شبكة همس الشوق - عرض مشاركة واحدة

16 - 3 - 2014, 04:58 PM

الساعه 1 بعد منتصف الليل ..
كان الجو هادي بالبيت والكل في فراشه وفي سابع نومه ..
ما عدا واحد مو قادر ينام ..
من التفكير ..! لا مو قادر ينام من الجوع ..
مع انه تعشى الساعه عشره بس هالمره يحس انه ما شبع ..
وفي نفس الوقت المطاعم تكون مقفله وما يقدر يروح يشتري له ..
تربع فوق السرير وقال: ما يصير انام وانا يوعان .. ما ارضاها على بطني ..
تأفف وقال: شكلي بروح اصحي لبنى تسوي لي اكل ..
سكت شوي بعدها قال: لا حرام مابي ازعج الطيبين ..
تنهد وقال: راح اشوف لي شيء اكله ..
اخذ جواله معاه عشان ينور لنفسه الطريق للمطبخ ..
دخل المطبخ وفتح الثلاجه وظل واقف يتأمل فيها ..
إياد: ماش .. ماكو شيء يحمس .. وحشتني ثلاجتنا ..
قفل الثلاجه وفتح الفريزر .. طالع شوي بعدها انتبه لكيس بطاطس مقطع ..
طالع في الكيس فتره بعدها قال: اصلا القلي سهل ..
اخذ البطاطس وبعدها قفل باب المطبخ وشغل اللمبات ..
تنهد وبعدها بدأ يدور المقلاه .. ولما لقاه حطاه عالنار وحط فيه زيت ..
إياد: القلي شكله سهل ..
جلس عالكرسي ينظر الزيت يصير حار عشان يقدر يحط البطاطس ..
تنهد للمره الثالثه وقال: طفش .. ملل .. شكلي بروح اصحي بدر .. لا لا حرام هو اليوم مرهق وتعبان ..
طالع في جواله لفتره وقال: ليش ما اتصلت سهى ..؟! هههه يمكن ما عرفت تحل اللغز ..
شوي تذكر اخته من ابوه فقال: يا ترى اللحين هي طفشانه مثلي ولا نايمه ..؟! يا ويلها لو كانت نايمه .. انا اخوها الصغير والمفروض تنام بعد ما انام ..
شوي ضحك وهو يقول: ههههههههههههههههههههههههه لا لا شكلك استخفيت يا إياد هههههههه ضريبة السهر هههه ..
قام من فوق الكرسي وبدأ يحط البطاطس المقطع في المقلاه وبعدين بدأ يحركه ..
دق جواله في هالوقت ..
اخذه وشاف ان الرقم غريب ..
إياد: اكيييييد سهى ..
رد وقال: واخييرا دقيتي يا سهى ..
.........: للاسف انا مو سهى حقتك ..
استغرب إياد لما سمع صوت بنت وقال: عفوا .. منو وياي ..؟!
ابتسمت وقالت: انا لينو واخذت رقمك من رفيجك بدر يا المخادع ..
إياد: اوووووه لينو المتعجرفه تتصل علي وبآخر الليل ..؟!!! ايش هالوقت المشبوه يا بنت ..؟!
ابتسمت لينو وقالت: والله ما عرفنالكم يالشباب .. اذا اتصلنا بالظهر تقولوا ايش الوقت الغلط ذا .. واذا اتصلنا العصر او المغرب تكونوا نايمين .. والمعروف انكم تسهروا كل الليل .. عيل هالوقت مو مشبوه لانه بالنسبه لكم نهار ..
إياد بإبتسامه: اخسس .. شكلج راعية شباب عيل ..
لينو بإنفعال: ابـــدا .. منو قال ..؟!
إياد: انتي ..
جت بترد عليه بالنفي بس تذكرت كلامها فقالت: لا يا الخبل .. كلامي مو دليل اني احاجي شباب .. انا طالبة ثانوي .. وطالبات الثانوي معظم سوالفهم عن مواقفهم يا مع اخوانهم او اقربائهم وعشان جذي انا عارفه هالاشياء عن الشباب ..
إياد: اها .. اقنعتيني ..
لينو: اسمع .. ممكن تقولي شنو هي العلاقه بين القضايا الموكله لابوي وبين ذاك اللي تبون تصيدونه ..؟!
إياد: هههههههههههههههههههههههههههههههههههههههههههههههههه ..
لينو: هذا اسميه اعتراف بالجذب ولا شنو ..؟!
إياد: والله فسريها بالطريجه اللي تبين تفسريها ..
لينو: امبلا انت كنت تجذب علي .. ماكو اي علاقه بين قضايا ابوي وبين عبد الخالق حقكم ..
إياد: انتي حره .. بس للمعلومه اتمنى اذا فشلتي بشيء ما تحطي الغلط في شخص غيرج ..
لينو: ها ..
ضحك إياد في نفسه .. يحاول قد ما يقدر انه يشككها في نفسها ..
لينو بحده: إيادووه عن الهبل .. واضح انك تشككني في نفسي و ....
سكتت شوي وهي تسمع عنده صوت الزيت وقالت: وين انت ..؟!
إياد: بالمطبخ ..
لينو: شنو تساوي بالمطبخ ..؟!
إياد: كنت يوعان فييت اقلي لي بطاطس ..
لينو بصدمه: تقلي لنفسك ..؟!!! انت من عائلة الراهي صح ..؟!
إياد: ايه ..
انصدمت اكثر وقالت: لا لا اكيد تستهبل .. شلون ولد عز ويقلي عالزيت .. ما اصدق ..
إياد بلا مبالاه: بكيفج ..
لينو: يعني من صج ..؟!!
إياد: ايه من صج .. وليه اجذب ..؟!
لينو: لانه ماكو واحد غني يدخل المطبخ ويطبخ ..!!
إياد: ياني سام الثاني ..
لينو: طيب افرض ان الزيت طش في ويهك وشوه شكلك ..
إياد ببرود: اعمل عمليات تنضيف وتجميل ..
لينو: صج انك خبل .. اترك عنك الزيت وخل احد غيرك يطبخ لك ..
إياد بإبتسامه: خايفه علي ..؟!
لينو بسرعه: تخسسى .. انا اخاف عليك ..!! لا لا صج ماخذ مقلب بروحك ..
إياد بتسليك: اوكي اوكي ..
لينو: لا تسلك لي .. انا صاجه ..
إياد: طيب خلاص عرفنا انج صاجه .. يقولون اللي يصر انه صاج فهو جذاب ..
لينو بضبط اعصاب: إيادووه انت شفيك بالضبط ..؟!
إياد: انتي اللي شفيج ..؟! قلت لج صدقتج بس مدري ليش شاكه .. الله يصلحج ..
لينو: اصلا إنا الخبله اللي اخذ واعطي معاك في الكلام .. بااي ..
إياد: هههههههه باي ..
قفل جواله وهو يضحك عليها وعلى طول جاء في باله الكلام اللي دار امس بينه وبين لبنى ..

:::::::::::::::::::::::::::::::::::::::::::::::::: ::::::
كانوا بالسياره توهم راجعين من المستشفى بعد ما ضمدوا جرح لبنى ..
كانوا يسولفون وبعد فتره من الصمت كانت لبنى تفكر بشيء بعدها قالت لإياد: اممم إياد بدي اسألك سؤال ..
إياد: إسألي ..
لبنى: انت لو حبيت لك صبيه شو بيكون تعاملك معها ..؟!
إياد: صبيه هههه .. واااااااو يا زين حجيج ..
لبنى: خلاص أئصد بنت ..
إياد: لا لا قولي صبيه .. عجبتني .. يا حظ بدر فيج ..
لبنى: اوكي اللي يريحك .. المهم اذا حبيتها شو بيكون تعاملك معاها ..؟! اممم بدي اعرف شو هي التصرفات اللي بتطلع منك ..
ابتسم إياد وهو يطالع فيها وقال: انت تحبي واحد وتبغي تعرفي ان كان يحبج ولا لا .. صح ..؟!
انصدمت لبنى من كلامه بعدها قالت: لك شو هالعقليه اللي بتِملِكها ..!!! عن جد فاجئتني ..
إياد: هههههههههه محد يقدر يلعب علي .. ياللا اعترفي منو هو وشنو اسمه ..
لبنى: إترِك عنك اللقافه وجاوبني ..
إياد بتفكير: امممم ...............................
:::::::::::::::::::::::::::::::::::::::::::::::::: ::::::

عقد إياد حاجبه وقال: يا ليتني سألتها نفس السؤال عن نوع تصرف البنت اذا حبت لها واحد ..
وبعدها بدأ يدندن وهو يكمل طبخ ..

.................................................. .......

في نفس هذا الوقت بس في مكان ثاني ..
عند ابو أبطالنا إياد واسيل ..
كان جالس في مكتبه ويجري اتصالات خارجيه وداخليه لاسباب شخصيه له ..
يبغى يطمئن من كل النواحي ان محد يكتشف تجاراته المشبوهه والمصانع الهابطه اللي يتعامل معها ..
بعد ما خلص وارتاح نفسيا دق زر جنبه ودخل عنده مدير اعماله يحيى ..
يحيى: سم طال عمرك ..
ابو إياد: بغيت اسألك بطاقة بنك الـ***** عند مين ..؟!
يحيى: هذي البطاقه عند ولدك إياد ..
ابو إياد بأستغراب: بس الصرف فيها مستواه عالي .. صحيح إياد مبذر بس مو لهدرجه ابدا ..
عقد يحيى حواجبه وهو يتذكر كلام إياد قبل فتره ..

:::::::::::::::::::::::::::::::::::::::::::::::::: ::::::
إياد: اسمع .. تذكر بطاقة الصراف لبنك الـ**** .. ابيك توقف حسابها ..
يحيى: اعذرني ما اقدر .. هالبطاقه تخص ابوك وهو الوحيد اللي يقدر يوقف الحساب ..
إياد بعصبيه: طيب انت رئيس اعماله .. وقفها اللحين ..
يحيى: صدقني ما اقدر .. هذه قوانين الحكومه .. اذا تبي حسابها يوقف اقدر اقول لأبوك يروح للبنك بنفسه ويوقفها ..
إياد: لا .. لا تقوله .. لا يوصل شيء له .. طيب اذا ما تقدر توقفها عالأقل غير الباسورد ..
يحيى: حتى هذا ما اقدر .. صاحب البطاقه هو الوحيد اللي يقدر .. هذه مسائل امنيه مشدده ..
:::::::::::::::::::::::::::::::::::::::::::::::::: ::::::

يحيى: طال عمرك انا اتوقع اني عرفت السبب ..
طالع فيه ابو إياد وقال: شنو تقصد ..؟!
يحيى: ولدك إياد قد اتصل علي قبل شهر تقريبا وطلب مني اني اوقف حساب هالبطاقه بس قلت له انك انت الوحيد اللي تقدر لانها باسمك .. قالي غير الباسوورد او أي شيء .. كان مصر ان البطاقه تتقفل او يتغير رقمها .. انا اضن انها مو معه .. يمكن مع احد ثاني سرقها منه او اخذها بالقوه ..
ابو إياد بتفكير: جذي يعني ..
يحيى: وكمان اصّر علي اني ما اعلمك وعشان جذي ما قلت لك وقتها ..
ابو إياد: طيب انت تشوف من الافضل اوقفها ولا انتظره يطلب مني ..؟!
يحيى: انا اشوف انك توقفها احسن لان الصرف عالي واذا راح كل اللي بهالبنك تكون خسرت ربع املاكك وهذا شيء كبير جدا ..
ابو إياد: معاك حق .. باجر بروح اوقفها واطلع وحده يديده ..
يحيى: تبغى مني شيء طال عمرك ..؟!
ابو إياد: لا ..
هز يحيى راسه وبعدها طلع برى المكتب ..
ضاقت عيون ابو إياد بتفكير وقال: ماكو غير جراح واللي معاه .. اكيد هم اللي اخذوها منه .. بس الغريب شلون إياد العنيد رضي يقولهم الرقم ..؟!!! إنا اكثر واحد عارف ابني عدل فشلون صار جذي ..؟!!!
قام من فوق الكرسي وبعدين قفل نور الاباجوره وطلع من مكتبه ..

⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊ ⁄⁄◊⁄⁄ ◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄ ◊⁄⁄◊⁄ ⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊

رن الجوال جنب اذنه بإستمرار وهو نايم وفي سابع نومه ويتحلم بجرس برج عالي قاعد يدق ..
بس الدق استمر مع ان الجرس اللي بحلمه انتهى من الدق ..
بدأ يحس بإنزعاج وبدأ يتلخبط حلمه لما صحي من نومه ..
مسك الجوال وطالع في الساعه وكانت 3 الفجر ..
كان راح يكسر الجوال من العصبيه .. منو هذا اللي يدق عليه في وقت زي كذا ..
طالع في الاسم وانصدم لما شاف انه ابوه ..
اعتدل في جلسته عالسرير وتردد بعدها قرر يرد على ابوه عشان يعرف ليش يتصل عليه بهذا الشكل المُلحّ ..
رد وقال: الو ..
الاب: سامي .. جان طنشت هالمره كمان ..؟!
سامي بهدوء: سوري ..
الاب: وينك ..؟!
سكت سامي شوي بعدها قال: ماني راجع للبيت وذيج موجوده فيه ..
الاب: اذا كنت تقصد سيلينيا فهي طلعت من نفس اليوم اللي دخلته فيه .. تعال بسرعه ..
اندهش سامي بعدها قال بإستهزاء: غريبه .. لا يكون طردت حبيبتك الجديمه ..؟!
الاب: سامي ما عندي وقت اتناقش وياك .. تعال هني ..
تنهد سامي وقال: طيب .. باجر بروح الجامعه بعدها برد البيت عندكم .. اللحين اخر الليل وانا ابي انام ..
الاب بحده: انا ما اعيد كلامي مرتين .. اترك شقتك اللي انت فيها او بيت صاحبك وتعال هني ..
سامي: انا بشقه وفي مجان شوي مزحوم من كثرة السيارات اللي فيه والوقت ليل وحددي نعسان .. يعني اكيد ما راح اقدر اسوق واحتمال كبير اني اسوي حادث ..
الاب بصوت هادي: سامي ..
سامي بضجر: ابوي والله ما اقدر .. راح اقعد ساعه في الطريج ويمديه يأذن الفير وما راح اقدر انام .. قبل كنت انام شوي بعد الصلاه بس اليوم ما اقدر لاني ابي اروح للجامعه بدري وامر على بيت ابن اللذين واخذه معي .. ابوي واللي يسلمك ابي انام هالساعه بس ..
سكت الاب لفتره طويله وسامي عنده امل ان ابوه يوافق مع انه متأكد انه راح يرفض لانه يعرف ابوه .. اذا قال كلمه لازم تمشي ..
الاب: ايش اسم العماره اللي انت فيها ..؟!
سامي: عمارة الـ****** ..
الاب: عيل باجر بعد الجامعه تيي هني فاهم ..؟!
اندهش سامي من كلام ابوه ..
اول مره يتنازل عن اوامره ..
ما فكر بالامر كثير لانه بعدها على طول انسدح عشان يلحق ياخذ له غفوه وبعدها يصحى للصلاه ..

قفل ابو سامي الجوال بعدها طالع في مراد وقال: روح صلح اللي قلتلك عليه ..
مراد: حاضر ..

..................................................

في نفس هذا الوقت وفي احد شاليهات مدينة الدوحه الكبيره ..
كانت تلك الامرأه الشقراء سيلينيا واقفه وتطالع لذاك الشخص اللي قدامها بحنين ..
تقدمت من عنده بهدوء وقالت بلكنتها البريطانيه: عزيزي .. جاك .. انك حقا بخير .. لقد .. لقد شفيت حقا ..
وراحت له وحضنته بلهفه وشوق ودموعها تنزل على خدودها ..
له اكثر من عشر سنوات وهو نايم بدون حركه ..
واخيرا شافته واقف مثل ما كان زمان .. اشتاقت له ..
كيف ما تشتاق له وهو زوجها .. نصفها الثاني .. شريك عمرها ..
دفنت وجهها بصدره وهي تقول بصوت باكي: لم اتوقع اني سآراك هكذا في يوم من الايام .. لقد فقدت الامل كثيرا .. جاكي عزيزي .. لا تبتعد عني ارجوك .. ارجوك يا جاكي ..
نزل نظره لها وبعدها حوطها بإيده وقال: جيد انك بخير يا سيلي ..
لف نظره وطالع في باتريك وقال: من ذاك الرجل ..؟!
بعدت سيلينيا عنه وقالت: انه قريب زوجة اخي ويعمل في قسم القانون والمحاماه .. سأحكي لك كل شيء عنه فيما بعد ..
طالعت في عيونه وقالت: انا حقا مندهشه لسفرك الى قطر .. كيف علمت اني هنا ..؟!
طالع فيها شوي وقال: لم اكن اعلم بتاتا بانك هنا ولكنني قابلت سائقك دانيال بالصدفه واتيت لك ..
سيلينيا بحذر: اذا لما اتيت ..؟!
ضاقت عيونه وقال بحده: اتيت خصيصا لسلطان وولده .. لقد اقسمت من قبل ان حياة ذاك الصبي بيدي وسأقتله .. لن اسمح ابدا بأن يكون لزوجتي ابن اخر من شخص غيري .. لن اسمح بهذا ابدا ..
مسكت سيلينيا ايده وقالت: ارجوك يا جاكي انس هذا الامر .. لا علاقة للصبي بما حصل .. اقتل والده اما هو فدعهه وشأنه ..
جاك: اعذريني يا سيلي .. لن استمع لكلامك هذا .. سلطان بالتأكيد سأقتله ولكن ليس قبل ان اريه جثة ابنه الذي انجبه من زوجتي ..
باتريك: اعذرني على مقاطعتك .. ولكن الا تضن بأن مهمتك مستحيله .. سلطان هذا شخص غني ومرموق في هذا البلد وبالطبع سيحيط ابنه بحراسة مشدده .. صدقني انك لن تستطيع ان تصل اليه بتاتا ..
ابتسم جاك وبعدها ضحك ضحكه عاليه ..
استغربوا باتريك وسيلينيا منه .. المفروض يعصب ويحس ان اللي بيسويه صعب ..
هز جاك راسه بأسف وقال: كيف لمحامي مثلك ان يقول هذا الكلام .. هل انت متأكد انك درست القانون ..؟! يبدوا انك درست الصيدله او الاقتصاد بالخطأ ..
باتريك بهدوء: ماذا تقصد ..؟!
جاك: كيف لي ان اشرح مسائل قانونيه مع محامي مثلك .. فكر بالامر جيدا .. الابن الذي يولد بطريقه غير شريعه من إمرأه متزوجه مسبقا .. من له الأحقيه في وصاية هذا الولد ..؟!
عقد باتريك حوجبه بعدها قال بدهشه: اتقصد ....؟!!
جاك: اجل ..
طالعت سيلينيا فيهم وهي مو فاهمه فقالت: باتريك ماذا يقصد جاكي ..؟!
باتريك بهدوء: شرعا وفي هذا البلد فان الابن الذي في مثل حالة سامي ينسب الى جاك اذا ثبت ان تحليل الـdna يتطابق مع تحليلك انتي ..
سيلينيا بدهشه: ولكن .. ولكن ...
لفت لى جاك وقالت: لا ارجوك عزيزي دع الصبي وشأنه ارجوك .. انه ولدي ولا اريده ان يموت ..
جاك بحده: انه ليس من صلبي فلا اريده ان يعيش .. لا تجادليني ..
وبعد جملته ذي طلع برى الشاليه فانهارت سيلينيا عالارض تبكي وهي تردد: احب جاكي ولكني لا اريده ان يفعل هذا لا اريده ..
جلس باتريك جنبها وقال: اهدأي .. كم مرة يجب ان اقول لكي لا تبكي كالاطفال .. كوني قويه ..
هزت سيلينيا راسها وكملت بكائها ..
تحب زروجها وتحب ولدها ..
فعشان كذا تحس نفسها ضايعه وما تدري ايش تسوي غير البكاء ..

⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊ ⁄⁄◊⁄⁄ ◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄ ◊⁄⁄◊⁄ ⁄◊⁄⁄◊⁄⁄◊⁄⁄◊⁄⁄◊⁄⁄◊⁄⁄◊

في صباح هذا اليوم ..
كان الجو صاااافي وباااارد وكأن وقت هطول الثلوج الخفيفه جاء ..
لا تستغربون لاننا الان نتكلم عن دولة كندا ..
وعند واحد من ابطالنا .. فيصل الرملي ..
كان جالس على احد الكراسي في هذا المطعم المفتوح من السقف والمبني على سفح احد الجبال الشبه عاليه ..
هذا المكان الاستراتيجي اعطى للمطعم ميزه حلوه مره ..
فإيش هو احلى من الاكل في هواء طلق وفي مكان هادئ وبعيد عن ضجيج السيارات والناس والاصوات العاليه ..
طالع فيصل في ساعته وقال: مو كأنهم تأخروا ..؟! ....... اصلا عادي .. ذي مو اول مره يتأخرون ..
اخذ كوب الكوكتيل وشرب منه وهو يفكر في نفسه ..
ذي اخر صفقه راح يسوها وبعدها راح يترك هالطريق ..
قراره مفاجئ بس له كم يوم يفكر فيه ..
ما يدري ايش السبب اللي يخليه يسوي كذا ويقرر هالقرار ..
بس يمكن موت ابوه اثر فييه كثيير لدرجة انه فكر في هالشيء ..
راح يترك تجارة الاسلحه والمخدرات وسعد وشركته ورينا وجوزيف وكندا وكل شيء ويبدأ حياة جديده بفلوس حلال .. ويعيش مثل ما كان ابوه يعيش ..
اللحين بس عليه انه ينهي هالامر .. مثل ما خطط مع رئيسه ..
تتجمع شحنة الاسلحه كالعاده وفي نفس الوقت يجمع ادله ضد شركة نوسترادا وفي الاخير يرسل بلاغ ضد الشركه ويورطهم في كمية هالاسلحه وتنهار شركة نوستراردا كلها ..
هذا هو مخططهم ولازم يلعبها صح .. عالاقل راح يريح الناس من شر هالشركه ..
ابتسمت رينا وقالت باللغه العربيه اللي تتقنها: هاااي فيصل .. في ايش كنت سرحان ..؟!
طالع فيصل فيها وقال: في امور كثييره ..
جلست عالكرسي وقالت: اها .. المعذره فشريكي اللي دايم يجي معاي اعتذر لانه تعبان ..
فيصل: عادي ماكو مشكله .. واللحين خلينا نبدأ شغل لاني مستعيل ..
رينا: مستعجل على ايش ..؟!
فيصل: امور عاديه .. لا تشيلي هم ..
ابتسمت رينا وقالت في نفسها: "اتمنى ان لا تكون خيانتنا هي احد هذه الامور .. لا يهمنيي هذا الامر .. ولكن يوم انتهائكم قريب وعلى يد شركة نوسترادا" ..
طالع فيصل في رينا وقال: وش هاي الابتسامه الغريبه ..
هزت راسها وقالت بصوت بريء: لا شيء .. تذكرت موقفا ..
فيصل: اها .. اوكي ..
وبدأ كل واحد فيهم اول خطوه لخيانة الاخر ..
بس مين يفوز في حرب الخيانه ذي ..؟!
قريب راح نعرف ان شاء الله ..

✖ إنتهــــــــــــــــــــــــــــى ✖

هالمره عاد مافي قفله عشاني حتأخر عنكم حول شهر ونص فراعيتكم ..
مع اني متحسفه انه مافي قفله :(
هههه بس وعد مني اني البارت الجاي احط اقوى قفله << معليش تحملوني شوي ادري اني لئيمه ..

ياللا اشوفكم على خيير بعد الاختبارات ..
اتمنى انكم انتم كمان تجتهدوا في دراستكم لان المستقبل مرره مهم ..

الاحداث بدت تصير احلى والنهايه باقي عليها اقل من ربع الروايه ..
ففعلا انا محتاجه لارائكم الجمييله اللي والله تساعدتني في كتابة الاحداث فلا تحرموني منها ..

تحياتي/ صوصصتككم *

|$[ نهاية البارت ]$|