شبكة همس الشوق - عرض مشاركة واحدة

16 - 3 - 2014, 04:53 PM

ريان: اتمنى انه مع الوقت يقل اصراره ويراعي شعور دانا ..
يزيد: بس كلمة تحلمون ذي احبطتني كثيير ..
صالح: ياللا ان شاء الله باجر إياد يقدر يغير مزاج الدكتور تركي ..
ريان: طيب شمعنى يبغي إياد لوحده .. لو انا بمجانه جان طلبت إياد ونفيع حقكم ذا ..؟! وش هالاسم الغريب .؟!
يزيد: إسأل سامي ..
سامي: مع التوتر كنت ابي اطلع اسم قريب من عادل فطلع معاي ذا .. وكمان اكيد طلب إياد لوحده لاني طلبت منه انه لا يدخل عادل بالسالفه وجذي يعني ..
طالع عماد فيهم وقال: حياتكم تحت إيد الدكتور تركي ..
تنهد سامي وقال: ان شاء الله ما يصير شيء ..

⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊ ⁄⁄◊⁄⁄ ◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄ ◊⁄⁄◊⁄ ⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊

الساعه 1 ونص الظهر وبجامعة اسيل ..
خرجت الدكتوره من الكلاس بعد ما خلصت محاضرتها ومن بعدها خرجوا الطلاب وهمهم الوحيد هو البيت وبس ..
وقفت اسيل وبدأت ترتب شنطتها والكتب ..
ابتسمت صبى وقالت: ها اسيل فكرتي ..؟!
اسيل بهدوء: ما ابغى .. شوفي وحده غيري تروح ..
صبى بإحباط: ليييش يا اسيل ..؟! انا ابغى اروح معاج ..
تنهدت اسيل بعدها ابتسمت لها وقالت: حتى انا يا حبيبتي بس لهذاك البيت مستحيل ..
صبى: لا مو بيت .. بنروح القصر الفخم ..
اسيل ببرود: بيت او قصر .. كلها في نظري مجرد قذاره ..
لفوا الشباب الثلاثه وطالعوا فيها بـ ؟
صبى: طيب بس لفه صغيره ونرجع ..
اسيل: اعذريني ..
صبى: طيب نص لفه ..
شالت اسيل شنطتها بعد مالمت كتبها وقالت: اسفه حبيبتي انا ما ابغى ..
صبى بحزن: خساره ..
عواد بإبتسامه: وليش رافضه هالرفض كله ..؟!
عايد: واضح ان السالفه فيها إنّ ..
عيد: اعترفي اعترفي ..
لفت اسيل وطالعت فيهم وقالت: ماكو شيء .. بس انا جذي ما ابي ..
عواد: العبيها على غيري يا حبيبتي .. انا ما ينلعب علي ..
عايد: شنو تقصدين لما قلتي ان ذاك القصر في نظرج هو قذر ..؟!
عيد: السؤال الاصح شنو علاقتج بصاحب المطعم ..؟!
لفت وجهها للجهه الثانيه وقالت: مافي اي علاقه بيننا ..
عواد: يا بنت جم مره اقولج لا تلعبي علي ..
عايد: اذا كنتي صاجه فليش ترفضين انج تروحين ..؟! رفضج كان قوي ..
عيد: وكأن ورى رفضج سبب ..
اسيل: جم مره اقولكم ماكو سبب .. بس انا حييل تعبانه وابي اروح البيت بسرعه وبس ..
عواد: انا متأكد مليوون بالميه انه فيه سبب .. بس انتي تقولي انه مافي .. عيل اكّدي لنا انه مافي ..
عايد: بمعنى امشي معنا لعند قصر صاحب المطعم عشان نتأكد انه صج ماكو بينكم علاقه ..
طالعت اسيل فيهم لفتره بعدها قالت: انا مب مجبوره انفذ كلامكم .. اذا ما تبون تصدقوني فهذا الشيء راجع لكم ..
عيد: عيل ما راح تيين ويانا ..؟!
عواد: فذي الحاله راح نروح احنا وصبى لهناك .. وراح نقابل رئيس المطعم ..
عايد: وراح نسأله ان كنت تعرف وحده لقيطه عمرها تسع تعش اسمها اسيل وهي نفسها اللي بجت جدامك قبل فتره ..
عيد: المهم هذا اللي احنا راح نسويه بس عشان نتأكد انه فعلا ماكو علاقه ونرتاح ..
طالعت اسيل فيهم وفي ابتسامتهم الواثقه لفتره طويله ..
بعدها قالت: صلحوا اللي تبغوه .. انا ما يهمني ..
لفت وطلعت ..
عايد بقهر: اووووف ما وافقت ..
عواد: عمى .. شلون راح نتأكد انه فيه علاقه .. مستحيل نقدر نقابل صاحب المطعم ويه لويه ..
عيد: خلاص شباب يمكن فعلا ما يكون فيه علاقه .. صبى ما عليج من هاللقيطه .. احنا بنروح معاج ..
شالت صبى شنطتها وقالت: انا ما بروح مع اغبياء .. بروح بس مع اسيل ..
وطلعت برى الكلاس وسط دهشة شلتها القديمه ..
عواد: سمعتم اللي سمعته ..؟!
عيد: انا سمعت ..
عايد: حتى انا سمعت .. رفيجتنا تخلت عنا ..
عواد: باعتنا بالكامل ..
عيد: نسيت الايام الحلوه والمره اللي كنا نعيشها ..
عايد: مسحتنا من قائمتها ..
عواد: وكله عششان ....
عيد: اسيل ..
ظلوا واقفين هالاغبياء الثلاثه مصدووومين من اللي صار ..
شوي لف عواد عليهم وقال: لا احنا ما راح نسكت .. لازم ندافع عن تماسك وترابط شلتنا الاربعه ..
عايد بحماس: فعلا .. لازم نستعيد صبى لشلتنا ..
عيد بنفس حماسهم: ونُبعد اسيل تماما ..
ضربوا ايدهم ببعض بحماس وانطلقوا عشان يلموا شمل شلتهم الموقره ..

في الخارج كانت اسيل متجهه لبوابة الجامعه ..
جت من وراها صبى وقالت: هيه هيه اسيل ..
لفت اسيل عليها وقالت: اهلييين صبى ..
مشيت صبى معاها وقالت: اسيل ما راح تغيرين راييج ..؟!
اسيل: اعذريني صدقيني ما اقدر ..
صبى: طيب بس عشاني ..
اسيل بهدوء: اسفه ..
طالعت صبى فيها بإحباط وقالت بهمس: كنت اتمنى اني اروح لقصره واشوفه .. والله ودي اشوفه ..
طالعت اسيل فيها فتره بعدها قالت: طيب روحي مع الاغبياء الثلاثه اصحابج ..
صبى: مابي .. اذا رحت ما راح يخلوني اسوي اللي ابغاه .. راح يمشوا بكيفهم ويقولوا لي تعالي ورانا .. ابغى ألف براحتي بدون لا احد يمنعني ..
طالعت في اسيل وكملت: كان نفسي اروح وياج لانج وايد طيبه .. ياليت كل الناس لقطاء وطيبين مثلج ..
ابتسمت اسيل بهدوء وفي نفس الوقت حزنت على حال صبى وبدون إدراك قالت لصبى: حاضر حبيبتي .. باجر راح اروح معاج .. شرايج ..؟!
فتحت صبى عيونها بدهشه وقالت: صـــج ..؟!!!
اسيل: ايه صج ..
حضنتها صبى وقالت: واااااي انتي واااايد طيييبه ..
طالعوا الشله الثلاثه فيها وهي تحضن اسيل وفرحانه ..
عواد: الامر تضاعف وصار اسوء ..
عايد: شكل مهمتنا مستحيله ..
عيد: واضح انها خلاص حبت هالبنت وتركتنا للابد ..
عواد بصدمه: للابد ..!!! لا يمكن اننا نرضى بهذا ابدا ..
عايد: فعلا .. فعلا ..
صبى: باااااااااااي اسسوله ..
اسيل: بااي حبيبتي ..
وكل وحده فيهم راحت في طريق ..
اسيل اتجهت لشقتها مشي لان الطريق قريب ..
طلعت جوالها وبدأت تدقدق فيه .. فشافت اشعار رساله فتذكرت انها سمعت صوت المسج وهي في وسط المحاضره ..
فتحته وطلعت من المجهول ..
وقبل لا تقرأ الرساله تذكرت شيء .. امس .. امس جتها رساله منه في الفجر ..
لحضه هي متأكده انها ارسلت له .. طيب وش ارسلت بالضبط ..
وليشش ردت عليه اصلا ..؟!!
قفلت الرساله وفتحت قسم الرسائل المرسله ..
لما فتحت الرساله اللي ارسلتا انصدمت !!!
ليش .. كيف .. شلون ارسلت هالرساله شلون ..؟!!!
حست بإحراج شديييد .. شخص ما تعرفه ارسلت له رساله تبين فيها انها ضعيفه ..
لا لحضه هو يعرفها لانه قال اسيل ..
اذا مين يكون ..؟!
مستحيل صاحباتها ومستحيل يكون ريما او فارس لانها تعرف اسلوبهم في الكتابه ..
اذا مين ..؟!
وائل عندها رقمه .. فيصل عندها رقمه .. عمها عندها رقمه ..
مين بقي ..؟!
دخلت عمارتها وهي لساتها مصدومه من نفسها انها ارسلت رساله زي كذا لواحد يعرفها ومو قادره تعرف مين هو ..
طلعت المصعد واتجهت للدور السادس وخرجت واتجهت لشقتها وهي ما تزال عيونها على شاشة جوالها ..
وفي الشقه اللي جنب شقتها طلع شاب منها ولما لف صقعت اسيل فيه فطاحت مفاتيحه وكتبه بالارض ..
رفعت راسها وهي تقول بسرعه: معليش ما كنت اقصد ..
انحنى هالشاب واخذ مفتاحه ولم كتبه وطالع فيها بهدوء وهو يقول: عادي ما صار شيء ..
فغرت اسيل شوي في وسامته بعدها حست على نفسها وقالت: فعلا انا اسفه ..
بعدها اتجهت لشقتها ودخلت وهو يراقبها بعيونه ..
ظل حول دقيقتين واقف في مكانه ويطالع في شقتها بعدها نزل من الدرج وراح لسيارته ..
هالمره تأخر ربع ساعه عن المعهد اللي يدرس فيها ..
قفل باب السياره وقال: لازم اشتري لي ساعة منبه يديده ..
شغل السياره ورفع نظره يطالع في الدور السادس شوي بعدها راح لمعهده ..

** باسل الـ****** .. عمره 22 سنه ويدرس قانون في معهد قريب من العماره اللي يسكنها .. هادي تقريبا وكلامه شوي قليل .. وفيه اشياء ثانيه حنعرفها بعدين عن هالشخصيه اللي راح تلعب دور كبير في تغير الاحداث **

⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊ ⁄⁄◊⁄⁄ ◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄ ◊⁄⁄◊⁄ ⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊

هذا اليوم الرابع تقريبا وهي جالسه لوحدها بين اربع جدران وعلى احححر من اعصابها ..
شلون هذا يصير شلووووون ..؟!
هي عارفه ومتأكده انه يموووت فيها اذا ليش تغير كذا وتزوج عليها ..؟!
معقوله معاملتها الجافه خلته يسوي كذا ..؟!!
بس هي ما تحبه فكييف يبغاها تعامله عدل ..
لحضه لا يكون السبب لانها مو بنت ..
ابتسمت بإستهزاء وقالت: يعني فعلا سويتها وتزوجت يا ويه العنز .. اصلا مسوي انك تقهرني .. مع نفسك انت وياها .. يبغالكم بس حضيرة غنم يالغنم .. بجد اغبياء ..
حطت رجل على رجل وقالت: ما راح اضايق نفسي كلش .. هو الخسران لانه طالع في وحده ابدا ماهيب من مستواي .. انا جمال وجسم وعقل وهي ماكو فيها ولا شيء يجذب ..
طالعت حواليها بسرحان بعدها قالت بهدوء: بس مهما كان انا ريــمــا الــرمــلــي .. شلون بتكون سمعتي اذا احد عرف ان زوجي المصون تزوج علي .. مستحيل ارضى بهالوضع .. انا لازم اتطلق وارتاح واريح كمان ..
فجاء في بالها كلمات منصور عن اخوها فارس ..
قالها اذا تبغين تتطلقين فقولي لاخوك ..
بس كيف راح تقدر تواجه فارس وهو يستحقرها وكارهها تماما ..
ضغطت اصابعها في بعض وهي تقول: والله آسفه يا اخوي .. مدري ليش زعلك اثر فيني وايد .. والله اثر فيني وايد ..
طالعت في ايدها فتره بعدها قالت: بس الوضع اللي انا فيه مو راضيه عنه .. ابدا مو راضيه فيه ..
انفتح باب البيت ودخل منصور وهو شايل الشنطه الكبيره ويقول: هههههههه فعلا ..
دخلت من بعده زوجته نوف وقفلت الباب وراها ..
رفعت ريما حواجبها وقالت: عصافير الحب رجعوا اخيرا .. آآآعع اي عصافير .. انتم في جهه والعصافير بجهه .. المفروض اقول دياي الحب رجعوا ..
طالع منصور فيها بعدها قالت بإبتسامه: كيفج ريما ..؟! ان شاء الله تمام ..
طالعت فيه نوف وهي رافعه حاجبها وتقول في نفسها: "خييير يسألها عن حالها وانا لساتني في بداية شهر العسل يستهبل ولا يبي يغيضني" ..
ريما: كيف حالي ..؟!!! لا والله فيك الخيير تعرف تسأل وتستفسر عني .. كثر الله خيرك ..
منصور: معليش ما اتصلت عليج الفتره اللي راحت .....
قاطعته ريما: لا لا لاتعتذر ولا شيء .. من حقك تنبسط مع العنز اللي وراك ..
طالعت في نوف: ها عساج انبسطتي في الجم لفه اللي لفها لج منصر في قطر هههههه اللهم لا شماته ..
ابتسمت نوف وقالت: لا يا قلبي .. احنا اخذنا جم لفه في المكسيك .. مب في قطر ..
ابتسمت ريما وهي تطالع في منصور وقالت: لا خووش والله .. مو انت قايل ان شهر عسلها بيكون قصير عشان دراستك .. اشوفك سافرت لامريكا ..
نوف: هو قال قصير بس ما قال ان بيلف فيني هني بقطر ..
ريما: اللحين انتي شدخلج .. انا احاجي منصوروه مو انتي ..
فتحت نوف فمها بتتكلم بس قاطعها منصور يقول: خلاص كان سوء فهم وما يحتاج الى هالتجادل ..
طالع منصور في ريما وقال: اسمي منصور ..
ريما: اها .. شكرا عالتوضيح ..
شال منصور الشنطه وطلع فوق لغرفته هو ونوف ..
طالعت نوف في ريما وقالت: بصراحه مدري ليش انتي جذي عدوانيه .. فعلا ما ألوم منصور يوم فكر يتزوج عليج ..
ريما: بس بس سكتي واللي يعافيج .. صوتج ييب لي المغص ..
وبعدها طلعت ريما لغرفتها ونوف واقفه مكانها ..
نوف بتأفف: قالوا عنها انها مليقه بس مو لهدرجه ..
طلعت فوق ودخلت الغرفه وشافت منصور بإيده منشفه ومتجه للحمام ..
نوف: اجهز لك ملابس يا حبيبي ولا جهزت لنفسك ..؟!
منصور بإبتسامه: تسلمين .. لا لا حألبس البجامه اللي معلقه ورى الباب ..
ابتسمت له نوف وبعدها دخل ياخذ له دش ..
جلست عالسرير بقهر وقالت: ليش دراسته جذي .. كله بسبب ريموه خلته يغيب فتره طويله عن الجامعه لحد ما ياه انذار الحرمان ..
نزلت لتحت تنادي وحده من الخدامات تساعدها في ترتيب شنطتها بالدواليب ..

اما ريما فكانت جالسه في غرفتها وحاضنه مخدتها بقوووه ..
اذا يبي يتزوج هو حر .. بس لازم يطلقها بالاول .. شلون بيكون برستيجها قدام الناس ..
ماهي راضيه ومستحيل ترضى ..
لازم تحط حد لهذا الامر .. لازم ..
قامت من فوق السرير وراحت لغرفة منصور ونوف ..
فتحت الباب فشافته توه طالع من الحمام ولاف المنشفه على خصره ..
اول ما شافته بهالمنظر صرخت وهي تقول: يا غبــــــي ليـــــش ..
ولفت وجهها على طول وهو مستغرب منها ..
اتجه للباب واخذ بجامته ولبسها وهو يقول: ما تعلمتي شلون تدقي الباب قبل لا تدخلين على احد ..؟!
ريما وهي مغمضه عيونها: ابي اتحجى معاك بسسرعه ..
جلس منصور عالسرير وقال: طيب تحجي ..
لفت ريما عليه بعدها قالت: طلقني ..
منصور: على طول بدون مقدمات ..!!
ريما: انا ما عندي لف ودوران .. طلقني اليوم قبل باجر ..

طلعت نوف الدرج ووراها وحده من الشغالات ..
استغربت ان باب غرفتها مفتوح مع انها قفلته لما نزلت ..
لما قربت سمعت صوت ريما ومنصور ..
هزت راسها باسف وقالت: التصنت عيب ..
وبعدها قربت عشان تسمع ايش يدور بينهم ..
مهما كان ففضول وغيرة المرأه ما تعترف بالعيب ..
طالع منصور في ريما فتره بعدها قال بهدوء: ريما .. خلينا نتكلم بجد شوي ..
تكتفت ريما وقالت: قول واخلص ..
تنهد منصور بعدها قال بهدوء: بصراحه انتـ ........
وبعدها سكت وهو يتأملها ..
ريما: شفيك سكت يا حضي ..؟!
لف وجهه وقال بصوته العادي: طلاق ماني مطلق الا اذا طلب مني اخوج فارس .. قولي له ابي اتطلق ..
ريما بعصبيه: انت شنو بالضبط ..؟! انت عارف ان علاقتي باخوي مو كويسه فليش تطلب هالطلب .. طلقني ياخي .. اتفاقنا كان عن شهر والشهر خلص من زمااان .. طلقني ما ابيك ولا طايقه اعيش في هالحضيره ذي ..
منصور: معليش اخوج قالي لا تطلقها فاعذريني ..
طالع فيها شوي بعدها كمل: ريما اتمنى انج .........
وللمره الثانيه تردد وسكت ..
طالعت ريما فيه وهي حاسه بقهر في قلبها ..
خلاااص حددددها مخنووقه وتبي تفتك من هالعيشه وترجع مثل اول ..
خرجت واتجهت لغرفتها بسرعه لدرجة انها ما انتبهت لنوف ..
دخلت نوف للغرفه وقالت: ايش بغيت تقولها وبعدين بطلت ..؟!
منصور بهدوء: بغيت اقولها انـ....
شوي استوعب وطالع في نوف وهو رافع حاجبه ..
انحرجت وقالت: شسمه اصلا انا سمعتكم بالغلط و .. امممم يا ميري تعالي رتبي الجنطه وياي ..
دخلت ميري وبدأت ترتب الشنطه مع نوف في الجهه الخاصه بدواليب الملابس ..
انسدح منصور عالسرير عشان ينام ويرتاح ..
بس للاسف مالقى طريق للراحه بسبب التفكير اللي بيفجر مخه ..

⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊ ⁄⁄◊⁄⁄ ◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄ ◊⁄⁄◊⁄ ⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊

المغرب وفي شقة طارق وانس ..
دخل طارق للشقه وقفل الباب بعده ورمى نفسه على اقرب كنبه ..
حددده تعبااان وهلكاان ..
طالع انس فيه وقال: ها حصلتم شيء ..؟!
هز طارق راسه بلا بعدها ابتسم وهو يقول: قربنا نخلص شوارع الدوحه ومع هذا ما حصلنا المجان اللي تشتغل فيه شهد ..
انس بنص عين: الدوحه كبيره يا طارق ..
طارق: ههههههه خلاص ما قربنا نخلصها .. قربنا بس من النص ..
بعدها تنهد وكمل: ياخي مافيني انكت ..
انس: ههههههههههههه اهمم شيء .. طيب ليه ما تسأل اثير بنفسك .. يمكن تعرف اكثر من شادي ووسيم ..
طارق: البنت لحد الان تنحرج مني .. سألتها اول فقالت ما اتذكر وشادي يقول ان المجان اللي تشتغل فيه شهد قصر وصاحبه غني ..
انس: طيب ما سألتهم شنو اسم صاحب القصر ..؟!
طارق: الدب المتغطرس ..
انس: ههههههه ياخي انا جاد ..
طارق: هههه مدري من يوم عرفتهم وهم يتكلموا عنه بهاللقب .. ما اتوقع ان عنده اسم ..
انس: هههههه بس تصدق .. الاسم حدده عجيييب .. مدري من فين يطلعون هالالقاب ..
طارق: خيالهم واسع ..
بعد جملة طارق هذي هدأ الجو بينهم شوي بعدها قال انس: طارق .. راح تحضر حفلة شفاء عهد ولا لا ..
طارق: ما كنت راح اروح بس بسام قالي تعال لان الحفله بالفندق اللي هو مستأجر فيه .. يقول بعرفك على ولد جيراننا واتحداك تضبط اعصابك جدامه ..
انس: شيقصد ..؟!
هز طارق كتفه بـ مآ ادري ..
وبعدها دق جواله فطلعه من جيبه ولما شاف ان اخته المتصله تنهد ورد وهو يقول: نعم يا كتلة الازعاج .. شنو تبين ..؟!
سهام: مافي السلام عليكم ..؟!
طارق: لا مافي ..
سهام: انت حر ما تبي حسنات .. المهم متى تيي .. ومتى توديني عند صديقتي الصدوقه .. ومتى ان شاء تفضي عمرك عشاني .. ومتى حاسافر معك ..؟!
طارق: فعلا كتلة ازعاج .. اسئلتج كلها لها معنى واحد فياليت لو انج اختصرتي ..
سهام: لا تضيع الموضوع وياوب ..
طارق: قلت لج لما افضى وانا لحد الان ما فضيت ..
سهام: ومتى راح تفضى يا بعدي ..؟!
طارق: مدري .. بعدين ..
سهام: مدري ليش بس احسك تضحك على عقلي وتسكتني بجم كلمه ..
طارق: ههههههههههههههههه سهام بجد صدقيني مستحيل افضى .. انا صاير يوميا الف الشوارع مع اخوها عشان القى المجان اللي تشتغل فيه .. انتظري لما القاها وبعدين اوديج عند رفيجتج .. مين اهم رفيجتج ولا اولاد عمج عمر ..؟!
سهام: طبعا اولاد عمي بس انا حيييييل متحمسسه احكي لصديقتي عنهم .. طروقي بليييز انا بصراحه متضايقه وحاسه ان رفيجتي بمشكله مع اللي ما يتسمى .. ولحد الان موبايلها مغلق وما ترد ..
تنهد طارق وقال: ان شاء الله احاول افضي نفسي ..
سهام بعصبيه: طــــــــــــــــــــآآرق انت كل مره تقول هالجمله وتسحب علي .. ابيك توعدني .. فاهم شنو يعني توعدني ..؟! لا لا ابيك تحدد لي موعد عشان احس ان انتظاري وراه فايده ..
ابتسم طارق وقال: صج انج نشبه وابتليت فيها .. خلاص بعد باجر راح ايي اخذج ..
سهام بعدم تصديق: صج يا طارق ..؟!!
طارق: ايوه صج ..
سهام بحماس: يسسس وناااسسه .. ياللا بااي وانتظرك بعد باجر ..
وبعدها قفلت الجوال في وجهه ..
طالع طارق في جواله وقال: قفلت في ويهي ..!! حتى كلمة شكرا ما قالتها ..!
انس: ههههههههههههههه ما ودي اتشمتت ..
طارق: لا يا شيخ ..
دق باب الشقه في هاللحضه بهدووووء ..
طالع انس في الباب وقال: مين المؤدب اللي يدق جذي .. شكله ما يبي يزعجنا ..
قام طارق وقال: ان شاء الله ما يكون احد من طرف صاحب العماره لاني مو رايق لهم ..
لف على انس وقال: جم باجي يوم على نهاية الشهر ..؟!
انس: اقل من اسبوع .. وشكلنا فعلا حننطرد من هني ..
طارق بقهر: سالم الاهبل ..
فتح باب الشقه فشاف قدامه وسيم يطالع فيه وعيونه مليانه دمووع ..
جلس طارق قدامه وقال: شفيك حبيبي تبجي ..؟!
شهق وسيم وقال: بأقولك بس لا تعلم اثير ..
استغرب طارق وقال: اوكي حبيبي ما راح اعلمها ..
شد وسيم ايده على بطنه وقال: بطني مررره يوجعني وابغى اروح المستشفى بس اثير تقول مو لازم تروح وتقول خذ فيفادول وتصير بخير ..
نزلت دموع وسيم وقال بصوت مرتجف وبطفوله: اخذت كثيير بس بطني ما صار بخيير .. مرره يوجعني يا طارق ..
حط طارق ايده على راس وسيم وقال: يا عمري ليش ما ييتني من اول وحتى لو اختك رفضت .. انا جم مره اقولكم اذا محتايين شيء لا تترددوا .. ياللا يا بطل روح البس جزمتك وانزل السياره عشان اوديك للمستشفى ..
وسيم: حااضر ..
وراح للبيت بسرعه عشان يصلح اللي قاله طارق ..
دخل طارق الشقه واخذ المفاتيح وقال: حاودي وسيم للمستشفى يشتكي من بطنه ..
انس: دلع اطفال .. لو ياخذ مسكن يصير بخير ..
هز طارق راسه بأسف وطلع برى ..
كمل انس تقليب في قنوات التلفزيون وطرى على باله الدكتور راكان ..
اخر مره زاره قبل امس وكانت حالته على نفس ماهي ولا فيه اي تحسنات ..
حاول يتناسى الامر واشغل نفسه بمتابعة فيلم وثائقي ..

دخل طارق المستشفى مع وسيم وراحوا لطبيب الاطفال عشان يكشف عليه ..
ووسيم طول الوقت وهو يتألم من بطنه وطارق يحاول يهديه بس مافي فايده ..
عمل له الطبيب فحوصات عاديه بعدها قال: لازم نعمل اشعه مقطعيه عشان نتأكد اكثر ..
طارق: ليش شنو فيه ..؟!
ما رد عليه الطبيب وخرج مع وسيم لبرى ..
جلس طارق في مكانه ينتظرهم يجون ..
كلها كم دقيقه بعدها دخل الطبيب مع وسيم وجلس في مكانه ..
طارق: شو صار ..؟!
الطبيب: الله يهديه الولد اكيد اكَل اكِل مكشوف وعشان جذي ياله تسمم بسيط بالمعده .. راح يقعد عندنا فتره قصير ما تتجاوز العشرين ساعه عشان نعمل له تنضيف ..
طالع طارق في وسيم وقال: انت شنو اكلت ..؟!
نزل وسيم راسه وقال بصوت منخفض: زي اصحابي .. لما خلصت المدرسه وقبل لا تيي انت ياء واحد يبيع بليله فاشترتها ..
عصب طارق بس ضبط اعصابه وقال: انا جم مره حذرتكم من انكم تشتروا شيء من برى ..؟! جم مره قلت اذا تبوا شيء قولوا لي انا ..؟!
وسيم بهمس: آسف اخر مره ..
تنهد طارق وقال للطبيب: يعني متى راح اييكم ..؟!
الطبيب: باجر في العصر ..
قام طارق وقال: طيب مع السلامه ..
وبعدها طلع .. دمعت عيون وسيم وقال: طلع وهو زعلان مني ..
ابتسم الطبيب وهدأ منه ..
مشي طارق في الاسياب وهو بصراحه متضايق ..
كم مره ينصحهم وهم بس يعاندون ..
فعلا التصرف معهم صعب ..
صقع كتفه بكتف واحد كان مار ..
لف عليه طارق وقال: انتبه في المره اليايه ..
وبعدها راح ..
طالع هالشاب في طارق بعدها قال: هو الغلطان مو انا ..
تنهد وقال: المهم اللحين شلون راح اقول لشهد ان حالة اختها سائت .. راح تتضايق ..
اخذ نفس عمييييق بعدها قال: راح اقول انها بخير وبس .. الله يعينها ويشفي اختها ان شاء الله ..
وبعدها راح وطلع برى وركب سيارته ورجع للقصر عشان لا يشك فيه راشد ..

⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊ ⁄⁄◊⁄⁄ ◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄ ◊⁄⁄◊⁄ ⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊