شبكة همس الشوق - عرض مشاركة واحدة

20 - 3 - 2014, 01:42 AM

الساعه عشر الليل ..
كانوا توهم اصحاب فارس طلعوا من البيت لأنهم كانوا متجمعين يذاكرون ..
واللحين فارس موجود باحد المطاعم عشان يشتري له ولأمه عشاء لأنها كانت شوي دايخه وما قدرت تصلح عشاء ..
كان واقف بالطابور ينتظر دوره وهو يفكر ..
بكره لازم يودي امه للمستشفى .. دوخاتها هالايام كل مالها تكثر ..
هو متأكد ان عندها فقر دم وبكذا لازم يوديها عشان يعطوها فيتامينات وحديد ..
تنهد وقال: يا رب اشفها .. هي الوحيده اللي بقيت لي ..
وصل دوره فأخذ له عشاء بسيط له ولأمه وبعدها طلع ..
ركب السياره واتجه للبيت اللي كان قصير ..
إبتسم لما تذكر شيء ..
في مثل هذا الوقت قبل كم شهر كان رايح يجيب عشاء له ولريما واسيل ..
وقتها وقفته وصايف وتكلمت معاه ..
اخخ اشتاق لأسيل كثير ..
يا ترى هي وينهي اللحين ..
وده يشوفها مره ثانيه .. ولو لدقيقه وحده ..
هي الوحيده من اخوانه طلعت محترمه مع انها مو منهم ..
وقف سيارته قدام البيت ونزل ..
دخل واتجه للمطبخ وحط الاكياس فوق الدولاب ..
راح للصاله ودور على امه بس مالقاها ..
استغرب وطلع لفوق ودخل غرفتها ..
انصدم لما شافها طايحه عالارض جنب سريرها ..
راح لها بسرعه وهزها وهو يقول بخوف: يمه .. يمـــــــه .. يمـــــــآآه ..
هزها اكثر من مره وهو حاس بخوف مو طبيعي ..
لا .. ما يبغى يفقد احد ثاني كمان ..
ما يبغى ..
اخذ جواله واتصل على الاسعاف ..
بعد ما قفل حاول يقوم امه .. يصحيها .. يحاول انها تجاوبه ..
اللي مريحه انها ما زالت تنبض وما زالت تتنفس ..
بس خايف انها تموت .. صار طاري الموت يخوفه كثييير ..
بعد دقايق وصلوا الاسعاف وودوها المستشفى ..
دخلوها للغرفه وهو ظل واقف والقلق واضح على وجهه ..
دق جواله فطلعه من جيبه وشاف ان محسن هو المتصل ..
رد وقال: الو هلا ..
جاه صوت امه ام غيدا تقول: ألو كيفك فارس .. عسى ماشر شفنا قبل شوي سيارة إسعاف طالعه من عندكم .. شصار ..؟! امك فيها شيء ..؟! انت فيك شيء ..؟!
فارس: لا ما حصل إلا كل خير يا خاله .. بس امي طاحت علي فناديت الإسعاف واللحين احنا بالمستشفى ..
ام غيدا: لا لا ما تشوف شر إن شاء الله .. في اي مستشفى ..؟!
فارس: لا مو لازم تتعبي حالج يا خاله لأ...
قاطعته تقول: يا ولد لا تضيع الوقت وقول في اي مستشفى ..؟!
تنهد فارس وقال لها عن اسم المستشفى وبعدها قفل الجوال ..
طلع الدكتور من الغرفه فسأله فارس: ها يا دكتور .. شفيها امي ..؟!
الدكتور: الحمد لله وضعها اللحين مستقر وتمام بس لازم نعمل لها فحوصات عشان نعرف سبب الإغماء ..
فارس: ومتى بتخلصون من الفحوصات ..؟!
الدكتور: الليله وإن شاء الله يكون ميرد فقر دم .. ادع لها ..
وراح عن انظار فارس اللي جلس عالكرسي وهو يدعي بقلبه لأمه ..
يدعي وهو يتمنى ان اللي فيها ما يكون خطير ..
ابدا ..

========================================

في مثل هذا الوقت ..
وعند ريما .. كانت عامله بارتي بمناسبة خطبة صاحبتها شذى ..
من العصر لحد اللحين كانوا يسولفون ويستهبلون ويستانسون واللحين رجعت كل وحده لبيتها ما عدا شذى ..
كانت جالسه هي وريما في المجلس ويسولفون ..
كانت ريما تحكي لها كل شيء ..
تشكي لها وتفضفضلها ..
كانت تحكي لها عن الوضع ..
طفشت .. تعبت .. ملت ..
إبتسمت شذى وهي تقول: ياه يا ريما .. من النادر اشوفج تتشكين ل من حالج ..
ريما: اووه يا شذى مو وقتج .. بس ترى صج انا حاسه بضيقه مو طبيعيه وابي افتك من هالزواج بس مو قادره ..
شذى: يا بنت هذا إبتلاء .. إصبري .. صدقيني لو صبرتي وأقلمتي نفسج عالوضع راح تتعودي واكيد راح تييج الراحه .. انا جم مره اقولج منصور شخص ما يتعوض .. لو انه ما يحبج جان ما خلاج لهاللحضه على ذمته ..
ريما: وانتي وش اللي مخليج واثقه انه يحبني .. يمكن متزوجني عشان يستفزني ويبهذلني ..
ريما: هههههه يا بنت لا تخلين الروايات والقصص تأثر عليج .. منو هالفاضي اللي راح يتعب نفسه في هالامور ..
ريما: شذى ترى المسأله واضحه .. والدليل انه متزوج علي وحده بثره ومليقه ..
شذى: الزواج مو حرام .. مثلا عندج الرسول صلى الله عليه وسلم .. تزوج اكثر من وحده ومع هذا فهو يحب كل زوجاته .. إذا تزوج عليج فهذا ما يدل إنه يكرهج .. فكري عدل يا بنت ..
تنهدت ريما وظلت ساكته فتره ..
شذى: احس انه فيه شيء ودج تقولينه ..
هزت ريما راسها بإيه وبعد فتره قالت: منصور ..
شذى: شفيه ..؟!
سكت ريما لوقت بعدين قالت: مدري بس .. بس ..
ترددت شوي وقالت: مو عارفه بالضبط شنو اللي قاعد يصير لي بس .. بس صرت اكره اشوفه مع نوف .. احس بشيء بداخلي يحرقني إذا شفتهم مع بعض .. مدري ليه ..
إبتسمت شذى وقالت: برافو هذا تقدم ممتاز .. صدقيني يا بنت انج بديتي تحبيه ..
هزت ريما راسها وهي تقول: لا مستحيل .. لا اقصد ان هذا مو معقول لأنه ... مو ممكن ..
تنهدت وهي تقول: ما ادري ما ادري ..
حط شذى إيدها على كتف ريما وقالت: استمري .. حبيه ومع الوقت راح تكتشفي انه هو كمان يحبج وبتعيشي حياة سعيده ..
هزت ريما راسها وهي تقول: هذا مو ممكن .. لا تنسين الشيء الكبير اللي انا ساويته .. إذا منصور سامحني فالله راح يعاقبني و....
قاطعتها شذى وهي تقول: لا لا لا لا تكملي يا ريما .. الله غفور رحيم .. دامج تبتي فالله اكيد قبل توبتج .. الكلام اللي قلتيه قبل شوي مو صحيح واصحج انج تكررينه ..
ريما: بس اللي ساويته مب بسيط ..
شذى: وربنا قلبه كبير ويقبل توبة العبد مهما كان عظم هالذنب .. استغفري ربج ..
ريما: استغفر الله .. بس .... بس منصور .. ما ادري بس ..
شذى: إذا كنتي متردده فليش ما ...
قاطعتها ريما تقول: لا .. مستحيل ..
شذى: انتي حره ..
طالعت في ساعتها وقالت: ياللا انا تأخرت وايد .. باجر ورانا دوام ..
ريما: ما تقدري تقعدي اكثر ..؟!
شذى: ودي بس ما اقدر .. اهلي راح يقلقوا ..
قامت ريما وقالت: اوكي مع السلامه ..
شذى: مع السلامه وانتبهي لنفسج ..
ودعوا بعض وبعدها خرجت شذى وراحت لبيتها ..
قفلت ريما الباب واتجهت لداخل فشافت نوف بوجهها ..
ريما بتأفف: يا لييييل ..
نوف: ها واخيرا راحوا اللي ما يتسمون .. جان عزمتيهم عالفطور بعد ..
ريما: اقول جب جب .. انا ما اتكلم مع بزران ..
وطلعت الدرج فقالت نوف: هيه انتي وقفي ..
وقفت ريما فكملت نوف: انتي يالبنت المنحطه .. انصحج انج ما تعلمي منصور اني قلت لج انج وحده قذره ضيعت شرفها بسذاجه ..
سكتت ريما لفتره بعدها لفت على نوف وقالت والابتسامه على وجهها: وليش ..؟! خايفه انه يعرف انج كنتي وياي في نفس ذيج الاستراحه ..
انصدمت نوف من كلامها وردت بسرعه: لا غلط غلط .. انا ما كنت هناك ابدا .. اصلا ما اعرف مجانها .. و .....
دخل منصور البيت في هالوقت ومعاه شنطته الجامعيه ولما شافهم قال: السلام عليكم ..
طالعت نوف في ريما فتره بعد لفت على منصور ورسمت على شفتها إبتسامه وجت عنده وهي تقول: اهلييين حبيبي .. وين كنت كل هذه المده .. وحشتني ..
منصور: كنت اذاكر مع اصحابي ..
مسكت إيده وحضنتها بدلع وهي تقول: ها تعشيت ولا اقولهم يجهزون لك عشى ..؟!
إبتسم وقال: لا تعشيت لا تشغلي بالج ..
تكتفت ريما وقالت بإستهزاء: سبحان الله لايقين على بعض يا سيد ديج وست ديايه .. ما اقول إلا الله يخلف على ام يابتك انت وياها ..
وبعدها طلعت لغرفتها وصفقت الباب وراها ..
نوف: ويع .. ما تعرف تقفل الباب بهدوء ..
طالع منصور فيها وقال: احسج تكرهيها ..
نوف: اكيييد اكرهها .. انت مو شايف كيف تتصرف ..؟! بيي يوم وتجلطني بحركاتها ..
سحبته للكنبه وهي تقول: تعال تعال احكيلك شصار اليوم ..
سحب إيده منها وهو يقول: لا لا انا مو ناقص لمشاكلكم .. تصافوا مع نفسكم .. تصبحين على خير ..
وطلع على فوق ونوف واقفه في مكانها والقهر واضح في ملامحها ..
جلست عالكنبه وهي تقول: بيت مو طبيعي .. ابدا مو طبيعي ..

========================================

في منتصف الليل ..
كانت جالسه بهدوء عالكنبه وتطالع في الارض ..
جت عندها رؤى وقالت: شفيج ..؟!
سكتت اسيل لفتره بعدها قالت: ما لقيت يواب لسؤالي ..
رؤى: اعرف شتقصدين ..؟! بس انا قلت لج ليش ابوج رماج و....
قاطعتها اسيل: لا .. مو هذا هو اليواب اللي ابيه .. مستحيل يكون هذا هو السبب ..
ارتجف صوتها وهي تقول: مستحيل يكون سبب رميي تافه مثل جذي .. مستحيل ..
رؤى: اوكي باجر إسألي خالج .. اكيد هو عارف كل شيء .. يمكن يكون فيه سبب انا ما ادري عنه ..
هزت راسها ووقفت وهي تقول: مابي اشوف احد .. شكرا على ضيافتج بس انا افضل اني ارجع لبيتي واعيش لحالي لأنه اريح لي .. وكل اللي اتمناه انكم تتركوني إذا تبون راحتي ..
قامت رؤى ةقالت: انا مالي سلطه عليج فما اقدر امنعج بس اللي تصلحيه غلط .. من امتى الراحه تكون بعيده عن الاهل .. إذا كان ابوج قاسي فلا تطالعي لبقية العيله بنفس النظره .. لا تصلحي مثل خالج .. على قد ماهو طيب إلا انه عنده غلط واحد وهو انه يحمل العائله كلها ذنب الشخص المخطئ .. من وقتها وهو محملني ذنب اللي صلحته اختي .. عائلة الراهي كلهم محملهم ذنب اللي صلحه ابوج فيج .. بس اكيد بيي يوم ويعرف انه كان على خطأ ..
جلستها عالكنبه وقالت: فخليج هني وباجر اوديج عند خالج .. اذا ابوج غلط .. وامج غلطت فإيش هو ذنب خالج بسام .. باجر بوديج له عشان يرد لج إعتبارج .. يعطيج هويتج اللي تستحقيها .. يرد كرامتج اللي اهانوها لج اهلج .. لازم تكوني مثل كل البنات وكل البشر .. اللي مريتي فيه اسمه إبتلاء من رب العالمين ..
سكتت اسيل ولا ردت عليها .. مهما تكلمت فمحد راح يحس فيها لأنهم ما مروا بنفس الكوابيس اللي مرت فيها ..
نزلت سيرين من الدرج بهدوء وبعدها تقدمت من عندهم وقالت بصوت منخفض: هاي ..
رفعت اسيل راسها وطالعت فيها ..
اما رؤى فقالت بعتاب: انا شنو قلت ..؟!
سيرين بتأفف: طيب انا شدخلني ..؟! باسل السبب مب انا .. وكمان ابغى اتعرف على اخت إياد .. يعني ما يصير اتعرف ..؟!
رؤى: شغلج معاي بعدين ..
طالعت في اسيل وقالت: هذي سيرين بنت اختي الكبيره ضحى ..
سيرين بإبتسامه: كيفج سجى ..؟!
اسيل بإبتسامه: تمام ..
لفت على رؤى وقالت: ما قلتي لي شسالفة باسل ..؟!
رؤى بإنزعاج: هذا اخو خطيبي جاسر ..
اسيل: الشرطي ..؟!
رؤى: ايه شرطي .. بس شدراج ..؟!
اسيل: بس قد قابلته من قبل .. طيب إيش كان يبي باسل مني ..؟!
رؤى: انسان سخيف .. هو من زمان عارف اني ادور عليج وقبل فتره طويله اتصل علي وقال اني لقيت بنت زوج اختج سجى .. فرحت وقتها بس انصدمت لما قال ما راح اقولج وينها إلا لما تنفذين الكلام اللي اقوله .. قسم يقهر ..
اسيل: وإيش اللي كان يبغاه ..؟!
لفت رؤى وطالعت في سيرين اللي قالت بحماس: هو يبيني بس رؤى رافضه ..
رؤى: جب ..
سيرين: اسفه ..
طالعت اسيل فيهم فقالت: شيعني ..؟!
رؤى: هو من قبل سنه تقريبا ياء مع اخوه لعندنا ووقتها شاف سيرين .. اعجب فيها وقال انه إذا كبر راح يتزوجها بس قلت له لا .. والخبله اللي ينبج ما عندها مانع تتزوج واحد مثله ..
اسيل: طيب ليش انتي رافضه ..؟!
رؤى بعصبيه: انتي بالله عليج ما شفتي كيف تصرفاته معاج ..؟! هو امس حكاني عن كل شيء وعرفت اللي كان يسويه وياج .. دخلج في رعب بدل ما يقولج الصج ابرك .. انسان متهور وتصرفاته ينخاف منها .. شلون أأمن بنت اختي عند واحد مثله ..؟!
سيرين: لا حرام عليج .. وربي انه سو كيووت ..
رؤى: انتي جب ولا كلمه ..
طالعت اسيل فيها فتره ..
فعلا كلامها صح ..
هالباسل جننها كثيير بتصرفاته وكلامه اللي يخوف ..
ما كانت تقدر تحدد من يكون .. مره طيب ومره شرير ..
لو انه صارحها من اول بيكون احسن بكثييير ..
بس اللحين بعد ما سمعت لرؤى فهمت كل تصرفات باسل ..
ما عدا ذيك الليله .. ليش وقتها دق الباب ودخلها لغرفته وبعد ساعه تقريبا او اقل طلعها ..
رؤى: نسيت اخبرج شيء .. هو مره من المرات عرف ان فيه احد كان يدور عنج .. فعلمني انه خلاج تتبادلي معاه بالغرف عشان هالشخص ما يوصل لج وتتطيري من ايده .. لو طرتي كان بتطير سيرين معاج .. تخيلي انه علمني شنو صار بالتحديد .. بالله عليج ذاك تصرف صح اللي ساواه .. فيه احد يدق بقوه بالليل .. لو انه دق الجرس بهدوء كان افضل .. والمشكله انه وقتها هددج بسجين عشان تسكتي .. انسان همجي جدا وتصرفاته عشوائيه ومتهوره ..
إبتسمت سيرين وقالت بهمس: يعجبني ..
تنهدت رؤى وهي تقول: والمشكله اخوه شرطي وهو يدرس قانون ..
طالعت اسيل فيها فتره بعدها قالت: طيب دامج رفضتي فكيف عرفتي مجاني ..؟!
رؤى: شسوي .. في نهاية الامر وافقت .. تصرفاته مثل ويهه بس ما انكر انه طيب وله جانب مره كويس .. اضطريت اوافق عشان القاج ..
دقتها سيرين وهمست بإذنها تقول: هييه سجى .. بالله عليج شرايج في باسل ..؟! مرره حلو صح ..؟!
إبتسمت لها اسيل وقالت: إيه .. بس تصرفاته مثل ويهه ..
سيرين: ههههههه دامج قلتي انه حلو عيل تصرفاته حلوه مثل ويهه ..
رؤى: سيرين إذا يبتي طاريه مره ثانيه راح احبسج في حجرتج ..
بوزت سيرين بعدها قالت: إيه صح نسيت اسألج انتي تعرفين إياد ..؟!
سكتت اسيل لفتره بعدها قالت بهدوء: إياد ..؟!
سيرين: باسل قال انج تعرفينه .. لما سألت إياد قال انه ما يعرفها وقال انه عرف لها طريج وراح يلقاها في هاليومين .. ولما قلت له ان باسل قال انها تعرفك قال لا تصدقين ذاك الجذاب .. اممم سجى كلام باسل صج ولا لا ..؟!
ترددت اسيل فتره بعدها قالت: مدري ..
سيرين بإحباط: لا مستحيل باسل يجذب ..
رؤى: مدري ..؟! شتقصدين ..؟!
طالعت فيهم وقالت: لا .. ما قصدي شيء ..
قامت وقالت: انا ابغى اروح ..
سيرين: لا لا ايلسي هني .. من فتره اتصل على إياد بس ما يرد فأرسلت له رساله واكيد لما يقراها راح يي ويشوفج .. هو من زمان وده يقابلج ..
اسيل: مو لازم .. لا تنكدون عليه ..
واتجهت للباب ..
قامت رؤى لعندها ومسكتها من كتفها ولفتها وقالت بعصبيه: سجى انتي ليش تفكيرج وتصرفاتج سوداويه ..؟! ما تعرفين تضحكين او تفكري بشكل سليم ..؟! الوضع هذا مو عاجبني يا بنت ..
سحبت اسيل نفسها من رؤى وقالت بإنفعال: ما كنت جذي .. ما كنت جذي ابدا .. ابوي .. امي هم اللي وصلوني لهالمرحله .. انتي مو مجربه الوضع اللي انا فيه فما يحق لج انج تتكلمي او تفتحي فمج .. قولي عني وقحه او سوداويه .. ما يهمني .. خلاص كلام الناس صرت اعرفه قبل لا ينطقون فيه والفضل يرجع لأمي وابوي .. حتى اختج .. فلا تتدخلوا .. ابدا لا تتدخلوا او تسوا نفسكم انكم انتو الصح وانا الغلط ..
لفت واتجهت للباب فقالت رؤى: شرايج اخذج له ..؟!
وقفت اسيل مكانها فكملت رؤى: شرايج اخذج لأبوج عشان تلقي كل الاجوبه للأسئله اللي تزعجج ..؟!
انصدمت اسيل من كلامها وظلت فتره واقفه مكانها متردده ..
هزت راسها بلا وقالت: ما ابغى ..
مدت إيدها بتفتح الباب بس هو انفتح وشافت في وجهها باسل ..
إبتسم وحرك إيده وقال: سلام اسيل ..
اسيل: انت ..؟!
باسل: وحشتج صح ..؟!
رؤى بضجر: انت شاللي يابك ..؟!
باسل: وانتي شدخلج ..؟! ييت اشوف اسيل ..
رؤى بحده: باسل ..
باسل: اوووه خلاص بعدين بأعتذر لج .. ابي اكلم اسيل ..
هزت رؤى راسها بيأس فقال باسل: اكييد رؤى علمتج كل شيء .. اممم اعرف تصرفاتي كانت شرسه وكلامي قاسي بس ماكو مشكله اكيد بتسامحيني صح ..؟!
فتحت اسيل فمها بترد بس قاطعها صوت سيرين تقول: هيه باسل .. ليش
جذبت علي ..؟!
لف باسل عليها ولما شافها تقدم لها وهو فاتح إيده يقول: سيرو حبيبتي وحشتيني ..
مسكته رؤى من ورى وقالت: هيه حدودك لا تتعداها ..
باسل: افف قلق ..
لف على سيرين وقال: شلون جذبت عليج ..؟!
سيرين: انت قلت ان سجى تعرف إياد بس إياد وسجى انكروا ..
باسل: إياد انا غاسل إيدي منه .. هذا جذاب لا تصدقيه بس ...
لف على اسيل وكمل: بس ليش انكرتي انتي ..؟!
طالعت اسيل فيه بعدها لفت وفتحت باب البيت ..
جاء باسل بسرعه وقفل الباب واسند ظهره عليه وهو يقول: ههههآي تتهربين من الاجابه .. ياوبي ليش انكرتي ..؟!
اسيل بهدوء: إبعد ..
باسل: مستحيل ..
رؤى: اول مره تعجبني يا باسل .. إيه لا تبعد ..
بعد باسل وقال لأسيل: تفضلي اطلعي ..
رؤى بصدمه: باسل ..!!!
رجع باسل لمكانه وهو يقول: هههههه امزح امزح ..
طالعت رؤى فيه بنص عين بعدها طالعت في اسيل وقالت: خليج هني .. باجر راح اوصلج لخالج .. ماني من النوع اللي يخلف بوعوده .. الكلام اللي قلتيه قبل شوي غلط .. صحيح اننا مستحيل نقدر نحس بنفس الاحاسيس اللي انتي تحسيها .. بس احنا نقدر نحدد الصح من الغلط لأننا مو تحت ضروف تضغط علينا وابتعادج عن اهلج واصلج ورفضج انج تردي هويتج غلط وستين غلط .. الضروف اللي انتي تمشي فيها لعبت بطريجة تفكيرج .. اصحي على نفسج يا سجى واعرفي شنهو الطريج الصحيح اللي لازم تمشي فيه ..
لفت اسيل عليها وقالت: انا اعرف طريجي صح .. انتم بس ابعدوا عني وخلوني اعيش لوحدي براحه ..
رؤى: هذا اسمه تهرب .. انتي قاعده تتهربين .. الى متى راح تظلي على هالحاله ..؟! لا اصل ولا اهل ولا امان .. منو بالدنيا يتمنى يعيش جذي ..؟! ماكو ..
طالعت اسيل فيها فتره بعدها طالعى في باسل وسيرين ..
لفت على رؤى وقالت: طيب .. راح اروح باجر عند اللي قال انه خالي .. وراح اتفاهم معاه .. لأن الحجي معاكم ضايع ..
ابتسمت رؤى وقالت: كويس .. طيب تبغي تنامي ..؟!
هزت اسيل راسها بإيه ..
رؤى: سيرين وديها لغرفة إياد القديمه ..
سيرين: اوككي .. اسيل هيا ..
اسيل: ابغى موبايل .. بأتصل على رفيجتي اللي كانت وياي بالمطعم عشان اطمئنها ..
باسل: صح النوم توج فكرتي فيها ..
رؤى: باسل وبعدين ..؟!
لفت اسيل على باسل وقالت: انا مب حافضه رقمها عدل بس بأجرب لحد ما القاه .. فعشان جذي ما اتصلت .. والمره اليايه انكتم .. لحد الان ما نسيت اللي ساويته فيني .. صرت تييني حتى باحلامي ..
زادت إبتسامة باسل وقال: اوووه شيء جميل والله .. صح نسيت اسألج من طارق ..؟!
انصدمت اسيل من سؤاله وهي تقول: شنوو ..؟!!!
باسل: الريال اللي قابلتيه بالحديقه .. اسمه طارق على ما اضن .. هو شكله كان يحبج وصدمتيني لما شفتج تصرخي عليه وتطلبي منه انه يبعد .. فيه احد في العالم يكون عنده واحد يعشه ومع هذا يطرده .. ناس غريبه ..
اسيل: مالك شغل .. واتمنى انك توقف عن مراقبتي ..
باسل وهو يتثاوب: وقفت من زمان اطمئني .. ياللا يا جماعه استأذن بروح انام ..
سيرين بإبتسامه: تصبح على خيير ..
باسل: وانتي من اهل الخير يا احلى سيرو بالعالم ..
اشرلها بإيده وطلع من البيت ..
دخل إيده بجيبه واتجه لسيارته وهو يقول: هالاسيل انسانه غريبه ..
فتح سيارته واتجه لشقته ..