شبكة همس الشوق - عرض مشاركة واحدة

17 - 3 - 2014, 06:31 PM

|$[ البآرت الثامن عشر الجزء الثاني ]$|

حاولتُ أن أكونَ وطناً جيد لـ إحتوآئكِ , لكن أظُن محاولآتيّ ذهبَت هباءاً منثورآ ..

ضاقت عيون هالشخص وظهر الالم فيها ..
مد إيده وحوطها على اسيل وقال بهمس: اسيل ..... انا آسف ..
وقفت اسيل عن البكي وهي تسمع لهالهمس القريب من اذنها ..
هي تعرف هالصوت ..
تعرفه زين ..
فتح هالشخص فمه وكمل: آذيتج كثيير .. كثيير وايد .. من اول ما شفتج وانا ما اوقف عن إهانتج .. اعرف انج تكرهيني واعرف انج شايله في قلبج علي .. بس اتمنى انج تسامحيني .. انا عملت كل هذا عشان ابي اكرهج .. كنت اناني بتصرفي .. من اول ما شفتج وانا بس افكر فيج ليل ونهار .. ما اعجبني وضعي فعشان جذي كنت اهينج عشان ابي اكرهج .. كنت ابي اكرهج بس ما قدرت .. والله ما قدرت ..
سكت شوي بعدها كمل: لما انتشرت حقيقة انج لقيطه بالجامعه ين ينوني ووقتها تأكدت اني مستحيل اكرهج .. اسيل انا عن جد حبيتج وما يرضيني ابدا انج تكوني زعلانه علي .. مستعد اعمل اللي محد يقدر يعمله بس المهم ما اشوفج تبجين .. امج وابوج اللي قطوج ما يستحقوا هالدموع اللي نزلت منج .. اسيل انا ما تعودت اشوفج ضعيفه .. وين اسيل اللي لسانها اطول منها ودوم تراددني ..؟! ارجعي مثل ما كنتي وانا راح اساعدج .. اسيل انتي تسمعيني ..؟!
نزلت دموع اسيل وقالت بصوت باكي: تعتذر ..؟! على اساس اللي ساويته شيء بسيط ها ..؟! ارمي نفسي عالريايل ..! انا وحده نجسه ..! اهلي ما ربوني ..! انت عبالك ان هالشيء سهل ..؟! بسيط ..؟! او قلت ان ذي مجرد لقيطه وراح تسامحني غصب عنها لأنها لقيت احد يتكلم معها ..؟!
بعدت إيده عنها ولفت عليه وكملت بإنفعال: انت غلطان .. حتى لو كنت لقيطه فكرامتي اهم .. حتى لو اهلي قطوني مثل الزباله واهانوني فأنا ما راح اهين نفسي .. شلوووون تبيني اسامح واحد خلى دمعتي تنزل ..؟! شلون تبيني اسامح واحد جرحني ..؟! شلووون اسامح واحد ما عاملني كإنسانه ..؟! إذا كنت تضن انه بإعتذار صغير مثل جذي تقدر تخليني اسامحك فإنت غلطان يا طارق .. خل غرورك وعجرفتك تفيدك .. روووح عن ويهي ما ابي اشوفك ..
اخذ طارق نفس بعدها قال: إعتذار صغير ..!! انا عمري ما اعتذرت لأحد .. انتي الوحيده اللي اعتذرت لها وفي النهايه تقولي إعتذار صغير ..! انتي بعد يا اسيل مو فاهمتني .. منتي عارفه انا قد شنو احبج وقد شنو تعبت وانا ادور عنج .. على كثر المشاكل اللي انا فيها فتفكيري ما نساج ولا لحضه .. إذا انا مغرور ومتعجرف فإنتي انانيه ولا تفكرين إلا بروحج .. ليه ما تطالعي حواليج .. ليه ما تحاولي تحسي بالناس ..؟!
اسيل: احس بشنو ولا شنو ..؟! إذا كان تصرفي بنظرك انانيه فأنا افتخر بذي الانانيه .. ما راح اسامحك ابدا ..
طالع فيها فتره بعدها قال بهدوء: إذا كل الناس تصرفوا مثلج فراح تصير الدنيا خراب .. كل انسان يغلط .. كل انسان يرتكب اخطاء .. إذا كان ربنا يسامح فليش انتي ما تسامحي ..
نزلت دموعها وهي تقول بصوت مرتجف: طيب انا بشنو غلطت عشان تعاملني جذي ..؟! انا بشنو غلطت عشان يقطوني اهلي ..؟! انا بشنو غلطت عشان اتعذب واتألم جذي ..؟!
شهقت وكملت: بشنو غلطت بشنو ..؟!!
وبعدها بدأت تبكي ..
طالع فيها طارق بحزن مد إيده ومسك كتفها وقال: انتي ما غلطتي .. انا اللي غلطت .. اهلج اللي غلطوا .. انتي تحملتي شيء ما يتحمله اي انسان .. لا تضعفي وواصلي الطريج .. ربي راح ييب لج الفرج .. تذكري انه هو اللي خلقج وما راح ينساج .. كل هذا إبتلاء فإصبري وبإذن الله تكون الينه هي مأواج ..
سكت شوي بعدها كمل: اسيل اتمنى انج ما تشيلي بقلبج علي .. اتمنى انج تسامحيني .. اعرف اني غلطت عليج .. بس وقتها كنت انسان شبه متحجر .. ما كنت احس .. بس اللحين انا تغيرت .. ومستعد اساوي اي شيء عشان ما اشوف دمعتج ولا اسمع شهقاتج .. الساعه ثلاث اخر الليل راح اسافر لعند امي .. اذا تبيني اوديج هناك وتعتبريها امج فأنا حاضر .. اسيل انتي بس قولي شنو تبين وصدقيني راح اصلح كل اللي تتمنيه ..
حطت اسيل ايدها على فمها عشان توقف شهقاتها المستمره ..
شنو تتمنى ..؟!!
تتمنى اشياء كثثيره مستحيله ..
تتمنى انها ما جات لهالحياة ..
تتمنى انها ولدت في عائله غير عائلتها الاصليه ..
تتمنى انها ما تحمل هاللقب ..
وتتمنى وتتمنى .. كلها امنيات مستحيله ..
مستحيله ..
بعدت عنه واستندت عالشجره ووقفت ..
اخذت نفس عشان توقف شهقاتها وقالت: شكرا .. انت اخر واحد اطلب منه انه يساعدني .. كل اللي ابيه منك انك تختفي من جدامي .. ما ابي اشوفك ابدا .. هدني بحالي واللي يسلمك ..
وقف طارق قدامها وقال: اهدج بحالج ..؟!! اكيد تمزحين ..! انا ما صدقت اشوفج وفي النهايه تقولين اهدج بحالج ..! اسيل اعرف انج متألمه من كل اللي صار لج .. بس هذا ما يعني انج تصيري متبلدة الشعور .. حسي في الناس اللي جدامج .. يا بنت حسي فيني .. اقولج انا مو قادر اشيلج من مخي فليش تردي علي رد مثل جذي ..
اسيل بصراخ: بس كافي ..! هدوني بحالي .. ما ابي احد .. ولا ابي احس باحد ولا ابي اشوف احد .....
قاطعها طارق بحده: اسيل اصحي .. انتي تتدخلي نفسج في العذاب .. لازم تتطلعي من القوقعه اللي حابسه نفسج فيها .. شنو يعني مابي احد ولا ابي احس باحد ولا اشوف احد ..؟! انتي بجذي تقتلي نفسج بنفسج .. انتي مب اول وحده ولا اخر وحده يقطوها اهلها .. اهلج غلطوا فلا تغلطي مثلهم .. قابلي الناس وعيشي وياهم طبيعي وحسي بالناس واولهم انا .. اسيل اصحي .. ربي ابتلاج عشان إيمانج يقوى مو يضعف .. فاهمه ولا مو فاهمه ..
ظلت اسيل فتره تطالع في طارق وهي مدهوشه من كلامه ..
شوي دفته وراحت لبرى الحديقه ..
تنهد طارق ولف يتابعها بنظره وهي تدخل العماره ..
ومن خلف احد الاشجار كان باسل واقف ويراقب الوضع ..
ضاقت عيونه وهو يطالع في طارق ..
احتدت نظراته وهو يقول: اسمه طارق .. وواضح انهم على معرفه سابقه ..
شوي ابتسم وقال: ما سامحته .. احسن ..
حط إيده بجيبه وبعدها راح للعماره ..
اخذ طارق نفس وطلع جواله اللي كان يدق فرد وهو يقول: هلا انس ..
انس: وينك يا ريال ..؟! انا وصلت للفندق ويالس انتظرك ..
طارق: اي فندق ..؟!
انس بدهشه: هيه طارق لا تينني .. الفندق اللي بتسوي عهد فيه حفلة سلامتها .. مو هي اعطتنا دعوه وانت قلت انك بتيي عشان تشوف رفيجك اللي اسمه بسام ..
طارق بهدوء: ايه تذكرت .. شوي وايي ..
انس: طيب لا تتأخر عشان تلحق ترجع الشقه وتزهب اغراضك واغراض اولاد عمك وتسافروا .. مع السلامه ..
طارق: مع السلامه ..
قفل انس الجوال وهو مستغرب من صوت طارق الهادئ ..
ومن الجهه الثانيه قفل طارق جواله وطالع في العماره لفتره بعدها راح لجهة سيارته ..
ركبها واتجه للفندق ..

========================================

في بيت سلطان الراهي ..
كان سام منسدح عالسرير يحاول ينام ..
بس للاسف مو قادر ينام ..
فتح عيونه وطالع في شاشة جواله وكانت الساعه عشره ..
بعدها تذكر الاتصالات اللي جته من ريان ..
ضغط عالازرار واتصل على ريان ..
شوي رد ريان يقول: اهلين سامي ..
سامي: كيفك ريان ..؟!
ريان: تمام .. انت ليه غايب اليوم ..؟!
سامي: بعدين اقولك .. بغيت اسألك الدكتور عمار قال شيء عني لأني قلت له ان بييب البحث اليوم بس غبت ..
ريان: ما ادري لأني ما حضرت اي محاضره ..
سامي بإستغراب: ليش ..؟!
سكت ريان لفتره بعدها قال: دانا اليوم طاحت علينا ..
جلس سامي وهو يقول بصدمه: شنو ..؟؟! كيف وشلون ..؟؟؟! شنو فيها ..؟!
ريان: طيب اهدأ شفيك منفعل ..
انتبه سامي على نفسه وقال: معليش .. اكيد طاحت بسبب فقر الدم ..
ريان: هذا اللي كنا نتوقعه ..
عقد سامي حواجبه وقال: شتقصد ..؟!
سكت ريان لفتره وسامي على اعصابه ينتظره يتكلم وبعد فتره قال ريان: دانا مريضه بمرض وايد خطير ..
انصدم سامي وقال: شنو يعني وايد خطيير ..؟! ومن امتى هي مريضه ..؟! اصلا شلون ..
ريان: هذا المرض من زمان عندها ...
قاطعه سامي: شنو مرضها ..؟!
تنهد ريان وقال: تليف الكبد .. وعلى حسب كلام الدكتور فهذا المرض مالقيوا له علاج لحد الان ..
سامي: شنو يعني تليف الكبد ..؟! شنو طبيعة هالمرض وليش ماله علاج ..؟!
ريان: والله ما ادري شنو طبيعة هالمرض بس اللي اعرفه انه مرض خطير يوجد بداخل الكبد .. وماله علاج ..
سامي: شنو يعني ماله علاج ..؟! طيب نغير الكبد حقها وتصير بخير صح ..؟!
عقد ريان حاجبه بإستغراب بعدها قال: والله ما اعرف شيء بذا الخصوص .. بس ترى مرض دانا وصل لمرحله خطيره ..
سامي: وينها اللحين ..؟!
ريان: بالمستشفى .. امها واخوها عندها ..
سامي: صحيح ما اعرف شيء بالطب بس اكيد فيه شيء اسمه زراعة كبد مثل زراعة الكلى .. اسمع هي في اي مستشفى ..؟!
ريان: مستشفى ****** .. ليه انت وش بتساوي ....... الو سامي ..
طالع في جواله وقال: قفل ..

قام سامي من فوق السرير ولبس ملابسه وطلع من غرفته ..
نزل تحت فصادف وجود ابوه عند المدخل يتكلم مع ريندا ..
طالع ابوه فيه وقال: وين رايح ..؟! الوقت ليل ..
سامي: بزور رفيجي بالمستشفى ..
الاب: زوره باجر واللحين اطلع على فوق ..
طنش سامي كلام ابوه وطلع من البيت ..
راقبه ابوه بنظراته بعدها اخذ جواله واتصل على مراد ..
ركب سامي سيارته واتجه للمستشفى بسرعه كبيره ..
كلها نص ساعه لحد ما وصل ونزل لسيارته بعد ما وقفها في المواقف ..
راح للاستقبال وسأل عن غرفة عادل وبعد ما عرف مكانها راح لعندها ..
بعد ما وصل للغرفه دق الباب وبعد شوي طلعت امها ولما شافته قالت: اهليين .. انت رفيج دانا ..
سامي بإبتسامه: كيفج يا خاله ..؟! وكيف دانا ..؟!
الام بحزن: انا بخير بس البنت حالتها ما تسر ..
سامي: ممكن ادخل اشوفها ..
بعدت الام وتركت سامي يدخل ..
لما دخل انتبه لأخوها عادل اللي كان جالس عالكرسي والعكاز جنبه ..
سامي: اوووه انت عادل .. اول مره اشوفك ..
ابتسم عادل وقال: وعليكم السلام ..
سامي: هيه ياني ريان رقم اثنين .. لزوم الاحراج يعني ..
عادل: لا ابد مو قصدنا .. بس يعني من الادب الواحد يسلم ..
سامي بإحراج: هههه طيب ..
لف على دانا وشافها تطالع فيه بإبتسامه ..
اخفت ابتسامتها بسرعه وقالت: كيفك سامي ..؟!
سامي: بخير .. هيه دانا ليش جذي ما علمتينا عن اللي فيج ..؟! ذي اسمها نذاله .. ليش ما قلتي لنا نساعدج ..؟!
لفت وجهها وقالت: ماكو فرق لو قلت او ما قلت لأنه في النهايه مرضي ماله علاج .. بالعكس راح اضايق خلقكم لو علمتكم ..
سامي: صج انج خبله عوده .. شنو يعني اضايق خلقكم .. يمكن مرضج ماله علاج بس فيه شيء اسمه نشيل الكبد ونييب وحده يديده .. زراعة كبد ..
طالعت دانا فيه بدهشه وهي متفاجئه .. ما كانت تدري ان لمرضها علاج ..
بس هالامل اختفى لما تذكرت حالتهم الماديه ..
من فين راح تييب فلوس الزراعه ذي ..
سامي: شفيه الاحباط ظهر على ويهج ..؟! دكتورج شنو اسمه ..؟!
دانا بهدوء: عبد الكريم ..
سامي: انا رايح لهالعبد الكريم واتناقش معاه سالفة الزراعه ذي .. جهزي نفسج لأنه ممكن تكون السالفه فيها سفر لبرى ..
انصدمت دانا من كلامه بعدها قالت: لا لا مو لازم .. انا ما راح اصلح ذي العمليه .. ما عندي فلوس تكفي و....
قاطعها سامي: اشش بلا دلع .. منو قالج انج راح تدفعين .. انا بأدفع و....
قاطعه عادل: لا يا سامي مستحيل .. حتى لو فيه شيء اسمه زراعة كبد فثمنها وايد عووود .. ويمكن اغلى من زراعة الكلى لأن الكبد اهم .. الكبد عنصر الحياة في جسم الانسان .. الانسان ممكن يتخلى عن احد كليتيه بس اذا تخلى عن الكبد يموت .. السالفه مب سهله وتكلف وايد ..
سامي: المهم انه يكون فيه كبد وما عليكم من الثمن .. الخير وايد ..
دانا: لا ..
لف سامي عليها فكملت: انا ما اقبل مساعده من احد .. ما اقبل صدقه من احد .. خل فلوسك لك واتركني بروحي ..
طالع فيها فتره بعدها قال: مع نفسج .. راح ادفع غصب عنج وراح اساعدج غصب عنج .. لعلمج انا ما احب اتعامل مع مدلعات فأتركي الدلع على ينب ..
خرج وقفل الباب وراه قبل لا يسمح لأحد يتكلم ..
تجمعت الدموع بعيونها وهي تقول: ليش جذي ..؟!
جلست امها جنبها وحضنتها وهي تقول: اهدأي الريال فيه الخير فليش متضايقه ..
دانا وهي تبكي: بس انا ما ابي .. ما ابي اضايقه بمشاكلي ما ابي .. اللي فيه يكفيه ..

.............................................

اما سامي فكان متجه لغرفة
الدكتور والجوال بإذنه يتصل بابوه ..
رد الاب وقال: نعم ..
سامي: اممم ابغاك تحول لي مبلغ عود على حسابي ..
الاب: والسبب ..؟!
سامي: خاص ..
الاب: مو من عادتك تطلبني .. ذي ثاني مره تطلب مني احولك مبلغ بدون لا تقول السبب ..
عقد سامي حاجبه وهو يقول: ثاني مره ..؟!! متى ..؟!
شوي تذكرت سالفة الشرطه والدين واسيل ..
ايه لما انسجنت على سالفة الاوراق اللي ما سرقتها ..
ذاك الوقت لما ما قدر يقابل ابوه اتصل عليه وطلب منه ..
سامي بقهر في نفسه: "ذاك الوقت طلبت اني اقابلها بس هي رفضت .. وبعدها على طوول طلعت من السجن .. طارت من ايدي" ..
قاطع افكاره ابوه يقول: جم تبي ..؟!
سامي: مدري .. بس كثيير للإحتياط .. وكمان ا.......
طوط طوط طوط ..
طالع سامي في جواله بضجر وهو يقول: قفل في ويهي ..
حط الجوال في جيبه ودق على غرفة الدكتور ..

========================================