شبكة همس الشوق - عرض مشاركة واحدة

26 - 3 - 2014, 07:51 PM

في نهاية الدوام ..
طلع طارق وانس وفهد من الكلاس ..
فهد وهو يتثاوب: ياني نوم فضيع ..
انس: هههههههه عشان تبطل سهر بالليل ..
فهد: هههههه ياخي مانيب بزر انام بدري ..
انس: بس للسهر حدود .. تسهر لوقت مره متأخر ووراج جامعه ..؟! انت من فين ييت ..؟!
فهد: ههههههههههههههههه ..
صك كتفه بكتف وحده مرت ..
لف وقال بسرعه: اووه سوري ما انتبهت ..
لف عليه ذيك البنت اللي ما كانت غير لين ..
لين: وشو ..؟! سوري ..؟! انت شنو جنسيتك ..؟! ما تعرف تقول اسف اختي ما كنت اقصد ..
ميل فمه وهو يقول: هذه انتي ..!
لين بإستهزاء: لا الطوفه ..
مد يده بلا مبالاه وكمل مشي وهو يقول: ياشيخه تقلعي ..
عصبت لين ولفته لناحيتها وهي تقول: هيه هيه انت وين رايح ..؟! شهالاسلوب الزفت اللي تحاجني فيه .. اعتدل لأعدلك ..
ندى: لين بطلي عبط .. امشي ..
لين: لا مو ماشيه لين يعدل اسلوبه وهو يتحجى وياي ..
فهد: وشو ..؟! ما سمعت .. اعدل ايش ..؟! اسلوبي ..!!! يا ماما شوفي نفسج اولا .. اقول طيري بس ..
لين بعصبيه: عساك بهلكوبتر تشلع راسك شلع .. شنو هذه طيري ..؟! انت تستحقرني لأني بنت صح ..؟! بس ما حزرت لأني مو اي بنت ..
وسن: وناسه .. شنوعج عيل ..؟!
انصدمت لين ولفت تطالع في وسن ..
فهد: ههههههههآآي لا يمكن .. ياللا ردي عليها ..
لين بحده: وسن ترى مو وقتج ابد ..
وسن: اسمي كارلوتا يا غبيه ..
لين: آخخخ منج ..
ابتسمت ندى بعدها قالت: خلاص امشي يا لين .. راح نتأخر عن ليان وسارا ..
زمت لين شفتها بقهر بعدها قالت: لي حساب ثاني وياك وراح تشوف ..
وراحت فقال فهد: صج انها وحده مينونه ..
مشي طارق وهو يقول: اثنينكم ميانين ..
مشي معاه انس وفهد وقال فهد: هيه طارق انا شدخلني ..؟!
طارق: شوف لتصرفاتك واحكم ..
فهد بإنزعاج: هي اللي بدأت .. انا اعتذرت بس مخها ترى مو طبيعي .. ابدا ..
انس: هههههههههههه عيل انت اللي مخك طبيعي ..
فهد: ما بأرد عليك تعرف ليه ..؟! لانك اخر واحد ممكن يتكلم عن المخ ..
اعتفس وجه انس لما عرف ان فهد يقصد علاقته مع راكان ..
فهد: هههههههههههه المهم استأذن .. عندي شغله مع الدكتور مسفر باسويها قبل لا اروح ..
طارق: مع السلامه ..
راح فهم وهم اتجهوا لبوابة الجامعه فلاحظ مهند جاي لجهته ..
وقف في مكانه وهو يطالع فيه ..
تقدم مهند ووقف قدام طارق وطالع فيه شوي بعدها ابتسم وقال: سمعت انك دافعت عن البنت اللي انتشرت عنها الاشاعه بالكلاس .. لهالدرجه تحبها ..؟!
ظل طارق ساكت لفتره بعدها قال: طبعا ..
رفع مهند حاجبه وهو يقول: انسان غريب ..
طارق: بس مو اغرب منك ..
مهند: كيف دراستك ..؟!
طارق: تمام .. ايش اخبار رزون ..؟!
مهند: بخير ومشتاقه لك .. ليه ما عاد صرت تزورها ..؟!
طالع طارق فيه لفتره بعدها قال: ان شاء الله في اقرب فرصه ..
مهند: ان شاء الله .. باي ..
فراح مهند وطارق يتابعه بنظراته ..
انس: هذا مهند ..؟!
طارق بهدوء: هذا اول لقاء بيننا من وقت كلامه لي بالمستشفى .. ما توقعت انه راح يبدأ يتكلم معاي عادي ..
انس: مستحيل يكون تاب .. ياخي ماني مرتاح له ..
كملوا مشي وطارق يقول: عيل مع نفسك ..
لفوا عاليمين فواجهوا بوجههم سامي وريان اللي كانوا راح يمروا بنفس الطريق ..
طالعوا طارق وسامي في بعض بنظرات حاده ..
كل واحد فيهم يكره الثاني ..
ثواني مرت بعدها مشيوا وابتعدوا عن بعض ..
انس: شفيك تناظره جذي ..؟!
طارق: اكرهه .. من وقت ما جذب علي وقال انه يحب اسيل وهي تحبه .. مو قادر استسيغ هالانسان ..
انس: الله يعينك على نفسك ..
ومن جهه ثانيه لف ريان على سامي وقال: ياخي شفيك تناظر الريال جذي ..؟!
سامي: اكرهه .. من وقت ما تضاربت معه وبعدها ساعدني من محسنوه الجلب .. حسيت نفسي مدين له .. ياخي مو قادر اهظم هالانسان ..
ريان: صج غريب .. عالعموم اشوفك باجر اوكي .. مع السلامه ..
سامي: باي ..
افترقوا وكل واحد راح لجهة سيارته ..
وقف سامي قدام باب سيارته وطلع المفتاح عشان يفتح السياره ..
تقدم واحد من وراه وبطريقه حاده مسك كتف سامي ولفه على ناحيته ..
ثبته عالجدار وهو ماسك رقبته وقال بحده: Welcome dear dirty << اهلا وسهلا عزيزي القذر << ..
فتح سامي عيونه على اخرها من الصدمه ..
لأن اللي قدامه هو رعبه الحقيقي ..
السيد جاك ..
مسك إيد جاك وحاول يبعدها عن رقبته فقال جاك بتهديد: Are you trying to escape .. you can not, rest assured .. I will not do anything to you now .. but I have come to tell you that you are dead inevitably .. wait for me .. I'll kill you and will kill your father after you and you will see .. << اتحاول الهرب يا هذا .. لن تستطيع .. اطمئن فأنا لن افعل لك شيئا الآن ولكنني اتيت لأخبرك بأنك ميت لا محاله .. فأنتظرني .. سأقتلك وسأقتل اباك من بعدك وسترى << ..
فك سامي وابتعد عن المكان ..
جلس سامي عالارض واسند ظهره عالجدار ياخذ له نفس عميق ..
حط ايده على صدره بعدها عض على شفته وهو يحس بدقات قلبه القويه ..
مسك بلوزته بقوه .. كافي ..
كـــــافي ..
متى ينتهي من العذاب هذا ..؟!
رفع نظره وطالع في المكان اللي اختفى منه جاك ..
مو عارف وش قال .. كان يضن انه راح يقتله اللحين بس دامه راح فهذا يعني انه جاء يهدد ..
اخذ نفس عميق والألم يعتصر قلبه من جوه ..
متى ينتهى من الخوف هذا اللي يلاحقه من طفولته ..؟!
متى يتخلص منه ..؟!
متى ..؟!

========================================

خرج فارس من بوابة الجامعه وهو شايل شنطته وتفكيره في كلام الاستاذ قبل شوي ..
فعلا مستواه نزل بشكل ملحوظ ..
اصلا بالنسبه له هذا المستوى شيء حلو لأنه ما كان يذاكر اصلا ..
الضروف اللي هو فيها ما تخليه يقدر يمسك كتاب اصلا ..
عالعموم الوضع اللحين يمكن صار اهون ..
امس جاء عمه عبد الغني وعائلته .. بيقعدون عنده لحد ما تصلح امه العمليه وتنجح ان شاء الله ..
تنهد ولف بيروح لجهة السياره بس وقف لما لاحظ لبنى واقفه وتطالع في الطلاب بسرحان ..
هالايام إذا شافها تكون دايما سرحانه ..
لا يكون زوجة ابوها القاسيه هي السبب ..
جاء عندها وقال: قوه لبنى ..
صحيت من سرحانها ولما شافته قالت بإبتسامه: اهلين .. شو اخبارك ..؟!
فارس: الحمد لله تمام .. اخبارج انتي ..؟!
لبنى: منيحه .. اممم اسيل بتعرف شي عنها ..؟!
فارس بإبتسامه: ايه زارتنا قبل فتره .. الحمد لله هي تمام وتعيش عند خالها الصجي ..
فرحت لبنى لهالكلام وقالت: الحمد لله .. ان شاء الله بتعيش حياة تعوضها عن كل اللي عانته من طلوعها من البيت ..
فارس: ان شاء الله .. شفيج سرحانه ..؟!
لبنى بهدوء: كنت افكر بإشيا كتيره ..
فارس: مثل وشو ..؟!
شوي كمل بسرعه: معليش مو قصدي اتطفل او ...
قاطعته تقول: لا عادي .. اممم بأفكر بإمي ..
فارس: ان شاء الله تلاقينها بيوم من الايام ..
ابتسمت وقالت: اتصلت عليها ..
اندهش فارس من كلامها وقال: صج ..؟!!
هزت راسها بإيه وهي تقول: سمعت صوتها .. كان صوت ناعم .. ما كان بدي تنتهي هالمكالمه بس انتهت .. بدي اشوفها لكن هي ما بدها ومو عارفه شو هو السبب .. بأحبها ونفسي نعيش مع بعض كل حياتنا .. بس ما ادري ليه هي بترفض .. مو عارفه السبب .. و مو عارفه اصلا ليش بيي لساته محتفض برقمها عنده بموبايله ..
طالع فارس فيها فتره طويله بعدها قال: تبغي الحل ..؟!
طالعت فيه وقالت: الحل ..!! عندك حل ..؟!
هز راسه بإيه وقال: اسمعي .. انتي لازم تتجرئي شوي .. بيوم وزوجة ابوج مو مويوده ادخلي على ابوج الغرفه ولوحدكم .. ايلسي معاه وصارحيه بكل شيء .. تسأليه عن سبب طلاق امج منه .. قولي له انج تبغي تسافري تعيشي معها .. انا متأكد ان ابوج راح ياخذ ويعطي معاج في الكلام لأنج مهما كان انتي بنته .. استغلي اقرب فرصه تكون زوجة ابوج مب مويوده لأنها وللأسف واضح ان كلمتها تمشي على كلام ابوج .. صلحي جذي وإلا ما توصلين لشيء راح يريحج ..
طالعت فيه فتره بعدها ابتسمت وقالت: بتشكرك كتييير يا فارس .. انت طلعتني من دائرة يأس كانت بتيتمر معي للآخر ..
ابتسم لها بعدها قال: عذرا عالتطفل بس عندي سؤال ..
لبنى: شو هو ..؟!
فارس: انتي قلتي انج من طفولتج ما شفتي امج .. عيل من طفولتج وانتي عايشه هني فكيف صايره تتحجي فلسطيني ..؟!
ابتسمت وهي تقول: إياد من قبلك سألني هالسؤال ..
فارس بإستغراب: إياد ..!!!
لبنى: صاحب خيي .. امم السبب يرجع لأني صحيح كنت اعيش هون بقطر بس اللي اعتنت فيي وانا صغيره هي جارتنا اللي بيتها جنب بيتنا .. كانت تزور مرة بيي وشافتها كيف بتعاملني بقسوه مع اني طفله وهي المسكينه ما كتب إلها الله انها تحمل فطلبت من مرة بيي انها تربيني فوافقت بسرعه لأنو كان بدها الخلاص مني .. هي كانت فلسطينيه وكانت دايم بتكلمني عن فلسطين وارضها .. عن المناطق اللي فيها .. كنت بنبسط لما اسمع هاد الكلام عن وطني اللي ولدت فيه .. ربتني لأكتر من 13 سنه بعدها سافرت هي وزوجها لبرى فتركتني .. ومع هذا كانت تجي في السنه مرتين لتزورني .. بحبها كتير لأنها هي من ربتني وحكتني عن وطني اللي ما قدرت اشوفو ولا مره بحياتي ..
فارس: هالانسانه عظيمه ..
هزت راسها وهي تقول: ايه .. كتييير ..
انتبهت للسياره وقالت: ياللا انا بأستاذن .. خيي بدر جاء ..
فارس: فأمان الله ولا تنسي اللي قلت لج عليه ..
لبنى: اكيد ما راح انساه لو شو ما صار ..
وبعدها راحت للسياره وفارس يطالع فيها بإبتسامه ..
لبنى انسانه غير بصراحه ..
ان شاء الله تجتمع بأمها في يوم من الايام ..
ويكون هذا اليوم قريب ..
تنهد بعدها اتجه لسيارته ..

========================================

الظهر عالساعه 2 ونص تماما ..
كان واقف قدم المغسله التابعه لغرفته في هالمستشفى ويطالع في معجون الاسنان ..
ضغط المعجون شوي فطلع سائل ابيض مخطط باحمر ..
قفل المعجون بعدها هزه بقوه وبعدين فتحه وضغط وبرضوا طلع سائل ابيض مخطط بأحمر ..
ليـــــــش ..؟!
هذا عباره عن تجويف .. مافيه آله من داخل فكيف يطلع المعجون وهو مرتب بالخطوط الحمراء ..؟!
سؤال يتبادر الى ذهن بطلنا إياد ..
لازم ياخذ له سكين ويقطعها عشان يكتشف شكلها من داخل ..
بس للأسف مافي في الغرفه سكين .. صاروا كأنهم مرضى نفسيين خايفين انهم ينتحروا ..
لحضه .. اصلا على اي اساس لازم يحطوا سكين ..؟!
تنهد وبعدها اخذ الفرشاه وفرش اسنانه وهو حاط بباله إذا رجع البيت يكتشف ما بداخل المعجون ..
إذا رجع البيت .....
تنهد وبعد ما خلص رجع لسريره ..
"ابوك مجرم"
غمض عيونه وهو يحاول ينسى ..
دق باب الغرفه فقال إياد: ادخل يا بدر .. من متى نزل الادب عليك ..؟!
انفتح الباب ودخل شاب ومعاه باقة ورد ..
ابتسم وقال: اخبارك إياد ..؟!
جلس إياد وطالع فيه بإستغراب وقال: الحمد لله .. بس منو انت ..؟!
حط الورد على الطاوله وقال: طبيعي ما تعرفني لأنه اخر مره شفنا بعض كنت انت بالصف السادس الابتدائي .. عمرك 12 ..
إياد بإستغراب: ياخي احس شكلك مو غريب بس ما اتذكرك مع اني نادرا انسى ..
ابتسم الشاب وهو يقول: انا بسام .. اخو مرة ابوك الاولى ..
إياد: انت خال سجى ..؟!
بسام: هههههه ايه خالها ..
عقد إياد حاجبه فتره بعدها قال: إيييه تذكرتك .. انت اللي ييت من زمان وتهاوشت مع ابوي ..
هز بسام راسه وهو يقول: ما شاء الله .. ذاكرتك حديد ..
إياد: إيه ادري ههههههههههههههه ..
جلس بسام على كرسي وقال: ها كيف صحتك اللحين ..؟!
إياد: تمام وراح اطلع بعد يومين .. بس مستغرب انك ياي تزورني ..
سكت لفتره بعدها كمل: لما شفتك قبل خمس سنوات تتناقش مع ابوي بحده كنت اضن انك شخص سيء ولحد الآن وانا اضن هذا الضن فعشان جذي مستغرب من ييتك لأني ما توقعت انه بيوم من الايام راح اقابلك ..
بسام: المشكله اللي بيني وبين ابوك كان بسبب طلاق اختي مع انها من زمان تطلقت .. عالعموم اللي راح راح .. وانا هههههه مو شخص سيء ..
إياد: ههههههههه اوكي اوكي .. المهم ترى عندي احساس قوي يقول انه لك سبب اساسي لزيارتي غير الاطمئنان علي ..
ابتسم بسام وهو يقول: ما شاء الله عليك ..
تنهد وكمل: ايه فيه سبب ثاني ومتردد اني افتحه معك او لا ..
إياد: وشو ..؟!
تكلم بسام بعد فترة سكوت وقال: انتشر في كل الجرايد تقريبا خبر عن جرائم سعد الراهي .. اللي هو ابوك ..
إياد بهدوء: اها .. هذا هو الموضوع ..
بسام: انا عارف ان اللي صار اكيد اثر فيك .. بس اسمع المجرم راح يظل مجرم ولازم يتعاقب .. وانا ييت عشان اقولك ان اللي فضح ابوك وطلع جرائمه هو انا ..
طالع إياد فيه بدهشه وهو يقول: انت ..!!
هز بسام راسه وهو يقول: ايوه ..
احتدت نظرات إياد وهو يقول: طيب ليه ..؟!
بسام: اعذرني بس هذا اللي لازم يصير .. انا مستحيل اسمح له يأذي الناس اكثر من .....
قاطعه إياد وهو يقول بإنفعال: فيه طرق كثيييره غير انك تبلغ عنه .. تقدر تواجهه وتعلمه على غلطه .. كان ممكن انه يتراجع عن اللي كان يسويه .. كل انسان يغلط .. ليه ما تصحح غلطه بدل من انك تبلغ عنه ..؟! اصلا كان واضح من البدايه انك تكرهه وتتمنى انه ينسجن .. طيب خلاص انا شنو دخلني عشان اعيش وابوي مسجون ..؟! انت ما تدري ان ابوي هو عيلتي كلها ..؟!
بسام: كنت متوقع انك راح تنفعل .. بس اعذرني على الكلام اللي بأقوله .. ابوك كان واضح انه ماكو امل انه يحس .. قبل فتره واجهته وقلت له ان بنته عايشه فما اهتم .. صارحته بأني اعرف كل عمايله .. بدل ما انه يحس ان نهايته قربت ويترك اللي يشتغله لا .. قام اكثر من مره انه يمنعني اروح ابلغ عنه .. هذا اللي انت تشوفه بويهي كان بسببه .. شلون واحد يهرب مخدرات لأبناء بلده ويدمنون عليها انه يتوب ..؟!! شلون واحد يهرب اسلحه ويصدرها لاعداء سوريا وفلسطين انه يتوب ..؟!! انسان خان بلده وخان وطنه واخوانه المسلمين مستحيل انه يتوب اذا كلمته بالهدوء او نصحته .. المسأله واضحه وما يحتاي اننا نييها باللين ..
طالع إياد فيه بصدمه ..
إيه عارف ..
عارف ان ابوه مجرم ..
بس ما كان عارف ان جرايمه من هذا النوع ..
هو من اول كان عارف انه مجرم من وقت ما علمه عن سالفة اخته ..
اثر هالشيء فيه ومع هذا ما قدر يكرهه ..
بس مو لدرجة ان جرايمه توصل لهذا الحد ..!!!
لا مو لهذا الحد ..!!
نزل راسه وقال بهمس: ليه ..؟!
سكت شوي بعدها كمل: ليه تعلمني ..؟! انا ما ابغى اكرهه فليش تصارحني بتفاصيل اعماله ..؟!
رفع لعيونه وطالع في بسام وكمل: انا ولده .. المفروض تراعي هالشيء .. اي قلب تملكه حتى تقول لولد عن تفاصيل جرائم ابوه ..؟!
اندهش بسام من كلامه ..
صح .. هو ما انتبه لهذا الشيء ..
انفعل من كلام إياد وقال اللي قاله بدون وعي ..
كلامه صح ..
هذا الانسان ابوه ..
الكلام اللي قاله قبل شوي كان قاسي ..
ما راعى شعوره ..
طالع في إياد وقال: إياد معليش .. صدقني انه ما كان قصدي ..
انسدح إياد عالمخده وحط ايده على عيونه ..
تنهد بسام وهو حاس بالذنب ..
تسرع بدون تفكير ..
بسام: إياد ..
إياد بهدوء: خلاص انتهى الامر .. اصلا جذي ولا جذي كنت راح اعرف .. ابغى ارتاح ..
بسام: اوكي انا طالع .. راح ازورك مره ثانيه ..
قام وطلع برى الغرفه ..

========================================