شبكة همس الشوق - عرض مشاركة واحدة

24 - 3 - 2014, 08:00 PM

|$[ البآرت الحادي والعشرون الجزء الثالث ]$|

جالس بالمقعد الخلفي للسياره بكل برود وهو يراقب السايق حقه وهو واقف بنص الشارع مع بنت وشرطي مرور ..
طالع في ساعته شوي بعدها رجع يطالع في السايق ..
شاف الشرطي يركب الدباب حقه يروح والبنت كملت طريقها والسايق جاي لعنده ..
ظل يطالع في السايق حقه ببرود بس لاحظ ان البنت وقفت عن المشي وهي بمكان قريب جدا من قزاز مقعده ..
لف يطالع فيها فاسترغب لما شاف نظرات الصدمه على وجهها وقال بمنتهى البرود: منو ذي ..؟!
قفل السايق الباب وهو يقول: هذه تقول ان اسمها .....
سكت شوي بعدها كمل: سجى سعد الراهي ..
ظهرت الصدمه على وجه سعد لثانيه بعدها استعاد بروده وقال: سجى ..! تقول ان اسمها سجى ..؟!
السايق: ايه طال عمرك .. وللامانه اول ما قالت اسمها انصدمت ولما دققت بملامحها شفت شبه بينها وبين ولدك إياد ..

ظلت اسيل تطالع فيه بصدمه وهي مو مصدقه ..
ايه ابوها .. مو مصدقه انها واقفه قدامه ..
بس لحضه .. حتى لو كان هو ابوها ليش تهتم ..؟!
خلاص لازم تروح وتطنشه ..
بس مو قادره ..
تحس برجلها متصلبه ومو قادره تتحرك ..
مو قادره تمشي ولا تخط خطوه وحده ..
زادت ضربات قلبها وهي تشوفه ينزل قزاز السياره ..
وضح لها وجهه تماما ولأول مره تشوف عن قرب ..
مد إيده واشر لها انها تقرب ..
بس ما قدرت ..
تحس بإنتفاض يهزها من داخل ..
اطرافها ترتجف ومو عارفه ايش هو السبب ..
مو عارفه .. بس خلاص ..
غمضت عيونها وهي تردد بداخلها كلمة خلاص ..
تبغى الانتفاضه توقف .. تبغى ارتجافها يوقف ..
تبغى ضربات قلبها توقف ..
تبغى رجلها تتحرك .. تبغى السياره تمشي وتبعد ..
تبغى الوقت يمر ويخلص ..
طالع فيها لفتره ينتظرها تقرب بس شكلها مطوله ..
فتحت عيونها وطالعت فيه ..
في نظراته البارده .. ووجهه الجامد ..
مدت رجلها لا ايراديا وتقدمت خطوتين منه ..
صارت المسافه بينهم اقل من متر ..
بلعت ريقها وقالت: نـ نعم ..
ظل ساكت لفتره بعدها قال بهدوء: انتي منو ..؟!
ارتبكت وما عرفت وش تقول ..
هي سجى .. سجى بنت سعد الراهي ..
هي بنته .. بس ما تتجرأ تقولها قدامه ..
كرهت نفسها في ذي اللحضه ..
ليش ما تفتح فمها وتصارخ عليه ..؟!
ليش هي خايفه كذا ..؟!
ليش ما تقول كل اللي في قلبها ..؟!
ليـــــــش ..؟!
حست بالعبره تخنقها ..
ودها في ذي اللحضه تصرخ عشان تبعد جزء كبير من الحمل اللي ثقيل على قلبها ..
لما طولت ما ردت قال بنفس الهدوء والبرود: سجى سعد الراهي .. شلون صار اسمج جذي ..؟!
برضوا ما ردت .. ماهي قادره ..
لسانها مو قادر يتحرك ..
مو قادره ترد على سؤاله الغريب ..
شنو يقصد بشلون صار اسمج جذي ..؟!
هالاب بشنو يفكر اللحين ..؟!
مو قادره تعرف ..
ظل فتره يطالع فيها بعدها قال: ليه ساكته ..؟!
طالعت في نظراته البارده وحاولت تتكلم وقالت بتردد: نـ نعم ..
رفع حاجبه وكأنه يقول سلامات وش هالجواب ..
اخذ جواله من جيبه ودق فيه كم دقه بعدها قفله ولف مره ثانيه على اسيل وقال: وين عبد الغني ..؟!
تفاجئت اسيل من سؤاله ..
عبد الغني ..!
منو هذا الشخص ..؟! ما تعرف اي احد بهذا الاسم ..
ضاقت عيونه وهو يشوف نظرات الدهشه على وجهها ..
شوي تذكرت .. عبد الغني اخو ابوها من الرضاعه فقالت: تقصد عبد الغني صالح ..؟!!
قال ببرود: لا تستغبين .. انا اقصد عبد الغني سطام ..
طالعت فيه بحيره ..
وش يقصد بلا تستغبين ..؟!
هي فعلا ما تعرف مين يكون عبد الغني سطام ..
ما تعرف غير عمها عبد الغني صالح ..
لاحظ الحيره اللي على ملامحها ..
يا انها تعرف تمثل صح ..
او انها ما تعرفه ..
بس للأسف الخيار الثاني مستحيل ..
لأنها لو ما كانت تعرف كان هي .....
قاطع تفكيره صوتها الهادي يقول: انت سعد الراهي صح ..؟!
لف نظراته البارده لناحيتها وقال بعد فتره من الصمت: عبد الغني ما ترك شيء ما علمج إياه ..
تجمعت الدموع بعيونها وقالت برجفه: اكرهك ..
طالع السايق فيها بعدها طالع في سعد اللي كانت ملامحه بارده كالعاده ..
بلعت ريقها اكثر من مره عشان لا تنزل دموعها ..
تقدم شاب من وراها وهو يقول بإستنكار: عشان سعد ..!! تبجي عشان سعد ..!! لا انتي فعلا غلطانه ..
حط إيده على كتفها وقال وعيونه على سعد: واحد مثله ما يستحق تنزلي دموعج عشانه ..
رفع سعد حاجبه وهو يقول: ومنو انت ..؟!
عقد السايق حواجبه وهو يقول: لحضه .. انت اللي ..!!
وكمل بحده: يعني كنت تجذب ..
تكى بإيده على كتف اسيل وهو يقول: يب .. كنت اجذب .. ههههههههه اصلا كان واضح اني كنت اجذب .. بس سبحان الله لكل انسان قوة استيعاب تعتمد على حجم عقله الداخلي ..
طالع في سعد وقال: اوووه المجرم الهارب من العداله هني .. كيف الحال ..؟! بصراحه فيك جرئه مب طبيعيه .. ما عمري شفت مجرم يمشي بالشوارع بذي الطريجه .. بالعاده يكونوا مختبئين في جحور الارانب ..
ابتسم سعد بإستهزاء بعدها ضغط الزر وبدأ شباك السياره ينقفل ..
رفع الشاب حاجبه بعدها قال: بتروح وبكل برود ولا كأن البنت اللي واقفه هني هي بنتك البكر .. اي قلب هذا اللي انت تملكه .. عالاقل قول لك شيء ..
لف سعد نظره وطالع باسيل بعدها قال: انا ما عندي بنات ..
احتدت ملامح الشاب وقال: بعتها وبسهوله .. لعلمك اصلا هي اللي تبي تتبرى منك .. ما تواطنك ولا تتمنى تشوفك ابدا ..
انقفل القزاز وتحركت السياره لقدام وابعدت عنهم ..
عض على شفته بقهر وهو يقول: اكرهه .. انتحر ولا يكون عندي ابو مثله ..
اسيل بصوت منخفض: ما اصدق ..
لف عليها وابعد ايده عنها فكملت بصوت مرتجف وعيونها عالارض: ما اصدق .. اني .. من لحمه ودمه ..
تنهد وهو يطالع فيها بعدها حط ايده بجيبه وهو يقول بلا مبالاه: لحم ودم ..؟! شكلج تحسين بالجوع مثلي وتبين تيس صح ..؟!
لفت تطالع فيه بصدمه ..
بعدها عضت على شفتها ودفته بقوه وراحت لجهة الشقه ..
هو وين وهي وين .. ماهي فاضيه لخفة دمه اللي جايه بوقت مره غلط ..
طاح على الارض من دفتها المفاجئه والقويه ..
مسك ظهره وهو يقول: آي إيي آه ..
قام من مكانه ولحقها وهو يقول: اسيل لحضه ..
وصل لعندها فمشي معها وهو يقول: ما تتحملين المزح ابدا .. إلا تعالي ابسألج .. منو عبد الغني هذا اللي سألج عنه ..؟!
هزت كتفها وهي تقول: ما اعرفه .. اول مره اسمع بعبد الغني سطام .. ما اعرف .. باسل خلاص اسكت لا تفتح هذا الموضوع ..
هز كتفه وهو يقول: انتي حره ..
ظلت تمشي وهي سرحانه ..
ابوها .. قبل شوي كانت واقفه مع ابوها ..
وتتكلم مع ابوها ..
ومن قصة بسام ورؤى كان واضح انه انسان ما عنده قلب ..
بس .. بس مو لهالدرجه ..
لا مو لهالدرجه ..
باسل: ايه اسيل بأقولج شيء ..
اسيل بهدوء: باسل هدني لحالي ..
باسل: اوكي بس لعلمج ترى يا واحد للشقه ويبي يقابلج فعشان جذي انا نزلت ادور عنج ..
لفت اسيل تطالع فيه وهي تقول: واحد ..! منو ..؟!
باسل: روحي للشقه وبتعرفينه ..
دخلوا للعماره واسيل مستغربه تفكر فقال باسل: ايه صح وين كنتي رايحه ..؟!
اسيل: اشتري لي كتاب .. بس خلاص بسام إذا ياء باجر الصبح اطلب منه بيبه لي قبل لا اروح للجامعه ..
بعد ما طلعت الدرج اتجهت لناحية شقتها ..
فتحتها ودخلت عشان تشوف مين هالواحد اللي جاء يشوفها ..
اول ما دخلت وشافته انصدمت ..
ما كانت تتوقع يكون هو ..
قام من فوق الكنبه وجاء عندها ..
حط ايده على راسها وقال بإبتسامه: مر وقت طويل على اخر مره شفتج فيها .. تغير شكلج وايد ..
اسيل: عمي ..!!
هز ابو وائل راسه وهو يقول: ايه عمج اللي كان يدور عنج من اول يوم طلعتي فيه من بيتج .. وائل كلم رفيجتج اكثر من مره بس للأسف ما كنتي تهتمين انج تشوفينا ..
نزلت راسها وهي تقول: اسفه بس .. بس لأنه ...
قاطعها وهو يقول: خلاص عادي انتهى الموضوع فلا تهتمي له .. المهم انتي كيفج اللحين ..؟!
اسيل: الحمد لله ..
ابو وائل: تعالي ايلسي ..
جلست اسيل وجلس عمها جنبها وقال: كيف هو وضعج اللحين ..؟!
اسيل بهدوء: تمام .. بسام اللي طلع خالي مهتم فيني وايد ..
ابتسم وهو يقول: الحمد لله .. يسعدني اشوفج مرتاحه .. ان شاء الله تظلي دوم جذي ..
هزت راسها بإيه وما ردت عليه ..
تنهد وقال: الله يكون بعونج .. ولدتي في صلب عائله ما يعرفون الرحمه او الشفقه .. ابوج عبد الرحمن قبل لا يموت كلمني ووصاني عليج .. وكأنه كان حاس ان يومه قريب ..
اسيل بهمس وألم: الله يرحمه ..
ابو وائل: آمين .. كان حريص عليج بكل شيء .. يهتم فيج اكثر من اولاده .. غلطته الوحيده انه ما علمج حقيقتج من بدري .. كان خايف من ردت فعلج .. ما يبيج تتضايقين .. بنته اسيل المرحه ما كان يبغى يشوفها مهمومه .. كل مره يقول بعدين .. باجر .. السنه اليايه .. بعد شهر .. كل شوي يأجل .. افهم شعوره .. بس كان هذا الشيء غلط .. اخوي من الاشخاص اللي مشاعره تسبق عقله .. ما يفكر بعقلانيه .. لا يهتم بالمشاعر اولا .. ومع هذا كان رائع بكل شيء .. الله يغفر له ويدخله فسيح جناته يا رب ..
اسيل: آمين ..
طالع في التلفزيون فتره بسرحان بعدها قال: كان عمرج تقريبا سنه ونص لما لقاج .. وقتها كانت توه بنته اسيل تؤام فارس ماتت .. ولدت اصلا وهي تعبانه وايد .. لما شافج تألم وايد وخصوصا .....
سكت شوي بعدها كمل: وخصوصا انه كان يشوف جدامه ناس يرموج في ذاك المجان .. حس بالألم .. ناس عنده نعمه .. بنته بصحه كويسه ومع هذا يتعاونوا برميها وبكل قسوه .. وقتها كان هذا المجان ينب السوق .. كان خلف السوق على ويه التحديد .. علمني كل شيء شافه .. كانت فيه سياره واضح ان صاحبها واحد غني وربي منعم عليه .. نزل منها ثلاث اشخاص .. اثنين واضح عليهم انهم عاديين والثالث كان رزه في مشيته وباين انه صاحب السياره .. سمعهم يقولون كلام كثير .. بس اللي قدر يفهمه هو *عائلة سعد الراهي غنيه بس للأسف رموا بنتهم ولا كأنها بنتهم* .. فعرف ان سعد الراهي هذا يطلع ابوها .. شوي سمع الثاني يقول *يقولون امها سميه كانت ناويه ترميها بنفسها* رد عليه الثاني *حتى يدتها ام امها* .. بعدها سمع الثالث يقولهم بحده *بس انت وياه .. خلونا نخلص قبل لا يكشفنا احد* .. حطوها هناك بالزاويه ملفوفه ببطانيه صغيره وبعدها رجعوا لسيارتهم وراحوا .. كان مصدوم .. بالبدايه كان يضن انها بنت حرام وعشان جذي يبغوا يتخلصوا منها .. بس انصدم لما عرف ان عندها عائله .. ام واب وجده .. وكلهم يبغوا يتخلصوا منها .. انصدم من كمية القسوه اللي تحملها هالعائله .. حاول انه يحسن الضن وقال انه يمكن هم فقارا وما عندهم فلوس تكفي .. بس مهما كان هذا ما يعتبر سبب .. اخذج ووداج عند زوجته احلام ومن وقتها قرر انه يربيج هو بنفسه .. ما قدر يروح للشرطه يبلغ عنج .. ما يبغاج تعيشي على لقب لقيطه .. بعد فتره سأل عن واحد اسمه سعد الراهي .. سأل عن ابوج وانصدم لما عرف انه غني .. يعني سبب رميج مو لأنهم فقارا .. عصب اكثر وكرههم .. ويمكن يكون هذا احد الاسباب اللي خلاه يتردد في انه يعلمج الحقيقه ..
هزت اسيل راسها بهدوء وهي تقول: اها ..
طالع فيها لفتره بعدها حط ايده على كتفها وهو يقول: اسيل انتي راح تظلي بنت اخوي .. وبيتي مفتوح لج دايما .. اذا انتي مو مرتاحه هني فتعالي عندي البيت .. المهم انج ما تضايقي نفسج ودوري على راحتج .. احنا في زمن صار الاخيار فيه ينعدوا عالاصابع ويارب احسن خاتمتنا جميعا .. ابوج وامج ما يستحقوا انج تضايقي نفسج عشانهم .. المهم ادعي لهم بالهدايه والله كريم ..
ظلت اسيل ساكته ولا ردت عليه ..
تنهد ابو وائل وقال: الوقت متأخر وانا ما ابي أأخرج عن موعد نومج .. انا طالع وراح ازورج من فتره لفتره ..
هزت راسها بإيه فقام واتجه للباب ..
بعد باسل بسرعه عن الباب بعد ما كان يتنصت ودخل لشقته ..
طالع من عين الباب وشافه مار من قدام شقته وبعدها نزل لتحت ..
فتح الباب واستند عليه وهو يقول: هذا عمها .. بس بصراحه الكلام اللي قاله محير .. منو يكونون هالناس اللي رموا اسيل .. إذا كانوا من جماعة سعد فكيف .. اقصد فيه شيء غريب محيرني ..
تقدم من شقة اسيل وحط إذنه عالباب لعل يسمعها تقول شيء ..
فتحت اسيل الباب في هذا الوقت فتلخبط باسل وعدل وقفته بسرعه وهو يقول: اهلا اسيل ..
طالعت فيه بعيون بارده فقال: آ آ كنت ابغى ادق عليج عشان اقولج حاجه ..
اسيل بتسليك: اها .. اسمع ابغى اسألك سؤال ..
باسل: وشو ..؟!
ظلت ساكته فتره بعدها قالت: المجرم الهارب من العداله .. انت قلت هالجمله لـ .... لسعد قبل شوي فإيش كنت تقصد ..؟!
باسل: لانه وببساطه مهرب اسلحه ومخدرات وكشفته الشرطه واللحين هم يدوروا عليه ..
طالعت فيه شوي بعدها قفلت الباب ..
تنهد وهو يقول: كويس هالمره عدت على خير مع انه كان واضح انها تسلك ..
طالع في شقة اسيل شوي فسمع صوتها وهي تجلس ورى الباب ..
تنهد وقال بهدوء: الله يصبرها ..
راح لشقته وقفل الباب وراه ..

========================================

في صباح اليوم اللي بعده ..
كانت جالسه على طاولة الفطور تاكل مع امها واخوها ..
تنهدت وقالت: مليت ..
ابتسم اخوها وقال: اصبري .. هو شهر واحد بس بعدها راح تاكلي اللي تبغيه .. اللحين لازم تمشي على كلام الدكتور عشان تستقر الصحه تماما ..
هزت راسها بإيه وقالت: عارفه عارفه بس الاكل ممل .. لا مو قصدي .. هو الحمد لله عالنعمه بس طفشت من نفس الاكل كل يوم وعلى كل وجبه ..
الام: دانا انتي ما تبغين تصيري بخير ..؟!
هزت دانا راسها بإيه فقالت الام: عيل اصبري ..
دانا بيأس: طيب .. عالعموم باجي ثمان وعشرين يوم .. ياللا هانت .. راح القليل وباجي الكثير ..
عادل: هههههههههههههههه صوتج يحزن ..
دانا: اصلا وضعي كله على بعضه يحزن ..
عادل: ههههههههههههههههههههههههههههههههه ..
طالعت دانا في ساعتها وقالت: خلاص انا رايحه اللحين ..
عادل: اللحين صبري اسبوعين وبإذن الله راح اريحج من القلق اللي انتي فيه ..
ابتسمت وهي تقول: بتريحني وبقوه .. امنيتي اشوفك تمشي وبإذن الله راح تمشي ..
عادل: ههههههه دانا خلاص مو لازم هالكلام المؤثر قبل لا تروحين ..
ابتسمت بعدها طلعت من البيت ..
ركبت السياره واتجهت للجامعه ..
اوووه من زمان عنها .. بصراحه حتى هي الثانيه اشتاقت لها ..
وقفت سيارتها في المواقف بعد ما وصلت ونزلت منها ..
دخلت للجامعه واتجهت لمكان الشله ..
لما وصلت لقتهم كلهم موجودين ومن دون استثناء ..
فقالت بإبتسامه: السلام عليكم ..
لفوا كلهم عليها بعدها قاموا وصافحوها وبدأوا يتحمدون لها بالسلامه ..
وسامي جالس يطالع فيهم بعدها قال: ههههههههههههه اشكالكم تحفه وانتم تقومون بوقت واحد .. ياليت كان الكام معي عشان اصوركم ..
جلس يزيد وهو يقول: هههههه اسكت بس ياخي .. لا تقلبها استهزاء ..
سامي: ههههههههههههههههههه ..
جلست دانا بمكان فاضي وقال عماد: ها كيف صحتج اللحين ..؟!
دانا: الحمد لله تمام ..
عماد: صج كنتي خبله .. مريضه وتعبانه ولا تقولين لأحد .. شكلج كنتي تبغين تنتحرين .. غبيه وايد ..
دانا بإحراج: لا لا مو جذي ..
ريان: عماد مره مو وقتك ..
يزيد: ههههههههههه عماد شتحس فيه .. بديتها هواش ..!!
لفت دانا نظرها وطالعت في سامي اللي يضحك وهو يكلم عماد ..
مو راضيه .. مو راضيه تتعالج على حساب واحد ثاني ..
تحسها صدقه او شفقه ..
بس ما تقدر ترجع له الفلوس حتى لو ظلت طول حياتها تشتغل وتجمع فلوس ..
صحيت على صوت ضحكات الشله كلها فطالعت فيهم وقالت: شفيه ..؟!
لف سامي عليها وهو يقول: ههههههههههههه لا يفوتج بس ههههههههههههههههه ..
عماد: ها ها ها بالمره سامجين ومالكم داعي ..
يزيد: هههههههههههههههههه وانا اقول شفيها اخلاقك قافله مع الصبح .. اثاري السالفه هي ان عدنان تهاوش مع لينا وتزاعلوا هههههههههههههههه ..
ريان: هههههههه خلاص يا شباب لا تعذبوه اكثر ماهو معذب هههههههه ..
عماد: جزاك الله خير على المساعده اللي مدري شلون اوصفها .. بس ما ابيها ..
صالح: هههههه طيب وشهو سبب الهواش ..؟!
عماد: ما راح اقولكم ..
ابتسمت دانا وقالت: طيب عادي .. اصلا انتم دايما تتهاوشون ..
عماد: لا هذا الهواش كان كبير ..
يزيد: مدري ليه بس حاس ان السبب تافه ههههههه ..
عماد: لا مو تافه ابدا .. عالعموم انا ما راح اكلمها إلا إذا يت هي بنفسها تعتذر ..
سامي: هههههه وافرض انها ما يت ..
عماد: عيل تصك راسها بالطوفه .. غبيه وهبله وتصرفات اطفال .. نرفزتني ..
ريان: ومن متى انتم متهاوشين ..؟!
عماد: من امس الظهر .. هذه اطول مده نظل فيها متهاوشين ..
يزيد بدهشه: امس ..!!!
صالح بنفس الدهشه: اطول مده ..!!
ريان: يووه وانا عبالي ان لكم بالقليل ثلاث ايام او اكثر .. امس ..!!! لا والمشكله يقول اطول مده ..!! بصراحه انا لا تهاوشت مع احد يكون يوم هو اقصر مده للهواش مو اطول مده ..
سامي: هههههههه اللحين ملعوزنا ومسوي فيها انكم طحتم بهواش صجي ومشكله كبيره وفي النهايه طلعت متضايق لأنها اطول مده تهاوشتوا فيها هي يوم ..
عماد: لا لسى ما كملنا يوم .. الساعه ثنتين و13 دقيقه نخلص يوم ..
يزيد: ههههههههههه بصراحه زاد شكي انه يكون سبب الهواش تافه ..
دانا: عماد .. وشو سبب الهواش ..؟!
عماد: احلموا .. ما راح اقولكم .. وكمان عناد فيها ما راح اعلمها انج رجعتي من السفر .. احسن ..
ابتسمت دانا وهي تقول: ياللا عشاني قول وشو السبب ..
طالع عماد فيها شوي بعدها قال: طيب .. عشان بس خاطر دانا ..
طالعوا كلهم فيه بإنصات يترقبون السبب اللي متأكدين انه تافه ..
طالع فيهم شوي بعدها قال: امس الظهر طلع يدي من المستشفى لأنه كان تعبان .. فكلنا يالعائله رحنا عند عمي الكبير عشان نزور يدي وتقابلنا انا ولينا هناك .. المهم ولد عمي عمره 11 سنه .. طلبنا منه انا ولينا ييب لنا شيء من البقاله .. لما يابه اخذت لينا شيء من حصتي قبل لا ايي .. اخذت الريد بول حقي ولما سألتها عن السبب قالت وببرود بكيفي .. بس حسيت نفسي اشتهيته فأخذته .. عبيطه وقسم .. خصوصا كنت توي متهاوش مع ولد عمتي فهاوشتها .. صرخت هي الثانيه بويهي تقولي جب يالاناني البخيل اللي ما عندك احساس .. تقول دام ان زوجة المستقبل اشتهت شيء واخذته المفروض تقول بالعافيه وتسألها إذا بغت شيء ثاني بعد .. وقسم انها عبيطه .. ترى مو بس هي زوجة المستقبل .. حتى انا زوج المستقبل والمفروض تتعلم شلون تدور على راحتي .. قلت لها تتابع البرنامج اللي على قناة 101 عشان تتعلم حضرتها .. واللي نرفزني اكثر انها قالت البرنامج لأمثالك .. عباطه وهباله ..
طالعوا الشله فيه شوي بعدها انفجروا ضحك عليه ..
فعلا مثل ما توقعوا .. السبب تافه ..
ريد بول ...!!!
ما ودهم يتشمتون صراحه .. بس للأسف غصب عنهم ..
يزيد: هههههههههههههههه وربي كنت حاس ..
سامي: ههههههههههههههه ريد بول ..!! عشان ريد بول هههههههههه ..
ريان: هههههههههههه اهم شيء البرنامج .. دامك تعرفه فأكيد تتابعه هههههههههه ..
عماد بإنزعاج: ايه قالت لي نفس الكلام اللي قلته يا ريان .. شايف كيف ان مستوى الهباله مرتفع عندها .. بزره وتصرفاتها تصرف اطفال ..
صالح: وانت شدراك ان قناة 101 هي نفس القناة اللي عندها هههههه ..
عماد: لا لا قنواتنا زي بعض .. انا وهي رتبناها عشان نصير زي بعض ..
الكل: ههههههههههههههههههههههههههههههههههه ..
عماد بتفكير: يتني فكره .. راح اخرب ترتيب القنوات عشان انرفزها ..
بعدها اطلق ضحكه شريره وهو يتخيل وجهها لأنهم تواعدوا انهم ما يخربوها ..
اصلا هي كانت صاحبة الفكره .. راح تنجن إذا عرفت وش صلح ..
سامي: ههههههههه شكلك يخوف يا عماد ..
عماد بخبث: اخخ متى ارجع البيت متى ..
ريان: هههههههه اخاف تنقلب السالفه عليك ..
عماد بثقه: مستحيل .. انا اعرف لينا عدل .. باجر راح اوافيكم بالاخبار ..
يزيد: اوكي .. ننتظرك ..
سامي بحماس: شباب شباب بقولكم شيء ..
ريان: وشو ..؟!
سامي: ههههههههههه واحنا بألمانيا صار موقف راح يصرعكم ضحك ههههه ..
طالعت دانا فيه بصدمه ..
لا يكون هذا من جد راح ينفذ كلامه ويعلمهم على سالفة المشي بالممر ..
عماد بحماس: وشو هذا الموقف ..؟!
سامي: الدكتور قال لدانا تقوم وتمشي بين فتره وفتره بالممر .. هههههههههه رحنا انا وامها لغرفتها عشان تقوم بس ما رضيت وظلت ساكته ههههههههه عارفين ليش ..؟!
قامت دانا وهي تقول: وقت محاضرتي ياء ..
عماد: هههههآآي دانا تتهرب ..
لفت وجهها وراحت للمحاضره ووجها قالب علبة الوان ..
وقفت في نص الطريق بعدها لفت تطالع في سامي من بعيد وهو يضحك مع اصحابه ..
ظهر الألم في نظراتها ..
تحبه مع انها عارفه ان نهاية حبها هو الفشل ..
متى بس تطلع من الجامعه عشان يختفي من نظرها وتنساه ..
تفكيرها جنوني بس بصراحه هي راضيه فيه حتى لو كان ولد حرام ..
عارفه ان مستقبلها راح يكون صعب إذا تزوجته بس هي راضيه ..
لكن هذا مستحيل يحصل ..
مستحيل دامه هو بنفسه ما يبغى ..
فعشان كذا تبغى تطلع لأنها صارت متعلقه فيه اكثر واكثر ..
تبغى تنساه .. مع انها متأكده ان نسيانه شيء مستحيل ..
بالمره مستحيل ..
لفت وجهها وكملت مشيها ناحية الكلاس ..