شبكة همس الشوق - عرض مشاركة واحدة

17 - 3 - 2014, 06:24 PM

|$[ البآرت الثامن عشر الجزء الاول ]$|

ما الذي اقصاك عني ** من تراه داس الشموع ؟!
كيف غابت شمس عمري ** لما انهيت السطوع ؟!

دق الباب ودق ودق وهي ما تزال حاضنه مخدتها ودافنه وجهها فيه ..
وما زال الطارق ينادي بإسمها ويطلب منها انها تفتح الباب غصب عنها وبسرعه ..
هي مو فاهمه شيء ..
تحس نفسها انها تحلم ..
منو هذا اللي يجي في مثل هالوقت ويدق ويرفس بالطريقه هذي ..؟!
منو ..؟!
شوي عقدت حواجبها ..
هالصوت مو غريب عنها ..
قد سمعته قبل كذا .. بس مو متذكره فين ومتى ..
رفعت راسها وظلت لفتره تطالع في باب غرفتها ..
لفت ناحية الساعه .. له سبع دقايق وما طفش من الدق ..
ترددت شوي بعدها قررت انا تروح تشوف مين ..
قامت وخرجت من غرفتها ..
تقدمت بخوف ناحية الباب اللي بتحسه رتح ينشلع من قوة الدق ..
رفع رجلها وطالعت من فتحة الباب عشان تشوف مين اللي يدق عليها في مثل هالوقت ..
انصدمت لما شافت انه جارها باسل ..
ووجهه واضح عليه العصبيه ..
استغربت من الوضع .. ليش باسل يدق بذي الطريقه وفي ذا الوقت ..
يمكن فيه سبب ضروري ..
دخلت المفتاح في الباب وفتحته وبعدها قالت: اهلين ب....
وقبل لا تكمل كلامها صرخ باسل في وجهها وهو يقول: خبله انتي ولا شنو ..؟! لي نص ساعه ادق ولا تفتحين ليييييش ..؟! شكلج يبيلج تصفيق على هالحركه الغبيه ذي .. جد انج اغبى وحده شفتها ..
طالعت اسيل فيه فتره مندهشه منه .
اول مره تشوف هالشخص الهادي منفعل كذا ..
شوي استوعبت انه قاعد بسبها فقالت بعصبيه: انت هيه علر اي اساس .....
وقبل لا تكمل كلامها مسك إيدها وسحبها وهو يقول: انجبي يا الخبله وامشي وراي بسرعه ..
سحبت ايدها وهي مصدومه وقالت: انت شنو قاعد تساوي ووين موديني ..؟!
مسكها من جديد وسحبها بقوه لحد ما وصل لشقتها وفتحهها واسيل تقاوم وبنفس الوقت في قمة صدمتها من افعال جارها الغريبه والمخيفه ..
اسيل بصراخ: هيه انت هد إيدي .. شنو يالس تساوي ..
دخلها لشقته وطلع سكين من جيبه فسكتت اسيل من شدة الصدمه ..
باسل: سمعيني عدل .. إيلسي هني ويا ويلج اسمع لج حس فاهمه لأتهور واسكتج طول عمرج ..
وكمل بصراخ: فاهمه ..؟!!
على طول هزت راسها بإيه وهي مرتعبه ..
خرج برى وقفل الباب عليها بالمفتاح ..
ولحد الان تصرفات هالجار تزدات غرابه ..
ليش حابسها هني ..؟! شنو هدفه بالضبط ..؟!
جلست عالارض وجسمها ينتفض من الخوف ..
تتمنى ان كل هذا يكون حلم ..

بعد ما قفل باسل الباب ظل واقف يطالع في الباب بعدها قال: كويس . . شكلها ما راح تصرخ هالخبله ..
طالع في السكين اللي بإيده وبعدها حطها بجيبه وراح لشقة اسيل ..
دخل فيها وبدأ يلف يطالع في كل شيء ..
اخذ جوالها وشاف ان الخلفيه على شكل بنت ..
فتح الاستيديو وهو يقول: ليش يحطون خلفيات بنات ..؟!
شاف له صورة للسماء فحطها كخلفيه ..
رجع الجوال مكانه وحط إيده بجيبه وهو يتأمل الغرفه بعدها قال: لا بأس ..
شوي دق باب البيت ..
راح وفتح الباب وقال: نعم ..
طالع فيه الشخص الاخر هو وصاحبه بعدها قال: هذا بيت اسيل محمد << لما طلعت لنفسها بطاقه صار اسم الاب محمد ..
طالع باسل فيهم وقال: ايوه .. اي خدمه ..؟!
الرجل: ممكن تناديها لنا ..؟!
باسل: بس هي مو هني .. عند امي في الكويت ..
الرجل: شنو تساوي عند امك هناك ..
رفع باسل حاجبه وقال: حرام الواحد يزور امه ..؟!
الرجل: امها ..؟!! شلون امها في الكويت وهي بالاصل لقيطه ..؟!
باسل: امي لقيتها وهي صغيره فرضعتها وصارت امها بالرضاعه واختي انا بالرضاعه .. واللحين هي متزوجه وعندها ولدين .. استأجرت لي هالشقه قبل لا تسافر .. عندك اسئله ثانيه ..
الرجل بدهشه: متزوجه ..؟!! ليه هي جم عمرها ..؟!
باسل: خمس وعشرين ..
طالع الرجال في صاحبه بدهشه وهو يقول بهمس: يقول ان عمرها خمس وعشرين ..؟!!!!
صاحبه بنفس الهمس: بس شلون ..؟! المفروض عمرها يكون تسع تعش ..
باسل: ها ..؟!! عندكم سؤال ثاني ..؟! ابغى انام باجر وراي دراسه ..
طالعوا فيه الاثنين بتفحص فقال الثاني: ابعد خلنا نتأكد ان البيت فاضي ..
مد باسل إيده وقال: راوني امر التفتيش عشان اسمح لكم ..
دفه الاول بقوه فطاح باسل ودخلوا الاثنين للبيت ..
مسك باسل كتفه وهو يقول: اووش ما عندهم تفاهم ..
فتحوا الابواب وبدأوا يدوروا على اسيل ..
تربع باسل وقال: فتشوا على راحتكم اختي مب هني .. في الكويت يا حبايبي .. إلا صح نسيت اسألكم وش تبون منها ..؟!
محد رد عليه وكملوا تفتيش في كل مكان بعدها جاء واحد منهم عند الثاني وقاله بهمس: البنت مب موجوده ابدا .. شكله مجرد تشابه اسماء ..
الثاني: فعلا .. هيا نطلع بس راح نحط احد يراقب العماره يومين للإحتياط ..
لفوا وطالعوا في باسل بعدها خرجوا ..
ابتسم باسل بمكر وقال: بتحطوا مراقبين ها ..؟! اسمحولي مستحيل اخليكم تصيدوا سجى لو على رقبتي .. ذي بطاقتي الرابحه ومستحيل اخليها تضيع مني ..
قام من مكانه وخرج برى الشقه ..
فتح شقته فرفعت اسيل راسها وطالعت فيه ..
باسل: خلاص روحي لغرفتج ..
طالعت فيه فتره بعدها ضاقت عيونها وقالت: انت شنو اللي تخطط له .. شنو معنى اللي يصير اللحين ..؟!
ابتسم وقال: اعتبري نفسج يالسه تحلمين ..
تقدم وجلس على كنبته بإسترخاء وقال: اطلعي وقفلي الباب وراج ..
قامت اسيل وقالت: مانيب طالعه من هني لحد ما افهم كل شيء ..
رفع حاجبه ولف عيونه عليها وقال بإبتسامه: اووه غريبه .. ذي اول مره اشوف بنت تصر انها تيلس في شقة ريال بمثل هالوقت ..
انقلب وجه اسيل بعدها طلعت وهي تقول: باجر ما راح اخليك إلا لما تشرح لي كل شيء ..
باسل: على طاري باجر .. لا تطلعي من العماره إلا لما تقولين لي ..
طالعت فيه وقالت: ليش .. منو تكون انت عشان تطلب مني جذي ..؟!
هز كتفه وغمض عينه وهو يقول: خلاص لا تقولين لي .. بس وقتها اتمنى انك ما تندمي على هالقرار ..
طالعت اسيل فيه فتره طويله بحيره ..
مو قادره تفهم تصرف هالشاب الغريب ..
مره تحسه انسان سيء ومره العكس ..
مين يكون هالانسان بالضبط ..؟!
وإيش هو هدفه اصلا ..؟!
لفت وقفلت الباب وراها وراحت لشقتها ..
دخلت وانسدحت على سريرها تنام ..
بس ما قدرت تنام من كثر التفكير باللي صار قبل شوي ..

================================================== ========

صباح اليوم الثاني ..
كانت دانا توها وقفت سيارتها في مواقف السيارات ..
اسندت راسها عالدركسون شوي ..
حاسه بدوخه فضيعه وتحس بالغثيان ..
لو اليوم ما عليهم تطبيق عملي مهم كان غابت وريحت نفسها ..
فتحت درج السياره واخذت قاروره مويه وشربتها لانها حاسه بجفاف ..
غمضت عيونها وقالت في نفسها: "المرض صار يتعبني كثير .. يا رب .. اخوي قرب يشفى فساعدني لحد ما يرجع اخوي يمشي ويدرس .. ساعدني يالله" ..
ظلت في مكانها دقايق وبعدها نزلت من السياره ودخلت الجامعه ..
اتجهت لمكان الشله ..
لما وصلت قالت: السلام عليكم ..
وبعدها جلست فردوا عليها السلام ..
يزيد: دانا شفيج ..؟! ويهج اصفر ..
صالح: انتي بخير ..؟!
هزت دانا راسها بإيه من دون لا ترد ..
طالع ريان فيها لفتره بعدها قال: ترى احنا ملاحضين عليج من اول انج مو طبيعيه .. انتي مريضه صح ..؟!
وللمره الثانيه هزت راسها بلا وقالت: انا بخير .. لا شيلوا هم .. وين سامي ..؟!
عماد: ما ياء .. شكله بيغيب ..
ريان: انا اللي محيرني انه امس قالي بأييك بس ما ياء ولما اتصل يقولي مغلق ..
صالح: الله يستر
عماد: يا ريال تفائل بالخير .. ان شاء الله يكون بخير ..
ريان في نفسه: "شلون نتفائل بالخير وجاك موجود بقطر .. لازم اليوم اروح له البيت مع ان ابوه ما يطيقني" ..
يزيد: اقول دانا شخبار اخوج ..؟!
ابتسمت وقالت بنبرة فرح: صار يمشي عالعكاز .. تحسنت حالته وارتفعت نسبة علاجه .. الحمد لله ..
بصراحه فرحوا لما سمعوا هالخبر وقال صالح: مبروك عقبال ما نشوفه يمشي ان شاء الله ..
يزيد: له له لازم نصلح بارتي على هالمناسبه ..
دانا: لا لا مشكورين مو لازم ..
عماد: قولي له عماد يقولك الف مبروك واستمر بالعلاج وبعدها نورنا بالجامعه ..
دانا: طيب ..
ريان: ان شاء الله يتعالج ويشفى ويفرح قلبج انتي وامج ..
دانا بإبتسامه: ان شاء الله ..
طالعت في ساعتها وشافت ان وقت محاضرتها قرب ..
طالعت فيهم وقالت: استأذن بروح لمحاضرتي ..
عدل صالح نظارته وهو يقول: اجتهدي عدل ..
عماد: ههههههههه لا توصي حريص .. دنو اشطر وحده ..
ابتسمت دانا بتعب وقالت في نفسها: "فعلا لازم اجتهد .. هالايام مستواي بدأ ينخفض" ..
قامت واخذت شنطتها .. شوي حست بدوخه وحست ان المكان يلف فيها ويظلم ..
كانت حتطيح بس مسكها ريان وهو مندهش نفس دهشة اصحابه ..
جلسها عالارض وهو يقول بخوف: هيه دانا انتي بخيير ..؟! شنو فيج بالضبط ..؟!
يزيد: يا بنت احنا متأكدين ان فيج شيء جايد فتحجي ..
عماد: شنو تحسين فيه ..؟! تبينا نوديج المستشفى ..؟!
هزت دانا راسها بلا وقالت بضعف: انا بخير .. هذا ميرد فقر دم .. لا تهتموا ..
صالح: دانا ترى واضح انج تجذبين .. فقر الدم ما يخلي عيونج صفرا جذي .. انتي فيج شيء اكبر من فقر الدم ..
ريان: دانا قولي الصج .. شنو فيج بالضبط ..؟! دووم ساكته وجسمج ضعيف وعيونج قالبه اصفر .. حتى ويهج مصفر ..
هزت راسها وهي تقول: انا جم مره اقول لكم اني بخير .. عندي فقر دم حاد وهذا كل شيء .. لا تتفاولوا علي بالشر ..
يزيد: احنا ما نتفاول بس اللي نشوفه يقول عكس جذي ..
مسكت شنطتها وقامت وهي تقول: خلاص سكروا السالفه ولا عاد تفتحوها ..
وللمره الثانيه الدنيا دارت فيها بس هالمره طاحت عالارض وبعدها ما عاد حست بشيء ..
طالعوا فيها اصحابها بصدمه ..
قاموا لها بسرعه وهو حدهم خايفين وعلى اقرب مستشفى اخذوها ..

================================================== ========

وفي مستشفى ثاني ..
كان سامي مستلقي عالسرير وساكت ..
من وقت ما صحي ما فتح فمه ابدا ..
عقد ابوه حواجبه وبعدها قال بحده: انا لا تحجيت ياوبني يا سامي .. منو قالك اطلع برى البيت من دون لا تاخذ شوري ..؟!
سامي: ..................................
طالع ابوه فتره طويله ينتظره يتكلم بس ما رد عليه ..
هو متأكد إن ورى السالفه جاك لان الشاب اللي جابه للمستشفى قال انه في ريال اجنبي كان يبي يقتله ..
الاب: سامي إلى متى راح تظل ساكت ..؟! شكلي تبيني اربيك واعلمك اصول بر الوالدين ..
وبرضوا ما رد سامي عليه فقال ابوه: السالفه فيها جاك صح ..؟!
ظهر التفاجئ على عيون سامي للحضه فكمل ابوه: انت عارف انك ممكن تكون ميت اللحين لولا تدخل ذاك الشاب ..؟!
جلس سامي وطالع في الشباك اللي قدامه فتره بعدها قال بهمس: جاك ما مات .. كلامي طلع صج .. جاك ما مات ..
طالع فيه ابوه ببرود فلف سامي عليه وبعد سكوت طويل قال: يبه انت جذبت علي .. قلت انه مات وانه ما راح يصحى ابدا .. بس حجيك كله جذبت لاني بعيني انا شفته ..
طالع في ابوه وكل المشاهد اللي صارت امس اختلطت في ذاكرته مع المشاهد اللي صارت في طفولته ..
مسك راسه وحس بصداع فضيييع ..
ابتسم ابوه وقال: تستاهل .. لو انك سمعت كلامي جان كل شيء اللحين عادي ولا صار شيء .. منو قالك تعصيني ..؟!
اخذ سامي نفس عميق بعدها قال: منو الشاب اللي يابني هني ..؟!
الاب: وليش هالاهتمام ..؟! لا يكون ناوي تروح تشكره على انقاذه لحياتك ..؟!
هز سامي راسه وقال: خلاص مابي اعرفه ..
الاب: انت حر .. بس انا ما اعرف منو هو .. لو تبي تعرف اسأل المستشفى وهم بيعطوك اسم اللي وصلك لهني ..
مشي وجلس عالكنب وطلع جواله ودق على مراد ..
كلمه عن امر اجتماع وإلغائه بعدها قفل الجوال ..
طالع في سامي اللي سرحان يطالع في الشباك ..
ابتسم وقال: امك تبيك تعيش عندها .. انا رفضت بس هي قالت سامي اللي يقرر وعشان جذي انا سألتك .. تبي تروح عندها ولا لا ..؟!
عقد سامي حواجبه وقال: مابي اعيش عندها .. ولو الامر بإيدي جان ما عشت عندك كمان .. منو يبي يعيش عند ناس يابوه للدنيا بحقاره وخلوه يعيش اتعس حياة وباقذر لقب .. ولد الحرام ..
سكت شوي بعدها قال: متى اطلع من هني ..؟!
الاب ببرود: العصر ..
انسدح سامي ولف عالجهه المعاكسه لجهة ابوه وقال: ابي انام ..
الاب بإبتسامه: طرده غير مباشره ..
قام وقال: انا طالع بس انتبه لا تفكر بجاك كثير عشان لا ييك على شكل كابوس باحلامك ..
طف النور وطلع من الغرفه ..
ضغط سامي على حديدة السرير بإيده بقووه ..
يكره ابوه كثيير ..
بس مهما كان فكرهه لامه اكبر بكثير ..
لانه لها نسبه كبيره في تعاسته ..
غمضت عيونه وحاول ينام ..