شبكة همس الشوق - عرض مشاركة واحدة

26 - 3 - 2014, 07:54 PM

في صباح اليوم اللي بعده ..
وفي مواقف الجامعه ..
كانت جالسه بسيارتها وسانده راسها عالدركسون ..
تحس نفسها بأي لحضه راح تبكي ..
العبره بالمره خانقتها ..
احد اهانها ..؟!!
احد هددها ..؟!!
مات واحد من اقربائها ..؟!!
شافت موقف مؤلم ..؟!!
لا .. ولا واحد من الاسباب اللي راحت هو سبب ألمها ورغبتها بالبكاء ..
لأنه هذي هي المره الاولى اللي تحس فيه بهذا الاحساس ..
احساس خانق .. مؤلم ..
صدرها بالمره يعورها ..
فيه شيء راح يصير اليوم ..
من وقت ما صحيت الصباح وهي حاسه بألم بجوات صدرها ..
طيب ليه ..؟!
من طفولتها والحاسه السادسه ذي معها ..
صارت كل ما حست انه فيه مصيبه بتصير ما تقدر تتمالك نفسها ..
اصلا بالقوه وصلت للجامعه بسبب ارتجاف إيدها بالسواقه ..
قد حست باحاسيس مماثله ..
مره قبل لا تصير حكاية انتشار الغاز ..
بس لحضه .. هالمره الاحساس اقوى ..
اقوى احساس تحسه بحياتها ..
خذا يعني انه ما راح تصير مصيبه ..
لا .. بتصير كتلة مصايب ..
نزلت دموعها على خدها ..
خايفه .. احساس يسبب الخوف ..
ما تبغى الشيء اللي بيصير انه يصير ..
ما تبغى ..
ظلت في مكانه لفتره طويله من الوقت ..
بعدها اخذت نفس عميق ونزلت من السياره ودخلت للجامعه ..
اتجهت لمكان الشله فشافت عماد وصالح توهم قايمين بيروحون لمحاضراتهم ..
لما شافها عماد قال: اووه دنو .. توقعناج غايبه .. يايه متأخر اليوم ..
دانا: لانه .. صحيت متأخر ..
صالح: عيل اسمحي لنا بنروح لمحاضرتنا .. سامي والبقيه راحوا لمحاضرتهم ..
دانا: اها .. خلاص اصلا شوي وتبدأ محاضرتي ..
عماد: عيل مع السلامه ..
وراحوا ودانا تطالع في ساعتها .. باقي لها نص ساعه .. مره كثييير ..
تنهدت واتجهت لكلاسها .. كالعاده راح تنتظر في الكلاس ..

في مكان اخر ..
وفي كلاس سامي ويزيد وريان ..
كان عندهم محاضرة انجليش ..
سامي بهمس لريان: ريان ابغى اروح انتحر ..
ريان: روح محد ماسكك ..
سامي: هههههه لا لا ما ابغى .. اعرف انه ما تقدروا تعيشوا من دوني ..
ريان: يا واثق .. المهم شفيك الصباح ييت وانت متضايق ..؟!
اعتفس وجه سامي وقال: ما عليك .. ماكو شيء مهم .. بس ترى كانوا مانعيني اروح الجامعه بس رحت غصب عنهم ..
شوي ابتسم وهو يقول: تسللت وهربت ههههههه بالله شرايك ..؟!
هز ريان راسه بيأس فكمل سامي: بس هروبي انكشف .. ابوي هاوشني بس بعدين سمح لي اروح للجامعه .. مدري شفيه اليوم عشان يمنعني .. المهم ريان ترى جد جد ابغى انتحر .. اكره هالمحاضره ..
الدكتور: سامي ..
لف سامي عليه فكمل الدكتور: ممكن تترك سواليفك وتطالع فيني ..
سامي: طيب ..
حرك الدكتور الاوراق اللي بإيده وقال: الاسبوع اللي راح طلبت منكم بحث بخصوص موضوع صحة الاطفال ولكن باللغه الانجليزيه .. وقلت ابغاكم انتم تألفوه ومافي مشكله لو استعنتم بالنت شوي ..
طالع في سامي وقال: سامي من فين يبت بحثك ..؟!
تورط سامي وقال: آ آ ليش تسأل ..؟!
ابتسم الدكتور وهو يقول: ايش اخبار منتدى بحور المعلومات ..؟!!
سامي: ها ..!!
طالع الدكتور في القاعه وهو يقول: تخيلوا انه ياب البحث كاملا من المنتدى لدرجة انه نسخ اسم المنتدى واخر المواضيع اللي فيه ..
انفجر الكلاس ضحك وسامي حس بكمية غباء مو طبيعيه ..
طيب هو شدراه .. كان الموضوع كله مكتوب بالانجليزي فنسخه كله ..
يزيد: هههههههههههههههههه سامي لا يمكن هههههه ..
ريان: هههههههه روح لقط ويهك ياخي هههههه ..
الدكتور: سامي ممكن اعرف ليش عملت جذي ..؟!
سامي: لأني ما اعرف انجليزي ..
الدكتور: وش ذي الاجابه السريعه الغبيه ..؟! ما تعرف انجليزي ..!!! عيل ليه ما اخذت لك مدرس خصوصي ..؟! اصلا انت شلون نجحت ووصلت للمستوى السادس وانت ما تعرف انجليزي ..؟!
هز سامي كتفه وهو يقول: خلاص استاذ طوف طوف واعطني درجة البحث كامله ..
رفع الدكتور حاجبه وقال: ما ودك تطلع برى الكلاس تكمل عبطك ..
هز سامي راسه بلا وهو يقول: والله ما ودي ..
الدكتور: سامي .. اطلع برى عشان المره اليايه تتعلم شلون تحترم الماده وتعاملها باهتمام مو بإهمال .. والمره اليايه تعلم شلون تحترم المحاضره .. ياللا اطلع ..
تنهد سامي وقال: طيب ..
اخذ شنطته وطلع من المحاضره ..
اسند ظهره عالباب وقال: طردني .. والله أليمه .. بس ياخي احسن .. خلوني شوي افتك من لغة الغجر ذي ..
طالعت فيه وقالت بإستغراب: سامي ..
لف سامي فشاف دانا شايله شنطتها وتطالع فيه ..
كانت توها متجهه لكلاسها بس استغربت لما شافته طلع من نص المحاضره وهو شايل شنطته ..
شوي حطت إيدها على فمها وهي تقول: هههه لا تقولي انك انطردت ..؟!
اعتفس وجهه وهو يقول: ايه تشمتي .. بس احسن .. انا اصلا ما ابي ايلس اكثر .. ماده تلوع الجبد .. المهم انتي وين رايحه ..؟!
دانا: للكلاس .. محاضرتي بتبدأ بعد نص ساعه ..
سامي: عيل تعالي امشي معي لحد ما يي وقت محاضرتج ووقتها بأشوف لي اي بنت وامشي معها ..
ظهرت الضيقه على وجهها وقالت: اوكي ياللا ..

========================================

وعند بوابة الجامعه ..
كانوا توهم طارق وانس داخلين بوقت مره متأخر ..
انس: خلاص انتهى الامر .. فاتتنا اول محاضره وكله بسببك ..
طارق: اللحين انت ياي تحط المشكله براسي .. شنو اسوي إذا كنت اثول ما تصحى على صوت المنبه .. انت السبب في تأخرنا ..
انس: ياخي انا دايم اصحى بس مو انت بالليل اللي مخليني غصب اسهر معك فعشان جذي ما صحيت .. الا تعال انت ليش اصلا ما تحط موبايلك على منبه .. ليش انا دايم ..؟!
طارق: لأني مابي ..
انس: لا يا شيخ .. احلف ..
طارق: خلاص خلونا نترك هذا الموضوع .. انس اسمع .. انا اليوم بروح لشقة اسيل ..
انس: شقة اسيل ..!! وانت اصلا شدارك وينها هالشقه ..؟!
طارق: صج اثول .. مو قلت لك من قبل ان رفيجي القديم صاري قابلته وعرفت انه يعرف اسيل وسألته وقتها عن الشقه فقالي .. حتى لما رحت لها اول مره كانت بالحديقه .. المهم انا راح اروح .. انتهيت من سالفة مهند وشهد واخوانها .. ما باجي لي غير اسيل ..
انس: اها .. تذكرت ..
جاهم فهد وهو يقول: انتم ييتم .. توقعتكم راح تغيبوا ..
طارق: هههههه انه السبب هو ....
وقف كلامه شوي وهو يطالع ورى فهد ..
انس: شفيك ..؟!
عقد طارق حواجبه وهو يفكر بالشيء اللي ما خلاه امس يرتاح من كثر ما فكر فيه ..
اعطى شنطته لانس وقال: انا عندي شغله خلها معك ..
وبعدها بعد عنهم ..
انس: شفيه ..؟!
فهد: مدري عنه ..
انس: طيب امش امش قولي شنو صار بالمحاضره ..
فهد: اوكي ..

وفي مكان مو بعيد عنهم ..
كانت اروى مسنده ظهرها عالجدار وهي تطالع بالارض ..
عضت على شفتها ونظرة الألم واضحه على وجهها ..
ما تقدر .. ابدا ..
رفعت راسها وطالعت في الطلاب ..
اعتدلت في وقفتها وقررت تروح لسامي ..

انتهــــEndــــى

لهنا نوقف وننهي البارت الحادي والعشرون الجزء الثالث ..
اتمنى تكونوا استمتعتم فيه واعجبكم ..
البارت الجاي بيكون بعد بكره .. يوم الجمعه في مثل هذا الوقت ..

مقتطفات من البارت الجاي ..

// سكتت لفتره بعدها قالت: وبعدين سمعتهم يقولون ان الاهتمام الزائد بشخص يسمونه ..... امممم يقولون ان اسمه ...... اسمه امممم ... حب ..!
اندهش لفتره بعدها ابتسم وحط إيده على شعرها ..
رفعت راسها تطالع فيه فقال بإبتسامه: خلاص فهمتج .. //

// اول ما خلصت الدكتوره محاضرتها ما انتظرتها حتى تطلع ..
على طول طلعت قبلها واتجهت لمكان الشله ..
خايفه على سامي .. فيه شيء راح يصير لسامي ولازم توقفه مهما كان .. //

// حطت إيدها على صدرها وهي تقول: قلبي يعورني .. ساعدني .. انت وعدتني .. //

|$[ نهاية البارت ]$|