شبكة همس الشوق - عرض مشاركة واحدة

17 - 3 - 2014, 06:42 PM

الساعه 6 تقريبا ..
كان سامي يلف البيت كله يدور على ابوه ..
واخيرا فتح باب المكتب ولقاه مشغول بأوراق معاه ..
رفع راسه وقال بهدوء: ما تعرف تستأذن قبل لا تدخل ..
قفل سامي الباب وجلس عالكرسي وهو يقول: راسي داخ من كثر ما ألف البيت ادور عنك .. كل ما سألت واحد قالي مجان غير عن الثاني .. واخيرا لقيتك ..
حط رجل على رجل وقال: ابي منك طلب ..
رفع ابوه حاجبه وقال: اللحين انت شايف روحك واحد محترم ..
عدل سامي رجله وقال: سوري .. بس كنت متحمس ..
الاب: إيه .. وش كنت تبغى ..؟!
سامي: ابي اسافر ..؟!
عقد ابوه حاجبه وقال: تسافر ..؟!! على وين ..؟!
هز سامي كتفه بما آدري ..
الاب بإستغراب: شلون ما تدري ..؟! اصلا ليش انت تبغى تسافر ..؟!
سكت سامي لفتره بعدها قال: رفيجتي دانا مريضه وابي اعالجها برى ..
رفع ابوه حاجبه اليمين وهو يقول: رفيجتك ..؟!! طيب رفيجتك ذي شنو مرضها عشان تتطوع وتسافر تعالجها ..؟!
سامي: تليف الكبد .. ما اعرف نوعية المرض بس هو ماله علاج .. ولما سألت الدكتور قالت ماكو علاج لهالمرض ويمكن جدامها ايام معدوده وتموت لأن الكبد عنصر الحياة في جسم الانسان .. وبعدين قلت له طيب ما يصير نغير لها الكبد .. يعني زراعه قال إيه ممكن بس ثمنه غالي وايد والعلاج برى الخليج .. فعشان جذي انا ابي اتكفل بعلاجها وسفرها وكل شيء .. الدكتور اعطاني اسم اكثر من دوله مختصه لهالنوع من الزراعات وما ادري في اي واحد اروح .. وكمان بيروح معها امها .. اما اخوها فبيظل بالبيت عشان عنده جدول لعلاجه الطبيعي ولازم يمشي عليه .. فعشان جذي ابيك تساعدني وتعطيني فلوس ومعلومات عن زراعة الكبد والدوله الاشهر في هالمجال ..
ظل ابوه فتره ساكت ويطالع في سامي لفتره طويله ..
شوي إبتسم وقال: اشوفك مهتم بالبنيه وايد ..
سامي: طبعا لأنها رفيجتي ..
سحب الاب سماعة التلفون ودق ثلاث ازرار وبعد شوي قال: مراد .. اللحين راح ييك سامي .. شوف شنو هي طلباته ونفذها .. ولما تحجز تذكره له إحجز لنفسك ورافقه في كل مجان .. اسمع كل هذا يكون بسريه فاهم ..
بعدها قفل التلفون وقال: انا مشغول .. روح لعند مراد يساعدك ..
ميل سامي فمه وقال: ما لقيت إلا جيمس بوند .. اوووه لا لا اقصد سبونج بوب خخخخ ..
قام وخرج مع انه مستغرب انه ابوه ما اعترض ولا بكلمه وحده .. بالعاده ابوه يرفض رفض تام او يسأل اسأله كثيره ..
هز كتفه وراح لعند مراد ..
انتهى الامر كله بعد فتره من المشاحنات بينهم وحجزوا طياره لباجر الظهر ..

========================================

جمرة بين الضلوع ** ووقود في الدموع
كنت لي اهدى دليل ** كنت في البحر القلوع

كنت لي اغلى رفيق ** في الصبا كان الشروق
ذكريات في خيالي ** ألم يأبى الهجون

ما الذي اقصاك عني ** من تراه داس الشموع
كيف غابت شمس عمري ** لما انهيت السطوع

بعد فجر وغروب ** دائما يأتي الطلوع
فلتعد طال إنتظاري ** عادت الشمس الرجوع

عادت الشمس الرجووع

وعلى ذاك السرير في تلك الغرفه اللي كانت قديما غرفة روان ..
كان جالس بإنكسار ونظره لتحت والاسوداد متكاثر تحت عينه ..
من ذاك اليوم ..
من ذيك الليله بالضبط وهو على هالحال ..
ما اكل .. ما شرب .. ولا حتى فتح فمه ..
اللي صار له مو شويه ..
ما عنده ام ولا اب ولا عائله ..
روان كانت كل اهله بس ..... إختفت !
ماتت ....!
رحلت وخلته وحيد ..!
ضايع .... مشتت ..!
خلته بدون هدف في حياته ..
كان همه ودنيته وحياته هي روان ..
من بعدها شنو بقاله غير الذكرى اللي تدمر الواحد ..
هو خلاص صار حطام ..
موت روان شيء قوي عليه ..
شيء دمر كيانه بالكامل ..
فتح فمه وقال بصوت مكسور وضعيف: حبيبتي .... ردي واللي يعافيج ..
ضعف صوته اكثر وقال: ليه تركتيني .... وحدي ..!
غمض عيونه وهو يحس بشيء حاد يمزق قلبه من داخل ..
طالع في إيده يتخيلها وهي تلفظ انفاسها الاخيره بين ذراعه ..
طيب ليييييييه ..؟؟!!
ليييه هي اللي ماتت مو هو ..؟؟!!
ليييه هي اللي راحت مو هو ..؟؟!!
لييييه كل هذا صار لها هي مو هو ..؟؟!!
لييييييييييه ...؟!!!!
غطى وجهه بإيده وهو يحس بحرارة دموعه وكأنها جمر ينزل قطرات ..
روان راحت .. حبيبته راحت .. دنيته راحت ..
خلاااص شنو يبي من الحياه دام نورها إختفى للابد ..؟!
مالحياته طعم .. مالها لون ..
يتمنى بس يموت ويلحقها ..
ما يبي يعيش في عالم ماهي موجوده فيه ..
ضحكاتها .. همساتها .. استهبالها وحتى زعلها إختفى ..
كل شيء إختفى ..
وهو يبي يختفي كمان ..

عند الباب كانت شهد واقفه تطالع فيه والدموع بعيونها ..
روان شيء كبير بالنسبه لها ..
روان صديقتها في هالبيت اللي ما عرفت فيه طعم الراحه ..
روان إنسانه غير في كل شيء ..
تصرفها .. طيبتها .. حنيتها ..
مسحت دموعها بإيدها وتقدمت من راشد ..
فتحت فمها وقالت: العشاء جهز ..
ما رد عليها ..
كل ما نادته على اي وجبه ما يرد ابدا ..
ظلت واقفه كالعاده تنتظره يقول شيء بس ما قال ..
تشجعت وقالت: لك فتره طويله ما اكلت .. إذا ظليت جذي بتموت ..
برضوا ما رد عليها وكأن هذا الوضع هو راضي عنه ..
يموت .. ذي هي امنيته ..
طالعت شهد فيه بنظرات شفقه ..
على قد ما اهانها وعلى قد ما تكرهه إلا إنها ما ترضى على هالحال حتى لو كان على عدوها ..
اللي صار له شيء قوي ومحد يتمناه لاي نسان ..
فتحت فمها وقالت: طيب تبيني اييب لك الاكل هني ..
وللمره الثالثه ما رد عليها ..
تجمعت الدموع بعيونها بعدها خرجت من غرفته ..
نزلت لتحت وجهزت له اكل على صينيه صغيره وطلعت لعنده ..
دخلت وحطت قدامه طاوله صغيره وحطت فوقها الصينيه ..
طالعت فيه وقالت: هذاني يبت لك اكلك .. راشد انت لازم تاكل .. كلنا مصيرنا الموت .. ادعي لها وادع لربك انه يجمعكم بالينه ..
غصب عنها شهقت وكملت: كثيير ناس غاليين فقدناهم بس مالنا إلا الصبر والدعاء ..
بعدها لفت وطلعت من الغرفه وراشد على نفس وضعيته ..
وهو في حالة اللا وعي ولا فهم اي كلمه قالتها شهد ..
اصلا ما سمع شيء عشان يفهمه ..
احداث تلك الليله تدور في مخه وتدور وتدور ..
كل ما انتهت الاحداث رجعت تدور من جديد ..
السياره .. الحريقه .. إبتسامتها .. وموتها ..
من اليوم ورايح ما عاد فيه ثرثاره تسولف معه ..
ما عاد فيه ازعاج وروحه للصاحبات ..
ما عاد فيه طاري كاي ولا فيه لهجه لبنانيه كالعاده ..
ما عاد فيه حركه بالبيت ..
كل شيء بيكون هادي ....
هادي ومسالم وبدون ضجه .. ابدا ..
لا ضحكات ..
ولا زعل ..
ولا إستهبال ..
ابدا ..

========================================