شبكة همس الشوق - عرض مشاركة واحدة

28 - 3 - 2014, 06:26 AM

تتمشى مع زميلتها في ساحات الجامعه ..
كانت حاطه إيدها بجيبها وكل كلمات الطفش تطلع من فمها ..
لفت عليها صاحبتها وقالت: خلاص يا بنت وقسم عرفنا انج طفشانه ..
تأففت وردت عليها: وقسم انه زهق وملل .. متى تيي الاجازه ..؟! متى اصحى الصبح وانا ما احمل هم الجامعه ..؟! ياختي متى اخلص الجامعه بكبرها ..؟!
ضحكت صاحبتها وقالت: ههههههه قلت لج شرايج نغيب اليوم انا وانتي بس رفضتي .. تستاهلي ..
صرخت بقهر وهي تقوه: آآآخخ خلاص طفشت .. حتى الجامعه ما صارت وناسه مثل قبل .. ابي اطلع كل الزهق اللي بداخلي .. ايه لقيتها .. ابي اتهاوش .. غدير دبريلي شله اتمشكل معها .. باجي كثير عالمحاضره اليايه ..
غدير بإستنكار: غيدا انتي من صجج ..؟! مو كأنو امس اخذتي تهزيئه محترمه من الدكتوره منال ..؟!
غيدا: طيب شوفيلي حل .. بأمووت ..
غدير: وشو الحل اللي ينفع معج ..؟! رحنا الكافتيريا قلتي زحمه وممله .. جلسنا بالساحه قلتي شيء روتيني ويطفش .. مشينا بأماكن نادر نييها وما زلتي في حالة الزهق اللي انتي فيها .. مالج علاج ..
شاتت غيدا علبة آيسكريم كانت قدامها وهي تقول: ابي اتهاوش .. ودي احد ياخذني للأداره واتهزأ .. ابغى اغير الروتين .. من زمان عن المشاكل .. اشتقت لويوه الدكاتره اللي دايم يشكونا .. اشتقت لورقة التعهد .. اشتقت لأوقات الاثاره ذي ..
غدير: مستحيل تتغيري .. تصرفاتج هي نفسها ..
غيدا: اذا قدرت اترك التشبيه مستحيل اقدر اترك تصرفاتي ابدا ..
تذكرت شيء فضحكت بصوت عالي لفت انظار الكل ..
غدير بإستغراب: بسم الله عليج .. شفيج فجأه قلبتي ..؟!
غيدا: هههههههههههههههههههههههههههه نسيت اقولج شيء .. ههههههههههه في البيبي كانت في لستتي وحده .. ههههههههههههه كانت دوووم ترسل لي برودكاست سب في البويات .. ههههههههههههههههههه المهم اللحين ما صارت ترسل .. هههههههههههههههههههههههههههههههههه تصرفها يضحني ..
غدير: ههههههههههه الحمد لله والشكر .. عشان هالسبب ضحكتي فجأه ..؟!
غيدا: ههههههههههههههه يا شيخه اللي عايش الموقف يقدره .. دامج مو عايشه الموقف فلا تتكلمي ههههههههه ..
غدير: هههههههه طيب اوكي اسفه .. السالفه تضحك بس انا غبيه ..
طالعت غيدا فيها بنص عين وقالت: اي نوع من التسليك هذا ..؟!
غدير: هههههههه سوري سوري .. طوفي وبس ..
تنهدت غيدا وقالت: المهم .. جم باجي على المحاضره اليايه ..؟!
طالعت غدير بساعتها وقالت: ثلث ساعه ..
غيدا: آووف ليش البريك طويل ..؟!
هزت غدير راسها بيأس وهي تقول: اول وحده بالتاريخ تتأفف من طول البريك .. بس لا يسمعج احد واللي يعافيج ..
وقفت غيدا عن المشي وهي تطالع في نقطه محدده ..
غدير بإستغراب: شفيج ..؟!
غيدا: تذكرت شيء ..
غدير: وشو ..؟!
تنهدت غيدا وقالت: يارتنا ام فيصل .. باجر راح تعمل عمليه استئصال ورم سرطاني ..
غدير: يووه الله يشفيها ان شاء الله .. هذه هي نفسها اللي كانت اسيل تعيش عندهم ..؟!
غيدا: ايه ..
غدير: الله يشفيها ويرجعها لأولادها .. هي اللي بقيت لهم من بعد موت ابوهم الله يرحمه ..
غيدا: الله يرحمه .. انا مو محزني غير حالة فارس .. عايش بحاله بالبيت .. اخته متزوجه .. واخوه مسافر من زمان .. وامه بالمستشى .. لو انا بمجانه مدري شلون بتكون نفسيتي .. بس الحمد لله عائلة عمه يوا عنده هالفتره لحد ما تطلع امه بالسلامه ..
عقدت حواجبها وهي تقول: بس هالمره سفر اخوه فيصل طول .. مو بالعاده يتأخر جذي .. وفارس كل ما سألته امي ابتسم ويقول سبب انا متأكده انه جذب .. الواحد لما يجذب اقدر اكشفه .. وجذبته كانت مره واضحه ..
هزت غدير كتفها وهي تقول: يمكن متهاوش هو واخوه وبجذي ما يعرف اخباره ..
غيدا بإستنكار: فيصل وفارس متهاوشين ..؟!! لا تمزحييين .. علاقتهم ببعض مره قويه .. ريما تتوقعي منها تكون متهاوشه معهم بس فارس مره لا ويستحيل يكون متهاوش مع فيصل .. فيصل بالمره مهتم فيه لدرجة انه مأجل الزواج لحد ما يتزوج فارس اول ..
غدير: ريال غريب .. بجذي راح يتزوج بسن متأخر ..
غيدا: بصراحه انا اشوف احسن .. يا شيخه شباب هاليومين ناقصين عقل .. اذا تزوج بدري فراح يكون بسن المراهقه وبسرعه يتغير تفكيره وعشان جذي كثر الطلاق .. اما اللي بنهاية العشرين او بداية الثلاثين فالوحده تضمن انه عاقل ومتزن .. فمثلا زوج ريما .. تزوجها بسن مبجر وشوفي اللحين شنو ساوى .. تزوج عليها ..
غدير بدهشه: احلفي ..!! وشلون ريما رضت ..؟! اللي اسمعه عنها منج يقول انها مغروره ومتكبره ومستعده تخسر كل شيء الا مكانتها بنظرها ..
هزت غيدا كتفها وهي تقول: علاقتي وياها ماهي قويه فما اعرف شنو هو موقفها بالضبط ..
غدير: يرانكم قصصهم غريبه ..
غيدا: هههههههه لا مو لهدرجه ..
غدير: على طاري الزواج .. ابسألج سؤال .. شلة سامي شفيهم مختفين .. لهم فتره طويله الكل غايبين ..
غيدا: مدري عنهم .. يمكن عندهم مشكله او عاملين مشكله ففصلتهم الاداره جم يوم .. بس تعالي .. شنو دخل الزواج فيهم عشان تقولي على طاري الزواج ..؟!
غدير: هههههههههههههههههههههههههههههههههه مو سامي كان من الممكن يكون زوجج المستقبلي ..؟!!
غيدا بإستنكار: جب بس .. بليييز لا تذكريني .. كانت ذيج من اسوأ ايامي .. انا اتزوج ساموه ..!!! من ثامن المستحيلات .. وقتها كانت نفسيتي بالقاع .. كويس ان الامر انتهى ..
غدير: هههههههههههههههه يا بنت حرام عليج .. سامي ألف من تتمناه ..
غيدا: وانا شعلي فيه وفي الألف اللي يبغوه ..؟! خليه يروح لهم ..
غدير: يعني لو حصل وياء يخطبج مره ثانيه رح ترفضي ..؟!
غيدا: طبعا بأرفض .. من اول رافضه فإيش اللي يخليني اغير رايي اللحين ..؟!
غدير: مو على اساس اول كنتي رافضه لأنج بويه .. توقعتج اللحين راح تغيري رايج ..
غيدا: لا ياقلبي ما راح اغيره .. لحد الآن شايله عليه من سالفتي ذيج القديمه تتذكريها .. انا يايه هالجامعه عشان اندمه بس لحد الآن حاسه حالي ما اخذت بحقي .. خلوني بس اشوف رقعة ويهه .. راح اراويه منو غيدا اللي كان لاعب عليها .. انا اللي هالمره راح ألعب عليه و ..... و اخذ حقي ..
غدير: الله يعينه .. عنده خصم لا ييأس ولا يتراجع ..
غيدا: شوفي شوفي شلة اسيل .. تعالي نضايقهم شوي ..
تنهدت غدير وقالت: اوكي امشي ..
اتجهوا لناحيتهم .. والشله كانوا توهم متجمعين ورايحين للكافتيريا ..
رفعت غيدا ايدها وقالت: هاي .. اخبار سنه اولى ايش ..؟!
لين: يا ليييييييل ..
كملت غيدا: ابو لمبه ..
غدير: حبينا نصبح عليكم ونقول صباح الانوار ..
وسن بإبتسامه: حلو .. غيرتم .. التشبيه بالاولاد ما كان حلو .. اللحين انتم صايرين احلى ..
قلب وجه غيدا وغدير احمر من كلامها ..
غيدا تغير الموضوع: على وين رايحه الشله الكريمه ..؟!
لين: لجهنم ..
غيدا: هههههههههههه كملي وقولي الزرقا .. اعرفها ذي سبة اسيل .. كانت دوووم تقولها لي كل ما سألتها عن حاجه ..
هزت غدير راسها وهي تقول: له له ليه انتي اسلوبج عدائي يا لين ..؟!
لين: لأنه وببساطه واضح انكم يايين تطقطقون ..
ندى: حبايبي احنا بريكنا مره قصير وما عندنا وقت .. فإسمحوا لنا بنروح ..
غيدا: اخس .. والله انكم محترمين .. اوكي اوكي سمحنا لكم تروحون ..
وبعدوا عن طريقهم ..
وسن بإبتسامه: هيه غيدا ..
غيدا: نعم ..
وسن: شرايج تصيرين صاحبتي..؟! احسج وايد طيبه مع اني ما كنت احبج اول ..
طالعت غيدا فيها بدهشه من كلامها ..
تنهدت لين وقالت في نفسها: "ما راح تتغير .. الطيبه الزايده مالها داعي يا بنت" ..
وسن: ولا تناديني وسن .. ابغاج تناديني كارلوتا زي باجي صاحباتي ..
حكت غيدا شعرها الناري وهي مو عارفه كيف تجاوب عليها ..
غدير: كارلوتا ..؟! اسم وسن احلى ..
وسن بإنزعاج: حتى اسيل تقول جذي .. لا وسن ينادوني فيه الناس العاديين .. بس اللي احبهم ابغاهم ينادوني كارلوتا ..
غيدا: تعالي انتي .. على اي اساس ضنيتي اني بوافق اصير صاحبتج ..؟!
وسن: تيب عادي .. انا باصير صاحبتج .. مافيها شيء ..
غيدا: هذا اللي كان ناقص .. احنا اعداء يا بنت ..
وسن: تيب عادي الاعداء يصيرو اصحاب ..
تنهدت غيدا .. مافي فايده ..
مسكت ايد غدير وقالت: احنا رايحين .. باي ..
وراحوا ..
لين: احلفي يا شيخه ..!! منو قالج اني ابي اصاحبهم ها ..؟!
مشيت وسن وهي تقول: انتي شدخلج .. انا قلت انو انا وحدي ابي اصير رفيجتهم ..
سارا: هههههههههههههههههه قصفت جبهتج ..
لين: بنت اللذين .. والله وصارت تعرف ترد ..
ندى: هي فعلا صاجه .. قالت لهم انها هي تبي تصير صاحبتهم .. ما قالت تعالوا معنا للشله ..
لين بقهر: خلاآاآاص ..
ليان: هههههههههههه ياللا امشوا امشوا نلحقها عالكافتيريا ..
كلها كم دقيقه وبعدها اجتمعوا بالكافتيريا ..

========================================

الساعه تسعه وتسع الصباح ..
متكيه على بلكونة غرفتها وتطالع في ساحة الفله الاماميه بهدوء ..
اخذت نفس بعدها قالت بإبتسامه: هذه هي المره الاولى اللي تروح فيها سيمو للمدرسه من دوني .. دائما نغيب مع بعض ونحضر مع بعض .. ما اتخيل اليوم الدراسي من دونها ولا هي تقدر تتخيله من دوني ..
تنهدت وقالت: انسدت نفسيتي عن كل شيء .. حتى المدرسه اللي كانت عباره عن متنفس لي .. ما عاد صار لي نفس اروح لها ابدا ..
لفت بعيونها على ساحة بيتهم .. عالبيوت اللي قدامهم ..
على الشارع وعلى محل رووديس اللي اكثر من مره راحوا له هي وسيمو ..
حياتها عباره عن فراغ من اللاشيء ..
ابوها مسجون .. لمدة سبع سنوات بتهمة الرشوه وغيرها ..
اخوها كمان مسجون .. بس بمده اقل من ابوها ..
وهي اللحين وحيده ..
ما عندها اقارب .. واهلها مو موجودين ..
كل اللي معها هم الخدم وبس ..
وفوق هذا ....
ظهر الألم في نظراتها ..
وفوق هذا خلاص ..
خلاص يستحيييل انها تصير ام ..
او تسمع كلمة ماما ..
او تحس بإحساس الامومه ..
احساس مافي بنت ما تتمناه ..
خلاص امر حملها صار من مستحيلات الحياة ..
مافي امل .. ولا ادنى امل ..
حست بدموعها الحاره تمشي على خدها ..
مسحتها بكف ايدها وهي تقول برجفه: بس .. بس .. ليه تبجين ..؟! شلون بجيتي اصلا ..؟! خلاص بس .. لا تصيري ضعيفه .. عفيه وقفي ..
جلست عالارض وضمت رجلها لصدرها وسانده ظهرها على سور البلكونه ..
شاده على شفايفها تمنع شهقتها لا تطلع ..
ليه فجأه بكت ..؟!
ما تبغى تكون ضعيفه ..
ما تبغى اي شيء يأثر عليها ..
لازم تكون قويه ..
بس كيف ..؟!
من فين تستمد قوتها ..؟!
من ابوها المسجون ..؟! او اخوها اللي مع ابوها ..؟!
او من امها الميته ..؟! او من ضروفها السيئه ..؟!
ما حولها احد تستمد القوه منه ..
مافي ..
اسندت راسها على ركبتها ..
خلاص راح تحاول تاخذ الامر بطريقه إيجابيه ..
راح تاخذ بكلام وصايف بنت عم صاحبتها سيمو ..
ابوها واخوها راح يكفروا عن ذنوبهم بذي الطريقه ..
راح يغيبوا فتره بس لما يرجعوا راح يرجعوا وهم غير عن اول ..
راح يعيشوا حياة اسريه مثل كل العوائل مو مشتتين مثل ما كانوا عايشين قبل ..
ايه .. سجنهم في صالحها وصالحهم ..
هذا تكفير عن ذنوبهم اللي اقترفوها ..
المفروض تكون نفسيتها افضل ..
المفروض يكون مزاجها بالقمممه ..
ابتسمت بهدوء ..
ليه طالعت في الامر بطريقه تشاؤميه ..؟!
تعبت نفسيتها على لا شيء ..
ابوها راح يرجع ..
واخوها راح يرجع ..
وبتتحول حياتها ميه وثمانين درجه .. وللأحسن طبعا ..
اختفت ابتسامتها تدريجيا ..
انحلت مشكلة الجانب الاول من حياتها ..
طيب والجانب الثاني ..؟!
نزلت ايدها على بطنها وشدت عليه ..
كيف تقدر تعدي هذه المشكله ..؟!
كيف تقدر تتعايش مع هذا الواقع المر ..؟!
كيف تخلي الموضوع عادي ولا كأنه مؤلم ..؟!
كيف ..؟!!
ما تقدر .. ابدا ما تقدر ..
كل ما شافت طفل قلبها ينقبض ويتألم ..
حتى اعلانات التلفزيون حقت الاطفال تدمرها داخليا ..
ضحكتهم .. ابتسامتهم .. حتى بكائهم ..
شيء مؤلم ..
لأنها مستحيل تملك طفل ..
يضحك وتضحك معاه ..
يبتسم وتبتسم معاه ..
يبكي فتحزن معاه ..
ما عاد لها اي رابط بأي طفل ..
كل اللي عليها هو مراقبتهم من بعيد ..
راح يكونوا دايم بعيد عنها ..
ما راح توصلهم ..
ولا راح توصلهم ..
الحاجر راح يظل .. طول حياتها ..
قامت من مكانها بهدوء ..
طالعت في السماء وقالت: وهو على كل شيء قدير ..
ارتجفت شفتها وهي تهمس: هو القادر .. هو الجبار ..
حطت إيدها على صدرها وقالت: اجبر قلبي .. وابعد عنه هالألم القاسي .. يا رب ..
اخذت نفس عمييييييق ..
بعدها تنهدت ودخلت لغرفتها ..
قفلت باب البلكونه وراحت للثلاجه الصغيره الموجوده في الغرفه ..
فتحتها تاخذ لها شيء بارد تشربه ..
لما طاحت عيونها على الكود رد تذكرت إياد ..
وخصوصا لما يقولها اشربيه مع الهولز ..
لينو بإستنكار: كود رد مع هولز ..!!! هالمينون عنده افكار غريبه جدا ..
ابتسمت وقالت: انسان غريب .. بكل شيء غريب .. تصرفاته وكلامه وطريجة تفكيره ..
اخذت الكود رد وبعدها فتحت الادراج حقتها تدور عن هولز كان عندها ..
راح تجرب طريقته ذي ..
بتشوف وين المتعه اللي يتكلم عنها ..

========================================