شبكة همس الشوق - عرض مشاركة واحدة

19 - 3 - 2014, 10:52 AM

وفي مكان اخر ..
عند بيت ابوها القديم ..
كان بيت كبير تقريبا من ثلاث طوابق ومساحه واسعه قدام البيت وفيها اشجار كبيره حول الجدار الخارجي للحوش ..
المنظر جميل بس بالليل واللمبات طافيه تحس انك داخل بيت رعب ..
وقف بدر سيارته وقال: هذا هو العنوان ..
طالع إياد في البيت بهدوء تام فقال بدر: إياد ..
إياد: همم ..
بدر: افتح رسالة لينو الثانيه .. يمكن اليوم موعد ان ابوها يي وبجذي راح نتورط ..
إياد بهدوء: لا .. إذا كان بيي او ما بيي ما يهمني لأني لازم القى الاوراق اليوم ..
بعدها كمل بقهر: لازم ألقاها اليوم واسجنهم ثلاثتهم ..
طالع بدر في وجه إياد بعدها قال: الاستعجال يمكن يورطنا اكثر ..
لف إياد على بدر وقال بحده: والتأخير راح يشوه سمعتي وسمعت عايلتي كلها فاهم .. اذا كنت خايف فروح .. انا ما اجبرتك ..
تنهد بدر وقال: لا حووول .. إياد سيطر على نفسك شفيك منفعل ..؟! ما تعودت اشوفك جذي .. منو قال اني خايف .. انا راح اطلع منها اذا مسكوني بس انت اللي راح تتورط اكثر .. جراح وربعه راح ينشروا المقطع إذا تأخرت عليهم ..
فتح إياد باب السياره وقال: خلنا ننزل ..
تنهد بدر للمره الثانيه بعدها نزل من السياره وقفل الباب وراه ..
اتجه هو وإياد للبيت ودخلوا للحوش لأنه كان مفتوح ..
وصلوا لعند الباب الرئيسي وكان مقفل بالمفتاح ..
لف بدر حواليه بعدها قال: ماكو مفتاح .. امش ندش مع الدريشه ..
اتجه بدر لاحد الدرايش وإياد وراه ..
تنهد بدر وقال: مقفله ..
إياد: نكسرها ..
بدر بدهشه: شنو ..؟!!
إياد: ماكو لنا حل إلا اننا نكسرها .. إذا عندك حل ثاني فقول ..
طالع بدر في الدريشه لفتره بعدها قال: اخاف يكون فيه احد داخل وبجذي يسمعنا و .....
وقبل لا يكمل كلامه رمى إياد حجره على الدريشه وانكسرت ..
بدر: متهور ..
تسلق إياد ودخل من الشباك وهو يقول: ههههه ياخي صجيتني بحذرك ..
هز بدر راسه بيأس وبعدها تسلق هو كمان ودخل ورى إياد ..
عقد حواجبه وقال: هذا كأنه ميلس صح ..؟!
إياد: يب .. وعلى حسب كلام لينو فالسجل موجود بالمكتب حقه .. بالعاده المكتب دايم يكون بالدور اللي تحت .. عيل بندور في هذا الدور اولا ..
بدر: اوكي ..
خرجوا من المجلس وكان قدامهم سيب ومغاسل وحمام وغرفه ثانيه تكون بالعاده المكان اللي يحطوا فيه الاكل للرجال ..
خرجوا من هالجهه وشافوا صاله كبييييره وواسعه ..
بدر: المجان مظلم ..
إياد: وبقوه ..
بدر: إياد ..
إياد: نعم ..
بدر: احس اني سمعت صوت سياره ..
تقدم إياد من احد الابواب وهو يقول: يتهيأ لك .. بطل وسوسه وخلنا نفتش عشان نخلص بسرعه ..
لحقه بدر وهو يقول: اتمنى انها تكون وسوسه ..
تعرقل بشيء وكان بيطيح بس تمسك بإياد اللي قال: بدر شفيك انتبه ..
طالع بدر في الارض وقال: عمى .. فيه فتحات مكسره بين السراميك وصايره كأنها حفر ..
إياد: ههههه بيتهم قديم بقوه ..
فتحوا باب احد الغرف ودخلوا وبعدها قفلوه وراهم ..
إياد: غرفة اكل .. ابد ما اتوقع انها هني ..
شوي ضحك واشر على الزاويه وهو يقول: هههههههه بدر ذي التحفه بشنو تذكرك ..
بدر بإبتسامه: صج انك فاضي ..
إياد: ههههه والله تشبه تحفتكم اللي بالميلس .. وناسه ..
لف بدر ورى وهو عاقد حواجبه ..
إياد: شفيك ..؟!
بدر: مدري بس .. بس احس اني سمعت صوت بالصاله ..
طالع إياد فيه شوي بعدها فتح الباب وطالع في الصاله بس ما شاف شيء ..
إياد: يا ابن الحلال وسوستك صجتنا ..
بدر بتفكير: ياخوفي يكون صج مو وسوسه ..
إياد: عالعموم خلنا نلقى المكتب بسرعه ..
طلعوا من هالغرفه واتجهوا لوحده من الابواب ودخلوها ..
إياد: لا حوووول وين المكتب .. ؟!
بدر: ههههههه ياخي كالعاده الشيء اللي تبيه لازم تلقاه اخر شيء ..
طلعوا من الغرفه واتجهوا لغرفه بابها كان مفتوح ..
دخلوا فقال بدر: لا لا كويس لقينا المكتب ..
طالع إياد في الغرفه اللي كان فيها مكتب كبيير والجدران كلها عباره عن دولاب كتب وملفات ..
إياد: شيء غريب ..
طالع بدر فيه وقال: شتقصد ..؟!
إياد: فيه شيء غلط بالموضوع ..
طالع في الباب وقال: ليه كان الباب مفتوح ..؟! على حسب كلام لينو فالواضح ان ابوها يحط كل اوراقه المهمه هني فليش يتركه مفتوح ..؟!
اشر على المكتب وقال: وكمان فيه هناك اوراق مبعثره ..
تقدم بدر من عند الاوراق يطالع فيها وإياد يلف بعيونه على المكتب وهو حاس بإحساس مو طبيعي ..
بدر: إياد إياد تعال هني ..
جاء إياد عنده فقال بدر وهو يقلب الاوراق: كل هالاوراق هي جزء من السجل اللي ندور عليه ..
عقد إياد حواجبه وهو يقول: شنو ..؟!
بدر: هذه الورقه هي بداية احد المشاكل بس انا مو قادر القى تكملتها لأن تكملتها اكيد بيكون فيها تجاوزات راح تدين ابو جراح .. حتى شف كل الاوراق موجوده بس الاساسيات اللي تدينه مو موجوده .. كأنه احد اخذ الاوراق المهمه وبس وبعدها طلع ..
طالع إياد في الاوراق فتره فقال بدر: تتوقع ان لينو خدعتنا ..
هز إياد راسه بلا وهو يقول: لا .. ما اتوقع .. بس برضوا هذا إحتمال ..
ظهرت العصبيه على وجهه وهو يقول: طيب اللحين شنسوي ..؟!
اول ما خلص سؤاله طلع صوت شيء يطيح من برى ..
طالعوا في بعض وقال بدر: فيه احد بالبيت ..
مشي إياد وفتح الباب وشاف ان احد الغرف مولعه الانوار فيها ..
إياد: شكل كلامك كان صج مو وسوسه ..
عقد حواجبه وهو يسمع اصوات بالغرفه وكأن احد يفتح الادرجه بشكل عشوائي ..
بدر: منو تتوقع يكون ..؟!
إياد بهمس: تعال نشوف ..
تقدموا بهدوء تجاه الغرفه وبانت بعض الدواليب فقال إياد: هذا مطبخ ..
شوي سمعوا شهقه وكأن في الداخل بنت تبكي ..
عقد إياد حواجبه بعدها دخل للمطبخ ..
وقف مكانه وهو مصدوم من المنظر اللي قدامه ..
دخل وراه بدر ولما شاف المنظر قال بصدمه: لينو ..؟!!!
رفعت لينو راسها عليهم .. وجهها كان احمممر والدموع مليانه بخدها ..
كانت جالسه وقدامها كان السجل اللي يدين ابوها وبإيدها ولاعه وحتحرق السجل ..
اول ما شافتهم قالت بصدمه: انتم .. انتم ليه ييتم ..؟!
طالع إياد فيها وهو مصدوم وقال: لينو انتي شنو قاعده تسويين ..؟!
تقدم عندها عشان ياخذ الولاعه ويطفيها قبل لا تحرق السجل فصرخت بهستريا تقول: ابعـــــــد .. لا تقرب ..
إياد بعصبيه: لينو ايش الهبل اللي قاعده تصلحيه ..
هزت راسها وهي تقول بنفس الصراخ: ابوي مجرم .. ابوي طّلع كثييير مجرمين من السجن .. ابوي حرامي وغشاش ومجرم .. مجانه السجن .. لازم يتعاقب المذنب ..
زاد صراخها وهي تقول: بس هو ابـــــــوي .. مالي بالدنيا احد غيره .. امي ماتت واخوي دووم مع اصحابه .. مالي احد غير ابوي فمستحيل اسمح لكم انكم تسجنونه .. مستحيـــــــل ..
طالعوا فيها شوي فقال بدر: عيل ليه ساعدتينا كل هالفتره ..؟!
ارتجفت شفتها وقالت بصوت باكي: هو مجرم .. مجرم والمفروض ينسجن .. لازم ينسجن .. انا ما عندي الشجاعه اني اسجنه فعشان جذي ساعدتكم .. بس ندمت ..
نزلت دموعها وكملت: ما راح اخليكم تسجنونه .. ما راح اسمح لكم انكم تبعدون ابوي عني .. ان شاء الله راح يتوب بس ما تسجنونه ولا تطيحون راسه .. كل واحد منكم عنده اهل ومبسوط معهم وانا ما عندي غير ابوي فعشان جذي مو حاسيين بالألم اللي بجواتي .. اللي يشوفني يقول اني مبسوطه بس الحقيقه لاا .. لااا ..
شوي احتد صوتها وقالت: قولوا عني مينونه او قولوا خبله بس انا ما راح اسمح لكم تقربون .. السجل راح احرقه واحرق كل شيء يدين ابوي .. ما راح اخليكم تسجنونه .. امووت ولا اشوفه مسجون ..
تقدم إياد خطوه وهو يقول: المجرم مجانه السجن .. اصحي على نفسج يا بنت .. اللي تسويه غلط .. عارفه شنو غلط ..؟!
لينو بصراخ: لا مو غلـــــــط .. اللي تسووه انتم غلط .. تبون تدمرون حياتي وحياة ابوي ...
قاطعها إياد بحده: ابوج لازم ينسجن عشان يوقف ظلم .. ناس كثيير انظلموا بسبب طمع ابوج .. فإعقلي وطفي الولاعه ..
هزت راسها بلا وهي تقول: لا .. لا .. ابوي ما راح ينسجن ..
وحطت الولاعه على السجل فإحترق طرفه ..
انصدموا بدر وإياد من اللي يشوفونه ..
وبسرعه تقدموا عندها وطنشوا صراخها ..
مسك إياد لينو وسحب الولاعه منها وبدر اخذ السجل وحاول يطفي النار بإيده ..
دفت لينو إياد وهي تقول: لا لا .. ابعـــــــدوا ..
طفى بدر النار وقال: صج انج مينونه ..
رجعت لينو خطوه ورى وهي تقول برجفه: ليه .. ليه ..؟! هات السجل ..
إياد بعصبيه: لينو انتي وين عقلج ..؟! استخفيتي ولا شنو ..؟!
فتحت الدرج اللي جنبها وطلعت سكين فإنصدم إياد وقال: شنو بتساوين ..؟!
اشهرت السكين في وجههم وقالت: بسرعه هات السجل وإلا ورب الإيمان راح اذبحكم او اذبح نفسي .. مابي اعيش دام ابوي مو موجود .. بســـــــرعه هاته ..
بدر: لينو استهدي بالله واتركي السجين ..ترى الشيطان شاطر فإتركيه قبل لا تندمي ..
هزت راسها بلا وهي تقول بطريقه شبه مجنونه: مابي .. مابي اتركه .. انتم تبون تبعدون ابوي عني وانا ساكته .. بســـــــرعه هات السجل ترى والله العظيم لأذبح نفسي ..
طالع إياد فيها وهو مصدوم ..
ابدا ما كان متوقع ان لينو البارده تكون كذا ..
بس بصراحه ما يقدر يلومها لأنها تصرفت نفس تصرفه ..
عرف ان ابوه رمى اخته وهي صغيره وهذه جريمه بس ما قدر يعلم عليه او يبلغ ..
مهما صد عنه مستحيل ينسى الايام اللي فاتت ..
هذا ابوه وماله احد بالدنيا غيره ..
هو فاهم شعورها ..
فاهمه عدل ..
تقدم من لينو فقالت بصراخ: ابعـــــــد .. ابعد ترى والله لأأذيك ..
تقدم اكثر بحذر وهي ترجع ورى لحد ما صكت بالدولاب ..
بدر: هيه إياد انتبه ..
إياد: لينو اتركي السجين على ينب وخلينا نتفاهم ..
هزت راسها بلا وهي تقول: مابي .. بسرعه السجل بسرعه ..
تقدم منها اكثر فغمضت عيونها وحركت السكين بعشوائيه وهي تقول: ابعد .. ابعد ..
رجع ورى لأن السكين كانت راح تصيبه ..
بدر: إياد .. خلاص خلنا نعطيها السجل .. ان شاء الله نقدر نلقى ادله ثانيه غيرها ..
إياد: مستحيل ..
طالعت لينو فيه وقالت: مستحيل ..!!
شهقت وكملت: يعني عادي عندك اني اعيش بدون ابو ..؟! يعني عادي عندك اني اذبح نفسي اللحين ..؟!
وبسرعه حركت السكين وطعنت فخذها وبعدها صرخت بألم ..
إياد وبدر ما قدروا يستوعبوا اللي صار ..
زادت شهقاتها وهي تقول: ابي السجل .. وربي اني لأطعن نفسي بصدري إذا ما يبتوه اللحين ..
هز إياد راسه بصدمه ..
خلاص واضح ان البنت فقدت السيطره على نفسها ومو حاسه باللي تساويه ..
تقدم بدر وقال: إياد خلاص كافي خلنا نعطيها السجل .. إياد اذا صار لها شيء بنكون احنا السبب .. خلنا نعطيها ..
اخذ إياد السجل من بدر وقال: لا .. السجل بيكون معي وما راح اعطيها .. لينو اعقلي وحسي بنفسج .. انتي شكلج مو مستوعبه الشيء اللي قاعده تسويه .. هذا اسمه انتـــــــحار ..
تقدمت خطوتين لجهة إياد وقالت بإنفعال: مالك شغل فيني .. انتم اصلا ايش دخلكم لحياتنا .. هات .. هات السجل يا إياد ..
بدر: إياد اعطها وخلصنا وربي انها صاجه في حجيها الـ...
قطع كلامه فجأه وهو يقول في نفسه: "كأني سمعت صوت سياره .. معقوله اتخيل" ..
وقفت لينو بمكانها وهي حاسه بألم فضيع في رجلها مع ان طعنتها كانت سطحيه ..
بس ألم قلبها كان اكبر وسيطر على مخها تماما ..
مد إياد إيده وقال: هات السجين يا لينو وتعوذي من الشيطان ..
هزت راسها بلا وهي تقول بهستيريا: مابي مابي مابي .. هـــــــات .. هات الملف بسرعه يا الجلب ..
إياد بحده: انسي الملف تماما لأني مستحيل اعطيج إياه استسلمي للأمر الواقع يا بنت ..
وللحضه .. طلع صوت من عند باب المطبخ ..
لف الكل بصدمه جهة الباب فشافوا محمد ابو لينو واقف ويطالع فيهم بدهشه ..
ايش اللي يصير وليش ..؟!
استغلت لينو هالفرصه ومسكت السجل وسحبته ..
وفي اخر لحضه حس إياد وشد قبضته عالسجل وسحبه بقووه منها ودفها بعيد ..
ترنحت لينو بوقفتها وتزحلقت رجلها فطاحت السكين في نفس اللحضه اللي طاحت فيها عالارض و ....
ثبت مقبض السكين في حفره بين السيراميك وصار النصل على فوق وطاحت لينو فوقه ودخل النصل كله في .. بطنها ..

صرخــــت صرخة ألم عنيفـــــه طلعت من جوف صدرها وبعدها انقطع صوتها ..
تماما ..
لحضة هدوء ..
لحضة صمت ..
نزل الدم منها وبدأ ينتشر على السيراميك البيضاء ..
الكـــــل كان واقف بذهول يستوعب اللي صار ..
ابوها جلس عالارض بعد ما خانته ارجوله ..
تقدم بدر بسرعه لعندها وقلبها على ظهرها واندهش لما شاف ان النصل بكامله ببطنها ..
حس بالألم من هالمنظر المؤلم ..
طلع جواله بسرعه واتصل على الاسعاف ..
كل هذا يصير وإياد واقف والصدمه مغرقته تماما ..
رفع إيده اللي ترتجف وطالع فيها ..
هو السبب ..
هو اللي دفها بإيده ..
هو اللي رفض يعطيها السجل ..
هو اللي عاند وقدم مصلحة عائلته ونفسه على رأيها ..
انتفض جسمه بعد ما سمع صراخ ابوها يقول: انـــــت اللي ذبحتها .. انت يا إيـــــــاد ..
لف بدر عليه وقال بعصبيه: هذا قضاء وقدر .. وكمان هي ما ماتت فلا تتفاول على بنتك ..
قام ابوها بسرعه لعندها ومسكها وهو يقول بصوت مرتجف: لينو بنتي .. هيه حبيبتي ردي علي .. لينـــــــو ..
هزها وبدأت الدموع تتجمع بعيونه ..
كل اللي صار قدامه صعب يستوعبه ..
ما يدري ايش اللي جاب بنته لهنا ..
ما يدري إيش اللي جاب إياد وبدر اعداء ولده هنا ..
مو فاهم سبب إنفعال بنته ..
مو فاهم حكاية السكين والملف اللي كان معهم ..
مو فاهم شيء ..
ولا شيء ..
بعد بدر وطالع في إياد اللي ما زال واقف ويطالع بإيده ..
جاء عنده وحط إيده على كتفه وهو يقول: هيه إياد شفيك ..؟!
إياد بهمس: انا .. دفيتها .. بإيدي ..
بدر: إياد خلاص تعوذ من إبليس .. اذكر ربك ..
فتح فمه وقال بصوت مرتجف: انا السبب .. انا السبب بكل هذا اللي يصير .. انا السبب ..
بدر بحده: إياد وبعدين .. قلنا خلاص ما صار إلا المكتوب .. استغفر ربك واذكره ..
طاح السجل من إيده وظهر الألم بعيونه ..
لو انه ما اصر على بدر يجون الليله ..
لو انه ما عاند لينو واعطاها السجل ..
لو انه ما دفها بإيده ..
كان ما صار لها شيء .. ابدا ..
لو ماتت هو السبب ..
لو حصل لها شيء خطير هو السبب ..
لو تدمرت نفسيتها هو السبب ..
هو السبب الرئيسي بكل شيء ..
بكل شيء ..
اقتربت اصوات سيارات الاسعاف من البيت ووقفت قدامه ..
كلها ثواني حتى تجمعوا اربع رجال في المطبخ ..
اول ما شافوا لينو اسرعوا لها وحطوها عالحماله واخذوها معاهم ..
قام الاب ولحق ببنته بسرعه وهمه الوحيد هو سلامة بنته ..
تابعهم بدر بنظراته بعدها تنهد وقال: يا رب تعيش وتصير بخير ..
لف على إياد وقال: ياللا خلنا نطلع ..
لما ما سمع رد منه اخذ السجل من الارض ومسك بإيد إياد وهو يقول: ياللا امش معي ..
وسحبه معاه وطلعوا من البيت وركبوا السياره ..
شغل بدر السياره وهو يقول: إياد الله يهديك استسلم للأمر الواقع وادع لها بالشفاء ..
ضاقت عيون إياد وهو يطالع في الشارع وقال بهمس: ما راح اسامح نفسي إذا صار لها شيء ..
طالع بدر فيه شوي بعدها طالع في الطريق ..

========================================