شبكة همس الشوق - عرض مشاركة واحدة

18 - 3 - 2014, 07:42 PM

في صباح يوم الاثنين ..
وفي بيت ام فيصل وعلى طاولة الفطور ..
كان الجو هادئ جدا وكل واحد منشغل بتفكير عكس تفكير الثاني ..
بس الشخص اللي يفكروا فيه هو نفسه ..
امه تفكر بولدها فيصل وفي سفرته ..
قلقانه عليه وقلقت اكثر من بعد كلام ذاك الشاب اللي زارها قبل فتره ..
خايفه ان ولدها يصير له شيء برى ولا يرجع ..
اما فارس فكان حدده متألم من الحقيقه اللي اكتشفها ..
اخوووه من هالنوعيه ..!
وربي انها اكبر صدمه .. مو قادر يصدق ..
على قد ما اخوه عصبي وشرس بس هو في الحقيقه حنون ..
مو معقول يكون مجرم ..
يكون بهذا الشر والطمع ..
اخ آخ .. نفسيته انقلبت اكثر من اول وبزياده ..
ابووه مات ..
اسيل هربت ..
ريما صايعه ..
اخوه تاجر اسلحه ..
مصائب كبيره اثقلت على قلبه ومو ناقص مصيبه ثانيه ..
كل شيء من حوله تدمر .. كل اهله تفككوا ..
يحس انه ممكن في اي وقت من الاوقات يدخل لمستشفى نفسي ..
ابتسامته صارت نادره وسرحانه صار كثير ..
مستواه الدراسي نزل ونفسيته صارت تعبانه ..
تنهد بعمق وهو يدعي بداخله ..
يدعي ربه ان يساعده باللي هو فيه ..
هذا إبتلاء وبكذا لازم يصبر ويتوكل على ربه ..
قام واخذ شنطته وقال: يمه انا رايح .. مع السلامه ..
سلم على راسها فقالت: الله يوفقك .. مع السلامه ..
طلع فارس برى البيت وركب السياره واتجه للجامعه ..
ومن خلف جدار البيت ابتسم ذاك الشخص وقال: كويس .. ما باجي إلا الام لحالها وبجذي سهل اضحك على راسها ..
زادت إبتسامته وقال: والله وطحت بإيدي يا سعد .. يا زوج اختي وما راح ارحمك .. لازم ادفعك ثمن كل اذيه تأذتها سجى بسببك ..
تقدم ودق جرس البيت ..
قامت الام من فوق كرسيها ..
حست بدوخه فضيعه وكانت حتطيح بس تمسكت بالكرسي ..
اخذت نفس عميق ودقات قلبها تزداد في الدق ..
حطت إيدها على قلبها وهي تقول بهمس: يا ساتر .. هالدوخه صارت مو طبيعيه ابدا .. يا رب ارحمني ..
مشيت وفتحت الباب واندهشت لما شافته هو نفس الشخص اللي زارها من قبل فتره قصيره ..
ابتسم وقال: السلام عليكم ..
الام: وعليكم السلام .. مو انت اللي في المره الاولى سألتني عن شغل فيصل ..؟!
طالع فيها ذاك الشخص اللي هو بالتأكيد بسام وقال: ايوه انا هو .. ها ياكم اتصال من فيصل ..؟!
هزت راسها بلا وقالت بلهفه : بالله عليك إذا تعرف شيء عنه خبرني .. قلبي مو مرتاح ..
حك بسام خده وقال: والله ما اعرف وش اقول .. بس ترى احتمال تسعين بالميه انه ينسجن ..
انصدمت الام من كلامه وقال بخوف: شنو ..؟!! شنو تقصد .. لا ولدي حبيبي مستحيل ..
إبتسم بسام في نفسه بعدها قال: بس فيه طريجه اقدر اساعده فيها ..
طالعت الام فيه وقالت بسرعه: شنهي .. شنهي هالطريجه وكيف ..؟!
بسام بإبتسامه: ممكن اشوف غرفة فيصل .. عشان ادور له دليل براءه ..
وبدون تفكير بعدت الام عن الباب وقالت: ادخل ..
دخل بسام وراها .. طلعت لفوق وفتحت باب غرفة فيصل ..
دخل بسام للغرفه وهو مبسوط لأن خطته نجحت ..
الام: ذي هي غرفة فيصل ..
جلس بسام على كرسي المكتب وطلع الاوراق من اول درج وبدأ يقرأ فيها ..
والام كانت واقفه على باب الغرفه تطالع فيه بقلق وهمها كله ان فيصل ما ينسجن مع انها مو فاهمه ايش حكاية السجن هذا ..
بعد مرور كم دقيقه رفع بسام عيونه إتجاه ام فيصل وقال بقمة الهدوء: نسيت اسألج .. انتم كان عندكم بنت إسمها اسيل صح ..؟!
عصبت الام اول ما سمعت طاريها وقالت بعصبيه: إييه عساها الماحي إن شاء الله .. كل اللي يصير بسببها .. بنتي ريما تغيرت عن قبل وفارس تغير كثيير وزوجي مات وولدي فيصل راح ينسجن .. هي اساس البلا عساها ما تتوفق بحياتها ..
ضغط بسام عالورق بقووه وهو يحاول يحافظ على هدوءه ..
مقهوووووور منها وبققوه ..
حاول يكون صوته طبيعي وهو يقول: اها ..
قام من فوق الكرسي وراح للكومدينه ..
فتح الادراج وبدأ يقلب في الاوراق لحد ما فتح الدرج الكبير اللي فيه اللاب ..
طلع اللاب توب وطلع الاوراق اللي كانت بالشنطه ..
تربع عالارض وبدأ يقرأ فيها ..
إتسعت إبتسامته وهو يقرأ المكتوب .. واخيرا وصل للي يبغاه ..
حط الاوراق على جنب وبعدها طلع اللاب وحطه فوق السرير وشغله ..
ابتسم وقال: كويس مافيه بآسس ..
قلب فيه شوي بعدها طلع من جيبه الهارد ديسك وشبكه باللاب ..
عمل نسخه شامله لكل اللي باللاب ..
ما عنده وقت يطلع كل اللي فيه فعمل نسخه وبيبحث بالفندق هناك افضل ..
ظل حول نص ساعه لحد ما اكتمل النسخ ..
قفل اللاب وقال: اطمئني .. ولدك بإذن الله يروح للمجان اللي يستحقه ..
الام براحه: كويس ..
اخذ الاوراق وقال: خلي هالامر سر عشان مصلحة فيصل ..
الام: طيب ..
طالع فيها شوي بعدها قال: الظلم ظلمات يوم القيامه .. فتوبي ..
بعدها خرج وهي واقفه ومو فاهمه قصده ابدا ..
اتجه لسيارته وركبها ..
ضغط عالبنزين واتجه للفندق ..

بعد عدة دقايق وقف السياره وطلع لجناحه ..
دخل فشاف سميه جالسه عالكنبه وتطالع في الفراغ بسرحان ..
قفل الباب وراه وقال: السلام عليكم ..
طالعت فيه وقالت بهدوء: هي ماتت ولا لا ..؟!
استغرب بسام من كلامها وقال: شتقصدين ..؟!
سكتت فتره طويله تطالع فيه بعدها قالت: اقصد الدخيله ..
عقد حواجبه فتره بعدها فهم قصدها ..
جلس عالكنبه وقال: إيه .. من زمان ..
طالع في سميه وقال: بس اختها رؤى عايشه .. ومبسوطه بعد ..
ظهرت الشراسه على وجه سميه وقالت: وليش عايشه .. المفروض تموت ..
بسام بهدوء: معاج حق ..
سميه: اككرها مثل ما اكره اختها الدخيله الغبيه ..
سكتت شوي بعدها كملت: ومثل ما اكره سعد الراهي .. ذاك اللي كان زوجي ..
لف بسام يطالع فيها بصدمه ..
يحس نفسه ما سمع زين ..
سميه تسب زوجها اللي دووم تردد كلمة *احبه* ...!
لا يمكن ..
إبتسم بعدها ..
اكيد جلسات الدكتور ابو بندر جابت نتيجه ..
ونتيجه وايد حلوه ..
عم الهدوء عالمكان فتره بعدها قالت: ليش ما رحت الجامعه ..؟!
بسام: كان عندي شغله اهم ..
طالع في ساعته وقال: واللحين رايح عشان الحق عالمحاضره الثانيه وباجي المحاضرات ..
دخل للغرفه وحط الاوراق والهارديسك في مكان امين بعدها طلع ..
طالع في اخته وقال: محتاجه شيء ..؟!
طالعت فيه فتره بعدها قالت بهدوء: لا ..
تنهد بعدها طلع من الجناح ..
ابتسم إبتسامه واسعه وقال: هااااي بساام .. من زمان عنك يالحرامي ..
تنهد بسام للمره الثانيه بعدها لف على مصعب وقال: يا هلا .. اخبارك ..؟!
مصعب: تمام .. وينك يا شيخ ما عاد تنشاف ..؟! لا يكون وراك قتيل ثاني وتفكر في مجان صالح للدفن ولا احد يكشفه مثل اللي بالاهرامات ..؟!
هز بسام راسه بيأس وقال: ياخي انت وش هالتفكير الغريب اللي عندك ..؟! لهدرجه انا مشبوه ..؟!
مصعب: وبقوه .. شوف الجرح اللي بويهك واللي بإيدك .. هذا اكيد الصراع اللي كان بينك وبين القتيل اللي مات .. ها وين نويت تدفنه ..؟! لا يكون تفكر تدفنه بسور الصين العظيم .. ذاك مجان محد راح يفتش فيه .. اخخ يا الخبيث ..
وللمره الثالثه تنهد بسام وقال: وراي دوام ..
مصعب: اووه معليش اخرتك ..
حط إيده على كتف بسام وقال بجديه مضحكه: اسمع وانا اخوك .. سلم نفسك .. سلم نفسك وكفر عن اخطائك الله يهداك .. كلنا مصيرنا الموت .. باجر شلون بتقابل ربك وانت ذابح لك اثنين .. الله يصلحك يا رب .. وانا بنفسي راح اعين لك اكبر محامي ..
اشر عاليمين وكمل: هناك طريج المخفر ..
طالع بسام في الجهه اللي اشر عليها مصعب وقال: اها ..
لف على مصعب وقال: صج انك ونعم الاخو .. الله يكثر من امثالك ..
مصعب: ياللا توكل على الله ..
لف بسام وراح للمصعد ..
اول ما قفل المصعد اخذ نفس عمييق وقال: يا رب .. هاليار مدري شنو اوصفه .. بس المهم يا رب اتمنى انه يرجع له عقله الغريب ..

========================================

الساعه 9 وبمحاضرة الدكتور تركي ..
كانت المحاضره هاليوم شوي ممله ومعظم الطلاب جاهم الطفش ..
تنهدت لين وقالت: واخيرا .. باجي بس عشر دقايق ونخلص واااه ..
لفت وسن عليها وقالت بهمس: هييه لين .. شوفي منال شتسوي ..؟!
طالعت لين في مكان وحده اسمها منال وشافتها تحط مناكير على اصابعها ..
لين بنص عين: وحده صج صج فاضيه ..
وسن بحماس: شرايج نعلم الدكتور عليها ..؟!
لين: اخخ منج .. وحده شريه ههههه ..
وسن: هههههههههههههههه ..
لين: دكتور ..
طالع الدكتور فيها وقال: نعم ..
وسن: دكتور فيه هني طالبه مرا وقحه ..
عقد الدكتور حواجبه بإستغراب وقال: ايش تقصدين ..؟!
وسن: وحده تحط مناكير بإصابعها ..
لين: منال عبد الصمد ..
لفت العيون كلها إتجاه منال اللي وجهها قلب احمر واخضر وازرق من الفشيله ..
لفت هالمنال وطالعت في وسن ولين بقهر ..
مدت وسن لسانها وهي تقول: احسن عشان مرآ ثانيه تنتبهي للمحادره ..
لين: هههههههههه مرره مقهوره هالبنت ..
د.تركي: منال .. ييبي المناكير اللي عندج هني ..
منال: خلاص يا دكتور .. ذي اخر مره ..
د.تركي: منال بسرعه انا ما ابي اضيع وقت المحاضره عالفاضي ..
انقهرت منال اكثر واخذت مناكيرها وراحت اعطتها للدكتور ..
د.تركي: لا عاد اشوفج تسألي عنها ابدا ..
منال بصدمه: بس يا دكتور ذي غاليه وبالقوه امي وافقت اني اخذها ..
د.تركي: ارجعي على كرسيج ..
تأففت منال بقهر ورجعت لمكانها .. وبعدها رجع الدكتور يكمل محاضرته ..
وسن بهمس: ههههه تستاهل ..
لين: والله انج داهيه يا كارلوتا ..
طالعت فيهم ندى بنص عين وقالت: حرام عليكم .. كسرت خاطري .. بس اللي محيرني هو انج انتي وياها تعاونتم مع بعض .. شيء غريب ..
وسن: عاتي إحنا صاحبات ..
ندى: ونعم الصاحبات والله ..
بعد عشر دقايق خلص الدكتور من محاضرته وبدأ الطلاب يطلعون من الكلاس ..
اخذت ندى جوالها واتصلت على اسيل ..
اما وسن ولين فأتجهوا للكافتيريا ..
جلسوا على الطاوله بعد ما اشترت كل وحده منهم وجبتها ..
وسن: متى سارا وليان يطلعوا من محادراتهم ..؟!
لين: بعد شوي ..
وسن بحماس: هييييه لين فاتج ..
لين: وشو ..؟!
وسن: قبل لا اروح المحادره مو انا تأخرت ..
لين: ايوه ..
وسن: تعرفي لي تأخرت ..؟! عشاني شفت بسام .. علمته عن هاديك المسابقه حقت الحصانات وقلت له اشترك فقال اني بأفكر ..
شوي كملت بضيق: كانت إيده مجروحه وويهه فيه لصق جروح .. شكلو تضارب مع احد ..
لين: ههههههه اقول بديت اتأكد انج تحبين بسام ..
إبتسمت وسن وقالت: وايد .. اصلا محد يقدر يكرهه ..
بعدها طالعت وسن في اكلها وهي سرحانه والابتسامه على وجهها ..
جت ندى وجلست عالطاوله فقالت لين: اتصلتي على اسيل ..؟!
ندى: يب .. وردت ..
لين: شقلتيلها ..؟!
ندى: وصلت لها كلام وائل ..
لين: ها .. رضت انها تشوف عمها ولا لا ..؟!
ندى: مدري .. قالت اللحين عندي محاضره وبأتصل بعد ما تخلص المحاضره ..
وسن: ادا اتصلت اعطيني اكلمها .. مررآ وحشتني ..
لين: عاد هالاسيل الله يهديها مو دايم ترد علينا ..
ندى: اللي صارلها مو شوي .. الله يعينها ..

========================================

عالساعه وحده الظهر ..
طلع الدكتور حسن .. الدكتور اللي كان موجود قبل الدكتور راكان ..
طلع من الكلاس بعد ما خلص الوقت المخصص للمحاضره ..
قاموا الطلاب وبدأوا يلموا كتبهم واغراضهم عشان يرجعوا للبيت طبعا ..
لف فهد على انس وقال: يعني الدكتور راكان صار تمام ..؟!
انس وهو يلم الاقلام: اتوقع .. اللي اعرفه انه بعد ما شفي نقل لمستشفى خصوصي عشان يعملوا له عملية تجميل .. ويهه وجسمه كان متضرر كثيير من الحريق اللي صار ..
فهد: والله ما يستاهل ..
هز انس راسه بهدوء ..
تقدمت منهم عهد وقالت: السلام عليكم ..
طالعوا فيها وردوا السلام ..
عهد: امم وين طارق ..؟!
انس: بالبيت نايم .. رجع امس من السفر متأخر ومرهق فنام ..
عهد بإحراج: حبيت اعتذر لكم عن المعامله السيئه من العماره اللي انتوا ساكنين فيها .. انا كلمت ابوي بس ما رضي انه يسمح لكم بالجلوس اكثر .. كل اللي قدرت عليه اني اخليه يمدد الوقت اطول ..
انس ببرود: مشكوره بس ما كنا نحتاج لأننا اليوم راح ننقل لشقه ثانيه ..
لبس شنطته وطلع ..
ابتسم فهد بترقيع بعدها طلع ورى انس ..
فهد: انس شفيه اسلوبك صاير زفت معها ..؟!
انس: ياخي لا تلومني .. مقهوور من ابوها ..
فهد: طيب هي شدخلها المسجينه ..؟!
انس: مدري لا تسألني ..
تنهد فهد وقال: ها وين راح تنقلون ..؟!
انس: مافي مجان محدد .. راح نطلع اليوم وندور عن شقه مناسبه وبسعر مناسب وتكون قريبه من الجامعه طبعا ..
تنهد وكمل: راح نفتقد وجبات ام ميار ..
فهد: هههههههههههههههه ..
وصلوا لسياراتهم فقال فهد: اوكي اشوفك باجر على خير .. مع السلامه ..
انس: مع السلامه ..
ركب انس سيارته واتجه للعماره حقتهم ..
بعد ما وصل طلع لفوق بالمصعد ..
اول ما خرج صادف ميار طالعه من شقتها ..
اول ما شافته ضربته على كتفه بدفاشه وقالت: اووه انووووس .. وينك يا ريال مختفي ..؟! والله ليك وحشه ..
مسك انس كتفه وقال: وانتي ما بتبطلين دفاشتج ذي .. إيب استحي انا ريال مب وحده من ربعج ..
حركت يدها بلا مبالاه وقالت: عادي عادي .. المهم سمعت خبر بجاني كثيير اهئ اهئ ..
هز انس راسه وقال: حتى البجي مصطنع ..
ميار: ما علينا .. المهم صج انكم راح تفارقون من هني ..؟!
انس: تفارقون ..!! بالله عليج هذا مصطلح مهذب ..
ميار: يا ريال ياوب وخلصني ..
انس بتنهيده: مدري منو بيتزوجج .. ايه راح ننقل ..
ميلت ميار فمها وقالت: اكره هالسالم عساه بالساحق الماحق .. افف ..
انس: ومنو اصلا يحبه .. هالانسان جشع ..
ميار: هههههه مساجين ما عاد بيصير عندكم امي تصلح لكم الاكل ههههه اشفق عليكم ..
شوي كملت: إيه صح نسيت اقولك ترى رفيجك طارق طلع قبل نص ساعه .. كنت توني راجعه من المدرسه فقالي قولي لأنس يروح يدور شقه لأنه مشغول .. يقول اولا بيزور الطفله شادن وبعدين بيروح عند واحد اسمه راشد على ما اتوقع .. بس كان واضح عليه القهر وهو يقول راشد ..
استغرب انس من كلامها ..
امس من رجع طارق نام ولا امداهم يتكلمون ..
منو يكون راشد وليش يبغى يروح له ..
انس: إيه صح على طاري راشد .. بصراحه افتقدت ولد الشعلان اللي بالجامعه .. صار لي جم يوم ما شفته .. غريبه هالانسان ما يعترف بشيء اسمه غياب ..
ميار: يمكن مريض .. عبالك ان الناس ما يمرضون وعقبالك انت تمرض من التخمه .. وول انت اكثر واحد اشوفه ياكل وما يبين عليه .. انا لو اكلت بيتزا ازيد كيلو ..
إبتسم انس وقال: ههههه بصراحه مبين انج انتي اللي بتمرضي من التخمه ..
ميار: ها ها ما تضحك .. ياللا باي .. اخرتني ..
ودخلت المصعد ..
استغرب .. وين راح تروح في هالظهر ..
هز كتفه بعدها دخل لشقته ..

========================================