شبكة همس الشوق - عرض مشاركة واحدة

20 - 3 - 2014, 01:40 AM

كان منسدح على كنبة الصاله ومغطي عيونه بإيده ..
كان يردد في داخله كلمة *غبي* اكثر من مره ..
بعد إيده عن عينه وقال بقهر: وربي انه اغبى واحد شفته .. ليش انكر .. ليش ..؟!
دق جواله فاخذه ولما شاف اسم المتصل رد وهو يقول: نعم .. خير ..!!
ضحك اللي بالطرف الثاني وقال: انس لحد الان معصب ..؟!
انس: وبقوه .. ابي افهم ليش انكرت اللي صلحه مهند ها ..؟! مو انت وعدتني انك هالمره راح تقول كل شيء وتفتك من شره ..
تنهد طارق وقال: انا راح اصلح اللي اشوفه صح ..
انس: واللي صلحه لك هو الصح برايك ..؟؟!!
طارق: خلاص يا انس .. انا دايم اصلح اللي يرضيني .. اهم شيء اني اكون مرتاح .. وكمان خلاص الموضوع انتهى فلا تشيل هم ..
انس: شلون ما اشيل هم ووراك واحد مستحيل يترك حتى يخلص عليك ..
طارق: انس انا قلت كل شيء انتهى صدقني انه كل شيء انتهى ..
انس: وشلون انتهى ها ..؟! ياللا ياوب ..
طارق: مو لازم اشرح وخلاص قفل عالموضوع .. انا اتصلت لأني بغيتك في شغله ..
تنهد انس وقال: لما تطلع بالسلامه لي حجي وياك .. ها وش بغيت مني ..؟!
طارق: شادن بنت عمي .. إذا ما عليك امر تقدر تروح المستشفى وتاخذها لأن موعد طلوعها اليوم وانا ما اقدر آخذها ..
انس: اوكي .. ما طلبت شيء .. انت متى بتطلع ..؟!
طارق: مدري بس شكلي مطول .. الله يعين ..
انس: فعلا الله يكون في عونك .. ياللا مع السلامه لأني رايح عالمستشفى .. ما وراي شغله .. جد طفش ..
طارق: ههههه مع السلامه ..
قفل انس الجوال بعدها قام وخرج من شقتهم الجديده وركب سيارته واتجهه للمستشفى اللي فيه شادن ..
بعد ما وصل نزل ودخل المستشفى وتفكيره كله في طارق ومهند ..
تنهد وقال: ان شاء الله يكون كلامه صح وان كل شيء انتهى ..
تقدم لعند الاستعلامات وسأل عن غرفة شادن ..
كلها نص ساعه لحد ما وقع الاوراق واخذ شادن معاه للبيت ..
دخل للشقه وحط شادن عالكنبه ..
اول ما فكها قامت هالطفله وبدأت تمشي بهدوء وهي تطالع في غرف البيت وكأنها تدور عن اخوانها ..
بعد ما خلصت لفت وطالعت في انس بنظرات تساؤل فقال انس: ما ادري عن ايش تدورين بس إذا كنتي تدورين عن اخوانج فهم مو مويودين ..
ظلت فتره تطالع فيه وهي طبعا ما فهمت كلامه بعدها اتجهت للكنبه مره ثانيه ولما وصلتها لقت صعوبه في تسلقها فشالها انس وجلسها عالكنبه وجلس جنبها ..
اخذ نفس عميق وشغل التلفزيون ..
لف عليها فشافها تطالع فيه فإبتسم وقال: امنيتي اعرف بشنو تفكر ..
ضغط ازرار الريموت وقلب لحد ما وصل لقناه كانت تعرض كرتون السنافر ..
انس: ياللا طالعي في هذا .. اكيد بيعجبج ..
طالعت شادن فيه بعدها طالعت في التلفزيون ..
تنهد وراح لغرفته واخذ مخده وانسدح بالصاله وقال: إذا بغيتي شيء صحيني ..
وبعدها حط إيده على عيونه وغمضها ..
طالعت شادن فيه فتره بعدها كملت تطالع في التلفزيون ..

========================================

الساعه 2:30وفي بيت راشد ..
كانت شهد ماسكه صينيه وفيها الغداء اللي صلحته لراشد ومتجهه لغرفته ..
كل يوم وعلى كل وجبه كانت تصلح له اكله من نوع اخر ..
كل شوي تنوع في الاكل على امل انه ياكل بس للاسف مافي فايده ..
بس اللي مريحها انه صار ياخذ له لقمه وحده تكفي بس للعيش ..
تنهدت ودقت الباب وهي تقول: زهبت الغداء ..
وبعد شوي فتحت الباب ودخلت عنده ..
كان وقتها جالس عالسرير وماسك جواله يقلب فيه ..
صوره ورى صوره ومقطع ورى مقطع ..
وكلها لروان ..
مره صورتها وهي مبوزه وزعلانه ..
ومره صورتها وهي عند الشاطئ بفستانها الازرق الرايق ..
ومره وهي عامله بيس بإيدها والابتسامه مو مفارقتها ..
حطت طاوله قدامه وحطت الصينيه فوقها ..
طالعت فيه شوي بعدها قالت: الغداء ..
رفع نظره عن الجوال وطالع في الاكل اللي كان هالمره طبق بحري ..
رفع نظره لشهد شوي بعدها رجع يطالع في الجوال ..
شغل له احد المقاطع ..
ابتسم وهو يسمع صوتها تقول "انت وايد سخيف" ..
بعدها سمع صوته يقول "ههههه لا لا مو ذي .. قولي اللي قلتيه اول" ..
فرجع له صوتها مره ثانيه تقول وهي تمد لسانها "مابي" ..
وينها ..
حس بحشرجة البكاء في حلقه ..
وينها .. وينها ..؟!
محتاج لها ..
يبغاها ..
يبغاها بقووه ..
فتحت شهد فمها وهي تقول: راشد الاكل راح يبرد .. بيصير ماله طعم ..
طالع راشد فيها ..
ماله طعم ..!!
اصلا وحتى وهو حار ماله طعم ..
قفل الجوال وقال بهدوء: مابي ..
شهد: لا لازم تاكل .. مهما عملت في نفسك ما راح ترجع روان ..
بدل ما انت حابس نفسك جذي قوم وصل ركعتين وادع لها .. روح وتصدق عنها .. جلوسك هذا ما راح يفيدك ولا يفيدها .. إذا تحبها صج فصلح اللي يريحها ويسعدها .. ما راح يسعدها ابدا انها تشوفك بهالحاله .. ما راح يريحها شكلك وانت تموت بشكل بطيء .. اللي تصلحه بروحك حرام .. ما يرضيني ولا يرضيها ولا يرضي رب العالمين .. قوم واصحى على نفسك .. كل بنموت .. وروان انت بنفسك تقدر تشوفها .. كل اللي عليك هو طاعة ربك عشان تشوفها بالينه ان شاء الله .. روان ما راحت للأبد .. انت تقدر تشوفها ومن بعدها بتكون معاها إلى مالا نهايه ..
رفع راشد راسه عن الجوال وطالع في شهد فتره طويله ..
ارتبكت شهد وحست انها اخذت راحتها وتجاوزت حدودها .. تخاف انه اللحين يخاصمها كالعاده اذا تدخلت في اموره ..
بس انصدمت لما سمعته يقول: ليش يا شهد ..؟! انا تشمت فيج لما امج ماتت فليش ما تستردي حقج وتتشمتي فيني ..؟!
سكتت شهد فتره وقالت: ايش بأستفيد ..؟! يمكن تنقلب علي ويموت احد من اهلي .. انا مو من عادتي اتشمت في مصايب الناس .. الله فوق ومثل ما نزل المصيبه على هالانسان بإمكانه انه ينزل علي مصيبه اكبر منها ..
ظل فتره يطالع فيها بعدها قال: انتي انسانه غريبه .. وايد .. اكثر وحده اذيتج واللحين انتي اكثر وحده واقفه بينبي ..
ابتسم بإستهزاء وقال: قالتها روان .. قالتها بيوم من الايام .. راشد توب قبل لا تنقلب فعايلك عليك .. بس تغطرست وما سمعت لحجيها .. معهم حق اخوانج يوم سموني الدب المتغطرس ..
لف وجهه وقال: اطلعي برى ..
هزت راسها بإيه وطلعت ..
طالع راشد في الصينيه لفتره بعدها مد إيده وحاول يجبر نفسه عالاكل ..

اما عن شهد فنزلت من الدرج وهي تقول لنفسها: ان شاء الله ياكل هالمره ..
اتجهت للصاله وطلعت من المكتبه دفتر لقيته وهي تنظف ..
كان دفتر ارقام هواتف اهم الاماكن الموجوده في الدوحه ومن بينها رقم المستشفى اللي دخلت فيه اختها شادن ..
قلقانه عليها وتبغى تعرف شصار لها ..
دقت عالمستشفى وبعد فتره ضغط رقم الاستفسار ولما رد عليها واحد سألته عن اختها شادن عمر العالي ..
ظلت فتره تنتظره يرد وهي على اعصابها ..
شوي رد يقول: معليش اختي عالتأخير .. المريضه شادن عمر العالي مو موجوده بالمستشفى حاليا ..
انصدمت شهد وآلاف الافكار السوداء تمشي براسها فقالت بخوف: ليه ..؟! وينها ..؟! ماتت ولا شنو ..؟!
الموضف: لا لا اهدي اختي مافيها إلا العافيه .. هي طلعت والحمد لله بعد ما صارت بخييير ..
اندهشت شهد من كلامه بعدها قالت: شلون ..؟! مين طلعها ..؟!
الموضف: دقيقه .... امممم طلعت تحت كفالة واحد اسمه طارق علي العالي .. يعني ولد عمها .. من فتره ياء وهو اللي وقع عالعمليه وزارها بعدين وطلب انها تطلع إذا كانت بخيير فعشان جذي طلعت .. ما ادري منو ياء واخذها بس اكيد هو ..
انصدمت شهد من كلامه ..
طارق ..؟!!
مين ذا ومن يكون ..؟!
صح اسمه قريب من اسمها بس هي مالها اقارب .. ابدا ..
بدأ الخوف يتسلل لقلبها ومو عارفه وش تسوي ..
الموضف: فيه اي خدمه ثانيه اختي ..؟!
شهد: ها .. لا لا مشكور ما قصرت ..
الموضف: العفو واتمنى ان خدمتنا اسعدتكم ..
وبعدها قفلت التلفون وهي تفكر ..
ما تدري هل تفرح لأن اختها صارت بخير ..
ولا تقلق بخصوص هالشخص اللي طلع فجأه واهتم بأختها ..
اللي محيرها ليه الاسماء متشابهه ..
ابوها عمره بحياته ما جاب سيرة انه لهم اقارب ..
حتى امها ما قد قالت هالشيء ابدا ..
اذا كيف ..؟!

========================================

برلين ~ ألمانيا
وفي احد الفنادق الفاخره فيه ..
كان سامي توه طالع من الحمام بعد ما اخذ له دش وبعدها راح للباب لأنه من زمان يسمع احد يدق ..
فتحه فكانت ام دانا اللي قالت: معليش تعبتك وياي بس تقدر تقول لسواقكم يوديني عند بنتي ..؟!
سامي: ههههههههه قصدج مراد .. بس يا خاله تونا يايين من عندها .. مالنا إلا اربع ساعات تقريبا ..
ام دانا: ما اقدر اصبر .. ابي اشوفها ..
سامي: اوكي من عيوني يا خاله .. سواقنا اللحين راح لشغله وبيرجع بعد جم دقيقه .. ارتاحي انتي بجناحج واذا ياء راح نروح كلنا سوى ..
ام دانا: مشكور الله يعطيك العافيه ما تقصر والله ..
سامي: لا عادي ولو ..
لفت ام دانا وراحت لجناحها ..
قفل سامي الباب وراح لغرفته .. بدل ملابسه وبعدها اخذ جواله ورد على المكالمه اللي جته قبل شوي ..
سامي: ألو .. اهليييييين ريووون .. واحشني يا زلمه ..
ريان: اسمي ريان .. وكمان وشو زلمه هذا .. حسستني انك مسافر للبنان مو ألمانيا ..
سامي: ههههههههههه اقولك توني طايح على مسلسل مدري شسمه بس كان فيه واحد كان زمان يحب وحده .. الزبده قابلها اليوم في محل الملابس اللي تشتغل فيه وقال انتي عم تخونيني ومنشان هيك انسيني لاني ما راح ارتبط فيكي .. ههههههههههههه البنت ضحكت وقالت كويس انو جات منك مو مني .. وجه الرجال طلع مضحك .. انجلط المسجين هههههههههه ..
ريان: ههههههههه ياخي مو وقتك ابد .. ها بغيت اسألك .. دانا عملت العمليه ..؟!
سامي: اووووه من زمان .. امس الفجر عملتها والحمد لله نجحت بس بتظل عندهم فتره حتى يشوفوا ان كان الجسم راح يتقبل الكبد ولا لا ..
ريان: الحمد لله على سلامتها .. وصل لها سلام الشله .. ههههه وحتى لينا حبيبة عدنان تسلم عليها ..
سامي: هههههههه لا مش ممكن يا راجل ..
ريان: انت لغتك مدري شلون صايره .. المهم مع السلامه ما ابي اطول عليك ..
سامي بسرعه: ريان لحضه لحضه استنى ..
ريان: ها .. شبغيت ..؟!
سامي: اممم بغيت اسألك سؤال بس ابيك تياوب بصج ..
ريان: إسأل .. متى انا قد جذبت ..
ظل سامي فتره ساكت بعدها قال: تتذكر ذاك اليوم بالجامعه .. كنا انا وياك مع بعض وانت فاتحتني بموضوع .. تتذكره ..؟!
ريان: اي موضوع تقصد ..؟!
سامي: دانا ..
تنهد وكمل: انت قلت وقتها انك حاسس انها تحبني ..
ريان: اها .. إيه تذكرت .. انزعجت وتهورت ورحت لعندها .. كنت ابغى أسألك شصار بس بطلت لما شفتك ما فتحت الموضوع ..
سامي: انكرت ..
ريان: جد ..؟!!
سامي: بغيت اسألك .. انت كنت وقتها متأكد من حجيك ..؟!
سكت ريان فتره بعدها قال: وبقوه بس استغربت لما قلت انها انكرت .. بس ما ألومها .. اكيد شافت ويهك المعصب وارتبكت .. بس صدقني انا متأكد .. صار لي فتره الاحظ تصرفاتها ..
سامي: اها .. باي ..
بعدها قفل الجوال ..
سند دقنه على ايده وهو يتذكر كلام دانا ..
يتذكر صراخها لما قالت *ما احبك* ..
انسدح عالسرير بالعرض وغمض عينه ..
من يوم ما اكتشف انها بنت وهو مو قادر يتحمل يمر يوم من دون لا تجي للجامعه ..
اصلا من وقت ما كانت ولد وهو يحس نفسه متعلق فيه ..
فيها صفات ماهي موجوده في اي بنت قابلها من قبل ..
صار يعتبرها جزء مهم من حياته ..
بس لا ..
لازم يبعدها عنه بأي طريقه ..
ما يبغى يتعلق فيها اكثر ..
ما يبغى يتعلق بشيء مستحيل يكون له ..
حتى الحب ..
حتى الحب محروم منه ..
ما يقدر يحب او يرتبط بأي احد والفضل يرجع لابوه وامه ..
حرموه من اشياء كثييره بسبب طيشهم ..
بسبب تفكيرهم الاناني ..
تربى اسوأ تربيه وعاش طفولته في اقذر مكان ..
اسمه صار ملوث واصله عباره عن قذاره ..
اخذ نفس عميق وهو يحاول ينسى ..
يحاول يشغل تفكيره بشيء ثاني غير عن ماضيه ..
صوت غلق الباب قطع تفكيره فقام وطلع من الغرفه فشاف مراد يجلس عالكنبه ..
ميل فمه بقرف .. هو وياه في نفس الجناح ..
سامي: اسمع .. راح نروح نزور دانا .. جهز نفسك ..
تأفف مراد في نفسه .. زياراتهم اكثر من المعتاد ..
اخذ سامي المفتاح من جنب مراد وقال: راح ننتظرك انا وامها بالسياره ..
خرج من الباب وقفله وراه ..
مراد بإنزعاج: صرت سواق عندهم ..
قام ودخل الشنطه اللي كانت معاه للغرفه وبعدها خرج ونزل لعند السياره ..
كانت ام دانا وسامي في السياره ناطرينه ..
ركبها واتجه للمستشفى ..
بعد دقايق وصل ووقف السياره فقال سامي: انتظرنا هنا ولا تتحرك ..
ام دانا: لا يا ولدي خل سواقكم يروح لأننا بنطول عندها ..
سامي: ههههههههههههههههه سمعت يا سواق .. خلاص روح وتعال لنا بعد ساعتين ..
نزل هو وام دانا ففحط مراد وراح ..
سامي: هههههههه ياه من زمان كان ودي انرفزه .. هالرحله ذي خلتني انرفزه اكثر من مره .. وانا اقوول ليش إياد دووم مبسوط .. عشان النرفزه تونس هههه ..
لف على ام دانا وقال: هيا يا خاله ..
دخل هو وامها لداخل واتجهوا للغرفه اللي هي فيه ..
في الطريق قالت ام دانا: هنا ما عندهم شيء اسمه مرافق ..؟!
سامي: والله مدري .. ما سألت ..
ام دانا: إسأل يا ولدي عشان ابي اكون مرافقه لبنتي ..
سامي: حاضر يا خاله .. ما طلبتي شيء ..
وصلوا للغرفه ودخلوا عند دانا ..
سامي بمرح: هاااي دنوووش ..
فتحت دانا عيونها ولفت عليهم ..
ابتسمت وقالت: اهليييين ..
جت امها عندها وقالت: ها حبيبتي كيفج اللحين ..؟! حاسه بتعب ولا شيء ..؟!
دانا: الحمد لله تمام بس مكان الخياطه والعمليه مرره يوجعني ..
الام: عساه فيني يا بنتي ..
دانا: بعيد الشر عنج ..
سامي: دنو ما قالولج متى بتطلعين ..؟!
هزت دانا راسها بلا وهي تقول: كل شوي لهم كلام .. مره بعد شهر ومره بعد اسبوعين ومره يقولوا ما ندري .. بس ودي اطلع في اقرب فرصه .. ملييييت ..
سامي: هههههه إيه والله .. يلست المستشفى تييب الملل .. اسمعي ترى الشله كلها تسلم عليج ..
ابتسمت وقالت: الله يسلمهم ..
سامي: هههههه حتى لينا زوجة عدنان المستقبليه تسلم عليج .. ومره متحمسه تشوفج ..
عقدت دانا حواجبها فتره بعدها قالت: لا يكون تقصد قريبة عماد حقت الطراطيع ..؟!
سامي: هههههههه إيه هيه .. عماد علمها انج بنت فتحمست تشوفج ..
دانا بإبتسامه: اشتقت للجامعه ..
سامي: اوووه وانا اكثر .. وخصوصا لبنات الجامعه ..
إختفت إبتسامة دانا وقالت: اها ..
لفت على امها وبدأت تسألها عن اخوها عادل .. وسامي كان حاط إيده بجيبه ويطالع فيها ..
ردت فعلها هذه تؤكد كلام ريان ..
بس إذا كان هالكلام صدق وانها تحبه فلازم انه يتصرف بسرعه ويبعدها عنه ..
اصلا لييييه ..؟!
ليييه تحبه مع انها عارفه انه ما يبي يتزوج ..؟!
ابتسم بإستهزاء .. المفروض هذا السؤال يسأله لنفسه ..
ليش تعلق فيها مع انه مانع نفسه من الحب والزواج ..؟!
طالع في دانا فتره ..
حتى بعد ما عرفت حقيقته ما تغيرت ..
ويمكن يكون هذا اللي خلاه يتعلق فيها اكثر واكثر ..
اتجه للباب وهو يقول: بروح للدكتور ..
خرج وقفل الباب وراه فظهر الألم في وجه دانا وقالت في نفسها: "ما اقدر .. ما اقدر اكرهه .. ما اقدر انساه" ..
الام: دانا شفيج ..؟!
دانا بهدوء: ولا شيء ..