شبكة همس الشوق - عرض مشاركة واحدة

19 - 3 - 2014, 10:50 AM

|$[ البآرت التاسع عشر الجزء الثاني ]$|

صَوتٌ دافِئ .. اعآد لي تِلک الذِكرَي المُؤلِمه ..

سمعت اسيل صوت خلفها ..
ما امداها تلف إلا وقاطعها ذاك الصوت اللي يقول: شنو تساوين عند شقة باسل .. التنصت مب كويس لأنه يدخل الانسان في مشاكل هو في غنى عنها ..
لحضه هالصوت يشبه ..
يشبه ..
إبتسمت بألم وهي تقول في نفسها: "غبيه .. مستحيل يكون هو" ..
لفت وطالعت في الشخص وكملت في نفسها: "لأن آرثر مات" ..
طالع فيها ذاك الشخص فتره بعدها قال: منو انتي ..؟! وليش تتصنتين على شقة باسل ..؟!
ما جاوبت عليه ..
كانت تطالع فيه والألم واضح على وجهها ..
تبغاه يتكلم ولا يوقف كلام .. لأن صوته يشبه ....
يشبه صوت آرثر ..
نفس الصوت ونفس طريقة الكلام ..
استغرب ذاك الشخص من سكوتها ونظراتها الغريبه ..
تنهد وقال: انتي شسمج ..؟!
ظلت اسيل ساكته فتره بعدها قالت: اسيل ..
ابتسم ذاك الشخص وقال: اسمج حلو .. اسمعي حبيبتي اسيل .. اتمنى انج ما عاد تعيدي هالتصرف .. يا كثر الجرائم اللي حصلت ومعظمها كان بسبب التنصت والفضول ..
طالعت اسيل فيه بتفحص ..
تقريبا عمره يجي سبع او ثمان وعشرين سنه فقالت: احسك كأنك شرطي ..
إبتسم لها وقال: وانا فعلا شرطي ..
اندهشت اسيل بعدها طالعت في شقة باسل وقالت: انت ياي تقبض على باسل ..؟!
طالع الشخص في الشقه وقال بهدوء: لا .. ياي أأدبه ..
ما فهمت اسيل وش يقصد ..
شوي ضحكت في نفسها بإستهزاء ..
مو بس باسل اللي مو فاهمته .. اصلا اي شيء متعلق فيه ما راح تفهمه ..
تقدم ذاك الشرطي ودق الباب ..
شوي فتح باسل الباب ..
اول ما شاف هالشخص بسرعه قفل الباب بس الشرطي لحق ودخل رجله ومنعه من انه يقفل ..
استند باسل عالباب وحاول يقفله وهو يقول في نفسه: "يوووه شيبي ياي ..؟! اصلا شلون عرف مجاني" ..
الشرطي: عيب يا باسل .. الناس ما يقابلون الضيوف جذي .. ابعد خلني ادخل ..
باسل بورطه: لا لا غلطان انا مب باسل ..
إبتسم الشرطي وقال: من جد ..؟! عيل سوري لخبطت .. يا ولد بطل عبط وافتح انا اخوك الكبير ومستحيل اغلط ..
تصبب العرق من وجه باسل وهو يقول: اي اخ ..؟!! يا ابن الحلال شكلك فعلا غلطان .. ابعد ريلك وخلني اقفل الباب و و واكمل مذاكرتي ..
رفع اخوه حاجبه وهو يقول: تكمل مذاكرتك ولا تكمل الاعيبك اللي ما تبطلها .. افتح عيب عليك البنت راح تاخذ عنك فكره سيئه ..
فتح باسل عيونه بصدمه وهو يقول في نفسه: "البنت .. منو ..؟!" ..
فتح الباب بسرعه وشاف اسيل واقفه ورى اخوه ..
انصدم واشر بعيونه لها بمعني روحي من هنا ..
استغربت اسيل من نظراته .. بس اللي فهمته انه ما يبغاها تكون موجوده اللحين ..
ابتسمت بتحدي وظلت واقفه لعل وعسى تفهم شيء من مخططاته ..
عصب لما شافها تعاند فبدأ شغل الاشارات واخوه متكتف ويطالع في اشاراته لأسيل ..
هزت اسيل راسها بلا وقالت: ماني متحركه ..
اندهش باسل وقال بسرعه: اشش لا يسمعج اخوي ..
الاخ: احلف يا شيخ ..؟!
ألتفت باسل جهة اخوه وقال: انت من متى تطالع فيني ..؟!
الاخ: من وقت ما طلعت من شقتك ..
بلع باسل ريقه وقال: يعني شفتني وانا أأشر لها عشان ما تشوفني ..
هز اخوه راسه وهو يقول: طبعا ..
باسل بضجر: افف .. انت ازعاج .. شلون عرفت مجاني ..؟!
الاخ: اولا حاجني بإحترام يا حبيبي .. ياللا ورني الاحترام اشوف ..
تنهد باسل وقال: اسف .. ها يا اخوي العزيز شلون عرفت مجاني ..؟!
الاخ: شطور حبيبي .. شلون عرفت مجانك ..!! لا تنسى اني شرطي وشيء مثل جذي مو صعب علي اني اطلعه ..
دخل إيده بجيبه وكمل: ياللا وين سجى ..؟!
اندهشت اسيل لما سمعت اسمها ..
يقصدوها ولا يقصدوا وحده غيرها ..؟!
باسل بإستعباط: سجى ..! اي سجى تقصد ..؟! اممم انا مب فاهم ..
رفع اخوه حاجبه وقال: ادخل خلنا نتفاهم داخل ..
بعد باسل عن الباب وهو يقول: تفضل إدخل ..
دخل اخوه لداخل وبعدها ظهر الانزعاج على وجه باسل وهو يتمتم بقهر: لا لا .. كل شيء ولا ان خطتي تفشل ..
لف وطالع في اسيل وقال: شموقفج عند باب شقتي ..؟!
طنشت اسيل سؤاله وقالت: شتقصد بأن خطتك راح تفشل ..؟!
إحتدت نظرات باسل وقال: مالج شغل .. لا تتدخلي في امر ما يخصج ..
اسيل: انا ما تدخلت .. انت اللي دخلتني غصب عني فعشان جذي انا اطالبك بتفسير واضح للي قاعد يصير ..
تكتف باسل وقال: تبين تفسير ها ..؟!
اسيل: طبعا ..
إبتسم وقال: عيل سمعي وش بأقول .. انا استعملج عشان اضغط على شخص ما .. هو يبيج بأي ثمن بس انا ما راح اعلمه عن مجانج إلا لما ينفذ طلبي الوحيد .. بس للاسف لحد الان ما نفذ شيء ..
انصدمت اسيل من كلامه ..
يستعملها ..!!
يستعملها عشان اهدافه الخاصه ..!!
لهالدرجه شايفها زي اللعبه ومن دون قيمه ..؟!!
لهالدرجه هو مستحقرها ..؟!
طيب ليييه ..؟!
ليه يعاملها كذا ..؟!
ليه يعتبرها آداه للوصول لهدفه الخاص ..؟!
حست بالعبره تخنقها لأنها عرفت السبب ..
ايه لأنها لقيطه ..
مالها احد بالدنيا تستند عليه ويساعدها ..
مالها احد يعيشها معززه ولا يسمح لأحد انه يهينها بالطريقه هذه ..
مالها اي احد .. اي احد ..
زادت إبتسامته وقال: شفيج ما رديتي ..؟!
نزلت راسها بهدوء ..
لفت ونزلت من الدرج ..
اول ما اختفت من قدام نظره اختفت إبتسامته وقال بهمس: اسف ..
دخل وقفل الباب وراه ..

========================================

الساعه عشره الليل ..
كانت لينو جالسه على طاولة العشاء تاكل لوحدها ..
ابوها باقي ما رجع من شغله واخوها صايع يتسكع مع اصحابه ..
خلاص صارت متعوده تاكل لوحدها ..
من النادر ياكل اهلها معها ..
رفعت راسها لما سمعت صوت الباب فشافت اخوها جراح داخل وهو يدندن باحدى الاغاني القديمه ..
إبتسمت وقال: اشوفك مبسوط ..
جلس عالكرسي وهو يقول: طبعا راح اكون مبسوط .. شلون ما اكون مبسوط وانا اليوم كسرت خشم ذاك المستفز .. استمتعت وانا اشوفه ضعيف ..
بعدها كمل بقهر: بس صاحبه بدر خرب علي .. آآخ والله اكرهه ..
عقدت حواجبها وقالت في نفسها: "مستفز وصاحبه بدر ..!! لا يكون يقصد إياد وبدر" ..
حط خدها على إيدها وقالت: اووه من زمان ما شفتك جذي .. شلون كسرت خشم ذاك اللي تقول انه مستفز ..؟!
بدأ ياكل وهو يقول: غريبه .. لينو مهتمه .. لا ما اصدق .. اكيد ورى اهتمامج هدف .. عالعموم احنا باحدى السهرات اللي كنا نسويها قبل جم شهر صورناه بعد ما اجبرناه انه يسكر بالحيله وبجذي خلينا حياته بين إيدنا .. إذا ما نفذ طلباتنا هو اعلم بإيش راح يصير ..
طالعت فيه فتره بعدها قالت: اها ..
وبعدين كملت اكلها ببرود ..
اكل جراح عالسريع وبعدها قام وقال: ياللا انا رايح انام ..
لينو: تصبح على خير يالديايه ..
وكملت بإستهزاء: ينام بدري ..!!
عصب وقال: غبيه .. سمعي اذا ياء ابوي صحيني ..
لينو ببرود: إذا ما نسيت ..
جراح بقهر: تبن ..
خرج وطلع فوق لغرفته ..
تابعته بنظراتها والضيقه واضحه على عيونها ..
لفت نظرها وطالعت في جوالها ..
قبل كم دقيقه ارسلت لإياد عنوان البيت ومواعيد حظور ابوها ..
ظهر الألم في عيونها وهي تطالع في الجوال ..
ابوها مجرم ..
ابوها مجرم ..
للأسف إكتشفت هذه الحقيقه المُرّه ..
حطت راسها بين إيدها وهي حاسه بصداع راح يشلع راسها عن رقبتها ..
الاوراق والمستندات والسجلات اللي يطلبوها إياد وبدر إكتشفت انه الهدف منها هي الاطاحه براس ابوها ..
طبعا عصبت من تصرفهم وكانت راح تأدبهم بس ...
بس كان لازم تتاكد ..
جمعت كل الاوراق اللي طلبوها واكتشفت المبالغ الضخمه اللي تجيه كل شهر ..
اخذت سجله اللي بالبيت القديم وهنا اكتشفت هالحقيقه المؤلمه ..
حست بعبره حارقه في حلقها ..
ابوها مجرم ..
مجـــــــرم ..!
شلون تقدر تستوعب شيء مثل كذا ..؟!
آلاف المجرمين طلعهم بالرشوه ..
آلاف الابرياء سجنهم بالرشوه ..
كل فلوسه مصدرها الرشوه ..
كل النعيم اللي هم فيه اساسه حرام ..
اساسه مال حرام ..
ضغطت بأصابعها بقووه على راسها ودموعها بدت تنهمر على خدها ..
شهقت اكثر من مره وهي مو مصدقه ..
لفت إيدها على جسمها وهي تحسه ينتفض من شدة البكاء ..
إبتسامته .. إستهباله .. لعبه معاها ..
ذكريات ابوها كلها تمر بمخيلتها ..
كانت دلوعته ..
كان ما يرفض لها طلب وما عمره عصب عليها ..
كان دايم يبتسم بوجهها ..
بس ستـــــــووب ..!!
خلاص ما عاد بتشوف إبتسامته ..
ما عاد بتسمع صوته وهو يناديها بدلوعتي ..
ما عاد تستهبل معاه او تضحك معاه ..
راح يدخل السجن ..
السجـــــــن ..
قامت من مكانها وطلعت من المكان كله ..