شبكة همس الشوق - عرض مشاركة واحدة

24 - 3 - 2014, 07:28 PM

========================================

الساعه عشر الصبح وبالجامعه الثانيه ..
خرجت الدكتوره من الكلاس وبدأ اللحين بريك الغدا ..
خرجت خلود واخذت معها تهاني ..
اما غيدا فحطت رجل على رجل فوق طاولتها وماهي ناويه تطلع لأنه مالها خلق ..
لمت غدير اغراضها بشنطتها وهي تطالع في غيدا ..
شالت الشنطه وقالت: راح تظلي هني لوحدج ..؟!
غيدا بلا مبالاه: ليه من متى الامر يهمج ..؟!
رمت غدير الشنطه عالطاوله وقالت بإنفعال: غيدا متى تتنازلي عن قرارج الغبي ..؟! متى ترجعي مثل قبل ..؟! احنا ما نبيج جذي ..
لفت غيدا نظرها ناحية غدير وقالت: اها اللحين فهمتج .. اول ما كنتم تحبوني لشخصي .. لا تحبوني لتشبهي .. شكرا عرفت شنو كان قدري عندكم ..
هزت غدير راسها بلا وهي تقول: لا مو جذي .. وقسم حبيتج لشخصيتج وطرجة كلامج و ...
قاطعتها غيدا: شخصيتي ما تغيرت وطريجة حجيي ما تغيرت فليش مو عايبج الوضع ..؟! لا تضحكي على نفسج يا غدير ..
لفت غدير عالطلاب اللي كانوا يطالعون فيهم وقالت: نعم خيييير .. اطلعوا برى ..
طالعوا فيها شوي بعدها قرروا يطلعون لأنه واضح ان الشياطين راكبتها ..
طالعت غدير في غيدا وقالت: انتي اللي مو عامله لنا قدر عندج .. حنا شلتج ومع هذا فراقنا عادي عندج لأننا بويات .. انتي تغيرتي يا غيدا .. انتي اللي شكلج كنتي تحبينا لأننا بويات ولما حولتي طنشتينا لأننا مب مثلج .. وقسم انانيه ..
غيدا ببرود: شكرا ..
غدير بنفاذ صبر: غيدا ..!!
غيدا: يعني .. وش تبيني ارد مثلا ..؟! غدير صحيح انتي رفيجتي ومن اعز رفيجاتي بس اعذريني .. إذا ظليتي بويه فأنا ما اعرفج ولا ابي اعرفج ..
طالعت غدير فيها بعدها قالت: انانيه ..
غيدا: اول مره ادري اني إذا مشيت عالفطره اكون انانيه .. عالعموم إذا ما كان عندج شيء فروحي الشله وتركيني لحالي ..
غدير: طيب ليه ..؟! شنو اللي خلاج تحولي .. منو اللي لعب بمخج ..؟!
غيدا: محد .. بس وعيت على نفسي وشفت ان اللي كنت اسويه غلط وانا متأكده مليون بالميه انج عارفه ان اللي انتي فيه غلط .. المهم إذا كنتي فاضيه بالبيت فادخلي على قوقل واقري قصص البويات التائبات لأنه راح يفيدج ..
شالت غدير شنطتها وهي تقول: ما راح اقرأ شيء ..
واتجهت للباب فقالت غيدا: طيب اعتبريه اخر طلب لي منك ..
خرجت وصفقت الباب وراها بقوه ..
تنهدت غيدا بعدها زحلقت نفسها عالكرسي وقررت تاخذ لنفسها غفوه ..

........................................

برى الكلاس وبالكافتيريا ..
كان انس وفهد جالسين على احدى الطاولات ..
فهد: ياخي اقولك مستحييييل .. ما اقدر ..
انس: طيب قول للدكتور انا شدخلني ..؟!
فهد: لا فشله اقوله ..
انس: عادي قول اختي بتولد وراح يزورنا ناس كثيير وبما ان ابوك مسافر وانت الولد الكبير فراح تنشغل وما تقدر تنجز البحث .. بسيطه ..
فهد: بسيطه بالنسبه لك مو لي ..
انس: طيب اسمع .. اكيد الضيوف ما راح ييوا في نص الليل عيل انجز البحث باخر الليل ..
فهد بإستنكار: ياخي روح عني .. طول اليوم وانا واقف اسلم على هذا واضيف هذا واهرج مع ذاك واسمع للثاني وتقولي اسهر الليل واكتبه ..!! ياخي إذا وصلت للغرفه فهذا انجاز .. اخاف انام بالميلس من التعب ..
انس: ههههههه الله يعينك .. طيب غيب وريح بالك ..
شوي كمل بسرعه: لا لا اسحب كلامي .. ياويلك لو تغيب وتتركني لحالي ..
فهد: ههههههههه إيه صح متى يطلع طارق من المستشفى ..؟!
انس: خلاص قرب يطلع .. بعد باجر ان شاء الله ..
فهد: ان شاء الله .. ههههه واخيرا راح ترتاح من شادن ..
انس: ياخي شوف صحيح هي مزعجه بس وقسم انها عسل .. عالاقل تونسني بدل من يلستي لوحدي ومقابلة الاطوف الاربعه ..
فهد: اللي مغترب عن اهله دوووم حالته تحزن .. مسجين ..
انس: ايه خذ راحتك وتطنز ..
فهد: هههههههه صحيح نسيت اسألك .. منو اللي بنص المحاضره اتصل عليك ..؟!
ميل انس فمه بقرف وهو يقول: راكانوه منو غيره ..
فهد: صحيح نسيت اسألك عنه .. هو طلع من المستشفى ولا لا ..؟! وكيف صحته اللحين ..؟!
انس: وانا شكو تسألني ..؟! شاللي يدريني .. اصلا اخباره ما تهمني ابدا ..
فهد: اها عيل معليش لأنك كنت تزوره بالمستشفى فكنت اضن انك مهتم له ..
انس: شرايك ارمي علبة البيبسي على راسك ..؟؟؟!
فهد: هههههههههه امزح امزح ياخي ..
انس: مزح سخيف .. كل كل ترى فترة البريك قصيره ..
فهد بتأفف: وانت الصاج ..

========================================