شبكة همس الشوق - عرض مشاركة واحدة

18 - 3 - 2014, 07:44 PM

برلين ~ ألمانيا ..
الساعه خمس العصر ..
وفي مستشفى شايتسه المختص في زراعة الكلى والكبد ..
كان مراد جالس بالسياره في حيث ان دانا وسامي وام دانا دخلوا للمستشفى من ساعه تقريبا ..
طالع في ساعته بعدها تنهد .. تعب من الانتظار ..
غمض عيونه وفضل النوم لحد ما يجوون ..

في داخل المستشفى كان سامي وام دانا جالسين في غرفة الدكتور اللي صار المسؤول عن حالة دانا ..
كان يتكلم ويتكلم بتلك اللغه الالمانيه اللي ما يفهمها سامي ابدا ..
بس كان جنب سامي شخص مترجم .. كل ما قال الدكتور جمله ترجمها لسامي .. فلما يرد سامي يترجم هالمترجم للدكتور الكلام ..
لف المترجم على سامي وقال: إنه يقول لقد قرأت الاوراق التي اتت من المستشفى الذي كان مسؤولا عن حالتها ونحن الان نعمل الفحوصات اللازمه لذلك .. فالآن تم اخذها لتقييم مرضها ليروا هل هناك علاجات اخرى ممكن عملها غير الزراعه وإن لم يكن هناك فسيفحصون القلب والرئه والامعاء وغيرها ليروا هل جسمها سيتحمل هذه الزراعه او لا .. وإيضا ليروا هل الكبد الذي سيتم زراعته مناسب لجسمها ام لا ..
سامي: اها .. طيب متى راح يصلحون العمليه ..؟!
بعد ما ترجم المترجم قال لسامي: يقول ان مرضها صحيح في مراحله الاخيره ولكن لن نعمل العمليه بهذه السرعه .. هذه عمليه جدا خطيره .. سيتم التقييم والفحوصات وقبل هذا كله يجب ان تكون مقتنعه إقتناع كامل وراضيه لعمل العمليه لأنه هناك نسبة في وجود اعراض جانبه تؤدي إلى الوفاة مباشرة .. وإيضا يجب ان يكون ولي امرها موافقا على عمل العمليه ..
سامي: قوله ان امها موافقه وقوله صلح العمليه بأسرع وقت تقدر عليه .. الطبيب اللي بقطر قال ان حالتها خطيره .. البنت كثر إغمائها وقلة شهيتها بالكامل .. حتى درجاتها نزلت مع انها من المتفوقين ..
تكلم المترجم مع الدكتور بعده قال لسامي: يقول اننا نعرف كل هذا .. لكن التمهل شيء ضروري بهذه العمليات .. وقال له ان يطمئن وليدعو ربه في ان تنجح عمليتها وان يتقبل جسمها هذا الكبد الجديد ..
تأفف سامي وهو يقول: ليه جذي .. ابيها تصير بخير بسرعه ..
إبتسم المترجم وقال: هل هي صديقتك ..؟!
انصدم سامي وقال بسرعه: لا غلطان .. شنو هالتفكير الغبي ..؟! لحضه اصلا انت شنو دخلك في الموضوع ..؟!
المترجم: انا آسف ولكن استغربت إصرارك على علاجها ..
سامي: لازم اصر .. هي رفيجتنا .. والشله كلها تنتظرها ..
بعدها كملوا المعاملات اللازمه مع المستشفى ومع الدكتور المسؤول عن حالة دانا ..
واخيرا وبعد ساعتين نزلوا لتحت ..
فتح سامي السياره ورفع حاجبه لما شاف مراد نايم ..
سامي في نفسه: "ذاك السبونج بوب المهمل" ..
ام دانا: يا حليله السايق .. انتظرنا لين ما تعب ..
سامي: هههههههههه اعجبتني كلمة السايق .. يا حليلج انتي يا خاله .. وربي تونسين ..
طالعت فيه بإستغراب بعدها ركبت ورى وقلبها كله مع بنتها ..
سامي بصراخ: مراادوووووه ..
قام مراد من نومه مفجوع وتلفت حوله بلا وعي ..
طاح سامي عالارض من الضحك على شكل مراد المضحك ..
عقد مراد حاجبه بقهر وقال: غبي .. تصرف اطفال وربي ..
سامي: ههههههههههههههههههههههههههههه لا مستحيييييل .. وقسم شكلك شيء هههههههههههههههههههه ياليتني صورتك .. كله كوم وتلفتك مثل المينون كوم ثاني هههههههههههههههههههههههههه ..
شغل مراد السياره وقال: لك عشر ثواني .. إن ما ركبت راح اروح للفندق واتركك ..
تنرفز سامي وقال: انت هيه .. اعرف مع منو تتكلم ..
إبتسم مراد بسخريه وقال: مع منو ..؟!! ليه منو تكون .. ومن اي عائله ..؟!
عض سامي على شفته وهو يكتم غضبه في داخله ..
زادت إبتسامة مراد وقال: حتى لو كنت انا ميرد مدير اعمال لكني في الاساس إنسان نضيف مب قذر ..
فتح سامي عيونه بصدمه للحضه بعدها إحتدت نظراته وضغط على قبضته وهو يقول ما بين اسنانه: الحقيييير ..
وبعدها وبتهور دخل السياره لعند مراد وضربه ببقس فصقع ظهر مراد عالباب ..
جلس سامي فوقه وبدأ يلكمه ويلكمه بطريقه جنونيه وهو يسب ويشتم ويقول ابشع الالفاظ لمراد ..
كل شيء فيه تألم من كلام مراد الوقح ..
كلام مراد صحيح ومهما ضربه سامي فإنه ما راح يطلع هالالم من داخله ..
حقيقة انه انسان بدون اصل راح تلصق فيه طول حياته ومستحيل يتخلص منها ..
حقيقة انه ولد حرام .. انه انسان اصله قذر .. مستحيل يفتك منها ابدا ..
حاول مراد يبعده بس مو قادر لأنه في وضيعه صعب يحرك فيها شيء من جسمه ..
اما ام دانا فكانت حدها مفجوعه من شكل سامي الشرس والعنيف ..
ومن خارج السياره تجمع الناس عندها وهم يطالعون في هالمضاربه اللي تصير بداخل السياره ..
يطالعون من جهة باب سامي المفتوح ..
يطالعون في هالشاب اللي عصبيته واضحه في عيونه وصوته وحتى في ضرباته ..
عض سامي على شفته وهو يطلع كل قوته ويلكم في وجه مراد اللي تحول لخريطه ..
ضرب وضرب .. بس ألم قلبه ما نزل ولا سانتي واحد ..
مو قادر يريح نفسه لو إيش ما صلح ..
ابدا مو قادر ..
تدخل شرطي من امن الطرق وابعد الناس وهو يقول بتلك اللغه الخاصه بهم: ما الذي يحدث هنا .. هيا فليبتعد الجميع ..
بعد ما ابتعد التجمهر من حول السياره انصدم من المنظر اللي يشوفه قدامه ..
نادي اثنين من العسكر اللي معاه وتدخلوا عشان يفكوا هالمضاربه ..
وطبعا نهايتهم يروحوا للشرطه عشان يفسروا اللي صار ..

.................................................. .............

في نفس هالوقت وفي بيت ام دانا ..
كان عادل جالس في الصاله وفي ايده احد كتب دانا الدراسيه يقرأ فيها ..
إستيقظ فيه الامل وصار يذاكر ويحفظ عشان يقدر يكمل الدراسه بعدين ..
تنهد براحه وهو يتخيل المستقبل شلون بيكون ..
حمد ربه وشكره للمره المليون ورجع يقرأ في الكتاب ..
بعد دقايق دق جرس البيت ..
إستغرب عادل .. مين راح يجي في هالوقت ..
اخذ العكاز من جنبه وبالقوه قدر يوقف وراح لعند الباب ..
فتحه فشاف رهف قدامه ..
إبتسمت وقالت: السلام عليكم ..
تردد شوي بعدها قال: هلا .. وعليكم السلام ..
رهف: عادل .. مبرووك ألف مبرووك على التقدم هذا .. فرحت لك من قلبي والله ..
إبتسم عادل وقال: الله يبارج فيج .. إذا كنتي تبغي دانا فهي مو موجوده اللحين و...
قاطعته رهف: غبي .. انا صاحبتها وعارفه وين بتروح ومتى .. انا ما ييت عشان دانا ..
طالع عادل فيها لفتره فقالت بإبتسامه: ييت اتحمد لك بالسلامه وابارك لك .. عقبال ما تصير تمشي على ريولك وترد لنا عادل الاولي .. عادل الحنون اللي يراعي مشاعر الغير .. عادل المتفائل والعطوف .. ترد مثل قبل ..
فهم عادل معنى كلامها ..
ظل ساكت لفتره وهي تطالع فيه تنتظره يقول شيء ..
بالنهايه إبتسم وقال: إطمئني .. عادل اللي تعرفيه راح يرد مثل قبل ..
طالعت فيه رهف بتفاجئ وحست روحها راح تبكي من الفرحه ..
هزت راسها بإيه وقالت: وانا راح انتظر ذاك العادل .. واللحين ما ابي اعطل عليك او اضايقك بشيء .. مع السلامه ..
عادل: مع السلامه ..
لفت وراحت للسياره اللي كان بداخلها السواق اللي وصلها ..
ركبتها وراحت لجهة بيتها ..
قفل الباب وراح للكنب وجلس عليه بسرعه ..
ما يقدر يطول عالعكاز كثير لأن إيده راح تؤلمه بعنف ..
كلها ثواني حتى دق الباب مره ثانيه ..
إستغرب بعدها تنهد وقام مره ثانيه عالعكاز وفتح الباب ..
انصدم لما شاف ان اللي دق هو صاحبه علي وشكله ابدا مو مثل قبل ..
عادل: علي شفيك ..؟! شسالفه ..؟!
علي بهدوء: خلنا ندخل لداخل ..
فتح عادل الباب كله عشان يسمح لعلي بالدخول وبعدها قفل الباب ..
جلس علي عالكنبه وجلس عادل جنبه وهو يقول: علي حكيني شصار لك ..؟! ليه ويهك مو طبيعي ..؟!
اسند علي راسه على إيده وقال بألم: عادل الحق علي يا عادل .. انا قتلت .. انا قتلت بنت بدون لا اقصد ..
انصدم عادل من كلامه ..
قتل بنت ..!! بدون لا يقصد ..!!
شسالفه ..؟! مستحيل هالشيء يصير ابد ..
طالع في علي وقال: علي شنو هالكلام الغريب اللي انت يالس تقوله ..؟! انا مب فاهم ..
غرز اصابعه بقوه في راسه وهو يقول بضعف: كنت ابي ادمر راشد .. كنت ابيه أأذيه بقوه .. كنت ابي اذوقه من الكاس اللي انت شربت منه .. المفروض يصيبه حروق كثيره بس ..
كمل بصوت مرتجف: اخته اللي ركبت السياره وماتت .. ماتت يا عادل وهي مالها شغل باللي صار .. اخخ يا عادل انا مب قادر اعيش او انام او اكل .. مب قادر ..
ما قدر عادل يصدق الكلام اللي سمعه ..
هذا شيقول ..؟!
هذا شقاعد يخربط ..؟!
ماتت .. اخت راشد ماتت بسبب تصرفه المتهور ..!
صديقه صار قاتل .. قاتل ..!
هز راسه بعدم تصديق ..
هالكلام لا يمكن يكون صحيح ..
لا يمكن ..
انعقدت حواجبه بعصبيه وقال: علي انت شنو ساويت بالضبط ..؟! انا جم مره حذرتك جم مره ..؟! ذي المشكله خاصه فيني .. انت شكو تتدخل .. ليش جذي .؟! انت صرت قاتل .. عارف شنو يعني قاتل ..؟!
نزلت دموع علي وهو يردد: اعرف .. اعرف ..
عادل بعصبيه: ما دامك تعرف فليش عملت جذي يا علي ..؟! القتل ذي جريمه كبيره عند الله وخصوصا قتل الابرياء .. علي انت مو مستوعب حجم المعصيه اللي انت ساويتها .. انا مو قادر اصدق اللي صار .. اعرف انك مشكلجي وراعي مضاربات بس ما توصل للقتل ..!!
علي بألم: اعرف .. اعرف ..
حط عادل راسه بين إيده وهو مو مصدق ..
صاحبه صار قاتل ..
هذه حقيقه صعب احد يستوعبها ..
عادل بهدوء: قلت لكم اكثر من مره انسوا سالفة اللي صدمني .. انا خلاص نسيت السالفه وسامحته .. بني البشر مالهم حق في انهم يعاقبون الناس .. الله وحده يعاقب مب احنا .. انت غلطان ..غلطان يا علي ..
ما رد علي عليه لأن العبره خانقته ومو قادر يرد ابدا ..
تنهد عادل بألم وقال: سلم نفسك .. روح للمخفر وسلم نفسك لعل الله يخفف من عقوبتك بالاخره .. توب واستغفر والتجئ لربك .. ياللا روح سلم نفسك يا علي ..
لف علي عليه وهو يقول: بس راح يقصوني .. راح اموت بجذي ..
طالع عادل فيه وقال: انت صحيح قتلت بس ما كان في نيتك انك تقتل .. كنت تبي تآذي راشد .. ما راح توصل للقصاص بس العقاب راح يكون قاسي .. مره قاسي .. اشكر ربك وادعي انه يخفف عليك عقاب الاخره .. ياللا روح كفر عن غلطتك ..
طالع علي فيه بعيون مليانه دموع بعدها قال بصوت مرتجف: انا ندمان ..
ابتسم عادل وقال: هذه خطوه حلوه ..
هز علي راسه بإيه وقال: خلاص بأسلم نفسي واعترف .. راح اعترف وان شاء الله ربي يسامحني ..
عادل: إن شاء الله ..
قام علي وطلع من البيت ..
غمض عادل عيوونه بقووه عشان يمنع دموعه من النزول .. اللي صار مو شوي ابدا ..
ابدا ..

========================================