شبكة همس الشوق - عرض مشاركة واحدة

28 - 3 - 2014, 06:24 AM

في المستشفى....
كان أول من شافني هوا الدكتور عمر....
قلي وهوا مبتسم: صباح الخير!!...
جاوبته : صباح النور...كيفك...دكتور عمر!!
د. عمر: الحمد لله تمااام....بس مومروق مثلك!!
ابتسمت أكثر وسألته: باين إني مروق!!
د.عمر: إيش إلي باين!!... عيونك جالسة تنط من مكانها...ما شاء الله
جاوبته وأنا لسى مبتسم: عادي ...هذا انا كل يوم!!
د.عمر:أبدا!!...اليوم غير!!...
ضربته على كتفه بخفة وأنا امشي: غير غير!!... يلا أشوفك خلال اليوم إن شاء الله...
ودخلت مكتبي....وانخرطت في جو الشغل....ومازال مزاجي رايق...
..........................................

هالة..........
: خلاص وأنا كمان بجي معاكم!!...
أشرتلي ثريا: لا تتعبي نفسك!!...إحنا بنروح البيت عشان ننظفه!!...إيش لك في التعب!!
قتلها: قولي إنك ماتبغيني أجي معاكم وريحي عمرك!!
سراب: أنا ما ابغكي تجي!!...إيش عندك!!
جاوبتها:الحين إنتي إيش دخلك!!...
سراب: الباب!!
ضحكت بتريقة: ويك ويك ويك!!...بايخة زيك!!
سراب: مو أبيخ من وجهك!!
سويت نفسي ما اسمعلها والتفت على ثريا: تونة حبيبتي!!...متى بتروحي بيتكم!!
أشرتلي ثريا: بكرة إن شاء الله حاتم حيوديني!!
كل شعرة في جسمي وقفت لما قالت اسمه!!....واستدركت نفسي بسرعة لا أنكشف قدامهم...وقلت لثريا: أجل خلاص !!...بكرة بروح معاكم....وخلي إلي مو عاجبه يموت قهر!!....
سراب: ياربي لصقة أصلي!!
طلعت لها لساني وقمت أكلم عمي وغازي عشان أستأذن منهم...
وأنا حاسة نفسي جالسة أطير !!...مدري من سرعتي ولا من فرحتي!!
حاتم هوا إلي راح يودينا !!...يا الله فرحتي ما تتوصف!!...سبحان الله...مدري كيف حبه سكن قلبي من دون أي مقدمات!!.... لقيت مشاعر العطف والإحترام إلي كنت أحس فيها كل ما حكتلي سراب عن مواقفه مع ثريا....وعن كل إلي عاناه من غادة تتحول لحب!!.... حبيته من دون حتى ما أعرف ملامحه كويس!!... ما شفته غير ثلاث أو أربع مرات وكلها ما تتعدى دقايق...كنت اعتقد إنه حب عابر!!... أو وهم !!....
لكن في يوم سراب دقت عليا ونقلتلي خبر زلزلني!!...يومها عرفت إن المشاعر إلي أحس فيها تجاه حاتم مشاعر حقيقية....حقيقية مية في المية...
كان صوتها حزين وباين عليها إنها كانت تبكي....
سألتها بقلق: سراب !!... إيش فيك!!
سراب: إلحقيني يا هالة!!....مصيبة!!... ماتصدقي إيش إلي حصل لي!!
سالتها بخوف: إيش في!!
سراب وهي تبكي: عمي خطبني لحاتم ولده!!...
حسيت الأرض دارت فيا... المصيبة إلي تقول عليها سراب جات على راسي أنا!!...حاتم خطبها!!... ماني مصدقة!!....
رجولي ما قدرت تحملني والأرض قامت تلف فيا!!...عرفت في لحظتها إني أعشقه!!... أحبه!!...وإن إلي أنا فيه مو وهم...
جلست على الكنب مصدومة ومجروحة!!...نزلت دموعي بسكون هادر!!...عصف بكياني!!....
جاني صوتها وكان مخنوق من كثر البكا: إنصدمت لما أبويا نقلي الخبر!!
جيت برد عليها لكن الكلام مارضي يطلع!!... طلعت بدل كذا شهقة لكني قدرت أكتمها قبل ما تفضحني...شديت على شفايفي بقوة ...وبشق الأنفس طلعت الكلمة مني: ليه!!
سراب: لاني عمري ما فكرت بحاتم غير أخ!!... عمري ما شفته غير زي هارون ورحيم ويحيى!! ...
حسيت إني أنجرحت أكثر!!....إنتي ما تحبيه وهوا يبغاكي!!... وإلي تبغاه ما يدري عنها!!... حتى أصلا ما يعرف بوجود وحدة على هذه الدنيا إسمها هالة!!....
رجعت كملت: حتى هوا!!... عمره ما فرق في المعاملة بيني وبين ثريا!!... حتى لما تغطيت عنه ما أختلفت المعاملة... ما زال يعاملني زي ثريا!!...
يعني حاتم ما يحبها!!....طيب وليه خطبها!!....أمكن هو يحبها لكن هيا مو عارفة حقيقة مشاعره!!
قتلها: سراب فهميني زي الناس!!... إذا يشوفك زي أخته ليه خطبك!!
سراب بعصبية: مو هو إلي خطبني!!... عمي هوا إلي خطبني!!....
حسيت بروحي أرتدت!!...سألتها: طيب فين المشكلة!!...إرفضيه!!...
حسيت إني أنانية لما قتلها أرفضيه!!...المفروض أقلها تتأنا وتفكر وتستخير...وتشوف إذا كان مناسب أو لا!!...مو كذا مرة وحده ترفضه!!ا
جاني ردها: وهذا هو إلي حصل...وبابا بلغ عمي!!
ابتسمت بفرحة...لكني رجعت خجلت من نفسي!!...حسيت نفسي لئيمة!!
سراب: هالة إنتي معي!!
جاوبتها بسرعة:معاكي معاكي!!...طيب ليه الحين جالسة تبكي!!
سراب: هالة أنا خايفة إن علاقة عمي وأبويا تخرب من تحت راسي!!... إنتي ما تعرفي عمي!!....
تنفست براحة وقتلها:الله يهديكي!!...الكلام إلي جالسة تقوليه ذا مايجي غير في عقل البزران إلي زيك!!....يا بنتي أبوكي وعمك ناس فاهمين وعاقلين بما فيه الكفاية!!....وعمك عارف إن هذا قسمة ونصيب !!... والله مو كاتب تصيري من نصيبه!!....ولنفرض إن عمك زعل!!... بيزعل كم!!... يوم !!...أسبوع!!... وإنكثرت حدها شهر!!....مستحيل الأخوان يقدرو يقاطعو بعض !!...مستحيل!!
سراب بقلق: يعني تتوقعي إنه ما بيزعل!!
قلت بإنكار: لسى تسألي!!... أشهد أن لا إله إلا الله!!
سراب: بالراحة عليا!!... أنا أسأل لاني خايفة!!... ما تحسي بالي بقلبي!!
جاوبتها: هدي بالك!!... ما حصل غير الخير!!....بعدين ولا تخلي نفسك مهمة ..عشان عمك يخسر أخوه عشانك!!
سراب: ههههههههههههههههه حسبي الله على أبليس!!
قتلها: أيوا كذا!!.. مو اول إنتي وهذاك الصوت!!... كأنك بقرة!!
سراب: ههههههههههههههههه بقرة إنتي!!... ههههههههههه....
سألتها: طيب وش رايك تجي عندي!!
سراب: امممممممم طيب أشوف أمي واردلك خبر ...يلا بروح أسالها!!
جاوبتها : طيب وأنا بستناك!!... يلا الحين سلام!!
وقفلت منها يومها وأنا طايرة من الفرح زي حالتي الحين!!....يااااارب!!....لو حاتم فيه خير ليا أجعله من نصيبي وحببه فيا!!... ولو فيه شر أصرفه عني وأصرفه من قلبي من دون ما أتوجع أو أتآذا!!... ياااااااااارب....
...........................