شبكة همس الشوق - عرض مشاركة واحدة

29 - 3 - 2014, 11:24 PM

جالس على الكنبه الموجوده بجناحه وبإيده الجوال يدق على احد الارقام ..
تقريبا قبل ساعه خلص من صلاة المغرب بالمسجد ورجع هنا بسرعه وبدأ يتصل بس محد يرد ..
ضغط مره ثانيه على زر الاتصال وهو يقول: وين طسيت يا وليد .. رد ولا تتهرب ..
قبل ساعتين تقريبا كلمه .. وسأله عن العلاقه اللي بين ابوه وسعد ..
وكان رد وليد هو / اذن المغرب .. السالفه بتطول وخلها بعد الصلاه احسن ..
قفل منه وراح يصلي بعدها كان فيه محاضره فقرر يسمعها واللحين لما رجع وبدأ يدق ومحد رد ..
اخر مكالمه كانت قبل ساعتين .. ما امداه ينشغل لهالدرجه ..
بدأت اعصابه تفور ..
مو من عادته يعصب بسرعه .. بس اللي صار خلاه غصب عنه يتنرفز ويعصب ..
رمى الجوال عالكنبه جنبه وهو يقول: آخخخ فعلا تهربت .. طيب ليش ..؟! شسالفه بالضبط ..؟!
ظل جالس فتره بعدها قام وهو يقول: مالي إلا اني اروح اقابل ابوه وافهم كل شيء منه ..
اخذ جواله ومفاتيحه وطلع من الغرفه ..
فتح باب الجناح .. فأنصدم من وجود وليد عند الباب ..
أءء لحضه ..!! كيف ..!!
رفع وليد إيده وقال بمرح: هاي بسام ..
بسام بصدمه: كيف ..؟! انت ...
قاطعه وليد: آي نو آي نو .. تحسبني ببريطانيا .. ايه المفروض اكون سافرت بس الليل ما نمت بدري فراحت علي الرحله هههههههههه ..
استوعب بسام السالفه فقال بحده: وليه ما ترد على الموبايل .. لي ساعه ادقدق عليك ..
وليد: هههههه غلط .. ساعه وربع ..
بسام بصدمه: وبكل برود ها ..!! انت انسان مو معقول ..
وليد: شوف بسام وربي ما كنت اقصد .. ادخل وراح اشرح لك كل شيء ..
بعد بسام عنه فدخل وليد ولحقه بسام بعد ما قفل الباب وراه ..
جلسه في الصاله وقال: ها .. ممكن تشرح لي سبب عدم الرد علي ..؟!
وليد: هههه اخس يالفصحى .. لا لا استهبل .. شوف من الاخر وبدون مقدمات .. سؤالك اللي سألتني إياه ما كان عندي له الاجابه الكامله .. رحت لعند امي وسألتها وهني فهمت الاشياء اللي ما كنت فاهمها .. وانت الله يهديك تتصل علي وانا عند امي فحطيت سايلنت .. المهم .. وانا بالسياره ياي لعندك تذكرت اتصالاتك .. فقلت راح ارد واقولك انا ياي .. بس لما شفت عدد المكالمات بطلت .. ههههه كنت متأكد انك راح تصارخ علي اول ما افتح الخط فقلت ايي بنفسي عشان وقع الصراخ يكون اهون هههههههه ..
بسام بعدم رضى: تصرف غبي .. حسبتك سحبت علي وكنت ناوي اروح لعند ابوك ..
وليد: ههههههههههه وربي كنت حاس .. المهم شخبارك وكيف الدراسه وياك ..؟!
بسام: وليد ..! عن العبط ..
وليد: ههههه اوكي اوكي آسف ..
تنهد وقال: شف بصراحه ذيج المره اللي شفت فيها بنت اختك كانت المره الاولى بحياتي اشوفها فيه ..
بسام بإستغراب: وشو ذا ..؟! لغز ..!! اول مره تشوفها عيل ليه انصدمت ..؟!
وليد: بصراحه وبدون مقدمات لأني اكره المقدمات ...
قاطعه بسام: بدون مقدمات .. هالجمله بنفسها مقدمه .. لا وتزيد عليها تقول اكره المقدمات و الخ .. ما طلبنا سيرتك وحياتك ..
ميل وليد فمه وهو يقول: لا فعلا واضح ان الاخلاق قافله عندك ..
تنهد بسام واخذ نفس وهو يقول: استغفر الله .. اعوذ بالله من الشيطان .. ياخي انت خليت فيها اخلاق .. جد نرفزني موقفك .. المهم خلاص ابدأ وخذ راحتك ..
سكت وليد لفتره بعدها قال: تعرف لما سألت امي عن الموضوع لاحظت انها متضايقه .. بعد ما حكت لي عرفت السبب .. اما ليش انصدمت لما شفت سجى هو لأنها تشبه اختك ..
فتح بسام فمه بيتكلم فقاطعه وليد يقول: اعرف بتقول متى شفت اختي .. ايه حتى اختك ماقد قابلتها ..
بسام: اها .. فهمت .. انت تطرح لغز صح ..؟! معليش سهله شوي لأنه فوق مستوى الصعوبه ..
وليد: ههههههههههههههه خطييير ردك ..
بسام: اللحين انصدمت من شكل سجى لأنها تشبه سميه اللي ما شفتها .. اعذرني الغباء مو مني .. من اللي جدامي ..
وليد: ههههه طيب حبه حبه اشرح لك ..
بسام: اوكي اشرح ..
تنهد وليد وقال: اصلا ابوي ايام زمان .. درس الجامعه برى في بريطانيا .. اختك سميه كانت زميلته في الدراسه ..
استغرب بسام من كلامه .. بصراحه اول مره يعرف ..
هو عارف ان بين عائلته وعائلة وليد صداقه بس ما كان عارف كيف تأسست هالصداقه ..
وليد: ابوي وقتها كان يدرس ثالث جامعه واختك اولى .. التقوا في احد انشطة الجامعه كانوا اثنينهم مشتركين في نفس النشاط .. وطبيعي في بلاد الغرب ان شاف واحد احد من اهل بلده يتصادق معه .. كونوا صداقه بينهم .. وللأمانه وعلى حسب كلام امي ان ابوي حب سميه بس ما خبرها لأنها كانت دايم تكلمه عن ولد صديق ابوها اسمه سعد وتحبه كثيير .. قويت الصداقه بينهم لدرجة ان حتى امه اللي هي يدتي تعرفت على امها اللي هي امك وصاروا على علاقه .. خلص ابوي من الجامعه ورجع هني وبدأ يمسك شركات يدي ويديرها .. وبإحد الصفقات عمل عقد مع شركة سعد الراهي .. كانوا شركاء في صفقه وهني بدأوا يتعرفوا على بعض .. تحصل كثير في علاقات الشراكه اللي تصير .. وقتها حكاله ابوي عن وحده كان يحبها بالجامعه وكل اللي يتمناه ان اللي تحبه يتزوج عشان تفقد الامل ويتقدم لها .. طبعا كانت سالفه عاديه بوسط السوالف وما ذكر فيها اي اسم ..
سكت شوي يرتب الكلام في مخه بعدها قال: خلصت سميه دراستها من برى .. ووقتها امك عملت حفله كبيره بمناسبة نجاحها ونادت ابوي ويدتي ويدي لها .. طبعا وقتها كان المفروض يكون فيه عشاء عمل بينه وبين سعد فإتصل واعتذر وقال انه راح يروح لحفله مهمه بالنسبه له .. شاف سميه فراح لها وبدأ يسألها عن الدراسه وهي تسولف له وتحكيله .. وقتها كانت حتى عائلة الراهي مدعوه للحفله .. ياء سعد وراح يسلم على امك ويبارك لها على نجاح بنتها .. شاف ابوي معها فبدأ يشك وما راح لها يسلم .. ظل شوي في الحفله بعدها راح بحكم اشغاله .. بعد مده ابو سعد وابو سميه قرروا يزوجون اولادهم لبعض .. اختك وافقت .. اما سعد فما اعرف رايه .. اتصلت اختك على ابوي وحكت له عن الخطبه وهي فرحانه .. طبعا انت راح تكون عارف وش بتكون ردت فعل ابوي .. مره تضايق وخلاص فقد الامل .. يدي ويدتي حبوا يطلعونه من اللي هو فيه فقالوا له راح نزوجك من بنت عمك .. ما قال رايه .. وافق اصلا قبل لا يعرف من هي من بنات عمه .. متضايق وعادي عنده يسوي اي شيء .. تزوج امي .. قالت لي امي انها ببدايات زواجها كان بارد جدا ناحيتها وواضح انه يحب وحده غيرها .. يا حياتي كان موقف امي وقتها يحزن .. المهم في نفس اليوم اللي ولدت انا فيه كان يوم زواج سعد من سميه .. قالت لي امي انها وقتها لما صحيت توقعت تلقى اول واحد جدامها هو ابوي بس ما كان مويود طيلت ذاك اليوم .. تزوجت سميه وبدأ ابوي وقتها يحاول ينساها .. مره زارها فأنصدم لما عرف انها تزوجت سعد نفسه اللي كان معاه شريك بجم صفقه .. سلم الامر لله وبدأ يهتم بأمي شوي شوي .. وبنفس الوقت كانت علاقته مع سعد اكثر من علاقة شراكه .. تقريبا صارت صداقه .. وطبعا مستحيل يزوره وما يسلم على سميه ..
بعدها سكت وقال بهدوء: هني راح يي الجزء الاصعب ..
طالع بسام فيه وهو سرحان يفكر بالكلام اللي سمعه قبل شوي ..
اول مره يدري بهالعلاقه .. ما كان متوقع هالشيء صار لان امه ماقد حكته عنها ..
طالع في وليد وقال: ايه كمل .. السؤال اللي كان يدور في بالي لحد الآن مالقيت اجابته ..
هز وليد راسه وهو يقول: مرت سنه فحملت سميه .. وبعد تسعة شهور طلعت بنتها اللي هي سجى .. واول واحد ياء يبارك لها كان ابوي .. وكثير حب سجى لأنها كانت تاخذ ملامح من امها ما عدا لون العينين اللي طلعوا على ابوها .. بعدها بسنه تقريبا سمع من امه عن حكاية ان سعد يبغى يتزوج وحده فوق سميه .. صحيح كان يحبها بس مع الايام اختفى حبه لها وصار ميرد صداقه .. بس حكاية انه يتزوج عليها وهي مو ناقصها شيء نرفزته .. واللي نرفزه اكثر لما قالت له يدتي ان سميه اكثر من مره اشتكت عن اهمال سعد لها .. وخصوصا بعد ما يابت بنت .. وتضن ان السبب هو لأنها ما يابت ولد .. حصلت مشكله كبيره .. هو مصر يتزوج وهي رافضه والطامه الاكبر ان البنت اللي يبي يتزوجها رافضه يكون جدامها وحده .. يا هي يا زوجته .. هو يمكن كان مينون بذي اللي يبي يتزوجها ففضلها على زوجته .. لا ما فضلها عبث .. الحكايه كلها انكشفت بعد ما تعبت سجى وودوها المستشفى .. ذاك الوقت ياء سعد لعند ابوي .. وهناك كانت بداية المشكله لكل شيء ..
ظل ساكت شوي ياخذ نفسه ويترك لبسام فرصه لترتيب الاحداث اللي سمعها بعدها كمل وقال: سعد صارح ابوي بأنه عارف انه كان يحب سميه .. قاله على ادله كثييره غير عن كلام سميه العفوي .. والمشكله الاكبر هي لما قال سعد وبالعربي الفصيح ان سجى ماهي بنته ..
انصدم بسام من كلامه فكمل وليد: حتى ابوي انصدم مثلك وقاله ليش تقول جذي .. فقال سعد ان السالفه واضحه .. البنت ما طلعت تشبه له فقاطعه ابوي يقول عيونها مثل عيونك وهذا اكبر دليل .. للأسف سعد ما اقتنع بهذا الدليل وقال ان حتى انت يا عبد الغني لك عرق اجنبي .. ايه .. سعد قالها بطريجه غير مباشره .. وكأنه يتهمه بأنه هو ابوه سجى الحقيقي ..
طالع في بسام اللي كل شوي تتسع عيونه اكثر مت الكم الهائل من ابصدمات اللي يسمها فقال: لسى ما صار الشيء الاقوى .. ابوي انصدم من سعد وقاله انت شلون تقول هالشيء ومن هذا الكلام .. استمر النقاش وقت طويل .. ابوي ينكر وسعد ييب ادله وفي النهايه قال سعد خلاص راح اترك سميه لك فتزوجها واشبع فيها .. ولو انك كنت تبيها كان من الافضل تقولها لي مو تخرج معها من وراي .. ابوي كانت الصدمات مخليته مو عارف كيف يفكر .. يبغى يبطل عنه هالتهمه بأي طريجه كانت .. تكلم ودافع عن نفسه بس سعد كان واقف بكل ثقه خلت ابوي يشك في نفسه .. وقف ابوي عن الكلام فقال سعد وقتها ان سميه والبنت ما يبغاهم .. وحده خانته والثانيه مو من صلبه .. بعدها ...
تنهد وقال: اتفقوا هو وياه على اتفاق .. سعد قال اني بديت اقتنع بأنك مو ابو سجى الحقيقي .. هذا يعني انها في النهاية بنت حرام وما يتشرف ان اسمه ينطبق مع اسمها .. مدري شنو هي عقلية هالانسان بالضبط ..؟! وبنفس الوقت مدري شلون ابوي بعد كان يفكر .. قاله سعد انها بنت حرام وبنت الحرام المفروض تموت من اول .. قاله ان سجى مويوده بالمستشفى حاليا .. إذا كنت تبغى تأكد لي انك ما عملت شيء مع زوجتي فتخلص منها .. تخلص من سجى .. اقتلها اذبحها المهم تموت .. ابوي انصدم .. بس في النهايه قال اوكي موافق .. ابوي وافق ..! تخيل ..!!
تنهد وبعدها كمل: بس بعدين فهمت ليش وافق .. اخذها من المستشفى وحط ورقه كاتب فيها انه خطفها ويبغى فديه ومن هالحجي عشان تعتبر الحكايه حكاية خطف .. واللحين كان من المفروض انه يقتلها .. بس ما قتلها .. لا ماهو قاسي لهالدرجه .. فيه رحمه .. فيه إيمان .. حطاها خلف احدى الاسواق .. وبعد ما ابتعد اتصل على احد دور الايتام عشان ييون ياخذوها على اساس انه فاعل خير وشافها صدفه .. يت السياره الخاصه بأحد الملاجئ بس وقتها ما لقيوا شيء .. ومن بعد هذا الحدث انقطعت علاقة ابوي بسعد وبسميه وابتعد عنهم .. وامي قالت انه لحد اللحين حاس بتأنيب الضمير .. كان قاسي شوي بتصرفه .. بس سعد حطم المقاييس بكمية القسوه اللي يملكها ..
هز راسه وهو يقول: جشع وما يملك اي رحمه .. انسان مثله ما اتوقع انه بيوم من الايام راح يتوب .. وببساطه هذه هي الحكايه كلها اللي تخص سميه وابوي .. ابوي اخطأ بالبدايه لكنه صحح غلطه في النهايه .. لو رفض وقتها كان من الممكن تكون سجى ماتت على يد واحد ثاني .. وهذا سبب موافقته .. قصه مو متوقعه .. وبشر مختلفين عن بقية البشر .. ادري انك انصدمت .. انا كمان انصدم مع انه مالي علاقه بسجى .. اما انت فخالها ..
بسام بعدم تصديق: هيه انت شنو قاعد تقول ..؟! ايش هالخرابيط اللي اسمعها ..؟! مستحيل ..
لف بنظره عالمكان .. يحاول يستوعب الكﻼم اللي سمعه ..
ما توقع ان السالفه راح توصل الى هذا المنحنى ..
هذا شيء .. لا .. لا ابدا مو معقول ..
احتدت نظراته وهو يقول: لأي مستوى من الحقاره وصل له هذا السعد ..؟! عقليته ذي مصنوعه من شنو ..؟! يشك بزوجته ..!! بأختي ..!!! يستهبل حظرته ..!!
ضغط على اسنانه وهو يقول: هذا خبل ولا عبيط ..؟! اختي تخونه ..!! على اي اساس فسر ذا الشيء ..؟! عشانهم كانوا يحبوا بعض زمان ..؟! هذا ميرد شك .. قصص مثل جذي تحصل كثير .. ما يعرف شيء اسمه dna ..؟! دام هو شكاك جان حلل الجينات وعرف الصج من الغلط .. بس لا .. هو انسان مب طبيعي .. اصلا كلمة انسان خساره فيه .. وقسم خساره ..
حس دمه يفور وكمل: سجى تشتت وضاعت وتحطمت انسانيتها بسبب شيء تافه مثل جذي .. اختي تحطمت .. وانينت .. ودشت اكثر من مستشفى ووصلت لدرجة انها تقتل وكله بسبب عبط مثل جذي ..! هالحيوان شنو راح يسوي لما يقابل ربه ..؟! يقول زوجتي خانتني ..؟!!! شتت وحطم ودمر حياة بنته وزوجته عشان سبب تافه ..!!! سبب مو متأكد منه ..!! سبب مو معقول ..!! وقسم بالله اني ما اتركه يتهنى هالواطي النجس ..
وليد: بسام إهدأ .. الموضوع ...
قاطعه بسام بعصبيه: اهدأ ..!! تستهبل انت ..؟!! هالجبان الواطي يشكك بأخلاق اختي .. هالحيوان دمر حياة اختي وبنتها .. حتى امي تدمرت حياتها بسببه .. هذا السبب الرئيسي لكل المصايب اللي صارت لنا .. وصارت لغيرنا .. ما انوقع انه فيه مجرم اشد منه .. شخص يستحق الموت والكل يتمنى انه يموت اليوم قبل باجر وانا اولهم ..
وليد: خلاص بسام .. ما اعرفك عصبي لهالدرجه .. من حقك تنفعل بس وش يفيدك الانفعال .. اذكر ربك .. تعوذ من الشيطان .. قول اعوذ بالله من الشيطان الرجيم ..
طالع بسام فيه فتره بعدها تنهد وهو يقول: اعوذ بالله من الشيطان الرجيم .. لا حول ولا قوة إلا بالله ..
وليد: ايه .. خلك محافظ على هدوئك .. ما راح تستفيد من الانفعال ..
بسام: استغفر الله .. بس ياخي هالانسان قذر بمعنى الكلمه .. كنت من البدايه حاس بأن في القصه شيء غلط بس ما توقعت ان الامور اقسى من جذي .. ما توقعت انها راح توصل لهالمواصيل .. يكره بنته وما يبيها تعيش .. بس مو لدرجة يأمر بقتلها .. مو لدرجة يشكك بأخلاق اختي .. مو للدرجه ذي ..
وليد: ما نقول إلا إنا لله وإنا إليه راجعون .. كل انسان وله عذابه .. ان الله يمهل ولا يهمل .. ما راح يهمل اي عاصي او مذنب .. الكل راح يتعاقب على كل ما عمله من ذنوب ..
هز بسام راسه وهو مؤمن بالله .. بس لسى في صدره شيء .. كمية حقد وكره ..
شعور الكره والحقد موجود فطره ولا يمكن تغيرها ..
قام فقال وليد: على وين ..؟!
بسام: لسعد ..
واتجه للباب فقال وليد: بس انت ما تعرف مكانه .. على حسب علمي فهو هارب من زمان ..
بسام: راح اطلعه وين ما كان .. اذا خرجت قفل الباب وراك ..
وليد: هيه لحضه ..
وانقفل الباب ..
تنهد وليد بعدها قام وطلع من الجناح وقفل الباب وراه ..

========================================

وامام العماره اللي ساكنه فيها ام ميار وبنتها ..
عمارة طارق وانس سابقا ..
وقف سيارته ونزل منها واتجه للعماره ..
طالع في ساعته وقال: صارت الساعه سبع .. تأخر وايد .. الله يستر ويبعد عنهم كل شر ..
دخل للمصعد وتكى ظهره عالجدار يتأمل ديكور المصعد ..
يا كثر ما دخل هالمصعد .. اكثر من ألف مره وبصراحه هذه المره الاولى اللي ينتبه فيها للديكور ..
ابتسم وقال: هههههههه والله اني فاهي .. بس بصراحه التصميم جميل ..
ميل فمه وكمل: طبيعي يكون جميل .. هالسلمان صاحب العماره يلهف الفلوس لهف .. الله يعين المستأجرين عليه ..
انفتح المصعد واتجه لشقة ام ميار ودق الجرس ..
سمع صوت ميار تقول: منو ..؟!
ميل فمه وهو يقول في نفسه: "من متى هالحرص ..؟! كانت تفتح على طول" ..
تنهد وقال: انا ..
ابتسمت ميار لأنها عرفته وقالت بعبط: يعني منو ..؟! شنو يعني انا ..؟!
هز راسه وهو يقول: ميار عن العبط افتحي ابي امج ..
ميار: اممم ما اقدر .. بابا وماما علمونا انه مو اي واحد يقول انا افتح له الباب .. يمكن يكون حرامي .. مجرم .. قول اسمك وافتح الباب ..
انزعج وقال: انا انس .. ها لسى ما عرفتيني يا ويه البوم ..؟!
فتحت ميار وهي تضحك فقال: نادى امج ..
ميار: ههههههههههه رفعت لك ضغطك صح ..؟! طيب دقيقه واناديها ..
دخلت لداخل وبعد اقل من دقيقه طلعت ام ميار وقالت: يا هلا وسهلا .. كيفك يابني .. تفضل ادخل ..
انس: اهلين يا خاله .. انا الحمد لله تمام .. كيفج انتي وايش اخبارج ..؟!
ام ميار: الحمد لله بخير وربنا منعم علينا من فضله .. ادخل ليه واقف عند الباب ..
انس: مشكوره يا خاله بس انا ياي عشان شغله وحده وراجع .. طارق كلمني ايي اشوف شنو محتايين لأنه ما امداه يسألكم اليوم الظهر .. كان مستعيل فيقول انه اكيد اخته وبنت عمه خلوكم تصرفوا فوق طاقتكم .. فهو ما يبغى يحملج فوق طاقتج وطلب مني اشوف وش طلباتكم وكمان اشتري لكم العشاء لأنه راح يطول اكثر ..
هزت ام ميار راسها وهي تقول: لا الله يجزاه ألف خير .. الحمد لله امورنا ماشيه تمام ومو ناقصنا شيء .. والعشاء انا خلاص عملت حسابه .. وترى كلها بنتين .. يعني هالشيء ما راح يخليني مثلا اصرف كثيير .. الله يهديه ما يعرف شيء اسمه اليار قبل الدار ..
انس: طيب يا خاله عالاقل العشاء اروح اييبه لكم .. اسهل من انج تتعبي حالج ..
ام ميار: لا الله يجزاك الينه .. مشكور ما قصرت ..
تنهد انس وقال: طيب انا رايح .. محتايين شيء ..؟!
ام ميار: لا مشكور .. المهم انتبه للطريج ..
انس: تسلمين يا خاله .. ياللا استأذن .. مع السلامه ..
ام ميار: الله معك ..
اتجه انس للمصعد ونزل لتحت ..
خرج من العماره واتجه لسيارته ..
كان بجنب العماره مكتبه .. او قرطاسيه بمعنى ادق ..
في هذا الوقت خرج منه شاب شايل في إيده كيس مليان من الحاجيات اللي اشتراها ..
كم دفتر + دباسه واقلام + حبر للطابعه ومجموعة اوراق 4a ..
لمح انس وهو رايح للسياره فنادى عليه يقول: اوووه انــــــــس ..
لف انس عاليمين مستغرب فأندهش لما شاف ذاك الشاب اللي عند باب القرطاسيه ..
جاء الشاب عنده وهو يقول: اخبارك انوسه ..؟! من زمان عنك ..
ميل انس فمه وهو يقول: انت شفيك صرت تطلع لي فجأه ..؟! بديت اشك انك تراقبني ..
الشاب اللي هو اكيد الدكتور راكان: ههههههههههههههههههه لا ياخي وقسم صدفه .. المهم اخبارك ..؟!
طلع مفاتيحه وهو يقول: زفت ..
د.راكان: افا .. ليه ..؟! لا يكون السبب انك شفت ويهي ..؟!
انس: ما شاء الله عليك فطين ..
د.راكان: ههههههههههه المهم انت شنو كنت تساوي هني ..؟!
فتح انس باب السياره وهو يقول: لقافتك مستحيل تبطلها ..
ولما كان بيدخل قال د.راكان: انس لحضه ابغى احاجيك بشيء ..
طالع انس فيه شوي بعدها قال: طيب اركب ..
ابتسم د.راكان وركب معاه بالسياره ..
حط الاغراض ورى فقال انس وهو يشغل السياره: وش هذه ..؟!
د.راكان: اغراض .. احتاجها دام اني دكتور جامعه .. المهم ليش انت هني ..؟!
تنهد انس وقال: كنت ازور ياري .. عندك سؤال ثاني ..؟!
د.راكان: ههههههههههه لا .. بس تصدق .. ودي انهم يحطوني بجامعتك مثل المره اللي راحت .. والله وناسه ..
انس: بالنسبه لك ..
د.راكان: المهم بغيت اسألك .. كيف عمي وايش اخر اخبار خطوبة اختك ..؟!
انس: الحمد لله ابوي بخير .. واختي راح تعمل الملكه بعد الاختبارات ..
د.راكان: الله يوفقها ..
انس: آمين ..
طالع انس في راكان نظره خاطفه بعدها سأله: وانت .. متى راح تتزوج ..؟!
ابتسم الدكتور راكان وقال: زوجتي مويوده ..
اندهش انس وقال: صج ..؟! وينها ..؟!
د.راكان بهدوء: عند ربها ..
اختفت دهشة انس .. لحد اللحين راكان ما تغير ..
كان يضن انه راح يتزوج بس ...
ظل ساكت لفتره بعدها قال: راكان .. اسمع ..
طالع في الطريق وقال: من كلامك اخر مره عرفت انك سمعتني ذاك اليوم في المستشفى .. ما توقعت انك وقتها كنت صاحي .. ايه .. ذاك الكلام صج .. انا اعتذر عن معاملتي لك .. بس لأني وقتها كنت محتاج احد افرغ ألمي فيه .. تصرف غلط .. بس وقتها ما كنت عارف الصح من الغلط .. اعذرني ..
طالع في راكان وكمل: انا عارف شكثر انت تحب ايمان .. ما اتةقع انه احد بالعالم يحب قد ما انت تحب .. بس هذا ما يعني انك تحرم نفسك من الزواج عشانها .. ما راح تكون راضيه بهذا التصرف .. راكان انت لازم تتزوج وتشوف حياتك ..
د.راكان: اوووه انوسه مهتم فيني بزياده ..
انس: انا جاد .. وكمان لا عاد تقول لي انوسه لا افقع ويهك ..
د.راكان: هههههههههههه اوكي اوكي .. بس ياخي خلاص اغسل ايدك مني .. انا من بعد إيمان لا يمكن اناظر لوحده ثانيه ..
انس: بس هذا غلط .. الزواج نصف الدين .. ما راح يكمل دينك إلا إذا تزوجت ..
د.راكان: طيب وش حكم الظلم ..؟!
ما فهم انس مقصد سؤاله فقال: الظلم ظلمات يوم القيامه .. بس ليش تسأل ..؟!
د.راكان: عاقبة الظلم وخيمه .. وعشان جذي ما ابي اتزوج .. لأنه محد بقلبي غير إيمان وراح اظلم البنت اللي راح اتزوجها معاي .. انا جذي مرتاح ..
انس: راكان انت لازم تنساها .. لا مو تنساها .. بس اعتبرها ذكرى جميله بحياتك .. ذكرى ما تنسي بس في النهايه اسمها ذكرى .. لا توقف حياتك على ذكرى بس .. منو ما يتمنى يكون ابو ..؟! يكون له ولد يشيل اسمه ..؟! يكون له عائله ..؟! بنات واولاد واحفاد ..؟! راكان لا يكون ناوي تظل جذي طول عمرك ..؟! لو كبرت منو راح يهتم فيك ..؟! ابوك بيموت وامك بتموت واخوانك يا دوبهم يشيلوا نفسهم .. تبغى تكون نهايتك دار العجزه ..؟!
د.راكان بإستنكار: وش هالطاري اللي يخوف ..؟! لا ما توصل لهالدرجه ..
انس: إلا توصل واكبر .. ياخي بتظل جذي طول حياتك ..؟! مستحيل تحس بطعم الحياة .. ماكو احد تهتم فيهم .. تسعدهم .. تسأل عنهم .. مالك عائله .. المال والبنون زينة الحياة الدنيا .. الحياة بدونهم مالها طعم ..
د.راكان: هههههه احسك مستعيل عالزواج صح ..؟!
انس بعصبيه: راكان وبعدين معاك ..؟!
تنهد الدكتور راكان وقال: انس انا عارف ان هذا غلط .. بس غصب عني .. ما اقدر انساها .. او انسى ضحكتها .. ابتسامتها .. انزعاجها .. مستحيل القى وحده مثلها .. مثلها بكل شيء وحتى الشكل ..
انس: تستهبل انت ..؟! ماكو احد يشبه إيمان ولا اشوفك تتمنى تقابل وحده مثلها بكل شيء .. ايمان غير عن كل البنات ..
د.راكان: ههههههههه انت غريب ..
تنهد انس وقال: المهم انت لازم تتزوج .. قطر مليانه بنات .. وكل وحده لها جوانب حلوه من شخصيتها .. شوف اللي تناسبك وتزوجها .. سامع .. لازم تتزوج ..؟! باجر لا ييت تتزوج محد بيقبل فيك .. بيقولوا انقلع يالشايب ..
د.راكان: هههههههههههه انس اطلع برى ..
انس: ياخي من صج اتحجى .. جذي راح يقولون لك .. صدقني فيه ألف من تتمناك .. ربي منعم عليك بكل شيء .. رزق ومظهر واسلوب .. لازم تشكر ربك وتتزوج ..
د.راكان: الحمد لله والشكر لله .. بس من ناحية اني اتزوج فأنسى لأني خلاص عفت الزواج من بعد ايمو ..
انس: ياخي وشو هالحجي اللي ما يدش المخ ..؟! انت تبغى تعذب إيمان وهي بقبرها ..؟! ما راح ترتاح إذا ما كنت مرتاح بحياتك ..
د.راكان بإبتسامه: ومنو قالك اني مو مرتاح ..؟! الشيء الوحيد اللي مضايقني هو الموبايل اللي اعطتني إياه .. احترق وطار .. غير جذي فأنا الحمد لله مرتاح ..
انس: انا ما كنت اقصد جذي .. هي ما راح ترضى تشوفك موقف مستقبلك عشانها .. مضايق امك وابوك ورافض الزواج عشانها .. ما راح ترتاح صدقني ..
تنهد الدكتور راكان وقال: فعلا .. امي وابوي كثيير يكلموني بهذا الموضوع .. بس مو بإيدي .. مو قادر اتقبل الفكره .. اتقبل اني اكون مع وحده غير ايمو .. احب وحده غير إيمو .. اعيش مع وحده غير ايمو .. ييني اطفال من وحده غير ايمو .. مو قادر اتقبل هالشيء .. احبها .. ولا يمكن تتخيل حياتي من دونها ..
انس: حتى هي تحبك .. طيب ابسألك .. لو انت اللي مت في ذاك الوقت .. وهي من بعدك صلحت سواتك راح ترضى ..؟! راح ترضى تشوفها موقفه حياتها عشانك ..؟! راح ترضى تشوفها مضايقه امها وابوها عشانك ..؟! تنحرم من انها تكون ام عشانك ..؟! لا .. انا متأكد انك ما راح ترضى .. نفس الحكايه تنطبق عليها .. ما راح ترضى ..
طالع الدكتور راكان فيه لفتره بعدها طالع في الشارع من ورى الشباك وقال بهدوء: بس صعب .. صعب احب لي وحده غيرها .. ما اتخيل نفسي اتزوج بوحده غيرها .. احس اني راح اظلمها كثيير .. والله صعب ..
انس: الله يرحمها .. محد منا قادر يتخيل حياته بدونها .. بس هذا اللي صار ..
ابتسم وكمل: راح تفرح ان شافتنا مبسوطين بحياتنا .. راح تفرح لك كثير لو شافت تزوجت ويبت لك بنوته حلوه وسميتها إيمان .. صدقني راح تكون هذه اكبر هديه لها ..
ابتسم الدكتور راكان لفتره بعدها قال: يا شيخ انقلع دخلت في راسي تخيلات سعيده ههههههههه ..
انس: يعني خلاص وافقت ..؟!
هز د.راكان راسه وهو يقول: اقولك صعب ..
انس: بس مو مستحيل ..
د.راكان: اقلها خله يمر وقت على موتها .. يمكن وقتها اغير رايي ..
انس: الى متى ..؟! لها جم سنه من ماتت .. راكان انت تماطل من غير فايده .. تخيل لا قدر الله مات ابوك قبل لا تتحقق امنيته ويشوف ابنك .. وقتها ما تنفع كلمة ياليت .. ولا الندم راح يرجع احد ..
د.راكان: الله يحفظه ويطول بعمره .. بس ياخي متردد ..
طالع في انس وقال: انسى السالفه .. لا مو قادر .. وقد وعدت نفسي قبل جذي اني ما اطالع في غيرها .. وقد حلفت لها لما خطبتها انها هي الوحيده اللي بتسكن بقلبي وبس ..
انس: ربي عز وجل لطيف في كل شيء .. دامك حلفت وتبي تتراجع فعندك كفارة .. تصدق على ستين مسجين .. وبعدها توكل على ربك وتزوج ..
د.راكان ينهي النقاش: اسمع .. خلاص اوكي راح افكر في الامر كثير .. وراح اترك لك مسألة الاختيار .. إذا يبت لي بنت ما اقدر اعيب اي شيء فيها فخلاص راح اتزوج .. وصدقني ما راح تلقى مثل إيمان .. بس يرب حظك .. وإذا ربي كتب لي اني اتزوج فراح اتزوج ..
ابتسم انس وقال: اوكي .. راح اشوف ..
د.راكان: ووعد مني اذا ياني ولد راح اسميه انوسه على اسمك ههههههههه ..
وقف انس السياره فجأه وقال: جم مره قلت لك لا تناديني بذا الدلع البايخ ..
د.راكان: هههههههههه آسف آسف انوستي .. اخر مره ههههههه ..
ضغط انس الزر اللي جنبه وانفتح الباب اللي من جهة د.راكان وقال: خلاص انزل ..
د.راكان بدهشه مصطنعه: افا .. اهون عليك يا النسيب ..؟!!!
انس: ايه تهون ونص .. عشان تبطل تناديني بذا الاسم .. انوسه وانوستي .. ياخي روح موت ..
د.راكان: هههههههههههه خلاص امزح امزح معك .. حرك ووصلني عالاقل للمجان اللي كنت فيه عشان سيارتي ..
حرك انس السياره وهو يقول: المفروض اخلي التاكسي يوصلك ..
د.راكان: هههههههه تخيل دكتور جامعه ويتشحطط بالتكاسي ..!!
انس: اصلا من عرفتك واحسك مشحطط في كل شيء ..
د.راكان: هههههههههه افا بس ..
اتجه انس لعند العماره عشان سيارة الدكتور راكان الموقفه هناك ..
اما الدكتور راكان فلف وجهه ناحية الشباك بسرحان ..
يتزوج ..!! وبوحده غير إيمان ..!!!
شيء مو عارف ان كان راح يتقبله او لا ..
لكن .. ربك يعين ..