شبكة همس الشوق - عرض مشاركة واحدة

28 - 3 - 2014, 07:08 AM

وإلي لازم تعرفوه إنها ما عاد تفكر في هارون ....شالته من راسها...ولولا كذا ما كان وافقت علي !!
وسكت شوي وطل علينا ورجع كمل: غادة تغيرت!! وأنا ما تزوجتها غير لما عرفت وتأكدت إنها تغيرت!!.....وإنت اول واحد تفاجأت بهذا التغير!!......(قال كذا وهو يطل عليا ) إمكن ما اقتنعتو لكن انا أقتنعت وعلى هذا الأساس خطبتها من عمتي وتزوجتها!!...وما أبغى أي احد يفتح معي هذا الموضوع ...
أمي بعصبية: ليه ما نفتحه!!....تبغى تمشي إلي براسك وبس!!....خلاص سوي إلي تبغاه!!...لكن لا تجي تطلب رضاي عنك لاني ما برضى عنك....ما برضى طول ما هي بذمتك!!
يحيى بحزن:ولو قتلك يما إن غادة في بالي من زمان !!....وإني لو ما تزوجتها ما كنت راح أتزوج غيرها... ومع هذا تبغيني اطلقها !!...بطلقها!!....مافي أي شي يهمني اكثر منك ومن رضاك علي !!...لكن إعرفي إنك راح تكوني سبب تعاستي....لانه عمره ما بتكون لي زوجها غيرها!!
أمل بصدمة: إيش تبغانها نفهم من كلامك ذا!!.... إنك تحبها !!...مستحيل نصدق!!....
شفت ملامح أمي الصارمة أرتخت!!...وجلست تطل على يحيى بتأمل....
الكل كان مصدوم من كلامه...وأنا أولهم!!.... يحيى كان يحب غادة ويفكر فيها من زمان!!....معقول!!...رغم كل إلي كانت غادة تسويه!!...رغم كل الكلام إلي كان ينقال عنها!!....هذا شي ما يتصدق!!...
كسر لحظة الصموت إلي عم علينا صوت سراب العالي: أنا قلت!!...قلت إنها سحرت له!!....من مت.....
صوت ابوي بحدة:سرااااااااااااب!!...كلمة زيادة على زوجة أخوك و راح أكسر راسك فاهمة!!...ويلا على فوق!!
سراب بملل: يووووه ليه دايما تطلعني فوق!!...يعني مالي حق أقول رأ....
أبوي وهو يقوم من مكانة: إنقلعي فووووووق !!....قبل ما يجيك إلي ما يرضيك!!
أبوي كان باين عليه إنه معصب مرة!!...عشان كذا سراب قامت وطلعت فوق من غير ما تفتح فمها بولا كلمة زيادة.....
ورجع وجه كلامه لامي: وإنت يا ام هارون!!... قلك الولد إنه يبغاها ...
خلاص يا حرمة بردي قلبه !!....
أمي بتأثر:إذا يبغاها هو حر!!...الله يسعده ويهنيه ياااارب!!....