شبكة همس الشوق - عرض مشاركة واحدة

17 - 3 - 2014, 06:36 PM

|$[ البآرت الثامن عشر الجزء الثالث ]$|

الساعه ثلاث ونصف ..
وعلى متن احدى الطائرات ..
كان يطالع من الشباك بحماس وهو يقول: واااو شادي طالع البيوت كلها تحتنا .. وكلهم يشغلون اللمبات .. والله الطياره فوقهم كلهم ..
شادي بثقل: ايه توك تدري .. صج انك ياهل ..
لف وسيم وقال بإنبهار: انت من اول تعرف ..؟!!!
شادي: طبعا .. قد سافرت مره عليها مع امي مع اثير وشهد وانت لسى ما ولدت ..
وسيم: اللـــــه يعني ذي ثاني مره اركب فيها طياره ..
شادي: اول مره يا الخبل .. ذاك الوقت انت لسى ما ييت ..
وسيم: بس كنت انا وشادن ببطن امي .. يعني ركبنا ..
شادي: والله انك خبل .. ذاك الوقت ما كنت ببطن امي ..
وسيم: عيل وين كنت ..؟! بالسوق مثلا ..
شادي: ها ها ها يا شين سماجتك .. اصلا انت صغير ما راح تفهم ..
لفت اثير على شادي اللي يجلس جنبها وقالت: وانت متى تبطل جذب ..؟! متى طلعنا الطياره يا استاذ ..؟!
شادي: يووه شكلج نسيتي الله يعينج .. حتى ذاك الوقت قدموا لنا شاورما ..
لف طارق على ورى وطالع في شادي وقال: صج انك بكاش .. من امتى الشاورما يقدموها في الطياره ..
شادي: ها .. آ آ ذيج كانت طياره خاصه ..
طارق بنص عين: طياره خاصه .. راح انبه امي على جذبك عشان تربيك .. وحط في بالك ترى امي شديده ..
بوز وسيم وقال: شادي الجذاب .. ما راح اصدقك مره ثانيه ..
شادي: هيه وسيم خلنا نتبادل .. تعال ينب اثير وانا ينب طارق لأني ابي اسأله شيء ..
وسيم: لا ما ابي .. ابي اكون ينب الشباك مو عالطرف ..
شادي: اوووه طيب تبادل مع اثير لما تيي مجاني ..
وسيم بتفكير: امممم طيب ..
قام وتبادلوا ..
جلس شادي جنب طارق وقال: هيه طارق ابي اسألك .. امك عصبيه ..؟!
طارق: وايد ..
شادي: طيب يعني تضرب ..؟!
طارق: والله اللي ما يسمع الكلام يستعد للعقاب ..
شادي بضجر: يعني لازم ايلس مؤدب ..
طارق: طبعا ..
شادي: طيب عندك اخوان كثيير هناك ..؟!
طارق: هههههه ماكو غير اختي سهام بالثانوي ..
شادي: سهام .. يشبه اسم صديقة اختي مع اني عمري ما شفتها .. طيب هي متغطرسه مثلك ..؟!
رفع طارق حاجبه فضحك شادي وهو يقول: هههههه لا الدب المتغطرس هو ذاك .. انت البطل المغوار ..
طارق: اقول لا يكثر بس ..
شادي: طيب اختك تحب تصلح المقالب ..؟!
طارق بنص عين: هذا همك .. ايه هي من هالنوع بس اتمنى انك ما تفكر تصلح مقالب فاهم ..؟!
شادي بإبتسامه: اوككي ..
طارق: الله يستر .. واللحين ممكن تريحني من ثرثرتك ..
شادي: انت انسان ممل .. كمل كمل سرحانك ..
ابتسم طارق بهدوء بعدها اسند دقنه على إيده وطالع في المسافرين ..
تقدم وسيم ودق كرسي شادي ..
لف شادي فقال وسيم بهمس: شادي شادي خلنا نستكشف الطياره ..
ابتسم شادي وقال: فعلا .. انت اولا روح للحمام وبعدها بالحقك ..
وسيم بحماس: طيب ..
اثير: انتم عن شنو تتهامسون ..؟!
وسيم: كنت اسأله عن مجان الحمام ..
اثير بعدم إقتناع: اها ..
قام وسيم من مكانه وراح لجهة الحمام ..
بعد دقيقه قام شادي فقال طارق: وين رايح ..؟!
شادي: بروح الحمام ..
طارق بشك: متأكد ..؟!
شادي: ايه ..
طارق: عيل باحسب لك ثلاث دقايق إذا ما ييت راح ايي ادور عليك .. صاحب المشاكل ماله امان ..
شادي بضجر: طارق انا راح اطول في الحمام فلا تحرجني ..
طارق: دامك بتطول فليش ما دخلت الحمام قبل لا تسافر ..؟!
شادي: وقتها ما كنت حشران بس اللحين ....
قاطعه طارق: بس بس لا تشرح .. روح ولك نص ساعه ..
شادي: يووه طارق انا اخر مره دخلت الحمام وطولت فيه كان قبل يومين فعشان جذي كل هالوقت ...
طارق: خلاص .. يا شين البزارين لا يوا يشرحون .. لك اربعين دقيقه ولا يكثر ..
شادي: طيب ..
قام وراح لجهة الحمام ..
طالع طارق في ساعته وقال: اصلا شوي ونوصل ..

وصل شادي لعند وسيم اللي كان واقف عند باب الحمام ..
وسيم: تأخرت ..
شادي: بالعكس ييتك بدري .. اسمع اسمع لازم نصلح حماس مثل اللي في التلفزيون ..
وسيم: مو فاهم ..؟!
جت عندهم احد المضيفات وقالت: شفيكم يا حبايبي واقفين هنا .. ضيعتوا الطريج ..
شادي: شايفتنا اطفال عشان تقولين ضيعتوا الطريج .. صج سخيفه ..
انزعجت المضيفه من كلامه بس حاولت تبتسم وقالت: عيل شموقفكم هني ..؟!
شادي: اخوي يخاف يدخل الحمام لوحده فعشان جذي ييت امسك له الباب ..
المضيفه: اها .. طيب خلصوا بسرعه ..
شادي: وانتي شدخلج ..؟!
شدت قبضتها من العصبيه وهي تردد داخلها: "المعامله الحسنه .. شغلي يحتم علي اني اتعامل مع المسافرين بمعامله حسنه" ..
ابتسمت وقالت: اولا باجي ربع ساعه ونوصل المطار فلازم تكونوا في اماكنكم .. ثانيا عيب البزارين يتحجوا مع الكبار جذي ..
شادي: وليش عيب ..؟! انا شنو قلت عشان تقولين عيب ..؟! ياللا روحي شوفي شغلج قبل لا اعلم رئيسج بالشغل عن إهمالج ..
ضبطت اعصابها وهي تقول: يا ولد فارج عن ويهي وخلك محترم قبل لا ....
قاطعها شادي: قبل شنو ..؟! قبل لا اضربك ..! قبل لا أأدبك ..! انا راح اشتكي عليج لما نوصل واخليهم يطردونج ..
ابتسمت المضيفه وقالت: شنو قلت ..؟! هههه اصلا انت ما تعرف منو رئيسي ههه ..
شادي: عادي بأشتكي لأحد الصحفيين اخليه يكتب مقال ضدكم ووقتها انتي عارفه شنو بيصير ..
تصبب العرق من وجهه المضيفه وهي تقول: هههه يا حبيبي الله يهديك ماله داعي هالمشاكل .. ياللا امسك لأخوك الحمام وخذوا راحتكم ..
ولفت وراحت ..
شادي: هههههه شفت يا وسيم شلون خليتها تخاف ..
وسيم بإنبهار: واااو انت بطل ..
شادي بغرور: من زمان بطل .. خلاص بعدين اعطيك توقيعي .. خلنا اللحين نصلح اللي ببالي ..
وسيم: شنو اللي ببالك ..؟!
شادي: امممم شرايك نصلح مثل اللي بالافلام ..
وسيم: شتقصد ..؟!
شادي: نصلح إزعاج ونقول في قنبله في الطياره فيخترعون الناس وتصير فوضى هههههههههههههههههه ..
شوي كمل: لا بايخه لازم ندور غيرها ..
وسيم: طيب شنسوي ..؟! اللحين نوصل لعند ام طارق واحنا ما سوينا شيء ..
شادي: امش امش نروح المطبخ ناكل لنا شيء لاني جوعان ..
وسيم: عندهم مطبخ ..؟!!
شادي: طبعا .. عيل شلون يابوا لنا الاكل الغبي اللي قبل شوي ..؟!
وسيم: ياللا ياللا نروح ..
مشي شادي مع وسيم لحد ما وصلوا لغرفة المضيفات ..
شادي: هيه ابي اكل ..
لفت ذيك المضيفه ولما شافته قالت بصدمه: لاحقني لحد هني ..!!
شادي: انه الحب .. اقول ابي اكل ولا يكثر على قولة طارق ..
جت المضيفه عنده وهي ودها تصكه ببقس يوصله للمطار بسرعه ..
حاولت تكون مهذبه وقالت: حبيبي قبل شوي مرينا عليكم بالاكل و....
قاطعها شادي: ييبوا لي مضيفه غير ذي الخبله اللي ما تفهم ..
تنرفزت المضيفه ومسكته من بلوزته وقالت: وصلت حدي يا ولد .. لا تحدني اعطيك بقس يعلمك الادب وحسن التعامل ..
شادي: اول شيء علمي نفسج الادب وحسن التعامل .. دامج مضيفه فلازم ذي الخصل تكون متواجده ..
ضحكوا المضيفات اللي كانوا فيه وكمل شادي: فكيني قبل لا اروح اشتكي على خدمتكم للصحافه ..
احمر وجهها من العصبيه وهي تردد في نفسها: "المعامله الحسنه المعامله الحسنه .. تحملي يا جواهر تحملي تحملي" ..
فكته بطريقه حاده وقالت بعدوانيه والابتسامه بالقوه طلعت: عفوا .. لم نقصد الازعاج .. عندك طلب ..؟!
عدل شادي بلوزته وقال: خخخ واضح انج معصبه .. ابي شاورما ..
وسيم: حتى انا .. ومعاه عصير شوكولاته ..
شادي: انا ابي شاني .. وييبي لاختي شاورما بعد مع ميرندا .. وطارق بعدين ياخذ بنفسه ..
وسيم: خلاص انا ابي سفن اب والشكولاته بعدين ..
ارتفع حاجب المضيفه جواهر ونزل اكثر من مره وهي كاتمه عصبيتها ..
ذولا شنو شايفين نفسهم ..؟! عبالهم انهم ببوفيه مثلا ..؟!
مسكت اكتافهم وطلعتهم برى وهي تقول: غلطانين بالعنوان .. هني طياره مب كافتيريا يا بابا انت وياه ..
وسيم: هيه هيه شادي تقول بابا لنا كلنا .. كيف الواحد يكون عنده ابوين ..
شادي: انا اقولك كيف .. اممم لا لا انت صغير عيب ..
وسيم: اصلا ما يي .. كيف ينادونها بعدين ..؟! ما ينفع ينادوها باسم ابوها الاثنين صح ..
شادي: يا غبي هي لما قالت يا بابا فهذا يعني انها مدلعه .. المدلعين عندهم اباء كثيرين ..
وسيم بإنبهار: من جد ..؟!!!
شادي: اكييد .. بس ذي مو مدلعه .. بالله طالع في ويهها .. بذمتك ذا ويه .. حدها ديايه ضايع منها ريشها ..
وسيم: هههههههههههه صارت مثل الدياي اللي نشتريه وهو مو ناجح ..
شادي: ههههههههههههههههه ايه ايه ..
مشيت المضيفه وراحت لغرفة الركاب وقالت بصوت شوي مرتفع: اعتذر على الازعاج بس يوجد عندنا طفليين ضايعين من اهلهم .. ارجوا ان تتفقدوا اطفالكم وان يأتي ولي امر الطفلين ..
عقد طارق حواجبه ولف ورى وما شاف غير اثير ..
حط إيده على وجهه وهو يقول: يالهي ساعدني .. هالثنائي المزعج ما رحموني حتى بالطياره ..
قام وراح لجهة المضيفه وقال: معليش الاطفال هم تبعي .. اكيد سببوا الازعاج ..
المضيفه: الازعاج وبي .. ذولا طلعوا قرون في راسي ..
رفع حاجبه وهو يطالع فيها ..
بالعاده الناس الذوق يقولوا لا عادي ما صار شيء ..
انتبهت المضيفه لنظرات طارق فقالت: احم لا عادي .. حصل خير ..
طارق: وينهم ..؟!
دخلت المضيفه وهي تقول: هني ..
راح طارق وراها لحد ما وصل لوسيم وشادي اللي ماشين في سوالفهم ويتكلمون ..
رفع حاجبه لما سمع شادي يقول: لا .. بالبدايه اللي اعرفه انهم يحطون اسمنت عشان الطوبه تلصق في الثانيه وما يطيحون ..
المضيفه في نفسها: "هذولا وين وصلوا بسوالفهم" ..؟!
وسيم: عيل شلون تلصق البويه كمان ..؟!
طارق: فيها ماده اتمنى من كل قلبي اني احطها بالمقاعد عشان تنثبروا مجانكم ولا تتحركون ..
لفوا وسيم وشادي عليه بصدمه ..
شادي بتفاجئ: ط طارق ..! انت شنو يابك ..؟!
وسيم: يمكن يبغى الحمام ..
شادي: عيل الطريج من هناك مب هني ..
طارق: تستظرف انت وياه ..!!
شادي: ا اسفين ..
طارق بحده: بسرعه جدامي عالمقاعد ..
وسيم: حاضر ..
مشيوا قدامه وجلسوا في اماكنهم ..
جلس طارق وقال: شنو كنت تسوون هناك ..؟! شنو نوع المصيبه اللي عملتوها ..
شادي: باجي ما سوينا شيء ..
طارق: يعني تعترف انك كنت ناوي .. مستوى الوقاحه عالي عندك .. واللحين ما ابي اسمع لا همس ولا نفس .. فاهمين ..؟!
شادي: إذا ما تنفسنا راح نموت ..
طارق بحده: شادي ..!
شادي: اسف ..
وبعدها ظلوا ساكتين لحد ما وصلوا للمطار ..
نزلوا منها وإستأجر لهم تاكسي واتجهوا لفلة اهله ..
بعد نص ساعه تقريبا وصلوا ..
طلع طارق المفتاح وفتح الباب ودخلوا هو واولاد عمه ..
شغل اللمبات فقال شادي: البيت فاضي .. شكلهم نايمين ..
طارق: اسكت ..
سمعوا صوت باب ينفتح وشوي شافوا وحده تنزل من الدرج ..
ابتسم طارق وقال: كنت حاس انج بتصحين ..
راح لعندها وسلم على راسها وقال: كيفج امي ..؟!
الام بتفاجئ: طارق .. انت شلون ييت ..؟!
طارق: هههه بالطياره .. معليش لأني ما اعطيتج خبر من اول ..
الام: الله يصلحك فجعتني ..
شادي بهمس: صحيت لأن طارق فتح الباب وشغل اللمبات .. هذا يعني ان نومها مرره خفيف .. وسيم بيكون مستحيل لنا اننا نتحرك بالليل لأنها اكيد بتحس فينا ..
وسيم بإحباط: صج ..؟!
شادي: إيه صج ..
طالعت الام في الاولاد وقالت: هذول اولاد عمر ..
طارق: ايوه يبتهم لج لاني اعاني من مشاكل في تأديبهم ..
طالع في شادي وقال: وخصوصا ذا .. خلي عينج عليه ..
ابتسمت الام وقالت: بس هم ثلاث .. اللي اعرفه انهم خمسه ..
تنهد طارق وقال: باجي بنتين .. الكبيره لحد الان ما حصلتها .. والطفله صلحت عمليه والحمد لله عدت على خير واللحين هي تحت المراقبه .. لما تشفى تماما راح اشوف وقت فاضي وايبها لج ..
الام: لا حول ولا قوة إلا بالله .. شلون الطفله مصلحه عمليه ..؟!
طارق بإنزعاج: مدري عن اختها .. حطتها بالمستشفى ولا عاد سألت عنها .. معليش بس هي وحده مهمله .. لو ما صادف ان هالخبل ما اكل طعام مكشوف جان ما رحت للمستشفى ولا اتصلوا علي ووقتها الله العالم شنو بيصير لهالصغيره اللي حالتها صارت اسوأ بسبب تأخير اختها .. مو كافي إخوانها راميتهم بالشقه راحت ترمي الصغيره بالمستشفى وهي بذاك الحال ..
الام: استهدي بالله يا طارق .. يمكن البنت عندها ظروف .. حرام تسيء الضن فيها .. خلاص إهدأ وما صار إلا الخير ..
شادي بعصبيه: طارق لا تسب اختي جذي .. هي مو مهمله ..
طارق بحده: انت انجب ولا تتدخل ..
الام: طارق خلاص شفيك منفعل .. اذكر الله ..
تنهد طارق وقال: لا إله إلا الله ..
جت الام عندهم وقالت: شسم هالشجاع اللي دافع عن اخته ورفع صوته على اللي اكبر منه .. لان له حساب عندي ..
شادي: انا شادي .. وانا مالي دخل عشان تحاسبيني .. شوفي لولدج اللي يسب اختي المسجينه ..
الام: شوفي لولدج ..؟!! اللحين هذا اسلوب محترم ..؟! اعتذر اشوف ..
شادي: اسف بس طارق سب اختي وانا ما اسمح له .. كل شيء إلا شهد محد يمسها بكلمه ..
طلع طارق الدرج وهو يقول: انا طالع انام .. امي اوراقهم عندهم فإذا ما عليج امر باجر روحي سجليهم بالمدارس اللي هني لأني حددي تعبان وابي ارتاح ..
الام: نوم العوافي ..
لفت على وسيم وقالت: وانت شسمك ..؟!
ابتسم وقال: وسيم ..
طالعت في اثير وقالت: وانتي ..؟!
اثير: اسمي اثير ..
طالعت فيهم فتره وقالت: شكلكم تعبانين من السفر .. تعالوا وراي عشان اوديكم لغرفكم ..
طلعت الدرج ومعاها الشنطه الكبيره وطلعوا الاولاد معاها ..
فتحت غرفه وحطت الشنطه فيها وقالت: هني راح ينام شادي ووسيم ..
شادي بهمس: وناسه .. انا وياك لوحدنا ..
وسيم: مرره حلو ..
لفت الام إلى اثير وقالت: والله الغرفه الثانيه لساتنا ما زهبناها .. بس نامي اللحين بغرفة بنتي سهام ..
اثير: طيب ..
راحت الام مع اثير وفتحت غرفة سهام اللي كانت في سابع نومه ..
ولعت اللمبات وعصبت لما شافت كتب سهام معفوسه على بعض جنب الشنطه ..
حتى مكتبها عليه عملها الفني واغراض الفني المكركبه على بعض ..
كالعاده كانت راح تصحيها امها وتهاوشها بس بطلت ..
فتحت الولاب وطلعت منه فرش وفرشتها عالارض مع البطانيه والمخده وقالت: باجر راح نرتب لج غرفه واللحين نامي هني ..
اثير: طيب ..
طفت الام اللمبات وقالت: تصبحين على خير ..
اثير: وانتي من اهله ..
قفلت الباب ورحت لعند الاولاد فشافتهم نايمين بسابع نومه ..
ابتسمت ولحفتهم وشغلت المكيف وقفلت الابواب ..
طالعت في ساعتها وقالت: باجي اقل من ساعه على الاذان ..
راحت لغرفتها وصلت الوتر وقرأت القرآن لحد ما يأذن ..

========================================