شبكة همس الشوق - عرض مشاركة واحدة

28 - 3 - 2014, 06:51 AM

حطيت الجوال على الصامت ورميته على طول يدي!!...الله يشيلك يا هارون!!...ما صدقت إني غفيت من آلام ظهري !!
ويادوب رجعت غفيت مرة ثانية ...سمعت أحد يدق على الباب...
يا الله!!...شكلي ما برتاح!!...جاوبت بتعب: ميييييين!!
جاني صوت مؤيد: أنا
أنعدلت في سدحتي وجاوبته: أدخل!!
دخل ...وكنت مظلمة الغرفة ...فتح الأنوار وقرب مني وقال بقلل: صبا إيش فيكي!!...تعبانة!!
حطيت يدي على عيوني وجاوبته: لا بس عندي صداع خفيف قلت أريح شوية....
مع إن آلام ظهري راح تموتني!!...
مؤيد بشك: متأكده!!
وقرب مني وحط يده على جبيني!!
جاوبته: أيوا متأكدة!!....
جاوبني: طيب زوجك تحت!!
جلست بسرعة وقتله بفزع: إيش!!
مؤيد" إيش إلي إيش!!....وإش فيك كذا أنفجعتي!!...
قتله بإرتباك: لا ....ما انفجعت!!...بس هوا ما أداني خبر!!....وبعدين الوقت متأخر!!
مؤيد:لا مو متأخر!!...يادوبك الساعة 8 ونص!!
سألته: هوا تحت ذحين!!....
مؤيد :إيوا تحت...!!
قتله بزعل: وليه ما قتلي من أول!!
مؤيد: صالح حرق جوالك وإنتي ما رديتي!!...ودوبه كلمني إلا وهارون جاي!!...فتحت له وطلعت عشان أناديكي!!
التفت عشان أشوف فين جوالي وأنا أقله: أيوا جوالي حاطاه على الصامت....خلاص شوية وأنزل!!
مؤيد: طيب لا تتأخري!!
وطلع من عندي....
أخذت الجوال من على الكمدينو: يا الله كانت 15 مكالمة...ست من هارون والبقية من صالح ...وفي رسالتين من هارون!!...
فتحتها وبهت لماشفت إلي مكتوب فيها...
دقيت عليه وأنا بطق من قهري!!.....هذا إيش يبغى مني!!...لا ويهدد كمان!!.... الله يشيلك يا هارون!!
أول ما جاني صوته قتله بحدة: إنت إيش جابك!!....
جاني صوته ببرود: إنتي إلي بغيتي كذا!!
قتله بعصبية: أف إنت ما تحس في أحد يجي بيوت الناس في وقت زي كذا!!
هارون: عادي!!....بيت أهل زوجتي ويستقبلوني في أي وقت!!
صرخت فيه: قتلك لا تقول زوجتي!!
هارون: طيب.... برصتي!!....
قفلت في وجهه ورميت الجوال على السرير وقمت...
ولأني مافيا حيل إني أغير البجامة إلي عليا ...ولا فيا مزاج أصلا!!...يادوب رفعت شعري بالشباصة...ونزلت له!!
في الصالة شفت مؤيد ماسك تبسي فيه عصير....وبيوديه للمجلس...أول ما شافني قال: إنهبلتي إنتي!!....بتدخليله كذا!!
جاوبته بملل: كذا كيف يعني!!...
مؤيد: بالبجامة!!....وشوفي كيف وجهك مورم !!...شكلك حتى ما غسلتيه!!
جاوبته : قتلك يا مؤيد مصدعة وما فيا حيل أغير ولا أسوي شي!!...وبعدين عادي...إيش فيها يعني!!
مؤيد: مافيها شي!!...بس شكلك معفن ويسد النفس!!
قتله بكسل : خلاص برجع ...وماراح انزل مرة ثانية...
وأنا أقول في عقلي: فكة من أشكاله...
ولفيت عشان أرجع...جاني صوته: تعالي تعالي!!.....إنتي حرة تطلعيله زي ما تبغي!!...خذي!!.....أنا رايح !!
جاوبته بسرعة: فين بتروح ما بتدخل !!
مؤيد: لا أخوياني مستنيني!!...يلا سلام...
وأعطاني تبسي العصير!!....
ناديته بسرعة: طيب في أحد جوا غيره!!
مؤيد: لا!!...يعني خذو راحتكم!!...
وأختفى من قدامي!!...
قال خذو راحتكم قال..الله ياخذه يا شيخ....
وقفت عند الباب وتنفست ثلاث مرات....وحاولت البس كل ألأقنعة إلي تطلعني باردة ومو خايفة منو....ودخلت....
كان ماسك جواله....مدري إيش يخبص فيه....أول ما حس إن في أحد دخل ....طل بكل برود ورجع كمل لعب في جواله ولا كأنه شاف أحد !!....
مالت عليه!!....ويقطع الساعة إلي عرفتها فيه....دخلت وأنا أتأفف
قربت منه وحطيت التبسي قدامة على الطاولة بطفش ....وجلست بعيد عنه ...
طال الصمت بينا ......وبعدين!!....إيش بيبات يعني!!