شبكة همس الشوق - عرض مشاركة واحدة

17 - 3 - 2014, 06:32 PM

الساعه عشره وفي الفندق اللي عملت فيه عهد الحفله بمناسبة سلامتها ..
كانت الحفله فخمه بمعنى الكلمه وهذا دليل على انها من طبقه شوي غنيه ..
المكان مزدحم بمعارفها ومعارف ابوها وامها المتوفيه ..
ومزدحم بطلاب الجامعه اللي اعطتهم الدعوات ..
كانت واقفه وهي في ابهى حله والابتسامه ما فارقت شفاهها ..
ومع هذا كانت متوتره وتدور بعيونها على طارق .. شافت اصحابه الاثنين بس ما شافته ..
عهد في نفسه: "وين طارق ..؟! اخاف ما يي لأن اصحابه هني وهو مو موجود .. يا رب يي" ..
جاء ابوها عندها وقال: شفيها ابتسامة حبيبتي اختفت ..؟!
ابتسمت عهد وقالت: لا بس كنت انطر واحد وما ياء .. ان شاء الله يي ..
ابتسم لها ابوها وقال: لهدرجه هالواحد مهم ..؟!
ابتسمت بإحراج فقال ابوها: اذا ياء عرفيني عليه ..
عهد: طيب ..
راح ابوها لواحد من اصحابه وبدأ يسولف معاه ..
انتبهت عهد لشلة راشد بس استغربت ان راشد مو معهم ..
هزت كتفها وبعدها جت وحده من صاحباتها وسولفت معاها ..

وقف طارق سيارته ونزل منها ..
طالع في الفندق وهو ماله نفس يحضر .. بس جاء عشان صاحبه بسام ..
دخل فشاف اصحابه انس وفهد ينتظروه ..
جاء عندهم وقال: يا هلا ..
طالع انس فيه وقال: صح النوم .. تونا انا وفهد كنا راح نييب لك مخده ولحاف ..
طارق: لا شكرا عندي ..
فهد: صج انك سخيف .. ليش تأخرت ..؟!
طارق: كان عندي شغله ..
انس: بس بصراحه فاتك اللي صار ..
طارق: احسن .. اصلا الحفله مو هامتني ..
فهد: خبل .. هيا اطلع لرفيجك اليديد ..
طارق: هههههههه بالعكس هو رفيجي القديم .. من ايام الاعداديه واحنا اصحاب .. اما انتم من الجامعه عرفتكم ..
انس: ايه صح نسيت اقولك ان عهد سألت عنك ..
طلع طارق جواله وهو يقول: باتصل ببسام ينزل لي عشان اروح معاه قبل لا تشوفني ..
فهد: ههههههههههههههههههههههههههههههههه ..
طارق: شفيك تضحك ..؟!
ابتسمت عهد وقالت: كيفك طارق ..؟!
لف طارق وراه بتفاجؤ وشافها واقفه والابتسامه على شفتها ..
اعطى فهد نظره بعدها ابتسم وقال: الحمد لله بخيير .. كيفج انتي وايش اخبارج ..؟!
فتحوا انس وفهد عيونهم بصدمه من تصرف طارق ألغير معتاد ..
من متى طارق مهذب من متى ..؟؟!!!
عهد: الحمد لله تمام .. الحمد لله إنك ييت .. توقعت ما راح تحضر ..
طارق: المهم الحمد لله عالسلامه ..
عهد: الله يسلمك .. بابا يبغى يسلم عليك ..
طارق: اوكي ..
راحت عهد لابوها وطارق وراها ..
واما المساكين فهد وانس كانوا محتاجين احد يصحيهم من صدمتهم ..

جت عهد عن ابوها وقالت: بابا .. هذا هو رفيجي اللي كنت انتظره ..
لف ابوها عليها بعدها لف يطالع في طارق ..
انصدموا اثنينهم لما شافوا بعضهم ..
ابو عهد: طارق ..!!! انت ..!!
عهد بإستغراب: تعرفه ..؟!
تغيرت ملامح وجه طارق من الصدمه إلى الحده وقال: من وقت ما شفتك وانا اقول اني مشبه عليك .. طلعت ابو عهد يا الاستاذ سالم .. يا رئيس عمارتنا الموقره ..

سالم .. صاحب العماره .. ابو عهد ..
بس حبيت اقول لكل من كان يضن انه ابو اسيل هارد لكم ..
فكروا بواحد ثاني :p

لف سالم على بنته وقال بحده: شنو يساوي ذا هني ..؟! منو اللي ناداه ..؟!!
خافت عهد من نبرة ابوها وقالت: ا انا اعطيته الدعوه .. هو في نفس كلاسي ..
طارق: اطمئن اصلا مالي اي رغبه بذي الحفله .. انا طالع فوق عند رفيجي .. استمتع فيها ..
لف ومشي وفي ايده جواله يتصل ببسام وتفكيره كله في سالم ..
كان كل ما يشوفه يحس انه قد شافه بس ما توقع انه يكون ابو عهد ..
استغرب لما سمع صوت رن جوال وراه ..
حط واحد ايده على كتف طارق وقال: لا تتعب نفسك وتدق ..
لف طارق فشاف بسام فإبتسم ولما كان حيتكلم سكت وهو يطالع في لصق جروح على خده وشاش ملفوف على إيده فقال بتفاجئ: بسام شنو ذا ..؟!
ابتسم بسام وقال: ما عليك دخلت في مضاربه صغيره مع واحد .. المهم انت ليش تاخرت ..؟! من زمان انتظرك ..
طارق: مين هالواحد وليش تتضارب معاه ..؟!
بسام: لا حوول ياخي انسى السالفه .. شيء بسيط وانتهى على خير ..
طارق: انتهى على خير ..؟! تضحك على مخي انت ..؟!
بسام: ههههههه المهم انت خبل بصراحه .. كنت ناوي اعرفك على ياري مصعب بس راح قبل لا تيي بربع ساعه .. تعال نطلع لمجان هادي ..
تنهد طارق وراح معاه للجهه الثانيه من الفندق .. طلبوا لهم نسكافيه وجلسوا على المقاعد ..
بسام: إلا ما قلت لي ليش تأخرت ..؟!
طارق: لا بس انشغلت بشغله عاديه ..
بسام: ويهك يقول انها مو شغله عاديه .. وين كنت ..؟!
طالع طارق فيه شوي بعدها قال: شفت البنت اللي حكيتك اول عنها ..
بسام: اخسس .. وها شصار بينكم ..؟!
طارق: ولا شيء .. باين انها حييل متألمه .. وربي كسرت خاطري وودي اساعدها بس البنت كارهتني ..
بسام: ما ألومها .. اللي ساويته مب سهل ..
طارق: بس المهم عرفت وين تدرس ووين تسكن ..؟! تحداك منو علمني ..؟!
بسام بإستغراب: منو ..؟!
طارق: صاري ..
بسام: اوووه صاري .. وحشني ذا الدب .. من زمان ما شفته ..
طارق: ههههه ياخي ذا الانسان على نفس طبايعه ما تغير ..
بسام: هههههههه طيب لا تنسى تعطيني رقمه عشان اكلمه ..
طارق: اوكي .. ايه شصار على سالفة بنت اختك ..؟!
تنهد بسام وقال: لحد الان ما في تطور .. اعطيت الرقم لمروان عشان يحاول يطلع لي مكانها او معلومات عنها ولحد الان مافي يديد ..
طارق: طيب وابوها .. ما تكلمت معه مره ثانيه ..
بسام بقهر: هالانسان راح اقلل من قيمتي إذا حاجيته .. هو يشتغل بتجاره مشبوهه وابي اوقع فيه .. عندي دليل ضده ..
طارق: حلو .. وشصار ..؟!
بسام: اخذه مني في غفله .. هالواطي ..
طارق: طيب وبعدين ..؟! ما عندك نسخه من الدليل او اي شيء ..؟!
بسام: لا .. ما كنت اتوقع انه يكون عارف عنه .. ابي اعرف شلون عرف شلون ..؟! شدراه ان الدليل موجود باللاب وشدراه انه في اللاب الثاني بالضبط .. انا ما خبرت احد فكيف ..؟! هالامر بيينني ..
طارق: يمكن حاط جاسوس للإحتياط ..
بسام: هذا اللي توقعته .. اكيد حط بس ما هددته اول مره .. بس منو هالجاسوس ..؟! آخخ عالعموم هالسالفه انا اجلتها ..
طارق: طيب اللحين شلون راح توقع فيه ..؟!
ابتسم بسام وهو يقول: اقتربت من دليل ثاني واكثر مصداقيه ..
طارق بإهتمام: شنو تقصد ..؟!
بسام بنفس إبتسامته: فيصل عبد الرحمن ..

========================================

في منتصف الليل وبغرفة مساعد ..
كان إياد وبدر متربعين عالارض وقدامهم الاوراق اللي اعطتهم لينو اليوم مع الاوراق السابقه ..
طالع بدر بإياد اللي كان عاقد حواجبه ويطالع في الاوراق وقال: اللي نبغاه مب مويود ..
إياد: فعلا .. بالبدايه طلبنا منها اسماء اللي يشتغلوا تحت إيده وبعدها بعض القضايا اللي استلمها ابوها واخر مره طلبنا معلومات شامله عن ابوها ..
بدر: اللحين اللي انا مستغرب منه انها اعطتنا معلومات عن ابوها من غير ما تسأل عن السبب ..
إياد: فعلا هالتساؤل حيرني وكمان ما طلبت فلوس كالعاده .. المهم فيه شيء نقدر نستنتجه من ورى هالاوراق .. اولا ابوها يشتغل في الشرطه وبرتبة مفتش .. شوف هالمعلومه ايش تقول ..؟!
بدر: هذا مقدار راتبه ..
إياد: وكمان هو ما عنده شغله غير ذي .. التساؤل اللي حيرني هو رصيده بالبنك .. هالتحويلات مبالغها اكثر من راتبه .. يمكن تكون هدايا او ترقيات بس ما تحصل في كل شهر ..! هذا الشيء مو معقول ..!
بدر بإبتسامه: هذا يعني انها ممكن تكون رشاوي يتقاضاها عشان يطلع ابناء ناس كبار ..
إياد: بالضبط واللي اكدلي هذا هو ذا الاسم .. مطلق صالح ال**** .. شنو يذكرك هالاسم ..؟!
بدر: لحضه لحضه .. هذا اسم ولد رئيس مجموعات المعالم للمواد الغذائيه ..
إياد: يب .. واسمه هني مدون مع اسامي المجرمين اللي متهمين باكثر من قضيه ومع هذا طلع منها برائه .. هذا اللي اكدلي انه يتلقى رشاوي ..
بدر: بس المشكله شلون نثبت انه ياخذ رشاوي .. ماكو دليل مادي ..
إياد: فعلا .. وحتى لو شافوا الحوالات المصرفيه يقدر يطلع لها جذبه .. اخخ بس لو عندنا سجل مفصل عن قضاياه ..
بدر: لينو تقول انها دورت بس ما حصلت ..
إياد: اكيد ما راح تحصله .. لأن في ذي التفاصيل اسماء شهود وادله هو اخفاها عشان يطلع هالمتهم برئ .. واكيد من ذي القضايا فيه الشكاوي ضد ابنه وشلته .. يا كثر ما اشتكينا .. مره بالخمر والمخدرات اللي معاهم ومره بسبب إعتدائهم علينا بالضرب ومره بسبب سرقه وغيره بس كان يتستر عليها ..
بدر: لو راس البلا ذا ينمسك فبالسهوله نقدر نسجن جراح واللي معاه ..
إياد بإبتسامه: اهم شيء اننا قدرنا نطلع له مخالفات .. الرشاوي شيء مو سهل .. بس ناقصنا الدليل وما ندري من فين نييبه ..
شوي إختفت إبتسامة إياد وقال: لازم نطلع دليل قبل لا ينتهي باجر .. هالقرده الثلاثه واضح ان وراهم شيء .. تهديدهم لي ما كان عادي .. كانوا واثقيين ..
بدر: طيب اطلب منها إنها تدور عدل ..
إياد: تقصد لينو ..؟!
بدر: إيوه ..
إياد: مدري بس مره محيرتني .. ساعدتنا بدون اسئله كعادتها .. شكلها ناويه على شيء ..
بدر: لا ما اضن ..
إياد: شلون ما تضن ..؟! هذا ابوها .. انا لو واحد طالب هالطلبات لو ايش ما يصير مستحيل اسكت .. لازم اتصرف باي طريجه ..
اخذ جواله وقال: عالعموم راح اطلب منها ذا ..
اتصل وبعد كم رنه ردت وهي تقول: نعم ..
إياد: نعامه .. خبله ما تعرف ترد مثل الناس ..
دقه بدر وهو يقول بهمس: ياخي بطل نرفزه ..
إياد بضجر: طيب ..
سكتت لينو لفتره بعدها قالت بهدوء: شنو تبون هالمره ..؟!
إياد: بسبعه ريال كود رد مع ساندويتش شاورما .. والحساب على رفيجتج سيمو ههههههه ..
دقه بدر بقوه فقال إياد: اخخ ياخي لا تضرب هني مجان الجرح حق جراحوه ..
بدر: طيب خلصنا ولا اعطني انا اكلمها ..
إياد بضجر: اوفف منك .. مليق ..
لينو: إياد خلصني ..
إياد: طيب طيب سمعيني .. اممم هذا يمكن يكون اخر طلب .. ابي سجل فيه تفاصيل القضايا اللي استلمها ابوج ..
لينو: مو قلت لكم ما لقيته ..
إياد: دوري عدل .. نبغاه باجر ضروري ..
لينو: اوكي حاضر راح ادوره من يديد .. اي اوامر ثانيه ..؟!
إياد: ااه لا .. بس غريبه ما سألتينا عن السبب ..
سكتت لينو فتره بعدها ضحكت ضحكه غريبه ما قدر إياد يفسرها ..
بعد ما اطلقت ضحكتها قالت بهدوء: واصلوا طريجكم يا شطار ..باي ..
قفلت الجوال فطالع إياد فيه وهو عاقد حواجبه بتفكير ..

.................................................. .....................

رمت لينو الجوال جنبها السرير وطالعت في الملف اللي قدامها ..
كان فيه نسخه من كل الاوراق اللي طلبوها ..
ظلت فتره ضامه رجلها وتطالع في الاوراق وآلاف الافكار في راسها ..
قفلت الملف وقالت بهدوء: امس دورت عالسجل اللي يبغوه بس ما حصلته .. وين ممكن يكون ..؟!
عقدت حواجبها بتفكير بعدها قالت: لحضه .. فعلا هذا ممكن ..
رفعت نظرها وطالعت في الشباك ..
ضاق نظرها وقالت بهمس: طيب ليه ..؟! لييه ..!

========================================