شبكة همس الشوق - عرض مشاركة واحدة

18 - 3 - 2014, 07:41 PM

|$[ البآرت التاسع عشر الجزء الاول ]$|

طالعت فيهم وقالت: ممكن تعرفوني عليكم يالحلوين ..
وسيم بحماس: انا وسيم وهذا شادي وذيج اثير .. اما شهد وشادن ما ييوا ..
..............!!
لحضة صمت ..
الاسماء ذي نسخه طبق الاصل من ....
ضحكت سهام وهي تقول: لا مستحيل .. يا ولد قول إسمكم الحقيقي ولا تفر راسي ..
وسيم بإستغراب: انا ما جذبت ..
شادي: اخوي قال الصج وما جذب ..
فتحت سهام فمها تحاول تستوعب الامر ..
الاسماء كلها نسخه طبق الاصل من ....
وفجأه صرخت بقوووه من هووول الصدمه ..
حط طارق إيده على إذنه وقالت الام بعصبيه: سهاموووه سكتي يالخبله .. شنو هالينون اللي هل عليج فجأه ..
رجعت سهام خطوات على ورى وهي تأشر على الاولاد بإيد مرتجفه وقالت: ذ ذ ذولا .. ذ ذولا الاطفال .. ذولا .. ذولا الاطفال انا اعرفهم ..
انصدم طارق وامه من كلامها ..
شلون تعرفهم وكيف ..؟!
طارق بهدوء: شتقصدين ..؟!
بلعت سهام ريقها وقالت: اقصد .. اقصد ان هالاطفال انا اعرفهم .. ايه اعرفهم ..
شوي شهقت بصدمه وهي تقول: شهد ..!!! رفيجتي شهد ..!!! معقووووله ..!!
جلست عالكنبه اللي وراها وهي بقممممة صدمتها ..
وطارق والبقيه يطالعون فيها وهم بقممة حيرتهم .. مو فاهمين شيء ..
قام طارق وجلس جنبها وقال: سهام .. شنو تقصدين من حجيج وليش مصدومه جذي ..؟!!
عقد حواجبه شوي وقال: شهد ..؟! هذا تشابه اسماء ولا .....
وما كمل كلامه فهزت سهام راسها بإيه ..
انصدم طارق وقال: رشووود ما غيره .. لا اكييد تستهبلي ..!! مستحييل ..!!
هزت سهام راسها بلا وكأنها تقول انه مو مستحيل ..
ابدا ..
لف طارق بصدمه لعند شادي وقال: انتم هيه .. الدب المتغطرس حقكم اسمه راشد الشعلان ..؟!
شادي بسرعه: إيووه صح .. الشعلان هو لقبه .. كنت ناسيه ..
وسيم: ايه اسمه راشد .. بس ما كنا نعرف لقبه ..
شتت طارق نظره بينهم وهو يحاول يستوعب ..
مو قادر يصدق ..
اصلا شلون ..
طالعت الام فيهم فتره بعدها قالت: طارق شسالفه .. انا مب فاهمه ..
هز طارق راسه بلا وقالت: شيء مو متوقع .. شهد اختهم .. هي نفسها رفيجة سهام ..
الام بصدمه: شنو ..؟! شلون ..؟!
لفت على سهام وقالت: شلون رفيجتج تطلع بنت عمج وانتي يالفاغره ما تعرفين ..؟! تشابه اسماء .. شلون ما انتبهتي لها ..؟!
هزت سهام كتفها وهي تقول: مدري .. والله مدري .. تصادقنا في الاعدادي ووقتها ما كنت ايلس ينبها فما عمري انتبهت .. حتى لو القابنا متشابه فهذا شيء طبيعي .. ما ياء هالامر ببالي ابدا لأنه على اساس ما عندي عيال عم ابدا .. والله مدري .. احس بصدمه غريبه ..
طارق بقهر: مو هني المشكله .. راشد الشعلان .. هالانسان ما باجي كائن حي ما اشتبك معه .. شلون بنت عمي تشتغل عند متسلط مثل هذا شلون ..؟؟!!
لف شادي على وسيم وقال بهمس: طلع طارق يعرف الدب المتغطرس من اول ..
وسيم: لو قلنا له اسم الدب الكامل جان عرفه من اول ..
شادي: احسن .. اللحين راح يعرف انه كان يظلم اختي المسجينه ..
وسيم: بس شلون راح ياخذها .. الدب المتغطرس شرير مررره .. واذا تقابلوا راح يتضاربون ..
شادي: ايه والله صح .. طارق راح يعصب والدب المتغطرس من اول عصبي .. يمكن يتأذى طارق ..
وسيم بحزن: ما ابغى يصير لطارق شيء .. احبه ..
لف شادي وطالع في طارق اللي كان يناظر بالارض وواضح على وجهه العصبيه .. وحتى قبضة إيده مشدوده ..
شادي بهمس: حتى انا ..
رفعت سهام نظرها وطالعت في الصغار لفتره بعدها لفت على طارق وقالت: ابي اروح معك .. واضح ان شهد تمر بوقت وايد صعب ..
طارق: لا .. خليج هني يالخبله .. صديقتج ومو عارفه انها بنت عمج .. عمري ما شفت غباء بهالمستوى ..
سهام بعصبيه: قلت لك ما انتبهت .. وقتها كنا بالاعدادي .. كثيير اسماء تتشابه .. فإيش العباطه عشان نفكر بشيء زي جذي ..
لف طارق عليها وقال: عباطه ها ..؟! يعني وحده ابوها مثل اسم عمج ويدها مثل يدج والالقاب مثل بعض .. شلون ما تشكين ها ..؟! انتي متأكده ان عقلج ذا فيه مخ ..؟! وربي اني اشك بصراحه .. خبله وايد .. وهي بعد خبله مثلج .. طول عمرهم البنات تفكيرهم محدود ومثل ويههم ..
سهام بإنفعال: هيه هيه لا تسبني ولا تسبها فاهم ..؟! اذا احنا تفكيرنا محدود فشوف نفسك .. رفيجتي اسمها شهد وكمان تعرف انها تشتغل عند رشيدان الشعلان .. بنت عمك اسمها شهد وتشتغل عند واحد اسمه راشد .. شلون ما ربطت الاشياء ببعضها .. هذا يدل على محدودية تفكيرك ذا .. خبل ومسوي روحه الاذكي هني ..
طارق بحده: سهام وبعدين معاج .. اشياء مثل جذي منتشره كثيير بحياتنا .. فشلون اعمل ترابط ها ..؟! فخليج منطمه يالخبله ولا يكثر ..
سهام بعصبيه: للمره المليون انا مب خبله .. مدري من فينا تفكيره غبي .. اكيد ما راح تقدر تعمل ترابط لأن عقلك مو معاك مع اللي إسمها اسيل صح ..
طارق بسرعه: سهام ..
لفت سهام على امها وقالت: انت بديت فتحمل .. امي ولدج يحب وحده لقيطه .. ويحبها وايد بعد وترك لمياء ولا فكر فيها وهي حسبالها انها بتكون له ..
لفت عل طارق ومدت لسانها وقالت: احسن عشان تفكر مليون مره قبل لا تعاند سهووم ..
طالع طارق فيها بقهر ..
اصلا هو الغلطان اللي قال لثرثاره مثلها ..
اما الام فكانت بقمة صدمتها ..
ولدها .. ولدها الوحيد اللي من العائله الفلانه يحب وحده لقيطه ..
لقيطه ....!!!
صحيح إنها تتعاطف مع الفئه ذي بس مو لدرجة ان ولدها يحب منهم ..
مستحيييل تقبل بهالشيء ..
ولدها .. وسمعته بين الناس .. وسمعت اهله ..
كلها راح تضيع إذا تزوج هاللقيطه ..
طالعت في طارق وقالت: الكلام اللي قالته سهام صح ولا غلط ..؟! ياوبني بصج ..؟!
لف طارق بنظره بعيد عنها ..
مو قادر يجاوب .. هو يعرف امه عدل ..
للحين يتذكر ردت فعلها لما عرفت ان عمه عمر تزوج وحده فقيره ..
ذاك الوقت إستنكرت وبقووه ..
فإيش عاد بوحده لقيطه ..!
بوحده سمعتها تلطخت بالتراب بسبب غباء واستهتار اهلها ..
تكلمت الام مره ثانيه تقول: طارق انا انطر اليواب .. طارق انا ابي افهم .. حجي سهام صح ولا غلط ..؟!
تنهد طارق وهو يسب سهام في نفسه مليون مره ..
طالع في امه وقال: إيه صح ..
زادت صدمت الام اكثر من اول من هالرد ..
هذا مستحييل ..
لا يمكن ..!
عقدت حواجبها وهي تقول: لقيطه ..! ليه قلوا بنات الناس عشان تفكر بوحده لقيطه ..!
اخذ نفس بعدها قال: امي لا تستحقريها .. هي إنسانه مثلنا ومالها ذنب باللي صار ..
الام بعصبيه: وتدافع عنها بعد ها ..؟! صحيح هي مالها ذنب بس انت شوف لسمعتها السيئه .. الله اعلم وش هي نوع التربيه اللي تربتها .. الله اعلم وش هي البلاوي اللي تصلحها .. إحتمال واحد بالميه بس انها تكون وحده شريفه وطيبه .. انت مينون ولا شلون .. شنو بيقولوا الناس لا تزوجتها ..؟! شلون بيطالعون فيك ..؟! عيالك شنو بيكون موقفهم وامهم بدون اصل ..؟! عيالك شلون راح يوايهون كلام الناس اللي مثل السم ..؟! إختك سهام منو راح يرضى يتزوجها لما يعرفوا ان اخوها ارتبط بوحده بدون لا اصل ولا فصل .. انت تدمر مستقبلك ومستقبل اختك ومستقبل عيالك لا كبروا باجر .. انت تشوه سمعة عائلة العالي .. انت الشاب الوحيد في هالعائله ومع هذا تتصرف بانانيه ولا تفكر بسمعتنا .. ولمياء المسجينه شنو بيصير فيها لا عرفت انك فضلت وحده لقيطه عليها هي الجامعيه والمجتهده هذا غير عن جمالها .. شنو بيقولوا الناس لا فضلت هاللقيطه عليها .. بيقولوا اكيد فيها عيب ولا شيء وبجذي حتى فضلت غيرها اقل قميمه منها .. ها يا طارق شنو بتستفيد ..؟! الامور ذي يبيلها عقل مب عواطف ..
قام طارق من مكانه وقال: اولا انا احب اسيل وما راح اتركها .. وكلام الناس التافهين ما يهمني .. واللي يرفض اختي عشان هالسبب انا في غنى عنه .. ثانيا منو قال اني كنت ناوي اتزوج لمياء ..؟! هي ما شاء الله الف واحد يتمناها .. مو عشاني ولد عمها الوحيد فقلتم اكيد بنكون لبعض .. وانا متأكد ان لمياء فاهمه وعاقله وعارفه هالشيء وما راح تزعل او تاخذ بخاطرها اصلا ..
طلع لفوق وهو يقول: انا مسافر اللحين وما راح ارجع إلا لما اييب شهد وشادن ..
قفل باب غرفته وراه لما دخل ..
هزت الام راسها من الصدمه ..
هالولد بيجننها .. راح يجننها ..

========================================

الساعه عشر ونص الليل ..
كانت اسيل جالسه في الشقه وقدامها كتبها مفتوحه بس ما كانت تذاكر ..
اشياء كثيير تفكر فيها ..
حياتها .. باسل .. كلام طارق ..
اخخ لو فيه شيء اسمه السفر للمستقبل ..
ودها تنط عشر سنوات لقدام عشان وقتها تكون فهمت كل شيء ..
تكون فهمت حقيقة اهلها ورميهم لها ..
تكون فهمت حكاية باسل وهدفه الحقيقي ..
تكون نسيت طارق تماما ويختفي من حياتها ..
صحيح اذاها بس الماضي ماضي وراح تحاول تسامحه وبعدها خلاص ما تبغى تشوفه ابدا ..
ربها الكريم يسامح فليش تكون انانيه وما تسامح ..
اللي هي فيه اللحين اصعب بكثيير من الكلمات المؤلمه اللي كان يقولها لها زمان ..
اخذت نفس عميييييق وبعدها دق باب الشقه ..
قامت من مكانها وطالعت من فتحة الباب فشافت انه باسل وفي إيده شيء ..
عقدت حواحبها بعدها فتحت الباب له ..
ابتسم باسل وهو يقول بمرح: هااااااي اسووول .. اخبارج ..؟!
اسيل: نعم .. شنو تبي ..؟!
باسل: له له له .. ما توقعت انج تقابلي ضيوفج جذي ..
احتدت نظرات اسيل وقالت: شنو تبي ..؟! شنوع المصيبه الثانيه اللي بتساويها .. ياوبني ..
باسل ببراءه: مصيبه ..؟!! انا اعمل مصيبه ..؟!! لهدرجه انا طايح من عينج ..! افا بس .. ما توقعت ان ذي هي نظرتج لي ..
رفع الصينيه اللي بإيده وقال: عملت عشاء بس طلع اكثر من اللي كنت ابيه .. فقلت خلاص يا باسل .. اسيل يارتك ولازم اتقاسم الاكل معاها .. فعشان جذي انا ييت ..
طالعت اسيل فيه فتره بعدها قالت: مابي شيء منك .. كل اللي ابيه هو انك تختفي انت بعد من ويهي ..
باسل: اوووب اختفي مره وحده .. ذي قويه في حقي يا اسوول .. بس اكيد ما يرضيج اني اكب الاكل الباجي صح ..؟! هذه نعمه يا اسيل ..
اسيل: رووح وزعه عالفقارى وابعد عن ويهي ..
دخل باسل لداخل وحط الصينيه عالطاوله وقال: يوووه انتي قاسيه .. انا عملت هالعشاء عشانج يا سجو ..
لفت اسيل عليه بصدمه لما نطق بهالاسم ..
سجى .. هو اسمها الحقيقي ..
هو الاسم اللي قالته وصايف .. هو اسمها ..
شدراه باسل عنه ..؟!
لف باسل عليها والإبتسامه الغامضه على وجهه ..
ظلت اسيل فتره تطالع بباسل بعدها قالت بإنفعال: انت بتينني .. منو انت ومنو تكون ..؟! ابي افهم .. شعلاقتك فيني وليه دوووم تتدخل في كل شيء ..؟! إبتسامتك وكلامك كلها تحمل معاني انا مو قادره افسرها .. ياوبني وفهمني كل شيء ..انا ابي افهم اللي يصير .. ابي افهم ..
زادت إبتسامة باسل وقال: الانفعال مب كويس .. المفروض تكوني بارده .. وبارده كالثلج .. مثل اخووج الموقر ..
فتحت اسيل عيونها بصدمه ..
اخوها ..!! هذا يقصد إياد ..
إيه يقصد إياد لأنه اخوها وبنفس الوقت إنسان بارد ..
بس شدراه ..؟!!
هالباسل بيجي يوم وتدخل المصحه بسببه ..
دخل إيده بجيبه وقال: مصدوومه ها ..؟! هذا دليل إنج قابلتيه .. قابلتي ذاك المزعج .. اوووه ليتني شفت شصار بينكم ..
اتجه للباب وهو يقول: خلاص باجر حكيني عن اللي صار اوكي ..
لف عليها وكمل بإبتسامه: لأني متشوق اعرف كل شيء يخصه ..
قفل الباب وراه واسيل على نفس وقفتها ..
جلست عالارض وهي تحس بصداااع أليييم ..
هزت راسها بقووه وهي تحاول تتناسى هالموضوع ..
لازم تنسى باسل وإياد واهلها وكل شيء ..
تبي تعيش حياتها بهدوء ودون ألغاز ..