شبكة همس الشوق - عرض مشاركة واحدة

24 - 3 - 2014, 07:40 PM

في صباح اليوم الثاني ..
وبساحة الجامعه العامه ..
كان الوضع جدا روتيني وعادي ..
هنا شلة بنات واقفين ويسلموا على بعض ..
وهناك شابين يتناقشون بموضوع موجود بالكتاب ..
وحده هناك تحكي لصاحبتها عن حبيبها والثاني يتكلم مع صاحبه عن الحب بعد الزواج ..
وفي ذيك الزاويه شابين بينهم مشاده كلاميه ..
إذا تطورت إلى مضاربه فالله يعين الدكتور تركي لأن الطلبه ما يعرفون ينادون إلا هو ..
يعني الوضع كالعاده ماشي ..
بس هناك .. وعند بوابة الجامعه دخل منها شاب في الصف الثالث جامعه ..
اول ما دخل جذب انظار الكل ..
الكل وقف عن الكلام والكتابه وغيره وطالعوا فيه ..
مافي احد ما يعرفه .. هو اسطورة الجامعه وبلا منازع ..
هو شخص له فتره غايب وافتقده كل الطلاب ..
ايه هو راشد الشعلان .. نار وبركان ..
ماشي بينهم ويسمع همسهم وكلامهم ..
اللي يستفسر عن غيابه كل هالمده ..
واللي يقول ياليته ما جاء ..
واللي قالت افتقدنا مشاكله ..
كل هذه الهمسات توصل لأذنه ..
كالعاده عاجبه الوضع .. يحب يشوف الكل يترك اللي في ايده ويتكلم عنه ..
وقدامه كان فيه طالب عيونه على جواله وماشي في نفس الطريق وطـــــاخ ....
صك براشد وقال: معليش ..
لما طاحت عيونه بعيون راشد الحاده ارتبك وخاف ..
مسكه راشد بقوه من بلوزته وقال بحده: ممكن افهم وين كانت عيونك يا الاحول ..؟!
الشاب بتوتر: صدقني ما كان قصدي .. والله ما انتبهت ..
لا لا .. ما كان قصدي هذه ما تمشي عند راشد ابدا ..
شد على بلوزته وهو ناوي انه يفرش فيه البلاط ..
"قسوتك ما احبها بس اكيد انت .... راح تتغير .. صح"

ارتعش جسمه وكلمات اخته روان تمر بمخيلتك ..
"راح تتغير"
"قسوتك ما احبها"
طالع في عيون الشاب شوي بعدها فكه بهدوء وراح ..
طالع الشاب فيه بصدمه ..
من متى وراشد يترك اللي قدامه ببساطه وهدوء ..؟!
لا مو بس هو ..
كل اللي كانوا يطالعون كانوا مندهشين من تصرفه الغريب ..
تصرف ما قد شافوه يطلع منه ابدا ..
بالعاده اذا بس طالع في الواحد ذيك النظره الحاده فهم متأكدين ان الواحد بيطلع منها مكسر ومبهذل ..
اتجه راشد للكلاس وهو يطالع في الارض بكل هدوء ..
يتذكر كلماتها ..
"والله طفشت من كثر ما العب لوحدي"
"ياخي مره ناسيني ولا كأني اختك"
"ما قد لعبت معي مع اني دايم اطلب منك وكل شوي تقول بعدين"
"هالبعدين طولت كثير وشكلها ما راح تيي ابدا"
"ما راح تيي ابدا"
"ابدا"
مسك مقبض باب الكلاس وضغط عليه بقوه ..
متألم من داخله ..
متألم وبقوه .. ليته لبى رغباتها ..
ليته التفت ولو مره لطلباتها ..
اخذ نفس عميييق ..
راحت اخته .. واللحين راحت حتى شهد ..
البنت اللي كانت واقفه بجنبه طول الايام الي راحت ..
البنت اللي حسسته ان موت اخته مصيبه ممكن انه يتجاوزها ..
اللي طلعته من عزلته ..
اللي صحته من اوهامه ..
تنهد وبعدها فتح باب الكلاس ودخل ..
الكل وبلا استثناء لفوا يطالعوا فيه والصدمه واضحه على وجوههم ..
لدرجة ان واحد منهم كان فاتح فمه من الصدمه بس صاحبه نبهه انه يغلق فمه ..
لف راشد نظره يطالع فيهم بعدها اتجه لكرسيه وجلس عليه ..
ايمن بدهشه: راشد ..!!!
عزوز: وينك يا معود ..؟! خفنا عليك ياخي ..
راشد بهدوء: انا مب اخوك ..
متعب: هههههه لا صج راشد شصار فيك .. قبل فتره زرناك بس قالوا انك ما تبغى تقابل احد .. عسى ماشر شصار ..
راشد: اشش في هالوقت انا ابغى هدوء ..
هزوا راسهم وفضلوا انهم يهدأون دامهم بيعرفون السالفه بعدين ..
دخل بسام وصاحبه بندر للكلاس في هذا الوقت ..
**ملاحظه/ بندر رفيج بسام ماهو نفس الشخص اللي تهاوش مع واحد ودخل عماد بينهم بالبارت اللي راح .. كان مجرد تشابه اسماء لأني كنت ناسيه اني دخلت اسم بندر بالروايه ..

دق بندر بسام وقال: شف شف منو فيه ..
لف بسام يطالع فاندهش لما شاف راشد الشعلان موجود ..
من زمــــان عنه ..
تقدم بسام من عنده وقال: اهلين راشد .. الحمد لله عالسلامه ليش كنت غايب ..؟!
طالع راشد فيه فتره ..
هذا الشخص كان ناوي له نيه سيئه بس ....
بس خلاص بطل وفي نفس الوقت مستغرب من طريقة بسام بالكلام معه ..
يتكلم معاه بطريقه محترمه ولا كأن قبل فتره كان راشد متوعده ومهدده ..
ظل ساكت لفتره بعدها قال: الله يسلمك .. انا بخير ..
صدمــــــــــــةة . . ! !!
كل الطلاب انا متأكده انهم بيصيبهم جلطه من تصرف راشد الغريب ..
من متى راشد يرد على الطلبه كذا ..؟!
لا اصلا من متى راشد يدخل الكلاس بدون صراخ وهواش ..؟!!
وكيف اصلا يرد على طالب كانت بينهم مشكله كبيره ..؟!!
كيف .. شلون ..؟!!
حتى اصحابه مصدومين من تصرفه ..!!
وللحضه بدأوا يشكون انه ما يكون رفيجهم او يمكن يكون دماغه مغسول ..
ابتسم له بسام بعدها راح لكرسيه وجلس جنبه بندر ..
بندر بهمس: هيه بسام .. انت متأكد ان هالادمي راشد ..؟!!! والله مستحيل ..!!
بسام: ياخي لا تحلف .. وكمان يمكن الله هداه ..
بندر بإستنكار: راشد ..!!!!
بسام: ايه راشد .. ولا الهدايه على ناس وناس لا ..؟!
بندر: لا مو قصدي بس مو قادر اصدق .. راشد يتغير ..!! ياخي هذا ثامن مستحيلات العالم السبع ..
بسام: ههههههه لهدرجه هو مجرم بعيونكم ..؟!
بندر: واكثر .. انت ما تعرفه كثرنا .. ياخي نظرته بحد ذاتها ممكن تذبح ..
بسام: ههههههههههههههه اهمم شيء ..
لف طالع في راشد لفتره ..
لحد الان شايل بقلبه عليه لأنه كان سبب بيوم من الايام بأذى اسيل بنت اخته ..
بس بيحاول انه يسامحه ويحتسب الاجر عند الله ..
كل الناس يغلطون ومثل ما يبغى الناس تسامحه على غلطه حتى الناس تبغى احد يسامحها على اغلاطها ..
اما راشد فكان جالس بطريقه عربجيه وجواله بإيده يدقدق فيه ..
عيونه عالجوال واذنه مع الطلاب ..
لف عليهم وقال بنفاذ صبر: وبعديـــــن معكم ..؟؟؟!
سكتوا الكل بخوف فقال: عشاني بس رديت على واحد قلبتوها قضيه .. انشغلوا بنفسكم الله يشغلكم دووم .. اغبياء وقسم ..
ورجع يطالع بجواله ومن بعدها ما سمع احد يتكلم عنه ..

========================================