شبكة همس الشوق - عرض مشاركة واحدة

29 - 3 - 2014, 11:20 PM

كانت واقفه في المطبخ وتشتغل ..
تجهز صحون كيك وحلى .. تجهز الفناجين والملاعق وحاطه القهوه عالغاز ..
وبرى كانت بنتها جالسه مع الضيوف وتتكلم معهم ..
ابتسمت شهد وهي تقول: طيب ميار بالله قولي لأمج لا تصلح شيء .. احنا مو يوعانين ..
ميار: ههههههههههه من امتى كانت القهوه لليوعانين .. هي للتحليه مب لليوع ..
شهد: هههه ادري بس اقصد انه لا تتعب نفسها .. احنا مانبي ..
سهام: إيه صح .. بالله قولي لها لا تحرجنا ..
ميار: انتم اللي لا تحرجونا الله يسعدكم .. هذا واجب الضيافه ..
تنهدت شهد بعدها ابتسمت بهدوء ..
ميار: امممم مين منكم اخت شادي واثير ووسيم ..؟!
شهد: انا ..
ميار: اها .. كانوا دايم يسولفوا عنج .. فتشوقت اشوفج ..
سهام: هههههههه ابسألج شادي ما اذاكم ..؟!
ميار: ههههههههههه اوووه حدث ولا حرج .. كل يوم مقلب الصبح ومقلب الليل .. ولد فظييييع ههههههه ..
شهد: هههههه معليش اعتذر ان كان آذاكم جذي ولا جذي ..
ميار: لا لا بالعكس بالمره حماس .. كان يكسر لي روتيني اليومي ..
قامت وقالت: معليش بروح اساعد امي ..
سهام: الله معج ..
شهد: تحتاجي مساعده عشان ايي اساعدج ..؟!
ميار: لا لا مشكوره ما تقصرين ..
دق الجرس فأستأذنت ميار منهم وراحت تفتح ..
شهد بهمس: سهام حاسه بالإحراج ..
سهام بنفس الهمس: عادي عادي تعودي .. المهم لقيتي الدفتر ..؟!
شهد: يب .. كويس محد رتب الغرفه وإلا كان الدفتر راح فيها ..
سهام: هات هات اقرأ ..
شهد: لا ابدا .. هذا كنت اطلع كل اللي في قلبي فيه .. ومعظم الاحيان افش خلئي فيه .. ففيه اشياء محرجه ما ابي احد يقراها .. احراج ..
سهام: عادي يا بنت انا مو غريبه ..
شهد: اقولج انقلعي .. فيه سوالف محرجه بيني وبين نفسي .. لو تموتي جدامي ما اخليج تلمسينه ..
سهام: ههههههههههههه اوكي راح يي يوم واقراه وانتي ما تدري هههههه ..
شهد: الله يستر منج .. والله انج تفجعي ..
جت ميار وقالت: امممم فيه ريال برى ويبي يكلم شهد ..
اندهشوا شهد وسهام من كلامها ..
مين ممكن يكون وكيف ..؟!
سهام: يمكن يكون طارق ..؟!
شهد: لو طارق جان طلبج انتي مو انا .. وكمان هم يعرفوا طارق فما راح يقولوا ريال .. خايفه ..
سهام: عيل خليج هني انا بأطلع واشوف .. يمكن في النهايه ميرد غلط ..
راحت للباب وفتحته فأندهشت لما شافت انه راشد الشعلان ..
طالع فيها ببرود وقال: انا طلبت شهد مو ام لسان طويل ..
لسان طويل ..!!!
ايه صح تذكرت لما راحت تزور شهد مره من المرات ..
ما شاء الله عليه ذاكرته حديد ..
عقدت حواجبها وهي تقول: وشو .. تبي منو ..؟! ما سمعت ..! انت صاحي ولا شنو ..؟! وشو تبي من شهد كمان ..؟! هي ماهي ناقصه ذل اكثر من اللي عاشته .. ابعد ولا تخليها تشوف رقعة ويهك عشان لا تتذكر ايامها السودا معاك .. ابعد ..
حط راشد إيده بجيبه وقال: انتي شدخلج ..؟! انقلعي ونادي شهد ..
خافت سهام من نبرته البارده ..
هيئته بكاملها تخوف بس استجمعت شجاعتها وقالت: اسمع ان ما ابعدت راح اتصل بأخوي يتصرف معك ..
راشد: شهــــــــد ..
حست سهام بأحد ماسك إيدها من داخل ..
لفت لداخل البيت فشافت شهد تطالع فيها بإبتسامه ..
سهام: شهد ..!
شهد: خلاص .. راح اكلمه ..
سهام بصوت منخفض: مستحييييل .. وقسم بالله ان طارق راح يعصب إذا عرف ..
شهد: منو راح يعلمه ..؟!
سكتت سهام وما ردت فقالت شهد: خلاص خليني اشوف ايش عنده ..
سهام: بس هذا شيطان ماشي عالارض .. شلون تكلمينه ..؟! شهد انا خايفه عليج ..
شهد: ما راح اطير .. بأكلمه من عند الباب وبس .. ننتهي بجذي ..
طالعت فيها سهام لفتره بعدها دخلت من دون لا تقول شيء ..
طلعت شهد من الشقه وقفلت الباب وراها ..
خرجت ام ميار من المطبخ وسألت بنتها: وش فيه ..؟! منو عند الباب ..؟!
هزت ميار كتفها وهي تقول: ما اعرف .. ريال يعرف شهد وخرجت تكلمه ..
طالعت ام ميار في سهام بعدها رجعت للمطبخ ..
بودها تسأل ايش السالفه بس ما تبغى تتدخل بينهم ..
ظلت سهام جالسه عالكنبه وهي قلقانه ..
مو راضيه بس بتحترم راي بنت عمها ..
يمكن لو رفضوا يعمل مشكله اكبر ..
اما شهد فواقفه عند باب شقة ام ميار وراشد قدامها ..
واقف عند باب شقة طارق وانس سابقا ..
ظل يطالع فيها فسألته: كيف ييت هني ..؟!
سكت لفتره بعدها قال: لحقتكم بالسياره ..
شهد: وليه ..؟!
طالع فيها لفتره طويله ..
صح هي معها حق ..
ليه ..؟!!!
ليه لحقها ..؟! ايش السبب ..؟!
وقتها تصرف لا إيراديا .. الاسباب مجهوله بالنسبه له ..
ليه ..؟!
سؤال مو عارف له إجابه فكيف راح يجاوب ..
طالعت فيه شهد ولاحظت الحيره اللي على ملامحه ..
كل اللي متوقعته هو انه حس بالذنب وجاء يعتذر ..
بس لا .. تفاؤلها هذا مستحيل يكون في موقعه ..
هو دايم قاسي .. فإيش اللي يخليه يعتذر ..؟!!
إذا كان الاعتذار ماهو السبب اللي خلاه يجي هنا .. اذا وشهو السبب ..؟!
وشهو السبب ..؟!
نفس السؤال يدور في راس راشد ..
وشهو السبب اللي خلاه يلحقها لهنا ..؟!
وشهو السبب اللي خلاه يفكر فيها ..؟!
وشهو السبب اللي خلى ضميره يأنبه على قسوته عليها ..؟!
وشهو السبب اللي خلاه يندم على تصرفاته معها ..؟!
وشهو السبب ..؟!
طال الصمت بينهم ..
ضياع وشتات .. ومشاعر مبعثره من جهة راشد ..
تساؤل واستفسار .. وحيره مربكه من ناحية شهد ..
وللآن محد منهم فتح فمه ..
ظل يناظرها وهو يحس بكمية تصادمات تدور في راسه وقلبه ..
ومع كل هذا الوقت اللي ظل فيه ساكت إلا انه ما لقى اجابه لسؤالها ..
رجعت تسأله مره ثانيه: ليه انت هني ..؟! تبي شيء ..؟!
طالع في عيونها لفتره ..
هذه خدامه .. مجرد شغاله تشتغل ونهاية كل شهر تستلم راتبها ..
اذا ليـــــــش مهتم فيها ..؟؟!!!
حاس بإنزعاج شديد من نفسه ..
مو فاهم ..
لكن اللي حاس فيه طيلة الايام اللي راحت هو انه فقدها ..
صار دايم لما يرجع من الجامعه يصارخ كعادته يناديها ..
ما قدر يتعود على غيابها ..
هي خدامه ..
وطول عمره يطالع فيها على اساس انها خدامه ..
لكن ...!!
من بعد موت روان تغيرت نظرته ..
صار يناظرها كأنسانه ..
حتى وهي خدامه كانت انسانه بس نظرته للطبقه اللي اقل منه كانت نظره دونيه ..
حسسته بأهمية الحياة ..
حسسته بأن الموت ما يعني نهاية روان للأبد ..
روان موجوده ..
بقلبه .. وللأبد ..
ذكرته بربه ..
اعطته نصائح .. مع انها مجرد خدامه ..
خدامه ..!!
يالله قد ايش اللحين يحس بحقارة نفسه ..
خلت عقله يصحى من غفلته ..
اجبرته بأسلوبها الطيب انه يندم على فعايله معها ..
حسسته بحقارة ودنائة تصرفاته معها ومع غيرها ..
ندم ..
ايه بالمره ندم على اغلاطه ويبغى يصلحها ..
صح ..
خلاص لقى اجابه للسؤال ..
السبب اللي خلاه يلحقها لهنا هو انه يبغى يصلح اغلاطه ..
ايه .. هذه هي الاجابه للسؤال اللي حيره ..
طالع فيها ولأول مره من قابلها تكلم وقال: شهد .. انا ييت عشان اصحح اغلاطي ..
انصدمت شهد من كلامه ..
يصحح اغلاطه ..!!!!
هذا يعني انه فعلا ندمان ..
هذا يعني ان نظرته للناس والحياة تغيرت ..
هذا يعني انه نادم على كل تصرفاته ..
ابتسمت ابتسامه صادقه طالعه من جوف صدرها ..
هذه كانت امنيتها ..
وامنية اخته روان ..
ارتبك لما شاف ابتسامتها الجميله ..
هي من اول كذا .. بس هو اللي حطم هالابتسامه ..
وحطم صاحبة الابتسامه ..
هالبنت كل مالها تحسسه بالذنب اكثر فأكثر ..
شال نظره عنها وقال بهدوء: مدري جم لج تشتغلي عندي .. ولا ادري جم مره اهنتج وجرحتج بحجيي .. ما ادري جم مره نمتي وانتي تبجين وبجيتي وانتي تشتغلين .. كل هالاشياء ما ادري عنها لأني ما كنت مهتم .. بس اللحين تغيرت نظرتي ..
ثبت نظره بعيونها وكمل: تخيلي .. راشد الشعلان .. نار وبركان اللي كل من يعرفني يبعد عن طريجي من الخوف .. تخيلي بس اني ندمت .. على كل تصرفاتي .. انا بنفسي مصدووم .. ما توقعت اني اهتم بمشاعر احد او اتعاطف معه .. يمكن موت روان وعاني واكتشفت العالم من حولي بمنظور ثاني .. يمكن تصرفج معي واهتمامج فيني على كثر ما سويته فيج صحاني .. السبب الحقيقي ما اعرفه .. بس كل اللي اعرفه هو اني وعيت من غفلتي .. شهد .. انا طول حياتي ما همني احد .. ولا اهتم لكلام احد واللي اسويه بكيفي ولا اطالع لآراء البشر .. انا اهم شيء عندي اكون مقتنع بتصرفاتي .. واللحين انا مقتنع بتصرفي الي اسويه .. ريال يعتذر لبنت ..!! ما يهموني اللي يقولون جذي .. شهد .. انا اعتذر عن كل اللي سويته لج .. وتعرفي شنو اللي ابيه منج ..؟!
سكت لفتره بعدها كمل: السماح ..
عيونها .. مفتوحه على وسعهها من الصدمه ..
مو مصدقه ان اللي يتكلم قدامها هو راشد الشعلان ..
مو مصدقه ان اللي يتكلم قدامها هو ذاك المتسلط المستبد المتغطرس الشرس ..
لا مو مصدقه اي كلمه تسمعها ..!
اكيد يمزح ..!!
لا مستحيل .. من متى راشد يمزح ..؟!!!
اصلا ما يعرف كيف يمزح عشان تتوقع انه يمزح ..!!
هذا يعني ان الكلام اللي سمعته صحيح ..!!
هذا يعني انه فعلا يعتذر لها ..!!!
يعني هو فعلا يطلب السماح منها ..!!
كله صح ..!!!
كل اللي سمعته صح ..!!!
ما تدري ليه .. بس تحس بالعبره تخنقها ..
كانت تتمنى انه يتغير ..
كانت اخته كمان تتمنى انه يتغير ..
وفعلا .. تغير ..
تجمعت الدموع بعيونها لا إيراديا وقالت بهمس: صج ..؟!
هز راسه بإيه وهو يقول: من امتى راشد الشعلان يجذب ..؟! ايه الكلام صج ..
بعد عيونه عن نظرها وقال بعد فتره من التردد: وللأمانه .. البيت من دونج ولا شيء .. راحت روان .. فقدتها .. ما ابي افقدج انتي كمان ..
لف عليها وقال بسرعه: لا ما اقصد اني ابيج ترجعي تشتغلي خدامه .. لا .. انا فعلا ابيج ترجعي .. اذا شفتج اشوف رونتي .. وإذا فقدتج .. بأفقد انعكاس شكلها وشخصيتها فيج ..
سكت لفتره بعدها قال: ابيج تسامحيني وترجعين للقصر بس مو بصفتج خدامه .. لا .. بصفتج ...
ظل فتره يطالع في نظراتها وللأسف ما تجرأ يكمل الجمله ..
اولا لأن هالقرار توه جاه .. قرار متسرع ..
وثانيا ما يعرف ليه ما كمل الجمله ..
بس خلاص .. التكمله واضحه .. والدليل نظرات شهد المصدومه ..
ظلت على حالها تطالع في راشد بصدمه من بعد ما سمعت كلامه الاخير ..
بعدها اختفت الصدمه من ملامحها وابتسمت ..
طالعت في عيونه وقالت: انا .. خلاص سامحتك ..
اندهش من كلامها ..
سامحته ..!!
يعني خلاص كل شيء انتهى ..
ابتسم غصب عنه .. فحطمت ابتسامته بجملتها الثانيه: بس ما راح انسى .. وحتى لو سامحتك ..
راشد بصدمه: ما فهمت ..
شهد بإبتسامه فيها لمحة ألم: انا مسامحتك بس هذا ما يعني اني نسيت .. ايام الظلم .. والاهانه .. الذل والحرمان ..
لفت تطالع في جهه بعيده عن نظره وكملت: ما اقدر انسى شكلي وانا اترجاك وانت تهينني .. شكلي وانا انجرح وانت تضحك .. شكلي وانا ابجي وانت تستهزئ .. ما اقدر انسى الليالي اللي نمت فيها على بقايا دموعي .. او الايام اللي كرامتي انمسحت بالأرض من دون سبب .. ما اقدر انسى كلامك لي لما ....
زمت على شفتها تمنع شهقتها تطلع وقالت بألم: لما رجعت من عند اهلي وقلت ان امي ماتت .. ما اقدر انسى كلامك وقتها .. كلام قاسي .. ما ينسي .. اهنتني .. واهنت عايلتي جدامي .. سبتني وسبيت طريجة تربيتي .. هذا شيء مؤلم ما ينسي .. والله ما ينسي ..
اخذت نفسها وكملت: شلون انسى كل هذا ..؟! شلون انسى طريجة تعاملك معي ..؟! صايره مثل الجلبه .. ظربتني .. اهنتني .. صفقتني .. و .... عيشتني بدمار بعد ما فقدت نظري .. افقدتني إياه وخليت الكوابيس ما تفارقني ليل نهار .. وانا صاحيه ونايمه .. ضربت اخواني جدامي .. طردتهم من البيت جدامي .. هذه اشياء ما تنسي ..
ارتجف صوتها وكملت: انا يتيمه .. اتقوا الله في الايتام .. انا محتاجه .. وين يد العون ..؟! انت بشنو ساعدتني ..؟! حتى اختي شادن كانت راح تموت بسببك لولا حماية رب العباد لها .. اخواني كانوا بيتشتتون بالشوارع لولا لطف الله علينا .. امي ماتت .. نبض حياتي مات .. حياتي فاضيه بدونها .. ما تحملت موت ابوي فشلون اتحمل موت امي كمان ..؟! ابسألك انت بشنو ساعدتني ..؟! شلون وقفت بينبي في هالمصيبه ..؟!
شهقت غصب عنها ونزلت دموعها على خدها وقالت: حرام اللي عملته فيني وبأخواني .. دمرتني .. شلون تبيني انسى كل هذا ..؟! شيء محفور بصميم القلب .. ما ينسى .. راح تكون ذكرى مؤلمه مستمره معي طول حياتي فشكرا لك ..
رفعت إيدها ومسحت دموعها بشكل سريع وراشد يطالع فيها ..
ضاقت عيونه وظهر الألم فيها ..
عارف .. عارف كل هذا ..
وعارف انه شيء مستحيل ينسي ..
مستحيييل ..!!!
وش يعني ..؟!
ايه .. واضح رد شهد .. الرفض ..
ما قالتها صريحه بس هو استنتج ..
كان اناني لما ضن انه راح يملكها ..
الارواح لها مشاعر .. مو لعبه ..
مو تحفه بمزاد .. ولا مزهريه مميزه بالغرفه ..
فتح فمه بيتكلم بس قاطعته تقول بهدوء: ومع كل اللي سويته لي فأنا سامحتك .. لأني طالبه الاجر من الله .. لكن من ناحية النسيان فهذا مستحيل .. راشد .. فرحت كثييير لما تغيرت .. خلك جذي .. راح تفرح روان كثير .. راح يحبوك كل اللي بالقصر .. لا تتغير .. خلك جذي .. والله يوفقك ..
ومسكت مقبض الباب بتدخل بس وقفها راشد يقول: شهد لحضه ..
وقفت وقالت: نعم ..
سكت لفتره طويله يفكر ..
خلاص بتروح ويفقدها مثل ما راحت روان وفقدها ..
بيظل عايش لوحده .. ومع هذا ما يقدر يجبرها ..
ما بإيده شيء يسويه ..
بس هو كمان ما يبغى يفرط فيها ..
اخذ نفس عميق وبعدها اخيرا قال: إذا حصل وتقابلنا .. لا تعامليني كغريب .. الله يوفقج بحياتج ..
ظلت تطالع فيه لفتره بعدها قالت بإبتسامه: ان شاء الله ..
دخلت وقفلت الباب وراها ..
تقدم بخطوات هاديه للباب ..
ظل يطالع فيه لفتره بعدها لف واسند ظهره عالباب وتنهد تنهيده عمييييقه ومره ..
صدره من جوا يؤلمه .. بقووه ..

من الجهه الثانيه ..
جالسه وهي سانده ظهرها من الجهه الثانيه للباب ودموعها تنزل على خدها ومن بين كل شهقه وشهقه نبضة ألم ..
جت سهام عندها وقالت: شهد شفيج ..؟! شنو صار ..؟!
ابتسمت من بين دموعها وقالت: مو ندمانه .. الله يوفقه .. سامحته .. وابغى انسى بس ما اقدر .. ما حبيته .. ولا اضن اني بيوم من الايام راح احبه .. بس الشعور مؤلم .. صار وحيد .. يتيم .. ما عنده عائله .. انا عالاقل ربي رزقني بأخوان وابناء عم .. هو ماله احد .. الوحده شعورها صعب .. متألمه لحالته .. على قد ماهو قاسي بس انا متأكده انه يتألم من جوا .. يا رب .. املئ الفراغ الموجود بحياته .. يا رب وفقه ..
شهقت وبعدها بكت ..
مدت سهام إيدها وحضنت شهد وهي تقول بهدوء: خذي راحتج .. ابجي ..
تشبثت شهد فيها وكملت بكي في حضنها ..
وفصل آخر من فصول الروايه اسدل الستار عنه ..
فصل مليء بالألم .. والقسوه ..
الاستبداد والتسلط والظلم ..
فصل عاش كل من فيه حياة متعاكسه ..
ظالم ومظلوم ..
غني وفقير ..
شرس ومسالم ..
شخصيتين متناقضتين ..
ولكل منهم الآن حياته الخاصه ..
وعالم مختلف عن الآخر ..
لا شيء جديد .. كل شيء رجع لسابق عهده ..
ولكن بذرة صغيره صافيه زرعت بقلبه فتغير .. للأحسن ..
وسيتغير .. للأفضل ..