شبكة همس الشوق - عرض مشاركة واحدة

15 - 3 - 2014, 11:11 PM

في فجر اليوم الثاني ..
كانت جالسه عالكنبه اللي بصالتها وحاضنها رجلها ومسنده راسها عليها ..
الجو من حولها هااادي واللمبات طافيه ويجيها نور بسيط من الشباك ..
كان عقلها يسترجع مشاهد من اللي صار امس ..
وقفته .. نظرته لها .. صوته .. ابتسامته البارده ..
ذاك الانسان هو ابوها ..
هي قطعه من ذاك الشخص اللي شافته امس ..
نزلت دمعتها على خدها ..
إختنآآآق .. حاسه بإختناق بصدرها ..
الليل كله ما نامته بسبب التفكير بإبوها ..
ومع هذا ماهي حاسه بإرهاق او نوم ..
حاسه بكتمه وضيقه في تنفسها ..
شخصية ابوها تدل انها قويه وشرسه ..
وامها انسانه قاتله ..
ما تدري ايش هو الوصف المناسب لهالعائله ..؟!
بس خلاص ماهي مهتمه فيهم ولا تبغاهم ..
ما راح تفكر فيهم وبتجبر نفسها انها تنساهم ..
مسحت دمعتها وهي مصره على قرارها ..
ماهي بحاجه لهم .. صار عندها شقه ورصيد بالبنك وتدرس وحياتها ماشيه ..
ابدا ماهي بحاجتهم ..
رفعت راسها وطالعت في الشباك ..
بدأ ضوء الفجر يطلع ..
منظر بداية الفجر وقبل شروق الشمس منظر حلو ويجيب الهدوء والطمأنينه ..
حست براحه نفسيه وقالت: سبحان الله .. منظر يخلي الواحد يحس بالأمان ..
وكملت بهدوء: والحنان ..
سكتت لفتره طويله تفكر وهي تراقب الجو ..
شوي سألت نفسها سؤال هي محتاجه لأجابته ..
امها وابوها .. ليش رموها ..؟!
اسيل: اللي عرفته من وصايف اني مب بنت حرام .. عيل ليش يرموني .. هم ماهم فقراء ولا محتايين .. اكيد فيه سبب .. مستحييل يسووا كذا من دون سبب ..
شوي ضاقت عيونها وقالت بألم: حتى لو فيه سبب فهذا مب عذر .. مب عذر .. ابدا ..
حست بالعبره تخنقها وغصب عنها شهقت ..
قامت من مكانها بسرعه .. راح تروح تصلي الفجر يمكن تنسى وترتاح ..
اتجهت للغرفه واخذت جوالها عشان تطالع في الساعه فأنتبهت للرساله ..
فتحتها فكانت من المجهول ونصها كان /
(( الوحده شيء قاتل .. فلا تكوني وحيده واسترجعي علاقاتج .. صدقيني بجذي راح ترتاحي )) ..

ارتجفت شفايفها ونزلت دموعها ..
فعلا الوحده شيء قاتل .. قلبها وصدرها مليااان اوجاع محتاجه تفضفضها لاحد ..
من يوم ما اكتشفت انها لقيطه وهي ابدا ما شكت لاحد ..
بس لاخت صاري .. حتى شكوتها لها كانت بسيطه ..
هي محتاجه تبكي بصوت عالي ..
محتاجه لاحد يحضنها ويهدئ منها ..
محتاجه تطلع كـــــــــل اللي بقلبها ..
محتاجه لأحد يمسح دمعتها ويقولها لا تهتمي ما دام اني بجنبك ..
بس مستحييل تلقى شخص بالمواصفات ذي .. مستحيل تقدر تطلع كل اللي بقلبها ..
الكتمان اهون من انها تشتكي لشخص يجامل ..
وبلحضة ضعف وهي تشاهق وتبكي ضغطت رد وكتبت لهالمجهول رساله كان نصها /
(( انا مختنقه وايد .. وايد .. والله اني اكرههم .. كـــــل هالعائله اكرهها .. مو قادره اتحمل .. قلبي يوجعني .. ياليتهم ذبحوني بدل لا يذبحون انسانيتي .. قلبي .. وروحي )) ..
وبعدها ضغطت ارسال وهي ماهي واعيه للي سوته ..
كتبت اللي تحس فيه بس ما ادركت انها ارسلتها لمجهولها الغريب ..
غطت وجهها بإيدها تبكي بقهر وحسره ..
بعد دقايق تذكرت الصلاه فقامت وصلت الفجر ..
من بعدها حست براحه نفسيه ..
طالعت في الشباك وشافت ان الشمس لساتها ما شرقت بس نورها طلع ..
ظلت واقفه تراقب شروق الشمس وماهي حاسه بالوقت .. وبدون لا تحس غفت ونامت ..
بعد ساعتين صحيت وطالعت حواليها تستوعب ..
شوي انتبهت على نفسها وراحت بسرعه تبدل ملابسها وتجهز نفسها بعدها نزلت واتجهت للجامعه ..
حتى فطور ما افطرت ..
لما نزلت من سيارة التاكسي طالعت في مطعم ابوها اللي يقدم تخفيضات بمناسبة افتتاحه ..
فقالت بهمس: ابي اشوفه .. ابي اقابل ابوي .. ابغى اسأله ايش السبب اللي خلاهم يرموني وبعدها راح اختفي من حياتهم .. بس ابي اعرف السبب ..
تنهدت وبعدها دخلت للجامعه واتجهت لكلاسها ..
شافها واحد من الطلاب وتفاجئ بقوه ..
شوي قال بدهشه: اسيل انتي تدرسين هني ..؟!
وقفت اسيل ولفت عاليمين تشوف مين هالشخص اللي يكلمها ..
لما شافته قالت بصدمه: ا .. انت ..؟! تدرس هني ..؟!
شوي ابتسم وقال: حلو انج صحيتي على نفسج وكملتي دراستج افضل من الشغل ..
اسيل: ما توقعت اني بأشوفك هني ..
ضحك وقال: هههه كويس صرنا اصدقاء دراسه .. بس المشكله انتي اولى وانا ثالث ..
اسيل: ...........................
طالع حواليه بعدها قرب منها وقال بهمس: اسيل منو دفع لج الفلوس ..
طالعت فيه بعدها قالت: يعني مو انت ..؟! زي ما توقعت ..
فقال بإستغراب: يعني ما تعرفين ..؟!
هزت اسيل راسها بلا وهي سرحانه ..
مستحيل يكون جواد ولا ليلى ولا حتى خالد ..
حتى كلام صاري اللحين يدل انه مو هو ..
اذا مين هو ..؟! ما باقي احد ..
فجأه تذكرت سامي ..
هي لما شافته بعدت عنه .. ليه مالحقها ..؟!
مسسستحيل يكون عرف ودفع عنها ..!!!
لا .. لا هي ما تبغى اي مساعده منهم .. ما تبغى ..
صاري: اسيل شفيج ..؟!
انتبهت اسيل له وقالت: ماكو شيء ..
جت وحده من ورى وقالت: اسيل اخبارج ..؟!
لفت اسيل وقالت: وصايف ..!! انا بخير .. شخبارج انتي ..؟!
وصايف: عااال .. المهم انتي شموقفج مع هالغريب .. سلاحف النينجا بدأت محاضرتهم من زمان فإيش اللي يخليج تتأخري ..
اسيل بصدمه: صح نسيت .. بااي وصايف ..
وراحت للكلاس بسرعه ..
طالعت وصايف في صاري بعدها راحت ..
صاري: اللحين انا صاير غريب ..!! اصلا منو ذيج وشتبي بإسيل ..؟! يب لازم ما اخلي اسيل تمشي مع ذيج الهبله .. لا الدلخه افضل ..
لف ورجع لشلته ..
فتحت اسيل باب الكلاس فشافت في وجهها الدكتور يخرج ..
خرج الدكتور وراح ولا انتبه لها ..
تنهدت وهي تقول: خلصت المحاضره ..
فلاحضت ان كل الكلاس يطالع فيها ..
حست بإحراج لأنها توها جايه وطالع شكلها غبي ..
دخلت وقفلت الباب وراها لأنه بعد عشر دقايق تبدأ محاضرتهم الثانيه ..
راحت لكرسيها وجلست عليه وطلعت كتابها تحضر ..
لفوا الشباب الثلاثه يراقبونها بنضراتهم ..
عايد بهمس: شكلها دافوره ..
عواد بنفس الهمس: لا لا ما اتوقع .. هي لقيطه وما عندها وقت تذاكر ..
عيد: وليش ما عندها ..؟!
عواد: لأنها اكيد تدور على اللي رموها ..
عايد: خبله ..
عيد: وليش خبله ..؟!
عايد: لأن اكيد اهلها فقراء دامهم رموها واللحين هي جامعيه وعندها مرتب شهري فليش تدور على حياة الشقا ..؟!
عواد: وانت شدراك ان اهلها فقراء ..؟! يمكن رموها خوف من الفضيحه ..
شهق عايد وهو يقول بهمس: مو معقوله تكون تقصد ....!!!
عواد: إلا معقوله ..
عيد: هذا يعني انها راح تدخل النار ..
عايد بإستغراب: وليش ..؟!
عيد: لأني سمعت حديث يقول فيه ان الرسول صلى الله عليه وسلم قال (( لا يدخل الجنه ولد زانيه )) ..
عواد: اييه صح حتى انا اتذكر اني سمعته ..
ما احتملت اسيل همسهم اللي واصل لها بوضوح ..
رفعت راسها لهم وقالت: هذا حديث مو صحيح او انه ضعيف .. واصلا يالاغبياء الثلاثه خذوا السالفه بالمنطق .. لو كان واحد يعبد ربه ليل ونهار ودايم يستغفره وهو بالاصل ولد حرام .. هل هذا يعني انه يدخل النار ..؟! ليش هو ايش ذنبه اذا كانوا اهله غلطوا ..؟!
طالعت فيهم شوي بعدها قالت: فيه حديث عن الرسول صلى الله عليه وسلم يقول فيه (( ولد الزنى شر ثلاثه)) .. يعني يقصد ان بحجيه الولد فهو اكثر شرا من ابوه وامه اللي زنوا .. لأن ابوه وامه صلحوا حرام .. اما الولد فهو مخلوق من الحرام .. وعلى حسب اللي فسروا حديث الرسول صلى الله عليه وسلم امثال ابن تيميه فقالوا انه في الغالب يطلع الولد سيء على اهله ونادرا يطلع صالح .. فإذا طلع صالح فلا ينطبق عليه .. ما قريتم ربنا شنو كاتب في كتابه (( ولا تزر وازرة وزر اخرى )) فشلون تفتون من عندكم وتقولوا انه حيدخل النار ..؟!
فكملت بحده: ثقفوا نفسكم بالدين قبل لا تتفلسفوا ولا تقولوا احاديث انتم مو عارفين مصدرها .. وبعدين صحيح انا لقيطه بس مو بنت حرام وهذا اهم شيء .. انا عندي ام واب .. بس هم اغبياء مثلكم .. واللحين طالعوا جدام ولا تراوني ويهكم ..
وبسرعه لفوا الثلاثه وطالعوا قدام ..
عواد بهمس: قطيعه .. تعرف تسكتنا ..
عيد بنفس الهمس: سمعت شنو قالت .. تقول ان امها وابوها اغبياء ..
عايد بهمس كمان: اصلا هي عاقه ..
اسيل: انكتموا .. صوتكم مو مخليني اركز ..
وبسرعه انكتموا ..
تنهدت اسيل وطالعت في كتابها وهي تفكر ..
ما تدري شلون جتها الجرأه انها تدافع عن اولاد الحرام ..
يمكن لأنها في البدايه ضنت انها منهم ..
ويمكن عشانها عاشت هالتجربه فهي تحس بمعاناتهم فعشان كذا دافعت عنهم ..
الناس في هالايام تفكيرهم محدود ..
نادرا الواحد يفكر في مشاعر الانسان .. اغلب تفكيرهم في المكانه والمظهر وبس ..
جت صبى في هالوقت وقالت بحماس: شباب شباب شباب وناسسسه مرره وناسسه ..
عواد: ايش فيج ..؟!
صبى: فيني حاجتين مرره روعه وحلوه وتينن وتهبل وتخقق و....
عايد: اخلصي ..
فتحت صبى شنطتها وقالت: اولا شوفوا ذي الصوره .. ههههه ذي صورة صاحب المطعم ضبطتها بالفوتوشوب وحطيت صورتي معه وصار كأني تصورت معاه .. ياااااه حمااسس ..
رفعت اسيل عيونها وطالعت في صبى لفتره ..
عواد: على قد ما انتي خبله إلا انج ماهره في التصميم ..
صبى: ههههههه ترى كلنا خبلان هههه ..
عايد: لا مو كلنا .. انا مو خبل ..
عيد: شنو الشيء الثاني اللي انتي مستانسه منه ..؟!
صبى بحماس: وااااو خبر بملييييون ريااان .. لا لا بمليييار ..
عواد بحماس: شنو هو وابشري بستين بعيير من جمال ابوي ..
صبى: وااااو وناسه .. بيصير عندي بعران كثير ..
غصب عن اسيل ضحكت لأنها تذكرت صاحبتها وسن: هههههههههههههههههههههههه ..
لفوا كلهم عليها فقالت صبى بحماس: يااااي انتي الطالبه اليديده .. من زمان ودي اتحجى معاج .. انتي مررره خققه ..
انحرجت اسيل وقالت: وانتي احلى ..
مشيت صبى وتركت الاغبياء الثلاثه وجلست جنب اسيل وقالت بحماس: اسمعي انا عندي شيء واااايد حماس .. ووااايد يينن ..
اسيل: شنو ..؟!
صبى: صاحب المطعم اللي قبال جامعتنا عرفت وين يسكن .. تخيلي انه يسكن بقصر واايد عووود ومرره قريب من هنا ..
فتحت اسيل عيونها بصدمه وهي تسمع لها ..
صبى: شرايج نروح انا وياج نشوفه .. واااااو حماس وفله ووناسسه وششيء ..
لفت اسيل راسها وهزته بإرتباك وهي تقول: لا لا .. لا مابي اشوفه مابي ..
صبى: يا خبله والله شيء حماااس .. هذا واحد من عائلة الراهي .. راح يفوتج نص عمرج اذا ما رحتي .. من زمان خاطري اشوف قصر لواحد ملياردير .. ابيج تروحين وياي ..
عواد: سلامات يا صبى .. واحنا وين رحنا ..؟!
عيد: لا يكون سحبتي علينا عشان وحده لقيطه ..
عايد: ترى احنا افضل من اللي مالهم نسب ..
طالعت صبى فيهم وقالت: مخكم تنكه فاضيه .. ماعلي في اصل البنت بس يكفي ان شكلها حلو وانه يبين انها طيبه وذكيه يالضاحكون الثلاثه ..
انصدموا من كلامها وقال عواد بسرعه: هيه هيه صبى احنا ربعج .. لا يكون سحبتي علينا ..
عايد: شنو عاجبج في ذي البنيه .. احنا افضل منها ..!
عيد: انا اختار الطويل اللي في الضاحكون ..
الكل: ؟؟؟؟؟؟؟؟؟؟؟
عواد: ياخي انجب مو وقتك .. بعدين نختار مو اللحين ..
عايد: عواد معاه حق ..
اسيل: ؟؟؟؟؟ نو كومنت !
عيد: طيب ..
عواد: اقول صبى ترى إذا تركتينا ما اخليج تزورين بيتنا ..
صبى بسرعه: لا لا انا احب اشوف بعران ابوك ..
عواد: عيل ليه تسحبين علينا ..؟!
دققت اصابعها السبابه في بعض وهي تقول بصوت منخفض: لأنه .. عشانكم خبلان وانا خبله فأبي اروح مع وحده مو خبله .. احس اني بأحس بشعور حلو .. اممممم .. كمان انا مو قصدي اسحب عليكم .. اممم بس ابي اتعرف على الطالبه اليديده واصير صديقتها ..
عايد: خلاص قبلنا عذرج بس انتبهي منها عدل ..
عواد: ايه لأنها لقيطه واكيد بتسرق من عندج فلوس ..
عيد: طبعا هذا اذا ما اخذتج رهينه عشان تدفع اهلج فلوس الفديه ..
رفعت اسيل عيونها وطالعت فيهم بححددده ..
فأنفجعوا ولفوا قدام ودفنوا وجههم بالكتب ..
صبى بتفكير: تسرق ..!! اممم حتى انتوا سراقين ترى ..
لفوا عليها بسرعه وهم حاطين اصبعهم على فمهم يقولوا: اششششش ..
طنشتهم ولفت على اسيل وقالت: ها شنو قلتي ..؟! راح نروح بعد ما تخلص الجامعه ..
هزت اسيل راسها وهي تقول: إعذريني ما اقدر ..
صبى بإحباط: لييييه ..؟!
نزلت اسيل نظرها لكتابها وماردت لأنها هي بنفسها ما عرفت ليه ..
بس هناك شعور متضارب في داخلها مرات يقول إيه ومرات لا ..
ولحد الآن ما ثبتت على اي قرار ..

================================================== ==================

في الجامعه الثانيه وعند شلة سامي ..
كان الكل موجود ما عدا دانا وسامي ..
دانا في محاضرتها ..
وسامي لسى ما جاء ..
كانوا جالسين والهدوء مسيطر عليهم ..
تفكيرهم كله في صاحبهم سامي ..
طالع عماد فيهم وقال: شباب ..
طالعوا فيه فكمل: لازم نطلع سامي منها .. يعني ما نبغاه يتذكر هالماضي ونخفف عنه .. المهم ما نغير معاملتنا اتجاهه لأنه يمكن يتأثر .. خلونا طبيعيين زي دايم .. نستهبل ونضحك ونسوي مقالب عشان يحس ان الدنيا ماشيه مهما صار ..
يزيد: عماد معاه حق .. حتى لو كان ولد حرام هو في النهايه انسان مثلنا وهالشيء ابتلاء من الله .. لازم نفهمه هالنقطه اذا شفناه متضايق ..
وصل سامي فطالعوا كلهم فيه ..
ابتسم بهدوء وقال: السلام عليكم ..
عماد: لا لا حال سامي ما يعجبني .. ويين ذاك الانسان اللي يينا مدرعم ويقول بصراخ هـــــــــآاي قـــــــــآايز ..
رفع سامي حاجبه فضحك ريان وقال: ههههه عماد يرحم والدينك اسكت .. احنا من اول نبغاه يتأدب ويسلم مثل الناس وانت تبي تخربه ..
يزيد: هههههههه شوفوا شلون صار ويه سامي ..؟! مو راضي يفهمنا ..
صالح: ما عليك من عماد .. السلام عليكم افضل من الهــآاي هذي ..
جلس سامي وقال: شفيها الشله اليوم مبسوطه ..؟!
ضربه عماد على كتفه وهو يقول: يووه سامي انا امس طوول الوقت افكر في شيء حماس نسويه ..
صالح بيأس: ماكو فايده .. اذا قال طفشان فهذا يعني انه مصر ومحد يقدر يوقفه ..
عماد: هههههه المهم وانا في عز تفكيري تذكرت دانا والاوراق .. يا شباب مو كأننا نسينا نرجع الاوراق .. لو واحد من اساتذتها فتح ملفها لأي سبب من الاسباب فراح يعرف انها مو نفس الولد اللي موجود بالاوراق .. بجذي كل تخطيطاتنا تروح في الهواء ..
ريان: ايه والله صح .. لازم نرجعها بس شلون .. ما نبغى نصلح زي اول .. لحد الآن وانا حاس بالذنب للي صار للدكتور راكان ..
سامي: صح .. والله انه ما يستاهل .. قبل يومين زرته في المستشفى وكانت حالته وايد صعبه ..
يزيد: الله يقومه بالسلامه ..
صالح: واضح ان دكتوركم ذا محبوب ..
ريان: وايد .. صحيح ملقوف بس يظل افضل دكتور قابلته ..
عماد: صح احنا ما حسبنا حساب انه ممكن يصير حريق صج .. كله كان قضاء ..
عدل صالح نضراته وقال لعماد: طيب الفكره اللي ببالج شنو ..؟! ما نبغى شيء خطير ..
عماد: مع اني اعشق الخطوره بس للأسف فكرتي ماهي خطيره .. جدا عاديه ..
صالح: كويس ..
يزيد: شنهي ..؟!
عماد: اولا لازم نعرف منو يغامر يدخل ويبدل الاوراق ..؟!
سامي: انا .. لأني عارف مكانها واقدر اخلص بسرعه ..
ضربه عماد على ظهره وهو يقول: والله انك خوش ريال ..
سامي: آآخ انت ليش دفش جذي ..
عماد: ههههههه المهم .. انا وريان بنروح للكافتيريا وان شاء الله نلقى شلة غيدا عشان نتمشكل معهم مشكله عوده واذا ما لقيناهم نتمشكل مع اي احد .. صالح انت دور طالب يروح يشتكي علينا للمدير وطالب ثاني للوكيل وطالب ثالث للمرشد عشان يتجمعون هالإداريين عندنا ..
سامي بصدمه: مينون انت ..؟! اكييد حتتعاقبوا ويمكن يخصموا من درجاتكم .. ناوي تجمع كل الإدارين عندك .. مب صاحي ..
عماد: يالدلخ احنا راح نستفز شلة غيدا وبس .. هم حيكونوا اللي بدوا فأغلب العقاب بيكون عليهم واحنا عقاب صغير .. واذا مو عاجبتكم الفكره فخلاص انا راح اشعل حريقه في المبنى ويتوتر الطلاب وبعدين كل الاداريين يطلعوا من مبنى الاداره و ....
صالح: بس بس خلاص موافقين ..
ابتسم عماد بعدها قال: واللحين دور يزيد هو مساعدة سامي .. لازم تشغل امين المخزن .. روح عنده بغرفته وطقها سوالف معاه لين يدق عليك سامي ويقولك انا خلصت ..
يزيد: هالدور يناسبك لأنك تعرف تشغل الواحد بسهوله ومن دون لا يشك فيك ..
صالح: فعلا .. انت اجتماعي بقوه ..
حك عماد شعره وهو يقول: امممم بس هالدور ما فيه تشويق .. ابي اتضارب واتعاقب وجذي يعني ..
تنهدت الشله وقالوا: ماكو فايده ..
عماد: هههههه المهم اللحين معك يا سامي اوراق دانا ..
سامي: ايوه .. من اول وهي في داخل الكتاب .. وكمان مفاتيح المخزن والدواليب اللي داخله ..
عماد: كويسس .. عيل خلونا نبدأ في الخطه قبل لا تطلع دانا من محاضرتها لأنها اكيد ما راح تسمح لنا ..
يزيد: معاك حق ..
ريان: بخصوص دانا ما تلاحضون عليها شيء غريب ..؟!
طالعوا فيه فتره وقال عماد: بصراحه انا ملاحظ بس ما سألتها .. احسها صارت هاديه وبقوه وكلامها مره قليل ..
يزيد: وغير جذي اكلها قليل وبعض الاحيان ما تاكل ..
صالح: ودايم سرحان وويهها صار شاحب ..
ريان: اما انا فلاحضت ان عيونها صارت صفرا .. تتوقعون شنو فيها ..؟!
هزوا كتوفهم بـ مآ ادري ..
اما سامي فيطالع فيهم بإستغراب ..
ما قد لاحض شيء عليها .. يمكن عشانه بس يفكر في اشياء ثانيه ..
عماد: اذا قدرنا اليوم او باجر نسألها .. هي بطبعها كتومه .. ههههه تتذكروا اول لما كانت خجوله ..
يزيد: هههه ياخي مو وقتك ..
عماد: ههههههههه تذكرت اول لقاء بيني وبينها .. يلست ينبها فبعدت عني .. كانت ابدا ما تقرب من احد وخوافه بقوه ههههههه ..
سامي: ههههههههههههه تذكرت حكاية الصابون ولما ضربتها على ضهرها .. مسجينه طاحت وتكسرت ..
عماد: ههههههههههه كله كوووم وحكاية المصيده كوم ثاني ههههه ..
سامي: هههههههههه ولما تهرب منا وما تبي تكون معنا .. هههه بصراحه من حقها هههههه ..
ريان: ههههههههه يا شباب خلاص خلونا نروح قبل لا تطلع من محاضرتها ويخرب كل شيء ..
عماد: صح صح ياللا امش يا ريان ..
تنهد ريان وقال: شرايك نتبادل انا ويزيد .. مالي خلق اتهاوش واتعاقب واتقروش ..
عماد: اقول امش يالكسول .. مستحيل تتغير ..
فقام ريان معاه وراحوا للكافتيريا وصالح معهم عشان يطلب من بعض الطلاب يروحوا يخبروا الاداريين ..
اما سامي فأخذ الاوراق والمفاتيح وراح هو ويزيد جهة مبنى الإداره ..

دخل عماد وريان للكافتيريا اللي كانت مليانه كالعاده ..
ابتسم عماد وقال: اهو ذيج الشله يالسه هناك ..
ريان: عيل خلنا نيلس في الطاوله اللي ينبهم .. كويس انها فاضيه ..
جوا ومشيوا من قدام شلة غيدا وبعدها جلسوا عالطاوله اللي جنبهم ..
لف عماد ولما شافهم قال بإستهزاء: اوووه ريان ينبنا شلة بنـــــااات .. خلنا نرقمهم ..
ريان غصب عنه ضحك: هههههههههههههههههههههههههههه ..
عصبت خلود من كلامهم وقالت: جـــــــــب انـــــــــت ويـــــــــاه ..
انتبهوا الطلاب لصراخ خلود فهدأوا يراقبون ..
عماد: اوووه عصبت هالبنــــــت .. خلاص بأخليها لك يا ريان مابي ارقمها ..
ريان: يرحم والدينك ما ابيها ..
الكافتيريا كلهم فقعوا ضحك على كلامهم ..
غدير: اللي تسونه اسمه قمممه في الدئانه فاهمين ..؟!
ريان: دئانه ههههههههههه ..
عماد: دئانه هههههههههههههههه ..
ريان: ههههههه رفض قوقل يترجمها ههههه ..
غدير بعصبيه: اقصد دنائه ..!! وبلاش خفة دم مرة ثانيه ..
غيدا: خلاص يا غدير لا تنزلي مستواج لهم ..
ريان: اصص سكوت .. تكلمت العاقله ههههه ..
عماد: هههههه خلاص يا ريان انا قررت اشبك صاحبة الشعر الاحمر .. دخلت مزاجي ..
ريان: لا لا انقلع انا عيني عليها .. وكمان انت تبي تشبكها اما انا فقاصد خير .. ابي اتزوجها ونييب تؤام بنوتات ..
تنرفزت خلود وقامت من مكانها وضربت طاولتهم بقوه ..
عماد بصدمه: فولاذ مب إيد ..
خلود بعصبيه: شنو هاي المصخره اللي تتكلموا عنها ..؟! شنو يعني اتزوجها واشبكها ..؟! احنـــــــــا بويـــــــــات .. عارف شنو يعني بويات ..؟!
عماد: ايه اعرف ..
اشر عالجدران وقال: ذي ..
فقعوا الكافتيريا ضحك فقالت خلود بعصبيه: برافو يالضريف .. مرره ضحكتني يالكوميدي .. جـــــــــب وانجـــــــــب احسن لك ولا تسوي فيها انك الـ...
قاطعها ريان يقول ببرود: اللحين انتي شدخلج ..؟! انا كلمت غيدا مو انتي ..
خـــــــــلاص انفجرت بطون الطلاب من كثر الضحك فقال واحد منهم: ههههه في نص الجبهه يا خلود هههههههه ..
وحده من الطالبات: ههههه طاحت هيبتها طاحت هههههههههههه ..
قامت غيدا لأنه ما اعجبتها حكاية انهم يستهزأوا بصاحبتها فقالت: عماد وريان .. ممكن تطلعوا برى يالظريفين .. مو قادره اتنفس وانتم هني ..
ريان: ههههههههههههههههههه ..
عماد: ههههه يا شباب احد عنده اكسجين يسلفها هههههه ..
غدير بعصبيه: ناس سسافله ..
اخذت غيدا كوب البيبسي حقها وطشته في وجههم وهي تقول: سدوا حلجكم لا اسسده لكم ..
غدير: ههههههه اشكالهم كــــــآآي ..
تهاني: هههههههههههه احسن يستاهلوا ..
طالع ريان في عماد وقال: البيبسي حار ..
عماد: توني ادري ان البنــــــات يشربونه حار ..
ضحك الطلاب عليهم فعصبت خلود وشمرت كمها وهي تقول: انتم واضح انكم يايين للمضاربه فقوموا عشان نعلمكم مين احنا ..
قام ريان وقال: اوكي بس لعلمكم انتوا الباديين ..
استغل صالح الفرصه وبدأ يكلم طلاب يعرفهم وقالهم روحوا بلغوا ..
صحيح استغربوا لأنه يبغى يبلغ على اصحابه بس هو قالهم انها خطه فوافقوا انهم يتعاونوا معهم وهم حددهم مستانسين ان شلتهم المشهوره تطلب منهم مساعده ..
وكل واحد منهم راح عند شخص وبلغه بالمضاربه اللي تصير في الكافتيريا ..
المدير ترك اعماله وراح ..
الوكيل لما عرف عصب لأنه يكره المشاكل ..
المرشد تنهد وراح يحل المشكله ..
لف سامي على يزيد وقال: خرجوا ..
يزيد: كويس .. واللحين انا بروح لأمين المخزن اطقها سوالف معاه وانت روح للمخزن ..
سامي: اوكي ..
ودخلوا لداخل ..
راح سامي للمخزن ويزيد دخل غرفة الامين المقابله للمخزن ..
وبسرعه عقد صداقه معاه لأن الامين كبير شوي بالسن وطيب ..
لف سامي حواليه وبعدها طلع المفتاح وفتح الباب ودخل ..
قفل الباب وراه وقال: سبحان الله التوتر هالمره اخف من المره اللي راحت ..
تنهد وقال: ان شاء الله اخلص بسرعه وبسلام ..
طلع مفاتيح الدولاب واتجه لها ..
سامي: كويس ان الترتيب هو نفسه ما تغير ..
بدأ يفتح الدولاب وهو يفكر في المره اللي راحت ..
هو متأكد انه لما طلع كان حسان مغمى عليه وعالارض قطرات دم ..
شلون اختفى كل هذا بسرعه .. ومين اللي صلح كذا ..
تذكر طارق اللي ساعده ..
يكره هالانسان وما يدري ليه .. يمكن عشانه كان يكلمه بعجرفه ..
هو الوحيد اللي يعرف .. اذا ممكن يكون هو ..
طيب ليييش يصلح كذا ..؟!
وده يعرف ايش السبب ..
تنهد وطلع ملف دانا وطلع اوراقها ..
لما شاف شكل إياد كشر وهو يقول: ابن اللذين .. اكرهه ..
عقد حواجبه وقال: من زمان ما شفته ..
حط اوراق دانا الصحيحه في الملف ..
وقتهــــــا سمع باب المخرن ينفتح ..!
لف بسرعه وهو يتمنى انه يكون يزيد هو اللي فتح ..
علق لسانه في حلقه من الصدمه وهو يشوف الدكتور يطالع فيه بـ صددمـــــةة ..
بلع ريقه وقال بخوف: الد كتـ ـور تر كـ ـي ..
طالع الدكتور تركي فيه بصدمه وفي المفاتيح اللي معاه وفي الاوراق وفي الملف ..!!
لا يمكـــــــــن ..؟!!
هز راسه بلا وقال: شنو هذا يا سامي ..؟!
كمل بعصبيه: شنو قاعد تساوي بالضبط ومن فين لك هالمفاتيح وليييش ..؟!
زادت نبضات قلب سامي وما قدر يرد عليه ..
عند يزيد فكان جالس ينتظر اتصال من سامي وحاس بتوتر فضيييع ..
قام امين المخزن فقال يزيد: وين رايح يا عم ..؟!
ضحك الامين وقال: للحمام وراجع لك ..
يزيد بإحراج: آه خذ راحتك ..
فدخل الامين للحمام فأستغل يزيد الفرصه وطلع يطمئن على سامي ..
لما خرج من الغرفه شاف الدكتور تركي في وجهه عند باب المخزن ..
لف الدكتور تركي وقال: وانت اكيد معاه صح ..؟!
لف يزيد نظره لسامي بعدها للدكتور وهو مو مستوعب غير شيء واحد ..
هو انهم طاحوا بورطه وما راح يطلعوا منها ..
طالع فيهم الدكتور وهم لحد الآن مو مصدق ..
يعرف ان هالشله مشكلجيه بس مو لهدرجه ..
اشر قدامه وقال: امشوا جدامي عالمكتب وانت يا سامي ييب كل الاوراق والمفاتيح اللي معك ..
طالعوا في بعض بعدها توجهوا مع الدكتور للمكتب ..
فعلا طاحوا ومحد سمى عليهم ..
وش مصيرهم ..؟!
وإيش هو مصير ريان وعماد وشلة غيدا ..؟!
وإيش هي ردت فعل دانا ..؟!

✖ إنتهــــــــــــــــــــــــــــى ✖

لهنا نوصل لنهاية اخر جزء من البارت السادس عششر ..
نلتقي على خييير في البارت السابع عششر الجزء الاول ..

قراءه ممتعه ان شاء الله .. طولت البارت لعيونكم ونزلته بدري كمان لعيونكم وكل اللي ابيه منكم هي ردودكم اللي تشجعني وتحفزني وتمتعني ..

تحيــــــــــــــــــــــــاتــــــــــي ..

*صصـوصتككـــــم*

|$[ نهاية البارت ]$|