شبكة همس الشوق - عرض مشاركة واحدة

20 - 3 - 2014, 01:38 AM

برى عند صبى مسكت بالعمود اللي جنبها وقالت: ما لقيتها .. اخاف تكون داخل .. لا يا رب .. المشكله ان موبايلها بالجنطه ..
ومن وراها تباطئت وحده من السيارات وطالع صاحبها بالمطعم اللي يحترق ..
هز راسه وهو يقول: لا حول ولا قوة إلا بالله .. شنو قاعد يصير هني ..؟!
جاه صوت الشخص اللي كان يكلمه يقول: شفيك طال عمرك ..؟!
انتبه للجوال وقال: قدامي مبنى يحترق وشكله مطعم ..
ضاقت عيونه وهو يقرأ اسم المطعم وقال بحقد: مطعم سعد ..
تنهد وقال: المهم اسمع يا مروان .. كل اللي قلته لك نفذه بسرعه .. وانا عندي اللحين شغله وراح اييك بالعصر وابغى كل شيء جاهز ..
ضاقت عيونه وكمل: لازم اسجن سعد باجر .. واسجن كل المتعاونين معاه في صفقة الاسلحه ذي .. ياللا مع السلامه ..
مروان: حاضر .. ما راح يصير إلا اللي تبغاه ..
قفل هذا الشاب اللي ما كان غير بسام جواله بعدها طالع في المطعم فتره طويله ..
حرك سيارته عشان يتجه للجامعه ..
عشان يشوف بنت اخته ..
لف عاليسار بهدوء وببطء وهو يطالع في المطعم ..
وقف سيارته ونزل منها ..
تقدم جهة المطعم وطالع فيه ..
فيه إحساس غريب بجواته اجبره انه ينزل ..
لف عالبنت اللي واقفه جنبه وقال: شلون إحترق ..؟!
لفت عليه البنت وقالت بتوتر: مدري .. مدري ..
بسام: شفيج متوتره ..؟!
البنت: رفيجتي اسيل ما لقيتها وشكلها داخل المطعم .. مرره خايفه ..
عدل بسام وقفته وقال بسرعه: اسيل مين ..؟! شسم ابوها ..؟!
طالعت فيه وقالت: مالها اهل .. بس قبل شوي قالت لي ان صاحب المطعم ابوها ..
انصـــــــدم بسام من الكلام اللي سمعه ..
مسكها من اكتافها وهو يقول بإنفعال: انتي متأكده ..؟! متأكده انها قالت جذي ..؟!!!
هزت راسها بإيه ولما فتحت فمها بتتكلم راح بسام وتركها ..
اتجه بسرعه للمطعم ودخل بالقوه بين الناس عشان يلحق عليها ..
توه عرف مكانها ولا يبغاها تضيع منه ..
وصل للمطعم بس الحرس مسكوه وقال واحد منهم: معليش يالاخو بس ممنوع الدخول .. مو شايف كيف الوضع ..؟!
سحب بسام نفسه منهم وقال: ابعد بنت اختي داخل .. راح تموت إذا ما ييت ..
الحارس: والله كل الموجودين يبون يدخلون يساعدون اهلهم .. الحرس راح يتكفلوا بالوضع لحد ما يوصل الدفاع المدني .. ما نبي خساره بالارواح ..
تنرفز بسام منهم .. مو وقتهم ابد ..
لف بعيونه عالسريع فحصل مكان مفتوح وفاضي ويقدر يدخل منه ..
ابعد عنهم وراح لهالمكان ودخل منهم ..
اول ما دخل حس بحراره كبيييره بسبب النيران المنتشره ..
وشاف قدامه مناظر بشعه ..
مو واحد ولا اثنين .. حول عشر اشخاص محترقين من هالنيران ..
وغيرهم احرقتهم ايدهم او رجولهم ويصرخوا من الألم ..
لف بعيونه بينهم بعدها صرخ: اسيــــــــــــــل ..
تقدم وصارخ: اسيـــــــل وينـــــــج ..؟؟؟!
دخل لحد داخل وهو ينادي عليها ومع كل مره خوفه يزداد عليها ..
ماتت ..!! إحترقت ..!! انتهت ..!!
وساوس كثيير تمر براسه ..
دخل بالقوه بين الناس وهو يدور عليها مثل المجنون ..
لو صار لها شيء راح يلووم نفسه .. لو انه جاء من الساعه سبعه افضل ..
ازدادت النيران في المكان والدخان صار خانق ..
وصراخ الناس والاطفال يزداد وصوته كل ماله يعلى بأسم اسيل بس محد رد عليه ..
اسند ظهره على الجدار واخذ له نفس عميييق وحس ان حباله الصوتيه راح تتقطع من كثر ما صارخ بإسمها ..
لف بعيونه يمين وشمال بعدها صرخ: اسيـــــــل ..
رفعت اسيل راسها بعد ما سمعت صوت بعيد ينادي عليها ..
مين يكون ..؟! وفينه ..؟!
شوي إبتسمت بإستهزاء ..
هذا الصوت اكيد ما يناديها هي ..
يا كثر البنات اللي اسمهم اسيل ولهم اهل يدورو عنهم ..
لفت حواليها وعيونها احرقتها بقوه ..
مدت إيدها وسحبت العدسات من عيونها عشان لا تتأذى ..
رمتها عالارض .. ما عندها الحافضه حقتها عشان تحفضها ..
شكلها بتشتري لها عدسات ثالثه ..
تنهدت ولما تقدمت خطوه طاح عمود قدامها فصرخت بخوف وتراجعت للجدار ..
لف بسام ورى بعد ما سمع هالصراخ ..
مين ..؟! اسيل ..؟! او وحده ثانيه ..؟!
تقدم ولاحظ من بعيد بنت حاطه إيدها على إذنها ومغمضه عيونها ..
الخوف كان واضح عليها ..
الرعب كان واضح وبقوه ..
طبيعي اي واحد في هالمكان يرتعب وخصوصا لما يسمع صراخ الناس والآمهم ..
تقدم ناحيتها وهو يقول: اسيل ..؟!
رفعت اسيل راسها وعلامات الاستغراب واضحه على وجهها ..
عقدت حواجبها وهي تشوفه ..
شكله مو غريب عنها ..
لا مو غريب ابدا ..
لحضه !!
تذكرته .. يشبه شخص شافته اكثر من مره ..
لا ما يشبهه .. هذا هو نفسه اللي ضرب ناصر في ذيك الليله ..
وهذا هو نفسه اللي شافت صورتها في محفضته ..
بس مين يكون ..؟! وليش اللحين ينادي عليها ..؟!
ظل بسام فتره يطالع فيها ..
ما تشبه ذيك البنت اللي شافها عالشاطئ ..
قرب من عندها وهو يقول: انتي اسيل ..؟!
هزت راسها بإيه وبمنتهى البرود ..
ابتسم وقالت: واخيرا ..
اسيل بحذر: منو انت ..؟!
تقدم لحد ما وقف قدامها ..
حط إيده على كتفها وقال: لا تخافي .. ان شاء الله لما نطلع من هني راح اقول لج كل شيء ..
بعدت إيده عنها ورجعت ورى وقالت: منو انت وشتبي ..؟!
تنهد وقال: سجى الموضوع ما ينفع نفتحهه اللحين .. خلينا نطلع من هني اول .. المجان خطر ..
اسيل بهدوء: سجى ..؟!! شلون تعرف اسمي ..؟!
زادت إبتسامة بسام وهو يقول: واخيرا .. اللحين تأكدت انج نفسها سجى .. مع ان شكلج مختلف عن المره اللي فاتت ..
طالع في عيونها وكمل: بس عيونج هي نفسها .. ما تغيرت ..
رجعت خطوه ثانيه وقالت: انا سألتك سؤال واضح وابي اجابه واضحه .. منو انت وشتبي ..؟!
بسام: مو وقته نتكلم .. خلينا نطلع من هني اول .. احس اني راح انكتم اذا ظليت اكثر ..
اول ما خلص جملته سمع صوت تكسر شيء ولما لف شاف احد الديكورات اللي كانت بالسقف تطيح فبسرعه بعد عن طريقها ..
طاح الديكور الخشبي المشتعل قدامه وصار حاجزهم هو واسيل في هالزاويه ..
تلفت بسام حوله بتوتر وهو يشوف ان النيران محاوطتهم تماما ومافي طريق للخروج ..
يعني تقريبا بعد خمس دقايق يصبحوا مشويين وناجحين كمان ..
لف بسام جهة الشباك اللي وراهم وشاف انه مجرد قزاز زينه وما ينفتح ..
طالع في اسيل اللي كانت مركزه نظرها ناحيته ..
لف وجهه وطالع في ساعته بعدها قال: وين الدفاع المدني ما ياء .. إذا طول الوضع جذي راح نحترق اكيد ..
تلفت حوله مره ثانيه يدور على اي طريقه للخروج ..
دخان النيران يكتمهم هذا غير عن الحراره الشديده ..
تصبب العرق من وجهه لحد ما ثبت نظره على الستاره المخمليه الكبيره ..
راح لها بسرعه وسحبها لحد ما خلعها من الجدار واسيل مستغربه من تصرفه ..
راح لأسيل ولفها بالستاره وهو يقول: راح الف هذا عليج عشان ما تتأثري بالنار وبعدها راح اتدحرج انا وانتي من وسطها وان شاء الله نقدر نطلع ..
طالعت فيه فتره بعدها قالت: وانت ..؟! ماكو شيء يحميك ..
بسام: لا تشيلي هم .. ملابسي ثقيله وان شاء الله ما يصيبني شي ..
اسيل بصوت منخفض: انت منو تكون ..؟!
ابتسم وقال: خالج يا سجى ..
حضنها وبعدها رمى بنفسه هو وياها وسط النيران بسرعه عشان يقدروا يطلعوا من المكان كله ..

وصل الدفاع المدني ورشاشات سياراتهم بدأت تغرق المطعم حتى تطفي كل النار اللي فيها ..
وقفت سياره فاخره قدام المطعم ونزل منها صاحب المطعم سعد وطالع في مطعمه بصدمه كبيره ..
جاء عنده حارسه جلال وقال بسرعه: العذر والسموحه طال عمرك .. انا عملت كل اللي علي وما تصورت ان المطعم راح يصير فيه جذي .. انا جد اعتذر ..
تقدم سعد خطوتين وعيونه ما زالت مثبته عالمطعم ..
هذه صدمه كبيره ..
المشروع هذا دفع فيه اموال كبيييره وبنى عليها احلام اكبر ..
بسهوله وببساطه وفي اقل من ساعه تحول الى رماد ..
الى رمـــــآآد ..
احتد نظره وقال في نفسه: "جوزيف النذل .. راح اندمك .. راح اخليك تندم لأنك وقفت في ويه سعد الراهي" ..
ومن بعيد كان فيه وحده واقفه ومستنده على سيارتها ولابسه نظارتها الشمسيه من ارماني وإبتسامة السخريه على وجهها ..
فتحت فمها وقالت بهمس: تستاهل اكثر يا سعد .. هذا يزاء اللي ساويته بزوجتك وبسجى ..

ومن جهه اخرى ..
كانت اسيل تمشي وهي لافه إيد بسام على رقبتها وهو بالقوه يمشي ..
الألم منتشر في كل جسمه ..
طلعت من الإزدحام وبعدها فكته فإستند عالجدار وبعدين جلس ..
كان نفسه متسارع بقوه واسيل تطالع فيه ..
ظلت ساكته بعدها قالت: شتقصد من الحجي اللي قلتاه لي قبل شوي ..؟! شنو يعني انت خالي ..؟!
رفع راسه وطالع فيها ..
كانت صورتها مشوشه بعيونه ..
ابتسم وقال: يعني اني خالج اخو امج .. اخو سميه ..
ظهرت النظرات البارده بعيونها فتنهد بسام وقال بصوت شبه ضعيف: انا راح اشرح لج كل شيء .. راح اشرح لج عن امج وابوج وعن سبب رميج في الشارع وكل شيء .. بس اللحين تعالي معاي .. انا راح اطلعج من هالحياة اللي عيشوك فيها اهلج .. راح اطلع لج هويتج الحقيقيه وتصير وحده عاديه مثل الكل و .....
قاطعته اسيل تقول بهمس: بعد شنو ..؟!
بسام: شتقصدين ..؟!
ظهر الألم على وجه اسيل وقالت بنفس الهمس: بعد شنو ..؟!
ارتجف صوتها وهي تقول: بعد ما سموني لقيطه ..
حطت عيونها بعيونه وقالت: بعد ما تشمت الكل فيني .. بعد ما صار لقبي اسيل اللقيطه .. بعد ما تحطمت حياتي وانسانيتي .. بعد شنو ..؟! ياوبني ..؟!
طالع بسام في عيونها اللي تجمعت فيها الدموع ..
مو عارف بإيش يجاوبها ..
فعلا وش بتستفيد إذا رجعت لها هويتها ..
خلاص صارت في نظر كل اللي يعرفوها انها لقيطه ..
ما عاد صارت تفرق معاها لأنها كذا ولا كذا لقب اللقيطه محد راح ينساه ..
إبتسم وقال بهمس: اسيل انا وربي حاس باللي تحسينه بس تذكري ان هذا إبتلاء من الله .. وتذكري انه انتي اللي راح تبقي لنفسج في النهايه فحاولي انج تسعدي نفسج وبس .. كل الناس مصيرهم يتركوج فلا تهتمي لهم ولحجيهم ..
بعد ما خلص كلامه بدأ يكح واسيل تطالع فيه بدهشه ..
جملته هذه .. جملته هذه تشبه الجمله اللي قاله لها ذاك المجهول ..
اخذ بسام جواله والآلام منتشره في كل جسمه ..
حط السماعه على اذنه وبعد فتره قال: ألو مروان ....... ها صلحت اللي قلته لك ...... احسنت .. اسمع ابغاك تيي للمجان اللي قلته لك اول .. مع السلامه ..
قفل الجوال بعدها عض على شفته بألم ..
قامت اسيل فقال بسام: هيه سجى .. وين ..؟!
اسيل بهدوء: اللحين يايه ..
وراحت عن انظار بسام اللي ما كان مطمئن لكلامها ..
يخاف انها تروح من إيده مثل ما راحت اول مره ..
حاول يوقف واستند على الجدار ..
مشي كم خطوه بس إحتكاك ملابسه بجلده آلمه لأن تأثير النيران ما زال موجود ..
شوي إرتاح لما لاحظ اسيل جايه وشاف معاها اثنين من المسعفين معاهم حماله ..
بسام: هذه شنو بتساوي ..؟!
وصلت عنده وقالت للرجال اللي معهم: هذا كمان مريض .. لازم تسعفوه ..
بسام بسرعه: لا لا انا تمام ..
جاء المسعفين عنده واندهشوا لما شافوا آثار الحروق في ظهره واياديه فقال واحد منهم بعصبيه: انا تمام ها ..؟! انت اللي يسمعم يقول انك تعاقب نفسك .. تعال تعال ..
تأفف بسام وطالع في اسيل وقال: ما كان تصرفج صح ..؟! تعالي معي ..
رجعت اسيل خطوه ورى وقالت: لا .. انا مرتاحه وانا وحدي ..
بسام: شنو ..؟!
جاء صوت وراهم يقول: انت تعبان يا بسام فروح للمستشفى وخل اسيل لي ..
لفوا بسام واسيل على ورى فشافوا وحده متكتفه ولابسه نظاراتها الشمسيه ..
احتدت نظرات بسام وقال: رؤى ..
نزلت رؤى نظارتها وقالت: الحمد لله على سلامتك يا بسام .. بس اعذرني .. اسيل راح تيي معاي ..
بسام: شنو تقصدين بانها راح تيي معاج ..؟! لا يكون ناويه تخلصين عليها وتكملين شغل اختج ..
رؤى بهدوء: لا تدخل اختي بالموضوع .. فاهم .. ؟!
بسام بحده: لا مو فاهم .. اختج ذي هي اساس البلا .. هي اللي فرقت بين اختي وريلها .. واللحين انتي يايه تكملين شغل اختج صح ..؟!
رؤى: للمعلومه تراي انا اكبر منك فرجاءا استخدم أسلوب ارقى من جذي .. اهلك ما علموك شلون تحاجي اللي اكبر منك ..؟!
فتح بسام فمه بيرد عليها بس تنهد وتعوذ من الابليس ..
تدخل احد المسعفين وهو يقول: اعذروني مشاكلكم حلوها بالبيت واللحين ممكن تيي معانا عشان نعمل لك الاسعافات اللازمه ..؟!
رؤى: روح معه .. انا ما راح آكل البنت .. باجر راح تلقاها عندك ..
ضاقت عيون بسام وهو يطالع فيها بعدها قال: وليش تبينها ..؟!
رؤى: اعذرني .. ما راح اقول السبب ..
لف بسام وطالع في اسيل بعدها لف على رؤى وقال: إذا ما يت باجر راح ادفعج الثمن فاهمه ..؟!
رؤى بإبتسامه: اوكي فاهمه ..
تنهد بعدها ركب عالحماله وراح معهم ..
طالعت اسيل في رؤى ببرود وقالت: منو انتي بعد ..؟!
ابتسمت رؤى وقربت من اسيل وقالت: انا رؤى .. المفاجئه اللي قالج عليها الزفت باسل ..
اندهشت اسيل من كلامها وقالت: باسل ..!! تقصدين باسل اللي بالشقه اللي ينب شقتي ..؟!!
رؤى: يب .. ذاك الشاب اللي يننج بتصرفاته العبيطه اللي ما يبطلها ..
مدت إيدها وقالت: امشي معي .. فيه اشياء كثيير ابغى اقولها لج ..
ترددت اسيل بعدها قالت: لا .. مابي ..
مسكتها رؤى من إيدها وقالت: يا بنت تعالي .. من زمان ادور عليج وعلى امج .. صدقيني من باجر راح ارجعج لخالج ..
لفت اسيل وطالعت في الجهه اللي راح منها بسام بعدها راحت مع رؤى ..
ركبوا السياره واتجه السايق ناحية قصر رؤى ..
طول الطريق واسيل وجهها ناحية الشباك وتفكر ..
حاسه نفسها ملخبطه ..
ما كانت تبغى تروح مع اي واحد فيهم بس ....
بس ودها تعرف حكاية جارها باسل ولييه ذي الرؤى جايه من طرفه ..
ودها تفهم سر تصرفاته المريبه والغريبه ..
اما بخصوص اهلها فهي ما تبغى تعرف عنهم اي شيء ..
كل اللي تبغى تعرفه هو إجابه لسؤال واحد ..
" لييه رموها ..؟! "
هذا السؤال اللي تبغى تعرف إجابته ..
تذكرت بسام اللي قال انه خالها ..
هو قال انه راح يشرح لها كل شيء ..
وقال انه راح يرجع لها كل اللي ناقصها ..
هويه واصل واسم وعائله ..
بس وش فايدة كل هذا ..؟!
وش الفايده منها دام ان الكل يعرفها بأسم اسيل اللقيطه ..؟!
مهما رجع لها كل شيء راح تظل في نظر الناس انها البنت اللي كانت بيوم من الايام لقيطه ..
البنت اللي عرفوها بأسم اللقيطه ..
البنت اللي مهما عملت ومهما صلحت راح تكون هي نفسها اللقيطه اللي كانت مشرده بالشوارع واللي قابلت كل اصناف البشر .. الصالح والطالح ..
راح تظل البنت اللي محد عارف وش كانت تاكل او مع مين تنام ومن فين تصرف على نفسها ..
راح تظل ذيك البنت المشكوك في اخلاقها ..
راح تظل هي نفسها اللقيطه ..
اذا وش الفايده ..؟!
ما تقدر تنكر ان ذاك اللي قال انه خالها انسان طيب ..
هي متأكده وعارفه انه محد مثله في طيبته ..
هو اول شخص اثر عليها من بعد ما عرفت حقيقتها ..
هو اول شخص يضرب احد اهانها واذاها بكلامه الجارح ..
هو اول شخص كان يساندها ويرسل لها الكلام اللي يهديها ويريحها ..
كلامه كان كله له تأثير ..
من اول لقاء بينهم ولحد اخر لقاء ..
بس مهما كان فما راح تروح معاه ..
ما تبغى تقابل لا ابوها.ولا احد من اهلها ..
تبغى تعيش حياتها الروتينيه الممله اريح لها ..
وقفت السياره وقالت رؤى: وصلنا ..
نزلت اسيل وظلت فتره واقفه تطالع في القصر مبهوره من فخامته ..
حست على نفسها ومشيت ورى رؤى ..
دخلت رؤى القصر وبعدها جلست على الكنب وقالت لأسيل تجلس ..
جلست اسيل عالكنبه اللي قدامها فنزلت رؤى طرحتها وعبايتها وحطتها جنبها ..
تنهدت وقالت: تبغين تشربين شيء ..؟!
اسيل: لا .. ابغى اعرف ايش سالفة باسل ..
ظهر الانزعاج على وجه رؤى وقالت: مجرد انه انسان مستفز ومتهور وطباعه ما تعجبني ..
طالعت اسيل فيها وقالت: ما فهمت ..
سكتت رؤى فتره طويله بعدها قالت: انا راح اشرح لج كل شيء من البدايه .. انا اسمي رؤى اخت سحر .. اذا ما تعرفين سحر فهي ام اخوج إياد .. زوجة ابوج الثانيه ..
هزت اسيل راسها بهدوء ..
طالعت رؤى في عيونها وكملت: هي السبب الاول والأساسي في اللي صار لج .. لو ما طلعت في حياتج كان انتي عايشه بشكل طبيعي مع ابوج وامج ومافي شيء يعكر عليكم ..
انصدمت اسيل منها ..
ما تدري تفرح ولا لا ..
كلامها يعني ان ابوها وامها مو هم اللي رموها ..
بس ... بس الكلام اللي سمعته ذاك اليوم من إياد ..
ذاك اليوم قال ان ابوه رمى بأخته في الشارع ..
اذا ليش رؤى تقول ان السبب الاساسي من امه ..؟!
طالعت في رؤى بعيون متسائله فقالت رؤى: راح تفهمي كل شيء اللحين .. راح تفهمي كل القصه اللحين ..
قامت ومشيت لجهة الدريشه وقالت: ابوج هو مالك المطعم اللي احترق قبل شوي واسمه سعد الراهي .. امج من عائلة العاصي واخت بسام اللي كنتي عنده قبل شوي واسمها سميه العاصي .. ابوج تزوج من امج زواج تقليدي بسبب الشراكه بين ابوها وابوه .. مع انه زواج تقليدي إلا ان امج كانت تحب ابوج بينون .. وانا متأكده انه لو قال لها سعد قطي روحج بالنار راح تقطه ..
سكتت رؤى فتره بعدها قالت: مر على زواجهم سنتين .. يابوج وكان عمرج وقتها سنه ونص .. في هذه الاوقات كانت اختي سحر تشتغل في شركة سعد .. كانت العلاقه بينهم علاقة زماله بس مع الوقت تطورت لحد ما ياء اليوم وطلب سعد يدها للزواج بس هي رفضت .. قالت مستحيل اتزوج واحد متزوج وعنده اولاد .. حاول معها اكثر من مره بس كانت رافضه وتقوله يا انا يا هي .. قالها مستحيل اطلق زوجتي عشان ابوه لا يزعل .. فقالت له طيب انساني .. بس ابوج كان واضح انه يحبها .. راح وقال لسميه بويه بارد انه يحب وحده وراح يتزوجها فأنين ينونها وحاولت معاه بكل الطرق انه يغير رايه بس ماكو فايده .. وكمان راحت لأختي البيت وهددتها بس اختي كان عنيده وانانيه فطردت سميه من البيت بطريجه جدا مهينه ..
تنهدت بعدها رجعت وجلست عالكنبه وقالت: للأمانه انا ما اعرف كل التفاصيل .. بس اللي اعرفه ان يدج مات وابوج ذاك الانسان البارد تخلص منج ومن امج بس عشان يتزوج اختي اللي كانت رافضه تتزوجه ما دامه عنده .. بعد ماتخلص منهم وافقت وتزوجوا وانجبوا إياد بعد جم شهر .. مرت الايام ورى بعض والسنوات وانا كنت عايشه في هالبيت مع اختي الكبيره ضُحى ام سيرين .. وقتها يت عندنا اختي سحر وكان وقتها اختي ضُحى مو موجوده .. كانت سحر حالتها جدا سيئه .. وقتها كنت انا بأول ثانوي .. سألتها شفيج فقالت لي انا ندمانه .. ما فهمت ايش تقصد فحكت لي كل شيء والدموع كانت انهار على خدها .. قالت لي انها اكثر من مره تحلمت بملك الموت يقبض روحها وتشوف طيف سميه وبنتها قدامها .. الضمير بدأ يأنبها والضيقه كل مالها تزيد في قلبها .. حكت لي كل حاجه وهي تتمنى انها تلقى سميه او بنتها عشان تعتذر لهم .. انا كنت مصدومه .. صحيح تصرفات اختي من زمان ما كانت تعجبني بس ما توقعت انها راح توصل بتصرفاتها لهذا الحد .. اليوم اللي بعده سحر وضحى ركبوا السياره وراحوا لبيت ام سميه عشان يعتذروا بس في الطريج صار لهم حادث وماتوا .. فعشان جذي كنت اتمنى القى سميه او القاج عشان اوصل لكم إعتذار اختي ..
رفعت عيونها تطالع في اسيل فانصدمت لما شافتها تطالع في الارض وجسمها يرتعش وواضح انها تبكي ..
قامت وجلست جنبها وهي تقول: اسيل حبيبتي اهدي ..
حضنتها وكملت: ليش البجي ..؟! اهدي لا تبجين ..
اسيل من بين شهقاتها: شلون اهدأ وانا اسمع هالسبب السخيف اللي عشانه ابوي رماني .. ما اقدر .. ما اقدر ..
شدت رؤى عليها وقالت: اهدأي لا تضايقي خلقج على ناس ما تستاهل ..
انفجرت اسيل بكي في حضن رؤى وهي مو مصدقه ..
ابدا ..

========================================

الظهر الساعه وحده ونص ..
كانت جالسه في الصاله وتهز رجلها بقهر ..
طالعت في ساعتها وقالت: وينه منصور ما ياء .. المفروض يكون ياء من زمان آفف ..
ظلت على حالها لفتره بعدها قامت وقالت: وليش انتظره ان شاء الله ..؟! انا عندي لسان وراح اتصرف بنفسي ..
مشيت متجهه ناحية الغرفه اللي فيها ريما ..
دخلت وشافت ريما واقفه وتعلم الشغالات شنو يصلحون ..
تكتفت نوف وقالت: انتي هيه .. هيه هيه انا احاجيج ..
لفت ريما عليها وقالت: نعم شنو تبين يا ديايه ..؟!
نوف بعصبيه: ديايه بعينج .. ممكن توقفي المهزله اللي انتي عاملتها بالبيت ..
تكتفت ريما وقالت بتحدي: لا .. اقرب رفيجاتي انخطبت وراح اعمل لها بارتي في بيتي ..
نوف: هيه يا ماما اصحي .. على اي اساس قلتي ان هذا بيتج ..
حركت ريما إيدها بلا مبالاه وهي تقول: اقول فارجي انا مب فاضيه لج ..
ولفت تكمل كلامها مع الخدم ..
تقدمت نوف ومسكت كتف ريما ولفتها عليها وقالت: انا إذا تحجيت لا تسافهيني يا السفيهه فاهمه .. واللحين ياللا لمي قشج اللي شريتيه من المول وروحي لغرفتج .. بسرعه ..
إبتسمت ريما وقالت: ما راح ألم شيء ورفيجاتي كلهم راح ييون العصر وبيسهروا لحد الساعه اثنين وغصب عنج وعن منصور واعلى مافي خليج اركبيه ..
تنرفزت نوف وقالت: انتي اصلا وحده وقحه وشايفه نفسج عالفاضي .. فأحسن لج تلمين كل شيء قبل لاندمج ..
ريما بإستهزاء: اوه ماي قاد .. الديايه تهددني .. يا قلبي انا قلت اعلى مافي خيلج اركبيه فاهمه ..
لفت نوف عالخدم وقالت: ياللا انتي وهيه كل وحده تروح على شغلها .. واللي تسمع كلام الرمه اللي ينبي راح افصلها فاهمين ..؟!
طالعوا الخدم في بعض بعدها تركوا اللي في إيدهم وطلعوا ..
حست ريما بالقهر جواتها .. الخدم دايم يسمعوا كلامها لأنها تقرب لمنصور ويعرفوها ..
ابتسمت وقالت: ها يا آنسه ديايه .. عسى قلبج برد اللحين ..؟!
نوف: إيه طبعا ..
طلعت ريما جوالها واتصلت وبعد فتره قالت: الو ...... اهلين شذو ...... اسمعي حبيبتي انا ابغى استلف منج شغالتكم خمس ساعات ممكن ...... يا فديت قلبج تسلمين ...... اوكي راح انتظرها ...... باي ..
قفلت بعدها اتصلت مره ثانيه وبعد فتره قالت: الو رنود ...... الحمد لله تمام اخبارج انتي ...... دوم ان شاء الله .. حبيبتي إذا ما عليج امر ممكن استلف شغالتكم خمس ساعات ...... ربي يسعدج يا احلى عسل ...... اوكي مع السلامه ..
قفلت وطالعت في نوف المقهوره بإبتسامه واتصلت على اخر صاحباتها ولما ردت قالت: يا هلا مرووم ...... الحمد لله تمام .. انا اتصلت لأني بغيت منج خدمه ...... تسلم عيونج حبيبتي .. بس بغيت استلف خدامتكم خمس ساعات إذا كانوا اهلج موافقين ...... تسلمين كلك ذوق ...... لا تنسي تيين العصر ترى انتظركم اوكي ...... ههههههه طيب باي ..
قفلت وقالت: ها يا ست ديايه .. جم مقدار القهر المتجمع في قلبج ههههههه ..
ومن بعد ضحكتها طلعت من المكان فضربت نوف الطاوله بقهر وهي تقول: هالرمه اكرهها .. وربي اكرهها ..
طلعت جوالها واتصلت على منصور وفي اخر رنه رد منصور وهو يقول: اذا اتصلتي عشان تشتكين فأنا مب فاضي ..
نوف بعصبيه: انت وينك .. تعال ووقف مهزلة الخبله ذي ترى قسم بالله لأثور فيها .. ترى نرفزتني بما فيه الكفايه ..
منصور: انا مو فاضي .. باجر علينا اختبار صعب ويالس اذاكر مع اصحابي .. ما راح ارجع إلا بعد العشاء .. ورجاءا يا نوف ما ابي مشاكل ..
نوف: يا سلام .. وليش ما تقول للرمه هذا الحجي ..؟! ترى واضح وبقوه انك مفضلها علي صح ولا انا غلطانه ..؟! ياللا ياوب ..
منصور: مع السلامه ..
وقفل في وجهها وبعدها تنهد وكمل دراسه مع اصحابه ..
عصبت نوف وبعدها طلعت من المكان وراحت لريما ..
وقفت قدامها وقالت: سمعيني عدل .. في هنا بالبيت حدود اتمنى انج ما تتعدينها .. الكلمه الاولى والاخيره في البيت هي كلمتي فإستأذني قبل لا تصلحي اي شيء .. وحفلة صاحبتج ذي صلحيها في اي مجان برى البيت فاهمه ..
طالعت ريما فيها فتره بعدها قالت: تصطفلي ..
ورجعت تقلب في المجله ببرود ..
عصبت نوف وقالت: اصلا انتي وقحه وشايفه نفسج انج فووق .. اللي يطالع فوق يتعب يا قلبي فأعرفي حدودج تراج حدج وحده قذره وسخه تخرج مع شباب لحد ما ضيعتي شرفج ببرود ..
انصدمت ريما ورفعت راسها تطالع في نوف وهي مو مصدقه ..
هذه شدراها ..؟! مو معقول يكون منصور علمها ..
لا مو معقول ..
قامت وقالت لنوف بحده: لسانج هذا إذا ما مسكتيه فراح يي يوم وينقطع وساعتها راح تتمني انج ابعدتي شرج عني .. اوكي ..
اخذت المجله وراحت وهي تقول: لو سمحتي لو يوا صاحباتي ما ابي اشوف رقعة ويهج ابدا .. فالافضل تروحي عند مامتج ..
طلعت الدرج وراحت لجهة غرفتها ..
ضربت نوف رجلها بالارض بقهر وهي تقول: تقهر تقهر تقهر وايد ..
شوي سكتت وعضت اضافرها وقالت: الله يستر .. اخاف ريما تعلم منصور عالكلام اللي قلته ووقتها إذا سألني منصور من فين عرفتي فشلون راح اجاوبه ..؟! لا لا ريما مستحيل تييها الجرأه انها تتكلم مع منصور عن سواد عمايلها .. ايه مستحيل فعشان جذي لازم ما اقلق نفسي عالفاضي ..
تنهدت وطلعت الدرج وراحت لغرفتها ..

========================================