شبكة همس الشوق - عرض مشاركة واحدة

24 - 3 - 2014, 07:44 PM

الساعه 12 ونص وبمحاضرة الدكتور حسن ..
كان الوضع هادي بالمحاضره والكل همه انها تنتهي ويخلصون ..
لف طارق على انس وقال: مع انه دكتورنا ودرسنا من زمان بس من بعد الدكتور راكان صرت اشوف اختلاف كبير ..
فهد: فعلا .. تعودنا على الدكتور راكان كثير ..
طارق: مافي امل يرجع ..؟!
فهد: لا .. خلاص سمعت انه رجع لجامعته يدرس ..
انس: خلاص اشش خلوني اركز ..
طارق: تركز بشنو .. تراه يتكلم عن العلاقات الاجتماعيه وهذه الاشياء معروفه ..
دقه فهد وقال: هيه طارق شف شف عهد تطالع فيك ..
طارق: اشش خلاص خلونا نركز بالمحاضره ..
انس: مدري منو كان يقول انها اشياء معروفه ومو لازم نركز ..
طارق: لا ما قلت مو لازم نركز ..
انس: بس معنى كلامك كان جذي ..
د.حسن: طارق واللي معاه .. إذا كانت المحاضره مب عاجبتكم تقدروا تطلعوا برى ..
انس: لا لا يا دكتور مو قصدنا ..
د.حسن: عيل ليه الكلام ..؟!
طارق: دكتور كنا نتناقش بشيء محيرنا ..
د.حسن: وشو ..؟!
تورط طارق بس لما طاح نظره على غيدا وشلتها جت بباله تصريفه ..
طارق: يا دكتور بالعلاقات الاجتماعيه فيه شيء اسمه حب صح يا دكتور ..
د.حسن: ايه اكيد وهو من اقوى مقومات العلاقات الاجتماعيه ..
طارق: يعني الحب فطره بالمجتمع .. طيب دكتور شنو تعليقك على اللي يحبوا اشخاص من نفس جنسهم ويعتبرون نفسهم من الجنس الاخر ..؟!! يعني امثال البويات ..
احتدت نظرات خلود لأنه واضح وبقوه انه يقصدهم فقال الدكتور حسن: مثل هذه العلاقات محرمه ومافيها اي شك .. علاقه محرمه وتشبيه محرم وطريج كله حرام .. شيء مثل جذي انتشر وللأسف في المدارس وخصوصا بالجامعات وتقريبا كل اسبوع نمسك هني بجامعتنا شيء مشابه ..
خلود: طيب دكتور ممكن سؤال ..
د.حسن: إسألي ..
خلود: الريال طبيعي يحب بنيه وزي ما انت قلت انه فطره .. بس ايش هي اهم الاشياء اللي من المفترض ان الريال حب ذي البنت عشانها ..؟!
د.حسن: اولا الدين .. الاخلاق و .....
قاطعته خلود وهي تقول: الاخلاق .. طيب يا دكتور وإذا كانت ذي البنيه اصلا لقيطه واخلاقها مشكوك فيها وتعيش بالشوارع .. يعني بنت شوارع .. فهل من الطبيعي انه ريال يحبها ..؟!
انصدم طارق من كلامها ..
هذه اكيد تقصده وتقصد اسيل ..
بس كيف عرفت ..؟!
لا اصلا ليش تقول هالكلام الوقح عن اسيل ..؟!
شلون يعني اخلاقها مشكوك فيها ..؟!
وشلون تقول عنها بنت شوارع ..؟!
فقال بحده: خلود احترمي نفسج تراها انظف منج ..
الدكتور: بــــس يا طــــارق ..
عض طارق على شفته بقهر واضطر انه يسكت ..
د.حسن: احنا ما نبغى نقلب المحاضره لنقاشات خارجيه .. ولا نبغى هواشات مالها داعي ..
خلود: معليش يا دكتور .. كان استفسار بسيط وما كنت ادري انه بينرفز بعض الناس ..
د.حسن: خلود وبعدين ..؟!
خلود: خلاص اسفه ..
تنهد الدكتور وبدأ يكمل شرحه ..
انس بهمس: تستاهل انت اللي بديت ..
طارق بقهر: سامع شنو قالت عن اسيل ..؟!! الحقييره .. اصلا شدراها اني احبها ..؟!
انس: هواشك ذاك اليوم مع ناصر اللي انشر الاشاعه بعض من طلاب كلاسنا شافوه فتناقلوا الكلام بين بعض فاكيد سمعت وعرفت ..
فهد: اشش ترى الدكتور قبل شوي لاحضكم فأسكتوا قبل لا يطردكم ..
سمعوا لكلام فهد وسكتوا قبل لا يحرجهم الدكتور ..
اما غيدا فكانت حاطه رجل على رجل وتطالع بخلود اللي كانت جالسه قدامها ..
مدت رجلها وضربت كرسي خلود فاستغربت خلود ولفت ورى تشوف منو فيه ..
ابتسمت غيدا لها وقالت: غيرانه من علاقتهم فعشان جذي تبغي تنرفزيه .. الله يعينج على نفسج .. طيب قلديهم وحبي لج واحد ومن بعدها بترتاحي ..
عصبت خلود منها وقالت: ما راح ارد عليج ..
ولفت قدام فقالت غيدا: لأنه ما عندج شيء تقولينه .. تكسري الخاطر وربي ..
ما ردت عليها خلود وبعدها لفت غيدا نظرها على كرسي غدير الفاضي ..
تنهدت وقالت في نفسها: "اتمنى تكون تغيرت وحطت كلامي في اعتبارها" ..
وقبل انتهاء المحاضره بكم دقيقه قال الدكتور: عندكم اسبوع على ما تيبوا البحث اوكي .. ما راح اتعبكم فعشان جذي خلوه صفحه وحده بس المهم ان المضمون يكون واضح اوكي ..
الطلاب: حاضر ..
قفل كتابه وقال: عندي تعليق على كلامج يا خلود .. انتي قلتي لو فيه بنيه لقيطه واخلاقها مشكوك فيها وبنت شوارع وحبها ريال فهل هذا شيء طبيعي ..!! اولا البنت لقيطه او يتيمه او بنت حرام او اي شيء ثاني ما يحق لنا نطالع فيها نظره غير ونحسها مختلفه عن المجتمع .. الانسان انسان مهما كانت طريجة عيشه .. مو كل اللقطاء سيئين ولا كلهم كويسين .. ما يجوز نحكم على الشخص بالسوء لأنه ماله اهل .. لأنه وبصراحه اللي معهم اهل هم اكثر سوء من اللي عايش بدونهم .. وانا متأكد انج تقصدي بحجيج الطالبه اللي بالسنه الاولى .. مجرد كونها لقيطه هذا ما يعني انها من دون اخلاق او بنت شوارع .. هي عاشت بين عيله وتربت معهم فهذا يعني انها متربيه مثلها مثلج ..
خلود: لو كانت متربيه جان ما هربت من البيت .. تلقاها ما صدقت على الله وراحت تهيت بالشوارع ..
شد طارق على قبضته من القهر وهو يطالع فيها فقال الدكتور: انتي مو عارفه حقيقة تصرفها فما يجوز تفسري الموقف من عندج .. كل شيء ولا ضن السوء ..
قالت وحده من الطالبات: بس يا دكتور هي من وقتها ما عاد شفناها بالجامعه .. شنو تفسر هالشيء ..؟! اكيد عجبتها حياة الشوارع وغيره من الاشياء اللي ما يعلمها إلا الله ..
فقال طالب ثاني: لا حرام تقولي جذي .. يمكن سمعت بالاشاعه فما قدرت تيي للجامعه عشان لا تشوف نظراتنا لها ..
تكلمت طالبه ثانيه تقول: الدكتور قال احسنو الضن .. يمكن تكون اللحين تعيش عند اهلها ..
ضحك احد الطلاب وقال: ههههههه واضحه ما يبغالها احسان الضن .. لو انها صج محترمه جان ما هربت من البيت .. كل البنات اللي يهربوا من البيت معروف شنو هو مقصدهم ..
د.حسن بحده: جـــــــب ..
فسكتوا الطلاب كلهم فقال الدكتور: التكلم باعراض الناس حرام .. عارفين شنو يعني حرام ..؟! خلاص حكمتوا عليها انها قذره بس لأنها هربت من البيت ..! نسمع كثيير عن حالات الهرب فهل هذا يعني انهم هربوا لسبب واحد ..؟! لا الاسباب تختلف .. منها قسوة الاهل .. منها الاضطراب النفسي من كثرة المشاكل .. منها الطرد .. الاسباب كثيره فلا احد يحكم عالناس جذي .. انتم شنو تستفيدون لما تشوهوا سمعتها ..؟! شنو تستفيدوا لما تتكلموا عنها بالباطل ..؟! انتم تكثروا ميزان ذنوبكم .. احنا ليش عايشين ..؟! عشان نطيع ربنا مو نتكلم في اعراض الناس .. اتمنى تفكروا بحجيي عدل ..
شال كتبه وطلع من الكلاس من بعد ما قال كلامه هذا ..
قام طارق من مكانه واتجه لطاولة خلود والطلبه كلهم جالسين في اماكنهم يترقبون اللي بيصير ..
ضرب بإيده على طاولتها وقال بحده: انسانه ملعونه ومسترجله مثلج ما يحق لها تتكلم عن الناس جذي .. بالبدايه شوفي نفسج واعرفي قدرج بعدها يحق لج تتكلمي وتقولي رايج .. وحده ملعونه ومطروده من رحمة ربها وتتكلم عن الاخلاق ..!!! صج انه شيء يجبرك انك تضحك .. حاله غريبه وشاذه .. وحطي ببالج انه المره اليايه لو سمعتج تقولي عن اسيل كلمه وحده اوديج لسابع ارض ..
رفع راسه وطالع في الطلاب اللي يطالعوا فيه فقال: وانتم سمعوا كمان .. كلامكم يدل على تربيتكم .. وصدق المثل اللي يقول كلن يرى الناس بعين طبعه .. اللي تكلم عنها بالطيب فهذا يدل على طيب اصله واللي تكلم عنها بالسوء ما يحتاج اقولكم شنو نوع اصله ..
فقال ذاك الطالب بحده: كلامك وقح كثيير يا طارق .. انت قاعد تسب اهلنا إذا ما كنت حاس ..
طارق ببرود: انتم يبتوا هذا الشيء لنفسكم ..
اخذ كتبه من فوق طاولته واتجه للباب عشان يطلع فقال ذاك الطالب: وحده لقيطه وتدافع عنها .. خلاص حتى احنا عرفنا شنو هو نوع اصلك ..
وقف طارق في مكانه فقالت طالبه ثانيه: لا تكون بس عشيقتك وتقابلها كل ليله وعشان جذي تدافع عنها ..
وحده من الطالبات: خلاص استغفروا ربكم ..
فقال طالب ثاني: اها .. عشيقته .. اللحين وضحت السالفه ..
لف طارق عليهم وقال: هههه انتم ناس مو طبيعيين .. بالله عليكم طالعوا شلون يطالعوا فيكم الطلاب .. انتم قاعدين تأكدون لهم ان اصلكم يمثل كلامكم هذا .. على العموم ما الومكم لأن الجاهلين يتكلموا جذي .. عشيقته ..!!
طالع في البنت اللي قالت هالكلمه وكمل بإستهزاء: ليه انتي عندج عشيق يا قلبي ..؟!!
انصدمت من كلامه فقال: لا تنصدمي لأن المنطق يقول جذي .. ما ينطق به اللسان هو نتاج ما يتحدث به العقل .. ترى واضحه ..
البنت بعصبيه: جب بس .. مو انت تقول ان الكلام يبين اصلكم .. هذا يعني ان كلامك الوقح يبين نوع اصلك ..
ابتسم وقال: ماكو دواء واحد يشفي جميع الامراض .. عيل ماكو اسلوب واحد يعالج جميع عقولكم المريضه .. لكل مرض دواء .. ولكل واحد فيكم اسلوب يداويه ..
خرج من الكلاس وقفل الباب وراه ..
ضحكت غيدا فجذبت جميع الانظار لها ..
قامت من مكانها ولمت كتبها وهي تقول: اضنه قصف جبهتكم بما فيه الكفايه .. روحوا بس لموا اللي بجي من كرامتكم وسكروا حلجكم ههههههه ..
وحده من البنات: شوفوا منو يتحجى .. بويه سابقه تعطي نصايح .. الله لا يبلانا ..
ابتسمت غيدا بإستفزاز وقالت: كان عقلي مريض وعالجته .. بس اطمئنوا لأن عقولكم لحد الآن ما اكتشفوا لها علاج .. شكلكم مطولين ..
اتجهت للباب وفتحته بس وقفت شوي ولفت وقالت: صح نسيت اقولكم .. اسيل انظف منكم فاهمين ..؟! حطوا هالشيء ببالكم ..
قفلت الباب وراها بعد ما طلعت ..
جلس الجو هادي لفتره بعدها بدأوا يطلعون من الكلاس ..
انس: اعجبني رد طارق عليهم .. انا من وقت ما شفته شاد على قبضته توقعته راح يصارخ بس اعجبني تصرفه ..
فهد: فعلا .. مسجينه ذي الاسيل .. تكلموا بعرضها وما زالوا ..
انس: بس كله بميزان حسناتها ..
فهد: وانت الصاج .. بس بصراحه انصدمت من دفاع غيدا عنها ..
انس: ههههههه تصدق اني بديت احبها .. كنت اكره الشله بأكملها ..
فهد: هههه المهم ياللا نطلع ياء وقت الانصراف ..
انس: اوكي اوكي ..
لموا كتبهم وبعدها طلعوا من الكلاس ..

========================================