر: مسسستححيل ..
ضغط على اسنانه بقوه بعدها راح وركب سيارته واتجه لبيت صاحبه بدر ..
وقف سيارته لما وصل ونزل .. فلاحظ الكراج فاضي ..
تغير مووده تماما وابتسم بخبث وهو يقول: الكراج فاضي .. ههههههههه ..
ركب سيارته ووقفها في الكراج بطريقه عرضيه واخذ مكان سيارتين ..
نزل ورجع ورى وطالع في الشكل النهائي ..
إياد: والله خوووش .. ههههه ..
لف ودخل البيت واتجه للمطبخ ..
حدده عطشان ويبي يشرب له كوب مويه ..
دخل المطبخ فشاف ام مساعد ولبنى يحضرون العشاء ..
ابتسم وقال: اهلييين خالتي .. شخبارج ..؟!
لفت ورى ولما شافته قالت: ويــــــع .. شنو يابج هني يا ويه الكوارث ..؟!
إياد: ههههههههه اعجبتني كوارث ذي .. اثارني مشكلجي وانا مدري ..
ام مساعد بعصبيه: اطلع برى .. ولو تطلع من البيت يكون احسن ..
إياد ببراءه: يا خاله الله يهداج .. انا اللحين شنو ساويت لج .. والله اني حالي حال نفسي .. بالعكس سألتج عن اخبارج بس صارختي علي .. اتقي الله فيني يا خاله ..
عصبت ام مساعد وقربت من إياد والشرر يتطاير من عيونها ..
إياد في نفسه: "يوه يوه والله عصبت .. الله يستر" ..
وقفت قدامه وقالت بحده: اختار احد الخيارين .. يا اما تطلع من البيت وتفكني من ويهك او انا اطلعك بطريجتي ..
إياد: اختار حذف اجابه ..
انصعقت الام من شدة العصبيه .. اما لبنى فحطت إيدها على فمها تمنع نفسها من الضحك ..
ام مساعد بعصبيه: إيادووه انا ما راح اصبر اكثر من جذي .. ما راح اصبر .. لا تحدني اسوي شي تندم عليه فاهم ..
طالع أياد فيها لفتره بعدها قال: شنو تقصدين ..؟!
ام مساعد: اقصد انك اذا ما طلعت من حالك فتحمل اللي بييك ..
إياد: يعني تهدديني ..؟!
ام مساعد: عفيه عالشطور .. ايوه اهددك ..
إياد: اسمعي يا خاله .. انا من النوع اللي ما يخاف من التهديد ايا كان نوعه ..
بعدها ابتسم بإستفزاز وقال: وطلعه من البيت ماني طالع .. اغسلي ايدج مني ..
لف وطلع برى المطبخ ..
فارت اعصاب الام وقال بحقد: الحقييير ..
لفت على لبنى وقالت بعصبيه: وانتي شنو موقفج هني يالجلبه ..؟!
فتحت لبنى فمها بتتكلم بس صفقتها ام مساعد كف وهي تقول: انجبـــــــــي .. مابي اسمع نفس واحد فاهمه ..
لبنى بصراخ: بس بيكفــــي .. لك انا شو دخلني لتضربيني ..؟! بيكفي خلاااص .. انا ما عملت شي غلط .. كل ما تعصبتي من حدا ضربتيني انا .. لك انتي وحدا مجنونه ..
عصبت الام زياده ومسكت شعر لبنى وقالت بعصبيه: انتي لسانج كل يوم يطول اكثر من اللي قبله يا بنت الفاجره ..
لبنى: آآآه لك انا كم مره بأقولك ما تحكي عن إمي بشي .. آآآآآه شعري عم يوجعني يا خالتي ..
الام بعصبيه: تخلخلت عضامج قولي آمييين .. ما ناقصني غير بزران يتحدوني ويرفعون صوتهم علي .. يالله متى تموتين عشان افتك منج وارتاح ..
ودفتها بقوه عالدولاب .. فصقع راس لبنى من عند اذنها بقوه ..
صرخت بألم وجلست عالارض وهي تصارخ وتبكي ..
الام: احسن عشان بعدين تتعلمين شلون تتحجين عدل يا الجلبه .. انا عمتج ولو سويت ايي شيء ما تعارضي ولا تفتحي فمج .. كافي اني متحملتج هني وانتي لا بنتي ولا تقربي لي ..
بعدت لبنى إيدها عن راسها فشافتها كلها دم ..
طالعت فيها وقالت بصوت باكي: لك شو هاد القلب اللي عم تملكيه ..؟! ما عندك رحمه على اي حدا ..!! بس عم تضربي فيا وتشتمي .. حرام عليك .. انا مو حيوان ..
الام بعصبيه: إلا حيوانه ونص .. وخلاص سدي حلجج لا اعلمج شلون تسدينه ..
اما إياد فلما سمع صراخ لبنى رجع المطبخ ..
وهو اللحين واقف عند باب المطبخ يطالع في ام مساعد بصدمه ..
مو مستوعب قد إيش هالانسانه شرسه ..؟!
هو السبب في عصبيتها فليش تضرب البنت ..؟!
فتحت لبنى فمها بتتكلم بس سكتت لما شافت إياد ..
لفت الام للمكان اللي تطالع فيه لبنى ولما شافت إياد قالت بعصبيه: نعــــــم شنو تبي بعد ..؟!
تقدم إياد للبنى وجلس قدامها ..
مد إيده ولمس جرحها بطرف اصابعه ..
فتألمت وهو تقول: آآخ ..
طالع إياد في اطراف اصابعه اللي تلطخت بالدم وقال بهمس: فتحت الجرح كبيره ..
قبض على إيده بقووه بعدها قام ولف على ام مساعد وقال بصوت حاد: شنو ذنبها البنت عشان تضربيها ها ..؟! اذا كنتي معصبه مني فأضربيني انا مو هي المـ....
وقبل لا يكمل كلامه تفاجأ بكف على خده من ام مساعد ..
جمد في مكانه وهو حدده مصدوم ..
ام مساعد: ها جذي ارتحت صح يا ولد الراهي ..؟! عشان بعدين تبطل تتحدى يا ولد ..
لف وطالع فيها واعصابه فايره ..
مو مستوعب ان وحده غريبه تصفقه كذا ..
ضغط على ايده بقووه وهو يقول بحده: انتي شلون تسوين جذي ..؟! شكلج مو عارفتني عدل ..؟! انا لو اهانني واحد صك عمره التسعين اقسم بالله اني ما ارحمه .. فاهمه شنو يعني ما ارحمه ..
ابتسمت الام وهي تشوف عصبيته الواضحه وحست بإستمتاع فقالت: طيب .. وبعدين ..؟!
تنرفز إياد بقوه وشد على قبضته اقوى وقال: اقدر انهيج تماما .. اقدر اندمج .. اقدر اخليج ما تنامي الليل من الألم والقهر ..
طالع فيها بنظراته الحاده وقال: بس راح اتركج ولا حأذيج عشان بس خاطر رفيجي بدر .. حأنسى انج مديتي إيدج علي .. بس مستحيل انسى انج مديتيها على لبنى بدون سبب ..
لف على لبنى وقال: تعالي اوديج المستشفى عشان يخيطوه ..
وبعدها خرج من المطبخ ..
قامت لبنى وطالعت في عمتها شوي بعدها لحقت بإياد ..
اما الام فكانت واقفه مكانها وهي حاسه بالقهر يغلي في صدرها ..